အခန်း ၅၁၀

အခန်း ၅၁၀

ယင်ရှားနယ်မြေ၏ ကိုးခုမြောက် အကျဉ်းထောင်တွင် ရှေးခေတ် ကိုယ်ခံပညာရှင်တစ်ဦး အကျဉ်းချခံထားရသည်။

လွန်ခဲ့သည့်အကြိမ်က လုံယီသည် ထိုနေရာသို့ ပိုမိုနက်ရှိုင်းစွာ စူးစမ်းရန် ကြိုးပမ်းခဲ့သော်လည်း အကျဉ်းထောင်အတွင်း ပုန်းကွယ်နေသော မခုခံနိုင်သည့် အန္တရာယ်တစ်ခုကို တွေ့ရှိခဲ့ရသဖြင့် အကြံအစည်ကို ပညာရှိသလို စွန့်လွှတ်ခဲ့ရသည်။

ယခုတွင်မူ ကိုယ်ပွားရှိနေပြီဖြစ်ရာ သူသည် ထိုနေရာသို့ စွန့်စားဝင်ရောက်နိုင်သည်။ ကိုယ်ပွား ပျက်စီးသွားပါကလည်း ပြန်လည် တည်ဆောက်နိုင်သေးသည်။

ရှေးခေတ် ကိုယ်ခံပညာ အမွေအနှစ်ကို ရရှိမည်ဆိုပါက ဤအန္တရာယ်ကို ရင်ဆိုင်ရကျိုးနပ်သည်။

သေချာသည်မှာ ယင်ရှားနယ်မြေထဲသို့ ဝင်ရောက်ခြင်းမှာ သူ လိုချင်သည့်အတိုင်း လွယ်ကူသည်တော့ မဟုတ်ပေ။ သူသည် သန့်ရှင်းသော သမီးတော်ကျားဟုန် ထံမှ သင့်လျော်သော အချိန်အခါကို စောင့်ဆိုင်းရမည်ပင်။

လုံယီသည် သူ၏ အရည်အချင်းပြမျက်နှာပြင်ကို ကြည့်လိုက်သည်။

[အမည် - လုံယီ]

[အသက် - ၂၄ / ၃၀၂]

[အဆင့် - ကိုယ်ခံပညာရှင် အဆင့် အစပျိုး (၃၀၄/၆၀၀)၊ ကြယ်သုံးပွင့် ကိုယ်ခန္ဓာကျင့်ကြံသူ (၁၃၈/၆၀၀)၊ ချီ ကျင့်ကြံခြင်း အဆင့် ၅ (၁၀၈/၆၀၀)]

