အခန်း ၄

အခန်း ၄ ကြက်သီးထဖွယ် ခန့်မှန်းချက်

ကွင်းဆက်လူသတ်မှု။

ချက်ချင်းဆိုသလိုပင် ထိုနေရာတစ်ခုလုံးရှိ လေထုမှာ အေးခဲသွားတော့သည်။

လူသတ်သမားက ဤမျှအထိ ကျွမ်းကျင်နေသည်ဆိုလျှင် သူသည် ဤအမှုမတိုင်မီက စမ်းသပ်လေ့ကျင့်မှုအချို့ ပြုလုပ်ထားခဲ့သလား ဆိုသည်ကို တွေးမိသွားကြသည်။ အကယ်၍ ရှိခဲ့မည်ဆိုလျှင် နစ်နာသူ မည်မျှအထိ များပြားနေမည်ကို တွေးကာ ထိတ်လန့်သွားကြသည်။

ရဲအရာရှိအားလုံး၏ မျက်နှာပေါ်ရှိ အမူအရာများမှာ တောင့်တင်းသွားကြသည်။

အကယ်၍ တကယ်သာ ကွင်းဆက်လူသတ်မှု ဖြစ်ခဲ့မည်ဆိုလျှင် အချိန်အကန့်အသတ်ဖြင့် အမှုဖော်ထုတ်ရမည်ဆိုသည့် အမိန့်က ရာခိုင်နှုန်းပြည့် သေချာပေါက် ကျလာတော့မည်ဖြစ်ကြောင်း တွေးမိကြသည်။

"ကောင်းပြီ... အခု အစကို ပြန်သွားကြရအောင်... ခုနက တပ်ခွဲမှူးလီက ကျွန်တော့်ကို မှုခင်းဆရာဝန် လုပ်ဖို့ စိတ်ကူးရှိမရှိ မေးခဲ့တယ်..."

ရွှီရှန်းက သတင်းအချက်အလက်များကို လုံလောက်ပြီဟု ယူဆကာ ရဲအရာရှိများကို ကြည့်ပြီး စကားစလိုက်သည်။

"ခင်ဗျားရဲ့ ရည်ရွယ်ချက်က ပွင့်ပွင့်လင်းလင်း ပြောရရင် ဒီအမှုကို ဖော်ထုတ်ဖို့ပါပဲ..."

"အဲဒီအတွက် ကျွန်တော့်ကို မှုခင်းဆရာဝန်အဖြစ် ခန့်အပ်ဖို့ မလိုပါဘူး... ဒါ့အပြင် မှုခင်းစုံစမ်းထောက်လှမ်းရေးတပ်ဖွဲ့မှာရော ဓာတ်ခွဲခန်း ရှိလို့လားလို့ မေးချင်တယ်..."

မှုခင်းဆရာဝန် နည်းပါးရခြင်း၏ အကြောင်းရင်းမှာ လေ့ကျင့်ပျိုးထောင်ရန် ခက်ခဲခြင်းအပြင် ငွေကြေးခက်ခဲခြင်းနှင့်လည်း သက်ဆိုင်နေသည်။

မြို့တစ်မြို့တွင် လူပျောက်မှုများကို ထည့်မတွက်ပါက တစ်နှစ်ပတ်လုံးမှ လူသတ်မှုက ဆယ်ဂဏန်းပင် မပြည့်တတ်ပေ။ ထိုမျှလောက် အမှုအရေအတွက်လေးအတွက် သီးသန့် ဓာတ်ခွဲခန်း၊ ခွဲစိတ်ခန်းနှင့် ရေခဲတိုက်များကို တည်ဆောက်ထားရန် မလိုအပ်ဟု ဆိုရပေမည်။

ထိုသို့တည်ဆောက်ရန် ငွေမရှိခြင်းက အဓိကအကြောင်းရင်း ဖြစ်သည်။ လုံးဝကို မရှိပေ။ ဓာတ်ခွဲစမ်းသပ်ချင်ပါက မြို့တော်ရဲတပ်ဖွဲ့ဌာနချုပ်သို့သာ သွားရပြီး ထိုဌာနချုပ်ရှိ ဓာတ်ခွဲခန်းမှာလည်း အလွန်ရိုးရှင်းလှသည်။

"ရည်ရွယ်ချက်က အမှုဖော်ထုတ်ဖို့ဆိုရင် နည်းလမ်းတွေ အများကြီး ရှိပါတယ်..."

