အခန်း ၄၆၇

အခန်း (၄၆၇) အီဘိုနီ အဆင့်မြှင့်တင်ခြင်း (အဆင့် ၉)၊ ဘူတာရုံမှ ထွက်ခွာခြင်း

【ကိုယ်ခံစွမ်းအား - ၁၃၃】【စိတ်စွမ်းအား - ၂၆၀】

ရဲချီယန်၏ စိတ်စွမ်းအား အပြည့်အဝ ပြန်လည်ပြည့်ဖြိုးလာချိန်သည် သူ အဆင့်မြင့် အသွင်ကူးပြောင်းခြင်းကို ပြုလုပ်နိုင်ပြီဖြစ်ကြောင်း ဆိုလိုနေပေသည်။

【ဝိညာဉ် လက်နက်ကိရိယာ ချဲ့ထွင်ခြင်း စာအုပ်】

ဤစာအုပ်သည် တစ်အုပ်လုံး မီးခိုးရောင်နှင့် အဖြူရောင်စပ်နေပြီး အတွင်းတွင် မည်သည့်စာသားမျှ မပါရှိဘဲ ဖတ်ရှု၍မရနိုင်သော အထူးမီးခိုးဖြူရောင် သင်္ကေတများသာ ပါရှိလေ၏။

ရဲချီယန်၏ လက်ချောင်းထိပ်မှ မိုးပြာရောင် အလင်းတန်းလေးတစ်ခု စီးဆင်းသွားကာ အလင်းတန်းများ ကျဆင်းလာပြီး စာအုပ်နှင့် ရစ်ပတ်ပေါင်းယှက်သွားတော့သည်။

【ပါရမီ စွမ်းရည် အသက်ဝင်လာခဲ့သည်】

"အဆင့်မြင့် အသွင်ကူးပြောင်းခြင်း" ဟု သူ ခပ်တိုးတိုး ရေရွတ်လိုက်၏။

ချဲ့ထွင်ခြင်း စာအုပ်က လေထဲတွင် လွင့်မျောလာပြီး လေမတိုက်ဘဲ လှုပ်ရှားနေခဲ့သည်။

ဝှစ်ခနဲ အသံနှင့်အတူ စာမျက်နှာများက ပင်မစာအုပ်မှ တစ်ရွက်ပြီးတစ်ရွက် ကွာကျလာလေ၏။

၎င်းတို့မှာ အစိတ်စိတ်အမွှာမွှာ ကွဲအက်သွားပြီးနောက် တစ်ဖန် ပြန်လည် ပေါင်းစည်းသွားကြသည်။

【အဆုံးစွန် အဆင့်မြင့် အသွင်ကူးပြောင်းခြင်း】

【စိတ်စွမ်းအား - ၂၆၀ → ၆၀】

အမှတ် နှစ်ရာ ကုန်ကျသွားပြီး အလားအလာများ လုံးဝ ကုန်ဆုံးသွားခဲ့လေပြီ။ 【အဆုံးစွန်】 ကို အသက်ဝင်စေသော အဆင့်မြင့် အသွင်ကူးပြောင်းခြင်း တစ်ခုအတွက်တော့ ဤသည်က သိပ်မများလှပေ။

သေချာသည်ကတော့ ဤသည်မှာ သူ၏ ပါရမီစွမ်းရည်က မိမိကိုယ်ကိုယ် အဆင့်မြင့် အသွင်ကူးပြောင်းခြင်း နှစ်ကြိမ် ပြုလုပ်ပြီးနောက် ပိုမို အစွမ်းထက်လာခဲ့သောကြောင့်လည်း ဖြစ်၏။

【ဝိညာဉ် လက်နက်ကိရိယာ ချဲ့ထွင်ခြင်း စာအုပ် → သန့်စင်သော သတ်ဖြတ်ခြင်း မှော်ဝင် · လက်နက် ချဲ့ထွင်ခြင်း စာအုပ်】

