အခန်း ၁၀၇၅

အခန်း(၁၀၇၅)

ယုံကြည်မှု၏ အခြေခံအုတ်မြစ်

“ငါ မမှားဘူးဆိုရင် မင်းရဲ့ ပုံတူပွား ခန္ဓာကိုယ်ကို ရုပ်သေးရုပ် သန့်စင်တဲ့ နည်းလမ်းနဲ့ ဖန်တီးထားတာပဲ ဖြစ်ရမယ်။ အနှစ်သာရအားဖြင့်တော့ ဒီပုံတူပွားတွေဟာ ရုပ်သေးရုပ်တွေထက် မပိုပါဘူး။ သူတို့မှာ မင်းရဲ့ စွမ်းအားအားလုံး ရှိနေပေမဲ့ ဇီဝအသက်စွမ်းအား လုံးဝမရှိကြဘူး။ ငါ့မှာ သက်ရှိနဲ့ သက်မဲ့ကို ခွဲခြားသိမြင်နိုင်တဲ့ နည်းလမ်းတစ်ခု ရှိနေတာကြောင့် မင်းရဲ့ စစ်မှန်တဲ့ ခန္ဓာကိုယ်ဟာ လုံးဝ ဗလာကျင်း ပေါ်လွင်သွားခဲ့ပြီ” ချင်ယွမ်ဖုန်းက ပြောလိုက်သည်။

တစ်ဖက်လူ၏ မျက်နှာပေါ်တွင် အံ့ဩတုန်လှုပ်သွားသည့် အရိပ်အယောင်တစ်ခု ပေါ်လာသည်။ သူသည် မိမိ၏ လျှို့ဝှက်ချက်ကို ချင်ယွမ်ဖုန်းက ထိုးဖောက်မြင်သွားလိမ့်မည်ဟု မမျှော်လင့်ထားခဲ့ချေ။

သူသည် ထပ်မံရုန်းကန်၍ ခုခံချင်သေးသော်လည်း ယခုအချိန်တွင် ချင်ယွမ်ဖုန်း၏ တိုက်ခိုက်မှုက သူ၏ ရုပ်ပိုင်းဆိုင်ရာ ခန္ဓာကိုယ်ကို လုံးဝ ဆုတ်ဖြဲပစ်လိုက်ပြီ ဖြစ်သည်။ တစ်ဖက်လူ၏ ခန္ဓာကိုယ်မှာ လုံးဝ ပျက်စီးသွားခဲ့ရပြီး သေဆုံးရန်မှာ အချိန်ကိစ္စသာ ဖြစ်တော့သည်။ သို့သော် ကွက်တိ ထိုအချိန်တွင်ပင် တစ်ဖက်လူက မဟိန်းဟောက်ဘဲ မနေနိုင်တော့ချေ။

“ချင်ယွမ်ဖုန်း။ ငါသေရင်တောင် မင်းတို့လည်း အသက်ရှင်ရမှာ မဟုတ်ဘူး။ ငါနဲ့အတူ လိုက်ခဲ့ကြတော့”

“မကောင်းတော့ဘူး” ချင်ယွမ်ဖုန်း မျက်မှောင်ကြုတ်သွားသည်။

တစ်ဖက်လူသည် မိမိ အသက်ရှင်ရန် အခွင့်အရေး မရှိတော့သည်ကို သိရှိသွားသဖြင့် လူတိုင်းကို သူနှင့်အတူ ဆွဲခေါ်သွားရန် ရည်ရွယ်လိုက်ခြင်း ဖြစ်သည်။ သူ သေဆုံးသွားပြီးနောက် ဤရုပ်သေးရုပ်များသည် သူ၏ ထိန်းချုပ်မှုအောက်တွင် ရှိတော့မည် မဟုတ်ပေ။ ထို့ကြောင့် သူ၏ နောက်ဆုံး ထွက်သက်ကို ထိန်းထားစဉ်မှာပင် ရုပ်သေးပုံတူပွားအားလုံးကို တိုက်ရိုက် ဖောက်ခွဲပစ်လိုက်တော့သည်။

