အခန်း ၇၅

အခန်း ၇၅ ကျေးဇူးတင်ခြင်း

"ဒါပေမဲ့ ဆွန်း က ဘာဖြစ်လို့ ဗုံး တွေ လုပ်နေရတာလဲ..."

ရိုအန်၏ ရှင်းပြချက်ကို နားထောင်ပြီးနောက် မိုနာက အနည်းငယ် သံသယဖြစ်စွာဖြင့် မေးမြန်းလိုက်သည်။

"ဆွန်း က လျှို့ဝှက် အေးဂျင့် မဟုတ်ဘူးလား..."

"ဘယ်သူ သိမှာလဲ..."

ရိုအန်က ခေါင်းခါယမ်းလိုက်ပြီး မိုနာဘက်သို့ လှည့်ကာ လေးနက်သော မျက်နှာထားဖြင့် မေးမြန်းလိုက်သည်။

"စုံထောက် မာလန် ရဲ့ ဒီလ အတွက် လျှို့ဝှက် အေးဂျင့် မှတ်တမ်း ထဲမှာ... ဒီကိစ္စ ကို ရေးမထားဘူး လို့ ငါ မှတ်မိတယ်..."

မိုနာက မိမိ၏ ခုံသို့ ပြန်ပြေးသွားပြီး ကွန်ပျူတာ ထဲရှိ မှတ်တမ်းများကို သေချာစွာ စစ်ဆေးကြည့်လိုက်ကာ ခေါင်းညိတ်ပြလိုက်သည်။

"မှန်တယ်..."

အတည်ပြုချက်ကို ကြားလိုက်ရသောအခါ ရိုအန်က တုံ့ဆိုင်းနေခြင်း လုံးဝ မရှိဘဲ အဖွဲ့ခေါင်းဆောင် ရုံးခန်း အတွင်းသို့ ချက်ချင်း ဝင်ရောက်သွားလေသည်။

"ဘာဖြစ်လို့လဲ..."

စာရွက်စာတမ်းများကို ခေါင်းငုံ့ ရေးသားနေသော သြဂတ်စ်က တံခါးမခေါက်ဘဲ ရုံးခန်း အတွင်းသို့ ဝင်ရောက်လာသော ရိုအန်ကို နားမလည်နိုင်သည့် မျက်နှာထားဖြင့် ကြည့်လိုက်သည်။

သို့သော် ရိုအန်၏ ခန့်မှန်းချက်ကို နားထောင်ပြီးနောက် သြဂတ်စ်၏ မျက်နှာ အမူအရာက ချက်ချင်း လေးနက် တည်ကြည် သွားတော့သည်။

"ဆွန်း က အဲ့ဒီ ဖုန်းတွေကို ဝယ်တာ... ဗုံး လုပ်ဖို့ ဆိုတာ မင်း သေချာလို့လား..."

"ဟင့်အင်း... ကျွန်တော် မသေချာဘူး..."

ရိုအန်၏ စကားကြောင့် သြဂတ်စ်၏ မျက်နှာပေါ်တွင် မည်းမှောင်သော မျဉ်းကြောင်းများ ပေါ်လာသော်လည်း ရိုအန်က ဆက်လက် ပြောဆိုလေသည်။

"ဒါပေမဲ့ ဒီလို ကိစ္စမျိုး က လုံးဝ မဖြစ်နိုင်ဘူး လို့ တွေးနေမယ့် အစား... တကယ် ဖြစ်လာနိုင်တယ် လို့ ယုံကြည်ထားတာ က ပိုကောင်းတယ်..."

"အက်ဖ်ဘီအိုင် ရဲ့ အုပ်စုဖွဲ့ မှုခင်း နှိမ်နင်းရေး ဌာန က မနက်ဖြန် ဒီအီးအေ နဲ့ အတူ ဟိုင်အီးနား ဂိုဏ်း ကို နှိမ်နင်းဖို့ စစ်ဆင်ရေး လုပ်မယ် လို့... ခေါင်းဆောင် ခုလေးတင် ပြောခဲ့တာ ကို ကျွန်တော် မှတ်မိတယ်... တကယ်လို့ သူတို့ရဲ့ သတင်း အရင်းအမြစ် က ဆွန်း ဆီကနေ လာတာ ဆိုရင်တော့..."

"ဒါဆိုရင် အုပ်စုဖွဲ့ မှုခင်း နှိမ်နင်းရေး ဌာန ရဲ့ ဆုံးရှုံးမှု က အရမ်းကို ကြီးမားသွားနိုင်တယ်..."

