အခန်း ၁၀၇၇

အခန်း(၁၀၇၇)

မဟာအစီအရင်ကြီး၏ လည်ပတ်မှုနှုန်း နှေးကွေးသွားပြီးနောက် ယင်းက အတွင်းဘက်သို့ ဖြည်းညှင်းစွာ ပြောဆိုလိုက်လေသည်။

"ကုဇေကြယ်က လူတို့... ငါဟာ မင်းတို့ရဲ့ ကြယ်အရှင်သခင်ပဲ၊ မင်းတို့ကို ငါ အန္တရာယ်မပြုပါဘူး။ ငါ ဒီကိုလာတာ ချင်ယွမ်ဖုန်း တစ်ယောက်တည်းအတွက်ပဲ။ ဒီအရှက်မရှိတဲ့ လူယုတ်မာက ငါ့သမီးကို လှည့်စားခဲ့ရုံတင်မကဘူး၊ သနားစရာကောင်းပြီး လမ်းမှားရောက်နေတဲ့ ငါ့သမီးနဲ့ ပူးပေါင်းပြီး ဖခင်ဖြစ်တဲ့ ငါ့ကို လုပ်ကြံပြီး ငါ့ရဲ့ ကြယ်အရှင်သခင် ရာထူးကို လုယူဖို့ ကြံစည်နေတာ။ မင်းတို့ လက်ရှိအခြေအနေကို သေသေချာချာ သိမြင်ကြစမ်း၊ လူယုတ်မာတွေရဲ့ အသုံးချတာကို မခံကြနဲ့။ တကယ်လို့ မင်းတို့ မြို့တံခါးကို မဖွင့်ပေးရင် ငါ အဓမ္မ အတင်းဝင်ရလိမ့်မယ်"

ထိုစကားများကို ကြားရသောအခါ လူတိုင်း ထိတ်လန့်တုန်လှုပ်သွားကြပြီး အိုချီဟွာ၏ သမီးဖြစ်သူ အိုယန်ယွန်းထံသို့ ကြည့်လိုက်ကြကုန်၏။

ထိုအချိန်တွင် အိုယန်ယွန်းက မျက်မှောင်ကြုတ်လိုက်မိသည်။ အိုချီဟွာက ဦးအောင် စွပ်စွဲလာလိမ့်မည်ဟု သူမ မထင်မှတ်ထားခဲ့ပေ၊ သို့သော်လည်း အိုချီဟွာ၏ ဖမ်းဆီးပိတ်လှောင်ခြင်းနှင့် စော်ကားခြင်းကို ခံရလုနီးပါး ဖြစ်ခဲ့ရသည့် ကိစ္စရပ်မှာ သူမအဖို့ ဖွင့်ဟပြောဆိုရန် ခက်ခဲလှချေသည်။ သူမက အိုချီဟွာအား ဒေါသတကြီး စိုက်ကြည့်နေမိပြီး ခေတ္တမျှ စကားလုံး ဆွံ့အသွားရလေသည်။ အိုချီဟွာကမူ ယင်းရလဒ်ကို ကြိုတင်တွက်ဆထားသည့်အလား ကျေနပ်အားရသော အပြုံးတစ်ခုကို ဖော်ပြနေခဲ့သည်။

သို့သော်လည်း ချင်ယွမ်ဖုန်းက ရှေ့သို့ လှမ်းတက်လိုက်ပြီး ပြောလိုက်သည်။

"သူ့စကားတွေကို မယုံကြနဲ့ဦး။ သူ ဘာတွေလုပ်ခဲ့လဲဆိုတာ သူ့ကိုယ်သူ အသိဆုံးပဲ။ ငါ မင်းတို့ကို တိုက်ရိုက် မသက်သေပြနိုင်ပေမဲ့ သူ အထီးကျန်ကြယ် ဘိုးဘေးကို ဒီကို ခေါ်လာတာကတင် သူ့ရဲ့ ရည်ရွယ်ချက်ကို ထင်ရှားစေတယ်။ တကယ်လို့ မင်းတို့ သူ့ကို ပေးဝင်လိုက်ရင် အထီးကျန်ကြယ် ဘိုးဘေးကိုပါ ပေးဝင်လိုက်တာနဲ့ အတူတူပဲ။ ဘာတွေ ဖြစ်လာမလဲဆိုတဲ့ အကျိုးဆက်ကို မင်းတို့ တွေးကြည့်လို့ ရတာပေါ့"