ဤမီးလျှံပုံရိပ်၏ စွမ်းအားမှာ အလွန်တရာ အစွမ်းထက်လှပြီး ရုပ်သေးပုံတူပွားများ၏ စွမ်းအားမှာလည်း သူနှင့် သိပ်မကွာခြားလှချေ။ ယခုအခါ ရုပ်သေးပုံတူပွား အများအပြား တစ်ပြိုင်နက်တည်း ကိုယ့်ကိုယ်ကိုယ် ဖောက်ခွဲလိုက်ကြရာ ထွက်ပေါ်လာသည့် စွမ်းအားမှာ ကုဇေကြယ်ရှိ နေထိုင်သူများ၏ ထက်ဝက်ခန့်ကို ဖျက်ဆီးပစ်ရန် လုံလောက်လှသည်။ အမှန်စင်စစ် ချင်ယွမ်ဖုန်းသည် ယင်းသို့ ဖြစ်ပျက်သွားသည်ကို ဒီအတိုင်း ကြည့်မနေနိုင်ပေ။

ထို့ကြောင့် တစ်ဖက်လူက ပုံတူပွားများကို ဖောက်ခွဲတော့မည့် အချိန်မှာပင် ချင်ယွမ်ဖုန်းသည် အပြင်သို့ ပြေးထွက်သွားလိုက်သည်။ သူ၏ လက်ဝါးကို ဆန့်ထုတ်လိုက်သည်နှင့် ထိုက်ရွှီဓားရှည်သည် ချက်ချင်း ပျံသန်းထွက်ပေါ်လာပြီး ယခုအချိန်တွင် သူသည် ထိုက်ရွှီဓားသိုင်း ကျင့်စဉ်ကို စတင်လည်ပတ်စေလိုက်သည်။ ချက်ချင်းဆိုသလို ကောင်းကင်ယံတစ်ခုလုံး ဓားရိပ်များဖြင့် ပြည့်နှက်သွားပြီး ထိုက်ရွှီဓားရှည်၏ စစ်မှန်သော စွမ်းအားသည်လည်း ဖြည်းညည်းစွာ ပေါ်လွင်လာခဲ့သည်။

ဓားအလင်းတန်းများမှာ ရှုပ်ထွေးစွာ ယှက်သန်းသွားပြီး ကောင်းကင်ယံတစ်ခုလုံးသို့ ဖြည်းဖြည်းချင်း ပျံ့နှံ့သွား၏။

မီးလျှံပုံရိပ်၏ ကိုယ့်ကိုယ်ကိုယ် ဖောက်ခွဲမှု စွမ်းအားမှာလည်း တဖြည်းဖြည်း ချဉ်းကပ်လာခဲ့သည်။ ယခုအချိန်တွင် ကိုယ့်ကိုယ်ကိုယ် ဖောက်ခွဲမှု၏ စွမ်းအားအောက်သို့ တဖြည်းဖြည်း ရောက်ရှိသွားကြသည့် သိုင်းပညာရှင်များသည်လည်း ကြီးမားသော ဘေးအန္တရာယ် ကျရောက်လာသည်ကို ခံစားလိုက်ရပြီး ပြင်းထန်သော ဖိအားကြီးတစ်ခုကပင် သူတို့အပေါ် သက်ရောက်လာခဲ့သည်။

ဤအခြေအနေတွင် သူတို့ ထွက်ပြေးချင်လျှင်ပင် သူတို့၏ ခြေထောက်များမှာ ခဲဆွဲထားသကဲ့သို့ လေးလံနေပြီး မရွေ့လျားနိုင်တော့သည်ကို တွေ့ရှိလိုက်ရသည်။

ဖောက်ခွဲမှု စွမ်းအားမှာ မျက်စိတစ်မှိတ်အတွင်း ဖြစ်ပွားခဲ့ခြင်း ဖြစ်ရာ သူတို့အတွက် ထွက်ပြေးရန် အခွင့်အရေး လုံးဝ မရှိသလောက်ပင်။

