အခန်း ၅၈

အခန်း ၅၈ အမှု အခြေအနေ

"မနက်ခင်းပါ ရိုအန်..."

ရိုအန်၏ မေးခွန်းကို ကြားလိုက်ရသောအခါ ကော်ဖီသောက်နေသော ဝီလျံက ဟီးဟီးဟားဟား ရယ်မောလိုက်ပြီး ရိုအန်ကို ခေါင်းငုံ့ရန် လက်ဟန်ဖြင့် အချက်ပြလိုက်သည်။ ထို့နောက် ရိုအန်၏ နားအနီးသို့ ကပ်ကာ တီးတိုး ပြောဆိုလိုက်သည်။

"ငါ ကြားထားတာတော့... မကြာသေးခင် ကမှ ဘဏ်ဓားပြတိုက်မှု တစ်ခုကို အမှတ် ၁၄ စုံစမ်းစစ်ဆေးရေး အဖွဲ့ လက်ထဲ အပ်လိုက်တယ် တဲ့... အမှတ် ၁၄ စုံစမ်းစစ်ဆေးရေး အဖွဲ့ က အခုမှ အသစ် ဖွဲ့စည်းထားတာ ဆိုတော့ အဖွဲ့ထဲမှာ လူအင်အား က ငါတို့ထက်တောင် နည်းသေးတယ်လေ... အဲ့ဒါကြောင့် ဘရိုဆန် က ခေါင်းဆောင် ဖြစ်နေရင်တောင်... နေ့တိုင်း အပြင်ထွက်ပြီး အမှုတွေကို ကိုယ်တိုင် လိုက်လံ စုံစမ်း စစ်ဆေးနေရတယ်..."

"ဟင်း... ဟင်း... ဟင်း..."

ထိုစကားကို ကြားလိုက်ရသောအခါ ရိုအန်က ခေါင်းကို အကြိမ်ကြိမ် ခါယမ်းလိုက်မိသည်။ ဘရိုဆန်သည် ယခင်က ခေါင်းဆောင် ဖြစ်စဉ် အချိန်ကတည်းက ရှေ့တန်းသို့ ကိုယ်တိုင် ကိုယ်ကျ ဆင်း၍ အမှုစစ်ဆေးခြင်းများကို မလုပ်ဆောင်တော့ချေ။ ယခု ခေါင်းဆောင်သစ်အဖြစ် ရာထူးတက်သွားချိန်ကျမှ နေ့စဉ် အပြင်ထွက်၍ အမှုလိုက်နေရသည်ကို တွေ့ရသည်။ တကယ်ကို ဆိုးရွားလှပေသည်။

ရိုအန်၏ နှုတ်ခမ်းများ ကွေးတက်သွားပြီး ဝီလျံ၏ ပခုံးကို ပုတ်ကာ မိမိ၏ ခုံသို့ ပြန်လာခဲ့သည်။ ယခုလက်ရှိ ဘရိုဆန်၏ အခြေအနေနှင့် ပတ်သက်၍ ရိုအန်၏ အမြင်မှာ စကားလုံး လေးလုံးတည်းသာ ရှိလေသည်။ ကိုယ်လုပ်သည့်ကံ ကိုယ်ခံရခြင်းပင် ဖြစ်သည်။

ယခင်က ကွင်းဆက် လူသတ် အလောင်းဖျောက်မှု ကိစ္စကို မီဒီယာများထံ သတင်းပေးလိုက်ခြင်းမှာ အခြားသူများ၏ အလုပ်ကို ပြောင်ပြောင်တင်းတင်း နှောင့်ယှက်လိုက်ခြင်းပင် ဖြစ်သည်။ အထက်လူကြီးများသည် မျက်ကန်းများ မဟုတ်ကြရာ ဘရိုဆန်ကို မည်သို့ အပြစ်မပေးဘဲ နေမည်နည်း။