【သန့်စင်သော သတ်ဖြတ်ခြင်း မှော်ဝင် · လက်နက် ချဲ့ထွင်ခြင်း စာအုပ်】

【လက်နက်တစ်ခုအပေါ် အသုံးပြုပြီးနောက် ၎င်းလက်နက်သည် လက်နက်ကိရိယာ ချဲ့ထွင်ခြင်းကို ရရှိမည်ဖြစ်သည်။ ချဲ့ထွင်မှု ပမာဏမှာ လက်နက်အဆင့်များအပေါ် မူတည်၍ ကွဲပြားသွားမည်ဖြစ်သည်】

【အဆင့် ၁ မှ ၇ ထိ - လက်နက်၏ အဆင့်ကို ၈ သို့ မြှင့်တင်ပေးမည်ဖြစ်ပြီး 【သန့်စင်သော သတ်ဖြတ်ခြင်း】 အခြေအနေဖြင့် မှော်ဝင်စေမည်ဖြစ်သည်】

【အဆင့် ၈ - အဆင့် ၉ သို့ မြှင့်တင်ပေးမည်ဖြစ်ပြီး မှော်ဝင်မှု ရှိမည်မဟုတ်ပါ】

【အဆင့် ၉ နှင့်အထက် - အဆင့်ကို မြှင့်တင်ပေးမည်မဟုတ်ဘဲ 【သန့်စင်သော သတ်ဖြတ်ခြင်း】 အခြေအနေဖြင့်သာ မှော်ဝင်စေမည်ဖြစ်သည်】

【သန့်စင်သော သတ်ဖြတ်ခြင်း - တိုက်ခိုက်မှုများတွင် 【သန့်စင်သော】 အမျိုးအစား ထိခိုက်ပျက်စီးမှုများ သက်ရောက်စေမည်ဖြစ်ပြီး စိတ်စွမ်းအား အမျိုးအစား တိုက်ခိုက်မှုများအပေါ် ထိခိုက်ပျက်စီးမှုကို ပိုမို တိုးမြှင့်ပေးမည်ဖြစ်သည်】

သူက အီဘိုနီကို အဆင့် ၉ သို့ မြှင့်တင်ရမည်လား။ သို့မဟုတ် ကောင်းကင်သိမ်းငှက်ကို အဆင့် ၈ သို့ မြှင့်တင်ရမည်လား။

ဟင့်အင်း၊ လေးနက်စွာ တွေးတော တွေဝေနေစရာ အကြောင်းမရှိပေ။ အဆင့် ၈ နှင့် အဆင့် ၉ ဆိုသည်မှာ ခြားနားသော နယ်နိမိတ်မျဉ်းတစ်ခု ဖြစ်နေခဲ့ပြီ မဟုတ်ပါလော။

ရဲချီယန် ခံစားမိသည်မှာ ဤစာအုပ်၏ အဆင့်မြင့် အသွင်ကူးပြောင်းခြင်းအတွက် အမှတ် ၂၀၀ တိုင်အောင် ကုန်ကျရခြင်း၏ အဓိကအကြောင်းရင်းမှာ အတိုဆုံး ဖော်ပြချက်ဖြစ်သော "အဆင့် ၈ ပစ္စည်းကို အဆင့် ၉ သို့ မြှင့်တင်ပေးခြင်း" ဆိုသည့်အပိုင်းတွင် အများစု ကုန်ဆုံးသွားခဲ့ခြင်းကြောင့်ပင် ဖြစ်နိုင်သည်ဟုတောင် ထင်မှတ်ရပေ၏။

သန့်စင်သော သတ်ဖြတ်ခြင်း အခြေအနေက အီဘိုနီအတွက်မူ အဓိပ္ပါယ်မဲ့လှသည်။

အဘယ်ကြောင့်ဆိုသော် သူကိုယ်တိုင်က အစွမ်းမြှင့်တင်မှု အမျိုးမျိုးကို ပြုလုပ်ထားပြီးဖြစ်ရာ သူပစ်ခတ်လိုက်သော ကျည်ဆန်များက မွေးရာပါ အကျိုးသက်ရောက်မှု အမျိုးမျိုးကို သက်ရောက်နိုင်စွမ်း ရှိနေပြီးဖြစ်သောကြောင့်တည်း။