သြဂတ်စ်က ခေါင်းညိတ် ထောက်ခံလိုက်သည်။ အုပ်စုဖွဲ့ မှုခင်း နှိမ်နင်းရေး ဌာန မှ ဒိုင်လွန် သည်လည်း ကိုလံဘတ်စ် ရန်ပုံငွေအဖွဲ့ အတွင်း၌ ပါဝင်နေသူ ဖြစ်ရာ အပိုစကားများ ဆက်မပြောတော့ဘဲ ဖုန်းကို ချက်ချင်း ထုတ်ယူကာ ဒိုင်လွန် ထံသို့ ဆက်သွယ် လိုက်တော့သည်။

"ဒီလို ကိစ္စမျိုး လည်း ရှိသေးတာလား..."

သြဂတ်စ်၏ ရှင်းပြချက်ကို နားထောင်ပြီးနောက် အစည်းအဝေး ခန်းမ အတွင်း၌ အဖွဲ့သားများနှင့် မနက်ဖြန် စစ်ဆင်ရေး အစီအစဉ်ကို ဆွေးနွေး တိုင်ပင် နေသော ဒိုင်လွန် တစ်ယောက် ဖင်တွင် မီးစွဲသွားသည့် အလား ချက်ချင်း နေရာမှ ထထိုင် လိုက်တော့သည်။

စက္ကန့်အနည်းငယ်မျှ တိတ်ဆိတ် သွားပြီးနောက် ဒိုင်လွန်က သြဂတ်စ်အား ဖုန်းကို မိနစ် အနည်းငယ်ခန့် အရင်ချထားရန် အချက်ပြလိုက်သည်။ ထို့နောက် အခြား ဖုန်းနံပါတ် တစ်ခုကို နှိပ်ကာ ဒီအီးအေ မှ မနက်ဖြန် စစ်ဆင်ရေး တာဝန်ခံ ထံသို့ ဆက်သွယ် လိုက်လေသည်။

အမှတ် ၅ စုံစမ်းစစ်ဆေးရေး အဖွဲ့၏ ခေါင်းဆောင် ရုံးခန်း အတွင်း၌ ရိုအန်နှင့် သြဂတ်စ်တို့က အကြည့်ချင်း ဖလှယ်လိုက်ကြပြီး ခေတ္တမျှ တိတ်ဆိတ် နေကာ ကော်ဖီခွက် များကို ပြိုင်တူ ကောက်ကိုင် လိုက်ကြသည်။

အချိန် အတော်ကြာပြီးနောက် သြဂတ်စ်၏ ဖုန်းက နောက်တစ်ကြိမ် မြည်လာတော့သည်။

"တကယ်ကို ကျေးဇူးတင်ပါတယ် သြဂတ်စ်..."

ဖုန်းတစ်ဖက်ခြမ်းရှိ ဒိုင်လွန်မှာ လူတစ်ယောက်နှင့် အကြီးအကျယ် ရန်ဖြစ်ပြီးခါစ ဆိုသည်မှာ အထင်းသား ပေါ်လွင်နေပြီး လေသံမှာ အနည်းငယ် မတည်ငြိမ်သေးပေ။

"ဒီတစ်ကြိမ် ပူးပေါင်း စစ်ဆင်ရေး ကို... ဒီအီးအေ ဘက် က ဆွန်း ပေးပို့လာတဲ့ သတင်း အချက်အလက် တွေ အပေါ် အခြေခံပြီး ရေးဆွဲထားတာ မဟုတ်ဘူး... ဒါပေမဲ့ ဆွန်း ဖုန်းတွေ ဝယ်ခဲ့တဲ့ ကိစ္စ ကို သူတို့လည်း မသိထားကြဘူး..."

အဖြစ်အပျက် အခြေအနေကို အကြမ်းဖျင်း ရှင်းပြပြီးနောက် ဒိုင်လွန်၏ လေသံက အလွန် လေးနက် တည်ကြည် နေလေသည်။

"သြဂတ်စ်... ဒီတစ်ကြိမ် တော့ ခင်ဗျား ကို ကျွန်တော် ကျေးဇူးဆပ် ရလိမ့်မယ်..."

