အခန်း ၄၇၂

အခန်း (၄၇၂)

[စိတ်စွမ်းအား - ၂၄၀ → ၁၂၀] [ကိုယ်ခံစွမ်းအား - ၂၂၀ → ၁၈၀]

[ရထားတွဲ သီးသန့်စွမ်းရည် အစွန်းရောက် စွမ်းရည်မြှင့် ကတ်ပြား → ကိုယ်ပိုင်ရွေးချယ်နိုင်သော · စွမ်းရည်နှစ်မျိုး · ရထားတွဲ သီးသန့်စွမ်းရည် အစွန်းရောက် စွမ်းရည်မြှင့် ကတ်ပြား]

[မည်သည့်ရထားတွဲတွင်မဆို အသုံးပြုပြီးပါက ထိုရထားတွဲနှင့် သက်ဆိုင်သော စွမ်းရည်လက္ခဏာများစွာ အလိုအလျောက် ပေါ်ထွက်လာမည်ဖြစ်သည်။ အသုံးပြုသူအနေဖြင့် အစွန်းရောက် စွမ်းရည်မြှင့်တင်ရန်အတွက် ထိုအထဲမှ လက္ခဏာနှစ်ရပ်ကို ရွေးချယ်နိုင်မည်ဖြစ်သည်]

"စွမ်းရည်နှစ်မျိုးတဲ့လား။ ဒါဆိုရင် သိုလှောင်ခန်း ရထားတွဲကို ပေးလိုက်တာ အကောင်းဆုံးပဲ"

သူက သိုလှောင်ခန်း ရထားတွဲဆီသို့ ဝင်ရောက်သွားကာ ထိုကတ်ပြားကို တိုက်ရိုက် အသုံးပြုလိုက်လေ၏။

လက်နက်တိုက် သိုလှောင်ရုံ၏ အဓိက ရည်ရွယ်ချက်မှာ စက်ရုပ်စစ်သည်တော်များကို ပိုမို သယ်ဆောင်နိုင်ရန်သာ ဖြစ်သည်။ သိုလှောင်ခန်း ရထားတွဲရှိ သိုလှောင်ခန်းများနှင့် အတူတူပင်ဖြစ်ရာ အကယ်၍ စွမ်းရည်မြှင့်တင်မှု တစ်မျိုးတည်းသာဆိုပါက ထိုနှစ်ခုကြား ကြီးမားသော ကွာခြားချက် ရှိလာမည်မဟုတ်ပေ။

သို့သော် နှစ်မျိုး နှစ်မည်ကိုသာ အဆင့်မြှင့်တင်နိုင်မည်ဆိုပါက လုံးဝ ခြားနားသွားပေလိမ့်မည်။

"အသုံးပြုမယ်"

ကတ်ပြားလေးမှာ သိုလှောင်ခန်း ရထားတွဲ၏ နံရံပေါ်သို့ ကပ်သွားလေတော့သည်။

ရထားတွဲအတွင်းရှိ သိုလှောင်ခန်းများက တဆက်ဆက် တုန်ခါလာချေပြီ။

အလင်းမျက်နှာပြင်တစ်ခု ပေါ်ထွက်လာပြီး ထိုအပေါ်တွင် ရထားတွဲကို ကိုယ်စားပြုသော စွမ်းရည်လက္ခဏာ အမျိုးမျိုးကို ပြသထားလေ၏။

[သိုလှောင်ခြင်း] [အထူး သိုလှောင်ခန်း] [မီးခံသေတ္တာ] [စီစဉ်မှု]

လေးခုထဲမှ နှစ်ခု ရွေးချယ်ပါ။

နောက်ထပ် ရှင်းလင်းချက်များ မပါဝင်ဘဲ ခန့်မှန်းရွေးချယ်ရန်အတွက် ဤလက္ခဏာလေးခု၏ အမည်များသာ ရှိနေပေသည်။

"စီစဉ်မှု ဆိုတာကို တိုက်ရိုက် ဖယ်ထုတ်ပစ်လို့ရတယ်။ သုံးခုထဲကနေ နှစ်ခု ရွေးရမယ်ဆိုရင်... မီးခံသေတ္တာကတောင် စွမ်းရည်လက္ခဏာတစ်ခုအဖြစ် သတ်မှတ်ခံရတာလား"