သူ့တွင် 【သန့်စင်သော အလင်း】 မရှိသည်လည်း မဟုတ်ပေ။ ဤထပ်ဆောင်း အကျိုးသက်ရောက်မှုက 【သန့်စင်သော သတ်ဖြတ်ခြင်း】 ထက် ပိုမို အစွမ်းမထက်လောက်သော်ငြား လုံလောက်မှုတော့ ရှိနေခဲ့ပြီ ဖြစ်၏။

အကြောင်းမှာ သူက ဝိညာဉ်ခန္ဓာကိုယ်များ၊ မကောင်းဆိုးဝါး သက်ရှိများနှင့် အလားတူ ရန်သူများကို ရင်ဆိုင်ရမည်ဆိုလျှင် သူ၏ အစစ်အမှန် အဆုံးစွန်လက်နက်မှာ သန့်စင်သော မြေစွဲကျောက်တုံး သာလျှင် ဖြစ်ပေသည်။

မည်သည့် တုံ့ဆိုင်းမှုမျှမရှိဘဲ ရဲချီယန်က လုပ်ငန်းစဉ်ခုံကို ဆင့်ခေါ်လိုက်သည်။

ချဲ့ထွင်ခြင်း စာအုပ်နှင့် အီဘိုနီ။ ထိုနှစ်ခုကို အတူတကွ တင်ထားလိုက်သည့် အခိုက်အတန့်မှာပင် အလင်းမျက်နှာပြင်တစ်ခု ထွက်ပေါ်လာလေ၏။

ယင်းအပေါ်တွင် စာသားခလုတ် တစ်ခုသာ ရှိနေခဲ့သည်။

【ချဲ့ထွင်ရန်】

သူက လက်မြှောက်ကာ နှိပ်လိုက်လေ၏။

ချဲ့ထွင်ခြင်း စာအုပ်ဆီမှ သန့်စင်သော အလင်းတန်းများ ပေါက်ကွဲထွက်ပေါ်လာပြီး စာမျက်နှာ တစ်ရွက်ပြီးတစ်ရွက်က အီဘိုနီနှင့် ပေါင်းစပ်သွားကာ သန့်စင်သော ကမ္ပည်းစာများက သေနတ်ကိုယ်ထည်ပေါ်တွင် ရေးထွင်းခံရပြီးနောက် လျင်မြန်စွာ ပျောက်ကွယ်သွားကြသည်။

အီဘိုနီက အသွင်ပြောင်းလဲနေခဲ့၏။

၎င်း၏ ပုံသဏ္ဌာန် ပြောင်းလဲမသွားသလို ၎င်း၏ စွမ်းရည်များကလည်း ပြောင်းလဲမသွားခဲ့ချေ။

သို့သော်...

【အီဘိုနီ - တက်လှမ်းခြင်း (အဆင့် ၈ → ၉)】

ချဲ့ထွင်ခြင်း ပြီးဆုံးသွားပြီးနောက် ရဲချီယန်က လုပ်ငန်းစဉ်ခုံပေါ်မှ ပစ္စတိုကို ကောက်ယူလိုက်သည်။

လေးလိုက်တာ။

ဟင့်အင်း၊ အလေးချိန်က ပြောင်းလဲသွားခြင်း မဟုတ်ပေ။

၎င်း၏ 【ဝိညာဉ်】 သို့မဟုတ် ၎င်း၏ စွမ်းအားက ပိုမို လေးလံလာခဲ့ခြင်းသာ ဖြစ်လေ၏။

သူက သေနတ်ကို မြှောက်ကာ ချိန်ရွယ်လိုက်ပြီး ခလုတ်ကို ဆွဲလိုက်သည်။

အနက်နှင့် အဖြူ ရောင်စုံ သံချပ်ကာဖောက် ပေါက်ကွဲစေတတ်သော ကျည်ဆန်များက အဝေးရှိ မုန်တိုင်းနှင့် သဲခုံများအတွင်းသို့ အပေါက်ကြီးတစ်ပေါက် ဖြစ်သွားအောင် ပေါက်ကွဲထွက်သွားစေခဲ့၏။

