အခန်း ၅၇

အခန်း ၅၇ ဘာဘီကျူး ပါတီ

တနင်္လာနေ့၊ မနက် ခုနစ်နာရီ ငါးဆယ် မိနစ်။

ဂျေးကော့ ဖက်ဒရယ် ရုံးအဆောက်အအုံ ၏ ကားပါကင်တွင် ရှက်ဗရိုလက် ကား တစ်စီး ဖြည်းညင်းစွာ ရပ်တန့်သွားသည်။ ရိုအန် က ထိုင်ခုံ ခါးပတ်ကို ဖြုတ်ကာ ကားပေါ်မှ ဆင်းလာပြီးနောက် တစ်ကိုယ်လုံး ကြွက်သားများ အပြည့်အဝ ရှိနေသော ရက်ဒ် လည်း နောက်ခန်းမှ ဆင်းလာလေသည်။

"ကော်ဖီ သွားဝယ်လိုက်ဦးမယ် ရိုအန်..."

ရက်ဒ် က နာရီကို ငုံ့ကြည့်လိုက်ပြီး အလုပ်စရမည့် အချိန်နှင့် အတော်လေး လိုသေးကြောင်း တွေ့လိုက်ရသဖြင့် ကားပါကင် မျက်နှာချင်းဆိုင်ရှိ ကော်ဖီဆိုင်ကို လက်ညှိုးထိုးပြကာ ရိုအန် ကို ပြုံးလျက် မေးမြန်းလိုက်သည်။

"မင်း တစ်ခွက်လောက် သောက်မလား..."

"ဒါပေါ့... ဒါပေမဲ့ သာမန် ကော်ဖီ ဆိုရင် ရပါပြီ... သကြား နဲ့ နို့ ရောဖို့ မမေ့နဲ့ဦး..."

ရိုအန် က အနည်းငယ် ရှုံ့မဲ့နေသော မျက်နှာထားဖြင့် ဆိုသည်။

"ငါက အချို သဘောကျလို့..."

"အိုကေ..."

ရက်ဒ် က သူ့ကို ပြုံးပြပြီး ခေါင်းညိတ်ကာ ကော်ဖီဆိုင်ဆီသို့ လျှောက်သွားလေသည်။

ရိုအန် ကမူ အနည်းငယ် လေးလံနေသော ခေါင်းကို ပုတ်လိုက်ပြီး ဖက်ဒရယ် ရုံးအဆောက်အအုံ အတွင်းသို့ ဝင်ရောက်သွားတော့သည်။

စနေနေ့က သြဂတ်စ် ဆုကြေးငွေများ ခွဲဝေပေးပြီးနောက် စုံထောက်များ အားလုံး အလုပ်မှ ချက်ချင်း ပြန်သွားခဲ့ကြပြီး ကိုယ်ပိုင် စနေ တနင်္ဂနွေ အားလပ်ရက် များကို စတင် ဖြတ်သန်းခဲ့ကြသည်။

ထိုအထဲမှ စုံထောက် အချို့က ရိုအန် ကို ၎င်းတို့၏ အိမ်သို့ အလည်လာရန် ဖိတ်ခေါ်ခဲ့ကြသော်လည်း လစာနှင့် ဆုကြေးငွေများ ရရှိထားပြီး ဖြစ်သဖြင့် ထိုတိုက်ခန်း ကိစ္စကို ဖြေရှင်းရန် အလောတကြီး ဖြစ်နေသော ရိုအန် က အားလုံးကို ပြုံးလျက် ခေါင်းခါ ငြင်းပယ်ခဲ့လေသည်။