သြဂတ်စ် ကသာ ဤသတင်းကို ဒိုင်လွန်အား မပြောပြခဲ့ပါက မနက်ဖြန် ဒီအီးအေ နှင့် ပူးပေါင်း စစ်ဆင်ရေး ပြုလုပ်သည့် အချိန်တွင် အက်ဖ်ဘီအိုင် အနေဖြင့် မျှော်လင့်မထားသော အခြေအနေနှင့် ရင်ဆိုင်ရပြီး စုံထောက် မည်မျှ သေဆုံးသွားမည် ကိုပင် ခန့်မှန်း၍ မရနိုင်ချေ။ အဖြစ်အပျက် ပြီးဆုံးသွားပါက ဒိုင်လွန်၏ အသက်မွေးဝမ်းကျောင်း ဘဝ လည်း သေချာပေါက် အဆုံးသတ် သွားမည် ပင် ဖြစ်လေသည်။

"နောက်မှ ကျွန်တော့် ကို အရက် တိုက်ရင် ရပါပြီ..."

ဖုန်းတစ်ဖက်ခြမ်းမှ အသံကို ကြားလိုက်ရသောအခါ သြဂတ်စ်က ဟားဟား ရယ်မောလိုက်ပြီး ရိုအန်ကို တစ်ချက် ကြည့်ကာ ပြုံးလျက် စကားဆိုလေသည်။

"ဒါပေမဲ့ ဒီတစ်ကြိမ် သတင်း ကို ကျွန်တော့် လက်အောက် က ရိုအန် ဂရင်းဝုဒ် လို့ ခေါ်တဲ့ စုံထောက် က ရှာတွေ့ခဲ့တာ... ရိုအန် က ကိုယ့်လူ ပဲ ဆိုတော့... နောက်ပိုင်း အတူတူ အရက်သောက် တဲ့ အခါကျရင် ရိုအန် ကို ပါ ခေါ်လာခဲ့မယ်... ခင်ဗျား စိတ်ဆိုး လို့တော့ မရဘူး နော်..."

"လွန်ခဲ့တဲ့ ရက်အနည်းငယ် တုန်းက... မှင်တံ ကို သုံးပြီး ကွင်းဆက် လူသတ်သမား ကို သတ်ပစ်လို့ နယူးယောက် သတင်းစာ မျက်နှာဖုံး မှာ ပါလာတဲ့... ရိုအန် ဂရင်းဝုဒ် ကို ပြောတာလား..."

သြဂတ်စ်၏ စကားကို ကြားလိုက်ရသောအခါ ဒိုင်လွန်၏ မျက်လုံးများ အရောင်တောက်ပ သွားသည်။ လက်ယမ်းပြကာ အရက်သောက်ခြင်း စသည်တို့မှာ ကိစ္စ အသေးအဖွဲများသာ ဖြစ်ကြောင်း ပြောဆိုလိုက်ပြီး ဒိုင်လွန်၏ စုံစမ်းစစ်ဆေးရေး အဖွဲ့တွင် လတ်တလော လူအင်အား လိုအပ်နေသဖြင့် ရိုအန်ကို ရက်အနည်းငယ်ခန့် အကူအညီ လာပေးရန် စေလွှတ်နိုင်ခြင်း ရှိမရှိ မေးမြန်းလိုက်သည်။

"နောက်မှ ပြန်ဆက်သွယ် လိုက်မယ်..."

သြဂတ်စ်က ဟင်းဟင်း ရယ်မောလိုက်ပြီး ဒိုင်လွန်၏ စကားကို လုံးဝ အဖက်မလုပ်တော့ဘဲ ဖုန်းကို ချက်ချင်း ချပစ်လိုက်လေသည်။

"အရက်သမား အိုကြီး..."

ဖုန်းထဲမှ ပြတ်တောက်သွားသော အသံကို ကြားလိုက်ရသောအခါ ဒိုင်လွန်၏ နှုတ်ခမ်းထောင့်များ အပေါ်သို့ ကွေးတက်သွားပြီး မိမိ၏ ရုံးခန်း အတွင်းမှ ထွက်လာခဲ့သည်။ လက်အောက်ငယ်သား စုံထောက်များကို အသံကျယ်ကြီးဖြင့် အော်ဟစ်လိုက်သည်။

"အားကိုး မရတဲ့ ဒီအီးအေ က ကောင်တွေကို ကျေးဇူးတင် ရမယ်... ငါတို့ အခု မနက်ဖြန် ရဲ့ စစ်ဆင်ရေး အစီအစဉ် ကို အသစ် ပြန်ဆွဲကြမယ်..."