[ကျင့်စဉ် - အဝါရောင် အလွန်အမင်း အသက်ရှူနည်း (တတိယအပိုင်း၊ အစပျိုး 0/300 + သုံးလုံးပါ ရတနာပုလဲ)၊ နက်နဲသော ယင်ကျင့်စဉ် (ကျွမ်းကျင် 0/3000 + ၁ လမင်းကျောက်)၊ ကြယ်စင်သန့်စင်ခြင်း ကျင့်စဉ် (ကျွမ်းကျင် 0/1000 + ၁ ကြယ်စင်တောက်ပသော ဆေးမြစ်)၊ လျှို့ဝှက် ယင်ယန် အပြန်အလှန် လှုပ်ရှားမှု စာအုပ် (ကျွမ်းကျင်)] [ကျွမ်းကျင်မှု အံ့အားသင့်ဖွယ် လှိုင်းလုံး (ပြီးပြည့်စုံခြင်း)၊ လုံ၏ ပုဆိန်အတတ် (ပြီးပြည့်စုံခြင်း)၊ ကိုယ်ခန္ဓာပေါ့ပါးခြင်း အတတ် (အောင်မြင်မှုအဆင့်မြင့်)၊ အဖော် ကိုယ်ခံပညာ·ကိုယ်ခန္ဓာဓားအသွင်၊ အဖော် ကိုယ်ခံပညာ·မှန်သားချပ်ဝတ်၊ လျှို့ဝှက်အတတ် နဂါးဖောက်ထွင်းနည်း အပိုင်းအစ (တစ်ခု)] [မှော်အတတ် အလောင်းထိန်းချုပ်ခြင်းအတတ် (ပြီးပြည့်စုံခြင်း) ... လေဓားအတတ် (အစပျိုးအဆင့် 0/10000)] [ပါရမီ ကျောက်ဖြစ်ခြင်း (ပြီးပြည့်စုံခြင်း)၊ လေစီးကြောင်းစီးခြင်း (အစပျိုးအဆင့် 0/5000+၁ လေလမ်းလျှောက်သီး)၊ အသွင်ပြောင်းခြင်း (အစပျိုးအဆင့် 0/10000+၁ အနက်ရောင် တိုင်ဆွေ)၊ ဇွဲ (ကျွမ်းကျင် 0/1000+၁ ဝိညာဉ်စားနွယ်ပင်)၊ ဝံပုလွေအရိုး (အတတ်ကျွမ်းကျင် 0/500+၁ ဝံပုလွေနတ်ဆိုးဆေးလုံး)၊ ကြီးမားသော ခွန်အား (အတတ်ကျွမ်းကျင် 0/500+၁ နဂါးဆင်သီး) ... အမြင်အာရုံလွဲမှားစေခြင်း (စတင်ပြီ 0/30+၁ ထောင်ပေါင်းများစွာသော အမြင်အာရုံပန်း)၊ ဗေဒင်ဟောခြင်း (စတင်ပြီ 0/500+၁ ထောင်နှစ်သက်တမ်းရှိ လိပ်ခွံ)၊ ကိုယ်ပွား (စတင်ပြီ 0/600+၁ သွေးကျောက်ကြာပွင့်)] [စုံစမ်းစစ်ဆေးခြင်း: ဟုတ်/မဟုတ်] [တွက်ချက်ခြင်း: ဟုတ်/မဟုတ်]

[စွမ်းအင်: ၂၁၈၃]

လက်ရှိတွင် သူ၏ ခွန်အားမှာ ကိုယ်ခံပညာကို အဓိကထားပြီး ပါရမီများဖြင့် ဖြည့်စွက်ထားသည်။

ချီကျင့်ကြံခြင်းမှာ အစီအရင်များကို အသုံးပြု၍ ဖြည့်စွက်နိုင်သေးသော်လည်း ခန္ဓာကိုယ်ကျင့်ကြံခြင်းမှာမူ အထောက်အကူမျှသာဖြစ်ပြီး များသောအားဖြင့် ထိရောက်မှု မရှိလှပေ။

အားဖြည့်ခြင်း၏ အရေးအကြီးဆုံး ကဏ္ဍမှာ ကိုယ်ခံပညာရှင်အဆင့်ကို မြှင့်တင်ရန်နှင့် မဟာကိုယ်ခံပညာရှင် အလယ်အဆင့်သို့ လျင်မြန်စွာ ရောက်ရှိရန် ဖြစ်သည်။

လုံယီ၏ လက်ရှိ အရှိန်နှုန်းအရ အသက်ရှူနည်း၏ တတိယအပိုင်းသည် ကျွမ်းကျင်မှုကို ဆယ်ရက်လျှင် တစ်မှတ်သာ တိုးပေးနိုင်သဖြင့် ရှစ်နှစ်ကျော် ကြာမြင့်နိုင်သည်။ သို့သော် သုံးလုံးပါ ရတနာပုလဲကို ရရှိပြီး အသက်ရှူနည်းကို မြှင့်တင်လိုက်ပါက အချိန်ကို များစွာ သက်သာစေမည်ပင်။

ထို့အပြင် ခုခံမှု၊ ခွန်အား သို့မဟုတ် အမြန်နှုန်းနှင့် သက်ဆိုင်သည့် ပါရမီတစ်ခုခုကို ရှာဖွေတွေ့ရှိပါက သူ၏ ကိုယ်ပိုင်ခွန်အားကို ပိုမိုမြှင့်တင်ပေးနိုင်မည်ပင်။