"မှုခင်းဆရာဝန် ဆိုတာက အမှုဖော်ထုတ်ဖို့ နည်းလမ်းတွေထဲက တစ်ခုတည်းပါပဲ..."

ထိုသို့ပြောပြီးနောက် ရွှီရှန်းက ခေတ္တရပ်သွားကာ အလွန်လေးနက်သော မျက်နှာဖြင့် ဆက်ပြောလိုက်သည်။

"တပ်ခွဲမှူးလီ... ကျွန်တော် မှုခင်းစုံစမ်းထောက်လှမ်းရေးတပ်ဖွဲ့ရဲ့ ယာယီ မှုခင်းစုံစမ်းထောက်လှမ်းရေး အတိုင်ပင်ခံအဖြစ် လုပ်ပေးနိုင်ပါတယ်... မှုခင်းတပ်ဖွဲ့မှာ လိုအပ်တဲ့ အကူအညီတွေကို ပေးမယ်..."

"အကယ်၍ အမှုပေါ်သွားခဲ့မယ်ဆိုရင် ကျွန်တော် လိုချင်တာက လက်တွေ့ဘဝမှာ ကျွန်တော့်ရဲ့ ဝန်ထမ်းတွေနဲ့ လူကြီးမိဘတွေကို ကိုယ်ထိလက်ရောက် စော်ကားခဲ့တဲ့ သူတွေကို... ဥပဒေနဲ့အညီ အရေးယူပေးဖို့ပါပဲ..."

လီရှန်း ကြောင်အမ်းသွားသည်။ ယခုလေးတင် ကြားခဲ့ရသော ကောက်ချက်ချမှုများ၏ တုန်လှုပ်မှုက သူ၏ ရင်ထဲတွင် မငြိမ်သက်နိုင်သေးသော်လည်း ယခုကိစ္စနှင့် ယှဉ်လိုက်ပါက သေးငယ်သွားသကဲ့သို့ ခံစားလိုက်ရသည်။

"ကောင်းပြီ... ငါ သဘောတူတယ်..."

လီရှန်းက ခေတ္တရပ်သွားပြီးနောက် ထပ်မံဖြည့်စွက်လိုက်သည်။

"အမှု မပေါ်ခဲ့ရင်တောင် ငါ အဲဒီလူတွေကို အရေးယူပေးမယ်..."

အမှန်အတိုင်း ပြောရလျှင် လူတိုင်းနီးပါး ဥပဒေကို ချိုးဖောက်ဖူးကြသည်။ သို့သော် ရဲတပ်ဖွဲ့က အသေးစိတ် လိုက်လံစုံစမ်းခြင်း မရှိ၍သာ ဖြစ်သည်။

ဥပမာအားဖြင့် ကျောင်းသားများသည် စာကို ကြိုးစားသင်ယူရမည် ဟူသော ဥပဒေတစ်ရပ် ရှိသည်။ ဤသည်မှာလည်း ဥပဒေစံနှုန်းတစ်ခုပင် ဖြစ်သော်လည်း မည်သူကမျှ အလေးအနက် မထားကြပေ။ ထိုဥပဒေကို ချိုးဖောက်ခြင်းသည် တရားမဝင်သော်လည်း ရဲတပ်ဖွဲ့က ဤကဲ့သို့သော အသေးအဖွဲ ကိစ္စများကို ဂရုမစိုက်ကြပေ။

အလားတူပင် လုယက်မှုသည် နားထောင်ရုံဖြင့် သေးငယ်သည်ဟု ထင်ရသော်လည်း အသေးစိတ် စုံစမ်းစစ်ဆေးမည်ဆိုပါက ကြီးလေးသော ပြစ်မှုတစ်ခု ဖြစ်လာနိုင်သည်။

ထို့အတူ ရွှီရှန်း မရှိခိုက် အိမ်ရှေ့တွင် ဆဲဆိုကြိမ်းမောင်းခြင်းနှင့် ဆေးသုတ်ရည်များ ပက်ခြင်းကို ရဲတပ်ဖွဲ့က အလေးအနက်ထား စုံစမ်းမည်ဆိုပါက ထိုလူများအတွက် ကြီးမားသော ပြဿနာ ဖြစ်လာနိုင်ပေသည်။

"ကျန်ဆန်းမြို့ အမှတ် ၆ မှုခင်းစုံစမ်းထောက်လှမ်းရေးတပ်ဖွဲ့ကနေ ကြိုဆိုပါတယ်..."

