အခန်း ၁၃၉၀
Vol. 122 Ch. 1390
အခန်း ၁၃၉၀
“ဒါပေမဲ့ ဒီဖြစ်ရပ်ကို ကြည့်ရင် အခုလောလောဆယ် ငါတို့တွေက ဒီလို အာကာသယာဉ်ကြီးတွေရဲ့ တိုက်ခိုက်မှုကို လုံးဝ မခုခံနိုင်သေးဘူးဆိုတာကို ပြနေတယ်။”
“မှန်တယ်။ ငါတို့ဆီမှာ အလွန်ဆုံးရှိမှ အသေးစား အာကာသယာဉ် အဆင့်ပဲ။ အာကာသယာဉ်ကြီးတစ်စီးနဲ့ဆိုရင် တန်းချင်းတောင် မတူဘူး။ ဘယ်လိုလုပ် သွားနှိုင်းယှဉ်လို့ ရမှာလဲ။”
“ငါ လူတိုင်းကို သတိပေးပါရစေ။ အခုလောလောဆယ် မြင်တွေ့နေရတဲ့ အာကာသယာဉ်ကြီးတွေအားလုံးက တကယ်ပဲ အကြီးစားတွေလားဆိုတာကို အသေအချာ မပြောနိုင်သေးဘူး။”
ရှောင်းယီက ၎င်းတို့ကို သတိပေးလိုက်သည်။
“ဟင်.. ဆရာကြီး ပြောတဲ့အဓိပ္ပာယ်က ဘာလဲ။”
“အခုချိန်မှာ အကြီးစားလို့ ခေါ်နေကြတာတွေ အားလုံးက သာမန်မျက်စိနဲ့ မြင်ရတဲ့ ဖြစ်စဉ်တစ်ခုအပေါ်မှာပဲ အခြေခံပြီး ပြောနေကြတာ။ ငါတို့ မြင်နေရတဲ့အရာက တကယ်ပဲ အကြီးစားလားဆိုတာ မသေချာဘူး။ သေချာတာတစ်ခုကတော့ အဲဒီအာကာသယာဉ်တွေရဲ့ အဆင့်က အသေးစား အာကာသယာဉ်တွေထက် ပိုအဆင့်မြင့်တယ်ဆိုတာပဲ။ ဒါပေမဲ့ ဘယ်နှစ်ဆင့်လောက် ပိုမြင့်လဲဆိုတာကိုတော့ ဘယ်သူက အတိအကျ ပြောနိုင်မှာလဲ။”
ရှောင်းယီက ရှင်းပြလိုက်သည်။
“ဟုတ်သားပဲ။ ငါတို့ မြင်နေရတာက အသေးစား၊ အလတ်စား အာကာသယာဉ်မျိုးလည်း ဖြစ်နေနိုင်တာပဲ။”
“အဓိပ္ပာယ်ရှိတယ်။ ဒီနေရာက ရေက အရမ်းနက်လွန်းတယ်။ ငါတို့တွေ မကိုင်တွယ်နိုင်သေးဘူး။”
“အဲဒီယုတ္တိအတိုင်းဆိုရင်.. ငါမြင်လိုက်ရတဲ့အရာက တကယ်ပဲ အသေးစားအာကာသယာဉ်ပဲ ရှိသေးတယ်ဆိုရင် အကြီးစားကျရင် ဘယ်လောက်တောင် ကြီးမားလိုက်မလဲ။ ငါ့အထင်တော့ အာကာသယာဉ်ထဲမှာ မြို့တစ်မြို့လုံးကိုတောင် ထည့်ထားလို့ ရလိမ့်မယ် ထင်တယ်။”
“တကယ်တော့ ငါက အဲဒီလိုကြီးမားတဲ့ အာကာသယာဉ်ကြီးတွေရဲ့ တွန်းကန်အားစနစ်က ဘယ်လိုပုံစံမျိုး ဖြစ်မလဲဆိုတာကို ပိုပြီး စိတ်ဝင်စားတယ်။”
