အခန်း ၄၀၇

အခန်း ၄၀၇။ သတ်ပုတ်ခြင်း... သြစတြေးလျတွင် သားပိုက်ကောင်နှင့် ရန်ဖြစ်ရသည်

တိုက်ရိုက်ထုတ်လွှင့်မှုကို ပုံမှန်အတိုင်း ဖွင့်လှစ်လိုက်သည်။

အင်တာနက်သုံးစွဲသူများ တိုက်ရိုက်ထုတ်လွှင့်မှု အခန်းထဲသို့ ဝင်ရောက်လာချိန်တွင် နံနက် ဆယ်နာရီ တိတိ ရှိနေပြီ ဖြစ်လေသည်။

ဤအချိန်တွင် စတင် ထုတ်လွှင့်ခြင်းက အနေတော်ပင် ဖြစ်လေသည်။

ရွှီယန်က တောရိုင်းမြေပြင် တစ်ခုတွင် ရောက်ရှိနေပြီး နေရာအနှံ့တွင် မြက်ရိုင်းများ ပေါက်ရောက်နေကာ အဝေးတွင်လည်း သစ်တောများ ရှိနေသဖြင့် သူ မည်သည့် နေရာသို့ ရောက်ရှိနေမှန်း အားလုံး မသိရှိကြချေ။

ဤနေရာက သြစတြေးလျ အရှေ့မြောက်ပိုင်း ဆင်ခြေဖုံး ဒေသ ဖြစ်ပြီး ရွှီယန် အထူး သီးသန့် ရှာဖွေထားသော နေရာလည်း ဖြစ်လေသည်။

အဘယ်ကြောင့်ဆိုသော် ဤနေရာတွင် ကျယ်ဝန်းလှသော သစ်တောအုပ်ကြီး ရှိပြီး တိရစ္ဆာန်များလည်း အလွန် များပြားသောကြောင့် ပင်ဖြစ်သည်။

[လောင်ရွှီ အပူပိုင်း မိုးသစ်တော ထဲကို ဝင်သွားတာလား]

[ဒါ ဘယ်နေရာလဲ]

အင်တာနက်သုံးစွဲသူများက စူးစမ်းချင်စိတ်များဖြင့် တစ်ယောက်တစ်ပေါက် မေးမြန်းနေကြလေသည်။

ရွှီယန်က ကွန်မန့်စာသားများကို တစ်ချက် ကြည့်လိုက်ပြီး အားလုံးကို ရှင်းပြလိုက်သည်။

"အပူပိုင်း မိုးသစ်တော ထဲကို မဝင်ပါဘူး... ဟိုဘက်တွေ က ရှုခင်းကြည့် ဧရိယာ တွေ ဆိုတော့ လျှောက်သွားခွင့် မပြုဘူး... ပြီးတော့ တော်တော်များများ လည်း ဖွံ့ဖြိုးတိုးတက် နေပြီလေ"

"အဲဒီဘက်က အပူပိုင်း မိုးသစ်တော ထဲမှာ လင်းနို့ တွေနဲ့ ငှက် တွေပဲ ပိုများတာ ဆိုတော့ သွားစရာ မလိုပါဘူး"

"ကျွန်တော် က ဆင်ခြေဖုံး ဘက်ကို သွားကြည့်ချင်တာပါ"

"အားလုံး သိကြတဲ့ အတိုင်း သြစတြေးလျ မှာက သားပိုက်ကောင် တွေ အရမ်း ပေါတယ်လေ... သစ်တော ထဲက သားပိုက်ကောင် တွေကို သွားကြည့်ချင်လို့ပါ"

"တောရိုင်း သားပိုက်ကောင် တွေက အရမ်း ကြမ်းတယ် လို့ ကြားဖူးတယ်"

ရွှီယန်က စကားပြောနေရင်း သစ်တော အတွင်းသို့ လမ်းလျှောက် ဝင်ရောက်သွားလေသည်။

နွေရာသီ ဖြစ်သဖြင့် ဤနေရာရှိ ရာသီဥတုက အနည်းငယ် ပူအိုက် အိုက်စပ် နေလေသည်။

ထို့အပြင် ရာသီဥတုက စိုစွတ်သဖြင့် သစ်တောထဲတွင် နှိုင်းယှဉ်ချက် အရ အနည်းငယ် ပို၍ အန္တရာယ် များကာ အမျိုးအစား စုံလင်သော ကပ်ပါးကောင်များနှင့် ရောဂါပိုးမွှားများ ကလည်း ရေတွက်၍ မရနိုင်လောက်အောင်ပင် များပြားလှပေသည်။

