အခန်း ၁၀၅

အခန်း ၁၀၅

"ငါတို့ဆီက အဖြေကို ဒီလိုပုံစံနဲ့ပဲ ပေးရမှာလား"

ချောလ်ဂျွမ်း၏ မေးခွန်းကြောင့် ဂျင်ဆိုဟွန်းက ပို၍ပင် တောက်ပစွာ ပြုံးပြလိုက်သည်။

"ဟုတ်တယ်လေ"

သူ၏ လွန်စွာတောက်ပလွန်းသော အဖြေကြောင့် ချောလ်ဂျွမ်းမှာ ရယ်မောလိုက်မိသည်။ ထို့နောက် ဂျူဂီလ်ယွန်းကို နောက်လှည့်ကြည့်ပြီး မေးလိုက်သည်။

"အခုဖြစ်ပျက်နေတဲ့ အခြေအနေကို ရှင်းပြဖို့ လိုမယ်ထင်တယ်"

"ကျွန်မ ဘာမှမသိဘူး"

"ဒါပေမဲ့ မင်းက အဲဒီလူနဲ့ အတူရှိနေခဲ့တာ မဟုတ်ဘူးလား"

"အဲဒါက... ကျွန်မလည်း အလိမ်ခံလိုက်ရတာ အဲဒီကောင်က ဟုန်ဂျုံဂိုဏ်းရဲ့ အစေခံပါလို့ ပြောတာကိုး"

ဂျူဂီလ်ယွန်း၏ ဒေါသတကြီး အော်ဟစ်သံကိုပင် ဂရုမစိုက်ဘဲ ချောလ်ဂျွမ်းက ပခုံးတွန့်လိုက်သည်။

"ကြည့်နေရင်တော့ သိရမှာပေါ့။ ဆာဆောင်ဂိုဏ်းကို ပြန်ရောက်ရင် ဒီကိစ္စကို ငါ ပြန်စစ်ဆေးကြည့်မယ်။ အခုတော့..."

ချောလ်ဂျွမ်း၏ ကြောက်မက်ဖွယ်ကောင်းသော မျက်ဝန်းတို့က ဂျင်ဆိုဟွန်းပေါ်သို့ ကျရောက်သွားသည်။

"မင်းလို သိုင်းမဟာမိတ်အဖွဲ့က ပုဂ္ဂိုလ်လေးတစ်ယောက်က ငါတို့ကို အမိန့်ပေးနိုင်လောက်အောင် တကယ်ပဲ အရည်အချင်းရှိရဲ့လား ဆိုတာကိုတော့ စမ်းသပ်ကြည့်ရမှာပဲ"

ချောလ်ဂျွမ်း၏ လက်ဖဝါးမှ အစွမ်းထက်သော လေလှိုင်းများ ထွက်ပေါ်လာပြီး ပတ်ဝန်းကျင်ရှိ ဖုန်မှုန့်များပင် လွင့်စင်သွားသည်။

သိုင်းလောက၏ ကြောက်စရာကောင်းသော အဆင့်မြင့်သိုင်းသမားတစ်ယောက်၏ အရှိန်အဝါကို ထိုနေရာရှိ လူတိုင်း ခံစားလိုက်ရသည်။

ဟုန်ဂျုံဂိုဏ်းသားများမှာ ချောလ်ဂျွမ်း၏ နောက်လိုက်များဖြစ်သော်လည်း သူ၏ အရှိန်အဝါကြောင့် နောက်သို့ ခြေလှမ်းအနည်းငယ် ဆုတ်သွားကြသည်။ သို့သော် ဂျင်ဆိုဟွန်းမှာမူ နေရာတွင်ပင် တည်ငြိမ်စွာ ရပ်နေဆဲပင်။

သူ၏ အပြုံးမှာ ပျောက်ကွယ်သွားပြီး မျက်ဝန်းတို့မှာ ရေခဲပြင်ကဲ့သို့ အေးစက်သွားသည်။

"စမ်းသပ်ကြည့်ချင်တာပေါ့လေ။ ဒါပေမဲ့ မင်းတို့ရဲ့ အသက်ကို ရင်းရလိမ့်မယ်ဆိုတာတော့ သိထားဖို့ လိုလိမ့်မယ်"

ဂျင်ဆိုဟွန်းက ခါးကြားမှ ဓားကို ဆွဲထုတ်လိုက်သည်။ ဓားမြှောင်မှာ လေထဲတွင် တလက်လက်တောက်ပနေပြီး သူ၏ အရှိန်အဝါမှာလည်း ရုတ်တရက် အဆမတန် မြင့်တက်လာသည်။

"အခုစလိုက်ကြမလား"

အခြေအနေမှာ တင်းမာလွန်းလှပြီး တိုက်ပွဲ၏ အစပျိုးချက်မှာ အလွန်ပင် အန္တရာယ်များနေသည်။ အားလုံး၏ အကြည့်မှာ ထိုသူနှစ်ဦးထံသို့ သက်ရောက်နေပြီး ဒွန်ဟိုဂိုဏ်း၏ ကံကြမ္မာမှာလည်း ဤတိုက်ပွဲရလဒ်အပေါ်တွင် မူတည်နေတော့သည်။

"ငါ တစ်ခုခု လုပ်ရတော့မှာပဲ"

