အခန်း ၃၉၃

အခန်း ၃၉၃။ လွင်ပြင်ထဲမှ အပျက်အစီးများ၊ ဆိုက်ဘေးရီးယား စူးစမ်းရှာဖွေ တွေ့ရှိမှုများ

ရွှီယန်က လူသူကင်းမဲ့သော နယ်မြေ၏ အနက်ပိုင်းသို့ တောက်လျှောက် လမ်းလျှောက် ဝင်ရောက်သွားသည်။

သစ်တောထဲတွင် နေရာတိုင်း၌ အန္တရာယ်များ ပြည့်နှက်နေလေသည်။

ဒရုန်း၏ ကင်မရာ လှည့်သွားသည့် အခါတိုင်း အင်တာနက်သုံးစွဲသူများ၏ ရင်ခုန်သံများကလည်း လိုက်ပါ၍ မြန်ဆန်လာကြသည်။

ဘေးနားရှိ ကွက်လပ် နေရာမှနေ၍ ကြောက်မက်ဖွယ် ကောင်းသော အရာတစ်ခုခု ထွက်ပေါ်လာမည်ကို အမြဲတမ်း စိုးရိမ်နေကြခြင်း ပင် ဖြစ်လေသည်။

သို့သော် ကံကောင်းစွာဖြင့် လမ်းတစ်လျှောက်လုံး မည်သည့် အန္တရာယ်မှ မရှိခဲ့ဘဲ ရွှီယန်က သစ်တောထဲမှနေ၍ လွင်ပြင် ဒေသသို့ ဝင်ရောက်သွားခဲ့သည်။

ရွှီယန်က အတော်လေး သတိထားတတ်သော်လည်း တစ်ဖက်တွင် သူ့ထံ၌ အန္တရာယ် အာရုံခံနိုင်စွမ်း ရှိနေပြီး အခြား တစ်ဖက်တွင်တော့ အသက်ကယ်နိုင်မည့် ကတ်ပြား တစ်ကတ် ရှိနေသဖြင့် နှိုင်းယှဉ်ချက် အရ ဘေးကင်းလုံခြုံမှု ရှိနေလေသည်။

ယနေ့ သွားရောက်ရမည့် နေရာမှာ လျှို့ဝှက် စခန်း ပင် ဖြစ်သည်။

ဆိုက်ဘေးရီးယား တွင် ဤကဲ့သို့သော လျှို့ဝှက် စခန်းများ အတော်လေး များပြားလှပေသည်။

တချို့က စစ်သုံ့ပန်း စခန်းများ ဖြစ်ပြီး တချို့ကတော့ ရုရှား ဇာဘုရင်များ ချန်ရစ်ခဲ့သော စခန်းများ ဖြစ်ကာ မည်သည့် နေရာဖြစ်ကြောင်းကို မသိနိုင်ချေ။

ရွှီယန်က အဝေးဆီသို့ တောက်လျှောက် လျှောက်သွားလိုက်သည်။

အပျက်အစီး များကို ရှာဖွေရခြင်းက အလွန် စိတ်ဝင်စားစရာ ကောင်းလှသဖြင့် တိုက်ရိုက်ထုတ်လွှင့်မှု အခန်းထဲတွင် ကြည့်ရှုနေသူ အရေအတွက် က အလွန် များပြားနေလေသည်။

အားလုံးက ရွှီယန် ပြောသည့်စကား မှန်မမှန် ကို သိချင်နေကြခြင်း ပင် ဖြစ်လေသည်။

လွင်ပြင် ၏ မြေပြင် အနေအထား က အနိမ့်အမြင့် မညီညာဘဲ အပေါ်တွင် ခြောက်သွေ့ ဝါကြင်နေသော ပေါင်းပင်များ အပြည့် ပေါက်ရောက်နေပြီး နေရာ အတော်များများ တွင် ရွှံ့ဗွက်များ ရှိနေလေသည်။

"ဒီဘက်က ရေခဲလွှာ ဒေသတွေပါ... အခု ရာသီဥတု ပူပြင်းတော့ ရေခဲတွေ နှင်းတွေ အကုန် အရည်ပျော်သွားလို့ နေရာ အတော်များများက ရွှံ့ညွန်တော တွေ ဖြစ်ကုန်တာ..."

"အပူချိန် ကျဆင်းသွားတာနဲ့ ဒီနေရာတွေ အကုန်လုံးက အပြည့်အဝ အေးခဲသွားတော့မှာ..."

"ကမ္ဘာပေါ်မှာ ရှိတဲ့ မာမွတ်ဆင် ရုပ်ကြွင်း တွေရဲ့ ရှစ်ဆယ် ရာခိုင်နှုန်း က ဆိုက်ဘေးရီးယား ရေခဲလွှာ ဒေသ တွေကနေ ရှာတွေ့ခဲ့တာ..."