အထက်လူကြီးများက ကြိုတင် အသိပေးထားပြီး ဖြစ်သဖြင့် တိုက်ခန်း ဝယ်ယူခြင်းနှင့် အမည်ပြောင်းခြင်း လုပ်ငန်းစဉ်များ က အလွန် ရိုးရှင်း လွယ်ကူလှသည်။ အချိန် သိပ်မကုန်လိုက်ဘဲ မွန်းတည့်ချိန် မတိုင်မီမှာပင် တိုက်ခန်း သော့နှင့် သက်ဆိုင်ရာ စာချုပ်စာတမ်း အထောက်အထား များကို ရိုအန် ရရှိသွားခဲ့လေသည်။

ထို့နောက် ကျန်ရှိနေသည်မှာ တိုက်ခန်း အလှဆင်ခြင်း ကိစ္စပင် ဖြစ်လေသည်။

တိုက်ခန်း ပိုင်ရှင်ဟောင်း ၏ အလှဆင်ထားမှု က အလွန် ထူးဆန်းလွန်းလှသည်။အခန်း အသီးသီးကို တစ်ချက် လှည့်လည် ကြည့်ရှုပြီးနောက် ရိုအန် ၏ မျက်နှာပေါ်တွင် မည်းမှောင်သော မျဉ်းကြောင်းများ ပေါ်လာပြီး အားလုံးကို ဖယ်ရှား၍ အသစ် ပြန်လည် အလှဆင်ရန် ချက်ချင်း ဆုံးဖြတ်လိုက်တော့သည်။

အလှဆင်ခြင်း ကိစ္စရပ်များကို ရိုအန် သိပ်နားမလည်သော်လည်း ထိုလုပ်ငန်းတွင် လိမ်လည်မှုများ အလွန် များပြားကြောင်း ကိုတော့ သူ ကောင်းစွာ သိရှိထားသည်။ ထို့ကြောင့် အကူအညီ တောင်းရန် ဖုန်းကို ချက်ချင်း ထုတ်ယူလိုက်လေသည်။

မိုနာ ကို အကူအညီ တောင်းရန် မဖြစ်နိုင်ပေ။ သူမက သြဂတ်စ် နှင့် စကားပြောဆိုနေပြီး အချိန်မရှိသည့် အပြင် ယခင်က သူမ အကြွေးဖြင့် ဝယ်ယူခဲ့သော တိုက်ခန်းငယ်လေး မှာလည်း အလှဆင်ပြီးသား အဆင့်သင့် နေနိုင်သော တိုက်ခန်းမျိုး ဖြစ်သဖြင့် ရိုအန် ကို မည်သို့မျှ ကူညီပေးနိုင်မည် မဟုတ်ချေ။

လေစီ လည်း မဖြစ်နိုင်ပေ။ သူမ က ဤနှစ်များ အတွင်း အိမ်ငှား နေထိုင်သည်ဟု အပြင်ပန်းတွင် ပြောဆိုထားသော်လည်း သူမ ၏ အချိန်အများစုကို အခြား အမျိုးသမီးများနှင့် အတူ ဟိုတယ်များတွင်သာ ဖြတ်သန်းလေ့ ရှိလေသည်။

အကယ်၍ သူမ ကို အကူအညီ တောင်းမည် ဆိုပါက လေစီ က အလှဆင် ကုမ္ပဏီ များတွင် အလုပ်လုပ်နေသော အမျိုးသမီး များ၏ လိပ်စာကတ်ပြား များကိုသာ သူ၏ လက်ထဲသို့ အပုံလိုက် လာပေးမည်မှာ သေချာလှသည်။

ထို့ကြောင့် ရိုအန် ၏ အကြည့်များ က ရက်ဒ် ဆီသို့ ရောက်ရှိသွားတော့သည်။

ရက်ဒ် သည် အိမ်ထောင်သည် တစ်ဦး ဖြစ်ပြီး ဇနီးနှင့် သား တစ်ယောက် ရှိသည့် အပြင် ကိုယ်ပိုင် သေနတ်ဆိုင် တစ်ဆိုင်ပါ ပိုင်ဆိုင်ထားသူ ဖြစ်ရာ အလှဆင်ခြင်း ကိစ္စများ အတွက် သူ့ကို အကူအညီ တောင်းခြင်းက အသင့်တော်ဆုံး ပင် ဖြစ်လေသည်။