ပြင်းထန်လှသော အသက်သတ်လိုစိတ်များ သူ၏ဆီသို့ ဝင်ရောက်လာချိန်တွင် ဂျင်ဆိုဟွန်းက ငွေရောင်အမှတ်တံဆိပ်ကို လက်ချောင်းဖြင့် ခပ်ဖွဖွ ပုတ်လိုက်သည်။

"ကျွန်တော်က သိုင်းမဟာမိတ်အဖွဲ့ဝင်ပါခင်ဗျာ သိထားဖို့ လိုမယ်နော်"

"ဘာဖြစ်လဲ"

"ထူးဆန်းလိုက်တာ။ သိုင်းဂိုဏ်းအနေနဲ့ဆိုရင် သိုင်းမဟာမိတ်အဖွဲ့ရဲ့ စည်းမျဉ်းတွေအောက်မှာ လှုပ်ရှားရမယ် မဟုတ်ဘူးလား"

"ဟားဟားဟား"

ချောလ်ဂျွမ်းမှာ ကျယ်လောင်စွာ ရယ်မောလိုက်သည်။ ထို့နောက် သူ၏ဓားကို ဆွဲထုတ်လိုက်သည်။ သူနှင့်အတူ လေးဓားတပ်ဖွဲ့ဝင် ငါးဆယ်မှာလည်း တစ်ပြိုင်နက်တည်း ဓားများကို ဆွဲထုတ်လိုက်ကြသည်။

သူတို့ ထုတ်လွှတ်လိုက်သော ဖိအားမှာ ဒွန်ဟိုဂိုဏ်းနှင့် ဟုန်ဂျုံဂိုဏ်းသားအားလုံး ထုတ်လွှတ်သော စွမ်းအားထက်ပင် ပိုမိုပြင်းထန်နေသည်။

လေးဓားတပ်ဖွဲ့က ဒီလောက်တောင် အစွမ်းထက်တာလား။

ဂျူဟျောလ်နှင့် ဂျူဂီလ်ဆော့မှာ လေးဓားတပ်ဖွဲ့၏ စွမ်းအားကို မြင်ပြီး အံ့ဩသွားကြသည်။ ဆာဆောင်ဂိုဏ်း၏ ဂုဏ်သတင်းကို ကြားဖူးသော်လည်း သူတို့၏ တကယ့်အစွမ်းကို မြင်ရခြင်းမှာ ပထမဆုံးအကြိမ် ဖြစ်သည်။

"မင်းက တကယ်ပဲ သိုင်းဂိုဏ်းတွေကို သိုင်းလမ်းစဉ်နဲ့ မိစ္ဆာလမ်းစဉ်ဆိုပြီး ခွဲခြားလို့ ရမယ်လို့ ထင်နေတာလား။ မင်းကတော့ အတော်ကို အတွေ့အကြုံနုတဲ့ ကောင်လေးပဲ"

"ဒါဆိုရင် မင်းတို့က မိစ္ဆာဂိုဏ်းဖြစ်သွားပြီပေါ့"

"လိုအပ်ချက်ပေါ်မူတည်ပြီး တာအိုဂိုဏ်းလည်း ဖြစ်နိုင်တယ်။ မိစ္ဆာဂိုဏ်းလည်း ဖြစ်နိုင်တယ်"

"ဒါဆို အခုကရော"

သိုင်းမဟာမိတ်အဖွဲ့မှ လာသော လူငယ်သိုင်းသမားမှာ တာအိုနှင့် မိစ္ဆာဆိုသည့် အချက်ကို ထူးဆန်းစွာပင် အလေးပေး မေးမြန်းနေသည်။

ချောလ်ဂျွမ်းက ကောက်ကျစ်စွာ ပြုံးလိုက်ပြီး...

"ဒီနေ့တော့ မိစ္ဆာဂိုဏ်းအဖြစ် သတ်မှတ်တာ ပိုသင့်တော်မယ်ထင်တယ်"

သူ၏ လက်ကို ရှေ့သို့ ဆန့်ထုတ်လိုက်သည်နှင့် လေးဓားတပ်ဖွဲ့မှာ လှုပ်ရှားလာသည်။ ငါးဆယ်သော စစ်သည်များမှာ ပြင်းထန်သော ဖိအားဖြင့် ချဉ်းကပ်လာချိန်တွင် ဂျင်ဆိုဟွန်းက ပြောလိုက်သည်။

"အိုဂျောင်"

"ဗျာ"

"အခုချက်ချင်း ငါ့အိပ်ဆောင်ကို ပြေးသွားပြီး ငါ့ရဲ့ ပျံသန်းဓားအိတ်ကို သွားယူပေးနိုင်မလား"

"ဟ…ဟုတ်ကဲ့ နားလည်ပါပြီ"

ပန်အိုဂျောင် အိပ်ဆောင်ဆီသို့ ပြေးသွားချိန်တွင် ဂျင်ဆိုဟွန်းမှာ ချဉ်းကပ်လာသော လေးဓားတပ်ဖွဲ့ကို စူးစိုက်ကြည့်နေသည်။

တာအိုလား၊ မိစ္ဆာလား။

ဂျင်ဆိုဟွန်းအတွက်တော့ အလွန်အရေးကြီးသော ကိစ္စဖြစ်သည်။ သူတို့သာ တာအိုဂိုဏ်းဟု ဆိုခဲ့ပါက သူသည် ချိုးနှိမ်၍ တိုက်ခိုက်ရမည်ပင်။