"ဒီနေရာက တကယ်ကို အေးလွန်းတယ်..."

ရွှီယန်က အားလုံးကို ဗဟုသုတ မျှဝေပေးနေလေသည်။

တိုက်ရိုက်ထုတ်လွှင့်မှု မြင်ကွင်း က အလွန် တောရိုင်းဆန်လှပေသည်။

ထိုစဉ်မှာပင် ရွှီယန်က ရင်းနှီးကျွမ်းဝင်နေသော အော်မြည်သံ တစ်ခုကို ရုတ်တရက် ကြားလိုက်ရသည်။

အစပိုင်းတွင် သူက အနည်းငယ် ယုံကြည်ရ ခက်ခဲနေသော်လည်း ခေါင်းမော့ ကြည့်လိုက်ရာ သူ၏ ခေါင်းထက်တွင် အရိပ်မည်း တစ်ခု က လှည့်ပတ် ပျံသန်းနေပြီး တစ်ပတ်ပြီး တစ်ပတ် ဆင်းသက်လာသည်ကို မြင်တွေ့လိုက်ရသည်။

"စွန်နက် လား... ဒီနေရာမှာတောင် တွေ့ရတယ်..."

"မဟုတ်သေးဘူး... သူက ဒီနေရာ အထိတောင် ရှာတွေ့တာလား..."

သားရဲငှက် များ၏ လှုပ်ရှား သွားလာသော နယ်မြေ က အလွန် ကြီးမား ကျယ်ပြန့်လှပြီး စွန်နက် လည်း ထိုနည်းတူစွာပင် ဖြစ်လေသည်။

၎င်းက ဆိုက်ဘေးရီးယား ၏ ကောင်းကင်ယံ သို့ ပျံသန်းလာပြီး သားကောင် ရှာဖွေနေစဉ် အတွင်း ရွှီယန်ကို မြင်တွေ့သွားခဲ့ခြင်း ပင် ဖြစ်လေသည်။

ထို့ကြောင့် ဤကောင်လေး က တိုက်ရိုက်ပင် အောက်သို့ ပျံသန်း ဆင်းသက်လာကာ နှုတ်ဆက်ခြင်း ဖြစ်လေသည်။

ရွှီယန် က လက်တစ်ချက် ဝှေ့ယမ်းပြလိုက်ရာ စွန်နက် က အောက်သို့ ဆင်းသက်လာခဲ့သည်။

ပရိသတ် အဟောင်းများ က စွန်နက် ကို ရင်းနှီးနေပြီ ဖြစ်ရာ ဘာမှ မထူးဆန်းသော်လည်း အနည်းငယ် အံ့အားသင့် သွားကြသည်။

ဤနေရာတွင်တောင် တွေ့ရလိမ့်မည်ဟု မမျှော်လင့်ထားခဲ့ကြချေ။

ရွှီယန်၏ တိုက်ရိုက်ထုတ်လွှင့်မှုကို ကြည့်ရှုနေကြသော နိုင်ငံခြားသား များကတော့ လူပင် ကြောင်အမ်းအမ်း ဖြစ်သွားကြရသည်။

သူ့ကို လက်တစ်ချက် ဝှေ့ယမ်းပြလိုက်ရုံဖြင့် သားရဲငှက် က အောက်သို့ ဆင်းသက်လာသည်မှာ အလွန် အံ့ဩစရာ ကောင်းလွန်းလှပေသည်။ ဤမျှလောက် အစွမ်းထက်သည်လား ဟု တွေးတောမိကြသည်။

အဝေးရှိ ရွာထဲမှ အီဗန် နှင့် ရွာထဲရှိ လူငယ် အချို့ ကလည်း ရွှီယန်၏ တိုက်ရိုက်ထုတ်လွှင့်မှုကို ကြည့်ရှုနေကြလေသည်။

ဤမြင်ကွင်းကို မြင်သောအခါ ပို၍ပင် ကြောင်အမ်းအမ်း ဖြစ်သွားကြရသည်။

လျှို့ဝှက်ဆန်းကြယ်သော တရုတ် သိုင်းပညာရှင် ပီသပါပေသည်။ တကယ်ကို အစွမ်းထက်လွန်းလှပေသည်။

ရွှီယန် က စွန်နက်ကို ပွတ်သပ်ပေးလိုက်ရာ စိတ်အခြေအနေ က အလွန် ကောင်းမွန်သွားခဲ့သည်။

သူက လွင်ပြင် အနက်ပိုင်း သို့ ဆက်လက် လျှောက်သွားလိုက်သည်။

နာရီဝက်ခန့် အကြာတွင် ရွှီယန် က အရှေ့ဘက်တွင် နိမ့်ကျသော အဆောက်အအုံစု တစ်ခုကို အဝေးမှနေ၍ မြင်တွေ့လိုက်ရသည်။