ယခင်က လည်း ရက်ဒ် က သူ၏ သေနတ်ဆိုင် သို့ အလည်လာရန် ဖိတ်ခေါ်ထားခဲ့ဖူးသည် မဟုတ်ပါလား။ ထို့ကြောင့် တုံ့ဆိုင်းနေခြင်း လုံးဝ မရှိဘဲ ရက်ဒ် ဆီသို့ ဖုန်းခေါ်ဆိုလိုက်ပြီး အမဲသားနှင့် အရက် အချို့ ဝယ်ယူကာ ရှက်ဗရိုလက် ကားကို မောင်းနှင်၍ ကွင်းစ်ရပ်ကွက် ဆီသို့ တိုက်ရိုက် ထွက်ခွာသွားလေတော့သည်။

ရက်ဒ် ၏ ဇနီး အမည်မှာ အီဗွန်နာ ဖြစ်ပြီး တက္ကဆက် ပြည်နယ် မှ လာရောက်သူ ဖြစ်ကာ နယူးယောက် ရဲမေဟောင်း တစ်ဦး ပင် ဖြစ်လေသည်။

တာဝန် ထမ်းဆောင်နေစဉ် အတွင်း အီဗွန်နာ ၏ ညာဘက် မျက်လုံးကို ကျည်ဆန် ထိမှန်သွားခဲ့ပြီး အသက်အန္တရာယ် မရှိခဲ့သော်လည်း ညာဘက် မျက်လုံး အမြင်အာရုံ လုံးဝ ဆုံးရှုံးသွားခဲ့ကာ သူမ၏ နဖူးပေါ်တွင်လည်း အရောင်ရင့် မျက်လုံးကာ တစ်ခုကို အမြဲတမ်း တပ်ဆင်ထားရလေသည်။

သို့သော် အီဗွန်နာ ၏ စိတ်နေ သဘောထား က အလွန် ကောင်းမွန်လှသည်။ ရက်ဒ် က ရိုအန် ကို ခေါ်ဆောင်လာပြီး တစ်ယောက်နှင့် တစ်ယောက် မိတ်ဆက်ပေးပြီးနောက် အီဗွန်နာ က သားဖြစ်သူကို ရက်ဒ် ထံသို့ ချက်ချင်း ပေးအပ်လိုက်ပြီး ရိုအန် ကို ဆွဲခေါ်ကာ သေနတ်ဆိုင် အနောက်ဘက်တွင် ပစ္စတို သေနတ်ပစ် ပြိုင်ပွဲ စတင်လေတော့သည်။

အကြိမ်အနည်းငယ်မျှ ပစ်ခတ် ပြိုင်ဆိုင်ပြီးနောက် အီဗွန်နာ နှင့် ရိုအန် တို့မှာ ညီအစ်ကို ကဲ့သို့ အလွန် ရင်းနှီးကျွမ်းဝင် သွားကြတော့သည်။

ရက်ဒ် တစ်ယောက် ဘာပြောရမှန်း မသိအောင် ဖြစ်သွားရသည်။

ထိုနေ့ညက ရက်ဒ် တို့ အိမ်နောက်ဖေး ခြံဝင်း အတွင်း၌ ဘာဘီကျူး ပါတီ တစ်ခု ကျင်းပခဲ့ကြသည်။ အီဗွန်နာ ၏ မိတ်ဆက်ပေးမှု အရ တက္ကဆက် ပြည်နယ် မှ လာရောက်ကြသော လူအများအပြား နှင့် ရိုအန် ရင်းနှီးကျွမ်းဝင် သွားခဲ့လေသည်။