သို့သော် လေးဓားတပ်ဖွဲ့မှာ ဒီနေ့တော့ မိစ္ဆာဂိုဏ်း ဖြစ်သည်။ ထို့ကြောင့် သူတို့ကို မိစ္ဆာဂိုဏ်းကဲ့သို့ပင် ဆက်ဆံရန် စိတ်ကူးလိုက်သည်။

"ဂိုဏ်းချုပ်"

"ဟ…ဟုတ် ပြောပါ"

"အိုဂျောင် ပြန်မလာခင်အထိ ဓားတစ်လက်လောက် ချေးပါဦးမယ်"

"ဘာကိုဆိုလိုတာလဲ... သတိထား"

စကားပြောနေစဉ်မှာပင် ဂျင်ဆိုဟွန်းက ခေါင်းလှည့်လိုက်ပြီး လေးဓားတပ်ဖွဲ့ဝင်များမှာ အရှိန်ပြင်းစွာ ဝင်ရောက်လာကြသည်။ သတိပေးခြင်းမရှိဘဲ ခုတ်ပိုင်းလိုက်သော ဓားချက်များမှာ ဂျင်ဆိုဟွန်းကို ရက်စက်စွာ သတ်ဖြတ်တော့မည့်အလားပင်။

"သေစမ်း"

လေးဓားတပ်ဖွဲ့ဝင်တစ်ဦးက ဓားဖြင့် ခုတ်လိုက်သည်။ ဂျင်ဆိုဟွန်း၏ မျက်နှာမှာ အေးစက်သွားသည်။

"ငါကတော့ ရှောင်လိုက်မယ်"

ဂျင်ဆိုဟွန်း၏ လက်မှာ တစ်ခဏအတွင်း ထိုသိုင်းသမား၏ လက်ကောက်ဝတ်ကို ဖမ်းဆုပ်

လိုက်သည်။

ရွှေလက်ဖမ်းကိုင်ခြင်းသိုင်းမှာ ဒွန်ဟိုဂိုဏ်းတွင် ထွက်ပေါ်လာခဲ့သည်။

လက်ကောက်ဝတ် အဖမ်းခံလိုက်ရသော သိုင်းသမားမှာ ထိတ်လန့်သွားပြီး လက်ကို ဆွဲထုတ်ရန် ကြိုးစားသည်။

"မရဘူး"

ဂျင်ဆိုဟွန်း၏ ဘယ်ဘက်ခြေထောက်က သိုင်းသမား၏ ဝမ်းဗိုက်ကို ကန်ထုတ်လိုက်သည်။ အတွင်းအားများ ပြည့်နှက်နေသော ကန်ချက်ကြောင့် ထိုသိုင်းသမားမှာ နောက်သို့ လွင့်စဉ်သွားပြီး အနီးနားရှိ လေးဓားတပ်ဖွဲ့ဝင်များနှင့် တိုက်မိသွားသည်။

"ခွပ်"

တစ်ပြိုင်နက်တည်း သိုင်းသမား သုံးဦး နောက်သို့ လွင့်သွားသည်။ ထို့နောက် အခြားသိုင်းသမား သုံးဦးက တစ်ပြိုင်နက်တည်း ဓားဖြင့် ထိုးသွင်းလာကြသည်။

ဓားဖျားသုံးစင်းမှာ ဂျင်ဆိုဟွန်းဆီသို့ တည့်တည့်ရောက်လာသော်လည်း သူ၏ပုံရိပ်မှာ ဝါးတားတားဖြစ်သွားပြီး ပျောက်ကွယ်သွားသည်။

အရိပ်ကျန်ရစ်ခဲ့တာလား။

"သူ ဘယ်ရောက်သွားတာလဲ"

"အပေါ်မှာ"

သိုင်းသမား သုံးဦးမှာ ခေါင်းမော့လိုက်သည်။ သူတို့၏ အပေါ်ဘက်တွင် ပေါ်လာသော ဂျင်ဆိုဟွန်းက လက်ဝါးနှစ်ဖက်ကို ဆန့်ထုတ်လိုက်သည်။

"ဖယ်ကြစမ်း"

ဂျင်ဆိုဟွန်း၏ လက်ဝါးနှစ်ဖက်မှာ မိုးကြိုးပစ်ချသကဲ့သို့ ပြင်းထန်စွာ ကျရောက်လာတော့သည်။

ချွမ်း…..

လက်ဝါးစွမ်းအား ပေါက်ကွဲထွက်သွားပြီး လေးဓားတပ်ဖွဲ့ဝင် သုံးဦးမှာ သွေးများ ပန်းထွက်လျက် လေးဘက်လေးတန်သို့ လွင့်စင်သွားကြသည်။ လေးဓားတပ်ဖွဲ့ဝင် အမြောက်အမြားကို တစ်ခဏအတွင်း ချိုးနှိမ်လိုက်သော ဂျင်ဆိုဟွန်းမှာ မြေပြင်ပေါ်သို့ ဆင်းသက်လိုက်ပြီး လက်နှစ်ဖက်ကို ဘယ်ညာသို့ ဖြန့်လိုက်သည်။

ထိုအခါ အံ့အားသင့်ဖွယ် မြင်ကွင်းတစ်ခု ဖြစ်ပေါ်လာသည်။

တိုက်ပွဲကို ငေးကြည့်နေကြသော ဒွန်ဟိုဂိုဏ်းသားများ၏ ဓားများမှာ သူတို့ဘာသာ လေထဲသို့ ပျံတက်လာကြသည်။

"ဓား... ဓားထိန်းချုပ်ခြင်း..."