အထူးသဖြင့် ခွန်အားနှင့် သက်ဆိုင်သော ပါရမီများမှာ လုံယီအတွက် အလွန်ရှားပါးလှသည်။ ခွန်အား ပါရမီတစ်ခု ထပ်မံရရှိပါက ဝံပုလွေအရိုးနှင့် ကြီးမားသော ခွန်အားပါရမီတို့နှင့် ပေါင်းစပ်နိုင်မည်ပင်။

ဤသို့ တွေးတောရင်း လုံယီသည် သုံးလုံးပါ ရတနာပုလဲတည်ရှိရာနေရာကို ဗေဒင်ဟောကာ ဆက်လက် စုံစမ်းတော့သည်။

သူ၏ စိတ်ထဲတွင် ကြယ်စုငယ်တစ်ခု ပေါ်ပေါက်လာပြီး ကျယ်ပြောလှသော ဂလက်ဆီတစ်ခုအဖြစ် ပြောင်းလဲကာ အဆက်မပြတ် လည်ပတ်နေသည်။ တစ်ခါတစ်ရံတွင် ချဲ့ထွင်လိုက်၊ တစ်ခါတစ်ရံတွင် ကျုံ့ဝင်လိုက် ဖြစ်နေသည်။

အသက်ရှူချိန် အကြိမ်နှစ်ဆယ်ခန့် ကြာပြီးနောက် လုံယီ၏ စိတ်ထဲတွင် စကားလုံးတစ်လုံး ပေါ်လာသည်။ ၎င်းမှာ ချန်ယွမ်နယ်မြေပင်။

"ချန်ယွမ်နယ်မြေ ကို သွားချင်တာလား"

ပိယောင်ယောင်က အံ့ဩစွာဖြင့် "ဂိုဏ်းရဲ့ အသေးစားနယ်မြေတွေကို သွားရောက်ဖို့ဆိုရင် စစ်မှန်သေညတပည့် ဖြစ်မှသာ အရည်အချင်း ပြည့်မီတာ။ ပြီးတော့ ဘိုးဘေးတွေ ချန်ထားခဲ့တဲ့ အစီအရင် စာမေးပွဲကိုလည်း အောင်မြင်အောင် ဖြေဆိုရဦးမှာ။ နယ်မြေတိုင်းက ဂိုဏ်းရဲ့ အခြေခံအုတ်မြစ်တွေပဲ အလွယ်တကူနဲ့ ဆုံးရှုံးလို့ မဖြစ်ဘူး"

"စစ်မှန်သောတပည့် ဟုတ်လား"

လုံယီက မျက်မှောင်ကြုတ်လိုက်သည်။

သူ ချီကျင့်ကြံခြင်းအဆင့် ၆ သို့ တက်လှမ်းရန် နောက်ထပ် ခြောက်လပင် မလိုတော့ပေ။ ချီကျင့်ခြံခြင်း အဆင့် ၆ မှ ၇ သို့ တက်လှမ်းရန် အနည်းဆုံး တစ်နှစ်ခန့် ကြာဦးမည်ပင်။ အချိန်အကြာကြီး မဟုတ်သော်လည်း ယခုချက်ချင်း သွားနိုင်လျှင် ပို၍ ကောင်းမွန်လိမ့်မည်။

"အဟွတ်... အဟွတ် မင်းရဲ့ အဖေ... ဒီအတွက် နည်းလမ်းတစ်ခုခုများ ရှိမလား"

လုံယီက ပိယောင်ယောင်ထံသို့ ရှက်ရွံ့ခြင်းမရှိဘဲ ချဉ်းကပ်လိုက်ရာ သူမ၏ စူးရဲသော အကြည့်ကို ခံလိုက်ရသည်။

"ရှင်က ကျွန်မကို နောက်ကွယ်ကနေ ကြိုးကိုင်ခိုင်းချင်တာပေါ့လေ"

