အခန်း ၉၇၄

အခန်း (၉၇၄) - ခန္ဓာပေါင်းစည်းခြင်းအဆင့် ရုပ်ခန္ဓာသို့ တက်လှမ်းခြင်း၊ နဂါးဆင်ခန္ဓာကိုယ်နှင့် သတ္တမအဆင့် ဝိညာဉ်ဆေးပင် ဖီးနစ်သွေးပန်းကို ရရှိခြင်း (၄)

ဝုန်း... ဝုန်း... ဝုန်း...

သွေးများ စီးကျနေပြီး ကြမ်းကြုတ်သောမျက်နှာထား၊ ဒေါသတကြီး သတ်ဖြတ်လိုစိတ်များ ပြည့်နှက်နေသော ထျန်းဖန်မျိုးနွယ်စုမှ ခန္ဓာပေါင်းစည်းခြင်းအဆင့် ကျင့်ကြံသူများ၏ တစ်ကိုယ်လုံးတွင် အနီရဲရဲ မီးတောက်များ ရုတ်တရက် ထွက်ပေါ်လာကာ တောက်လောင်လာကြလေသည်။ ဤအချိန်၌ သွေးတစ်စက်စီတိုင်းက လောင်စာများအဖြစ် ပြောင်းလဲသွားပြီး ရေနံဆီများကဲ့သို့ အပြင်းအထန် တောက်လောင်နေသည့်အလား ထင်မှတ်ရပေသည်။

"ကျောက်စိမ်းယုန်မျိုးနွယ်စု... မင်းတို့ ငါတို့ကို ဘာတွေလုပ်လိုက်တာလဲ..."

ထျန်းဖန်မျိုးနွယ်စုမှ ခန္ဓာပေါင်းစည်းခြင်းအဆင့် ကျင့်ကြံသူများစွာ၏ မျက်နှာပေါ်တွင် ထိတ်လန့်ကြောက်ရွံ့မှုများ ပေါ်လွင်သွားလေသည်။ ဤအခိုက်အတန့်တွင် သေဆုံးခြင်းအန္တရာယ် နီးကပ်လာကြောင်းကို သူတို့ ခံစားလိုက်ရပြီး ခန္ဓာကိုယ်မှ ကြောက်မက်ဖွယ်ကောင်းသော နာကျင်မှုများ ထွက်ပေါ်လာခဲ့၏။

အမည်မသိ အဆိပ်တစ်မျိုးက သူတို့၏ ခန္ဓာကိုယ်ကို တိုက်စားသွားသကဲ့သို့ ခန္ဓာကိုယ်အတွင်းသို့ ထူးဆန်းသော မီးတောက်များ ဝင်ရောက်လာကာ ခန္ဓာပေါင်းစည်းခြင်းအဆင့်၏ ခိုင်မာသော ကိုယ်ခန္ဓာဖြင့်ပင် လုံးဝ မခုခံနိုင်တော့ချေ။

ဤသည်မှာ 'ရွှေအလင်းအဆိပ်တစ်ထောင်ကူ' မှ ပိုင်ဆိုင်သော သတ္တမအဆင့် အဆိပ်ဖြစ်သည့် 'ကောင်းကင်မီးလောင်ကျွမ်းခြင်း' ပင် ဖြစ်လေသည်။

ဤသည်မှာ ငရဲမိစ္ဆာကမ္ဘာမှ လာသော ကြောက်မက်ဖွယ် သတ္တမအဆင့် အဆိပ်ဖြစ်ပြီး ခန္ဓာပေါင်းစည်းခြင်းအဆင့် ကောင်းကင်မိစ္ဆာများပင်လျှင် ကိုယ်နှင့်မကွာ သယ်ဆောင်ထားရကြောင်း သိထားရမည် ဖြစ်၏။ သတ္တမအဆင့် အဆိပ်များစွာထဲတွင် 'ကောင်းကင်မီးလောင်ကျွမ်းခြင်း' သည် ထိပ်ဆုံးဆယ်ခုစာရင်းဝင် ဖြစ်ပေသည်။