သို့သော် ကွက်တိ ထိုအချိန်တွင် ကောင်းကင်ယံ၌ ကြီးမားလှသော ပိုက်ကွန်ကြီးတစ်ခု ရုတ်တရက် ပွင့်လန်းသွားခဲ့သည်။ လူတိုင်း အံ့ဩမှင်သက်ကာ ပါးစပ်အဟောင်းသား ဖြစ်သွားကြရသည်။ အဘယ်ကြောင့်ဆိုသော် ထိုပိုက်ကွန်ကြီးမှာ ရေတွက်၍မရနိုင်သော ဓားအလင်းတန်းများကို ပေါင်းစပ်ယှက်နွှယ်ထားခြင်း ဖြစ်ပြီး ဤရှုပ်ထွေးလှသော ဓားအလင်းတန်းကို မောင်းနှင်နေသူမှာ အခြားသူမဟုတ်ဘဲ ချင်ယွမ်ဖုန်းပင် ဖြစ်သည်။

ယခုအချိန်တွင် သူ၏ ခန္ဓာကိုယ်မှာ အနည်းငယ် သေးငယ်နေပုံရသော်လည်း သူသည် လောကတုန်ဟည်းစေမည့် စွမ်းအားကို ပိုင်ဆိုင်ထားသည်။

မီးလျှံပုံရိပ်၏ ရုပ်သေးပုံတူပွားများ ကိုယ့်ကိုယ်ကိုယ် ဖောက်ခွဲလိုက်သည့် ကွက်တိအချိန်၌ ထိုဓားအလင်းတန်း ပိုက်ကွန်ကြီးမှာ ဖြစ်တည်ပြီးသွားပြီဖြစ်ရာ ကိုယ့်ကိုယ်ကိုယ် ဖောက်ခွဲလိုက်သည့် ပုံတူပွားကို ချက်ချင်း လွှမ်းခြုံပစ်လိုက်သည်။

“မင်းတို့ရဲ့ ကာကွယ်ရေးစွမ်းအားတွေကို အမြင့်ဆုံးအထိ မြှင့်တင်ကြ” ချင်ယွမ်ဖုန်းက အော်ဟစ်လိုက်သည်။

ယခုအချိန်တွင် ကိုယ့်ကိုယ်ကိုယ် ဖောက်ခွဲမှု စွမ်းအား၏ ဖိနှိပ်ခြင်းကို ခံထားရသော လူအုပ်ကြီးမှာ နောက်ဆုံး၌ သတိဝင်လာကြတော့သည်။ သူတို့ ထပ်မံ ထွက်ပြေး၍ မရနိုင်တော့သော်လည်း သူတို့ အသုံးပြုနိုင်သမျှသော ကာကွယ်ရေး နည်းလမ်းအားလုံးကို ထုတ်ဖော်လိုက်ကြသည်။

ဗုန်းခနဲ မြည်သံနှင့်အတူ ရုပ်သေးပုံတူပွားမှာ လုံးဝ ပေါက်ကွဲသွားခဲ့ပြီ ဖြစ်သည်။ ထိုအချိန်တွင် ဓားအလင်းတန်း ပိုက်ကွန်ကြီးမှာ စတင်တောက်ပလာပြီး ထိုက်ရွှီဓားရှည်၏ စစ်မှန်သော စွမ်းအားကိုလည်း ဤအချိန်တွင် ပြသလိုက်သည်။

ပေါက်ကွဲမှု စွမ်းအားမှာ အပြင်သို့ တိုးဝှေ့ထွက်လာစဉ်မှာပင် ချက်ချင်း အစိတ်စိတ်အမြွှာမြွှာ ဖြတ်တောက်ခြင်း ခံလိုက်ရပြီး ၎င်း ပေါက်ကွဲထွက်လာသည့် အချိန်တွင်မူ စွမ်းအားမှာ အလွန်တရာ အားနည်းသွားခဲ့ပြီ ဖြစ်သည်။