အထက်လူကြီးများက ဘရိုဆန်၏ ရာထူးတက်မည့် ကိစ္စကို ရပ်ဆိုင်းလိုက်မည် သို့မဟုတ် ရာထူးချပစ်လိုက်မည်ဟု ရိုအန် အစက ထင်မှတ်ထားခဲ့သည်။ သို့သော် ယခု ဘရိုဆန်၏ အခြေအနေကို မြင်တွေ့လိုက်ရပြီး ယခင်က ဘရိုဆန်သည် အခြား ရန်ပုံငွေအဖွဲ့ တစ်ခုတွင် ဝင်ရောက်ထားကြောင်း ဗီရိုနီးစ် ပြောပြခဲ့သည့် စကားကို ရိုအန် သတိရသွားသည်။

"ကြည့်ရတာ ဘရိုဆန် ဝင်ထားတဲ့ ရန်ပုံငွေအဖွဲ့ ကလည်း သာမန် မဟုတ်ဘူးပဲ..."

အချိန်အတော်ကြာ စဉ်းစားခန်း ဝင်နေပြီးနောက် ရိုအန်က ခေါင်းခါယမ်းလိုက်သည်။ ထိုကိစ္စများကို ယခုအချိန်တွင် သူ ဝင်ရောက် စွက်ဖက်ရန် မလိုအပ်သေးပေ။ ထို့ကြောင့် ဦးနှောက်ထဲရှိ အတွေးများကို အမှိုက်ပုံး အတွင်းသို့ လွှင့်ပစ်လိုက်တော့သည်။

စားပွဲပေါ်ရှိ ဖိုင်တွဲကို ကောက်ကိုင်လိုက်ပြီး ရေကန်တွင်း အမျိုးသမီး အလောင်း ကွင်းဆက် လူသတ်မှုကြီးနှင့် သက်ဆိုင်သော အချက်အလက်များကို ရိုအန် ထပ်မံ၍ စတင် ဖတ်ရှု လေ့လာနေလိုက်သည်။

ရုပ်အလောင်းများကို တွေ့ရှိခဲ့ရသော နေရာမှာ နယူးယောက်နှင့် နယူးဂျာစီ ပြည်နယ်ကြားရှိ နယ်စပ်ဒေသတွင် တည်ရှိသော ရေကန် တစ်ကန်ပင် ဖြစ်လေသည်။

ရုပ်အလောင်း လေးလောင်းစလုံးမှာ အမျိုးသမီးများ ဖြစ်ကြပြီး ရေထဲမှ ဆယ်ယူရရှိချိန်တွင် ၎င်းတို့၏ ကိုယ်ရေး အချက်အလက်များကို သက်သေပြနိုင်မည့် မည်သည့် ပစ္စည်းမျှ ပါဝင်လာခြင်း မရှိခဲ့ချေ။ နောက်ဆုံးတွင် နယူးဂျာစီ ဒေသခံ ရဲတပ်ဖွဲ့က ပျောက်ဆုံးသူ စာရင်းများကို စုံစမ်းစစ်ဆေးပြီးမှသာ ၎င်းတို့၏ အမည်များကို အတည်ပြုနိုင်ခဲ့ခြင်း ဖြစ်သည်။

မှုခင်း ဆရာဝန်၏ စစ်ဆေးချက် အစီရင်ခံစာအရ သေဆုံးသူ လေးဦးစလုံးမှာ ကြိုးနှင့်တူသော အရာတစ်ခုခုဖြင့် အတင်းအကျပ် လည်ပင်းညှစ်၍ သတ်ဖြတ်ခြင်း ခံထားရကြောင်း သိရသည်။ လက်ကောက်ဝတ်နှင့် ခြေကျင်းဝတ်များတွင် ချည်နှောင်ထားသော ဒဏ်ရာများ ရှိနေပြီး ခန္ဓာကိုယ် အထက်ပိုင်းတွင် ညိုမည်း စွဲကျန်နေသော ဒဏ်ရာများနှင့် အောက်ပိုင်းတွင် ပြဲကွဲနေသော ဒဏ်ရာများ ရှိနေကြောင်း ဖော်ပြထားသည်။ သေဆုံးသူ လေးဦးစလုံးမှာ မသေဆုံးမီက လူသတ်သမား၏ ပြင်းထန်စွာ ညှဉ်းပန်းနှိပ်စက်ခြင်းကို ခံခဲ့ရကြောင်း ခန့်မှန်းရလေသည်။