ရွှီယန် ကတော့ ဤအရာများကို ကြောက်ရွံ့ခြင်း မရှိချေ။

မကြာခင်မှာပင် သူက ရတနာရှာဖွေရေး တာဝန်ကို စတင်ရန် ရွေးချယ်လိုက်တော့သည်။

[ရှားပါး ရတနာရှာဖွေရေး တာဝန်ကို စတင်ပါပြီ... သြစတြေးလျ မှတ်တမ်း... ရတနာရှာဖွေရေး အကြိမ်ရေ ဆယ်ကြိမ် အသုံးပြုရန် လိုအပ်ပြီး လက်ခံမည် မခံမည်ကို ရွေးချယ်ပါ]

[တာဝန် အကြောင်းအရာ... သြစတြေးလျ တောရိုင်း တိရစ္ဆာန် ဆယ်မျိုး၏ မှတ်တမ်းကို စုဆောင်းပါ]

[တာဝန် ဆုလာဘ်... ရဟတ်ယာဉ် မောင်းနှင်ခြင်း ကျွမ်းကျင်မှု စွမ်းရည်]

[ဧည့်ခန်းသုံး သစ်မာ ပရိဘောဂ တစ်စုံ]

တာဝန် က နောက်တစ်ကြိမ် ထပ်မံ ထွက်ပေါ်လာခဲ့ပြန်သည်။

ဤတစ်ကြိမ် တာဝန် က ကြည့်ရသည်မှာ ထိုမျှလောက် မခက်ခဲချေ။

သို့သော် ရွှီယန် သေချာစွာ လေ့လာ ကြည့်လိုက်သော အခါမှသာ တကယ်တမ်းတွင် ထိုမျှလောက် မရိုးရှင်းကြောင်း သတိထားမိလိုက်သည်။

တောရိုင်း တိရစ္ဆာန် ဆယ်မျိုး အထဲတွင် မြွေဆိုး နှစ်မျိုး နှင့် အဆိပ် ပင့်ကူ တစ်မျိုး ပါဝင်နေလေသည်။

သြစတြေးလျ၏ အကြောက်မက်ဖွယ် အကောင်းဆုံး အချက်မှာ ဤအချက် ပင်ဖြစ်သည်။ ကြီးမားသော သားရဲတိရစ္ဆာန်များ မရှိသော်လည်း သေးငယ်သော အဆိပ်ရှိ သတ္တဝါများ ကတော့ အများအပြား ရှိလေသည်။

ဥပမာအားဖြင့် မြွေဆိုး နှင့် အဆိပ် ပင့်ကူ များ ဖြစ်ပြီး ဤနေရာတွင် အရေအတွက် အလွန် များပြားလှပေသည်။

တောင်ဘက်သို့ ရောက်လေလေ အင်းဆက်ပိုးမွှားများ က ပို၍ ကြီးမားလေလေ ဖြစ်ရာ ဤနေရာရှိ အင်းဆက်များ က မည်မျှအထိ ကြောက်စရာ ကောင်းမည်ကို တွေးကြည့်ရုံဖြင့် သိနိုင်ပေသည်။

ဤသည်မှာလည်း ဂေဟစနစ် ကောင်းမွန်ခြင်း၏ ဆိုးကျိုး ပင်ဖြစ်သည်။ ထို့ကြောင့် သြစတြေးလျ သို့ ရောက်ရှိပါက သေချာပေါက် မြို့ပြ ဧရိယာ အတွင်းတွင်သာ လှုပ်ရှား သွားလာရမည် ဖြစ်လေသည်။

ရှုခင်း လှပသော ဝေးလံခေါင်သီသည့် ကျေးလက် ဒေသများ သို့ သွားရောက်မည် ဆိုပါက အိမ်ထဲသို့ အင်းဆက်ပိုးမွှား မည်မျှ ဝင်ရောက်လာမည်ကိုပင် မသိနိုင်တော့ချေ။

အိမ်သာခွက် ကို ဖွင့်လိုက်သည် နှင့် အထဲမှနေ၍ ဖား အများအပြား ထွက်လာနိုင်ခြေ ပင် ရှိလေသည်။

'တာဝန် က တော်တော်လေး ခက်တယ်... ဒါပေမဲ့ အချိန် ကန့်သတ်ချက် မရှိတော့ ရေရှည် လုပ်သွားလို့ ရတယ်'

'ကံတရား အတိုင်းပဲ သွားရမှာပဲ... ဒီအကောင် တွေက ရှာချင်တိုင်း ရှာလို့ ရတဲ့ အကောင်တွေ မှ မဟုတ်တာ'

'ငါ လည်း အလုပ်အားနေလို့ အဆိပ် ပင့်ကူ သွားရှာနေမှာ မဟုတ်ဘူး'