အက်ကွဲကြောင်းက ပျောက်ကွယ်သွားလေသည်။

သူ၏လက်ထဲရှိ သေနတ်သည် ယခုအခါ စွမ်းအားများကို ပို၍ပို၍ သယ်ဆောင်နိုင်စွမ်းရှိနေပြီဖြစ်ကြောင်း ရဲချီယန် ခံစားမိလိုက်သည်။

ထို့အပြင် ၎င်း၏ အလားအလာများလည်း မြင့်တက်သွားခဲ့ချေပြီ။

သူက ၎င်းကို အဆင့်မြင့် အသွင်ကူးပြောင်းခြင်း ပြုလုပ်သင့်သလား။ အဆင့် ၉ ကို သူ၏ လက်ရှိ ပါရမီဖြင့် တစ်ကြိမ် ပြုလုပ်လိုက်ပါက ၎င်းသည် အဆုံးစွန် အဆင့်မြင့် အသွင်ကူးပြောင်းခြင်း ဖြစ်သွားပေမည်။

ပြီးလျှင် အဆုံးစွန် အဆင့်မြင့် အသွင်ကူးပြောင်းခြင်း ဖြစ်သွားသည်နှင့် ၎င်းက အပြီးသတ် အတည်ပြုသွားမည် ဖြစ်လေ၏။

ဤသည်မှာ မတူညီသော လမ်းကြောင်းနှစ်ခု ဖြစ်သည်။

ထို့အပြင် ရဲချီယန်၏ အဆင့်မြင့် အသွင်ကူးပြောင်းခြင်း အတွက် မတူညီသော ရွေးချယ်မှုများလည်း ဖြစ်ပေ၏။

လရိပ်ဓားကဲ့သို့ အဆင့်တစ်ခု၌ အဆုံးစွန် အဆင့်မြင့် အသွင်ကူးပြောင်းခြင်းကို ပြီးမြောက်စေမည်လား။

သို့မဟုတ် ရဲချီယန်၏ ကိုယ်ပိုင် ပါရမီ တိုးတက်လာမည့်အချိန်ကို ဆက်လက် စောင့်ဆိုင်းကာ ပိုမိုမြင့်မားသော အဆင့်သို့ တက်လှမ်းစေမည်လား။

ရဲချီယန်က လရိပ်ဓားအတွက်မူ ပထမနည်းလမ်းကို ရွေးချယ်ခဲ့သည်။ သို့သော် သူ့ကို အမြဲတမ်း အဖော်ပြုပေးခဲ့သော ဤအီဘိုနီအတွက်မူ ဒုတိယနည်းလမ်းကိုသာ သူ ရွေးချယ်လိုခဲ့၏။

အီဗ်ကို ပေးအပ်ထားသော ထာဝရ ဖြတ်တောက်သူ မှလွဲ၍ ဤသေနတ်သည် တကယ်ကိုပင် သူ၏ ပထမဆုံး လက်နက် ဖြစ်ခဲ့ပေသည်။

အီဘိုနီက မည်မျှအထိ ခရီးဆက်နိုင်မည်ကို ရဲချီယန် မြင်တွေ့ချင်ခဲ့၏။

ထို့အပြင် သူကိုယ်တိုင်ကရော မည်မျှအထိ ရောက်နိုင်မည်ကိုလည်း မျက်မြင်ကိုယ်တွေ့ ကြုံချင်နေခဲ့လေသည်။

နောက်တစ်နေ့တွင်...

