အခန်း ၃၇၈

အခန်း (၃၇၈) အရေးကြီးသော သတင်းအချက်အလက်

"ဒါက သေချာတာပေါ့... သေချာတာပေါ့..." လီကျန်းရှီးသည် စကားပြောရန် ဆွံ့အသွားခဲ့ပေ၏။

တာ့ရှား(တရုတ်)ရှိ အဓိက အဖြစ်အပျက်များကို သူ အမှန်တကယ်ပင် မသိရှိခဲ့ချေ။

မည်သို့ပင်ဖြစ်စေ သူသည် နေ့စဉ် စားသောက်ခြင်းနှင့် ပျော်ပါးခြင်းများဖြင့်သာ အချိန်ဖြုန်းလေ့ရှိပြီး သတင်းများကိုမူ လုံးဝ ဂရုမစိုက်ခဲ့ပေ။

"ဟားဟား... အဲဒီလိုဆိုရင်တော့ ဥက္ကဋ္ဌစုအပေါ်ကို ကျွန်မ အများကြီး အားကိုးရတော့မယ်..." မန်နေဂျာ လီမေ့ကျူးက ပြောလိုက်၏။

တစ်ခုခု မှားယွင်းနေကြောင်းကို သူမ သိရှိနိုင်သော်လည်း မည်သည့်အရာကိုမျှ သံသယမဝင်ခဲ့ချေ။

ထိုအချိန်မှာပင် အရှေ့ဘက်၌ အခြားကားတစ်စီး ရပ်တန့်သွားပြီး ကျောက်ဟွေ့ဟွမ် ဆင်းလာခဲ့လေသည်။

"တာ့ရှား(တရုတ်)က ဝန်ကြီးကျောက်ပါလား..." မန်နေဂျာ လီမေ့ကျူးသည် သူမ၏ အဝတ်အစားများကို ချက်ချင်း သပ်သပ်ရပ်ရပ်ဖြစ်အောင် ပြင်ဆင်လိုက်ပြီး သူမ၏ အမူအရာမှာလည်း လေးနက်သွားခဲ့ပေ၏။

"ဝန်ကြီးကျောက်... ယွမ်ဟိုင်လုပ်ငန်းစု အရောင်းဌာနရဲ့ အကြီးအကဲလား..." လီကျန်းရှီးက အလျင်အမြန် မေးလိုက်သည်။

အရောင်းမန်နေဂျာ တစ်ယောက်အတွက် တကယ်ပဲ ဒီလောက်အထိ လေးနက်နေဖို့ လိုလို့လား။

"ဟင်..."

"မင်းကို ငါ မပြောခဲ့ဘူးလား..."

"ဒါက တာ့ရှား(တရုတ်)က ဝန်ကြီးကျောက်လေ... သိပ္ပံနဲ့ နည်းပညာဌာနရဲ့ အကြီးအကဲလေ..." မန်နေဂျာ လီမေ့ကျူးက လီကျန်းရှီးကို ကြည့်လိုက်၏။

လီကျန်းရှီးသည် အတော်လေး အနေခက်သော အခြေအနေသို့ ရောက်ရှိသွားခဲ့ပေသည်။

ဒီလူကို ငါ လုံးဝ မသိဘူး...

ဒါပေမဲ့...

အခု ဒီလူ ရောက်လာပြီဆိုတော့ စုယွမ်က ဒီကိစ္စကို တစ်ယောက်တည်း ဆုံးဖြတ်နိုင်တဲ့ အနေအထားမှာ မရှိတော့ဘူးလို့ ဆိုလိုတာ မဟုတ်ဘူးလား...

တကယ်လို့ ဝန်ကြီးကျောက်နဲ့သာ တိုက်ရိုက် ဆွေးနွေးညှိနှိုင်းနိုင်မယ်ဆိုရင်...