မှန်ပြောင်းဖြင့် သေချာစွာ ကြည့်ရှုလိုက်ရာ လူများ နေထိုင်ခဲ့ဖူးသော တစ်ထပ်အိမ်လေးများ ဖြစ်ကြောင်း အတည်ပြုနိုင်ခဲ့သည်။

သူက အဆောက်အအုံစု ရှိရာ ဘက်သို့ ချက်ချင်းပင် အလျင်စလို သွားရောက်လိုက်သည်။

တိုက်ရိုက်ထုတ်လွှင့်မှု အခန်းရှိ ကြည့်ရှုသူများ ကလည်း ဤမြင်ကွင်းကို မြင်တွေ့လိုက်ကြသည်။

[ဟိုဘက်က ဘာကြီးလဲ... တကယ်ကြီး လျှို့ဝှက် စခန်း ရှိနေတာလား]

[မဟုတ်သေးဘူး... သူက တကယ်ကြီး ဆိုက်ဘေးရီးယား မှာ အပျက်အစီး တွေကို ရှာတွေ့သွားတာလား]

[အဲဒါ ဘာကြီးလဲ... သရဲရွာ ကြီးများ ဖြစ်နေမလား]

[ဒီလောက် လူသူကင်းမဲ့တဲ့ နေရာမှာ အိမ်တွေ ရှိနေတယ်]

အင်တာနက်သုံးစွဲသူများ ထပ်မံ၍ လန့်ဖြတ်သွားကြပြန်သည်။

ဤမြင်ကွင်းကို ကြည့်ရသည်မှာ မည်သူမဆို ကြောက်ရွံ့ကြမည်သာ ဖြစ်သည်။

ပတ်ဝန်းကျင် ကီလိုမီတာ ဆယ်ချီသည့် အတွင်း လူတစ်ယောက်မျှ မရှိဘဲ ဤကဲ့သို့သော စွန့်ပစ်ထားသည့် ရွာငယ်လေး တစ်ရွာသာ ရှိနေလေသည်။

အထဲသို့ ဝင်ရဲသူများ မှာ သာမန် လူများ မဟုတ်ကြချေ။

ရွှီယန် ကတော့ သတ္တိ အလွန် ကောင်းလှရာ အရှေ့သို့ တောက်လျှောက်ပင် လျှောက်သွားတော့သည်။

မကြာခင်မှာပင် သူက အဆောက်အအုံစု ၏ အရှေ့သို့ ရောက်ရှိသွားခဲ့သည်။

ဤသည်မှာ တကယ်ကို စွန့်ပစ်ထားသော ရွာငယ်လေး တစ်ရွာ ဖြစ်ပြီး နံရံများ အားလုံး က မြေကြီး နံရံများ ဖြစ်ကာ အများစုမှာ ယိုယွင်း ပျက်စီးနေပြီး ခေါင်မိုး လေးပုံ သုံးပုံခန့်မှာ ပြိုကျနေပြီ ဖြစ်သည်။

အိမ် အရေအတွက် လည်း ထိုမျှလောက် မများပြားဘဲ ကြည့်ရသည်မှာ အနည်းငယ် ကျောချမ်းစရာ ကောင်းနေလေသည်။

"စွန့်ပစ်ထားတဲ့ ရွာ တစ်ရွာပဲ... ဘယ်လောက်တောင် ကြာပြီလဲ မသိဘူး..."

"ကြည့်ရတာ တော်တော် ဟောင်းနေပြီ... နှစ်ပေါင်း မနည်းတော့ဘူး လို့ ခန့်မှန်းရတယ်..."

ရွှီယန်က စွန့်ပစ်ထားသော ရွာ အပျက်အစီးများ ထဲသို့ ဝင်ရောက်ကာ ဘယ်ညာ လှည့်ပတ် ကြည့်ရှုလိုက်သည်။

သူက အကောင်းပကတိ ရှိနေသေးသော အိမ်တစ်လုံး ကိုပင် ရှာတွေ့ခဲ့ပြီး အတွင်းသို့ တိုက်ရိုက် ဝင်ရောက်သွားခဲ့သည်။

အင်တာနက်သုံးစွဲသူများ ကတော့ ကြည့်လေလေ ပို၍ စိုးရိမ် ထိတ်လန့်လာကြလေလေ ပင်။

[လောင်ရွှီ... အဲဒါ သရဲရွာ ဖြစ်နေမှာ မကြောက်ဘူးလား]

[မင်း တစ်ယောက်တည်း အပျိုစင် သစ်တော ထဲ ဝင်ရဲတာကို ငါက ဘာမှ မဟုတ်ဘူးလို့ ထင်နေခဲ့တာ... မင်း ဒီရွာထဲကို ကိုယ်တိုင် ဝင်ရဲတာကိုတော့ ငါ တကယ် အရှုံးပေးတယ်]