“အပေါ်က ညီအစ်ကို မင်းက လျှောက်တွေးနေပြန်ပြီပဲ။ ဒါက အခုလောလောဆယ် ငါတို့ စဉ်းစားရမယ့် ပြဿနာမဟုတ်ဘူး။ ငါတို့ အသေးစား အာကာသယာဉ်အဖြစ် ဘယ်လိုအဆင့်မြှင့်မလဲဆိုတာကိုပဲ အရင်ဆုံး အမြန်ဆုံး အဖြေရှာတာ ပိုကောင်းလိမ့်မယ်။”
“ဟုတ်တယ်။ ဒီဖြစ်ရပ်ကြောင့် ငါတို့ အပျက်အစီးတွေဆီကနေ အာကာသယာဉ်တွေ ရယူနိုင်မယ့် လမ်းကြောင်း နောက်တစ်ခု ပိတ်သွားပြန်ပြီလို့ ခံစားရတယ်။”
“မဟုတ်ဘူး။ ဒါက လုံးဝ ပိတ်သွားတာ မဟုတ်ဘူး။ ဆန့်ကျင်ဘက်အနေနဲ့ ဒါက ငါတို့အတွက် ဖြတ်လမ်းတစ်ခုကို ပေးလိုက်တာပဲ။”
“ဖြတ်လမ်း ဟုတ်လား။ ငါ့မျက်စိထဲမှာတော့ ဒါက လမ်းပိတ်သွားတာလို့ပဲ မြင်တယ်။”
“ဆရာကြီးပြောတဲ့ စကားတွေကို သေချာအာရုံစိုက်သင့်တယ်။ အများသုံးချန်နယ်ထဲမှာ အချိန်ဖြုန်းနေတဲ့သူတွေ ဒါမှမဟုတ် ရိုင်းရိုင်းစိုင်းစိုင်း လျှောက်ပြောနေတဲ့ အသက်ရှင်ကျန်ရစ်သူတွေရဲ့ စကားကို လိုက်နားမထောင်နဲ့တော့။”
“ဆရာကြီးရဲ့ စကားတွေ ဟုတ်လား။”
“မှန်တယ်။ ဆရာကြီး စကားပြောတိုင်းမှာ အနှစ်သာရ အပြည့်ပါတယ်။ မင်းတို့ သတိထားမိဖို့ပဲ လိုတာ။”
“စောစောက ဆရာကြီးက မေးခွန်းတစ်ခု မေးခဲ့သလိုပဲ။ အဲဒီအသက်ရှင်ကျန်ရစ်သူက သူ့ရဲ့ တည်နေရာကို ရွေ့လျားခဲ့ခြင်း ရှိ၊ မရှိ မေးခဲ့တယ် မဟုတ်လား။”
“ဟုတ်တယ်။ ဆရာကြီး ဘာလို့ အဲဒီလိုမေးခွန်းမျိုး မေးခဲ့လဲဆိုတာ မင်းတို့ စဉ်းစားဖူးလား။ မူလက ဒီကိစ္စက သူနဲ့ လုံးဝ သက်ဆိုင်တာမှ မဟုတ်တာ။”
“ဆရာကြီးက အဲဒီလူက သူနဲ့ အရမ်းနီးကပ်နေပြီး အဲဒီအာကာသယာဉ်ကြီးတွေကို ဆွဲခေါ်လာမှာ စိုးရိမ်လို့များလား။”
“ဆရာကြီးက သူ့ရဲ့ တည်နေရာကို ရွေ့သလားပဲ မေးတာ။ သူ့ရဲ့ တည်နေရာ အတိအကျကို အရင် စပြီး မမေးခဲ့ဘူးလေ။ အဲဒါတော့ မဟုတ်လောက်ပါဘူး။ ဆရာကြီးက အဲဒီအပျက်အစီးတွေကို စောင့်ကြပ်နေတဲ့ အာကာသယာဉ်ကြီးတွေ ရှိနေနိုင်တယ်လို့ ခန့်မှန်းနေတာ ထင်တယ်။”