လီရှန်းက မျက်မှောင်ကြုတ်ကာ အလွန်လေးနက်သော မျက်နှာထားဖြင့် လက်တစ်ဖက်ကို ကမ်းပေးလိုက်သည်။

"ယာယီပါ..."

ရွှီရှန်းက ပြုံး၍ လက်ဆွဲနှုတ်ဆက်လိုက်သည်။

ရဲတပ်ဖွဲ့ဘက်မှ တစ်စုံတစ်ယောက်က သည်းမခံနိုင်တော့ဘဲ မေးလိုက်သည်။

"အတိုင်ပင်ခံရွှီ... ခုနက ခင်ဗျားပြောတဲ့ ဒီအမှုက ကွင်းဆက်လူသတ်မှု ဖြစ်နိုင်တယ်ဆိုတာ..."

"ဖြစ်နိုင်ခြေ ဘယ်လောက်ရှိသလဲလို့ သိချင်ပါတယ်..."

ဖြစ်နိုင်ခြေ မည်မျှရှိမည်ကို အားလုံး သိချင်နေကြသည်။ ထိုစကားထွက်လာသည်နှင့် ရဲအရာရှိ ဆယ်ဦးခန့်က ရွှီရှန်းကို စူးစိုက်ကြည့်လာကြသည်။ ရွှီရှန်း စကားပြောရန် ဟန်ပြင်လိုက်စဉ်မှာပင် နောက်တစ်စက္ကန့်၌ လူတိုင်း၏ နားထဲတွင် အသံတစ်သံ ထွက်ပေါ်လာခဲ့သည်။

[တပ်ခွဲမှူးလီ... တပ်ခွဲမှူးလီ... မမျှော်လင့်ထားတဲ့ အခြေအနေ ဖြစ်သွားပြီ... ဒုတိယ နစ်နာသူ တွေ့ရှိရပြီး အမှုက လူသတ်မှုကနေ ကွင်းဆက်လူသတ်မှုအဖြစ် ပြောင်းလဲသွားပါပြီ...]

[ဌာနချုပ်ကနေ အမိန့်ကျလာပါပြီ... အမှတ် ၆ မှုခင်းစုံစမ်းထောက်လှမ်းရေးတပ်ဖွဲ့ကို ရှစ်ရက်အတွင်း အမှုဖော်ထုတ်ဖို့ အချိန်အကန့်အသတ်နဲ့ အမိန့်ပေးလိုက်ပါတယ်...]

အသံက စကားပြောစက်ထဲမှ ထွက်ပေါ်လာပြီး လူတိုင်း၏ နားထဲသို့ ရောက်ရှိသွားသည်။

ချက်ချင်းဆိုသလိုပင် ထိုနေရာတစ်ခုလုံး သေမတတ် တိတ်ဆိတ်သွားပြီး ရဲအရာရှိအားလုံး နေရာမှာပင် တောင့်တင်းသွားကြသည်။

'အချိန်အကန့်အသတ်နဲ့ အမှုဖော်ထုတ်ရမယ်... ရှစ်ရက်ပဲ အချိန်ပေးတယ်လို့ ဆိုလိုတာလား...'

"ကြည့်ရတာ ဖြစ်နိုင်ခြေ ရာခိုင်နှုန်းပြည့် ဖြစ်သွားပြီ ထင်တယ်..." ရွှီရှန်းက ဖြည်းညှင်းစွာ ပြောလိုက်သည်။

သူက ခေတ္တရပ်သွားပြီး လူအားလုံးကို ကြည့်လိုက်သည်။

"စကားတွေ အများကြီး မပြောတော့ဘူး... အရင်ဆုံး စုံစမ်းစစ်ဆေးဖို့ သွားကြရအောင်..."