ထိုအထဲတွင် ရိုအန် ကို ပြဿနာ ရှာသူ အချို့ ရှိခဲ့သော်လည်း အရက် အနည်းငယ် သောက်ပြီးနောက် ခွန်အားတိုး ဆေးရည် တစ်ပုလင်း ကို သောက်သုံးလိုက်ကာ ထိုနေရာရှိ လူအားလုံးကို လက်ပန်းလုံးရာတွင် အနိုင်ယူလိုက်ပြီးနောက် ရိုအန် သည် ချက်ချင်းပင် တက္ကဆက် ပြည်နယ် မှ လာရောက်သူများ ၏ အချစ်ဆုံး ညီအစ်ကို တစ်ယောက် ဖြစ်လာတော့သည်။

ဘာဘီကျူး ပါတီ တွင် ရိုအန် တစ်ယောက် အရက် အလွန်အကျွံ သောက်မိသွားသဖြင့် ရက်ဒ် တို့ အိမ်၌ပင် ညအိပ်လိုက်ရပြီး နောက်တစ်နေ့ အထိ အိပ်မောကျ သွားခဲ့လေသည်။

အိပ်ရာမှ နိုးလာပြီး ကိုယ်လက်သန့်စင် ပြီးနောက် ခေါင်းကိုက် နေဆဲ ဖြစ်သော ရိုအန် ထံသို့ အီဗွန်နာ က ဧည့်ခန်း တံခါးကို တွန်းဖွင့်ကာ အရက်ပုလင်း တစ်ပုလင်းကို လာပေးလေသည်။

အရက် အလွန်အကျွံ သောက်ပြီး ခေါင်းကိုက်နေပါက မစိုးရိမ်ရန်၊ အရက် အနည်းငယ် ထပ်သောက်လိုက်ပါက သက်သာသွားမည် ဖြစ်ကြောင်း အီဗွန်နာ က ပြောပြလေသည်။

"..."

အီဗွန်နာ ၏ စေတနာကို ခေါင်းခါ ငြင်းပယ်လိုက်ပြီးနောက် ရိုအန် က မိမိ၏ တိုက်ခန်းကို အလှဆင်ရန် အတွက် လူရှာပေးရန် အကူအညီ လိုအပ်ကြောင်း ရက်ဒ် တို့ ဇနီးမောင်နှံ ကို ချက်ချင်း ပြောပြလိုက်သည်။

အီဗွန်နာ နှင့် ရက်ဒ် တို့က ထိုစကားကို ကြားလိုက်ရသောအခါ ဤသည်မှာ အသေးအဖွဲ ကိစ္စရပ်လေး တစ်ခုသာ ဖြစ်ကြောင်း ပြောဆိုကာ ရင်ဘတ်ကို ပုတ်၍ ချက်ချင်းပင် သဘောတူလိုက်ကြသည်။ ဈေးနှုန်း သင့်တင့်ပြီး ကုန်ကြမ်း ပစ္စည်းများ အရည်အသွေး ကောင်းမွန်သည့် အပြင် ကျွမ်းကျင်မှု အဆင့်အတန်းလည်း မြင့်မားသော အလှဆင် ကုမ္ပဏီ တစ်ခုကို သေချာပေါက် ရှာဖွေပေးမည် ဖြစ်ကြောင်း အီဗွန်နာ က ကတိပြုလေသည်။

ထို့နောက် နောက်ထပ် ဘာဘီကျူး ပါတီ တစ်ခု ထပ်မံ ကျင်းပပြန်သည်။

"..."