ဓားဆယ်လက်မှာ ဂျင်ဆိုဟွန်း၏ ကျောနောက်တွင် တန်းစီရပ်တည်နေသည်။

"ကျွန်တော်က မိစ္ဆာဂိုဏ်းတွေနဲ့ ပတ်သက်ပြီး မကောင်းတဲ့ အမှတ်တရတွေ အများကြီး ရှိခဲ့ဖူးတယ်"

ဂျင်ဆိုဟွန်း၏ လက်ညှိုးဖျားများမှာ ကျန်ရှိနေသေးသော လေးဓားတပ်ဖွဲ့ဝင်များထံသို့ ညွှန်ပြလိုက်သည်။

"နည်းနည်းတော့ စူးရှသွားလိမ့်မယ်... မဟုတ်ဘူး အများကြီး စူးရှသွားလိမ့်မယ်"

လက်တစ်ထောင် စွမ်းအားပါဝင်သော ဓားဆယ်လက်မှာ လေးဓားတပ်ဖွဲ့ဝင်များထံသို့ ပျံသန်းသွားသည်။

"ကာကွယ်ကြ"

သူတို့ ဓားဆယ်လက်ကို ရုန်းကန်ကာ ကာကွယ်နေချိန်တွင် ပန်အိုဂျောင်မှာ ပြန်ရောက်လာသည်။

"အစ်ကို ဒီမှာ"

ပန်အိုဂျောင်က သူကိုင်ထားသော ပျံသန်းသည့်ဓားအိမ်ကို အစွမ်းကုန် ပစ်ပေးလိုက်သည်။ ဂျင်ဆိုဟွန်းက ၎င်းကို ဖမ်းယူလိုက်ပြီး ပုခုံးပေါ်သို့ လွယ်လိုက်သည်။

၎င်းနောက် ပျံသန်းသည့်ဓားဆယ်လက်ကို ပြန်လည်ရရှိသွားသော ဂျင်ဆိုဟွန်းမှာ သူတို့ကို ဆုံးမသည့်နှယ် ပြောလိုက်သည်။

"မကောင်းတဲ့ မိစ္ဆာဂိုဏ်းကောင်လေးတို့ရေ ဒီနေ့ မင်းတို့နဲ့ တွေ့ရတာ တကယ်ပဲ ဝမ်းသာတယ်"

ဂျင်ဆိုဟွန်းက ပျံသန်းသည့်ဓားနှစ်လက်ကို ထုတ်ယူကာ အရှိန်ပြင်းစွာ လွှတ်တင်လိုက်သည်။ လျှပ်စီးတန်း၏ စွမ်းအားပါဝင်သော ပျံသန်းသည့်ဓားနှစ်လက်မှာ မိုးကြိုးပစ်ချသကဲ့သို့ ပျံသန်းသွားပြီး လေးဓားတပ်ဖွဲ့ဝင် နှစ်ဦး၏ ပေါင်ကို အသီးသီး ဖောက်ဝင်သွားသည်။

"ခွပ်"

ပေါင်တွင် ဓားချက်အထိခံလိုက်ရသော လေးဓားတပ်ဖွဲ့ဝင်များမှာ မြေပြင်ပေါ်သို့ လဲကျပြီး နာကျင်မှုကြောင့် လူးလိမ့်နေကြသည်။

လောင်ကျွမ်းနေသည့် အနံ့ဆိုးမှာ နှာခေါင်းထဲသို့ တိုးဝင်လာသောအခါ ငေးမောနေသည့် ချောလ်ဂျွမ်းမှာ သတိပြန်ဝင်လာသည်။

သိုင်းပညာရှင်တစ်ယောက်... အထွတ်အထိပ် သို့မဟုတ် အထွတ်အထိပ်ထက်ပိုတဲ့ သိုင်းပညာရှင်တစ်ယောက်

ဂျင်ဆိုဟွန်းကို လူငယ်တစ်ယောက်ဟု သတ်မှတ်ကာ လျစ်လျူရှုခဲ့သော ချောလ်ဂျွမ်း၏ ကိုယ်ခန္ဓာတစ်ခုလုံးမှာ ချွေးပြန်သွားသည်။

"ခွေးကောင်..."

လေးဓားတပ်ဖွဲ့ဝင် ငါးဆယ်မှာ ယခုအခါ ဆယ်ဦးပင် မကျန်တော့ပေ။ အခြေအနေမှာ သူ့ဘက်သို့ ပြောင်းပြန်ဖြစ်သွားသောအခါ ချောလ်ဂျွမ်းက အော်ဟစ်လိုက်သည်။

"ဂိုဏ်းချုပ် အဲဒီကောင်ကို သတ်ဖို့ ငါ့ကို ကူညီစမ်း"

"ဘာ... ဘာပြောတယ်"

ငေးမောနေသည့် ဂျူဟျောလ်မှာ ထိတ်လန့်သွားသည်။

"အဲဒီလို မိစ္ဆာတစ်ကောင်နဲ့ တိုက်ခိုက်ခိုင်းတာလား"