ရန်သူများသည် 'ကောင်းကင်မီးလောင်ကျွမ်းခြင်း' အဆိပ်မိသွားပါက အသွေးအသားခန္ဓာကိုယ်သာမက မူလဝိညာဉ်ပါ အဆိပ်ကူးစက်ခံရမည်ဖြစ်ပြီး နောက်ဆုံးတွင် ပြာကျသည်အထိ လောင်ကျွမ်းခံရမည် ဖြစ်သည်။

ထို့အပြင် အဆိပ်ပျံ့နှံ့သည့် အမြန်နှုန်းမှာလည်း အလွန်မြန်ဆန်လှပေသည်။

ဖြေဆေး မရှာတွေ့ခင်မှာပင် အဆိပ်လောင်ကျွမ်းခံရကာ သေဆုံးပြီး ပြာအဖြစ် ပြောင်းလဲသွားလေ့ရှိ၏။

"အဆိပ်ခတ်တာလား... မင်းတို့လို ခွေးကောင်တွေက ငါတို့ကို အဆိပ်ခတ်ရဲတယ်ပေါ့... အရှက်မရှိတဲ့ ကျောက်စိမ်းယုန်မျိုးနွယ်စု..."

"မင်းတို့ကို ငါသတ်ပစ်မယ်..."

ထျန်းဖန်မျိုးနွယ်စုမှ ခန္ဓာပေါင်းစည်းခြင်းအဆင့် ကျင့်ကြံသူတစ်ဦးသည် ထိန်းချုပ်၍မရနိုင်အောင် ဒေါသထွက်ကာ ဟိန်းဟောက်လိုက်လေသည်။

သို့သော် သူသည် ခြေတစ်လှမ်းလှမ်းလိုက်သည်နှင့် သူ၏ ကိုယ်ခန္ဓာတစ်ခုလုံးသည် မီးရှူးတိုင်အဖြစ်သို့ ပြောင်းလဲသွားပြီး ဆဲလ်တိုင်းကို မီးတောက်များက လောင်ကျွမ်းသွားခဲ့၏။

ထို့နောက် နောက်တစ်စက္ကန့်တွင် ပြာဖြစ်သွားခဲ့လေသည်။ လေပြင်းတစ်ချက် တိုက်ခတ်လိုက်သည်နှင့် ဤလောကမှ ပျောက်ကွယ်သွားတော့သည်။

ထင်ရှားလှသည်မှာ သူ၏ ပြင်းထန်သော လှုပ်ရှားမှုက သတ္တမအဆင့် အဆိပ်ဖြစ်သော 'ကောင်းကင်မီးလောင်ကျွမ်းခြင်း' ၏ ပျံ့နှံ့မှုကို ပိုမိုဆိုးရွားစေပြီး ပို၍မြန်မြန် သေဆုံးသွားစေခြင်းပင် ဖြစ်၏။

"အရှက်မရှိတဲ့ ကျောက်စိမ်းယုန်မျိုးနွယ်စု... မင်းတို့တွေ ကြီးမားတဲ့ ဘေးဆိုးကြီးကို ဖန်တီးလိုက်ပြီပဲ..."

"ငါတို့ကို သတ်လိုက်ရင် ဘယ်လောက် ကြီးမားတဲ့ပြစ်မှုကို ကျူးလွန်မိမယ်ဆိုတာ သိလား... ကျောက်စိမ်းယုန်မျိုးနွယ်စုတစ်ခုလုံးက ငါတို့ ထျန်းဖန်မျိုးနွယ်စုရဲ့ ဒေါသကို ဆွဲဆောင်မိပြီး မျိုးနွယ်စုတစ်ခုလုံး မျိုးပြုတ်သွားနိုင်တယ်ဆိုတာ သိရဲ့လား..."