သဲကန္တာရ၏ ပထမဆုံးသော နေရောင်ခြည်က ရထားအတွင်းသို့ ဖြာကျလာချိန်၌ ရဲချီယန်သည် သူ၏ ဇိမ်ခံ အိပ်မက် ကုတင် ပေါ်မှ နိုးထလာခဲ့သည်။

မျက်နှာသစ် ကိုယ်လက်သန့်စင်ပြီး စားသောက်လိုက်သည်။

နောက်ဆုံး အပ်ကြီးပျား တစ်ကောင်က အပြင်ဘက်ရှိ သဲကန္တာရ မုန်တိုင်းကို အန်တုကာ ၎င်း၏ ပျားအုံဆီသို့ ပြန်လည် ရောက်ရှိလာခဲ့၏။

မြွေရေခွံအိတ်တစ်လုံးကို သယ်ဆောင်လာသော ကျီးကန်းနတ်ဆိုး ကလည်း နောက်ဆုံး သယံဇာတ အသုတ်ကို ရထားတွဲထဲသို့ ယူဆောင်လာခဲ့လေသည်။

ရဲချီယန် သိနေခဲ့သည်။

အချိန်တန်ပြီ၊ သူ ရှေ့ဆက် ချီတက်သင့်ပြီ ဖြစ်၏။

"ထွက်ခွာမယ်"

မုန်တိုင်းမျက်လုံး ကျောက်တုံး ၏ စွမ်းအားက ဖြည်းညင်းစွာ ပျောက်ကွယ်သွားလေသည်။

သဲများ ရောနှောနေသော လေပြင်းများက ရထားပြတင်းပေါက်များကို ရိုက်ခတ်ကာ တဖြန်းဖြန်း မြည်သံများကို ဖြစ်ပေါ်စေခဲ့၏။

သူက ထွက်ခွာရန် ခလုတ်ကို နှိပ်လိုက်သည်။

ရင်းနှီးပြီးသား လေဟာနယ် နေရာလွတ်က စက်ခေါင်းတွဲ၏ အရှေ့တည့်တည့်တွင် ထွက်ပေါ်လာလေတော့သည်။

သံလမ်းများက ရှေ့သို့ ဆန့်ထွက်သွားပြီး ရထားကြီး စတင် လှုပ်ရှားလာခဲ့သည်။

ရထားဥဩဆွဲသံနှင့်အတူတကွ။

လိမ့်တက်လာသော သဲများနှင့် ဖုန်မှုန့်များနှင့်အတူတကွ။

"ပွီး..."

ရထားကြီးက လေဟာနယ်ကို ဖြတ်သန်းသွားကာ ဤကမ္ဘာကြီးကို စွန့်ခွာသွားလေတော့၏။

ထိုမြို့တော်၏ အပျက်အစီးများမှာ သဲမုန်တိုင်း၏ ဖုံးလွှမ်းခြင်းကို ခံလိုက်ရပြီး မကြာမီအချိန်အတွင်း လူအချို့ ဤနေရာသို့ ရောက်ရှိလာကာ ပြန့်ကျဲနေသော ရုပ်အလောင်းများကို မြင်တွေ့ရပြီး အပျက်အစီးများ ပြည့်နှက်နေသော မြို့တော်ကို မြင်တွေ့ကြပေလိမ့်မည်။

သူတို့ ထွက်ပြေးကြပြီး သတင်းများ ဖြန့်ဝေကြလိမ့်မည်။

သို့သော် အဆုံးစွန်သော ရလဒ်မှာ မေ့လျော့ခြင်း၊ လွှမ်းမိုးအုပ်စိုးခြင်းနှင့် မြို့တော်သစ်တစ်ခု တည်ထောင်ခြင်းသာ ဖြစ်ပေလိမ့်မည်။