ရုပ်အလောင်းများက ရေကန် အောက်ခြေတွင် အချိန်အတော်ကြာ ရှိနေခဲ့သဖြင့် လူသတ်သမား၏ ဒီအန်အေ ကဲ့သို့သော မျိုးရိုးဗီဇဆိုင်ရာ အထောက်အထားများ သို့မဟုတ် လူသတ်သမားနှင့် သက်ဆိုင်သော အခြား သဲလွန်စများ အားလုံးမှာ ပျောက်ကွယ်သွားခဲ့ပြီ ဖြစ်သည်။ မှုခင်း ဆရာဝန် အနေဖြင့် သေဆုံးသူ၏ ခန္ဓာကိုယ်ပေါ်တွင် အခြားသူ တစ်ဦး၏ မည်သည့် အရာကိုမျှ ရှာဖွေ မတွေ့ရှိခဲ့ရပေ။

ထို့အပြင် သေဆုံးသူ လေးဦး၏ နေရပ်လိပ်စာများ၊ လူမှုဆက်ဆံရေး ပတ်ဝန်းကျင်များ၊ ဘဝ ဖြတ်သန်းမှု အတွေ့အကြုံများနှင့် လုပ်ငန်းခွင် အခြေအနေများမှာလည်း တစ်ဦးနှင့် တစ်ဦး လုံးဝ ပတ်သက် ဆက်နွှယ်မှု မရှိကြကြောင်း တွေ့ရသည်။ တစ်ခုတည်းသော တူညီသည့် လက္ခဏာမှာ ၎င်းတို့ လေးဦးစလုံးသည် အိမ်ထောင်သည် အမျိုးသမီးများ ဖြစ်ကြပြီး ရုပ်အလောင်းပေါ်ရှိ လက်ထပ် လက်စွပ်များမှာလည်း ပျောက်ဆုံးနေခြင်းပင် ဖြစ်သည်။

ယခင် ပြန်ပေးဆွဲမှုများကို စုံစမ်းစစ်ဆေးစဉ်က ရိုအန်က လူသတ်သမားသည် သေဆုံးသူ၏ လက်ပေါ်မှ လက်စွပ်ကို ချွတ်ယူသွားခြင်းမှာ အမှတ်တရ သိမ်းဆည်းထားလို၍ သို့မဟုတ် ပိုင်ဆိုင်လိုစိတ်ကြောင့် ဖြစ်နိုင်သည်ဟု ခန့်မှန်းခဲ့သည်။

ထိုအချက်က ရိုအန် တိုက်ခန်းကို ဝယ်ယူပြီးနောက် တိုက်ခန်း အတွင်းရှိ အလှဆင်ထားမှု အားလုံးကို အသစ် ပြန်လည် ပြင်ဆင်ရန် ဆုံးဖြတ်ခဲ့ခြင်းနှင့် အတူတူပင် ဖြစ်သည်။ ၎င်းမှာ ယခင် ပိုင်ရှင်၏ အမှတ်အသားများကို ဖျောက်ဖျက်ပစ်လိုသော လူသားတို့၏ မသိစိတ် သဘောသဘာဝပင် ဖြစ်လေသည်။

ထို့ကြောင့် ရိုအန်က သေဆုံးသူ လေးဦး၏ ခင်ပွန်းများ၊ ၎င်းတို့၏ လူမှုဆက်ဆံရေးများ၊ လုပ်ငန်းခွင် အခြေအနေများနှင့် အချစ်ရေး ကိစ္စရပ်များကို အဓိကထား၍ စုံစမ်းစစ်ဆေးရန် ယခင်က ရက်ဒ်ကို တာဝန်ပေးခဲ့ခြင်း ဖြစ်သည်။ ထိုမှတစ်ဆင့် သဲလွန်စ အချို့ကို ရှာဖွေ တွေ့ရှိနိုင်မည်ဟု သူ မျှော်လင့်ထားခဲ့သည်။

