အခန်း ၂၀၀၉

အခန်း (၂၀၀၉ )

နတ်ဘုရင် အဆင့်သို့ တက်ရောက်ခြင်း

လုချန်း၏ လုပ်ဆောင်ချက်များကို သွေးမိစ္ဆာ နတ်သခင်က သဘာဝကျကျပင် သိသွားသော်လည်း ထျန်းရှ နတ်ဘုရား နိုင်ငံတွင် နတ်သခင် ငါးပါးက အခိုင်အမာ တပ်စွဲထားသောကြောင့် သူသည် ထိုနေရာသို့ တစ်ကျော့ပြန် ခြေမချရဲတော့ပဲ နှောင့်ယှက်မှုများ ဖန်တီးရန် မိစ္ဆာနတ်အချို့ကိုသာ စေလွှတ်နိုင်ခဲ့သည်။

ထိုနတ်သခင် ငါးပါးသည် ထျန်းရှ နတ်ဘုရား နိုင်ငံတွင် အချိန်အကြာကြီး အခြေချ နေမည်မဟုတ်ကြောင်း သွေးမိစ္ဆာ နတ်သခင် ကောင်းစွာ သိထား၏။ မဟုတ်ပါက လုချန်း ပြန်လည် ရောက်ရှိလာပြီး ချက်ချင်းပင် နိုင်ငံ၏ သာမန် အရပ်သားပြည်သူများကို စုစည်းကာ တည်နေရာရွှေ့ပြောင်း ခေါ်ဆောင်သွားနိုင်မည် မဟုတ်ပေ။

လုချန်း၏ ပါးနပ်သော နည်းလမ်းက သွေးမိစ္ဆာ နတ်သခင်ကို အလွန် မကျေမနပ် ဖြစ်စေခဲ့သည်။ အကယ်၍ ထိုလူများအားလုံး ထွက်ပြေးသွားပြီး အခွံသက်သက်သာ ကျန်ရစ်ခဲ့ပါက ထျန်းရှ နတ်ဘုရား နိုင်ငံသည် အသုံးမဝင်တော့ပေ။

၎င်းတို့၏ နယ်မြေချဲ့ထွင်ခြင်း ရည်ရွယ်ချက်၌ နယ်နိမိတ် တိုးပွားရန် တစ်စိတ်တစ်ပိုင်း ပါဝင်သော်လည်း အခြား အင်အားစုများမှ လူသားများကို ကျင့်ကြံခြင်း အရင်းအမြစ်များအဖြစ် သားကောင်ပမာ ရက်စက်စွာ အသုံးချရန်က ပို၍အဓိကကျသည်။

ယခု လုချန်းက လူတိုင်းကို ခြေရာဖျောက် ပြောင်းရွှေ့ပေးလိုက်သဖြင့် ထျန်းရှ နတ်ဘုရား နိုင်ငံသည် မြေ နေရာတစ်ခု အဖြစ်သာ ကျန်ရှိတော့ရာ ၎င်းကို သိမ်းပိုက်လျှင်ပင် အသုံးဝင်မှု အနည်းငယ်သာ ရှိလိမ့်မည် ဖြစ်သည်။ အရေးကြီးဆုံးမှာ လူသားအရိပ်အယောင်ပင် မရှိတော့ပါက နိုင်ငံ၏ ကံစွမ်းအားများသည်လည်း သဘာဝကျကျပင် ပျောက်ကွယ်သွားမည် ဖြစ်သည်။

သွေးလင်းယုန်ခန်းမက ထျန်းရှ နတ်ဘုရား နိုင်ငံကို အတင်းအဓမ္မ သိမ်းပိုက်လိုက်လျှင်ပင် ၎င်းတို့ နတ်ဂိုဏ်း၏ ကံစွမ်းအားကို ပြောပလောက်အောင် များစွာ တိုးတက်စေမည် မဟုတ်ပေ။

သွေးမိစ္ဆာ နတ်သခင်သည် ဒေါသအလွန်ထွက်နေသော်လည်း နတ်သခင် ငါးပါး ရှိနေခြင်းကြောင့် လုချန်းကို တားဆီးရန် မလှုပ်ရှားရဲခဲ့ပေ။

…..