ရွှီရှန်း ပြောခဲ့သည့်အတိုင်းပင် ညနေ လေးနာရီခွဲအချိန်၌ လီရှန်းတို့ ရွှီရှန်းကို ရှာဖွေနေချိန်မှာပင် မှုခင်းစုံစမ်းထောက်လှမ်းရေးတပ်ဖွဲ့၏ ရုံးခန်းသို့ ဖုန်းတစ်ကော ဝင်လာခဲ့သည်။

တိုင်ကြားသူမှာ လူလတ်ပိုင်း အမျိုးသမီးတစ်ဦး ဖြစ်ပြီး အလုပ်မှ ပြန်ရောက်လာချိန်တွင် အိမ်နီးချင်း၏ အိမ်မှ ထွက်ပေါ်နေသော အလွန်အမင်း နံစော်နေသည့် အနံ့ကို ရက်ဆက်တိုက် သည်းမခံနိုင်တော့ခြင်း ဖြစ်သည်။ ထို့ကြောင့် သူမက ရပ်ကွက်ရုံးသို့ သွားရောက်ကာ တံခါးဖွင့်ခိုင်းလိုက်သောအခါ သွေးသံရဲရဲနှင့် ခေါင်းမရှိတော့ဘဲ ကြမ်းပြင်ပေါ်တွင် လဲကျနေသော အလောင်းတစ်လောင်းကို တွေ့ရှိခဲ့ရသည်။

တံခါးဖွင့်လိုက်သည်နှင့် ရပ်ကွက်ရုံးဝန်ထမ်းနှင့် တိုင်ကြားသူတို့သည် မျက်နှာကို ရိုက်ခတ်လာသော အနံ့ဆိုးကြီးကြောင့် သတိလစ်မတတ် ဖြစ်သွားခဲ့ကြသည်။ အလောင်းကို တွေ့ရှိပြီးနောက် ချက်ချင်း ရဲကို ဖုန်းဆက်တိုင်ကြားခဲ့ခြင်း ဖြစ်သည်။

"နစ်နာသူက အမျိုးသားတစ်ယောက်ဖြစ်ပြီး လျှပ်စစ်ကျွမ်းကျင်သူ တစ်ယောက်ပဲ... အသက်က နှစ်ဆယ့်လေးနှစ် လူပျိုဖြစ်ပြီး အိမ်မှာ တစ်ယောက်တည်း နေထိုင်တယ်... သေဆုံးချိန်က လွန်ခဲ့တဲ့ ငါးရက်... ၃၀ ရက်နေ့ ဝန်းကျင်လောက်ကပဲ..."

ဒုတိယ မှုခင်းဖြစ်ပွားရာနေရာတွင် ရွှီရှန်း၊ လီရှန်းနှင့် အခြားသူများသည် နှာခေါင်းစည်းများ၊ ဖိနပ်စွပ်များစသည့် ပစ္စည်းများကို တပ်ဆင်ထားပြီး အလောင်းဘေးတွင် မျက်နှာထားဆိုးဝါးစွာဖြင့် ရပ်နေကြသည်။

ဤနေရာသည် ပထမ မှုခင်းဖြစ်ပွားရာနေရာနှင့် ၁၂ ကီလိုမီတာတိတိ ဝေးကွာသည်။

နစ်နာသူမှာ အမျိုးသားတစ်ဦး ဖြစ်သော်လည်း ပထမ မှုခင်းဖြစ်ပွားရာနေရာရှိ ခေါင်းမှာမူ အမျိုးသမီးတစ်ဦး၏ ခေါင်းဖြစ်သည်။ ဤသည်မှာ ဒုတိယမြောက် နစ်နာသူ ဖြစ်ကြောင်း ထင်ရှားနေသည်။

သူ ပေါ်ထွက်လာခြင်းက ရွှီရှန်း၏ စကားကို မှန်ကန်ကြောင်း သက်သေပြလိုက်ပြီး အမှုမှာ လူသတ်မှုမှ ကွင်းဆက်လူသတ်မှုအဖြစ် ပြောင်းလဲသွားပြီ ဖြစ်သည်။

ရွှီရှန်းက ပတ်ဝန်းကျင်ကို အကဲခတ်ကြည့်လိုက်သည်။ နေရာမှာ အနည်းငယ် ရှုပ်ပွနေပြီး ရုန်းရင်းဆန်ခတ် ဖြစ်ထားသည့် သဲလွန်စများကို တွေ့ရသည်။