သို့သော် အခြေအနေက မျှော်လင့်ထားသလို ဖြစ်မလာခဲ့ပေ။ ရက်ဒ်၏ စုံစမ်းစစ်ဆေးမှု အစီရင်ခံစာကို ဖတ်ရှုလိုက်ရသောအခါ ရိုအန်၏ နှုတ်ခမ်းထောင့်များ တစ်ချက် တွန့်ကွေးသွားသည်။

ရက်ဒ်၏ အစီရင်ခံစာထဲတွင် သေဆုံးသူ ခင်ပွန်း လေးဦး၏ လူမှုဆက်ဆံရေးများ၊ လုပ်ငန်းခွင် အခြေအနေများ စသည်တို့မှာ ထိုခင်ပွန်းများ၏ ပါးစပ်မှ ပြောပြချက်များကိုသာ ရေးမှတ်ထားခြင်း ဖြစ်ပြီး ရက်ဒ်က အခြားသူများထံသို့ သွားရောက်ကာ ထိုခင်ပွန်းများ ပြောဆိုချက် မှန်ကန်မှု ရှိမရှိကို အတည်ပြု စစ်ဆေးခဲ့ခြင်း မရှိကြောင်း တွေ့ရသည်။

ထိုခင်ပွန်း လေးဦး၏ အချစ်ရေးနှင့် ပတ်သက်၍မူ ရက်ဒ်က စာတစ်ကြောင်းတည်းဖြင့်သာ မှတ်တမ်း တင်ထားလေသည်။

"အိမ်နီးချင်းများ၏ ပြောပြချက်အရ ၎င်းတို့ ဇနီးမောင်နှံ၏ ဆက်ဆံရေးမှာ ကောင်းမွန်ပြီး အများအားဖြင့် ရန်ဖြစ်လေ့ မရှိကြောင်း သိရသည်။" ဟူ၍ ဖြစ်သည်။

ရိုအန် တစ်ယောက် ဘာပြောရမှန်း မသိအောင် ဖြစ်သွားရသည်။

ရက်ဒ်သည် အထူးစစ်ဆင်ရေး တပ်ဖွဲ့မှ ဆင်းသက်လာသူ တစ်ဦး ဖြစ်ပြီး အခြားသူများကို ရုပ်ပိုင်းဆိုင်ရာ အင်အားသုံး၍ ဖျောင်းဖျ သိမ်းသွင်းရာတွင် ကျွမ်းကျင်သော်လည်း မှုခင်း စုံစမ်းစစ်ဆေးရေး ကိစ္စရပ်များတွင်မူ အမှန်တကယ်ပင် အားနည်းလှကြောင်း ရိုအန် သတိရသွားသည်။ ထို့ကြောင့် အသက်ပြင်းပြင်း တစ်ချက် ရှူသွင်းလိုက်ပြီး ရင်ထဲရှိ ဆဲရေးတိုင်းထွာ လိုစိတ်များကို အတင်းအကျပ် ဖိနှိပ်ထားလိုက်တော့သည်။

"မင်းရဲ့ ကော်ဖီ ရပြီ ရိုအန်..."

ရိုအန် လက်ထဲရှိ ဖိုင်တွဲကို ပိတ်လိုက်ချိန်မှာပင် ဝတ်ဆင်ထားသော အနောက်တိုင်း ဝတ်စုံ ပေါက်ကွဲထွက်မတတ် ကြီးမားလှသည့် ကြွက်သားများ ပိုင်ရှင် ရက်ဒ်လည်း အမှတ် ၅ စုံစမ်းစစ်ဆေးရေး အဖွဲ့ အတွင်းသို့ ပြန်လည် ရောက်ရှိလာသည်။ ပူနွေးနေသော ကော်ဖီ တစ်ခွက်ကို ရိုအန်၏ စားပွဲပေါ်သို့ တင်ပေးလိုက်ပြီး ပြုံးလျက် ဖြူဖွေးသော သွားတန်းများကို ဖော်ပြကာ ဆိုသည်။

"နို့ နဲ့ သကြား ရောထားတယ်... မင်း အကြိုက်ဆုံး ပုံစံပဲ..."