ထျန်းရှ နတ်ဘုရား နိုင်ငံ။

ရှီးယန် နတ်မြို့။

ပူပြင်းတောက်လောင်နေသော နေရောင် အောက်ရှိ နတ်မြို့တော်၌ ပုရွက်ဆိတ်အုံကဲ့သို့ လူများဖြင့် ပြည့်နှက်နေ၏။ တော်ဝင်မြို့တော်မှလွဲလျှင် ရှီးယန် နတ်မြို့သည် ကယ်တင်ခြင်း၏ နောက်ဆုံး တည်နေရာရွှေ့ပြောင်းခြင်း စုရပ်တစ်ခု ဖြစ်သည်။

ဤအချိန်တွင် ရှီးယန် နတ်မြို့၌ နတ်ကျင့်ကြံသူ သန်းတစ်ရာကျော်နှင့် ပင်လယ်လှိုင်းတံပိုးပမာ လူသား ကုဋေချီ၍ စုဝေးနေကြ၏။

ရှီးယန် နတ်မြို့မှ လူအားလုံးကို တည်နေရာရွှေ့ပြောင်းရန်အတွက် နတ်စွမ်းအား အမြောက်အမြား ကုန်ဆုံးမည် ဖြစ်သည်။

ကံကောင်းသည်မှာ လုချန်းသည် အထက်တန်းလွှာ မိသားစု အတော်များများကို အမြစ်ပြတ် ရှင်းလင်းသိမ်းပိုက်ထားခဲ့သဖြင့် ယခု သူ့၌ မပြတ်လပ်နိုင်သော အရာမှာ တောင်ပုံရာပုံ ရှိသော နတ်ကျောက်တုံးများ ဖြစ်နေခြင်းပင်။ ထို့ပြင် နတ်သခင် ငါးပါးလည်း ရှိနေခြင်းကြောင့် လူသား ကုဋေချီကို တည်နေရာရွှေ့ပြောင်းခြင်းက သိပ်ပြီး အခက်အခဲ မရှိလှပေ။

ထိုအခိုက်အတန့်တွင် လုချန်းနှင့် နတ်သခင် ငါးပါးတို့သည် လေပွေပမာ ရှီးယန် နတ်မြို့၏ အထက်ကောင်းကင်သို့ ချဉ်းကပ်ရောက်ရှိလာကြသည်။ လုချန်းက ဝိညာဉ်နယ်ပယ် ဖြတ်ကျော် နည်းဗျူဟာကို စတင် ရေးဆွဲတော့မည့်အချိန်တွင် နတ်သခင် တစ်ပါးက သိလိုစိတ် ပြင်းပြစွာဖြင့်

“လုချန်း... ခင်ဗျား ဒီလူတွေကို ဘယ်နေရာဆီ တည်နေရာရွှေ့ပြောင်းပေးမလို့လဲ”

ဟု မေးမြန်းသည်။

ဤနတ်သခင် ငါးပါးစလုံးသည် လုချန်း၏ အံ့မခန်း တည်နေရာရွှေ့ပြောင်းခြင်း နည်းဗျူဟာပုံစံ၏ ထူးခြားချက်များကို သတိပြုမိကြသည်။ လူသား ကုဋေချီကို တစ်ပြိုင်နက်တည်း တည်နေရာရွှေ့ပြောင်းပေးနိုင်သော တည်နေရာရွှေ့ပြောင်းခြင်း နည်းဗျူဟာ ပုံစံမျိုးကို သူတို့ မမြင်ဖူးပေ။

ကောင်းကင်အဆင့် တည်နေရာရွှေ့ပြောင်းခြင်း နည်းဗျူဟာပုံစံတစ်ခုပင်လျှင် ယင်းကဲ့သို့ လုပ်ဆောင်ရန် လွန်စွာ ရုန်းကန်ရလိမ့်မည် ဖြစ်သည်။

၎င်းတို့သည် ဤဆန်းကြယ်လှသော တည်နေရာရွှေ့ပြောင်းခြင်း နည်းဗျူဟာပုံစံအပေါ် တစ်ခဲနက် အလွန် စိတ်ဝင်စားနေကြ၏။

သို့သော် လုချန်းသည် ၎င်းတို့ကို အမှန်အတိုင်း ပြောပြမည် မဟုတ်တာ သေချာ၏။

သူက

“ကျုပ်က သူတို့ကို ထျန်းရှ နတ်ဘုရား နိုင်ငံ ပြင်ပကို ပို့ပေးရုံသက်သက်ပါပဲ။ ဘယ်နေရာကို ရောက်သွားမလဲဆိုတာကတော့ ကံတရားအပေါ်မှာပဲ မူတည်ပါတယ်”