"ဟုတ်ကဲ့ပါ ခေါင်းဆောင်..."

အဝေး တစ်နေရာ ရှိ ဒီအီးအေ နယူးယောက် ဌာနခွဲ၏ ရုံးခန်း တစ်ခန်း အတွင်း၌ စစ်ဆင်ရေး အဖွဲ့ ခေါင်းဆောင် မက်ဒန် က စားပွဲပေါ်ရှိ ဖိုင်တွဲကို ကောက်ယူကာ စုံထောက် မာလန် ထံသို့ အားကုန် ပစ်ပေါက် လိုက်လေသည်။

"သောက်ကျိုးနည်း မာလန်..."

မက်ဒန် ၏ မျက်လုံးများ အတွင်း၌ ဒေါသမီးများ တောက်လောင်နေပြီး မာလန် ကို လက်ညှိုးထိုးကာ အဆက်မပြတ် ဆဲရေးတိုင်းထွာ လိုက်သည်။

"မင်း လက်အောက် က လျှို့ဝှက် အေးဂျင့် တွေ က... တကယ်တမ်း ဘယ်လိုတွေ လုပ်နေကြတာလဲ..."

မက်ဒန် အနေဖြင့် ဒေါသထွက် ရခြင်းမှာ မာလန်၏ လက်အောက်ရှိ လျှို့ဝှက် အေးဂျင့် က သစ္စာဖောက် နိုင်ချေ ရှိနေသည့် ကိစ္စကြောင့် မဟုတ်ပေ။ ဒီအီးအေ တွင် နှစ်စဉ် သေဆုံးသူ၊ သစ္စာဖောက်သူ နှင့် ပျောက်ဆုံး သွားသော လျှို့ဝှက် အေးဂျင့် အရေအတွက် မှာ အနည်းအကျဉ်း မဟုတ်ရာ မက်ဒန် တစ်ယောက် ဤကိစ္စများကို ယဉ်ပါး နေပြီ ဖြစ်လေသည်။

မက်ဒန် အား တကယ်တမ်း ဒေါသ ထွက်စေခဲ့သည့် အရာမှာ ဤကိစ္စကို မိမိ၏ လက်အောက်ငယ်သားများ က ပြောပြခဲ့ခြင်း မဟုတ်သလို ဒီအီးအေ မှ အခြား လုပ်ဖော်ကိုင်ဖက် များက ပြောပြခဲ့ခြင်း လည်း မဟုတ်သောကြောင့် ပင် ဖြစ်သည်။

ထိုအစား အက်ဖ်ဘီအိုင် မှ လူများက မက်ဒန် ထံ ဖုန်းဆက်၍ ဤကိစ္စ တကယ် ရှိမရှိ လာရောက် မေးမြန်း ခဲ့သောကြောင့် ပင် ဖြစ်လေသည်။

အက်ဖ်ဘီအိုင် စုံထောက်များ သည် အတော်လေး တန်ဖိုးကြီးမား ကြရာ ဒီအီးအေ လိုမျိုး စုံထောက်များ သတင်း အမှားအယွင်း ကြောင့် ပြီးစလွယ် သေဆုံး သွား၍ မရနိုင်ချေ။

အခြား ဌာန များ အရှေ့တွင် အရှက်ကွဲ ရတော့မည် ပင် ဖြစ်လေသည်။

"တောင်းပန်ပါတယ် ခေါင်းဆောင်..."

မက်ဒန် ၏ မျက်နှာပေါ်ရှိ ဒေါသမီး များကို မြင်တွေ့လိုက်ရသောအခါ မက်ဒန် ၏ စိတ်နေသဘောထား ကို ကောင်းစွာ သိရှိထားသော မာလန် က အပို ရှင်းလင်းချက်များ မပေးတော့ဘဲ လေးနက်သော လေသံဖြင့် ရှင်းပြလေသည်။

"နောက်ပိုင်း ကျရင် ကျွန်တော့် လက်အောက် က လျှို့ဝှက် အေးဂျင့် တွေကို စိတ်ပိုင်းဆိုင်ရာ အကဲဖြတ်မှု အသစ် ပြန်လုပ်ပါ့မယ်..."

"စောက်ရူး တွေ ရဲ့ စိတ်ပိုင်းဆိုင်ရာ အကဲဖြတ်မှု ကို သွားလုပ်ချည်..."