ယခင်က လစ်ဒီယာ ၏ အဖြစ်အပျက် ပြီးဆုံးသွားပြီးနောက် စနစ် က ရိုအန် အား အကဲဖြတ်ချက် အဖြစ် အလွန် ကောင်းမွန်ပါသည် ဟု သတ်မှတ်ပေးခဲ့ပြီး ရတနာသေတ္တာ မှ ခံနိုင်ရည်တိုး ဆေးရည် တစ်ပုလင်း၊ ခွန်အားတိုး ဆေးရည် တစ်ပုလင်း၊ အဆိပ်ဖြေ ဆေးရည် တစ်ပုလင်း နှင့် အန္တရာယ် အာရုံခံ ဆေးရည် တစ်ပုလင်း တို့ကို ရရှိခဲ့သည်။

သို့သော် ဤနှစ်ရက် အတွင်း ကျင်းပခဲ့သော ပါတီပွဲ များအတွက်မူ စနစ် က ရိုအန် အား ကောင်းမွန်ပါသည် ဟုသာ အကဲဖြတ်ပေးခဲ့ပြီး ရတနာသေတ္တာ များမှ ခံနိုင်ရည်တိုး ဆေးရည် တစ်ပုလင်း နှင့် အားနည်းစေသော ဆေးရည် တစ်ပုလင်း၊ နောက်တစ်ကြိမ်တွင် ခွန်အားတိုး ဆေးရည် တစ်ပုလင်း နှင့် အိပ်ဆေး ဆေးရည် တစ်ပုလင်း တို့ကို အသီးသီး ရရှိခဲ့လေသည်။

ယခု လက်ရှိ အချိန်တွင် ရိုအန် ၏ စနစ် သိုလှောင်ခန်း အတွင်း၌ ခံနိုင်ရည်တိုး ဆေးရည် လေးပုလင်း၊ မီးခံ ဆေးရည် တစ်ပုလင်း၊ ညကြည့် ဆေးရည် နှစ်ပုလင်း၊ ရေအောက်အသက်ရှူဆေးရည် တစ်ပုလင်း၊ ခွန်အားတိုး ဆေးရည် နှစ်ပုလင်း၊ လျင်မြန်မှု ဆေးရည် တစ်ပုလင်း၊ အဆိပ်ဖြေ ဆေးရည် တစ်ပုလင်း၊ အန္တရာယ် အာရုံခံ ဆေးရည် တစ်ပုလင်း၊ အားနည်းစေသော ဆေးရည် တစ်ပုလင်း နှင့် အိပ်ဆေး ဆေးရည် တစ်ပုလင်း တို့ ရှိနေလေပြီ။

ဂျေးကော့ ဖက်ဒရယ် ရုံးအဆောက်အအုံ ၏ ဓာတ်လှေကားဖြင့် အထပ်သို့ ရောက်ရှိသွားချိန်တွင် ဓာတ်လှေကား တံခါး ပွင့်သွားသည်နှင့် တပြိုင်နက် ရိုအန် က အမှတ် ၁ စုံစမ်းစစ်ဆေးရေး အဖွဲ့၏ ခေါင်းဆောင် ဘရိုဆန် နှင့် သူ၏ လက်အောက်ငယ်သား အချို့နှင့် မျက်နှာချင်းဆိုင် ဆုံတွေ့လိုက်ရသည်။

"မနက်ခင်းပါ အရာရှိကြီး..."

ရိုအန် က ဓာတ်လှေကား အတွင်းမှ ထွက်လာပြီး နှုတ်ခမ်းထောင့်များ ကွေးတက်ကာ အလွန် ယဉ်ကျေးစွာ နှုတ်ဆက်လိုက်သည်။

ဘရိုဆန် က ရိုအန် ကို အေးစက်စွာ တစ်ချက် ကြည့်လိုက်ပြီး မည်သည့် စကားမျှ ပြန်မပြောဘဲ ဓာတ်လှေကား အတွင်းသို့ တိုက်ရိုက် ဝင်ရောက်သွားလေသည်။

သူ၏ အနောက်မှ အနောက်တိုင်း ဝတ်စုံ ဝတ်ဆင်ထားပြီး မျက်နှာပေါ်တွင် မကျေမနပ် ဖြစ်နေသော အမူအရာများ ပြည့်နှက်နေသည့် လူဖြူ အမျိုးသား တစ်ဦး ကမူ ရိုအန် ၏ ဘေးမှ ဖြတ်သွားချိန်တွင် အေးစက်စွာ နှာမှုတ်သံ တစ်ချက် ပြုလုပ်သွားသော်လည်း အပိုစကားများ မပြောဆိုခဲ့ချေ။