[မကောင်းတဲ့ အရာ တစ်ခုခု ပူးကပ်သွားဦးမယ်]

[ဒီလို နေရာမျိုးက သေချာပေါက် ထူးဆန်းတယ်... လောင်ရွှီ... မပတ်သက်မိစေနဲ့နော်]

အားလုံးက အသီးသီး သတိပေး နေကြလေသည်။

ဤအရာများကို ယုံကြည်သူများ အတော်လေး များပြားကြောင်း သိသာလှပေသည်။

ရွှီယန် က အမြဲတမ်း တည်ငြိမ်နေတတ်ပြီး တောင်စောင့်နတ်ကို ပူဇော်ခြင်း၊ ဓနနတ်မင်း ကို ကြိုဆိုခြင်း စသည့် မင်္ဂလာရှိသော အရာများကို နှစ်သက်သော်လည်း ပျော်ရွှင် မင်္ဂလာရှိစေရန် သက်သက်သာ ဖြစ်လေသည်။

အဆိုးမြင်သော ကိစ္စများ နှင့် ပတ်သက်၍တော့ ရွှီယန် က အမြဲတမ်း မယုံကြည်တတ်ချေ။

မယုံကြည်ပါက ဤအရာများ ကလည်း သူ့အပေါ် မည်သည့် အကျိုးသက်ရောက်မှု မှ ရှိမည် မဟုတ်ပေ။

ရွာက အလွန် လူသူကင်းမဲ့နေပြီး မည်သည့် အရာမျှ မရှိချေ။

အိမ်ထဲတွင်ပင် ရှင်းလင်း သန့်စင်နေလေသည်။

ဤမျှ နှစ်ပေါင်းများစွာ ကြာမြင့်နေပြီ ဖြစ်ရာ ဤနေရာသို့ လူများ ရောက်လာဖူးမည်မှာ သေချာလှပြီး တစ်ခုခု ရှိနေပါကလည်း စောစောစီးစီး ကတည်းက ယူဆောင် သွားကြမည်သာ ဖြစ်သည်။

မြေကြီး နံရံ အချို့သာ ကျန်ရှိတော့ပြီး မည်သည့် ခေတ်အခါ က ကိစ္စ ဖြစ်ကြောင်းကိုလည်း မသိနိုင်ချေ။

"အားလုံးပဲ ကြောက်နေစရာ မလိုပါဘူး... စွန့်ပစ်ထားတဲ့ ရွာလေး သက်သက်ပါ... ဘာမှ မရှိပါဘူး..."

"ဒီလို နေရာမျိုးက ယေဘုယျအားဖြင့် အတော်လေး ဘေးကင်းလုံခြုံတယ်..."

"အချိန် စောနေသေးလို့သာ... မဟုတ်ရင် ညဘက် နေဖို့ နေရာ တစ်ခုလောက် ရှာပြီး ဒီမှာပဲ အိပ်လိုက်ချင်တယ်..."

"နှိုင်းယှဉ်ကြည့်ရင် ပိုပြီး သက်သောင့်သက်သာ ရှိတယ်လေ..."

ရွှီယန်က ပြောလိုက်သည်။

သူ၏ စကားကို ကြားသောအခါ အားလုံးက ဘာပြောရမှန်းပင် မသိအောင် ဖြစ်သွားကြရသည်။

ညဘက် ဤနေရာတွင် အိပ်မည် ဟုတ်လား။ လန့်သေသွားနိုင်သည်။

မှောင်မိုက်နေပြီး ဘာမှ မမြင်ရသည့် အပြင် အကယ်၍ အိမ်ရှင် ကသာ လာရှာလျှင် ဘယ်လို လုပ်မည်နည်း။

တောရိုင်းထဲတွင် အိပ်ရသည် ကမှ ပို၍ ကောင်းမွန်သေးသည်။

အားလုံး ဤသို့ တွေးတောနေကြသည် ကလည်း ပုံမှန်ပါပင်။ မည်သို့ပင်ဖြစ်စေ မသိနားမလည်သော အရာများက ပို၍ ကြောက်စရာ ကောင်းလေသည်။

ရွှီယန် က တစ်ပတ်ခန့် လှည့်ပတ် ကြည့်ရှုပြီးနောက် ပျင်းရိလာသဖြင့် ခရီး ဆက်ထွက်လာခဲ့သည်။

သူက ရတနာ မြေပုံ ကို တစ်ခါတစ်ရံ ထုတ်ယူ ကြည့်ရှုလိုက်ကာ အဝေးဆီသို့လည်း လှမ်းကြည့်လိုက်သည်။