“သေချာပေါက် အဲဒီလမ်းကြောင်းပဲ။”
ဆရာကြီး၏ စကားများကို အာရုံစိုက်ရန် ယခင်က သတိပေးခဲ့သော အသက်ရှင်ကျန်ရစ်သူက လေးနက်သောလေသံဖြင့် ပြောလိုက်သည်။
“လမ်းညွှန်ကို ဝယ်ခဲ့တဲ့သူတွေအားလုံးလည်း သိကြမှာပါ။ စောစောကလူက အပျက်အစီးတွေကို တူးဖော်တဲ့ လုပ်ငန်းစဉ်တစ်ခုလုံးမှာ ဘာအန္တရာယ်မှ လုံးဝ မကြုံတွေ့ခဲ့ရဘူး။ ငါတို့အားလုံးက ပထမအဆင့်ကနေ လာခဲ့ကြတာပဲ။ ကမ္ဘာ့စည်းမျဉ်းတွေက ဘယ်တုန်းက ငါတို့ကို ဒီလောက်အထိ ကြင်နာဖူးလို့လဲ။”
“မှန်တယ်။ ကမ္ဘာ့စည်းမျဉ်းတွေနဲ့ ပတ်သက်လာရင် သူတို့က အမြဲတမ်း အခက်အခဲတွေကို လေထဲကနေ ဖန်တီးပြီး ထည့်ပေးတတ်တယ်။ ငါတို့ အာကာသယာဉ်တစ်စီးကို ဒီလောက်လွယ်လွယ်ကူကူ ရဖို့ဆိုတာ ဘယ်လိုမှ မဖြစ်နိုင်ဘူး။”
“ဆရာကြီးရဲ့ မေးခွန်းအပေါ် အခြေခံပြီး ကြည့်ရင် သူ သေချာပေါက် သတင်းအချက်အလက် တချို့ကို ခန့်မှန်းမိထားတာပဲ ဖြစ်ရမယ်။ ဒါကို ဆရာကြီးကိုယ်တိုင် အသေးစိတ် ရှင်းပြပေးဖို့တော့ လိုလိမ့်မယ်။”
“ဟုတ်တယ်။ @ယီရန်ပင်း ဆရာကြီး...ကျေးဇူးပြုပြီး ပြောပြပေးပါဦး။ ကျွန်တော်တို့ အခကြေးငွေ ပေးပါ့မယ်။”
“မှန်တယ်။ ကျွန်တော် ဆရာကြီးကို ယုံကြည်တယ်။ အခကြေးငွေ ပေးရမယ်ဆိုရင်တောင် ဝန်မလေးပါဘူး။”
ရှောင်းယီသည် အနည်းငယ် မှင်တက်သွားပြီးနောက် ပြုံးကာ အများသုံးချန်နယ်တွင် ပြောလိုက်သည်။
“ရတာပေါ့။ ဒါက ငါ့ရဲ့ ယူဆချက်သက်သက်ပဲ။ အခကြေးငွေကိုတော့ အနက်ရောင်ရွှေ ၁ ယူနစ်ပဲ ကောက်ခံပါမယ်။ ဒါက အကိုးအကားအဖြစ် သုံးဖို့အတွက်ပဲ။ အမှန်တရား ဟုတ်၊မဟုတ်ကိုတော့ အာမမခံဘူးနော်။”
“ဆရာကြီးကတော့ တကယ်ကို သိက္ခာရှိတာပဲ။ အနက်ရောင်ရွှေ ၁ ယူနစ်ပဲ ကောက်ခံတယ်တဲ့။ စဉ်းစားနေစရာ ဘာလိုသေးလဲ။ ဆရာကြီးနဲ့ စကားပြောရတာတင် အနက်ရောင်ရွှေ ၁ ယူနစ်ထက် ပိုပြီး တန်ဖိုးရှိတယ်။”
“ဟုတ်တယ်။ ဆရာကြီးက အတွေ့အကြုံရှိတယ်။ သူ ငါတို့ကို နည်းနည်းလောက် လမ်းပြပေးရုံနဲ့တင် ငါတို့အတွက် အကျိုးကျေးဇူးတွေက အတိုင်းအဆမရှိ ရရှိသွားမှာပဲ။”