'ပြီးတော့ ကျွမ်းကျင်မှု ဆုလာဘ် က ရဟတ်ယာဉ် မောင်းတာ ဆိုတော့ သိပ်ပြီး အသုံးမဝင်ဘူး... စွန့်စားဖို့ မလိုပါဘူး'

ရွှီယန် က စိတ်ထဲမှ တွေးတော နေလိုက်သည်။

ရှားပါးအဆင့် တာဝန် က ထိုမျှလောက် မလွယ်ကူလှရာ သူ အနေဖြင့် ရွေးချယ်ခွင့် ရှိလေသည်။

ထို့ကြောင့် ရွှီယန်က သစ်တော အတွင်းသို့ ဆက်လက် လမ်းလျှောက် သွားလိုက်သည်။

အချိန် သိပ်မကြာခင်မှာပင် စနစ်၏ သတိပေးသံ က ရုတ်တရက် ထပ်မံ ထွက်ပေါ်လာခဲ့ပြန်သည်။

[ရတနာရှာဖွေရေး တာဝန်ကို စတင်ပါပြီ... ကြမ်းကြုတ်သော သားပိုက်ကောင်]

[တာဝန် အကြောင်းအရာ... ကြမ်းကြုတ်သော သားပိုက်ကောင် တစ်ကောင် က ပိုင်ရှင် ကို တိုက်ခိုက်တော့မည် ဖြစ်ရာ ပိုင်ရှင် အနေဖြင့် ၎င်းနှင့် မျက်နှာချင်းဆိုင် တိုက်ခိုက်ရာတွင် အနိုင်ရရှိအောင် လုပ်ဆောင်ပါ]

[တာဝန် ဆုလာဘ်... လက်ဝှေ့ဘုရင် ရွှေခါးပတ်]

ရုတ်တရက် ထွက်ပေါ်လာသော သတိပေးချက် ကြောင့် ရွှီယန် အနည်းငယ် ကြောင်အမ်းအမ်း ဖြစ်သွားရသည်။

"ဘာကြီးလဲ..."

"ကြမ်းကြုတ်တဲ့ သားပိုက်ကောင် ဟုတ်လား..."

သူ အနည်းငယ် သံသယ ဖြစ်နေစဉ်မှာပင် မလှမ်းမကမ်းရှိ သစ်တော ထဲမှနေ၍ အရပ် နှစ်မီတာခန့် မြင့်ကာ တစ်ကိုယ်လုံး ကြွက်သားများ အပြည့်အနှက် ရှိနေသော ကြမ်းကြုတ်သည့် သားပိုက်ကောင် တစ်ကောင် က သစ်တော ထဲမှ ခုန်ဆွ ခုန်ဆွ ဖြင့် ထွက်လာပြီး ရွှီယန် ရှိရာဘက်သို့ ချဉ်းကပ်လာတော့သည်။

သြစတြေးလျ တွင် သားပိုက်ကောင် အရေအတွက် အလွန် များပြားကြောင်းကို ရွှီယန် သိရှိထားလေသည်။

တချို့ သားပိုက်ကောင်များ က စိတ်သဘောထား လည်း ကြမ်းတမ်းကြပြီး အမြဲတမ်း ရန်ဖြစ်တတ်ကြလေသည်။

သို့သော် သူ ကိုယ်တိုင် ကြုံတွေ့ရလိမ့်မည် ဟု မမျှော်လင့်ထားခဲ့ချေ။

ဒရုန်း က သားပိုက်ကောင် ပေါ်လာသည်ကို အာရုံခံမိသွားပြီး ကင်မရာ မှန်ဘီလူး က သားပိုက်ကောင် ရှိရာဘက်သို့ ချက်ချင်း လှည့်၍ ရိုက်ကူးလိုက်လေသည်။

အင်တာနက်သုံးစွဲသူများ က ချက်ချင်းပင် စိတ်လှုပ်ရှား လာကြတော့သည်။

[သားပိုက်ကောင် လာနေပြီ... လခွမ်း... အကြီးကြီးပဲ... တစ်ကိုယ်လုံး လည်း ကြွက်သားတွေ ကြီးပဲ]

[မဟုတ်သေးပါဘူး... သားပိုက်ကောင် က ဒီလောက်တောင် အရပ်ရှည်တာလား... လူထက် ပုမယ် လို့ ထင်ထားခဲ့တာ]

[သားပိုက်ကောင် မျိုးစိတ် တွေ အများကြီး ရှိတယ်... အမြင့်ဆုံး ဆိုရင် နှစ်မီတာခွဲ ကျော် အထိ ကြီးထွားနိုင်တယ်... ဒီသားပိုက်ကောင် က သားပိုက်ကောင် အကြီးစား မျိုးစိတ် ထဲမှာ ပါတယ်]