အဝေးတွင် ဝေဝါးနေသော တောင်ကုန်းများ၏ ပုံသဏ္ဍာန် ကို မြင်တွေ့နိုင်ပြီး လျှို့ဝှက် စခန်း မှာ ထိုဘက်တွင် ရှိမည်ဟု ခန့်မှန်းရလေသည်။

လွင်ပြင် ၏ ရှုခင်း ကလည်း မပျင်းရိစရာ မကောင်းချေ။

တစ်ခါတစ်ရံ တောသမင် အချို့ ပြေးထွက်သွားသည်ကို မြင်တွေ့ရတတ်ပြီး လင်းတ များ က ယိုယွင်း ပုပ်သိုးနေသော တิရစ္ဆာန် အသေကောင် များကို စားသောက်နေသည် ကိုလည်း မြင်တွေ့နိုင်လေသည်။

မြင်တွေ့ရတိုင်း လူများကို အဆက်မပြတ် အံ့ဩ ချီးကျူး သွားစေတတ်လေသည်။

ဤသို့ဖြင့် ရွှီယန် က လွင်ပြင် တွင် တဲထိုးကာ တစ်ညတာ အနားယူလိုက်ပြီး ခရီး တစ်ဝက်ခန့် ထပ်မံ သွားလာပြီးနောက် ဒုတိယနေ့ မွန်းလွဲပိုင်း တွင်တော့ တောင်ကုန်း အနီးသို့ ရောက်ရှိသွားခဲ့ပြီ ဖြစ်သည်။

တိုက်ရိုက်ထုတ်လွှင့်မှု အခန်းထဲရှိ လူအရေအတွက် မှာ များပြားနေဆဲ ဖြစ်သည်။

သို့သော် ဤတစ်ကြိမ် တွင်တော့ သံသယ ဝင်သော အသံများ ကလည်း ပို၍ များပြားလာခဲ့သည်။

လူအချို့ က လျှို့ဝှက် စခန်း တကယ် ရှိမရှိ ကို မေးမြန်းနေကြပြီး ထိုရတနာ မြေပုံ မှာ လှည့်ကွက် တစ်ခု သက်သက်သာ ဖြစ်မည်ဟု ထင်မှတ်နေသူ များလည်း ရှိကြလေသည်။

မည်သို့ပင်ဖြစ်စေ လူအများစု တွင် စိတ်ရှည် သည်းခံမှု မရှိကြသဖြင့် ဤအချိန်တွင် အမြန် ရစ်ကာ ဇာတ်သိမ်း ကိုသာ တိုက်ရိုက် ကြည့်ရှုချင်ကြလေသည်။

ရွှီယန် ကတော့ အလွန် တည်ငြိမ်နေလေသည်။

သူက တောင်ခြေ သို့ ရောက်ရှိသွားပြီးနောက် ပတ်ဝန်းကျင် အခြေအနေကို တစ်ချက် ကြည့်ရှုလိုက်သည်။

ထို့နောက် ရတနာ မြေပုံ တွင် မှတ်သားထားသော နေရာ အတိုင်း စတင် ရှာဖွေတော့သည်။

တကယ်တမ်းတွင် သူက ခရီးပန်းတိုင် မည်သည့် နေရာတွင် ရှိကြောင်းကို သိရှိထားပြီး ရတနာ မြေပုံ ကိုင်ထားခြင်းမှာ တိုက်ရိုက်ထုတ်လွှင့်မှု အခန်းရှိ ကြည့်ရှုသူများကို ပြသရန် အကြောင်းပြချက် တစ်ခု သက်သက်သာ ဖြစ်လေသည်။

မကြာခင်မှာပင် ရွှီယန် က ခရီးပန်းတိုင် သို့ ရောက်ရှိသွားခဲ့သည်။

ဤနေရာ တွင် လိုဏ်ဂူ တစ်ခု ရှိနေပြီး တူးဖော်ထားသော လိုဏ်ဂူ တစ်ခု ဖြစ်ကာ လိုဏ်ဂူ ပေါက် တွင် သစ်သား တိုင်များ တပ်ဆင်ထားသည့် အပြင် လိုဏ်ဂူ ၏ အရှေ့တွင် ရထား သံလမ်း ကဲ့သို့သော သံလမ်းများ လည်း ရှိနေလေသည်။

အပြင်ဘက် တွင် ပျက်စီးနေသော ရထား တစ်စီး ရှိနေပြီး သံလမ်း ၏ ဘေးတွင် လဲကျနေလေသည်။

ယိုယွင်း ပျက်စီးနေသော အခြေအနေ အရ ကြည့်မည် ဆိုလျှင် ဤနေရာ သို့ လူသူ ရောက်ရှိမလာခဲ့သည်မှာ နှစ်ပေါင်း မည်မျှ ကြာမြင့်နေပြီမှန်း မသိနိုင်တော့ချေ။

"ရှာတွေ့ပြီ... ဒီနေရာပဲ..."