“[အနက်ရောင်ရွှေ] ၁ - အခမဲ့ လဲလှယ်ခြင်း။
သတ်မှတ်ထားသော ကုန်သည် - ယီရန်ပင်း။”
တဒင်္ဂအတွင်း ထိုကဲ့သို့ သတ်မှတ်ထားသော ကုန်သွယ်မှု ကမ်းလှမ်းချက်များသည် အများသုံးချန်နယ်တွင် အဆက်မပြတ် ပေါ်ထွက်လာခဲ့သည်။
ရှောင်ယီသည် ၎င်းတို့ကို ကလစ်တစ်ချက်နှိပ်ရုံဖြင့် တစ်ပြိုင်နက် လက်ခံလိုက်သည်။
“ကုန်သွယ်မှု အောင်မြင်ပါသည်...။ လေးဆတိုး ရိတ်သိမ်းခြင်းကို အသက်သွင်းလိုက်ပါပြီ။ ရရှိသော ကုန်ကြမ်းပစ္စည်း - အနက်ရောင်ရွှေ ၁၁.၂ သန်း။”
ထိုကိန်းဂဏန်းကို မြင်သောအခါ ရှောင်းယီတစ်ယောက် စိတ်ထဲမှ တိတ်တဆိတ် တွက်ချက်လိုက်မိသည်။ ယခုအချိန်အထိ ဤဂလက်ဆီတွင် အနည်းဆုံး အသက်ရှင်ကျန်ရစ်သူ ၂.၈ သန်းခန့် ရှိနေသေးသည်။
ဤအရေအတွက်မှာ တကယ့်ကို အလွန်တရာ ကြီးမားလှပေသည်။
ငွေမပေးရသေးသူများ ရှိနေသေးသည်ဖြစ်စေ၊ မရှိသည်ဖြစ်စေ ရှောင်းယီအနေဖြင့် တစ်ယောက်ချင်းစီကို လိုက်ပြောရန် စိတ်မရှည်တော့သဖြင့် အများသုံးချန်နယ်တွင် တိုက်ရိုက် ပြောလိုက်သည်။
“လူတိုင်းရဲ့ ပံ့ပိုးမှုအတွက် ကျေးဇူးတင်ပါတယ်။ အခု အသက်ရှင်ကျန်ရစ်သူ အများစုက ငွေပေးချေပြီးကြပြီဆိုတော့ ငါ တစ်ယောက်ချင်းစီကို သီးသန့်မက်ဆေ့ခ်ျ လိုက်မပို့တော့ဘူး။ အများသုံးချန်နယ်မှာပဲ တိုက်ရိုက် ပြောကြရအောင်။”
“ကောင်းတယ်။ ပြဿနာမရှိပါဘူး။ ငွေမပေးရသေးတဲ့သူတွေက နောက်မှပဲ ကိုယ့်ဘာသာကိုယ် ပြန်ဖြည့်လိုက်ကြပေါ့။”
“ဟုတ်တယ်။ အနက်ရောင်ရွှေ ၁ ယူနစ်ဆိုတာ မတတ်နိုင်စရာအကြောင်း မရှိပါဘူး။ အဲလောက်ထိ ကုတ်ကတ်မနေကြပါနဲ့။”
“သင်တန်းကြေး ပေးပြီးပါပြီ။ စာသင်ခန်းထဲမှာ အဆင်သင့်ပဲ။”
“ကောင်းပြီ.. အားလုံးပဲ စာတိုတွေ လျှောက်မပို့ကြနဲ့တော့။ ဆရာကြီး ပြောတာကို နားထောင်ကြရအောင်။”