ပိယောင်ယောင်က လုံယီ၏ ရည်ရွယ်ချက်ကို အမှန်အတိုင်း ဖော်ထုတ်လိုက်ပြီးနောက် ရယ်မောကာ "ဒါဆို ဘာအကျိုးအမြတ် ရမှာလဲ"

"အကျိုးအမြတ်ကတော့ ရှိမှာပေါ့"

ပိယောင်ယောင်၏ မျှော်လင့်နေသော အကြည့်ကို မြင်လိုက်ရသည့်အခါ လုံယီက ဖြည်းညှင်းစွာ ချဉ်းကပ်ကာ "ကျွန်တော့်ကိုယ်ကျွန်တော် ပေးအပ်လိုက်ရင်ရော ဘယ်လိုလဲ"

"သေလိုက်စမ်း"

ပိယောင်ယောင်၏ ပန်းရောင်လက်သီးလေးမှာ ချက်ချင်းပင် ထိုးနှက်လာပြီးနောက် လုံယီက သူမအား ဖက်လှဲတကင်းဖြင့် ပွေ့ဖက်လိုက်သည်။

ရက်အနည်းငယ် ကြာပြီးနောက် ဂိုဏ်းခေါင်းဆောင် တောင်ကုန်းရှိ အကြီးအကဲများ ကောင်စီတွင်ဖြစ်သည်။

အလောင်းမောင်းနှင်ခြင်းဂိုဏ်း၏ ဂိုဏ်းခေါင်းဆောင် သုံးလောင်းတာအိုဆရာမှာ ထိပ်ဆုံးနေရာတွင် အမူအရာမဲ့စွာ ထိုင်နေပြီး အောက်ဘက်တွင်မူ အကြီးအကဲ ရှစ်ဦး သို့မဟုတ် ကိုးဦးခန့်သာထိုင်နေကြသည်။

ဤနေရာတွင် လူနည်းပါးနေရသည့် အကြောင်းရင်းကို တက်ရောက်နေသူအားလုံး ကောင်းစွာ သိရှိကြသည်။

နတ်ဆိုးမျိုးနွယ်စုများ၏ အကြီးအကျယ် ကျူးကျော်ဝင်ရောက်လာမှုကြောင့် အကြီးအကဲအများစုမှာ ဂိုဏ်းကို စွန့်ခွာကာ အရေးပေါ် ကူညီတိုက်ခိုက်ပေးနေကြရသည်။

ရန်သူများ၏ ဝင်ရောက်တိုက်ခိုက်မှုကို တားဆီးရန် လူအနည်းငယ်သာ ကျန်ရှိတော့သည်။

"ရုံမြို့ အပြင်ဘက်မှာ အဆင့်မြင့် နတ်ဆိုးဗိုလ်ချုပ်တစ်ဦး ပေါ်လာတယ်။ အကြီးအကဲ ချူ တစ်ယောက်တည်းနဲ့ ရင်ဆိုင်ဖို့ ခက်ခဲနေပြီး အကူအညီ တောင်းခံလာတယ်။ ဘယ်သူ သွားနိုင်မလဲ"

"ကျွန်တော် သွားနိုင်ပါတယ်။ ဒါပေမဲ့ စည်းကမ်းလိုက်နာခြင်းခန်းမရဲ့ တာဝန်ကို ဂိုဏ်းခေါင်းဆောင်အနေနဲ့ တခြားသူကို ပြန်လည်ပေးအပ်ပေးဖို့ လိုလိမ့်မယ်"

"ခွင့်ပြုတယ်"

သုံးလောင်းတာအိုဆရာက ခေါင်းညိတ်လိုက်သည်။

"ဟွိုင်မြို့ ရဲ့ အစီအရင်ကို ပြင်ဆင်ပြီးသွားပြီ။ မြို့စားသစ်မှာ မိန်းမနဲ့ သမီး မရှိတော့ဘူး။ အရမ်းကို စိတ်ချရတယ်"