နစ်နာသူမှာ လည်ပင်းအထက်ပိုင်း ပြတ်တောက်သွားပြီး ခေါင်းပျောက်ဆုံးနေသည်။ လည်ပင်းမှ သွေးများစွာ စီးကျထားပြီး ယခုအခါ ခြောက်သွေ့နေပြီ ဖြစ်သည်။

မျက်စိရှေ့တွင် ယင်ကောင်များ နေရာအနှံ့ ပျံဝဲနေပြီး နှာခေါင်းစည်း တပ်ထားသော်လည်း အလောင်းနံ့ကို မတားဆီးနိုင်ပေ။ လည်ပင်းကို ဖြတ်တောက်ထားသော နေရာရှိ မြေပြင်ပေါ်တွင် လောက်ကောင်များ၏ အခွံများ စုပုံနေပြီး အဖြူရောင် လောက်ကောင်များက ဒဏ်ရာပေါ်တွင် အဆက်မပြတ် တွန့်လိမ်လှုပ်ရှားနေကြသည်။ ခန္ဓာကိုယ်ပေါ်တွင် ဒဏ်ရာများ ရှိပြီး ယေဘုယျအားဖြင့် ဟင်းသီးဟင်းရွက်လှီးဓားဖြင့် ခုတ်ထစ်ထားပုံရသည်။

ရွှီရှန်းက အလောင်း၏ အပေါ်ပိုင်းအနီးတွင် ဆောင့်ကြောင့်ထိုင်လိုက်ပြီး မှုခင်းဖြစ်ပွားရာနေရာကို ကြည့်ကာ လူသတ်မှု ဖြစ်စဉ်ကို ခေါင်းထဲတွင် ပုံဖော်ကြည့်လိုက်သည်။

"ဒါက ပထမဆုံး လူသတ်မှု မဟုတ်ဘူး..."

ရွှီရှန်းက လည်ပင်းရှိ ဖြတ်တောက်ထားသော ဒဏ်ရာကို ကြည့်ပြီးနောက် ခေါင်းခါလိုက်သည်။

"နောက်ထပ် နစ်နာသူတွေ ပေါ်လာဦးမယ်လို့ ဆိုလိုတာလား..."

လီရှန်း၏ သူငယ်အိမ်မှာ ကျုံ့ဝင်သွားပြီး တစ်ကိုယ်လုံး ဆဲဆိုချင်စိတ်များ ပေါက်လာတော့သည်။

'လက်ရှိအချိန်မှာ နစ်နာသူ နှစ်ဦး ရှိနေပြီ ဖြစ်တယ်... အကယ်၍ ဒါက ပထမဆုံး နစ်နာသူ မဟုတ်သေးဘူးဆိုရင်...'

'အနည်းဆုံး နစ်နာသူ သုံးဦး သေဆုံးပြီးပြီဆိုတဲ့ သဘော မဟုတ်ဘူးလား...'

'နစ်နာသူ သုံးဦးထက် ကျော်လွန်သွားပါက အမှုရဲ့ အဆင့်မှာ တိုက်ရိုက် မြင့်တက်သွားမှာဖြစ်ပြီး ပြည်နယ်ရဲတပ်ဖွဲ့ဌာနချုပ်က တာဝန်ယူမှာ ဖြစ်တယ်... အဲဒီအခါ ငါတို့အနေနဲ့ အမှုကို ဖော်ထုတ်နိုင်ခဲ့ရင်တောင် ကံဆိုးမိုးမှောင် ကျရပေတော့မယ်...'

လီရှန်းက စိတ်ရှုပ်ထွေးမှုကို ဖိနှိပ်ထားပြီး နစ်နာသူ၏ ပြတ်တောက်နေသော လည်ပင်းကို ကြည့်ကာ လေးနက်စွာ တွေးတောရင်း မေးလိုက်သည်။

"ခေါင်းက ဘယ်မှာလဲ..."

"ကျွန်တော် ပထမ မှုခင်းဖြစ်ပွားရာနေရာကို စုံစမ်းစစ်ဆေးခဲ့တယ်... ခွေးအလောင်းရဲ့ သေဆုံးချိန်နဲ့ နစ်နာသူရဲ့ သေဆုံးချိန်က သိပ်မကွာခြားဘူး..."