ဟု ပြန်လည် တုံ့ပြန်လိုက်သည်။

နတ်သခင် တစ်ပါးက သံသယစိတ်ဝင်စွာဖြင့်

“ဒါဆို ဒီတည်နေရာရွှေ့ပြောင်းခြင်း နည်းဗျူဟာက တိကျတဲ့ ထွက်ပေါက် မရှိဘူးဆိုတဲ့ သဘောလား”

ဟု ထပ်မံ မေးမြန်းသည်။

လုချန်းက

“ဟုတ်ပါတယ်”

ဟု တိုတိုတုတ်တုတ် ဆို၏။

လုချန်း၏ အဖြေကို ကြားလျှင် နတ်သခင်များသည် ထိုတည်နေရာရွှေ့ပြောင်းခြင်း နည်းဗျူဟာအပေါ် စိတ်ဝင်စားမှု ချက်ချင်း ပျောက်ဆုံးသွားကြသည်။ ၎င်းက လူအမြောက်အမြားကို တည်နေရာရွှေ့ပြောင်းပေးနိုင်သော်လည်း အကယ်၍ ထွက်ပေါက်က မရေမရာ ဖြစ်နေပါက ရန်သူ၏ ရှေ့မှောက်သို့ တိုက်ရိုက် ပို့ဆောင်မိနိုင်သလို သားရဲတွင်းထဲ သက်ဆင်းသကဲ့သို့ ဘေးအန္တရာယ်ကြီးမားသော နေရာအချို့သို့ပင် ရောက်ရှိသွားနိုင်သောကြောင့် ဖြစ်သည်။

ထို့နောက် လုချန်းသည် ဝိညာဉ်နယ်ပယ် ဖြတ်ကျော် နည်းဗျူဟာ၏ ဆန်းပြားသော နည်းဗျူဟာ အင်းကွက်များကို စတင် ရေးဆွဲ တော့သည်။ ခဏအကြာတွင် တောက်ပလှသော နည်းဗျူဟာ ပုံစံတစ်ခုသည် ရှီးယန် နတ်မြို့၏ အထက်ကောင်းကင်ယံသို့ ပျံသန်းသွားခဲ့သည်။

ထို့နောက်ချက်ချင်းပင် လုချန်းသည် အာကာသလက်စွပ်ထဲမှ တောင်ပူစာသဖွယ် နတ်ကျောက်တုံးပုံကြီးကို သွန်ချလိုက်ရာ ဝိညာဉ်နယ်ပယ် ဖြတ်ကျော် နည်းဗျူဟာသည် နတ်ကျောက်တုံးများဆီမှ နတ်စွမ်းအားများကို လောဘတကြီး ရူးသွပ်စွာ စုပ်ယူတော့သည်။ မျက်စိတစ်မှိတ် အတွင်းမှာပင် တောင်သဖွယ် မြင့်မားစွာ ပုံနေသော နတ်ကျောက်တုံးပုံကြီးသည် လုံးဝ အငွေ့ပျံ ကွယ်ပျောက်သွားခဲ့တော့သည်။

နောက်တစ်ခဏတွင် ရှီးယန် နတ်မြို့၏ အောက်ခြေ၌ ကြီးမားသော ဝဲဂယက်တစ်ခု ပေါ်လာပြီးနောက် ရှီးယန် နတ်မြို့တစ်ခုလုံးသည် ဝဲဂယက်ထဲသို့ ဖျတ်ခနဲ ပျောက်ကွယ်သွားကာ ကြီးမားလှသော မြေကျင်းကြီးတစ်ခုသာ ကျန်ရစ်ခဲ့တော့သည်။

ရှီးယန် နတ်မြို့တစ်ခုလုံး လုံးဝ ပျောက်ကွယ်သွားသည်ကို တွေ့မြင်လျှင် ရှိနေကြသော နတ်သခင်များ အလွန်တုန်လှုပ်သွားကြဆဲ ဖြစ်သည်။ ၎င်းတို့၏ ကောင်းကင်အဆင့် တည်နေရာရွှေ့ပြောင်းခြင်း နည်းဗျူဟာပုံစံများသည်ပင် နတ်မြို့တစ်ခုလုံးကို တိုက်ရိုက် တည်နေရာရွှေ့ပြောင်းပေးနိုင်စွမ်း မရှိပေ။