ထိုစကားကို ကြားလိုက်ရသောအခါ မက်ဒန် က မာလန် ကို နောက်တစ်ကြိမ် ဒေါသတကြီး စူးစိုက် ကြည့်လိုက်သည်။

ပုံမှန် အားဖြင့် လူတစ်ယောက် သည် အက်ဖ်ဘီအိုင်၊ စီအိုင်အေ၊ အန်အက်စ်အေ အစရှိသော ဌာန များသို့ ဝန်ထမ်းသစ် အဖြစ် ဝင်ရောက် လိုပါက ကိုယ်ရေး နောက်ခံ စုံစမ်း စစ်ဆေးခြင်း၊ အသက်မွေးဝမ်းကျောင်း ဆိုင်ရာ စစ်ဆေး အကဲဖြတ်ခြင်း၊ လိမ်လည်မှု ထောက်လှမ်း စစ်ဆေးခြင်း၊ စိတ်ပိုင်းဆိုင်ရာ အကဲဖြတ်ခြင်း အစရှိသည့် လုပ်ငန်းစဉ် များကို မဖြစ်မနေ ဖြတ်သန်း ရလေသည်။ အချက် တစ်ချက်မျှ မအောင်မြင် ပါက အလုပ် ခန့်အပ်ခြင်း ခံရမည် မဟုတ်ပေ။

သို့သော် ဒီအီးအေ ကတော့ မတူညီချေ။

သင်သည် လူမွဲ စာရင်း ခံထားရပြီး စီးပွားရေး အခက်အခဲ ရှိနေလျှင်သော် လည်းကောင်း၊ မိသားစု နောက်ခံ မကောင်းမွန်လျှင် သော်လည်းကောင်း၊ လိမ်လည်မှု ထောက်လှမ်း စစ်ဆေးခြင်း တွင် မအောင်မြင်လျှင် သော်လည်းကောင်း၊ လူမိုက် ဂိုဏ်းဝင် များ နှင့် အဆက်အသွယ် ရှိနေလျှင် သော်လည်းကောင်း ဒီအီးအေ ၏ ဝန်ထမ်းသစ် တစ်ယောက် ဖြစ်လာ နိုင်သေးသည်။

အကြောင်းရင်း မှာ အလွန် ရိုးရှင်းလှသည်။ ထိုသို့သော လူမျိုးများကို ဒီအီးအေ က ဖက်ဒရယ် နိုင်ငံတော် ၏ တောင်ဘက် ရှိ နိုင်ငံများ ကဲ့သို့သော ပြည်ပ နိုင်ငံများသို့ လျှို့ဝှက် အေးဂျင့် အဖြစ် စေလွှတ်လေ့ ရှိသောကြောင့် ပင် ဖြစ်သည်။

ကိုယ်ရေး နောက်ခံ သန့်ရှင်းပြီး မည်သည့် အမည်းစက် မျှ မရှိသော လူတစ်ယောက် အနေဖြင့် ဖက်ဒရယ် နိုင်ငံတော် ၏ တောင်ဘက် ရှိ နိုင်ငံများ ထဲမှ မူးယစ်ဆေးဝါး ရောင်းဝယ် ဖောက်ကား နေသော အသိုင်းအဝိုင်း များ ထဲသို့ ဝင်ရောက် ထိုးဖောက်ရန် ဆိုသည်မှာ လုံးဝ မဖြစ်နိုင်ပေ။

ထိုသို့သော အခြေအနေ မျိုးတွင် ဒီအီးအေ အနေဖြင့် ပြည်တွင်း၌ လျှို့ဝှက် အေးဂျင့် ရွေးချယ်သည့် အခါ တွင်လည်း အထက်ပါ စစ်ဆေးမှု များကို သိပ်ပြီး ဂရုစိုက်လေ့ မရှိချေ။

စိတ်ပိုင်းဆိုင်ရာ အကဲဖြတ်မှု ဆိုသည်မှာ လည်း အချိန် အများစု တွင် ဒီအီးအေ မှ စုံထောက်များ နှင့် လျှို့ဝှက် အေးဂျင့် တို့ အတူတကွ ရပ်ကာ ဆေးလိပ် သောက်ရင်း စကားစမြည် ပြောဆိုခြင်း သက်သက်သာ ဖြစ်လေသည်။

အသက်ပြင်းပြင်း တစ်ချက် ရှူသွင်းလိုက်ပြီးနောက် မက်ဒန် က မိမိ၏ ကုလားထိုင် ပေါ်သို့ ပြန်လည် ထိုင်ချလိုက်သည်။ မာလန် ကို စူးစိုက်ကြည့်ကာ မေးမြန်းလိုက်သည်။

"မနက်ဖြန် စစ်ဆင်ရေး ကိစ္စ ကို... မင်း လက်အောက် က အဲ့ဒီ လျှို့ဝှက် အေးဂျင့် ကို မင်း ပြောပြထား ဖူးလား လို့ သိချင်တယ်..."