"ဒီရတနာ မြေပုံ က အစစ်ပဲ..."

ရွှီယန်က လိုဏ်ဂူ ပေါက်ဝသို့ ရောက်ရှိသွားပြီး ပြောလိုက်သည်။

ခြေလျင် လျှောက်လာခဲ့သည်မှာ အတော်လေး ကြာမြင့်ခဲ့ပြီ ဖြစ်ပြီး နှစ်ရက် နီးပါးခန့် လမ်းလျှောက်ခဲ့ရကာ တောင်ကျော် ရေဖြတ် ၍ စွန့်ပစ်ထားသော ရွာငယ်လေး တစ်ရွာကို ဖြတ်ကျော်ပြီးနောက် ရွှီယန် က နောက်ဆုံးတွင် ဤနေရာ သို့ ရောက်ရှိလာခဲ့ပြီ ဖြစ်သည်။

ဒရုန်း က ဤအရာများကို အင်တာနက်သုံးစွဲသူများ၏ အရှေ့သို့ ပြသလိုက်သောအခါ အားလုံး ချက်ချင်းပင် အံ့ဩမှင်တက် သွားကြတော့သည်။

တကယ်ကြီး ရှာတွေ့သွားခဲ့ပြီ ဖြစ်သည်။ မှတ်ချက်များ က မျက်တောင်တစ်ခတ် အတွင်းမှာပင် ပေါက်ကွဲထွက်လာတော့သည်။

[လခွမ်း... လောင်ရွှီ... မင်း က တကယ် အစွမ်းထက်တာပဲ]

[တကယ်ကြီး အပျက်အစီး တွေ ရှိနေတာပဲ... အကြမ်းစား ကြီး]

[အစ်ကိုယန် ကို သံသယ ဝင်နေတဲ့ သူတွေ ရှိသေးလား... သူက နတ်ဘုရား ပဲ]

[ရတနာ ရှာတဲ့ နေရာမှာ လောင်ရွှီ ရဲ့ စွမ်းရည် က တကယ် နောက်ပြောင်နေတာ မဟုတ်ဘူး... အရမ်း အစွမ်းထက်တာ]

[ဒါက ဘယ်နေရာကြီးလဲ... သံလမ်း တွေတောင် ရှိသေးတယ်... အရင်တုန်းက သတ္တုတွင်း လား]

[ဒီနေရာကို ဝင်သွားလို့ ရမလား]

အင်တာနက်သုံးစွဲသူများ က အလွန် စိတ်လှုပ်ရှား နေကြပြီး အားလုံးက ဤထူးဆန်းသော လျှို့ဝှက် စခန်း ကို စူးစမ်းရှာဖွေရန် မစောင့်ဆိုင်း နိုင်တော့ချေ။

ရွှီယန် က လိုဏ်ဂူ ပေါက်ဝကို ကြည့်ရင်း အထဲသို့ ဝင်ရောက်ရန် အလျင်စလို မလုပ်သေးဘဲ ကျောပိုးအိတ် ကို ချထားကာ စားစရာ အချို့ကို ထုတ်ယူ၍ ခွန်အား ဖြည့်တင်းနေလိုက်သည်။

ဤကဲ့သို့သော နေရာမျိုး သို့ ဝင်ရောက်ရာတွင် အလျင်စလို လုပ်၍ မရနိုင်ချေ။

အောက်ဘက်တွင် ဘာတွေ ရှိနေမည်ကို မပြောပြတတ်ချေ။

တကယ်တမ်းတွင် ရွှီယန် ၏ ရင်ထဲ၌လည်း တွေဝေနေပြီး ဤတာဝန်ကို ပြီးမြောက်အောင် လုပ်ဆောင်မည်လား ဆိုသည်ကို မသေချာသေးချေ။

ဆိုက်ဘေးရီးယား ၏ ရေခဲလွှာ အကြောင်းကို သူ သိရှိထားပြီး တချို့သော အရာများက အလွန် ကြောက်စရာ ကောင်းလှပေသည်။

ဥပမာအားဖြင့် ရှေးဟောင်း ရောဂါပိုးမွှားများ၊ ရှေးဟောင်း ဗိုင်းရပ်စ် များ၊ နိုးထလာသော သံကြိုးကောင်များ စသည်တို့ ပင် ဖြစ်လေသည်။

ဤအရာများကို လုံးဝ မပတ်သက်မိစေရန် သတိထားရမည် ဖြစ်သည်။ ဤသည်က ကောင်းမွန်သော ကိစ္စ တစ်ခု မဟုတ်ချေ။