သို့သော် ၎င်းသည် ကျပန်း တည်နေရာရွှေ့ပြောင်းခြင်း ဖြစ်ပြီး ရှီးယန် နတ်မြို့သည် လမ်းစပျောက်ကာ မသိရသော နေရာတစ်ခုသို့ ရောက်ရှိသွားနိုင်ကြောင်း တွေးမိသောအခါ နတ်သခင်များလည်း ဝိညာဉ်နယ်ပယ် ဖြတ်ကျော် နည်းဗျူဟာအပေါ် စိတ်ဝင်စားမှု ကင်းမဲ့သွားကြတော့သည်။

ရှီးယန် နတ်မြို့ကို အောင်မြင်စွာ တည်နေရာရွှေ့ပြောင်းပေးပြီးနောက် လုချန်းသည် ထျန်းရှ နတ်ဘုရား နိုင်ငံ၏ စည်ကားလှသော တော်ဝင်မြို့တော်တစ်ခုလုံးကို အရိုင်းနယ်မြေသို့ တည်နေရာရွှေ့ပြောင်းရန်အတွက် နတ်ကျောက်တုံး အမြောက်အမြားကို ထပ်မံ အသုံးပြုခဲ့သည်။

ထျန်းရှ နတ်ဘုရား နိုင်ငံ၏ တော်ဝင်မြို့တော်ကို ချင်နတ်ဘုရား နိုင်ငံသို့ တည်နေရာရွှေ့ပြောင်းပြီးသည်နှင့် သူ၏ ခန္ဓာကိုယ်ထဲသို့ လှိုင်းတံပိုးပမာ ကြီးမားလှသော ကံစွမ်းအားများ တဟုန်ထိုး တိုးဝင်လာသည်ကို လုချန်း ခံစားလိုက်ရပြီး လျှပ်တစ်ပြက် အတွင်းမှာပင် သူ၏ ကျင့်ကြံခြင်း အဆင့်သည် ကျောက်ဆောင်ကို ဖောက်ထွက်သကဲ့သို့ အတားအဆီးများကို ဖောက်ထွက်ကာ နတ်ဘုရင် အဆင့်သို့ တိုက်ရိုက် တက်ရောက်သွားခဲ့တော့သည်။

…..

ထိုအခိုက်အတန့်တွင်။

ချင်နတ်ဘုရား နိုင်ငံ။

တော်ဝင်နန်းတော်။

ကျင့်ကြံခြင်း အခန်းအတွင်း။

လုချန်းသည် သူ၏ မျက်လုံးများကို ဖွင့်လိုက်ပြီး သူအတွင်းရှိ အတိုင်းအဆမဲ့သော နတ်စွမ်းအားများကို ခံစားလိုက်ရသည်။ သူသည် အလွန်တရာ စိတ်အားတက်ကြွမှုကို ခံစားလိုက်ရ၏။ သူ၏ နဂို ကျင့်ကြံခြင်းစွမ်းအားများကို နောက်ဆုံးတွင် အမိအရ ပြန်လည် ရရှိခဲ့ပြီ ဖြစ်သည်။

ယခုအချိန်မှစ၍ သူသည် နတ်ဘုရင်၏ ကျိန်စာကို အသုံးပြုရန် လုံးဝ မလိုအပ်တော့ပေ။

သူ၏ နဂိုကျင့်ကြံခြင်းအဆင့် ပြန်ရလာခြင်းသည် စွမ်းအားအကြီးဆုံး ရန်သူအများစုကို ထိပ်တိုက် ရင်ဆိုင်နိုင်စွမ်း ရှိလာခြင်းကို အခိုင်အမာ ကိုယ်စားပြုသည်။ အကယ်၍ ပြိုင်ဘက်က အထွတ်အထိပ် နတ်ဧကရာဇ် တစ်ပါး မဟုတ်ပါက သူ့ အနေနှင့် ပြန်လည် တိုက်ခိုက်နိုင်စွမ်း ရှိလိမ့်မည် ဖြစ်သည်။