ယခုအခါ အိုချီဟွာနှင့် ချင်ယွမ်ဖုန်းတို့က တစ်ယောက်တစ်မျိုးစီ ပြောနေကြပေရာ လူတိုင်း ချက်ခြင်းပင် စိုးရိမ်ပူပန်သွားကြပြီး မည်သူ့ကို ယုံကြည်ရမည်မှန်း မသိ ဖြစ်သွားကြချေသည်။

သို့သော်လည်း ထိုအချိန်တွင် ၎င်းတို့က ချင်ယွမ်ဖုန်းဘက်သို့ ပို၍ ယိုင်လဲသွားကြသည်၊ အကြောင်းမူကား အကယ်၍ ချင်ယွမ်ဖုန်းက ၎င်းတို့ကို အန္တရာယ်ပြုလိုပါက မီးလျှံရုပ်သေး၏ ကိုယ်တိုင်ပေါက်ကွဲမှု စွမ်းအားကို တားဆီးရန်အတွက် မိမိအသက်ကို စွန့်စားကာ ဓားအစီအရင်ကို အသုံးပြုခဲ့လိမ့်မည် မဟုတ်ပေ။ ထို့အပြင် ၎င်းတို့ထဲမှ အများစုမှာလည်း ထိုကိုယ်တိုင်ပေါက်ကွဲမှုကြောင့် သေဆုံးသွားလောက်ပြီ ဖြစ်ချေသည်။

အိုချီဟွာ၏ စကားများကလည်း ကျိုးကြောင်းဆီလျော်မှု ရှိနေသော်လည်း ယင်းက အထီးကျန်ကြယ် ဘိုးဘေးကို အမှန်တကယ် ခေါ်ဆောင်လာခဲ့သည်။ ၎င်းအတွက် တံခါးဖွင့်ပေးခြင်းသည် အထီးကျန်ကြယ် ဘိုးဘေးအတွက် တံခါးဖွင့်ပေးခြင်းပင် ဖြစ်ပေသည်။ ထို့ကြောင့် ကောင်းကျိုးဆိုးပြစ်ကို ချိန်ဆကြည့်ပြီးနောက် ၎င်းတို့သည် သဘာဝကျစွာပင် ချင်ယွမ်ဖုန်းဘက်၌ ယာယီ ရပ်တည်ရန် ရွေးချယ်လိုက်ကြတော့သည်။

"ကြယ်အရှင်သခင်... ကျွန်တော်တို့ တကယ်ပဲ တောင်းပန်ပါတယ်။ ဒါပေမဲ့ အရှင်သခင်ရဲ့ အခုလုပ်ရပ်က ကျွန်တော်တို့အတွက် တကယ်ပဲ နားလည်ရခက်ပါတယ်။ ပြီးတော့ အထီးကျန်ကြယ် ဘိုးဘေးကလည်း ဒီမှာ ရှိနေတာပဲ။ ကျွန်တော်တို့ အရှင်သခင်အတွက် တံခါးဖွင့်မပေးနိုင်ပါဘူး" ဟု မြို့မကြီးအတွင်းရှိ ဝါရင့်သိုင်းပညာရှင်အချို့က အိုချီဟွာအား ပြောလိုက်ကြသည်။

အိုချီဟွာ၏ မျက်လုံးများက ချက်ခြင်းပင် လွန်စွာ မှုန်မှိုင်းသွားချေသည်။ ယင်းက ဤကဲ့သို့သော ရလဒ် ထွက်လာမည်ကို သိရှိထားပေရာ အေးစက်စွာ နှာခေါင်းရှုံ့လိုက်ပြီး ပြောလိုက်သည်။