ရိုအန်၏ နှုတ်ခမ်းများ တစ်ချက် လှုပ်ရှားသွားပြီး ကော်ဖီကို ယူကာ တစ်ငုံ သောက်လိုက်သည်။ ခေတ္တမျှ တိတ်ဆိတ်သွားပြီးနောက် ရက်ဒ်ဘက်သို့ လှည့်ကာ မေးခွန်း အချို့ မေးမြန်းရန် ပြင်လိုက်စဉ်မှာပင် အမှတ် ၅ စုံစမ်းစစ်ဆေးရေး အဖွဲ့၏ တံခါးကြီးက ရုတ်တရက် ပွင့်လာပြီး ဗိုက်ရွှဲရွှဲဖြင့် အဖွဲ့ခေါင်းဆောင် သြဂတ်စ်က မိုနာကို ခေါ်ဆောင်၍ ဝင်ရောက်လာလေသည်။

ဖိုင်းကနဲ အသံနှင့်အတူ စားပွဲပေါ်တွင် မှောက်အိပ်နေသော လေစီကို လန့်နိုးသွားစေရန် စားပွဲကို အားကုန် ရိုက်ချလိုက်ပြီးနောက် သြဂတ်စ်က ရုံးခန်း နယ်မြေ၏ အရှေ့ဘက်ဆုံးတွင် ရှိသော သင်ပုန်းဖြူကြီးကို ဆွဲယူလိုက်ပြီး အသံကျယ်ကြီးဖြင့် အော်ဟစ်လိုက်သည်။

"အပတ်သစ် တစ်ခု စတင်ပြီ... အားလုံးပဲ တက်တက်ကြွကြွ ရှိကြစမ်း... အခု အချိန်က စပြီး လူတိုင်းရဲ့ အာရုံစိုက်မှု ကို ဒီကွင်းဆက် လူသတ်မှုကြီး အပေါ်မှာပဲ ထားကြ... ဒီအပတ် အတွင်းမှာ ငါတို့ ဒီအမှုကို မဖြစ်မနေ ဖော်ထုတ်ပြီး တရားခံ အစစ် ကို ဖမ်းမိရမယ်..."

ဤနေရာသို့ ရောက်သောအခါ သြဂတ်စ်က ပတ်ဝန်းကျင်ကို တစ်ချက် ဝေ့ကြည့်လိုက်ရာ လူတိုင်း၏ အာရုံစိုက်မှုများက သူ့ထံသို့ ရောက်ရှိနေပြီ ဖြစ်ကြောင်း တွေ့လိုက်ရသဖြင့် ကျေနပ်အားရစွာ ခေါင်းညိတ်လိုက်သည်။ ထို့နောက် ဘေးနားရှိ ဝီလျံကို လက်ညှိုးထိုးပြကာ အမိန့်ပေးလိုက်သည်။

"ဝီလျံ... ဒီအမှုရဲ့ အခြေအနေကို အကြမ်းဖျင်း တစ်ခေါက်လောက် ရှင်းပြလိုက်စမ်း..."

"ဟုတ်ကဲ့ပါ အဖွဲ့ခေါင်းဆောင်..."