သူသည် နတ်ဘုရင် အဆင့် ကိုယ်ပွား အမြောက်အမြားကို လျှပ်တပြက်အတွင်း ဖန်တီးနိုင်၏။ ဤနတ်ဘုရင် ကိုယ်ပွားများနှင့် ဆိုလျှင် သူ အနိုင်မယူနိုင်သော ရန်သူနှင့် ထိပ်တိုက် တွေ့ဆုံသည့်အခါတိုင်း သူ့ကိုယ်သူ ဖောက်ခွဲရန် ရွေးချယ်နိုင်မည် ဖြစ်သည်။

နတ်ဘုရင် တစ်ပါး၏ ဖောက်ခွဲမှုသည် နတ်သခင် တစ်ပါးကိုပင် သေလုမြောပါး ပြင်းထန်စွာ ဒဏ်ရာရရှိစေနိုင်ပြီး သူ၏ နတ်ဘုရင် ကိုယ်ပွားများကိုတော့ အဆက်မပြတ် ထုတ်လုပ်ကာ အသုံးချနိုင်ပေသည်။

ထို့ပြင် ချင်နတ်ဘုရား နိုင်ငံ၏ ကံစွမ်းအားသည် အလွန် ထူးကဲသိပ်သည်းလှပြီး သူ၏ နတ်ဘုရင် အဆင့် စွမ်းအားမှာ သာမန် နတ်ဘုရင်များထက် များစွာ ပိုအစွမ်းထက်လှရာ နတ်သခင် တစ်ပါး၏ စွမ်းအားနီးပါးအထိ ချဉ်းကပ်နေသည်။ မည်သည့် နတ်ဘုရင်မှ သူ့ကို စွမ်းအားချင်း ရင်ပေါင်တန်း ယှဉ်ပြိုင်နိုင်မည် မဟုတ်ကြောင်းလည်း လုချန်း ယုံကြည်သည်။

……

တစ်ချိန်တည်းမှာပင်။

လျှို့ဝှက်လဝန်း နန်းတော်။

နှင်းခဲနန်းတော်အတွင်းတွင်...

ယွမ်ယုတိသည် လုချန်းနှင့် စိတ်ဝင်တစား ကျင့်ကြံနေစဉ် လျှို့ဝှက်လဝန်း နန်းတော်၏ ကံစွမ်းအားများ လျင်မြန်စွာ မြင့်တက်လာသည်ကို ရုတ်တရက် ခံစားလိုက်ရသည်။ ကံစွမ်းအားများ သိသိသာသာ မြင့်တက်လာခြင်းက သူမ၏ ကျင့်ကြံခြင်း အတားအဆီးကိုလည်း လျော့ရဲသွားစေပုံရပြီး သူမအား နောက်တစ်ဆင့်သို့ နီးစပ်လာစေခဲ့သည်။

ကံစွမ်းအားနှင့် စွမ်းအား တိုးပွားလာမှုကို ခံစားမိလျှင် ယွမ်ယုတိ မျက်မှောင်ကြုတ်ကာ လုချန်းကို စူးစိုက်ကြည့်လိုက်သည်။ သူမသည် ဉာဏ်ပညာကြီးမားသူဖြစ်ရာ လျှို့ဝှက်လဝန်း နန်းတော်၏ ကံစွမ်းအား ရုတ်တရက် ထူးခြားစွာ မြင့်တက်လာခြင်းမှာ ချင်နတ်ဘုရား နိုင်ငံ၏ ကံစွမ်းအား အရှိန်အဟုန်ဖြင့် တိုးပွားလာခြင်းကြောင့် ဖြစ်ရမည်ကို ကွင်းကွင်းကွက်ကွက် သဘောပေါက်လိုက်သည်။

ယခုအခါ လျှို့ဝှက်လဝန်း နန်းတော်၏ ကံစွမ်းအားသည် ချင်နတ်ဘုရား နိုင်ငံနှင့် ချိတ်ဆက်ထားပြီး ဖြစ်သောကြောင့် ချင်နတ်ဘုရား နိုင်ငံ၏ ကံစွမ်းအား တိုးပွားလာမှုတိုင်းက လျှို့ဝှက်လဝန်း နန်းတော်၏ ကံစွမ်းအားကိုလည်း ဒွန်တွဲ၍ မြင့်တက်စေမည် ဖြစ်သည်။

ယွမ်ယုတိက အံ့ဩမှင်သက်နေသော မျက်နှာဖြင့်

“ရှင် ဘာလုပ်လိုက်တာလဲ... ဘာလို့ လျှို့ဝှက်လဝန်း နန်းတော်ရဲ့ ကံစွမ်းအားတွေ ဒီလောက်တောင် မြင့်တက်လာရတာလဲ”