"ဒါဆိုရင် ငါတို့အားလုံး ဒီမှာ သေရတော့မလို့လား မင်း ငါ့ကို ကူညီရင် ငါ ဆာဆောင်ဂိုဏ်းရဲ့ ပင်မတပ်ဖွဲ့ကို ခေါ်ပြီး ပြန်လာခဲ့မယ်။ ဒါဆိုရင် အဲဒီကောင် ဘယ်လောက်ပဲ ထူးချွန်းပါစေ၊ အသက်ရှင်လျက် လွတ်မြောက်မှာ မဟုတ်ဘူး"

ချောလ်ဂျွမ်းမှာ အသည်းအသန် ဖြစ်နေသည်။

"ပြီးတော့ ဒီကိစ္စတစ်ခုလုံးကို ဦးဆောင်ခဲ့တာ ဟုန်ဂျုံဂိုဏ်း မဟုတ်ဘူးလား အသက်ရှင်ဖို့ဆိုရင် အဲဒီကောင်ကို သတ်မှဖြစ်မယ်"

"ခွပ်"

ဂျူဟျောလ်မှာ စိတ်ရှုပ်ထွေးသွားသည်။

သူသည် သိုင်းမဟာမိတ်အဖွဲ့ကို အကာအကွယ်ယူပြီး အထင်ကြီးအောင် လုပ်နေသော ရူးသွပ်သည့် ကောင်လေးဟု ထင်ခဲ့သူမှာ ဓားထိန်းချုပ်ခြင်းကို အသုံးပြုနိုင်သော အထွတ်အထိပ် သို့မဟုတ် အထွတ်အထိပ်ထက် ပိုမိုမြင့်မားသည့် သိုင်းပညာရှင်တစ်ယောက် ဖြစ်နေသည်။ သူ့ကို ရင်ဆိုင်ရန်အတွက် ဟုန်ဂျုံဂိုဏ်းသားအားလုံးကို အကုန်သုံးမှ ဖြစ်မည်။

ငါ ဘာလုပ်ရမလဲ။

တစ်ဖက်တွင်မူ သူတို့၏ စကားပြောသံကို ကြားနေရသော ဂျင်ဆိုဟွန်းမှာ အတွေးတစ်ခု ဝင်လာသည်။

ဘယ်လိုပဲဖြစ်ဖြစ် ဟုန်ဂျုံဂိုဏ်းက ဆာဆောင်ဂိုဏ်းရဲ့ အရုပ်ကလေးတွေပါ။ သူတို့အားလုံးက လူဆိုးတွေဆိုတာ မှန်ပေမဲ့ အကုန်လုံးကိုတော့ သတ်လို့မရဘူး။

ဤနေရာတွင် တိုက်ပွဲ ပိုမိုပြင်းထန်လာပါက အပြစ်မဲ့သူများ သေဆုံးသွားမှာ သေချာသည်။ ၎င်းကို တားဆီးရန် တိုက်ပွဲကို ရပ်တန့်ရမည်။ ထိုသို့ပြုလုပ်ရန် သူတို့၏ စိတ်ဓာတ်ကို အပြီးအပိုင် ချိုးဖျက်ပစ်ရမည်။

"အခုထိတော့ မပြီးပြည့်စုံသေးပေမဲ့"

ဂျင်ဆိုဟွန်းက ပျံသန်းသည့်ဓားတစ်လက်ကို ထုတ်ယူကာ သူ၏ ညာလက်ဖြင့် ကိုင်ထားလိုက်သည်။ ထို့နောက် အတွင်းအားများကို စုစည်းကာ ပျံသန်းသည့်ဓားထဲသို့ ထည့်သွင်းလိုက်သည်။

ဝုန်း….

ပျံသန်းသည့်ဓား၏ ကိုယ်ထည်မှာ ပြင်းထန်စွာ တုန်ခါလာသည်။ စွမ်းအားလုံလောက်စွာ စုစည်းမိသောအခါ ဂျင်ဆိုဟွန်းက အစွမ်းကုန် အော်ဟစ်လိုက်သည်။

"ဂိုဏ်းချုပ်"

သူ့ကို ခေါ်ဆိုလိုက်သော အသံကြောင့် ဘာလုပ်ရမှန်းမသိ ဖြစ်နေသည့် ဂျူဟျောလ်မှာ ဂျင်ဆိုဟွန်းကို ကြည့်လိုက်သည်။

"ဟုန်ဂျုံဂိုဏ်းက တာအိုဂိုဏ်းလား မိစ္ဆာဂိုဏ်းလား"

မေးခွန်းကို မေးလိုက်သည်နှင့် တစ်ပြိုင်နက် ပျံသန်းသည့်ဓားမှာ သူတို့၏ ဘေးမှ ဖြတ်ကျော်သွားပြီး ဒွန်ဟိုဂိုဏ်း၏ ပင်မတံခါးဆီသို့ ပစ်သွင်းလိုက်သည်။

နောက်တစ်ခဏတွင် ကြီးမားသော ပေါက်ကွဲမှုတစ်ခု ဖြစ်ပေါ်လာသည်။

ဘုန်း…..