ဝီလျံက ဖိုင်တွဲ တစ်ခုကို ထုတ်ယူလိုက်ပြီး ရိုအန် ယခင်က ဖတ်ရှုခဲ့သော အမှု အခြေအနေများကို အများ သိရှိစေရန် အကြမ်းဖျင်း တစ်ခေါက် ရှင်းပြလိုက်သည်။ ထို့နောက် သြဂတ်စ်က ကျေနပ်စွာ ခေါင်းညိတ်ပြပြီး ဝီလျံကို ပြန်ထိုင်ရန် အချက်ပြလိုက်သည်။ ထို့နောက် သင်ပုန်းဖြူကြီးကို ခေါက်ကာ ထပ်မံ၍ အသံကျယ်ကြီးဖြင့် အော်ဟစ်လိုက်သည်။

"အမှုရဲ့ အခြေအနေ ကတော့ ဒါပဲ... ဒီအချက်အလက် တွေကို မင်းတို့ ထဲက တချို့က တစ်ခေါက်မက ဖတ်ဖူးပြီးသား ဆိုတာ ငါ ယုံကြည်တယ်... ဒါပေမဲ့ ငါ ထပ်ပြီး သတိပေးချင်တာက... ဒီအမှုရဲ့ တရားခံ က သာမန် မဟုတ်ဘူး... အခု အချိန်မှာ တရားခံ က နောက်ထပ် မှုခင်း တွေကို ထပ်မံ ကျူးလွန်နေသေးလား ဆိုတာကိုတောင် ငါတို့ အတိအကျ မသိရသေးဘူး... အဲ့ဒါကြောင့် ဒီတစ်ပတ်လုံး ငါတို့တွေ အာရုံစိုက်မှု ကို နှစ်ရာ ရာခိုင်နှုန်း လောက် အထိ မြှင့်တင်ထားရမယ်... သတင်း အသစ်တွေ ဝင်လာတာကို အမြဲတမ်း စောင့်ဆိုင်းနေရမယ်... ရှင်းပြီလား..."

"ဟုတ်ကဲ့ပါ အဖွဲ့ခေါင်းဆောင်..."

စုံထောက်များ၏ အသံကို ကြားလိုက်ရသောအခါ သြဂတ်စ်က ကျေနပ်စွာ ခေါင်းညိတ်လိုက်သည်။ ထို့နောက် ရိုအန်ထံသို့ အကြည့်များ ရွှေ့ပြောင်းသွားပြီး အဖွဲ့ခေါင်းဆောင် ရုံးခန်းဆီသို့ လှည့်ထွက်သွားရင်း ခေါ်လိုက်သည်။

"ရိုအန်... မင်း ခဏလောက် လာခဲ့..."

ရိုအန် တစ်ယောက် ဘာပြောရမှန်း မသိအောင် ဖြစ်သွားရသည်။

စုံထောက်များ အားလုံးက သူ့ကို ထူးဆန်းသော အကြည့်များဖြင့် ကြည့်နေကြသည်ကို မြင်လိုက်ရသောအခါ ရိုအန်က သက်ပြင်း တစ်ချက် ချလိုက်ပြီး သြဂတ်စ်၏ နောက်မှ လိုက်ကာ အဖွဲ့ခေါင်းဆောင် ရုံးခန်း အတွင်းသို့ ဝင်ရောက်သွားတော့သည်။

"ထိုင်..."

ရုံးခန်း အတွင်း၌ သြဂတ်စ်က သူတို့ နှစ်ဦးစလုံး အတွက် ကော်ဖီ တစ်ခွက်စီ ငဲ့ပေးလိုက်သည်။ ကုလားထိုင် ပေါ်တွင် ဝင်ထိုင်လိုက်ပြီးနောက် လေးနက် တည်ကြည်သော မျက်နှာထားဖြင့် ဆိုသည်။

"ရိုအန်... ဒီအမှုက မင်းအတွက် အရမ်း အရေးကြီးတယ်..."

ရိုအန် တစ်ယောက် ဆွံ့အသွားရပြန်သည်။

'ဒီစကား က ဘာလို့ ဒီလောက်တောင် ရင်းနှီးနေရတာလဲ...'