ရိုအန် ၏ မျက်ခုံးများ တစ်ချက် ပင့်သွားသည်။ သူ ထိုသူကို မသိရှိပေ။

ဓာတ်လှေကား တံခါး ဖြည်းညင်းစွာ ပိတ်သွားသည်ကို ကြည့်ရင်း ရိုအန် ၏ နှုတ်ခမ်းထောင့်များ အနည်းငယ် ကွေးတက်သွားပြီး အမှတ် ၅ စုံစမ်းစစ်ဆေးရေး အဖွဲ့ အတွင်းသို့ လှည့်ဝင်သွားတော့သည်။

ဓာတ်လှေကား အတွင်း၌ မကျေမနပ် ဖြစ်နေသော မျက်နှာထားဖြင့် ရှိနေသည့် လူဖြူ အမျိုးသားမှာ မက်သရူး ပင် ဖြစ်လေသည်။

ဘရိုဆန် ၏ လက်အောက်တွင် ဆယ်နှစ်ကျော် အလုပ်လုပ်ခဲ့သော ဝါရင့် စုံထောက် တစ်ယောက် အနေဖြင့်... ဘရိုဆန် တစ်ယောက် အသစ် ဖွဲ့စည်းလိုက်သော အမှတ် ၁၄ စုံစမ်းစစ်ဆေးရေး အဖွဲ့၏ ခေါင်းဆောင် အဖြစ် ပြောင်းရွှေ့ ခံလိုက်ရကြောင်း သိရှိသွားသောအခါ မက်သရူး က တုံ့ဆိုင်းနေခြင်း လုံးဝ မရှိဘဲ အမှတ် ၁ စုံစမ်းစစ်ဆေးရေး အဖွဲ့မှ နုတ်ထွက်ကာ ဘရိုဆန် နှင့် အတူ အမှတ် ၁၄ စုံစမ်းစစ်ဆေးရေး အဖွဲ့ သို့ လိုက်ပါ ပြောင်းရွှေ့သွားခဲ့ခြင်း ဖြစ်လေသည်။

ဓာတ်လှေကား က ဖြည်းညင်းစွာ ဆင်းသက်သွားစဉ် အတွင်း မက်သရူး က ခေတ္တမျှ တိတ်ဆိတ်နေပြီးနောက် ဘရိုဆန် ၏ ဘေးသို့ ကပ်ကာ တီးတိုး မေးမြန်းလိုက်သည်။

"ခေါင်းဆောင်... အမှတ် ၅ စုံစမ်းစစ်ဆေးရေး အဖွဲ့ ရဲ့ လက်ထဲမှာ မဖော်ထုတ်ရသေးတဲ့ ကွင်းဆက် လူသတ်မှုကြီး တစ်ခု ရှိနေသေးတယ်... ကျွန်တော်တို့..."

"လောလောဆယ် သူတို့ကို ဂရုစိုက်စရာ မလိုသေးဘူး..."

မက်သရူး ကို တစ်ချက် ကြည့်လိုက်ပြီးနောက် ဘရိုဆန် ၏ စိတ်ထဲတွင် မိမိ၏ ဝါရင့် လက်အောက်ငယ်သား အပေါ် ရှုပ်ထွေးသော ခံစားချက်များ ဖြစ်ပေါ်လာသည်။ ခေတ္တမျှ တိတ်ဆိတ်သွားပြီးနောက် စကားဆိုလိုက်သည်။

"ငါတို့ လက်ထဲမှာ ရှိနေတဲ့ အမှုတွေကို အရင်ဆုံး ပြီးပြတ်အောင် ရှင်းလိုက်ကြမယ်... သူတို့ကို အမြဲတမ်း စောင့်ကြည့်နေရင် ရပါပြီ... ငါ အမိန့်မပေးသရွေ့ မင်း ဘာမှ မလုပ်ရဘူး..."