ငါ့မှာ အခြေအနေကို ပြောင်းလဲပြီး အနိုင်ရဖို့ အခွင့်အရေး ရှိနေသေးတယ်။

၎င်းကို တွေးတောမိချိန်တွင် လီကျန်းရှီးသည် ဝန်ကြီးကျောက်အပေါ် ကောင်းမွန်သော ပထမဆုံး အမြင်တစ်ခု ဖန်တီးပေးရန် လိုအပ်ကြောင်း နားလည်သွားခဲ့လေ၏။

ထို့ကြောင့် သူသည် ကျောက်ဟွေ့ဟွမ်၏ ဘေးသို့ အလျင်အမြန် ပြေးသွားလိုက်သည်။

"မင်္ဂလာပါ ဝန်ကြီးကျောက်... ကျွန်တော်က Six Starလုပ်ငန်းစု တည်ထောင်သူရဲ့ အငယ်ဆုံးသားပါ... ကျွန်တော့်နာမည်က လီကျန်းရှီးဖြစ်ပြီး Six Starလုပ်ငန်းစုရဲ့ ဥက္ကဋ္ဌနေရာကို ဆက်ခံဖို့ အလားအလာအရှိဆုံး သူတစ်ယောက်ပါ..."

"ဒီနေ့ ဒီနေရာမှာ ဝန်ကြီးကျောက်ကို တွေ့ရတဲ့အတွက် အရမ်းကို ဝမ်းသာပါတယ်..."

"ကျွန်တော်တို့ရဲ့ ရှင်းလင်းပြတ်သားတဲ့ ညှိနှိုင်းမှုတွေက ချောချောမွေ့မွေ့ ဖြစ်သွားလိမ့်မယ်လို့ မျှော်လင့်ပါတယ်..." လီကျန်းရှီးက သူ၏ကိုယ်သူ သဘာဝကျကျ မိတ်ဆက်လိုက်၏။

"အင်း... တွေ့ရတာ ဝမ်းသာပါတယ်..."

"ဒါပေမဲ့ ဒီနေ့ ငါလာတာက အကဲခတ်ဖို့နဲ့ ခွဲခြမ်းစိတ်ဖြာမှု လုပ်ငန်းစဉ်မှာ ပါဝင်ဖို့ပါ..."

"ဆွေးနွေးညှိနှိုင်းမှုတွေအတွက်တော့ ဥက္ကဋ္ဌစုနဲ့ပဲ ဆွေးနွေးသင့်ပါတယ်..." ကျောက်ဟွေ့ဟွမ်က ခံစားချက်ကင်းမဲ့စွာ ပြောလိုက်သည်။

ဤလီကျန်းရှီးနှင့် ပတ်သက်၍ သူတို့ အသေးစိတ် စုံစမ်းစစ်ဆေးမှုများ ပြုလုပ်ထားပြီး ဖြစ်ပေ၏။

အတိုချုပ်ပြောရလျှင် သူသည် သောက်စားပျော်ပါးခြင်းကိုသာ သိရှိပြီး စီးပွားရေး ကိစ္စရပ်များနှင့် ပတ်သက်၍မူ လုံးဝ မသိရှိသော ဘာမှသုံးစားမရသည့် သူဌေးသားလေး တစ်ယောက်သာ ဖြစ်ပေသည်။

"ဒါက.. ဝန်ကြီးက မပါဝင်ဘူးလား..." လီကျန်းရှီးက အံ့အားသင့်စွာ မေးလိုက်၏။

"ဟုတ်တယ်... ငါက အကဲခတ်ရုံသက်သက်ပါပဲ..." ကျောက်ဟွေ့ဟွမ်က ပြန်လည်ဖြေကြားလိုက်သည်။

"တကယ်ကြီးလား... ဒီလောက်ကြီးမားတဲ့ ပရောဂျက်ကြီးကို ဝန်ကြီးက ကိုယ်တိုင်ကိုယ်ကျ မပါဝင်ဘူးပေါ့... ဝန်ကြီး သူ့ကို တကယ်ပဲ ယုံကြည်လို့လား... တည်ငြိမ်မှုရှိမယ်ဆိုတာကိုရော အာမခံနိုင်လို့လား... ကျွန်တော့် အကြံပြုချက်ကတော့ ဝန်ကြီး ကိုယ်တိုင် ပါဝင်သင့်တယ်လို့ ထင်ပါတယ်..." လီကျန်းရှီးက အလျင်အမြန် ပြောလိုက်၏။

"ငါ မပါဝင်ဘူးလို့ ပြောပြီးပြီလေ..."