သို့ရာတွင် ယခင်ကဲ့သို့ အစွမ်းထက်တော့မည် မဟုတ်သည်ကလွဲ၍ပေါ့။

ရထားစနစ်၏ အလင်းမျက်နှာပြင် က ဤမြို့တော်၏ အပျက်အစီးများအထက်တွင် ထွက်ပေါ်လာခဲ့သည်။

မည်သူမျှ မမြင်တွေ့ခဲ့သလို မည်သူမျှလည်း မြင်တွေ့ရမည် မဟုတ်ချေ။

ယင်းအပေါ်တွင် စာကြောင်းများက ဆက်တိုက် ထွက်ပေါ်လာနေခဲ့၏။

【နက်ဖီလင်မ်၏ ခြံဝင်း (အဆင့် ၉ → ၇)】

【အချိန်စီးဆင်းမှု —】

【လွင်တီးခေါင်ပြင်နှင့် ထိန်းညှိပြီး】

【ဝင်ရောက်စွက်ဖက်ခြင်း မရှိ】

【နတ်ဘုရား မရှိ】

【ဘာမှမရှိ】

【မှတ်တိုင် အမည်ပြောင်းလဲခြင်း - သေဆုံးနေသော မကောင်းဆိုးဝါး အပျက်အစီးများ (အဆင့် ၇)】

— — — —

"ငါတို့ ပြန်ရောက်ပြီ"

ရထားပြတင်းပေါက် အပြင်ဘက်ရှိ မြင်ကွင်းက ရင်းနှီးနေသော်လည်း အနည်းငယ် စိမ်းသက်နေဆဲဖြစ်သော လွင်တီးခေါင်ပြင်ဆီသို့ ပြန်လည် ရောက်ရှိသွားခဲ့လေ၏။

စိမ်းသက်နေရသည့် အကြောင်းရင်းမှာ ယခုလက်ရှိ လွင်တီးခေါင်ပြင်၌...

မျက်စိတစ်ဆုံးတွင် ကောင်းကင်ယံအထိ ထိုးတက်နေသော စူပါ ဧရာမ လေဆင်နှာမောင်း အမြောက်အမြား ရှိနေခြင်းကြောင့်ပင်။

ကောင်းကင်ယံက မှိုင်းညို့နေခဲ့သည်။

ပြင်းထန်လှသော လျှပ်စီးကြောင်းများက ဤလေဆင်နှာမောင်းများနှင့် ရစ်ပတ်ယှက်နွှယ်နေကြ၏။

ရထားကို လိုက်လံ ဖမ်းဆီးနေသော မကောင်းဆိုးဝါးများမှာ လေဆင်နှာမောင်းများထဲသို့ လွင့်စင်ပါသွားကြလေသည်။

လွင်တီးခေါင်ပြင်၏ မီးခိုးရောင် ဖုန်မှုန့်များက လွတ်လပ်စွာ လွင့်မျောနေပြီး စက္ကန့်အနည်းငယ်အတွင်းမှာပင် ရဲချီယန်၏ ရထားပြတင်းပေါက်များကို ပြာမှုန့်အလွှာတစ်ခုဖြင့် ဖုံးလွှမ်းသွားစေခဲ့တော့သည်။

【ယနေ့ ရာသီဥတု - ဧရာမ လေဆင်နှာမောင်းများ】

【မနက်ဖြန် ရာသီဥတု - စူပါ ဧရာမ လေဆင်နှာမောင်းကြီးများ】

နေသာသော အရုပ်လေး ၏ ပုံပန်းသဏ္ဌာန်မှာ ၎င်း၏ လျှာကို ထုတ်ကာ ရှုပ်ပွပြီး တွန့်လိမ်နေသော ပုံစံအဖြစ်သို့ ပြောင်းလဲသွားခဲ့လေ၏။

ယနေ့၏ ဧရာမ လေဆင်နှာမောင်းများက ဤမျှလောက် ပြင်းထန်နေခဲ့ပြီ ဖြစ်သည်။

မနက်ဖြန်တွင် ၎င်းကို စူပါ ဆိုသည့် စကားလုံးပါ ထပ်တိုးထားသေးသည်လား။

"ဒီရာသီဥတုက ရူးနေတာလား"