[ကြည့်ရတာ တော်တော် ကြမ်းမယ့် ပုံပဲ]

ရွှီယန်က သူ့ထံသို့ ချဉ်းကပ်လာနေသော သားပိုက်ကောင်ကို ကြည့်ရင်း စကားဆိုလိုက်သည်။

"ဒီကောင် က ရည်ရွယ်ချက် မကောင်းဘူး"

"ဒီလောက် ကြီးမားတဲ့ ခန္ဓာကိုယ် နဲ့ ဆိုတော့ ရန် ခဏခဏ ဖြစ်ဖူးလောက်တယ်... ဒီနား တစ်ဝိုက်က သားပိုက်ကောင် ဘုရင် လည်း ဖြစ်နိုင်တယ်"

"သားပိုက်ကောင် တွေက ဒေသခံ တွေ ကြားမှာ အဲဒီလောက် လူကြိုက် မများဘူး... ရန်ဖြစ်ပြီး ပြဿနာ ရှာရတာကို နှစ်သက်တော့ အဆင့်အတန်း လည်း အဲဒီလောက် မမြင့်ဘူး"

"သူ ပြဿနာ လာရှာတာ မဟုတ်ပါစေနဲ့ လို့ မျှော်လင့်ရတာပဲ"

ရွှီယန်၏ စကားသံ ဆုံးသွားပြီး သိပ်မကြာခင်မှာပင် သားပိုက်ကောင် က သူ၏ အရှေ့သို့ ရောက်ရှိလာခဲ့ပြီ ဖြစ်လေသည်။

ဤကောင် က အရပ် တကယ်ကို ရှည်မားလှပြီး တစ်ကိုယ်လုံး ကြွက်သားများ ရှိနေသဖြင့် ဖိအားပေးနိုင်စွမ်း ကတော့ ရှိနေဆဲပင် ဖြစ်လေသည်။

သာမန် လူများသာ ဤမျှ ကြီးမားသော တိရစ္ဆာန်ကို မြင်တွေ့ရပါက သေချာပေါက် လန့်ဖြတ်သွားကြမည် သာ ဖြစ်လေသည်။

သို့သော် ရွှီယန် ကတော့ အလွန် တည်ငြိမ်နေပြီး သားပိုက်ကောင်ကို တည်ငြိမ်သော မျက်နှာဖြင့် ကြည့်ရှုနေလိုက်သည်။

သားပိုက်ကောင် က ခေါင်းငုံ့၍ ရွှီယန်ကို ကြည့်နေပြီး မျက်လုံးများထဲတွင် ရန်စလိုသော အရိပ်အယောင် အချို့ ပါဝင်နေလေသည်။

အင်တာနက်သုံးစွဲသူများ မှာ ချက်ချင်းပင် စိုးရိမ် ထိတ်လန့်လာကြတော့သည်။

[ဘာအခြေအနေ လဲ... ဒီသားပိုက်ကောင် က လောင်ရွှီ ကို ရန်စ နေတဲ့ ပုံပဲ]

[အခြေအနေ မဟန်ဘူး... တကယ်ကြီး ရန်ဖြစ်ကြတော့မှာလား မသိဘူး]

[သားပိုက်ကောင် မြန်မြန် ပြေးတော့... သွေးဆာနေတဲ့ မကောင်းဆိုးဝါးကြီး ကို သွားမစနဲ့]

[ဟားဟားဟား... ချကြတော့... ချကြတော့]

တိုက်ရိုက်ထုတ်လွှင့်မှု အခန်းထဲရှိ လေထု က အလွန် ပူပြင်း လာခဲ့တော့သည်။

သားပိုက်ကောင် လာရခြင်း၏ ရည်ရွယ်ချက် က ရန်ဖြစ်ရန် သက်သက် သာ ဖြစ်ကြောင်း ရွှီယန် သိရှိထားလေသည်။

သူက ဒေါသတကြီးဖြင့် မေးလိုက်သည်။

"ဘာကြည့်နေတာလဲ..."

သူ၏ စကားသံ ဆုံးသွားသည် နှင့် တစ်ပြိုင်နက် သားပိုက်ကောင် က နေရာတွင်ပင် နှစ်ချက်ခန့် ခုန်ကာ အားယူလိုက်ပြီး နောက်တစ်စက္ကန့် တွင် အပေါ်သို့ အမြင့်ကြီး ခုန်တက်လိုက်ကာ ခြေနှစ်ဖက်စလုံး ကို အရှေ့သို့ တပြိုင်နက် ကန်ထွက်လာပြီး ရွှီယန် ရှိရာဆီသို့ ကန်ချလာတော့သည်။