ထိုသို့ ဖြစ်လင့်ကစား အရပ်မျက်နှာ အသီးသီးရှိ သိုင်းပညာရှင်များမှာ ကြီးမားစွာ ရိုက်ခတ်ခြင်း ခံလိုက်ရပြီး တစ်ယောက်ပြီးတစ်ယောက် လွင့်ထွက်သွားကြရသည်။

ချင်ယွမ်ဖုန်း၏ စွမ်းအားမှာလည်း ယခုအချိန်တွင် လုံးဝ ကုန်ခမ်းလုနီးပါး ဖြစ်သွားခဲ့ပြီ ဖြစ်သည်။ ဤနောက်ဆုံး တိုက်ကွက်မှာ သူ၏ အင်အားအားလုံးကို အကြွင်းမဲ့ အသုံးချလိုက်ခြင်းပင်။

ထိုစွမ်းအင်၏ ရိုက်ခတ်မှုကြောင့် လွင့်ထွက်သွားစဉ်မှာပင် သူသည် ဝိညာဉ်ဆေးလုံးတစ်လုံးကို သူ၏ ပါးစပ်ထဲသို့ အလျင်အမြန် ပစ်ထည့်လိုက်သည်။ ၎င်းကို ဝါးမြိုလိုက်ပြီးနောက် သူသည် ဝိညာဉ်စွမ်းအင် အနည်းငယ် ပြန်လည်ရရှိလာခဲ့သော်လည်း အပြည့်အဝ ပြန်လည်ကောင်းမွန်လာရန်အတွက် အချိန်အနည်းငယ် လိုအပ်ဦးမည် ဖြစ်သည်။

ရုပ်သေးပုံတူပွား၏ ပေါက်ကွဲမှု ရိုက်ခတ်မှုမှာ မျက်စိတစ်မှိတ်စာသာ ဖြစ်သည်။ ခဏအကြာတွင် ထိုနေရာတစ်ခုလုံး တိတ်ဆိတ်သွားခဲ့ပြီ ဖြစ်သည်။

“ဒဏ်ရာရတဲ့လူတွေကို မြန်မြန် ကုသပေးကြ”

အသက်ရှင်ကျန်ရစ်ခဲ့သော သိုင်းပညာရှင်များမှာ အပြင်သို့ အလျင်အမြန် ပြေးထွက်လာကြပြီး ထိခိုက်သေဆုံးမှု အရေအတွက်ကို စတင်စစ်ဆေးကာ ဒဏ်ရာရရှိထားသည့် သိုင်းပညာရှင်များကို ကုသပေးကြတော့သည်။

အချိန်မည်မျှ ကုန်ဆုံးသွားသည်မသိဘဲ စိတ်လှုပ်ရှားနေသော အသံတစ်ခုက ရုတ်တရက် အော်ဟစ်လိုက်သည်။

“ဒဏ်ရာပြင်းပြင်းထန်ထန် ရတဲ့ သိုင်းပညာရှင် အနည်းငယ်ကလွဲရင် ဘယ်သူမှ မသေဘူး။ တစ်ယောက်မှ မသေဘူး”

ဤသတင်းကို ကြားလိုက်ရသဖြင့် လူတိုင်း၏ နှလုံးသားထဲတွင် တုန်လှုပ်သွားကြရသည်။ ခုနက အလွန်ပြင်းထန်လှသော ပေါက်ကွဲမှုကြီး ဖြစ်ပွားခဲ့သော်လည်း တစ်ယောက်မျှ မသေဆုံးခဲ့ချေ။

ချက်ချင်းဆိုသလို လူတိုင်း၏ အကြည့်များမှာ ချင်ယွမ်ဖုန်းထံသို့ ကျရောက်သွားကြသည်။ အကယ်၍ ချင်ယွုန်းဖုန်းသာ သူ၏ ဓားသိုင်းကို အသုံးပြုပြီး ထိုစွမ်းအင်ကို ထိန်းချုပ်မပေးခဲ့လျှင် ဤကဲ့သို့သော ရလဒ်မျိုး မည်သို့မျှ ဖြစ်လာနိုင်စရာ အကြောင်းမရှိပေ။