“ပုံမှန်အားဖြင့်တော့ လူတိုင်းက ကျွန်းအထိမ်းအမှတ်ကျောက်တိုင် ဘေးမှာပဲ အချိန်အများကြီး ကုန်ဆုံးကြတာဆိုတော့ အများသုံးချန်နယ်ထဲက သတင်းအချက်အလက်တွေကို မြင်ဖူးကြမှာပါ။ ငါကိုယ်တိုင်လည်း လူတွေ အာကာသယာဉ်ကြီးတစ်စီးကို မြင်တယ်လို့ လာသတင်းပို့ကြတာ သုံးလေးကြိမ်ထက်မက မြင်ဖူးတယ်။ အဲဒီ ပထမဆုံး ဇွတ်တရွတ်လုပ်ပြီး ရှေ့တိုးသွားလို့ ပြုတ်ထွက်သွားရတဲ့ အသက်ရှင်ကျန်ရစ်သူကလွဲရင် ကျန်တဲ့လူတွေအားလုံးက အခုထိ ဘေးကင်းနေကြတုန်းပဲ။ ဒါက ဘာကို ဆိုလိုတာလဲ။”
“ကျုပ်တို့တွေ စိတ်မလောသရွေ့တော့ အခုလက်ရှိအဆင့်မှာ အဲဒီအာကာသယာဉ်ကြီးတွေက ငါတို့ကို လာပြီး တိုက်ခိုက်မှာ မဟုတ်ဘူးလို့ ဆိုလိုတာလား။”
“အဲလိုလည်း ပြောလို့ရပါတယ်။ ဒါပေမဲ့ ငါ့မှာ အခြားယူဆချက်တွေလည်း ရှိသေးတယ်။ ခဏနေရင် အားလုံးကို စုပြီး ပြောပြမယ်။”
ရှောင်းယီက ခေါင်းညိတ်ပြီး ဆက်ပြောလိုက်သည်။
“ဒါ့အပြင် ဒီတစ်ကြိမ်မှာ အဲ့ဒီအသက်ရှင်ကျန်ရစ်သူက ကယ်ဆယ်ရေးယာဉ်ကို သုံးပြီး အပျက်အစီးတစ်ခုကို သွားတူးခဲ့တယ်။ ပထမဆုံးအနေနဲ့ ဒါဟာ ကမ္ဘာ့စည်းမျဉ်းတွေက ငါတို့ကို ပေးထားတဲ့ ဖြတ်လမ်းတစ်ခုဆိုတာ အသေအချာပဲ။”
“ဒါပေမဲ့ မင်းတို့ စောစောက ဆွေးနွေးနေကြသလိုပဲ။ ကမ္ဘာ့စည်းမျဉ်းတွေက ဒီလောက်အထိ မကြင်နာဘူး။ ဖြတ်လမ်းတစ်ခုကို ပေးထားတဲ့ တစ်ချိန်တည်းမှာပဲ သေချာပေါက် စမ်းသပ်မှုအချို့လည်း ရှိနေလိမ့်မယ်။”
ဤအခိုက်အတန့်တွင် အသက်ရှင်ကျန်ရစ်သူ အားလုံးနီးပါးသည် မိမိတို့၏ ကျွန်းအထိမ်းအမှတ်ကျောက်တိုင်များကို စောင့်ကြည့်ရင်း ရှောင်းယီပေးပို့သော သတင်းအချက်အလက်များကို ဖတ်ကာ တစ်ယောက်ပြီးတစ်ယောက် ခေါင်းညိတ်နေကြသည်။
“စောစောက မင်းတို့ လမ်းညွှန်ကို ဝယ်ပြီးနောက် ပြန်ပြောကြတဲ့ စကားတွေကို ငါမြင်လိုက်တယ်။ တူးဖော်တဲ့ လုပ်ငန်းစဉ်တစ်ခုလုံးမှာ ဘာစမ်းသပ်မှုမှ မရှိခဲ့ဘူးလို့ ထင်ရတယ်။ လူတိုင်းကို တကယ်ကြီး ဒီလောက်လွယ်လွယ်ကူကူ ပေးလိုက်တာလားပေါ့။ အဲ့ဒီအသက်ရှင်ကျန်ရစ်သူက အာကာသယာဉ်ကြီးတစ်စီးကို မြင်လိုက်ရတယ်လို့ ပြောတဲ့အချိန်မှာတော့ ငါ သဘောပေါက်သွားပြီလို့ ငါထင်လိုက်တယ်။”