"ဖြေဆေးကို အခုချက်ချင်း ပေးစမ်း... မဟုတ်ရင်တော့ ထျန်းဖန်မျိုးနွယ်စုနဲ့ ကျောက်စိမ်းယုန်မျိုးနွယ်စုက တစ်ဖက်သေတဲ့အထိ တိုက်ခိုက်ရလိမ့်မယ်..."

ထျန်းဖန်မျိုးနွယ်စုမှ နှောင်းပိုင်း ခန္ဓာပေါင်းစည်းခြင်းအဆင့် ကျင့်ကြံသူ ဖန်ယုံကန်းသည် အပြင်ပန်းတွင် ကြမ်းတမ်းဟန်ပြနေသော်လည်း အတွင်းစိတ်ထဲ၌မူ ကြောက်ရွံ့နေခဲ့ချေပြီ။

သူ၏ နက်ရှိုင်းသော ခန္ဓာပေါင်းစည်းခြင်းအဆင့် ကျင့်ကြံမှုစွမ်းအားဖြင့် အနည်းငယ် ပို၍ အချိန်ကြာကြာ တောင့်ခံထားနိုင်လေသည်။

သို့ရာတွင် အချိန်အကြာကြီးတော့ တောင့်ခံထားနိုင်မည် မဟုတ်ပေ။ အကယ်၍ ဖြေဆေးသာ မရှိပါက သူလည်း သေချာပေါက် သေဆုံးရ‌ပေမည်။

ယခုအခါတွင် သူသည် အူများစိမ်းသွားသည်အထိ အလွန်အမင်း နောင်တရနေခဲ့ချေပြီ။

ကျောက်စိမ်းယုန်မျိုးနွယ်စုသည် ဤမျှ ကြောက်စရာကောင်းကြောင်းသာ စောစောကတည်းက သိထားခဲ့ပါလျှင် သူသည် လာရောက်ရန်စရန် လုံးဝရဲဝံ့မည် မဟုတ်ပေ။

ဝမ်းနည်းစရာကောင်းသည်မှာ ယခုအချိန်တွင် ဘာပြောပြော နောက်ကျသွားခဲ့ပြီ မဟုတ်ပါလော။

"အဆိပ်ဟုတ်လား... ဘာအဆိပ်လဲ..."

ကျောက်စိမ်းယုန်မျိုးနွယ်စုမှ အမျိုးသမီးကျင့်ကြံသူများစွာ၏ မျက်နှာတွင် ရှုပ်ထွေးမှုများ ပြည့်နှက်သွားပြီး ဤထျန်းဖန်မျိုးနွယ်စု ခန္ဓာပေါင်းစည်းခြင်းအဆင့် ကျင့်ကြံသူများ ဘာပြောနေကြသည်ကို လုံးဝ နားမလည်နိုင်ကြချေ။

အဘယ်ကြောင့်ဆိုသော် သူတို့အနေဖြင့် လုံးဝ အဆိပ်မခတ်ခဲ့သောကြောင့်ပင် ဖြစ်၏။

ဤထျန်းဖန်မျိုးနွယ်စုမှ ခန္ဓာပေါင်းစည်းခြင်းအဆင့် ကျင့်ကြံသူအုပ်စု၏ အခြေအနေက အတိအကျ မည်သို့ဖြစ်နေကြောင်းကိုလည်း သူတို့ မသိရှိကြပေ။

သူတို့အားလုံးသည် ခေါင်းထဲတွင် မြူများဖုံးလွှမ်းနေသကဲ့သို့ ရှုပ်ထွေးသွားကြပြီး မူလနေရာတွင်ပင် ရပ်ကာ အဆိပ်တက်၍ သေဆုံးသွားမည့် ထျန်းဖန်မျိုးနွယ်စု ကျင့်ကြံသူအုပ်စုကို စူးစမ်းလိုစိတ်ဖြင့် စောင့်ကြည့်နေလိုက်ကြသည်။

"မင်းတို့..."