မြေကြီးပင် တုန်ခါသွားလောက်အောင် ကြီးမားသည့် ပေါက်ကွဲသံနှင့်အတူ ဒွန်ဟိုဂိုဏ်း၏ ပင်မတံခါးမှာ လုံးဝ ပျက်စီးသွားသည်။ ၎င်းအောက်တွင် ကြီးမားသော ကျင်းတစ်ခု ဖြစ်ပေါ်သွားသည်။

ထိုမယုံနိုင်စရာ စွမ်းအားကို မြင်လိုက်ရသောအခါ ဂျူဟျောလ်၏ မေးရိုးပင် ပြုတ်ကျမတတ် ဖြစ်သွားသည်။

"ဂိုဏ်းချုပ်"

နောက်တစ်ကြိမ် ထွက်ပေါ်လာသည့် ဂျင်ဆိုဟွန်း၏ အသံကြောင့် ဂျူဟျောလ်၏ ခေါင်းမှာ တရွေ့ရွေ့ဖြင့် လှည့်လာသည်။

သူ့ရှေ့တွင် ရပ်နေသော ဂျင်ဆိုဟွန်းက ဒုတိယမြောက် ပျံသန်းသည့်ဓားကို ထုတ်ယူကာ မေးလိုက်သည်။

"ဒါက တာအိုဂိုဏ်းလား မိစ္ဆာဂိုဏ်းလား"

"ဒါက... တာအိုဂိုဏ်းပါ"

ဂျူဟျောလ်၏ အဖြေကြောင့် ကျေနပ်သွားပုံရသည့် ဂျင်ဆိုဟွန်းမှာ တောက်ပစွာ ထပ်မံ ပြုံးလိုက်သည်။

"ဒါဆိုရင်တော့ တော်သေးတာပေါ့ ငါ့ရဲ့ တာအိုဂိုဏ်းချင်း တူတဲ့သူတွေကို ငါမှားပြီး သတ်မိတော့မလို့လေ။ ဟားဟားဟား"

တောက်ပလွန်းသော လေသံနှင့် သူ၏အပြုအမူနှင့် မလိုက်လျောညီထွေရှိသည့် စကားလုံးများအား ဂျင်ဆိုဟွန်းက တောက်ပသော မျက်နှာဖြင့်ပင် ဆက်ပြောသည်။

"ဒါဆို အခုတော့ ဘေးဖယ်ပေးလို့ ရမလား အဲဒီ မကောင်းတဲ့ မိစ္ဆာဂိုဏ်းကောင်တွေကို ငါ ရှင်းပစ်ရဦးမယ်"

ဂျူဟျောလ်က ဟုန်ဂျုံဂိုဏ်းသားများကို အမြန်ဆုံး ဦးဆောင်ကာ ထောင့်တစ်နေရာသို့ သွားရောက် ပုန်းခိုနေလိုက်သည်။

ထိုအခါ ကျန်ရစ်ခဲ့သော ချောလ်ဂျွမ်းနှင့် လေးဓားတပ်ဖွဲ့ဝင်တို့မှာ ဂျင်ဆိုဟွန်းကို ကြည့်နေကြသည်မှာ သေမင်းတမန်ကို မြင်နေရသည့်အလား ဖြစ်နေသည်။

"အာ တောင်းပန်ပါတယ်။ ငါက ပစ်မှတ်ကိုချိန်တာ သိပ်မကျွမ်းဘူး။ ဒီတစ်ခါတော့ သေချာ ပစ်မယ်"

ဂျင်ဆိုဟွန်းက ပျံသန်းသည့်ဓားကို မြှောက်လိုက်သည့်အခါ ချောလ်ဂျွမ်းက အမြန်ဆုံး ဒူးထောက်လိုက်သည်။

"ကျွန်တော့်ကို အသက်ချမ်းသာပေးပါ"

"သူတို့ကို ဒီအတိုင်း လွှတ်ပေးလိုက်တာ တကယ်ပဲ ဖြစ်ပါ့မလား"

"ငါတို့အတွက်က ပြဿနာမရှိပါဘူး"

လေးဓားတပ်ဖွဲ့ဝင်များမှာ နောက်က မီးလောင်နေသည့်အလား ပြေးလွှားသွားကြသည်ကို ကြည့်ကာ ဂျင်ဆိုဟွန်းက တောက်ပစွာ ပြုံးလိုက်သည်။

"ပြဿနာတက်မှာက ဟုန်ဂျုံဂိုဏ်းပဲ"

"ကျ... ကျွန်တော်တို့လား"

အပြစ်သားတစ်ယောက်ကဲ့သို့ ရပ်နေခဲ့သည့် ဂျူဟျောလ်က ဘာကို ဆိုလိုတာလဲဟူသည့် မျက်နှာအမူအရာဖြင့် ဂျင်ဆိုဟွန်းကို ကြည့်လိုက်သည်။

"ဟုတ်တယ်လေ ပြန်ရောက်လာမယ့် ဆာဆောင်ဂိုဏ်းက သိုင်းသမားတွေက ဒီလိုမျိုး ပြောလာမှာ မဟုတ်ဘူးလား။ ဒီကိစ္စမှာ သိုင်းမဟာမိတ်အဖွဲ့ ဝင်ရောက်စွက်ဖက်သွားပြီ။ ဟုန်ဂျုံဂိုဏ်းက သူတို့ကို သစ္စာဖောက်သွားတယ်လို့ပေါ့။ ဒါကြောင့် ဆာဆောင်ဂိုဏ်းက အသက်ရှင်ချင်တယ်ဆိုရင်..."