ဤသည်မှာ သားပိုက်ကောင်၏ တိုက်ခိုက်ရေး နည်းလမ်း ပင်ဖြစ်သည်။

လူအများအပြား က သားပိုက်ကောင် များမှာ လက်ဝှေ့ ထိုးရာတွင် ကျွမ်းကျင်သည် ဟု ထင်မှတ်ထားကြသော်လည်း တကယ်တမ်းတွင် သားပိုက်ကောင် ၏ အထက်ပိုင်း ခြေလက်များ တွင် ခွန်အား အများကြီး မရှိကြချေ။ ဆန့်ကျင်ဘက် အနေဖြင့် ၎င်းတို့၏ ခြေထောက် ခွန်အား က အထူး ကြီးမားလှပေသည်။

ထို့ကြောင့် သားပိုက်ကောင် ၏ တိုက်ခိုက်ရေး နည်းလမ်း မှာလည်း ခြေထောက်ကို အားကိုးခြင်း ပင်ဖြစ်သည်။

ရွှီယန် က ကြိုတင် ပြင်ဆင်ထားပြီး ဖြစ်ရာ သားပိုက်ကောင် ခုန်တက်လိုက်သည့် အခိုက်အတန့် တွင် ရွှီယန် က ချက်ချင်း နောက်သို့ ခြေနှစ်လှမ်း ဆုတ်လိုက်ပြီး ၎င်း၏ တိုက်ခိုက်မှုကို ရှောင်တိမ်းလိုက်လေသည်။

သားပိုက်ကောင်များ က ပုံမှန်အားဖြင့် ခုန်ကန်သည့် အချိန်တွင် အထက်ပိုင်း ခြေလက်များ ဖြင့် ပြိုင်ဘက် ကို ဖမ်းဆုပ်ထားတတ်ကြပြီး သားပိုက်ကောင် နှစ်ကောင် ရန်ဖြစ်ရာတွင်လည်း လက်မောင်း ချင်း ချိတ်ဆက်ကာ အပြန်အလှန် ကန်ကြခြင်း ပင်ဖြစ်သည်။

သို့သော် ရွှီယန် က ဖမ်းဆုပ် မခံရဘဲ နောက်သို့ တစ်ချက် ဆုတ်လိုက်ရုံဖြင့် အလွန် လွယ်ကူစွာ ရှောင်တိမ်း နိုင်ခဲ့လေသည်။

ရွှီယန်က ကျောပိုးအိတ် ကို မြေကြီးပေါ်သို့ လျင်မြန်စွာ ချထားလိုက်ပြီး တိုက်ခိုက်မည့် အနေအထား ကို ပြင်ဆင်လိုက်ကာ စကားဆိုလိုက်သည်ကို မြင်တွေ့လိုက်ရသည်။

"အားလုံးပဲ မြင်တဲ့ အတိုင်းပါပဲ... သားပိုက်ကောင် က အရင် စတင် တိုက်ခိုက်တာပါ"

အင်တာနက်သုံးစွဲသူများ က တင်းမာနေသော မြင်ကွင်း ကို မြင်သောအခါ ချက်ချင်းပင် ကြောင်အမ်းအမ်း ဖြစ်သွားကြရတော့သည်။

ဘာအခြေအနေ လဲဟု တွေးတော နေကြလေသည်။

သြစတြေးလျ တွင် သားပိုက်ကောင် နှင့် ရန်ဖြစ် နေရတာလား ဟု အံ့ဩ နေကြသည်။

ဘယ်လိုလုပ်ပြီး တကယ်ကြီး ရန်ဖြစ် နေရတာလဲ ဟု စိတ်လှုပ်ရှား နေကြလေသည်။

သို့သော် အားလုံးက ဤကဲ့သို့သော စည်ကား သိုက်မြိုက်သည့် မြင်ကွင်းမျိုး ကို ကြည့်ရှုရသည်ကို နှစ်သက်ကြလေသည်။

ထို့ကြောင့် တိုက်ရိုက်ထုတ်လွှင့်မှု အခန်းထဲတွင် အားပေးသံများ က အဆက်မပြတ် ထွက်ပေါ် လာခဲ့တော့သည်။

[သားပိုက်ကောင် ရေ အားတင်းထား... မင်း နိုင်မယ် လို့ ငါ လောင်းတယ်]

[အစ်ကိုယန် ရေ အားတင်းထားပါ]

[ပထမ အချီ စတင်ပါပြီ]

အားလုံးက တစ်ယောက်တစ်ပေါက် အော်ဟစ် နေကြလေသည်။

ရွှီယန်၏ တုံ့ပြန်မှု က အလွန် မြန်ဆန်လှပေသည်။ သားပိုက်ကောင် က ခုန်ဆွ ခုန်ဆွ ဖြင့် ရွှီယန်၏ အရှေ့သို့ ရောက်ရှိလာပြီး ဒုတိယ အကြိမ် ခုန်ကန်ရန် ပြင်ဆင်နေချိန်တွင် ပင်ဖြစ်သည်။