“ချင်ယွမ်ဖုန်းက တကယ့်ကို နတ်ဘုရားတစ်ပါးပဲ”

တစ်စုံတစ်ယောက်က ရေရွတ်လိုက်ရာ လူအုပ်ကြီးမှာ စိတ်လှုပ်ရှားသွားကြပြီး တစ်ယောက်ပြီးတစ်ယောက် ချင်ယွမ်ဖုန်း၏ အမည်ကို အော်ဟစ်ကြတော့သည်။

ယခုအချိန်တွင် ချင်ယွမ်ဖုန်း၏ မျက်နှာပေါ်၌လည်း စိတ်သက်သာရာရသွားသည့် အပြုံးတစ်ခု ပေါ်လာခဲ့သည်။ အဘယ်ကြောင့်ဆိုသော် သူသည် ရှောင်လင်၏ စနစ်အတွင်းရှိ စနစ်၏ ယုံကြည်မှုတန်ဖိုးများ ဒုံးပျံတစ်စင်းကဲ့သို့ အရှိန်အဟုန်ဖြင့် ထိုးတက်သွားသည်ကို ခံစားလိုက်ရသောကြောင့် ဖြစ်သည်။

“ဒီချင်ယွမ်ဖုန်းက တကယ့်ကို စွမ်းဆောင်ရည်အချို့ ရှိတာပဲ”

ယခုအချိန်တွင် တိုက်ခိုက်နေကြသည့် ကျန်းပန်နှင့် ကျန်းယန်တို့သည် တစ်ယောက်စီ နောက်ဆုတ်လိုက်ကြပြီး အချင်းချင်း အကွာအဝေးတစ်ခုကို ထိန်းသိမ်းလိုက်ကြသည်။ တစ်ချိန်တည်းမှာပင် ကျန်းပန်၏ အကြည့်က ချင်ယွမ်ဖုန်းထံသို့ ကျရောက်သွားပြီး စကားတစ်ခွန်းကို ဖြည်းဖြည်းချင်း ပြောလိုက်ခြင်း ဖြစ်သည်။

ကျန်းယန်က “အို... ဒီလူငယ်လေးလား။ သူက ချင်ယွမ်ဖုန်းလား” ဟု မေးလိုက်သည်။

“စီနီယာအစ်ကို” ကျန်းပန်က ရုတ်တရက် ပြောလိုက်သည်။ “ဒီလူငယ်လေးရဲ့ ခန္ဓာကိုယ်ပေါ်မှာ ရတနာတွေ အများကြီး ရှိတယ်။ ဒီအရာတွေဟာ ငါတို့တစ်သက်မှာ ဘယ်တော့မှ မရနိုင်တဲ့ အရာတွေ ဖြစ်နိုင်တယ်။ ငါတို့ ခေတ္တလောက် တိုက်ခိုက်တာကို ရပ်လိုက်ရအောင်။ မင်းနဲ့ငါ ပူးပေါင်းပြီး ချင်ယွမ်ဖုန်းကို သတ်လိုက်ရင် ဘယ်လိုလဲ”

သူ၏ စကားကို ကြားလိုက်ရသဖြင့် ကျန်းယန်က ပြုံးလိုက်ပြီးနောက် ပြောလိုက်သည်။ “မင်းကမ်းလှမ်းတဲ့ အခြေအနေက တကယ့်ကို ဆွဲဆောင်မှု ရှိတာပဲ”

“ဒါဆို မင်းရဲ့ ရည်ရွယ်ချက်က ဘာလဲ” ကျန်းပန်ကလည်း ပြုံးလိုက်ပြီး သူ၏ စီနီယာအစ်ကို စိတ်လှုပ်ရှားသွားလိမ့်မည်ဟု ထင်မှတ်နေသည်။