"ငါအရမ်းမုန်းတယ်..."

ဤမြင်ကွင်းကို မြင်လိုက်ရသောအခါ ထျန်းဖန်မျိုးနွယ်စုမှ နှောင်းပိုင်း ခန္ဓာပေါင်းစည်းခြင်းအဆင့် ကျင့်ကြံသူ ဖန်ယုံကန်းမှာ အဆုတ်ပေါက်ကွဲမတတ် ဒေါသထွက်သွားလေသည်။

အဘယ်ကြောင့်ဆိုသော် ကျောက်စိမ်းယုန်မျိုးနွယ်စု အမျိုးသမီးကျင့်ကြံသူများ၏ နားမလည်နိုင်သော အမူအရာများကို သူက လှောင်ပြောင်နေသည်ဟု ထင်မြင်သွားသောကြောင့်ပင် ဖြစ်၏။

သူ့ရှေ့ရှိ ဤခွေးကောင်အုပ်စုသည် သူ့ခြိမ်းခြောက်မှုကို လုံးဝ ဂရုမစိုက်ကြဘဲ သူ အဆိပ်တက်၍ သေဆုံးသွားမည့်အချိန်ကို မျက်စိအပြူးသားဖြင့် စောင့်ကြည့်နေကြလေသည်။

မည်မျှ ရက်စက်ကြမ်းကြုတ်သော ကျောက်စိမ်းယုန်မျိုးနွယ်စု ကျင့်ကြံသူများဖြစ်မည်နည်း။

လောကရှိလူတိုင်းက ဤယခင် အစစ်အမှန်ဝိညာဉ်မျိုးနွယ်စုကို အထင်သေးခဲ့ကြလေပြီ။

အားနည်းပြီး အပြစ်ကင်းဟန်ဆောင်ထားသော်လည်း တကယ်တမ်းတွင်မူ ရက်စက်ကြမ်းကြုတ်သော နှလုံးသားနှင့် ရက်စက်သော နည်းလမ်းများ ရှိနေကြသည်။

ခဏတာ ပေါ့ဆသွားမှုကြောင့်ပင် သူတို့သည် ဤကဲ့သို့သော အဆုံးသတ်မျိုးနှင့် ရင်ဆိုင်လိုက်ရချေပြီ။

အုန်း... အုန်း... အုန်း...

သူသည် တစ်ခုခု ဆက်ပြောချင်သေးသော်လည်း ဤအချိန်တွင် ဘာမှ မပြောနိုင်တော့ပေ။

အဘယ်ကြောင့်ဆိုသော် သတ္တမအဆင့်အဆိပ် 'ကောင်းကင်မီးလောင်ကျွမ်းခြင်း' သည် အပြည့်အဝ ပျံ့နှံ့သွားခဲ့ပြီး သူ၏ ကိုယ်ခန္ဓာနှင့် မူလဝိညာဉ်တို့ကို ပြင်းထန်သော မီးတောက်များက လောင်ကျွမ်းသွားသောကြောင့်ပင် ဖြစ်၏။ ဤမျှပြင်းထန်သော နာကျင်မှုကြောင့် သူသည် စကားတစ်ခွန်းမျှ မပြောနိုင်တော့ဘဲ ကြောက်မက်ဖွယ်ကောင်းသော အော်ဟစ်သံများကိုသာ ထုတ်လွှတ်နိုင်ခဲ့တော့သည်။

အသက်တစ်ရှိုက်စာ အချိန်အတွင်းမှာပင် ထျန်းဖန်မျိုးနွယ်စုမှ ခန္ဓာပေါင်းစည်းခြင်းအဆင့် ကျင့်ကြံသူ အယောက် (၂၀) တို့သည် ပြာဖြစ်သွားခဲ့ပြီး ဤလောကမှ လုံးဝ ပျောက်ကွယ်သွားကာ သိုလှောင်အိတ် (၂၀) သာ ကျန်ရစ်ခဲ့လေသည်။