အကြီးအကဲတစ်ဦးက မှတ်ချက်ပေးသည်။

"ဒီ အနီရောင် သူရဲကောင်းကြောင့်သာ ဟွိုင်မြို့ကို အလွယ်တကူ ပြန်သိမ်းနိုင်ခဲ့တာ။ မဟုတ်ရင် ဟွိုင်မြို့ကို ဆုံးရှုံးလိုက်ရရင် ဂိုဏ်းရဲ့ အကြီးဆုံး သတ္တုတွင်းကို နတ်ဆိုးမျိုးနွယ်စုတွေ လက်ထဲ အပ်လိုက်ရလိမ့်မယ်။ ဒါက မှော်လက်နက် ထုတ်လုပ်မှုကို အများကြီး ထိခိုက်စေမှာ"

"တကယ်ပါပဲ။ ကျွန်တော်လည်း အရင်က အနီရောင် သူရဲကောင်းကို အပြစ်တင်ခဲ့ဖူးတယ်။ သူသာ သံကျောပြင် ဝံပုလွေမျိုးနွယ်စုရဲ့ ငယ်ရွယ်တဲ့ ဝံပုလွေသခင်ကို မသတ်ခဲ့ရင် ဂိုဏ်း ဒီလောက်ထိ ဆိုးရွားတဲ့ ကံကြမ္မာမျိုး ကြုံရမှာ မဟုတ်ဘူးလို့ ထင်ခဲ့တာ။ အခုကြည့်တော့ နတ်ဆိုးမျိုးနွယ်စုတွေက အမြဲတမ်း ကျူးကျော်ဖို့ ကြံရွယ်နေခဲ့တာ၊ အကြောင်းပြချက်တစ်ခုကို ရှာနေခဲ့တာသာ ဖြစ်နေတယ်"

အခြား အကြီးအကဲတစ်ဦးက ခေါင်းညိတ်လိုက်သည်။

"အနီရောင် သူရဲကောင်းကို ဂိုဏ်းဝင်အဖြစ် ဆွဲဆောင်ဖို့ စဉ်းစားသင့်တယ်။ ငါတို့ ဂိုဏ်းရဲ့ သမိုင်းမှာလည်း အရည်အချင်းရှိတဲ့ ဧည့်သည်တော် အကြီးအကဲတွေ ရှိခဲ့ဖူးတာပဲ..."

အကြီးအကဲပိက ရုတ်တရက် အကြံပြုလိုက်ရာ တက်ရောက်နေကြသည့် အကြီးအကဲများစွာ အံ့အားသင့်သွားကြသည်။

"ဧည့်သည်တော် အကြီးအကဲတွေကို ခေါ်ယူဖို့ဆိုတာ အရေးကြီးတဲ့ ကိစ္စရပ်ပဲ။ အနီရောင် သူရဲကောင်းရဲ့ အထောက်အထားကလည်း မသေချာသေးဘူး"

အကြီးအကဲ တစ်ဦးထက်ပို၍ အမြန်ပင် ကန့်ကွက်ကြောင်း ဖော်ပြကြသည်။

ကန့်ကွက်ခြင်း မရှိသူအချို့မှာလည်း သဘောတူညီမှု မပေးကြဘဲ မရေမရာသော သဘောထားမျိုးကိုသာ ပြသနေကြသည်။

အကြီးအကဲများမှာ မိုက်မဲသူများ မဟုတ်ကြဘဲ ဤကိစ္စကို အကျိုးထက် အပြစ်က ပိုများနိုင်သည်ဟု ရှုမြင်ကြသည်။

အနီရောင် သူရဲကောင်းမှာ ငယ်ရွယ်သော ဝံပုလွေသခင်ကို သတ်ဖြတ်ခဲ့သူဖြစ်ရာ သူ့ကို ခေါ်ယူခြင်းမှာ တင်းမာမှုများကို ပိုမိုတိုးပွားစေပြီး စီယန်ဝံပုလွေ တောင်ကုန်းထံမှ ပိုမိုပြင်းထန်သော လက်စားချေမှုများကို ဖြစ်ပေါ်စေနိုင်သည်ဟု ယူဆကြသည်။