ဂျင်ဆိုဟွန်း စကားကို ဖြတ်လိုက်သည့်အခါ ဂျူဟျောလ်၏ မျက်နှာမှာ ပြာနှမ်းသွားသည်။

"သူတို့က ဟုန်ဂျုံဂိုဏ်းကို စွန့်ပစ်လိုက်မှာပဲ။ အပြစ်အားလုံးကို သူတို့ခေါင်းပေါ် ပုံချလိုက်လိမ့်မယ်"

"ဒါက အဉာဏ်အရှိဆုံး လုပ်ရပ် မဟုတ်ဘူးလား ဂိုဏ်းချုပ် ဘယ်လိုထင်လဲ"

သူပြောသည့်အတိုင်းပင် သိုင်းမဟာမိတ်အဖွဲ့က ဝင်ရောက်စွက်ဖက်သွားပြီး ဓားထိန်းချုပ်ခြင်းကို အသုံးပြုနိုင်သော ထူးချွန်းသည့် သိုင်းပညာရှင်တစ်ယောက်ကို စေလွှတ်လိုက်သည်။

အကယ်၍ အရာရာတိုင်းက ဒီအတိုင်း ဆက်ဖြစ်နေမည်ဆိုပါက ဆာဆောင်ဂိုဏ်းမှာ ပျက်စီးမည့်အစွန်းသို့ ရောက်ရှိသွားမည်ဖြစ်ရာ သူတို့က မည်သို့ပင်ဖြစ်စေ အပြစ်အားလုံးကို ဟုန်ဂျုံဂိုဏ်းပေါ်သို့ ပုံချရန် ကြိုးစားပေလိမ့်မည်။

ထို့နောက် လက်စားချေရန် ပြင်ဆင်ကြမည်ဖြစ်ကာ သူတို့ကို သစ္စာဖောက်သည့် ပြစ်မှုအတွက် တောင်းဆိုရန်ပင်။

မည်သို့ပင်ဖြစ်စေ ဟုန်ဂျုံဂိုဏ်းမှာ အကျပ်အတည်းထဲ ရောက်နေပြီ ဖြစ်သည်။

"ကျွန်တော်တို့ကို ကူညီပေးပါ"

"ကျွန်တော့်ကိုလား"

"ဟုတ်ကဲ့"

"ဘာလို့ ကူညီရမှာလဲ"

ဂျင်ဆိုဟွန်းက သူ့ပါးပြင်ကို ကုတ်လိုက်ပြီး ပျင်းရိသော မျက်နှာဖြင့် မေးလိုက်သည်။

ဂျူဟျောလ်မှာ အသည်းအသန် ဖြစ်နေသည်။

ထိုအတိုင်း ဆက်ဖြစ်နေမည်ဆိုပါက ဟုန်ဂျုံဂိုဏ်းမှာ ပျက်စီးသွားမည်မှာ သေချာသည်။ အသက်ရှင်ဖို့အတွက် သူသည် ဂျင်ဆိုဟွန်းကိုသာ မှီခိုရတော့မည်။

"ကျေးဇူးပြုပြီး ကျွန်တော်တို့ကို ကူညီပေးပါ"

"အင်း... အဲဒါမတိုင်ခင် ဆာဆောင်ဂိုဏ်းက ဒွန်ဟိုဂိုဏ်းရဲ့ ဘိုးဘွားပိုင်တောင်ကို ဘာလို့ လိုချင်ရတာလဲဆိုတဲ့ အကြောင်းရင်းကို ပြောပြနိုင်မလား"

"အဲဒါကတော့..."

ဂျူဟျောလ်၏ ချီတုံချတုံ ဖြစ်နေမှုကြောင့် ဂျင်ဆိုဟွန်းက လက်ကို ဝှေ့ယမ်းလိုက်သည်။

"ဟေ့ မပြောချင်ရင်လည်း မပြောနဲ့။ ငါက ကူညီရတာ ငြီးငွေ့နေပြီ"

"အဲဒါ... သတ္တုတွင်းကြောင့်ပါ"

"သတ္တုတွင်း ဟုတ်လား"

မျက်တောင် ခတ်လိုက်သော ဂျင်ဆိုဟွန်းက သူ၏ ဆန့်ကျင်ဘက်တွင် ထိုင်နေသော ဟန်ဆိုအွန်ကို ကြည့်လိုက်သည်။

ဟန်ဆိုအွန်ကလည်း ထိုနည်းအတိုင်း ခေါင်းခါပြလိုက်သည်။

"ကျွန်တော် ဘာမှ မသိဘူး။ သတ္တုတွင်း ဟုတ်လား"

ဟန်ဆိုအွန်က မေးလိုက်သည်။

"ဒွန်ဟိုတောင်မှာ သတ္တုတွင်း ရှိနေလို့လား"

"ဟုတ်ပါတယ်။ ဒွန်ဟိုတောင်အောက်မှာ သံရိုင်းသတ္တုတွင်း ရှိပါတယ်။ ပြီးတော့ အရည်အသွေးမြင့် သံတွေနဲ့ မြုပ်နှံထားတာပါ"

"ဟား... ဒါကြောင့် ဆာဆောင်ဂိုဏ်းက ဒွန်ဟိုတောင်ကို လိုချင်နေတာကိုး"

ကံမကောင်းစွာဖြင့် ဒွန်ဟိုတောင်၏ ပိုင်ရှင်ဖြစ်သော ဒွန်ဟိုဂိုဏ်းမှာ သူတို့၏ ဘိုးဘွားများ မြုပ်နှံထားသည့် တောင်ကို တူးဖော်ရန်ပင် မဝံ့မရဲ ဖြစ်နေခဲ့သည်။