ဟု မေးလိုက်သည်။

ချင်နတ်ဘုရား နိုင်ငံ၏ ကံစွမ်းအားကို ယခု လောက်အထိ ဟုန်းဟုန်းတောက် မြင့်တက်စေရန် မည်သည့်အရာကို လုချန်း လုပ်ဆောင်ခဲ့သလဲဟု သူမ အလွန် စူးစမ်းချင်နေမိသည်။ လျှို့ဝှက်လဝန်း နန်းတော်၏ ကံစွမ်းအားသည် မဟာအင်အားကြီးအုပ်စု အချို့၏ ကံစွမ်းအားနီးပါးအထိ ရင်ပေါင်တန်း ချဉ်းကပ်လာခဲ့ပြီ ဖြစ်သည်။

လုချန်းက

“ဘာမှ အများကြီး မဟုတ်ပါဘူး။ ကျုပ်က ထျန်းရှ နတ်ဘုရား နိုင်ငံရဲ့ အရပ်သား ပြည်သူအားလုံးကို ချင်နတ်ဘုရား နိုင်ငံဆီ ပို့လိုက်ရုံပါပဲ။”

ဒါက...

ယွမ်ယုတိ ခဏခန့် တိတ်ဆိတ်စွာ တွေးတောလိုက်သည်။ လုချန်းက ထျန်းရှ နတ်ဘုရား နိုင်ငံ၏ ကံစွမ်းအားအားလုံးကိ စုပ်ယူလိုက်သဖြင့် ချင်နတ်ဘုရား နိုင်ငံ၏ ကံစွမ်းအားကို မြင့်တက်စေခဲ့ပြီး ထိုမှတစ်ဆင့် လျှို့ဝှက်လဝန်း ကျောင်းတော်၏ ကံစွမ်းအားကိုပါ မြှင့်တင်ပေးခဲ့သည်ဆိုလျှင် ဖြစ်နိုင်ခြေ ရှိသည်။

သို့သော် နတ်ဘုရား နိုင်ငံ တစ်နိုင်တည်း၏ ကံစွမ်းအားကို စုပ်ယူရုံမျှဖြင့် ချင်နတ်ဘုရား နိုင်ငံ၏ ကံစွမ်းအားကို ဤမျှအထိ သိသိသာသာ မြင့်တက်စေခြင်းက အနည်းငယ် ပုံကြီးချဲ့လွန်းရာ ကျမနေဘူးလား။

ထျန်းရှ နတ်ဘုရား နိုင်ငံ၏ ကံစွမ်းအားကို စုပ်ယူရုံသက်သက်ထက် မကပဲ ကွင်းဆက်ပမာ အခြားသော အကြောင်းအရင်းများလည်း ပါဝင်နေရမည် ဖြစ်သည်။

ယွမ်ယုတိက ဆက်လက်၍

“ထျန်းရှ နတ်ဘုရား နိုင်ငံက အဆင့်နိမ့် နတ်ဘုရား နိုင်ငံ တစ်ခုပဲလေ... သူ့ရဲ့ ကံစွမ်းအား က ဘယ်လောက်တောင် ရှိနိုင်မှာမလို့လဲ။ ဒီကံစွမ်းအားတွေက အရမ်းကို လွန်လွန်ကဲကဲ အစွမ်းထက်လွန်းတယ်လို့ ရှင် မခံစားရဘူးလား။”

လုချန်းက

“ဖြစ်နိုင်တာကတော့ ကျုပ်ရဲ့ ကျင့်ကြံခြင်းက နတ်ဘုရင် အဆင့်ကို ပြန်ရောက်သွားတာကြောင့် ကောင်းကင်လမ်းစဉ်က ကျုပ်ကို ကံစွမ်းအားတွေ ပိုပြီး ဆုချလိုက်တာ နေမှာပါ။”

ယွမ်ယုတိသည် နက်ရှိုင်းလှသော တွေးတောဆင်ခြင်မှုထဲသို့ ကျရောက်သွားခဲ့၏။ ကျင့်ကြံသူတစ်ဦး၏ အဆင့်တက်ရောက်မှုက ပုဂ္ဂိုလ်ရေးဆိုင်ရာနှင့် အင်အားစု၏ ကံစွမ်းအားကို တရှိန်ထိုး သိသိသာသာ မြင့်တက်ပေးနိုင်စွမ်း ရှိတာကတော့ မမှားပေ။

သို့သော် လုချန်းအနေနှင့် နတ်ဘုရင် ကျင့်စဉ်အဆင့်သို့ ပြန်လည်ရောက်ရှိရုံမျှဖြင့် ကံစွမ်းအားကို ဤမျှအထိ မြှင့်တင်နိုင်ခဲ့လျှင်...