"ယုံချင်ယုံ မယုံချင်နေ။ နောက်မှ ပြဿနာတက်လာရင် ငါ့ကို လာမပြစ်တင်နဲ့"

စကားပြောပြီးနောက် ယင်းက အထီးကျန်ကြယ် ဘိုးဘေးအား ဆက်ပြောလိုက်သည်မှာ "ညီအစ်ကို အထီးကျန်ကြယ်... ငါ ဒီမဟာအစီအရင်ရဲ့ စွမ်းအားကို အများကြီး အားနည်းသွားအောင် လုပ်ထားပြီးပြီ။ အခု မင်း လှုပ်ရှားလို့ ရပြီ"

အထီးကျန်ကြယ် ဘိုးဘေးက ခေါင်းငြိမ့်ပြကာ ပြုံးလျက် ပြောလိုက်သည်။

"ကြယ်အရှင်သခင် အို... လူတွေအားလုံးက မင်းကို သိပ်မယုံကြတဲ့ပုံပဲ"

အိုချီဟွာ၏ မျက်နှာက ပို၍ပင် ကြည့်ရဆိုးသွားချေသည်။ တစ်ဖက်လူက မိမိအား လှောင်ပြောင်နေသည်ကို ယင်းက ကြားရသော်လည်း မျက်နှာပျက်မခံနိုင်ပေရာ ခေါင်းကိုသာ လွှဲလိုက်ရတော့သည်။

အထီးကျန်ကြယ် ဘိုးဘေးက ရှေ့သို့ လှမ်းတက်လာပြီး မဟာအစီအရင်ကြီး၏ ရှေ့သို့ ရောက်ရှိလာခဲ့ပြီ ဖြစ်သည်။ ယင်းက လည်ပတ်မှု နှေးကွေးသွားသော မဟာအစီအရင်ကြီးကို ကြည့်ကာ ၎င်း၏ စွမ်းအားကို သိမ်မွေ့စွာ အာရုံခံလိုက်သည်။ ထို့နောက် ချက်ခြင်းပင် ယင်း၏ လက်ချောင်းဆယ်ချောင်းက ရုတ်တရက် ကနုတ်ပန်းနွယ်ယှက်သကဲ့သို့ လှုပ်ရှားသွားပြီး ဝိညာဉ်ဂါထာမန္တန်များက လက်ဝါးပြင်ထက်၌ လျင်မြန်စွာ လျှံထွက်လာခဲ့သည်။

ခေတ္တမျှအကြာတွင် ဧရာမ ဦးခေါင်းခွံကြီးတစ်ခုက ယင်း၏ ခန္ဓာကိုယ်ထဲမှ တိုးထွက်လာခဲ့လေသည်။

ထိုဦးခေါင်းခွံကြီး၏ တစ်ကိုယ်လုံးမှ သွေးကဲ့သို့ ရဲရဲနီသော အလင်းတန်းများ ဖြာထွက်နေချေသည်။

"မိစ္ဆာဝိညာဉ် အရိုးစု"

ကုဇေကြယ်ပေါ်ရှိ ဝါရင့်သိုင်းပညာရှင် မျိုးဆက်များမှာ အထီးကျန်ကြယ် ဘိုးဘေး၏ လှုပ်ရှားမှုကို ယခင်က မြင်တွေ့ဖူးကြချေသည်။ ယင်းက လှုပ်ရှားလိုက်သည်နှင့် ချက်ခြင်းပင် ၎င်းတို့က ဤပညာရပ်ကို မှတ်မိသွားကြပြီး ၎င်းတို့၏ မျက်လုံးများထဲတွင် ထိတ်လန့်ခြောက်ခြားမှုများ ထင်ဟပ်လာခဲ့သည်။

ဤတိုက်ကွက်မှာ ၎င်းတို့အတွက် လွန်စွာ ပြင်းထန်သော ဖျက်ဆီးမှုစွမ်းအား ရှိကြောင်း ထင်ရှားလှချေသည်။