မြေပြင်ပေါ်တွင်မူ အနက်ရောင် ပြာမှုန့်ပုံတစ်ပုံသာ ရှိနေခဲ့သည်။

ဤသည်ကပင် ဤလောက၌ သူတို့ ကျန်ရစ်ခဲ့သော တစ်ခုတည်းသော သဲလွန်စတစ်ခုကဲ့သို့ ဖြစ်တော့၏။

"အားလုံး သေသွားကြပြီလား..."

ဤမြင်ကွင်းကို မြင်လိုက်ရသောအခါ ကျောက်စိမ်းယုန်မျိုးနွယ်စုမှ အမျိုးသမီးကျင့်ကြံသူများစွာသည် မျက်လုံးများ ပြူးကျယ်သွားကြပြီး လုံးဝ မယုံကြည်နိုင်ဖြစ်သွားကြလေသည်။

အစောပိုင်းကပင် သူတို့သည် ထျန်းဖန်မျိုးနွယ်စု ကျင့်ကြံသူများ၏ လိုက်လံသတ်ဖြတ်ခြင်းမှ ရှောင်ရှားရန် ထွက်ပြေးဖို့ စီစဉ်ထားခဲ့ကြခြင်း ဖြစ်၏။

မျက်တောင်တစ်ခတ်စာ အချိန်အတွင်း ဤခန္ဓာပေါင်းစည်းခြင်းအဆင့် ကျင့်ကြံသူအုပ်စု သေဆုံးသွားလိမ့်မည်ဟု မည်သူက ထင်မှတ်ထားခဲ့မည်နည်း။

စောစောက အတိအကျ ဘာတွေဖြစ်သွားမှန်း သူတို့ မသိလိုက်ကြသလို အဘယ်ကြောင့် ရုတ်တရက် သေဆုံးသွားကြသနည်းဆိုသည်ကိုလည်း နားမလည်နိုင်ဖြစ်နေကြသည်။

"တာအိုရောင်းရင်းကျိုး... စောစောက သူတို့ကို သတ်လိုက်တာ ရှင်မဟုတ်လား..."

ယွီရှန်းအာမှာလည်း အလွန်အမင်း အံ့ဩတုန်လှုပ်နေခဲ့သည်။

သူမသည် ကျိုးစွေ့ကို ချက်ချင်း လှမ်းကြည့်လိုက်သည်။ အဘယ်ကြောင့်ဆိုသော် သူမ၏ရှေ့မှ ဤအမျိုးသားက ဝင်ရောက်တိုက်ခိုက်လိုက်သောကြောင့်သာ ဤထျန်းဖန်မျိုးနွယ်စု ခန္ဓာပေါင်းစည်းခြင်းအဆင့် ကျင့်ကြံသူများ သေဆုံးသွားကာ ရန်သူများကို အမြစ်ပြတ် ရှင်းလင်းလိုက်နိုင်ကြောင်း စောစောက သူမ ခံစားသိရှိလိုက်သောကြောင့်ပင် ဖြစ်၏။

ရိုးရိုးသားသားပြောရလျှင် သူမသည် အလွန်အမင်း မယုံကြည်နိုင်ဖြစ်နေသည်။ ရှေ့မှ ဤအမျိုးသားသည် လေဟာနယ်သန့်စင်ခြင်းအဆင့် နှောင်းပိုင်းကျင့်ကြံမှုသာ ရှိသော်လည်း အဘယ်ကြောင့် လေဟာနယ်သန့်စင်ခြင်းအဆင့်ဖြင့် ခန္ဓာပေါင်းစည်းခြင်းအဆင့်ကို တိုက်ခိုက်နိုင်ရသနည်း။

ဤမျှကြီးမားသော တိုက်ပွဲစွမ်းအားမှာ စိတ်ကူးကြည့်ရန်ပင် ခက်ခဲလှပေသည်။

"မှန်တယ်... ငါ ကြားဝင်ပြီး သူတို့ကို သတ်လိုက်တာ..."