"ယွမ်ဟိုင်လုပ်ငန်းစုရဲ့ အထွေထွေမန်နေဂျာ ဥက္ကဋ္ဌစုက ရှယ်ယာ ၄၉ ရာခိုင်နှုန်း ပိုင်ဆိုင်ထားပြီး ဥက္ကဋ္ဌအဖြစ် တာဝန်ယူထားတယ်ဆိုတာကို မင်း ကြိုသိထားသင့်တာပေါ့... ပါဝင်နေတဲ့ အစုရှယ်ယာတွေရဲ့ အရေးပါမှုကို မင်း ဘာလို့ နားမလည်ရတာလဲ..."

"ဒီအပေးအယူက ဥက္ကဋ္ဌစု တစ်ယောက်တည်းက ဆုံးဖြတ်ရမယ့် ကိစ္စပဲ... ငါက ဒီတိုင်း လာကြည့်ရုံ သက်သက်ပဲ..." ကျောက်ဟွေ့ဟွမ် သူ့ကို တစ်ချက်ကြည့်ကာ ပြောလိုက်သည်။

"ဒါပေမဲ့ ဘယ်လိုပဲဖြစ်ဖြစ် ဝန်ကြီးက ဝန်ကြီးပဲလေ... တကယ်လို့ ဝန်ကြီး မပါဝင်ဘူးဆိုရင် ဒါက ဝန်ကြီးကို မလေးစားရာ မကျဘူးလား..."

"ကျွန်တော့် အကြံပြုချက်ကတော့..." လီကျန်းရှီးသည် ကျောက်ဟွေ့ဟွမ်အား ဆွေးနွေးညှိနှိုင်းမှုများတွင် ပါဝင်ရန် မမောမပန်း ကြိုးပမ်းနေခဲ့သော်လည်း အနီးသို့ ရောက်ရှိလာသော မန်နေဂျာ လီမေ့ကျူးကြောင့် ပြတ်တောက်သွားခဲ့လေ၏။

"ဟားဟား... ဝန်ကြီးကျောက်... ကျန်းရှီးက ဒီကိစ္စတွေကို နားမလည်လို့ပါ... သူ့ကို ခွင့်လွှတ်ပေးပါ..."

မန်နေဂျာ လီမေ့ကျူးသည် စကားပြောရန် ဆွံ့အသွားခဲ့ပေသည်။ လီကျန်းရှီး၌ အရည်အချင်းအချို့ ရှိလိမ့်မည်ဟု သူမ အစပိုင်းက ထင်မှတ်ထားခဲ့သော်လည်း ယခုကြည့်ရသည်မှာ ထိုအရည်အချင်းများ အားလုံး ပျောက်ကွယ်သွားခဲ့ပုံပေါ်လေ၏။

"ဝန်ကြီးကျောက်... ကျွန်တော် ယုံကြည်နေတုန်းပဲ..." လီကျန်းရှီးသည် စုယွမ်နှင့် လုံးဝ ထိပ်တိုက်မတွေ့ချင်သော်လည်း ဆက်လက်၍ စကားပြောရန် ကြိုးစားနေခဲ့၏။

"အင်း... မန်နေဂျာလီ... ဥက္ကဋ္ဌစုရဲ့ ကား ရောက်ပြီမလား..အချိန် ထပ်မဖြုန်းဘဲ စတင်လိုက်ကြရအောင်..." ကျောက်ဟွေ့ဟွမ်က သူ့အား ဖြတ်ပြောလိုက်သည်။

"ကောင်းပါပြီ..." မန်နေဂျာ လီမေ့ကျူးက ခေါင်းညိတ်လိုက်၏။

ထို့နောက် သူတို့နှစ်ဦးသည် ယွမ်ဟိုင် အဆောက်အအုံအတွင်းသို့ ဘေးချင်းယှဉ်ကာ လျှောက်ဝင်သွားကြလေ၏။