"ဒါက လူသတ်သမားဟာ လူကိုသတ်ပြီးတာနဲ့ ခေါင်းကို ချက်ချင်း သယ်သွားပြီး အပြင်ထွက် ခွေးကိုသတ်ခဲ့တယ်... ပြီးတော့ ခွေးရဲ့အလောင်းနဲ့ လူခေါင်းကို ချုပ်နှောင်ခဲ့တယ်ဆိုတဲ့ သဘောပဲ..."

"အဲဒီကြားကာလ အချိန်က အရမ်းတိုတောင်းတယ်..."

ရွှီရှန်းက မတ်တတ်ရပ်လိုက်ပြီး ယာယီထိန်းသိမ်းရေးခန်းထဲတွင် ပြန်လည်စဉ်းစားထားသမျှ သတင်းအချက်အလက်များကို အားလုံး ထုတ်ပြောလိုက်သည်။

"ဒါက သတင်းအချက်အလက် တစ်ခုကို ဖော်ပြနေတယ်..."

'သတင်းအချက်အလက်... ဘာသတင်းအချက်အလက်လဲ...'

လီရှန်း ကြောင်အမ်းသွားသည်။ သူ၏ စဉ်းစားတွေးခေါ်မှုက တစ်ဖက်လူနောက်သို့ မလိုက်နိုင်သကဲ့သို့ ခံစားလိုက်ရသည်။

"လူသတ်သမားက အရမ်းလောနေတယ်..." ရွှီရှန်းက အေးတိအေးစက် ပြောလိုက်သည်။ "သူက အရမ်းလောနေတယ်... သူ့ရဲ့ ရည်မှန်းချက်ကို ပြီးမြောက်ဖို့အတွက် အချိန်လုနေရသလိုပဲ..."

"အရမ်းလောနေတဲ့အတွက်ကြောင့် နစ်နာသူရဲ့ ခေါင်းက လူသတ်မှု ဖြစ်ပွားခဲ့တဲ့ နေရာနဲ့ သိပ်ဝေးမှာ မဟုတ်ဘူး..."

"ငါးကီလိုမီတာ ပတ်လည်အတွင်းမှာ လေလွင့်ခွေးတွေ ရှိတဲ့နေရာနဲ့ အနည်းငယ် ကွယ်ဝှက်နေတဲ့ လမ်းကြားတွေကို စုံစမ်းစစ်ဆေးကြည့်ပါ..."

အလျင်လိုနေသောကြောင့် အချိန်နည်းပါးခြင်း ဖြစ်သည်။ ရူပဗေဒတွင် အကွာအဝေး ညီမျှခြင်း အလျင် အမြှောက် အချိန် ဟူသော ပုံသေနည်း တစ်ခုရှိသည်။ မှုခင်းကိစ္စများတွင် အလျင်ဆိုသည်မှာ သယ်ယူပို့ဆောင်ရေး ယာဉ်ကို ဆိုလိုပြီး အချိန်မှာ သေဆုံးချိန် ဖြစ်ကာ အကွာအဝေးမှာ လူသတ်သမား၏ လှုပ်ရှားနိုင်သော နယ်ပယ် ဖြစ်သည်။

နစ်နာသူနှင့် ခွေး၏ သေဆုံးချိန်မှာ တစ်ချိန်တည်းလိုလို ဖြစ်နေသည်။ ဆိုလိုသည်မှာ တစ်ဖက်လူ၏ ရွေ့လျားနိုင်သော အကွာအဝေးမှာ မဝေးနိုင်ဘဲ ငါးကီလိုမီတာ ပတ်လည်အတွင်း ကန့်သတ်ထားခြင်းက ပို၍ လုံခြုံစိတ်ချရသည်။

"အချက်နှစ်ချက်ကို အစွမ်းကုန် ရှာဖွေပါ..."

"တစ်က ဒုတိယ မှုခင်းဖြစ်ပွားရာနေရာက နစ်နာသူရဲ့ ခေါင်းနဲ့ ပထမ မှုခင်းဖြစ်ပွားရာနေရာက နစ်နာသူရဲ့ အလောင်းကို ရှာပါ..."