"သူတို့က သတ္တမအဆင့်အဆိပ်ဖြစ်တဲ့ 'ကောင်းကင်မီးလောင်ကျွမ်းခြင်း' မိသွားတာပါ..."

"ဒီသတ္တမအဆင့် အဆိပ်ပျံ့နှံ့သွားတာနဲ့ တစ်ကိုယ်လုံး လောင်ကျွမ်းပြီး သေဆုံးသွားလိမ့်မယ်... ကုသဖို့ ဆေးမရှိသလောက်ပါပဲ..."

"ခန္ဓာပေါင်းစည်းခြင်းအဆင့် ကျင့်ကြံသူဆိုရင်တောင် ခုခံဖို့ နည်းလမ်းမရှိဘူး..."

ကျိုးစွေ့က ခပ်ဖွဖွ ပြုံးလိုက်ပြီး ဘာကိုမျှ ဖုံးကွယ်ထားရန် ရည်ရွယ်မထားပေ။

"ဒါ..."

ကျောက်စိမ်းယုန်မျိုးနွယ်စုမှ အမျိုးသမီးကျင့်ကြံသူများစွာသည် ရှေ့မှ ဤအမျိုးသားကို အလွန်အမင်း ထိတ်လန့်တုန်လှုပ်စွာဖြင့် ကြည့်လိုက်ကြသည်။

သူတို့သည် ဤအမျိုးသားက သာမန်လူမဟုတ်ကြောင်းနှင့် လေဟာနယ်သန့်စင်ခြင်းအဆင့် ကျင့်ကြံသူမျှသာ လုံးဝမဟုတ်ကြောင်းကို စောစောကတည်းက သိထားခဲ့ကြပြီး ဖြစ်၏။

သို့သော် မည်သူက ထင်မှတ်ထားခဲ့မည်နည်း။ ဤလူသည် ခန္ဓာပေါင်းစည်းခြင်းအဆင့်မှ အစွမ်းထက်ပုဂ္ဂိုလ်များကို သတ်ဖြတ်ရာတွင် ဟင်းသီးဟင်းရွက်လှီးသကဲ့သို့ပင် လွယ်ကူနေခဲ့သည်။

ခန္ဓာပေါင်းစည်းခြင်းအဆင့်မှ အစွမ်းထက်ပုဂ္ဂိုလ်များသည် သတ်ဖြတ်ရန် ထိုမျှ မလွယ်ကူကြောင်း သိထားရမည် မဟုတ်ပါလော။

အခြေအနေ မဟန်ပါက သူတို့သည် ချက်ချင်း တည်နေရာရွှေ့ပြောင်းကာ ထွက်ပြေးကြရမည်သာ။

ထို့အပြင် အသက်ရှင်သန်နိုင်စွမ်းမှာလည်း အလွန်အမင်း ခိုင်မာလှရာ သေစေနိုင်သော ဒဏ်ရာမဟုတ်သရွေ့ အမြန်ဆုံး မူလအတိုင်း ပြန်လည်ကောင်းမွန်လာနိုင်ပေသည်။

သေစေနိုင်သော ဒဏ်ရာဖြစ်လျှင်ပင် အချိန်မီ ကုသနိုင်ပါက လျင်မြန်စွာ ပြန်လည်သက်သာလာနိုင်သည်။

ခန္ဓာပေါင်းစည်းခြင်းအဆင့်သို့ ရောက်ရှိပြီးနောက် လောကတွင် ဤကဲ့သို့သော အဆင့်ရှိသည့် သက်ရှိများကို သတ်ဖြတ်နိုင်သည့် စွမ်းအားမျိုးမှာ အလွန်နည်းပါးသွားခဲ့ပြီ ဖြစ်၏။