“ငါ ငြင်းတယ်” သို့သော် ကျန်းယန်က တိုက်ရိုက်ပင် ငြင်းပယ်လိုက်သည်။

“ဘာဆိုလိုတာလဲ” ကျန်းပန်က သူ့ကို အေးစက်စွာ စိုက်ကြည့်ရင်း ပြောလိုက်သည်။

ကျန်းယန်က “ငါတို့ကြားက ရန်ငြိုးတွေက ဘယ်တော့မှ ရပ်တန့်မှာ မဟုတ်ဘူး။ မင်း ငါ့ကို အရှုံးပေးတယ်လို့ ဝန်ခံမှပဲ ဖြစ်မယ်” ဟု ဆိုလိုက်သည်။

“ငါ ဘယ်တော့မှ အရှုံးမပေးဘူး” ကျန်းပန်က သွားခဲကြိတ်ကာ ပြောလိုက်သည်။

ကျန်းယန်က “ငါတို့ကြားမှာ ထပ်ပြီး ဆွေးနွေးစရာ မရှိတော့ဘူးထင်တယ်” ဟု ပြောလိုက်သည်။

---

ယခုအချိန်တွင် ဝိညာဉ်ဆေးလုံးကို သောက်သုံးပြီးနောက် ချင်ယွမ်ဖုန်းသည် အနည်းငယ် ပြန်လည်ကောင်းမွန်လာခဲ့ပြီး သိုင်းပညာရှင်များကို လှမ်းကြည့်လိုက်သည်။ ဤလူများသည် အိုချီဟွာ၏ စစ်မှန်သော မျက်နှာဖုံးကို မသိရှိကြသေးဘဲ သူ့ကို စတင်ယုံကြည်နေကြပြီ ဖြစ်ကြောင်း ထင်ရှားလှသည်။ ထို့ကြောင့် ချင်ယွမ်ဖုန်းက အခွင့်အရေးကို အသုံးချကာ လူတိုင်းကို ကြေညာလိုက်တော့သည်။

“လူတိုင်း။ ငါ ဘယ်သူ့ကိုမှ မဟုတ်မမှန် စွပ်စွဲနေတာ မဟုတ်ပါဘူး။ ဒါပေမဲ့ မင်းတို့ နားလည်ထားရမှာက လက်ရှိ ကြယ်အရှင်သခင် အိုချီဟွာဟာ မင်းတို့သိတဲ့ လူတစ်ယောက် မဟုတ်တော့ဘူး။ သူဟာ ဒီတစ်ကြိမ်မှာ အထီးကျန်ကြယ် ဘိုးဘေးနဲ့ ပူးပေါင်းကြံစည်ခဲ့တာ ဖြစ်နိုင်သလို ဒါမှမဟုတ် သူတို့ရဲ့ လှည့်စားခြင်းကို ခံလိုက်ရတာလည်း ဖြစ်နိုင်တယ်။ ဒါကြောင့် ဘာပဲဖြစ်ဖြစ် ရလဒ်ကတော့ ကုဇေကြယ်အတွက် နောက်ဆုံးမှာ ဆိုးကျိုးတွေပဲ ဖြစ်လာလိမ့်မယ်။ မင်းတို့ အထီးကျန်ကြယ် ဘိုးဘေးကို ခုခံရုံတင်မကဘဲ ကြယ်အရှင်သခင် အိုချီဟွာကိုလည်း သတိထားကြဖို့ ငါ မျှော်လင့်ပါတယ်”

ချင်ယွမ်ဖုန်း၏ စကားများမှာ အလွန်ပင် လိမ္မာပါးနပ်လှသည်။ သူသည် အိုချီဟွာ၏ တိရစ္ဆာန်ကဲ့သို့သော မျက်နှာပြင်ကို တိုက်ရိုက် ဖွင့်ချခြင်း မပြုခဲ့ပေ။

သို့သော် ဤစကားများက ကုဇေကြယ်၏ သိုင်းပညာရှင်များကြားတွင် ချက်ချင်းပင် ရုတ်ရုတ်သဲသဲ ဖြစ်သွားစေခဲ့သည်။

“ကြယ်အရှင်သခင်က အဲဒီလိုလူမျိုး ဖြစ်မှာ မဟုတ်ပါဘူး...”