"မပြောပြ ဖူးပါဘူး... ဒါပေမဲ့..."

ထိုစကားကို ကြားလိုက်ရသောအခါ မာလန် က ချက်ချင်း ခေါင်းခါယမ်း လိုက်သည်။ ပါးစပ် ဟကာ တစ်စုံတစ်ခု ကို ပြောရန် ပြင်လိုက်သော်လည်း နောက်ဆုံးတွင် ငြင်းဆို လိုက်သည်။

"ဆွန်း က ဒီကိစ္စ ကို မသိပါဘူး..."

"အရမ်း ကောင်းတယ်..."

မက်ဒန် က သက်ပြင်းချနိုင် သွားပြီး စားပွဲပေါ်ရှိ ဖိုင်တွဲ များကို ရှင်းလင်း ရင်း လေးနက်သော လေသံဖြင့် ဆိုသည်။

"မနက်ဖြန် ရဲ့ စစ်ဆင်ရေး အစီအစဉ် ကို အသစ် ပြန်ဆွဲရမယ်... ဟိုင်အီးနား ဂိုဏ်း ရဲ့ လက်ထဲမှာ အဝေးထိန်း ဗုံး တွေ ရှိနေနိုင်တယ် ဆိုတဲ့ မသေချာ မရေရာ တဲ့ အချက် ကိုပါ ထည့်သွင်း စဉ်းစား ရမယ်... ငါတို့ ဒီအီးအေ ရဲ့ စုံထောက် တွေလည်း သတင်း အမှားအယွင်း ကြောင့် သေဆုံး သွားလို့ လုံးဝ မဖြစ်ဘူး..."

"ဟုတ်ကဲ့ပါ ခေါင်းဆောင်..."

မာလန် က ခေါင်းညိတ်ပြလိုက်ပြီး လှည့်ကာ ရုံးခန်း အတွင်းမှ ထွက်ခွာ လာခဲ့သည်။

ရုံးခန်း တံခါး ကို ပိတ်လိုက်ပြီးနောက် မာလန် ၏ မျက်နှာထား က ချက်ချင်း မည်းမှောင် သွားတော့သည်။ သွားများကို တင်းတင်း ကြိတ်ကာ တီးတိုး ရေရွတ် လိုက်သည်။

"ကျိန်ဆဲချင်စရာ ကောင်းတဲ့ ဆွန်း ရယ်... ပြီးတော့ အက်ဖ်ဘီအိုင် က ကောင်တွေ ရယ်..."

"တကယ်ကို ကောင်းကောင်း လုပ်နိုင်ခဲ့တာပဲ ရိုအန်..."

ဖုန်းချလိုက်ပြီးနောက် သြဂတ်စ် က အံသွားများ ပေါ်လာသည် အထိ ရယ်မော လိုက်လေသည်။

"ကျွန်တော် တစ်ယောက်တည်း ရဲ့ လုပ်ဆောင်ချက် မဟုတ်ပါဘူး ခေါင်းဆောင်..."

ရိုအန် က ခေါင်းခါယမ်းလိုက်ပြီး လေးနက် တည်ကြည်သော မျက်နှာထား ဖြင့် ပြောလိုက်သည်။

"ဆွန်း ဖုန်းတွေ ဝယ်ခဲ့တဲ့ ကိစ္စ ကို ဝီလျံ က ရှာတွေ့ခဲ့တာပါ... မှတ်တမ်း တွေကို မိုနာ က စုံစမ်း ဖော်ထုတ် ခဲ့တာပါ... ကျွန်တော် က တစ်ဖက်လူ ဆီမှာ ဗုံး လုပ်နိုင်တဲ့ အလားအလာ ရှိတယ် ဆိုတာ လောက်ပဲ ခန့်မှန်း ပေးခဲ့တာပါ..."

"အရမ်း ကောင်းတယ်..."

ရိုအန် ၏ စကားကို ကြားလိုက်ရသောအခါ သြဂတ်စ် ၏ မျက်နှာပေါ်ရှိ အပြုံးများ က ပို၍ တောက်ပ လာတော့သည်။