ရွှီယန် က လက်သီး နှစ်ဖက်စလုံး ကို တင်းကျပ်စွာ ဆုပ်ထားလိုက်ပြီး သားပိုက်ကောင် ၏ ပါးပြင် ဘေးဘက် သို့ ညာဘက် ချိတ်လက်သီး နှစ်ချက် နှင့် ဘယ်ဘက် ချိတ်လက်သီး တစ်ချက် တိုက်ရိုက်ပင် ထိုးချလိုက်တော့သည်။

သူ၏ လက်သီးများ အားလုံး က အားကို ထိန်းချုပ်ထားသဖြင့် သားပိုက်ကောင် အပေါ် ကြီးမားသော ထိခိုက် ဒဏ်ရာများ ဖြစ်ပေါ်စေမည် မဟုတ်ချေ။

သို့သော် စော်ကားမှု ကတော့ အလွန် ပြင်းထန်လှပေသည်။

သားပိုက်ကောင် မှာ လက်သီး သုံးချက် ထိုးခံလိုက်ရပြီးနောက် မူလက ခုန်ဆွ ခုန်ဆွ လုပ်နေသော်လည်း ချက်ချင်းပင် ဆက်မခုန်တော့ချေ။

၎င်းက နေရာတွင်ပင် ကြောင်အမ်းအမ်း ဖြစ်သွားပြီး လုံးဝကို မှင်တက် သွားတော့သည်။

စောစောက ဘာအခြေအနေ လဲ ဟု ၎င်းက တွေးတော နေပုံ ရလေသည်။

ဒီလူ က ဘာဖြစ်လို့ ဒီလောက်တောင် မြန်နေရတာလဲ ဟု အံ့ဩ နေပုံ ရလေသည်။

သားပိုက်ကောင် မှာ တစ်ခဏချင်း မိမိကိုယ်ကို သံသယ ဝင်သွားတော့သည်။

ဤမြင်ကွင်းကို မြင်သောအခါ အင်တာနက်သုံးစွဲသူများ ကတော့ ပျော်ရွှင်စွာ ရယ်မောလိုက်ကြလေသည်။

[လောင်ရွှီ အရမ်း မိုက်တာပဲ]

[ဟားဟားဟား... သြစတြေးလျ အထိ လာပြီး သူတို့ နိုင်ငံ ရဲ့ အဖိုးတန် တိရစ္ဆာန် ကို လာရိုက်နေတာ... မင်း မှ မင်းပဲ]

[မင်း မှ မင်းပဲ... တကယ်ကို အစီအစဉ် ကောင်းတာပဲ]

သားပိုက်ကောင် က မိမိကိုယ်ကို သံသယ ဝင်သွားပြီး ရွှီယန် ကို လှမ်းကြည့်လိုက်ရာ ဤတစ်ကြိမ် တွင်တော့ မောက်မာ ဝင့်ကြွားမှုများ မရှိတော့ချေ။

သို့သော် သားပိုက်ကောင် ကလည်း ဒေါသကြီးသူ ဖြစ်ရာ ထိုမျှလွယ်ကူစွာ အရှုံးပေးမည် မဟုတ်ချေ။

၎င်းက လျင်မြန်စွာပင် ထပ်မံ၍ အမြန် ခုန်ဆွ ခုန်ဆွ စတင် လုပ်ဆောင် လာပြန်သည်။

"လာပြန်ပြီလား... အားလုံးပဲ မြင်တဲ့ အတိုင်းပဲနော်... ဒီသားပိုက်ကောင် က ထပ်ပြီး တိုက်ခိုက်ချင် နေသေးတာ"

ရွှီယန်က ဤအခြေအနေကို မြင်သောအခါ နောက်တစ်ကြိမ် တိုက်ခိုက်မည့် အနေအထား ကို ပြင်ဆင်လိုက်ပြန်သည်။

ဤတစ်ကြိမ် တွင်တော့ သားပိုက်ကောင် က အများကြီး ပို၍ ကြမ်းတမ်းလာပြီး ရွှီယန် ရှိရာဆီသို့ တိုက်ရိုက်ပင် အရှိန်အဟုန်ဖြင့် ပြေးဝင်လာကာ ကြည့်ရသည်မှာ ထပ်မံ၍ ခုန်ကန်ချင်နေပုံ ရလေသည်။

ရွှီယန် စောင့်ဆိုင်း နေသည်မှာလည်း ဤတိုက်ခိုက်မှု ပင်ဖြစ်သည်။

၎င်း ခုန်တက်လိုက်သည် နှင့် တစ်ပြိုင်နက် ရွှီယန် က သွက်လက်စွာ ရှောင်တိမ်းလိုက်ပြီး အရှေ့သို့ တိုးကာ နောက်ထပ် လက်သီး သုံးချက် ထိုးချလိုက်ပြန်သည်။