သူက ချမ်းသာကြွယ်ဝမှု ဒိုင်းလွှာ ကို အသက်သွင်းလိုက်သော်လည်း ခေါင်မိုးပေါ်တွင် ရှိနေခဲ့သော အီဗ် ကို ရထားတွဲအတွင်းသို့ ပြန်လည် ခေါ်ယူလိုက်ရသေးသည်။

ဤအခြေအနေတွင် ချမ်းသာကြွယ်ဝမှု ဒိုင်းလွှာသာ ခံနိုင်ရည်မရှိပါက ရထားက ကိစ္စမရှိသော်လည်း အီဗ်သာ တခြားနေရာသို့ လွင့်စဉ်သွားလျှင် ပြဿနာတက်ပေလိမ့်မည်။

"အဆင့်နိမ့် ရထားမောင်းနှင်သူတွေအတွက်ရော ရာသီဥတုက အတူတူပဲလား"

ရဲချီယန်က တွေးတောလိုက်ရင်း အများသုံး ချက်ဘောက်စ် ကို ဖွင့်ကာ ရာသီဥတုနှင့် ပတ်သက်သော အဓိက စကားလုံးများကို ရှာဖွေလိုက်လေသည်။

【၂၃၈၈ / ၁၀၀၀၀】

【"ဒီ သောက်ကျိုးနည်း ရာသီဥတုကြီး၊ လွင်တီးခေါင်ပြင်က ကမ္ဘာပျက်တော့မှာလား။ ငါတို့တော့ သေပြီပဲ"】

【"ပြောရခက်တယ်၊ ငါ့ဂိုဏ်းက စီနီယာက စာပို့လာတယ်။ နောက်လာမယ့် အချိန်ကာလအတွက် လေက ပိုပြီး ပြင်းထန်လာဖို့ပဲ ရှိတယ်တဲ့။ မြို့တော်ကလည်း ဒီအစွန်းရောက် ရာသီဥတုကို ကာကွယ်ဖို့ ဒိုင်းလွှာကို အသက်သွင်းထားပြီးပြီ။ ငါလည်း ခဏလောက် သွားပုန်းနေတာ ပိုကောင်းမယ်ထင်တယ်"】

【"တကယ်ပဲ၊ ပြီးခဲ့တဲ့ ရက်အနည်းငယ်ကတည်းက ဘူတာရုံကမ္ဘာတွေမှာတောင် လေပြင်းတွေ တိုက်ခတ်နေလို့ အရင်ကထက် ဖြတ်သန်းရ ပိုခက်လာတယ်။ ငါလည်း မြို့တစ်မြို့မှာ ခဏလောက် သွားပုန်းနေဖို့ လိုတယ်"】

ရထားမောင်းနှင်သူ အများစုကလည်း တူညီသော ဆုံးဖြတ်ချက်ကို ချမှတ်ခဲ့ကြပုံရသည်။

မြို့ထဲတွင်နေ၍ လေပြင်းများ ငြိမ်သက်သွားသည်အထိ စောင့်ဆိုင်းကာ ထို့နောက်မှ ရှေ့ဆက် ချီတက်ကြရန်ပင်။

ဤသည်က တကယ်ကို မှန်ကန်သော ဆုံးဖြတ်ချက်တစ်ခု ဖြစ်ပေ၏။

【တီ... တီ...】

ဘေးဘက်တွင် သူငယ်ချင်းထံမှ စာတိုလေးတစ်ခု ထွက်ပေါ်လာခဲ့သည်။

၎င်းအပေါ်တွင် မွန်ရိုးဂျီနာ ၏ အမည်က အနည်းငယ် တလက်လက် တောက်ပနေခဲ့၏။

【"မောင်လေးရဲ... နောက်ထပ် ဘူတာရုံကမ္ဘာတစ်ခုကို အောင်နိုင်ခဲ့တဲ့အတွက် ဂုဏ်ပြုပါတယ်နော်"】