အကယ်၍ လုချန်းသာ နတ်သခင် ကျင့်စဉ်အဆင့်သို့ တက်လှမ်းနိုင်ခဲ့ပါက ချင်နတ်ဘုရား နိုင်ငံနှင့် လျှို့ဝှက်လဝန်း ကျောင်းတော်၏ ကံစွမ်းအားများသည် အထွတ်အထိပ် အုပ်ချုပ်သူအဆင့် အင်အားစုကြီးတစ်ခု၏ အဆင့်အတန်းသို့ပင် ရောက်ရှိသွားနိုင်သည် မဟုတ်ပါလား။

ဤလုချန်း၏ သရုပ်မှန် မရိုးရှင်းတာ ထင်ရှားလှသည်။

မသိစိတ်၏ ဆန်းကြယ်သော အကြောင်းအရင်းအချို့ကြောင့် ယွမ်ယုတိရင်ထဲ ရုတ်တရက် ခံစားချက်တစ်ခု ဝင်လာခဲ့သည်။ သူမနှင့် လုချန်းတို့ကြား ကလေးရရှိမည့် နိမိတ်လက္ခဏာက ပြည့်စုံလာပြီဟု သူမ ခံစားလိုက်ရသည်။

လုချန်း၏ ကြီးမားလှသော ကံစွမ်းအားများနှင့်ဆိုလျှင် ဧကရာဇ်အဆင့်သို့ တက်လှမ်းရန် သေချာသလောက် ရှိနေသည်။ သူသည် ပို၍ပင် ရှေ့ဆက်သွားနိုင်ကာ သူ၏ ကျင့်ကြံခြင်းသည်လည်း နတ်ဧကရာဇ် အဆင့်တွင် ရပ်တန့်သွားလိမ့်မည် မဟုတ်ပေ။

အကယ်၍ တစ်နေ့တွင် လုချန်းသာ အလွန် စွမ်းအားကြီးလာခဲ့ပါက သူမအနေနှင့် သူ၏ ကလေးကို မွေးဖွားပေးရန်မှတစ်ပါး အခြား လွတ်မြောက်ရာ ရွေးချယ်စရာ ရှိတော့မည် မဟုတ်ပေ။

ထိုအရာကို တွေးမိရင်း ယွမ်ယုတိ၏ ခန္ဓာကိုယ်လည်း ဆောင်းလေထဲက သစ်ရွက်ပမာ အနည်းငယ် တုန်ယင်သွားခဲ့သည်။

သို့သော် မကြာမီ အချိန်အတွင်းမှာပင် ယွမ်ယုတိသည် သူမ၏ စိတ်တွင်း မငြိမ်မသက်ဖြစ်မှုများကို ပြန်လည် တည်ငြိမ်စေခဲ့သည်။ သူမအနေနှင့် လုချန်းထက် ပိုစွမ်းအားကြီးနေစေရန် ဝီရိယရှိရှိ ဆက်လက် ကျင့်ကြံနေပါက ဤလူ၌ သူမကို ကိုယ်ဝန်ရရှိအောင် လုပ်ဆောင်နိုင်မည့် အခွင့်အရေး ရေတွက်ရလောက်အောင် ရှိလာလိမ့်မည် မဟုတ်ပေ။

သူမသည် ကျင့်ကြံရန် အတွက် ရွှေထက်ရှားသော အချိန်ကို အမိအရ ဆုပ်ကိုင်ရမည် ဖြစ်သည်။ ထိုပြတ်သားသော အတွေးနှင့်အတူ ယွမ်ယုတိသည် ဝိညာဉ်ညှို့ဓာတ် ကျမ်းစာကို မုန်တိုင်းပမာ ပြင်းထန်စွာ စတင် လည်ပတ်စေခဲ့လေတော့သည်။

--

…………