အထီးကျန်ကြယ် ဘိုးဘေး၏ ထိန်းချုပ်မှုအောက်တွင် မိစ္ဆာဝိညာဉ် အရိုးစုက ကြောက်မက်ဖွယ်ကောင်းစွာ ရယ်မောလိုက်ပြီး မဟာအစီအရင်ကြီးဆီသို့ ဝင်ဆောင့်လိုက်လေသည်။ သွေးရောင်များ ဖြာထွက်သွားပြီး ပြင်းထန်သော ပေါက်ကွဲသံကြီးနှင့်အတူ ယင်းက မဟာအစီအရင်ကြီးကို တိုက်ရိုက် ရိုက်ခတ်သွားရာ တစ္ဆေများ ငိုကြွေးသံနှင့် ဝံပုလွေများ အူသံကဲ့သို့သော အသံများ ချက်ခြင်း ထွက်ပေါ်လာခဲ့သည်။

ခေတ္တမျှအကြာတွင် စွမ်းအင်များ ရုတ်တရက် ပေါက်ကွဲထွက်လာပြီး မဟာအစီအရင်ကြီးမှာ ထိုပေါက်ကွဲမှုများကြားတွင် ပြင်းထန်စွာ တုန်ခါသွားရလေသည်။

လူတိုင်း၏ မျက်နှာတွင် အံ့အားသင့်တုန်လှုပ်မှုများ ထင်ဟပ်သွားသည်။ အထီးကျန်ကြယ် ဘိုးဘေးက မဟာအစီအရင်ကြီးကို အမှန်တကယ် လှုပ်ခါနိုင်လိမ့်မည်ဟု ၎င်းတို့ မထင်မှတ်ထားခဲ့ကြပေ။

အချို့ကမူ စိတ်ပျက်လက်ပျက်ဖြင့်ပင် အော်ဟစ်လိုက်ကြသည်မှာ "မလွယ်တော့ဘူး၊ မလွယ်တော့ဘူး။ ဒီတစ်ခါတော့ ငါတို့ သူ့ကို ခုခံနိုင်မှာ မဟုတ်တော့ဘူး" ဟု ဖြစ်သည်။ လူအုပ်ကြီးမှာ ချက်ခြင်းပင် ဖရိုဖရဲ လှုပ်လှုပ်ရှားရှား ဖြစ်သွားကြချေသည်။

ချင်ယွမ်ဖုန်းက ချက်ခြင်း မတ်တပ်ရပ်လိုက်ပြီး လူတိုင်းကို ပြောလိုက်သည်။

"မလန့်ကြနဲ့ဦး။ သူ့ရဲ့ တိုက်ခိုက်မှုက ပြင်းထန်ပေမဲ့ မဟာအစီအရင်ကြီးကို ချိုးဖျက်ဖို့ဆိုတာ မျက်စိတစ်မှိတ်အတွင်း လုပ်နိုင်တဲ့အရာ မဟုတ်ဘူး"

အိုယန်ယွန်းက ချင်ယွမ်ဖုန်း၏ နောက်ကွယ်တွင် ရပ်နေခဲ့ပြီး ဤကဲ့သို့သော ရှုပ်ထွေးဆူပူနေသည့် အခြေအနေကို ရင်ဆိုင်ရသော်လည်း သူမက နောက်ဆုတ်မသွားခဲ့ပေ။ ယင်းအစား သူမက ရှေ့သို့ တစ်လှမ်း တိုးလိုက်ပြီး ပြောလိုက်သည်။

"အခု အစီအရင်ဆရာတွေအားလုံး ငါ့ရဲ့ စီစဉ်မှုကို နားထောင်ကြ။ မဟာအစီအရင်ကို ပြုပြင်ဖို့အတွက် လိုအပ်တဲ့ ပစ္စည်းတွေကို ချက်ခြင်း ပြင်ဆင်ပြီး အစီအရင်ရဲ့ အောက်ခြေကို သွားကြ၊ အချိန်မရွေး ပြုပြင်နိုင်အောင် အသင့်ပြင်ထားကြပါ"