ဤအရာများ အားလုံး က အားကို ထိန်းချုပ်၍ ထိုးထားခြင်း ဖြစ်ပြီး အနောက်မှ လိုက်၍ မထိုးချေ။ မဟုတ်ပါက သားပိုက်ကောင် အနေဖြင့် အသက်ရှူရန်ပင် အချိန် ရရှိမည် မဟုတ်ပေ။

ဤတစ်ကြိမ် တွင်တော့ သားပိုက်ကောင် လည်း ဤလူ ကို ရန်စ၍ မရနိုင်ကြောင်း ချက်ချင်းပင် နားလည် သဘောပေါက် သွားတော့သည်။

၎င်းက နောက်လှည့်ကာ အမြီးကြီးကို လှုပ်ခါလျက် အနောက်သို့ ကမန်းကတန်း ထွက်ပြေး တော့သည်။

ရွှီယန် လည်း ဓာတ်ပုံရိုက်ပြီး မှတ်တမ်း ဖွင့်ရန် ကျန်သေးကြောင်း သတိရသွားသဖြင့် အလျင်စလို ဖုန်းကို ထုတ်ကာ အနောက်မှ လိုက်သွားတော့သည်။

သားပိုက်ကောင် က ရွှီယန် အနောက်မှ လိုက်လာသည်ကို မြင်သောအခါ လန့်ဖြတ်သွားပြီး ထွက်ပြေးသည့် အမြန်နှုန်းကို ပို၍ပင် တိုးမြှင့် လိုက်တော့သည်။

ကံကောင်းစွာဖြင့် ရွှီယန် ၏ လက်က မြန်ဆန်သဖြင့် ဓာတ်ပုံကို အောင်မြင်စွာ ရိုက်ကူး နိုင်ခဲ့လေသည်။

[သားပိုက်ကောင် မှတ်တမ်း ကို ဖွင့်လှစ် နိုင်ပါပြီ... တာဝန် တိုးတက်မှု တစ် ဆယ်ပုံ တစ်ပုံ]

စနစ်၏ အသံ ထွက်ပေါ်လာခဲ့သည်။

တိုက်ရိုက်ထုတ်လွှင့်မှု အခန်းထဲရှိ အင်တာနက်သုံးစွဲသူများ မှာ ဤကဲ့သို့သော မြင်ကွင်းကို မြင်တွေ့ရသောအခါ ပါးစပ် မစေ့နိုင်အောင်ပင် ရယ်မော နေကြတော့သည်။

တကယ်ကို အလွန် စိတ်ဝင်စားစရာ ကောင်းလွန်းလှပေသည်။

[လောင်ရွှီ နိုင်သွားပြီ]

[ဟားဟားဟား... မျှော်လင့်ထားတဲ့ အတိုင်းပါပဲ]

[ရှစ်ထောင့် သံလှောင်အိမ် ထဲမှာ တစ်ပွဲလောက် ချဖို့ အကြံပြုတယ်... အစီအစဉ် က သေချာပေါက် ပေါက်ကွဲ သွားလိမ့်မယ်]

[ဒီသားပိုက်ကောင် က ခေါင်းမာလွန်းတယ်... မင်း သူ့ကို မနိုင်ဘူး လို့ ပြောထားရက်သားနဲ့]

ကွန်မန့်စာသားများ က ရူးသွပ်စွာ လိမ့်တက် လာတော့သည်။

ယနေ့ တိုက်ရိုက်ထုတ်လွှင့်မှု က အတော်လေး စိတ်ဝင်စားစရာ ကောင်းနေဆဲပင် ဖြစ်လေသည်။

သြစတြေးလျ တွင် တိရစ္ဆာန်များ ပေါများပြီး နှိုင်းယှဉ်ချက် အရ လုံခြုံမှု လည်း ရှိသဖြင့် အစီအစဉ် အကျိုးသက်ရောက်မှု က အထူး ကောင်းမွန်လှပေသည်။

ရွှီယန်က ကျောပိုးအိတ် ကို ကောက်ယူ လွယ်လိုက်ပြီး လက်ကို ခါလိုက်ကာ စကားဆိုလိုက်သည်။

"ဒီသားပိုက်ကောင် က တိုက်ခိုက်ချင်စိတ် တော်တော်လေး ပြင်းထန်တယ်... အားလုံးပဲ မြင်တဲ့ အတိုင်းပါပဲ... သူက အရင် စတင် တိုက်ခိုက်တာပါ"