အနောက်တွင် ကျန်ရစ်ခဲ့သော လီကျန်းရှီးမှာမူ ဒေါသကို မထိန်းနိုင်တော့ဘဲ လေထဲသို့ လက်သီးတစ်ချက် အားပြင်းပြင်းဖြင့် ထိုးချလိုက်သည်။

ထိုအပြုအမူကပင် သူ၏ ရင်ထဲတွင် ဒေါသများ မည်မျှ ပြင်းထန်စွာ ဆူပွက်နေကြောင်းကို ထင်ရှားစွာ ဖော်ပြနေခဲ့လေ၏။

အစည်းအဝေးခန်းတစ်ခုအတွင်း ကြီးမားသော လေးဘက်လေးနံ စားပွဲကြီး၏ တစ်ဖက်တစ်ချက်စီတွင် နှစ်ဖက် ညှိနှိုင်းရေး ကိုယ်စားလှယ်များ ထိုင်နေကြပေသည်။

စုယွမ်ဘက်တွင် လူခြောက်ဦးသာ ရှိ၏။

ကျောက်ဟွေ့ဟွမ်အပြင် ကုမ္ပဏီ ဒုတိယဥက္ကဋ္ဌ နှစ်ဦး၊ အရောင်းဌာန အကြီးအကဲ တစ်ဦးနှင့် စကားပြန် တစ်ဦးတို့ ပါဝင်ပေသည်။

Six Starလုပ်ငန်းစုဘက်တွင်လည်း လူခြောက်ဦး ရှိပေ၏။

"စကားမရှည်တော့ပါဘူး... မ​န်နေဂျာလီ... ကျွန်တော်တို့ရဲ့ Lithography စက် ထုတ်ကုန်တွေကို စိတ်ဝင်စားတဲ့အတွက် Six Starလုပ်ငန်းစုကို ကျေးဇူးတင်ပါတယ်..."

"ဒါက ကျွန်တော်တို့ရဲ့ ပထမဆုံး အမှာစာလည်းဖြစ်ပါတယ်... ဘယ်လောက် အရေအတွက် ဝယ်ယူဖို့ အစီအစဉ်ရှိလဲဆိုတာကို သိပါရစေ..." အရောင်းဌာန အကြီးအကဲက မေးလိုက်သည်။

"ကျွန်မတို့ Lithography စက် ခြောက်လုံး ဝယ်ယူဖို့ စီစဉ်ထားပါတယ်..."

“ဒါက ကျွန်မတို့ရဲ့ ပထမဆုံးအကြိမ် ပူးပေါင်းဆောင်ရွက်ခြင်း ဖြစ်သလို၊ တာ့ရှား(တရုတ်)ဘက်ကလည်း ကောင်းမွန်တဲ့ အစပြုမှုတွေကို အမြဲတန်ဖိုးထားတတ်တာကြောင့် စကားကို အရှည်မဆွဲချင်တော့ပါဘူး...

ရှင့်တို့ဘက်က အနည်းဆုံး သတ်မှတ်ထားတဲ့ ဈေးနှုန်းကိုသာ တိုက်ရိုက် ပြောပြပေးပါ...”

မန်နေဂျာ လီမေ့ကျူးက တည်ငြိမ်စွာ ပြောလိုက်၏။

“မန်နေဂျာလီ... စိတ်ချထားနိုင်ပါတယ်...

ကျွန်တော်တို့ ကမ်းလှမ်းမယ့် ဈေးနှုန်းက သေချာပေါက် သင့်တင့်မျှတပြီး နှစ်ဖက်စလုံး စိတ်ကျေနပ်စေမယ့် ဈေးနှုန်းတစ်ခု ဖြစ်ပါလိမ့်မယ်...”