"ဒီကိစ္စကို နောက်မှပဲ ဆွေးနွေးကြမယ်"

သုံးလောင်းတာအိုဆရာက လေးနက်စွာ ပြောဆိုလိုက်ရာ အားလုံး တိတ်ဆိတ်သွားကြသည်။

သို့သော် အကြီးအကဲပိက နောက်ထပ် အကြံပြုချက်တစ်ခုကို မကြာမီပင် တင်ပြလာသည်။

"ဒီစစ်ပွဲကာလအတွင်းမှာ အသေးစားနယ်မြေတွေက စစ်မှန်တဲ့ အမွေအနှစ်တွေကို ဆက်လက် ကန့်သတ်ထားတာ မသင့်တော်ဘူးလို့ မထင်ဘူးလား။ အသေးစားနယ်မြေ အချို့က တပည့်တွေကို လေ့ကျင့်ပေးဖို့အတွက် အထူးသင့်တော်ပါတယ်။ ကန့်သတ်ချက်တွေကို လျှော့ချပြီး ဂိုဏ်းရဲ့ အင်အားကို တိုးတက်စေဖို့ ဦးစားပေးသင့်တယ်လို့ ကျွန်တော် ထင်တယ်"

ထိုစကားကို ကြားလိုက်ရသည့်အခါ အခြား အကြီးအကဲများမှာ လေးလေးနက်နက် တွေးတောမိကြသည်။

"ကျွန်တော်တော့ ဖြစ်နိုင်ချေရှိတယ်လို့ မြင်တယ်။ အတွင်းဂိုဏ်း တပည့်တွေက အပြစ်ကင်းကြပါတယ်။ ပြီးတော့ ဘိုးဘေးတွေရဲ့ အစီအရင်ကလည်း ပြဿနာ မရှိအောင် အာမခံချက် ပေးထားတာပဲ"

"မှန်တယ် အတွင်းဂိုဏ်း တပည့်တွေထဲမှာ ချီကျင့်ကြံခြင်း နောက်ဆုံးအဆင့်ကို ရောက်ဖို့ နီးကပ်နေသူတွေ အများကြီးပဲ။ အသေးစားနယ်မြေတွေမှာ လေ့ကျင့်ခြင်းက သူတို့ကို တိုးတက်မှုတွေ ဖြစ်စေနိုင်တယ်"

"အာကာသကျောက်တုံးတွေကို ပိုသုံးရတာကလွဲရင်ပေါ့။ အခုချိန်မှာ လူတွေက ရတနာတွေထက် ပိုတန်ဖိုးရှိနေပါပြီ"

အကြီးအကဲများစွာမှာ အကြောင်းရင်း နှစ်ခုကြောင့် အကြီးအကဲပိ၏ အကြံပြုချက်ကို ထောက်ခံခဲ့ကြသည်။

ပထမအချက်မှာ သူတို့ကိုယ်တိုင် အတွင်းဂိုဏ်း တပည့်များကို အုပ်ချုပ်နေရခြင်းဖြစ်ပြီး ဤအကြံပြုချက်မှာ သူတို့အတွက် အကျိုးရှိသည်။

ဒုတိယအချက်မှာ အနီရောင် သူရဲကောင်း ကိစ္စနှင့် ပတ်သက်၍ အကြီးအကဲပိကို ကန့်ကွက်ထားပြီးဖြစ်ရာ နောက်တစ်ကြိမ် ငြင်းပယ်ခြင်းက သူ့ကို စိတ်အနှောင့်အယှက် ဖြစ်စေနိုင်သောကြောင့်ပင်။