တကယ်တမ်းတွင် သူက ယခင်က ရောဂါပိုးမွှား များကို ခုခံနိုင်စွမ်း ရှိသော ခန္ဓာကိုယ် ကို ရရှိထားခဲ့ဖူးသော်လည်း အပြင်သို့ သယ်ဆောင်သွားပါကလည်း မကောင်းလှချေ။

ရွှီယန် က အစားအစာ အချို့ကို စားသောက်ပြီးနောက် လိုဏ်ဂူ ပေါက်ဝ ဆီသို့ လှမ်းကြည့်လိုက်သည်။

ဤအချိန် တွင် ညနေ ငါးနာရီခန့် ရှိနေပြီ ဖြစ်ပြီး သူက အထဲသို့ ဝင်ရောက် ကြည့်ရှုရန် ရည်ရွယ်ထားလေသည်။

ရွှီယန် က ပင်ပန်းသည်ဟု မခံစားရဘဲ မည်သို့ပင်ဖြစ်စေ အတွင်းဘက် တွင်လည်း မှောင်မည်း နေမည်သာ ဖြစ်ရာ ဤအချိန် တွင် ဝင်သွားသည် လည်း ကိစ္စမရှိချေ။

တစ်ညလုံး ကြည့်ရှုပြီးနောက် ပြန်ရတော့မည် ဖြစ်သည်။

သူက ဖုန်းကို ထုတ်ယူကာ မှတ်ချက်များကို တစ်ချက် ကြည့်လိုက်ရာ မှတ်ချက်များ က ထင်သည့် အတိုင်းပင် ဆူညံပွက်လောရိုက် နေလေသည်။

ရွှီယန် က တည်ငြိမ်စွာ ပြောလိုက်သည်။

"ဒီနေရာက တကယ်ကို လျှို့ဝှက် စခန်း တစ်ခုပါပဲ... ကျွန်တော့်ရဲ့ ပထမဆုံး တုံ့ပြန်မှု အရ ဆိုရင်တော့ သတ္တုတွင်း လို့ ထင်ရပေမဲ့ သေချာ ကြည့်လိုက်တော့ ပတ်ဝန်းကျင် မှာ သတ္တုရိုင်း တွေ နည်းနည်းလေး မှ မရှိဘူး... လိုဏ်ဂူ ပတ်ဝန်းကျင် မှာတောင် မရှိဘူး ဆိုတော့ မဟုတ်ဘူး ဆိုတာကို သက်သေပြနေတယ်..."

"ခန့်မှန်းရသလောက် တစ်ခုခုကို အောက်ချဖို့ အတွက် ဖြစ်မယ်..."

"သိပ်ကောင်းတဲ့ နေရာ တစ်ခုလို့ မခံစားရဘူး..."

"ဒါပေမဲ့ အားလုံးလည်း သိတဲ့ အတိုင်းပါပဲ... ရောက်လာပြီးမှတော့..."

တရုတ် လူမျိုးများ မိမိကိုယ်ကို ဒုက္ခပေးသည့် အကြီးမားဆုံးသော အကြောင်းပြချက် မှာ 'ရောက်လာပြီးမှတော့' ပင် ဖြစ်လေသည်။

တကယ်ပင် ရောက်လာပြီးမှတော့ အထဲဝင် မကြည့်ပါက အလွန် နှမြောစရာ ကောင်းလှပေသည်။

နောက်ပိုင်းတွင် သေချာပေါက် နောင်တ ရနေလိမ့်မည်။

ရွှီယန် က စက်ပစ္စည်း များကို စတင် စီစဉ်တော့သည်။

သူက ဓားငယ် နှင့် ခေါက်တုတ် တို့ကို တပ်ဆင်လိုက်ပြီးနောက် ခေါင်းတွင် ဓာတ်မီး တစ်လက် တပ်ဆင်လိုက်ကာ ဘေးဘက်တွင် အဆိပ်ငွေ့ ကာကွယ်ရေး မျက်နှာဖုံး ပါရှိသော လွယ်အိတ် တစ်လုံးကို လွယ်ထားလိုက်သည်။

မီးခြစ်၊ အလင်းအားပြင်း ဓာတ်မီး များကိုပါ ယူဆောင်လာခဲ့ပြီး ရင်ခွင်ထဲတွင်လည်း အချက်ပြ သေနတ် တစ်လက်ကို ထည့်သွင်းထားလေသည်။

အသက်ကယ်နိုင်မည့် ပစ္စည်းများ ကို အပြည့်အဝ ယူဆောင်ထားခြင်း ပင် ဖြစ်သည်။

ထို့နောက် သူက ရေတစ်ဝက်ခန့် ထပ်မံ သောက်လိုက်ပြီး လိုဏ်ဂူ အတွင်းသို့ ဝင်ရောက်ရန် ပြင်ဆင်လိုက်တော့သည်။