"ကျွန်တော်တို့ တာ့ရှား(တရုတ်)ရဲ့ Lithography စက်အကြောင်းကို ခင်ဗျားတို့ သိထားသင့်တယ်... ဒါက ဒီနေ့ကမ္ဘာမှာ အဆင့်မြင့်ဆုံး နည်းပညာကို အသုံးပြုထားတာပါ... 7-nanometer လုပ်ငန်းစဉ် ဖြစ်ပေမဲ့ ချစ်ပ်ပြားရဲ့ လက်တွေ့ စွမ်းဆောင်ရည်က 3-nanometer ချစ်ပ်ပြားတွေနဲ့ နှိုင်းယှဉ်လို့ရပါတယ်..."

"အဲဒါက ကျွန်တော်တို့ရဲ့ အားသာချက်ပဲ..."

"3 nanometers နဲ့ ထုတ်လုပ်ထားတဲ့ Lithography စက်တွေနဲ့ နှိုင်းယှဉ်ရင် ကျွန်တော်တို့က သဘာဝကျကျ ပိုပြီး သက်သာပါတယ်... ပြီးတော့ ကျွန်တော်တို့ Lithography စက်တွေရဲ့ အထွက်နှုန်းကလည်း အရမ်းကို မြင့်မားပါတယ်... စမ်းသပ်မှုတွေ လုပ်ဆောင်နေချိန်အတွင်း ချို့ယွင်းချက်ရှိတဲ့ ချစ်ပ်ပြား တစ်ပြားမှတောင် ကျွန်တော်တို့ မတွေ့ခဲ့ရဘူး..."

"ဒီလို ထုတ်ကုန်မျိုးက ခင်ဗျားတို့ Six Starလုပ်ငန်းစုကို ယူဆောင်လာပေးနိုင်တဲ့ အကျိုးကျေးဇူးတွေက ရှင်းလင်းပြီးသားပါ..."

အရောင်းဌာန အကြီးအကဲက ဆက်လက်၍ ပြောလိုက်လေ၏။

"ဒါကြောင့် ကျွန်တော်တို့ရဲ့ လက်ရှိ ဈေးနှုန်းက တစ်လုံးကို ယွမ် လေးဘီလီယံပါ... အဲဒါက 3nm Lithography စက်ထက် ယွမ် ၁.၅ ဘီလီယံတိတိ လျော့နည်းနေပါတယ်..."

ထိုဈေးနှုန်းကို ကြားချိန်တွင် မန်နေဂျာ လီမေ့ကျူး၏ မျက်ခုံးများ တွန့်ချိုးသွားခဲ့ပေသည်။

ခြောက်လုံးဆိုလျှင် စုစုပေါင်း ယွမ် ၂၄ ဘီလီယံ အထိ ရောက်သွားမည် ဖြစ်သည်။

သို့သော် သူတို့၏ လက်ရှိ စုစုပေါင်း ဘတ်ဂျက်မှာ ယွမ် ၂၀ ဘီလီယံ သာ ရှိသေးရာ၊ ထိုကဲ့သို့သော ဈေးနှုန်းမှာ သဘာဝကျကျ တွက်ခြေမကိုက်လှပေ။

"လူကြီးမင်းတို့... ဈေးနှုန်း ယွမ် လေးဘီလီယံကို ကျွန်မတို့ လက်မခံနိုင်ပါဘူး..."

"ပွင့်ပွင့်လင်းလင်း ပြောရရင် ဒီဈေးနှုန်းက ကျွန်မတို့ရဲ့ ဘတ်ဂျက်ကို ကျော်လွန်နေပါတယ်..."

"ကျွန်မကတော့ ယွမ် နှစ်ဘီလီယံ ပဲပေးနိုင်ပါမယ်" မန်နေဂျာ လီမေ့ကျူးက တိုက်ရိုက် ပြောလိုက်၏။

"ဟားဟားဟား... မန်နေဂျာလီက နောက်နေတာပဲ..."

“တကယ်လို့ ထူးထူးဆန်းဆန်း ဈေးဆစ်တတ်တဲ့သူ တစ်ယောက်ယောက်သာ ရောက်လာပြီး အစဈေးရဲ့ တစ်ဝက်ကိုပဲ ပေးမယ်လို့ ပြောမယ်ဆိုရင်တော့ ဒီအပေးအယူက ဘယ်လိုမှ အောင်မြင်နိုင်မှာ မဟုတ်ပါဘူး...