ရိုအန်၏ မျက်နှာပေါ်ရှိ ထူးဆန်းသော အမူအရာကို မြင်တွေ့လိုက်ရသောအခါ သြဂတ်စ် တစ်ယောက် အနည်းငယ် ကြောင်အမ်းအမ်း ဖြစ်သွားပြီး ချက်ချင်း သဘောပေါက် နားလည် သွားတော့သည်။ လက်ကို အလျင်အမြန် ဝှေ့ယမ်းပြကာ မျက်မှောင် အနည်းငယ် ကြုတ်လျက် ရိုအန်ကို ရှင်းပြလိုက်သည်။

"အထင်မလွဲ ပါနဲ့ ရိုအန်... ဒီတစ်ကြိမ် ငါ ပြောချင်တာက ဘရိုဆန် တို့ အဖွဲ့ကို ဆိုလိုတာ မဟုတ်ဘူး..."

ထိုစကားကို ကြားလိုက်ရသောအခါ ရိုအန်က ခေါင်းစောင်းကာ နားမလည်နိုင်စွာဖြင့် မေးမြန်းလိုက်သည်။

"သူတို့ မဟုတ်ရင်... ဘယ်သူတွေ ဖြစ်နိုင်သေးလို့လဲ..."

"နယူးဂျာစီ က ရဲတွေလေ..."

သြဂတ်စ်က ကော်ဖီ တစ်ငုံ သောက်လိုက်ပြီး အမည်းရောင် မျက်နှာကြီးပေါ်တွင် အလွန် လေးနက်သော အမူအရာများ ဖြစ်ပေါ်လာသည်။

"မင်း တစ်ခု သိထားရမှာက ရိုအန်... ဘယ်ဒေသ က ရဲတပ်ဖွဲ့ မှ အက်ဖ်ဘီအိုင် ကို သဘောမကျ ကြဘူး ဆိုတာပဲ..."

ရိုအန် ချက်ချင်း နားလည် သဘောပေါက် သွားသည်။ ဤသည်မှာ တကယ့် အမှန်တရားပင် ဖြစ်သည်။

လုပ်ပိုင်ခွင့် အာဏာများကြောင့် အက်ဖ်ဘီအိုင် အဖွဲ့အစည်း စတင် ပေါ်ပေါက်လာကတည်းက ဒေသ အသီးသီးရှိ ရဲတပ်ဖွဲ့များသည် အက်ဖ်ဘီအိုင် အပေါ် လုံးဝ ကျေနပ်မှု မရှိခဲ့ကြချေ။

ရဲတပ်ဖွဲ့များ၏ အမြင်တွင် အမှုဖော်ထုတ်ခြင်းနှင့် တရားခံ ဖမ်းဆီးခြင်းတို့မှာ ၎င်းတို့၏ တာဝန်များသာ ဖြစ်ပြီး အက်ဖ်ဘီအိုင်က မည်သည့် အရာမို့လို့ ဝင်ရောက် စွက်ဖက်ရသနည်းဟု တွေးထင်တတ်ကြသည်။

ထို့အပြင် ရဲတပ်ဖွဲ့များ မဖော်ထုတ်နိုင်သော အမှုများကို အက်ဖ်ဘီအိုင်က ဖော်ထုတ်နိုင်သွားပါက ရဲတပ်ဖွဲ့၏ မျက်နှာကို ဘယ်မှာ သွားထားရမည်နည်း။

ထို့ကြောင့် ရဲတပ်ဖွဲ့ အများအပြားသည် အက်ဖ်ဘီအိုင် စုံထောက်များကို လုံးဝ အဖက်မလုပ်တတ်ကြသလို သူတို့၏ အကြံပြုချက်များ၊ အမိန့်ပေးချက်များကိုလည်း ဘယ်သောအခါမှ နားထောင်လေ့ မရှိကြချေ။

ပို၍ ဒေါသထွက်လွယ်သော ရဲတပ်ဖွဲ့ အချို့ဆိုလျှင် အက်ဖ်ဘီအိုင်များ လာရောက် မဖမ်းဆီးမီ သံသယရှိသူများကို အမြန် ထွက်ပြေးရန် ကြိုတင် အသိပေးတတ်ကြပြီး အက်ဖ်ဘီအိုင်များ လာရောက် ဖမ်းဆီးချိန်တွင် အလွတ်ကြီး ဖြစ်နေစေကာ မိမိတို့ကတော့ နောက်ကွယ်မှနေ၍ ပေါင်မုန့် စား၊ ကော်ဖီ သောက်ရင်း လက်ခုပ်တီး ရယ်မော နေတတ်ကြလေသည်။