"အစီအရင်ဆရာတွေ ဘယ်မှာလဲ... အစီအရင်ဆရာတွေ" အိုမိသားစု ညီအစ်ကိုနှစ်ယောက်မှာလည်း အနည်းငယ် ပျာယာခတ်နေကြပြီး ယခုအချိန်တွင် ဘာလုပ်ရမည်မှန်း မသိ ဖြစ်နေကြချေသည်။

သို့သော်လည်း အိုယန်ယွန်း၏ စကားကို ကြားပြီးနောက် ၎င်းတို့ ချက်ခြင်း သဘောပေါက်သွားကြသည်။ ထိုအချိန်တွင် အထီးကျန်ကြယ် ဘိုးဘေး၏ ရိုက်ခတ်မှုအောက်၌ မဟာအစီအရင်ကြီးတွင် အက်ကွဲကြောင်းတစ်ခု ပေါ်ပေါက်နေပြီ ဖြစ်သည်။

မဟာအစီအရင်ကြီး၏ အစိတ်အပိုင်းတစ်ခုတွင် ပြဿနာတက်နေသည့်အလား ရှိနေပြီး ၎င်းတို့နှစ်ဦးမှာ အစီအရင်ဆရာများကို လျင်မြန်စွာ စုစည်းရန် သတိမထားမိခဲ့ကြပေ။ အိုယန်ယွန်း၏ အော်ဟစ်လိုက်မှုနှင့်အတူ ၎င်းတို့ ချက်ခြင်း နားလည်သွားကြတော့သည်။

---

အပြင်ဘက်တွင်မူ အိုချီဟွာမှာ ဒေါသထွက်လွန်းသဖြင့် နှာခေါင်းပင် တွန့်လိမ်မတတ် ဖြစ်နေချေသည်။ ယင်းက မြို့ထဲသို့ မဝင်ရောက်နိုင်ခြင်းကြောင့် အလွန်အမင်း ဒေါသထွက်နေရသည့်အပြင် မိမိ၏ သားသမီးများကပါ မိမိကို ပြန်လည် ဆန့်ကျင်လာလိမ့်မည်ဟု မထင်မှတ်ထားခဲ့ပေ။

အထီးကျန်ကြယ် ဘိုးဘေးက ၎င်း၏ အလုပ်များကြားမှ ခေတ္တမျှ အချိန်ပေးကာ ယင်းအား လှမ်းကြည့်လိုက်ပြီး မပြောဘဲ မနေနိုင် ဖြစ်သွားသည်။

"မင်းကတော့ လူတိုင်းရဲ့ စွန့်ပစ်တာကို ခံရတော့မယ့်ပုံပဲ"

အိုချီဟွာက တစ်ဖက်လူ၏ စကားထဲမှ ပြင်းထန်သော လှောင်ပြောင်မှုကို ကြားရသဖြင့် ၎င်းအား ဂရုမစိုက်ချင်သော်လည်း ခေတ္တမျှ တုံ့ဆိုင်းသွားပြီးနောက် ပြောလိုက်သည်။

"အခုလိုအချိန်မှာ အဲ့ဒီလို သရော်စာတွေ မပြောတာ ပိုကောင်းလိမ့်မယ်။ မဟာအစီအရင်ကို ဖျက်ဆီးလို့ ရနိုင်ပေမဲ့ ပိုပြီး ကြီးမားတဲ့ စွမ်းအားကို စိုက်ထုတ်ဖို့ လိုအပ်တယ်။ ငါက အစီအရင်ရဲ့ နိယာမအချို့ကို ဖျက်ဆီးပြီး မဟာအစီအရင်ကို အားနည်းအောင် လုပ်ဖို့ ကိုယ်တွင်းစွမ်းအင်တွေ အများကြီး သုံးထားရပြီးပြီ။ ကျန်တာကတော့ မင်းအပေါ်ပဲ မူတည်တော့တယ် ညီအစ်ကို အထီးကျန်ကြယ်... မဟာအစီအရင်ကို ဘယ်လို ချိုးဖျက်မလဲဆိုတာ ငါ့ကို မြန်မြန် ပြစမ်းပါဦး"