ဒါပေမဲ့...

ခင်ဗျားတို့က ပူးပေါင်းဆောင်ရွက်ဖို့ စိတ်ရင်းမှန်နဲ့ လာကြတာဆိုတော့ ကျွန်တော်တို့ဘက်ကလည်း အလိုက်သင့် ညှိနှိုင်းပေးရမှာပေါ့...

ယွမ် သုံးဘီလီယံခွဲ...”

အရောင်းဌာန အကြီးအကဲက တည်ငြိမ်စွာ ပြောလိုက်၏။

ထိုဈေးနှုန်းကို ကြားလိုက်ရသော်လည်း မန်နေဂျာ လီမေ့ကျူးက သူမ၏ လက်ချောင်းများကို စားပွဲပေါ်တွင် ဖွဖွလေး ခေါက်နေဆဲ ဖြစ်သည်။

ဒီဈေးက မဖြစ်သေးဘူး...ဈေးကြီးနေသေးတယ်...

ကုန်ကျစရိတ်ကို တက်နိုင်သမျှ ထိန်းချုပ်နိုင်သမျှ ထိန်းချုပ်ရပေမည်။

တစ်လုံးလျှင် ယွမ် သန်း၁၀၀ လျော့ချနိုင်ခဲ့ရုံမျှဖြင့်ပင် စုစုပေါင်းတွက်လိုက်လျှင် အလွန်များပြားသော ငွေပမာဏ ဖြစ်သွားနိုင်၏။

“ဒီလိုဆိုရင် ဘယ်လိုလဲ...

နှစ်ဖက်စလုံး တစ်ဝက်စီ အလျှော့ပေးလိုက်ကြတာပေါ့...

ယွမ် သုံးဘီလီယံ...ဒီဈေးကိုရော ဘယ်လို သဘောရလဲ...”

မန်နေဂျာ လီမေ့ကျူးက အပြုံးဖျော့ဖျော့ဖြင့် မေးလိုက်၏။

ဤစကားများကြောင့် သူတို့အဖွဲ့မှာ တိတ်ဆိတ်စွာ တွေးတောသွားကြလေသည်။

မူလ ကြိုတင်ရောင်းချမည့် ဈေးနှုန်းမှာ တကယ်ပင် ယွမ် သုံးဘီလီယံပင် ဖြစ်၏။

ထိုအခိုက်အတန့်တွင် စုယွမ်သည် ယနေ့အတွက် သတင်းအချက်အလက်များကို မစစ်ဆေးရသေးကြောင်း ရုတ်တရက် သတိရသွားခဲ့ပေသည်။ စနစ်ကို အဆင့်မြှင့်တင်ပြီးနောက် သတင်းအချက်အလက်များကို အချိန်ကိုက် တွန်းပို့နိုင်ပြီဖြစ်ရာ စုယွမ်သည် ယနေ့အတွက် ၁၂ နာရီဟု သတ်မှတ်ထားခဲ့သည်။

သို့သော် ထိုအချိန်တွင် စုယွမ်၏ စိတ်ထဲသို့ အတွေးတစ်ခု ရုတ်တရက် ဝင်ရောက်လာခဲ့၏။

ဒီနေ့ရဲ့ သတင်းအချက်အလက်တွေကို တစ်ချက်လောက် ကြည့်လိုက်ရင်ရော...

အဖွဲ့နှစ်ဖွဲ့ ဆွေးနွေးညှိနှိုင်းနေကြစဉ် စုယွမ်သည် တိတ်တဆိတ် သတင်းအချက်အလက်များကို ဖွင့်ကြည့်လိုက်လေသည်။

[ယနေ့ သတင်းအချက်အလက်] Six Starလုပ်ငန်းစု၏ ဥက္ကဋ္ဌ လီရှန်းဟယ်သည် နောက်ဆုံးအဆင့် ကင်ဆာရောဂါကို ခံစားနေရပြီး ကုသနိုင်မည့် နည်းလမ်းကို နေရာအနှံ့ ရှာဖွေနေလျက် ရှိသည်။