ရွှီရှန်းက ခေတ္တမျှ စဉ်းစားပြီးနောက် ပထမဆုံး အမိန့်ကို ချမှတ်လိုက်သည်။

ပထမ မှုခင်းဖြစ်ပွားရာနေရာရှိ အလောင်းကို ရှာဖွေရန်မှာ လွယ်ကူသည်။ ဒုတိယ မှုခင်းဖြစ်ပွားရာနေရာရှိ ခေါင်းကို ရှာဖွေသည့် နည်းလမ်းအတိုင်း ပြောင်းပြန် ပြန်လည်ရှာဖွေရန်သာ ဖြစ်သည်။

"နှစ်က... တတိယ နစ်နာသူလို့ ခန့်မှန်းရတဲ့သူရဲ့ တည်နေရာကို စုံစမ်းစစ်ဆေးပါ..."

ရွှီရှန်းက ခေါင်းမရှိသော အလောင်းကို ကြည့်ကာ မျက်လုံးများ ကျဉ်းမြောင်းသွားသည်။

"ကျွန်တော် တတိယ နစ်နာသူ သေဆုံးခဲ့တဲ့ နေရာကို လိုချင်တယ်... ဒီအချက်က အရမ်းအရေးကြီးတယ်..."

ခုနကမှ အမိန့်ချမှတ်ခဲ့သော လီရှန်းမှာ ကြောင်အမ်းသွားပြီးနောက် ရွှီရှန်းကို ကြည့်လိုက်သည်။

"မင်း ဘာကို တွေးမိလို့လဲ..."

ရွှီရှန်းက ခေါင်းညိတ်လိုက်ပြီး သူ၏ရှေ့မှ ခေါင်းမရှိသော အလောင်းကို ကြည့်လိုက်သည်။

"ဒီအမှုက ကျွန်တော့်ကို အရမ်း ရင်းနှီးကျွမ်းဝင်နေတဲ့ ခံစားချက်မျိုး ပေးနေတယ်..."

'အမှုက ရင်းနှီးနေတယ်...'

လူသတ်သမားက လူကိုသတ်ပြီးနောက် နစ်နာသူ၏ ခေါင်းကို ဖြတ်တောက်လိုက်သည်။ ထို့နောက် အချိန်တိုအတွင်း အလောတကြီး ခွေးတစ်ကောင်ကို ရှာဖွေကာ ခွေး၏ခေါင်းကို ဖြတ်ပြီး နစ်နာသူ၏ ခေါင်းကို အပ်နှင့်အပ်ချည် အသုံးပြုကာ ချုပ်နှောင်လိုက်သည်။ ဤသည်မှာ ဤကွင်းဆက်လူသတ်မှုတွင် လူသတ်သမား လှုပ်ရှားရာ၌ ပြုလုပ်ခဲ့သော လုပ်ရပ်များ ဖြစ်သည်။

လီရှန်း၏ မျက်လုံးများ ပြူးကျယ်သွားပြီး မေးလိုက်သည်။

"ဘယ်လို ခံစားချက်မျိုးလဲ..."

'ငါအနေနဲ့ အလွန်ထူးချွန်တဲ့ မှုခင်းစုံစမ်းထောက်လှမ်းရေး အတိုင်ပင်ခံ တစ်ယောက်ကို ရရှိထားသလိုပဲ...'

'နေ့ခင်းဘက်က အမှုရဲ့ သဘောသဘာဝမှာ ကွင်းဆက်လူသတ်မှုအဖြစ် ပြောင်းလဲသွားမယ်ဆိုတာကို တိကျစွာ ခန့်မှန်းနိုင်ခဲ့တယ်... ဒါ့အပြင် မှုခင်းဖြစ်ပွားရာနေရာကို ရောက်လာပြီး သဲလွန်စတွေ မစုဆောင်းရသေးဘဲ မှုခင်းစုံစမ်းစစ်ဆေးမှုကိုတောင် မလုပ်ရသေးခင်မှာ အမိန့်နှစ်ခုကို ချက်ချင်း ချမှတ်နိုင်ခဲ့တယ်... ငါ တကယ်ပဲ ရတနာတစ်ခုကို ကောက်ရလိုက်တာလား...'

"တပ်ခွဲမှူးလီ... ခင်ဗျားက ဝါရင့် မှုခင်းရဲအရာရှိ တစ်ယောက်ဆိုတော့ ယုတ္တိဗေဒနဲ့ ဖော်ထုတ်လို့ရတဲ့ မည်သည့် လူသတ်မှုမှာမဆို လူသတ်သမားက လူသတ်တာဟာ ရည်ရွယ်ချက်တစ်ခုဆီကို ဦးတည်နေတယ်ဆိုတာ သိမှာပါ..."