ပုံမှန်တွေ့ဆုံနေရသူများ ဖြစ်သည့်အတွက် ဆက်ဆံရေး ပျက်ပြားမည်ကို စိုးရိမ်ကြသည်။

ထို့ကြောင့် အကြီးအကဲပိ၏ အဆိုပြုချက်မှာ တစ်ဦးတစ်ယောက်မျှ ကန့်ကွက်သူမရှိဘဲ အတည်ပြုခြင်း ခံလိုက်ရပြီး အကြီးအကဲပိပင်လျှင် အံ့အားသင့်သွားရသည်။

"အတည်ပြုလိုက်ပြီ"

သုံးလောင်းတာအိုဆရာက ခေါင်းညိတ်လိုက်ပြီး "အတုအယောင် ဆေးလုံး ဆရာသခင်တွေ ပါဝင်ပတ်သက်နေတဲ့ အသေးစားနယ်မြေတွေနဲ့ ပတ်သက်လို့တော့ သူတို့ကို ကျွန်တော် တိုင်ပင်ရဦးမယ်" ဟု ဖြည့်စွက် ပြောကြားလိုက်သည်။

"ဒါက မဖြစ်မနေ လိုအပ်တာပဲ"

အကြီးအကဲပိက အတည်ပြု ပြောကြားလိုက်သည်။

အကြီးအကဲများ အစည်းအဝေး ပြီးဆုံးပြီးနောက်တွင် အတွင်းဂိုဏ်း တပည့်များအတွက် အသေးစားနယ်မြေများသို့ ဝင်ရောက်ခွင့်ရရှိတော့မည်ဟူသော သတင်းမှာ အလောင်းမောင်းနှင်ခြင်းဂိုဏ်းတစ်ခုလုံးသို့ လျင်မြန်စွာ ပျံ့နှံ့သွားသည်။

သက်ဆိုင်ရာ တပည့်များမှာလည်း နယ်မြေများအကြောင်း အချက်အလက်များကို စိတ်အားထက်သန်စွာဖြင့် အပြိုင်အဆိုင် ရှာဖွေကြည့်ရှုကြသည်။

နှစ်ပေါင်း တစ်သောင်းကျော် သက်တမ်းရှိသော အလောင်းမောင်းနှင်ခြင်းဂိုဏ်းသည် မြင်သာထင်သာရှိသည့် အသေးစားနယ်မြေပေါင်း ဆယ်ခုကျော်ကို ပိုင်ဆိုင်ထားသည်။

ယခင်က ၎င်းတို့၏ အမည်များမှာ စနစ်တကျ မရှိလှဘဲ စစ်မှန်သော တပည့် များအတွက်သာ ဖွင့်လှစ်ပေးလေ့ရှိသည်။

အသေးစားနယ်မြေ တစ်ခုစီ၏ ပတ်ဝန်းကျင်မှာ ပင်မကမ္ဘာနှင့် အနည်းငယ်စီ ကွဲပြားခြားနားကြသည်။

အချို့သော နယ်မြေများမှာ လူသူမရှိဘဲ ရာသီဥတု ပြင်းထန်လွန်းလှပြီး အချို့နယ်မြေများမှာမူ လူသားတို့အတွက် အထူးသင့်တော်အောင် ဖန်တီးထားသည်။ နယ်မြေတစ်ခုစီတိုင်းတွင် ထူးခြားသော စည်းမျဉ်းများ ရှိနေကြသည်။

အထူးသတိပြုရမည့် အချက်မှာ အချို့နယ်မြေများမှာ အလွန်အမင်း ထိလွယ်ရှလွယ်ဖြစ်ပြီး ပြင်ပမှ ဝင်ရောက်လာသူများကို ပြင်းထန်စွာ နှိမ်နင်းလေ့ရှိခြင်းပင်။

ထိုကဲ့သို့သော နယ်မြေများအတွင်းသို့ အခြေခံအုတ်မြစ်တည်ဆောက်ခြင်းအဆင့် ကျင့်ကြံသူများ ဝင်ရောက်မိပါက ခဏချင်းတွင်ပင် ပြင်းထန်သော တုံ့ပြန်မှုများကို ခံစားရပြီး အသက်ဆုံးရှုံးသည်အထိ ဖြစ်ပွားနိုင်သည်။