"ဟုတ်ကဲ့ပါ ခေါင်းဆောင်..."

မက်သရူး က ခေါင်းညိတ်ပြလိုက်သည်။ ထိုအချိန်မှာပင် ဓာတ်လှေကား တံခါး ပွင့်သွားပြီး မက်သရူး က ဘရိုဆန် ၏ နောက်မှ အလျင်အမြန် လိုက်ပါ ထွက်ခွာသွားလေသည်။

အမှတ် ၅ စုံစမ်းစစ်ဆေးရေး အဖွဲ့ အတွင်း။

ယခု အချိန်အထိ မိုနာ ရောက်ရှိမလာသေးသကဲ့သို့ လေစီ ကလည်း စားပွဲပေါ်တွင် မှောက်အိပ်နေဆဲ ဖြစ်သည်။ ရိုအန် က အမှတ် ၅ စုံစမ်းစစ်ဆေးရေး အဖွဲ့၏ ရုံးခန်းနယ်မြေ အတွင်း ဘယ်ညာ လှည့်ပတ် ကြည့်ရှုလိုက်ပြီး ကော်ဖီ သောက်ရင်း ကွန်ပျူတာဖြင့် အခြားသူများနှင့် စကားပြောနေသော အမျိုးသား နည်းပညာ ကျွမ်းကျင် စုံထောက် တစ်ဦး ၏ ဘေးသို့ ဝင်ထိုင်လိုက်ကာ တီးတိုး မေးမြန်းလိုက်သည်။

"မနက်ခင်းပါ ဝီလျံ... ဌာနခွဲမှူး သစ် ဖြစ်လာတဲ့ ဘရိုဆန် နဲ့ ပတ်သက်ပြီး လတ်တလော ထူးခြားတဲ့ သတင်းတွေ ဘာများ ရှိလဲ..."

ဝီလျံ မေလာ၊ အရပ် ၅ ပေ ၁၀ လက်မ၊ မျက်လုံး မျက်ခုံး ထင်ရှားပြီး ခန္ဓာကိုယ် ပိန်သွယ်သူ ဖြစ်ကာ အမှတ် ၅ စုံစမ်းစစ်ဆေးရေး အဖွဲ့ရှိ နည်းပညာ ကျွမ်းကျင် စုံထောက် များထဲမှ တစ်ဦး ဖြစ်လေသည်။

အမှု၏ လိုအပ်ချက်များ အရ သူသည် စီအိုင်အေ၊ အန်အက်စ်အေ အစရှိသော အက်ဖ်ဘီအိုင် ပြင်ပရှိ အခြား အစိုးရ ဌာနဆိုင်ရာ များနှင့် အများအားဖြင့် ဆက်သွယ် ဆောင်ရွက်ပေးရလေသည်။

သို့သော် ရိုအန် ၏ အမြင်တွင်မူ ဝီလျံ ၏ အကြီးမားဆုံး အရည်အချင်း မှာ သူ၏ မရေမတွက်နိုင်သော သူငယ်ချင်းများ ထံမှ တစ်ဆင့် ဤရုံးအဆောက်အအုံ ကြီး၏ မည်သည့် ထောင့်စွန်း မည်သည့် အချိန်တွင်မဆို ဖြစ်ပျက်နေသော သတင်း အသစ်များကို အမြဲတမ်း ပထမဆုံး အချိန်မီ သိရှိနိုင်စွမ်း ရှိခြင်း ပင် ဖြစ်လေသည်။

ဤအချက်တွင် ထောက်လှမ်းရေး ဌာနမှ ဆင်းသက်လာသော လေစီ ပင်လျှင် သူ့ကို ယှဉ်နိုင်မည် မဟုတ်ချေ။