ရွှီရှန်းက တိုက်ရိုက် မဖြေဘဲ လီရှန်းနှင့် ဟန်ယန်အပါအဝင် ရဲအရာရှိများကို လမ်းကြောင်းပေးလိုက်သည်။

လီရှန်းတို့က ခေါင်းညိတ်လိုက်ကြသည်။ အမှန်ပင် မည်သည့်အမှုမျိုးဖြစ်စေ ယုတ္တိတန်သော လူသတ်မှုဖြစ်ပါက လူသတ်သမားသည် ရည်ရွယ်ချက် တစ်ခုခုအတွက်သာ လုပ်ဆောင်ခြင်း ဖြစ်သည်။ လူသတ်ခြင်းဆိုသည်မှာ ထိုရည်ရွယ်ချက်ကို ရရှိရန်အတွက် နည်းလမ်းတစ်ခုသာ ဖြစ်သည်။ ဈေးဝယ်လျှင် ငွေပေးရသကဲ့သို့ပင် ဖြစ်သည်။

"ဒါဆိုရင် ဒီအမှုမှာ လူသတ်သမားရဲ့ ရည်ရွယ်ချက်က ရှင်းပါတယ်... သူလိုချင်တာက 'ခွေးကိုယ်လူခေါင်း' ပဲ..."

ရွှီရှန်းက ခေတ္တမျှ စဉ်းစားပြီးနောက် မှုခင်းဖြစ်ပွားရာနေရာရှိ လူခေါင်းပေါက်နေသော ခွေးအကြောင်းကို ထုတ်ပြောလိုက်သည်။

လီရှန်းက ထပ်မံ ခေါင်းညိတ်လိုက်သည်။ နစ်နာသူ၏ အိမ်တွင် ငွေကြေးဆုံးရှုံးထားသည့် သဲလွန်စ မတွေ့ရသောကြောင့် ရည်ရွယ်ချက်ထဲမှ ငွေကြေးကို ဖယ်ထုတ်နိုင်သည်။ ဒုတိယ နစ်နာသူမှာလည်း အမျိုးသားဖြစ်နေသောကြောင့် လူသတ်သမားက လိင်ပိုင်းဆိုင်ရာ အကြံအစည်ဖြင့် လူသတ်ခြင်း ဖြစ်နိုင်ခြေ မရှိပေ။

'ဒါဆို သူ့ရဲ့ ရည်ရွယ်ချက်က ဘာဖြစ်မလဲ...'

ခွေးကိုယ်လူခေါင်း ပင်ဖြစ်သည်။

"ခွေးကိုယ်လူခေါင်း ဖန်တီးတဲ့ လုပ်ငန်းစဉ်ကတော့..."

"အတိုချုပ်ပြောရရင် လူသတ်သမားက နစ်နာသူဆီကနေ ခေါင်းကို ယူလိုက်တယ်... ပြီးတော့ ခွေးတစ်ကောင်ကို ရှာပြီး သူ့ခေါင်းကို ဖြတ်ပြီး လူခေါင်းနဲ့ အစားထိုးလိုက်တာပဲ..."

ရွှီရှန်းက မျက်မှောင်ကြုတ်ကာ တွေးတောလိုက်သည်။ သူ၏ ခေါင်းထဲတွင် တစ်ချိန်က တစ်ခွင်တစ်ပြင် ပွက်လောရိုက်သွားခဲ့သော စမ်းသပ်ချက် တစ်ခုကို ပြန်လည် မြင်ယောင်လာသည်။

"တပ်ခွဲမှူးလီ... ခွေးကိုယ်လူခေါင်း ဖန်တီးတဲ့ ဒီလုပ်ငန်းစဉ်က ခွဲစိတ်ကုသမှုတွေထဲက တစ်ခုခုနဲ့ တူနေတယ်လို့ မထင်ဘူးလား..."

ရွှီရှန်းက ခေါင်းမော့ကာ လီရှန်းကို ကြည့်ပြီး ရဲအရာရှိအားလုံးကို အံ့အားသင့်သွားစေမည့် စကားတစ်ခွန်းကို လေးနက်စွာ ပြောလိုက်သည်။

"ကိုယ်တွင်းအင်္ဂါ အစားထိုးကုသမှု…”