၎င်းကို မြင်သောအခါ အသက်ရှင်ကျန်ရစ်သူတစ်ယောက်က နောက်ဆုံးတွင် မနေနိုင်ဘဲ ပြောလာခဲ့သည်။
“ဆရာကြီးက အရမ်းအံ့ဩဖို့ကောင်းတာပဲ။ အရာအားလုံးကို ဒီလောက် မြန်မြန်ဆန်ဆန် ဆက်စပ်မိသွားတယ်။”
“စောစောက ကောင်းကင်ကြီးက မျက်စိမရှိဘူးလို့ ငါ ကျိန်ဆဲနေမိတာ။ အဲဒီလို နှလုံးသားမည်းတဲ့ ကုန်သည်မျိုးကို အာကာသယာဉ်တစ်စီး ဒီလောက်လွယ်လွယ်ပေးလိုက်တာ မတရားဘူးပေါ့။ စမ်းသပ်မှုက ဒီနေရာမှာ ရှိနေလိမ့်မယ်လို့ လုံးဝ မထင်ထားမိဘူး။”
“ချီးပဲ.. ငါ အဲဒီကောင်ကို ဒေါသထွက်နေလို့ မျက်စိကန်းသွားတာပဲ။ မဟုတ်ရင် ငါလည်း ဒါကို သေချာပေါက် တွေးမိမှာ။”
“ကဲပါ.. ကဲပါ.. အားလုံးပဲ စကားဖြတ်မပြောကြပါနဲ့။ ဆရာကြီး ဆက်ပြောပါစေ။”
“နောက်ဟာကတော့ ငါ့ရဲ့ ယူဆချက်ပဲ။”
ရှောင်းယီက ပြုံးကာ ပြောလိုက်သည်။
“အထက်ပါ အခြေအနေအားလုံးအပေါ် အခြေခံပြီး ငါကတော့ အောက်ပါအတိုင်း ရဲရဲဝံ့ဝံ့ ယူဆချက်ထုတ်ချင်ပါတယ်။”
“ပထမအချက်၊ ငါတို့ရဲ့ လက်ရှိတည်နေရာက အတော်လေး ဘေးကင်းတဲ့ဇုန် ဖြစ်တယ်။ ဒီနေရာမှာ ငါတို့က အာကာသပတ်ဝန်းကျင်မှာ ဖြစ်ပေါ်လာတဲ့ အန္တရာယ်တွေကိုပဲ ရင်ဆိုင်ဖို့ လိုအပ်တယ်။”
“ဒုတိယအချက်၊ အာကာသယာဉ်ကြီးတွေ ပေါ်လာတဲ့ တည်နေရာက အတော်လေး အန္တရာယ်ရှိတဲ့ဇုန်ပဲ။ အဲဒီနေရာမှာ အာကာသယာဉ်ကြီးတွေနဲ့ ထိပ်တိုက်တိုးနိုင်ခြေ ရှိတယ်။”
“နောက်ဆုံးအချက်ကတော့.. ကယ်ဆယ်ရေးယာဉ်ကို သုံးပြီး အပျက်အစီးတွေကို သွားရောက်တူးဖော်နိုင်တယ် ဆိုပေမဲ့ တူးဖော်ပြီးတာနဲ့ ကိုယ်ရရှိထားတဲ့အရာတွေကို ယူပြီး ဘေးကင်းဇုန်ဆီကို အမြန်ဆုံး ပြန်လာဖို့ နည်းလမ်းရှာရမယ်။ မဟုတ်ရင်တော့ အဲဒီအာကာသယာဉ်ကြီးက သေချာပေါက် လာရှာလိမ့်မယ်။”