"အတွင်းပိုင်း ကို ဝင်သွားရင် သစ်တောအုပ် တွေပါ... ဒီဘက်က ပူအိုက်ပြီး စိုစွတ်တယ်"

"ဒီမှာ ကြီးမားတဲ့ သားရဲတိရစ္ဆာန် တွေ မရှိဘူး ဆိုပေမဲ့... အန္တရာယ် များတဲ့ အဆင့် ကတော့ ဆိုက်ဘေးရီးယား ထက် မနိမ့်ပါဘူး"

"တစ်ကမ္ဘာလုံး မှာ ရှိတဲ့ မြွေဆိုး အစိတ် မျိုး အထဲက ဆယ့်ငါးမျိုး က သြစတြေးလျ မှာ ရှိတာပါ"

"ပြီးတော့ ပြင်းထန်တဲ့ အဆိပ် ရှိတဲ့ ပင့်ကူ တွေလည်း အများကြီး ရှိသေးတယ်"

"အဲဒါကြောင့် သြစတြေးလျ ရဲ့ သစ်တော ဧရိယာ တွေထဲမှာ လှုပ်ရှား သွားလာမယ် ဆိုရင် သေချာပေါက် အထူး ဂရုစိုက်မှ ရမယ်"

ရွှီယန် ဤသို့ ပြောသည်ကို ကြားသောအခါ မှသာ အင်တာနက်သုံးစွဲသူများ လည်း ဤနေရာ၏ ကြောက်မက်ဖွယ် ကောင်းပုံကို နားလည် သဘောပေါက် သွားကြတော့သည်။

အားလုံး အတွက်တော့ မြွေဆိုး နှင့် အဆိပ်ရှိသော အင်းဆက်များ ကို တွေးကြည့်လိုက်ရုံ ဖြင့်ပင် ခေါင်းနပန်း ကြီးသွားရလေသည်။

"ဒါပေမဲ့ အဲဒီလောက် အလွယ်တကူ နဲ့တော့ ကြုံတွေ့ရမှာ မဟုတ်ပါဘူး... ဘယ်သူက ဒီလောက်တောင် ကံဆိုးနေမှာလဲ..."

ရွှီယန်က ထပ်မံ စကားဆိုလိုက်သည်။

သို့သော် သူ၏ စကားသံ မဆုံးသေးခင်မှာပင် မြက်ခင်း ထဲမှနေ၍ တစ်ကိုယ်လုံး အနက်ရောင် ရှိသော မြွေ တစ်ကောင် က ကွေ့ကောက်ကာ သူ၏ အရှေ့မှ ဖြတ်သွားသည်ကို မြင်တွေ့လိုက်ရသည်။

ရွှီယန် က ချက်ချင်း နောက်သို့ ခြေနှစ်လှမ်း ဆုတ်လိုက်သည်။

"လခွမ်း... ကျားနက်မြွေ ပဲ..."

"ဒါက အဲဒီ အထဲက မြွေဆိုး တစ်မျိုး ပဲ..."

ရွှီယန်က စကားပြော နေရင်း နှင့်ပင် အလျင်စလို ဓာတ်ပုံရိုက်ရန် မေ့မနေခဲ့ချေ။

[ကျားနက်မြွေ မှတ်တမ်း ကို ဖွင့်လှစ် နိုင်ပါပြီ... တာဝန် တိုးတက်မှု နှစ် ဆယ်ပုံ တစ်ပုံ]

ကျားနက်မြွေ က မြွေများ အထဲတွင် ရုပ်ရည် အတော်လေး မြင့်မားသည် ဟု သတ်မှတ်၍ ရပြီး အနည်းဆုံးတော့ ထိုအကွက်များ ပါသော မြွေများထက် အများကြီး ပို၍ ကြည့်ကောင်း လှပေသည်။

မည်သို့ပင်ဖြစ်စေ တစ်ကိုယ်လုံး အနက်ရောင် ရှိပြီး ခန္ဓာကိုယ် ကလည်း နှိုင်းယှဉ်ချက် အရ ထိုမျှလောက် မသေးသွယ်သဖြင့် ကြည့်ရသည်မှာ အတော်လေး လှပလှပေသည်။

[တကယ်ကြီး မြွေဆိုး ရှိနေတာလား]

[လောင်ရွှီ သတိထားဦးနော်... ဒါ နည်းနည်း အန္တရာယ် များတယ်]

[ဒီမြွေ က တော်တော်လေး လှတာပဲ... အမည်းရောင် စစ်စစ် မြွေ ကို ပထမဆုံး အကြိမ် မြင်ဖူးတာပဲ]

[အကိုက်ခံရရင် ဘယ်လို ဖြစ်သွားမလဲ... ငါ့ကို ပြပေးလို့ ရမလား]