ဤအဖြစ်အပျက်များကို စိတ်ကူးယဉ် ရေးဖွဲ့ထားခြင်းဟု မထင်လိုက်ပါနှင့်။ အမှန်တကယ် လက်တွေ့ ဘဝတွင် ဖြစ်ပျက်ခဲ့ဖူးသော အရာများပင် ဖြစ်လေသည်။

၂၀၀၁ ခုနှစ် လေယာဉ်ဖြင့် အဆောက်အအုံများ ဝင်တိုက်ခံရသည့် အဖြစ်အပျက် ပြီးနောက်ပိုင်း တရားရေး ဝန်ကြီးဌာန၏ ပြုပြင်ပြောင်းလဲမှုများကြောင့် အက်ဖ်ဘီအိုင် ဝါရှင်တန် ဌာနချုပ်က တစ်နိုင်ငံလုံးနှင့် ချိတ်ဆက်ထားသော မှုခင်း မှတ်တမ်း စစ်ဆေးရေး စနစ်ကို တည်ဆောက်နိုင်ခဲ့ပြီးနောက်မှသာ အက်ဖ်ဘီအိုင်နှင့် ဒေသခံ ရဲတပ်ဖွဲ့များကြား ဆက်ဆံရေးက အနည်းငယ် ပိုမို ကောင်းမွန် လာခဲ့ခြင်း ဖြစ်သည်။

သို့သော် အခြေအနေက အတော်လေး ဆိုးရွား နေဆဲပင် ဖြစ်သည်။

ယခု အချိန်တွင် ဒေသခံ ရဲတပ်ဖွဲ့များသည် သံသယရှိသူများကို ကြိုတင် ထွက်ပြေးခိုင်းသည့် ကိစ္စမျိုးကို မလုပ်ဆောင်တော့သော်လည်း အက်ဖ်ဘီအိုင်များကို အဖက်မလုပ်ခြင်း၊ အလုပ်လုပ်ရာတွင် အားကြိုးမာန်တက် မလုပ်ဆောင်ခြင်း စသည့် ကိစ္စများကတော့ မကြာခဏ ဖြစ်ပွားလေ့ ရှိနေဆဲပင် ဖြစ်လေသည်။

"အဲ့ဒါကြောင့် ရိုအန်..."

ရိုအန် တစ်ယောက် မိမိ ဆိုလိုရင်းကို နားလည် သဘောပေါက် သွားကြောင်း မြင်တွေ့လိုက်ရသောအခါ သြဂတ်စ်က ရိုအန်၏ မျက်လုံးများကို စူးစိုက်ကြည့်ကာ ပြောလိုက်သည်။

"ဒီတစ်ကြိမ် အမှု စုံစမ်း စစ်ဆေးတဲ့ အခါမှာ... နယူးဂျာစီ က ရဲတွေကို မင်း သေချာ ဂရုစိုက်ဖို့ လိုလိမ့်မယ်..."

ရိုအန်က ခေါင်းညိတ်ပြလိုက်ပြီး နှုတ်ခမ်းကို သပ်ကာ မျက်နှာပေါ်တွင် နွေးထွေးသော အပြုံး တစ်ခုကို ဖော်ဆောင်လိုက်သည်။

"စိတ်ချပါ အဖွဲ့ခေါင်းဆောင်... ကျွန်တော် က တခြားသူတွေကို ဘယ်တော့မှ အရင် စတင် အနိုင်ကျင့် လေ့ မရှိပါဘူး... တစ်ချိန်တည်းမှာပဲ တခြားသူတွေရဲ့ အနိုင်ကျင့် ခံရတာကိုလည်း လုံးဝ လက်ခံမှာ မဟုတ်ပါဘူး…”