ဒရုန်း က အနောက်မှ လိုက်ပါလာပြီး အနိမ့်ပျံသန်းမှု ဖြင့် လိုက်ပါသည့် မုဒ် ကို ဖွင့်ထားလိုက်သည်။

ဤမုဒ် က အရှိန် မမြန်သော်လည်း အလွန် တည်ငြိမ်လှပေသည်။ အင်တာနက်သုံးစွဲသူများ က ပို၍ စိုးရိမ် ထိတ်လန့် လာကြလေသည်။

[လောင်ရွှီ... မင်း တကယ်ကြီး ဝင်သွားမလို့လား]

[သူ့ရဲ့ သတ္တိကိုတော့ ငါ တကယ် အရှုံးပေးတယ်]

[ထိပ်တန်း လိုက်ဖ်လွှင့်သူ က တကယ့် ထိပ်တန်း ပဲ]

[တကယ်ကို ပြိုင်ဘက်ကင်း ပဲ]

ရွှီယန် နေ့လယ်ဘက် တွင် တိုက်ရိုက်ထုတ်လွှင့်မှု ပြုလုပ်စဉ်က လူကြိုက်များမှု က အနည်းငယ် ကျဆင်းသွားခဲ့သည်။

မည်သို့ပင်ဖြစ်စေ လူသူကင်းမဲ့သော လွင်ပြင် တွင် ခရီးသွားရခြင်းက အနည်းငယ် ပျင်းရိစရာ ကောင်းသဖြင့် ပင် ဖြစ်လေသည်။

သို့သော် လိုဏ်ဂူ ပေါက်ဝကို ရှာတွေ့လိုက်သည့် အခိုက်အတန့် မှ စတင်၍ လူအရေအတွက် က လျင်မြန်စွာ တိုးတက်လာခဲ့ပြီး ငါးသိန်း ခြောက်သိန်း အရေအတွက် ဆီသို့ ဦးတည် သွားနေပြီ ဖြစ်သည်။

ဗီဒီယို အတို ပလက်ဖောင်း ၏ ကြည့်ရှုသူ အရေအတွက် က တကယ်ကို မှန်ကန်လှပြီး အင်တာနက်သုံးစွဲသူများ က ဘယ်နေရာ ကောင်းလျှင် ထိုနေရာသို့ ကြည့်ရှုကြခြင်း ပင် ဖြစ်လေသည်။

ဤဘက်တွင် ကြည့်ကောင်းသည် ကို သိသည်နှင့် အားလုံး က ချက်ချင်းပင် ပြန်ရောက်လာကြတော့သည်။

ရွှီယန်၏ ရင်ထဲတွင် လည်း အနည်းငယ် သတိထားနေမိသည်။

ဆိုက်ဘေးရီးယား ၏ ရှားပါးအဆင့် တာဝန် များ အများစု မှာ အလွန် ကြီးမားသော အန္တရာယ်များကို ရင်ဆိုင်ရမည့် တာဝန်များ ဖြစ်ကြောင်း သူ သိရှိထားလေသည်။

ဥပမာအားဖြင့် ယခင် တစ်ကြိမ် ဝံပုလွေအုပ် ၏ နောက်ယောင်ခံ လိုက်ခြင်း မှ အသက်ရှင် လွတ်မြောက်ခဲ့ရခြင်း မှာလည်း ကံကောင်းမှု တစ်ခု အဖြစ် သတ်မှတ်နိုင်ပေသည်။

အကယ်၍ ဝံပုလွေအုပ် သာ အတူတကွ ဝင်တိုက်မည် ဆိုပါက သူ လည်း ကိုင်တွယ် ဖြေရှင်းရန် လွယ်ကူမည် မဟုတ်ချေ။

ဤတာဝန် ကလည်း ထိုမျှလောက် ရိုးရှင်းမည် မဟုတ်ကြောင်း ခန့်မှန်းရလေသည်။

"နောက်ပိုင်း စွန့်စားပြီး စိတ်လှုပ်ရှားမှု တွေ ရှာချင်ရင် ဆိုက်ဘေးရီးယား ကို လာခဲ့ရမယ်..."

"ဒီမှာ တာဝန် တွေက ပြီးတာ မြန်ပေမဲ့ အရမ်း အန္တရာယ် များလွန်းတယ်..."

"ပြီးရင်လည်း သတိထားရဦးမယ်..."

ရွှီယန်က ခေါင်းပေါ်ရှိ ဓာတ်မီးကို ဖွင့်လိုက်ပြီး လက်ကိုင် ဓာတ်မီး ကိုပါ ဖွင့်လိုက်သည်။

ထို့နောက် ဤသို့ဖြင့် လိုဏ်ဂူ အတွင်းသို့ တိုက်ရိုက် လျှောက်ဝင်သွားတော့သည်။