ထို့ကြောင့်ပင် သံရိုင်းသတ္တုတွင်းမှာ ကြာမြင့်စွာကတည်းက ရှာမတွေ့ခဲ့ခြင်းပင်။

ထိုအတောအတွင်း လမ်းမှားသွားသော ဆေးမြစ်ရှာသူတစ်ယောက်က ဒွန်ဟိုတောင်ထဲသို့ မတော်တဆ ရောက်ရှိသွားပြီး နက်ရှိုင်းသော လိုဏ်ဂူတစ်ခုထဲသို့ ပြုတ်ကျသွားခဲ့သည်။

ဆေးမြစ်ရှာသူမှာ ခြေထောက်ကျိုးသည့် ပြင်းထန်သော ဒဏ်ရာရခဲ့သော်လည်း လိုဏ်ဂူနှင့် ဆက်သွယ်နေသည့် ကြီးမားသော အပေါက်တစ်ခုထဲတွင် သတ္တုတွင်းကို ရှာဖွေတွေ့ရှိခဲ့သည်။

ထို့နောက် ထိုအပေါက်ထဲမှ အံ့ဖွယ်နည်းဖြင့် လွတ်မြောက်လာသော ဆေးမြစ်ရှာသူက သူမြင်ခဲ့သမျှကို သူငယ်ချင်းများကို ပြောပြခဲ့ပြီး သူတို့၏ ဇာတ်လမ်းမှာ ဆာဆောင်ဂိုဏ်းထံသို့ ရောက်ရှိသွားခဲ့သည်။

"အရည်အသွေးမြင့် သံရိုင်းဆိုရင် အရမ်းကောင်းမွန်တဲ့ ဓားတွေကို လုပ်လို့ရတယ်။ ဆာဆောင်ဂိုဏ်းက ဒွန်ဟိုတောင်ကို ဝယ်ယူပြီး အဲဒီမှာရှိတဲ့ သံရိုင်းသတ္တုတွင်းကို သုံးပြီး ပိုက်ဆံရှာဖို့ စီစဉ်နေတာ။ ပြီးတော့ သူတို့က ငါတို့ကို သတ္တုတွင်းရဲ့ လုပ်ငန်းအခွင့်အရေးတွေကို ပေးမယ်လို့ ကတိပေးထားတယ်"

"မင်းတို့က ပိုက်ဆံအတွက်နဲ့ ဒွန်ဟိုဂိုဏ်းရဲ့ သင်္ကေတနဲ့ ဘိုးဘွားပိုင်တောင်ဖြစ်တဲ့ ဒွန်ဟိုတောင်ကို လောဘတက်ခဲ့တာလား"

"ဟွန်း သင်္ကေတဆိုတာ ဘာအသုံးဝင်လို့လဲ ဒွန်ဟိုတောင်မှာ သံရိုင်းသတ္တုတွင်း မြုပ်နှံထားတယ်ဆိုတာသာ ဒွန်ဟိုဂိုဏ်းက သိရင် သူတို့ လက်ပိုက်ကြည့်နေမှာတဲ့လား မင်းတို့လည်း သတ္တုတွင်းကို တူးမှာပဲ မဟုတ်လား။ ဟုတ်တယ်မလား"

"ငါက..."

သူတို့နှစ်ဦးကြား အငြင်းပွားမှုမှာ ပိုမိုပြင်းထန်လာစဉ် ဂျင်ဆိုဟွန်းက စားပွဲကို ခပ်ဖွဖွ ပုတ်လိုက်သည်။

"ရပ်ကြပါ။ အဲဒါက ဒွန်ဟိုတောင်ရဲ့ ပိုင်ရှင်ဖြစ်တဲ့ ဂိုဏ်းချုပ်ဟန် ကိုယ်တိုင် ကိုင်တွယ်ဖြေရှင်းရမယ့် ကိစ္စပါ။ ကျွန်တော်တို့ကတော့ ဆာဆောင်ဂိုဏ်းကို ဘယ်လို ရင်ဆိုင်မလဲဆိုတာကိုပဲ စဉ်းစားသင့်တယ်ဗျ"

"အဲဒါက ဟုန်ဂျုံဂိုဏ်း ကိုယ်တိုင် ဖြေရှင်းရမယ့် ကိစ္စ မဟုတ်ဘူးလား"

ဟန်ဆိုအွန်က လက်ပိုက်လျက် နောက်သို့ ဆုတ်လိုက်သောအခါ ဂျူဟျောလ်မှာ ဒေါသထွက်သွားမိသည်။ သို့သော်လည်း သူ ဘာမျှ မတတ်နိုင်ခဲ့ပေ။ ထိုအချိန်တွင် ဂျင်ဆိုဟွန်းက ရှေ့သို့ တိုးလာသည်။

"ဟုန်ဂျုံဂိုဏ်း အသက်ရှင်ဖို့အတွက် တစ်ခုတည်းသော နည်းလမ်း ရှိပါတယ်"

"နည်းလမ်း ရှိတယ်လား"

ဂျင်ဆိုဟွန်းက ခေါင်းညိတ်လိုက်ပြီး လက်ညှိုးကို ထောင်ကာ ပြောလိုက်သည်။

"ခင်ဗျားတို့ အရင်ဆုံး တိုက်ခိုက်ရလိမ့်မယ်"