အိုချီဟွာ၏ စကားကို ကြားသောအခါ အထီးကျန်ကြယ် ဘိုးဘေးက မိမိလည်း ပြန်လည် လှောင်ပြောင်ခံလိုက်ရသည်ကို သိရှိသော်လည်း ဘာမှ ထပ်မပြောတော့ပေ။ အဆုံးတွင်မူ ယခုအချိန်၌ ၎င်းတို့နှစ်ဦးစလုံးမှာ တစ်ဦးကိုတစ်ဦး အသုံးချနေကြခြင်းသာ ဖြစ်ချေသည်။

အထီးကျန်ကြယ် ဘိုးဘေးက မဟာအစီအရင်ကြီးကို စတင်ပြုပြင်နေကြပြီဖြစ်သော အစီအရင်ဆရာများကို လှမ်းကြည့်လိုက်ပြီး အေးစက်စွာ ရယ်မောလျက် ပြောလိုက်သည်။

"မင်းတို့ ပြုပြင်တာက မြန်မလား၊ ငါ ဖျက်ဆီးတာက မြန်မလားဆိုတာ ကြည့်ကြသေးတာပေါ့"

စကားပြောပြီးနောက် ယင်းက လက်ကို ဝှေ့ယမ်းလိုက်ရာ ဝိညာဉ်ဖမ်းအဆောင်အလံမှာ တစ်ဖန် ပြန်လည် ပျံသန်းထွက်လာခဲ့သည်။ ထို့နောက် ချက်ခြင်းပင် သွေးနီရောင် အလင်းတန်းတစ်ခုက မိစ္ဆာဝိညာဉ် အရိုးစုကို လွှမ်းခြုံသွားချေသည်။

ခေတ္တမျှအကြာတွင် မိစ္ဆာဝိညာဉ် အရိုးစုမှာ တုန်ခါသွားပြီး အမှန်တကယ်ပင် နှစ်ခုအဖြစ် ကွဲထွက်သွားလေသည်။

အထီးကျန်ကြယ် ဘိုးဘေးက နှောင့်နှေးကြန့်ကြာမှုမရှိဘဲ မိစ္ဆာဝိညာဉ် အရိုးစုနှစ်ခုလုံးကို တစ်ပြိုင်နက်တည်း လှုပ်ရှားစေကာ မဟာအစီအရင်ကြီးဆီသို့ အဆက်မပြတ် ဝင်ဆောင့်စေလိုက်တော့သည်။

မိုးခြိမ်းသံကဲ့သို့ ပြင်းထန်သော မြည်ဟီးသံများ ဆူညံသွားရလေသည်။ မိစ္ဆာဝိညာဉ် အရိုးစု၏ စွမ်းအားမှာ ဤမျှအထိ ကြီးမားလိမ့်မည်ဟု ယင်းက မထင်မှတ်ထားခဲ့ပေ။

အကယ်၍ သာမန်အစီအရင်တစ်ခုသာ ဖြစ်ပါက ယင်း၏ စွမ်းအားကြောင့် ကြာမြင့်စွာကပင် ပျက်စီးသွားလောက်ပြီ ဖြစ်ချေသည်။ ဤမဟာအစီအရင်ကြီးမှာမူ အမှန်တကယ်ပင် ခိုင်ခံ့လှပေရာ အကြိမ်ကြိမ် ရိုက်ခတ်မှုများအပြီးတွင် နောက်ထပ် အက်ကွဲကြောင်းတစ်ခု ထပ်မံ ပေါ်ပေါက်လာခဲ့ပြန်သည်။

"အစီအရင် တည်ဆောက်ပုံရဲ့ နောက်ထပ် အစိတ်အပိုင်းတစ်ခု ပျက်စီးသွားပြန်ပြီ"