အမှန်တကယ်တော့ သုံးခုထဲမှ နှစ်ခုကို ရွေးချယ်ရခြင်းမဟုတ်ဘဲ နှစ်ခုထဲမှ တစ်ခုကို ရွေးချယ်ရခြင်းသာ ဖြစ်နေ၏။

ဒုတိယမြောက် [အထူး သိုလှောင်ခန်း] ဆိုသည်မှာ အနည်းငယ်မျှပင် တုံ့ဆိုင်းနေရန် မလိုအပ်သော ရွေးချယ်မှုတစ်ခုပင်။

"လောလောဆယ် ဒီရထားတွဲမှာ သိုလှောင်ခန်း ၃၀၈ ခန်း ရှိနေပြီဆိုတော့ ယာယီအားဖြင့် လုံလောက်နေပြီပဲ"

ရဲချီယန်က ဆုံးဖြတ်ချက်ချလိုက်ပြီး [အထူး သိုလှောင်ခန်း] နှင့် [မီးခံသေတ္တာ] ဟူသော လက္ခဏာနှစ်ရပ်ပေါ်သို့ ဖိနှိပ်လိုက်လေ၏။

[ဒင်... ဒင်... ဒင်...]

ရထားတွဲကြီးမှာ သိမ့်သိမ့်တုန်ခါနေပေသည်။

အတွင်းဘက်ရှိ သိုလှောင်ခန်းများ အားလုံးမှာ ဖြူစင်သော အလင်းတန်းများဖြင့် လွှမ်းခြုံခံလိုက်ရလေတော့သည်။

[အထူးသတ်မှတ်ချက် · သိုလှောင်ခန်း ရထားတွဲ။ အစွန်းရောက် စွမ်းရည်မြှင့်တင်ခြင်း ပြီးမြောက်ပါပြီ]

[ဤရထားတွဲကို အထူးသတ်မှတ်ချက် · ဘေးကင်းလုံခြုံသော သိုလှောင်ခန်း ရထားတွဲ ဟု အမည်ပြောင်းလဲလိုက်ပါပြီ]

[အမြဲတမ်း / ပြောင်းလဲမရသော / လုံးဝ ဘေးကင်းလုံခြုံသော / ပျောက်ဆုံးနိုင်စွမ်းမရှိသော အထူး မီးခံသေတ္တာ သိုလှောင်ခန်း စုစုပေါင်း ၃၁၂ ခန်းကို ပိုင်ဆိုင်သွားပါပြီ]

[ဆင်တူသော ပစ္စည်းအမျိုးအစားများကို သိုလှောင်ခန်းများအတွင်း အကန့်အသတ်မရှိ ထပ်စီထားနိုင်ပါသည်]

[သိုလှောင်ခန်းအတွင်းရှိ ပစ္စည်းအားလုံးကို ရထားမောင်းနှင်သူ ရဲချီယန်မှ မည်သည့်နေရာတွင်မဆို ထည့်သွင်းခြင်းနှင့် ထုတ်ယူခြင်းများ ပြုလုပ်နိုင်ပါသည်]

[ဤရထားတွဲသည် အထူး ဘေးကင်းလုံခြုံသော အကာအကွယ်တစ်ခုကို ပိုင်ဆိုင်ထားပါသည်။ အကယ်၍ ပျောက်ဆုံးသွားပါကတောင် ရထားမောင်းနှင်သူ ရဲချီယန်နှင့် သူခွင့်ပြုချက်ပေးထားသူများမှလွဲ၍ အခြားမည်သူမျှ ဖွင့်လှစ်နိုင်မည်မဟုတ်ပါ]

"ဘုရားရေ... သာမန် သိုလှောင်ခန်းတွေ အားလုံးကို အထူး သိုလှောင်ခန်းတွေအဖြစ် တိုက်ရိုက် ပြောင်းလဲပစ်လိုက်တာပဲ။ ငါ ခန့်မှန်းထားတဲ့အတိုင်း ကွက်တိပါလား"

"အစွန်းရောက် စွမ်းရည်မြှင့်တင်ခြင်းလို့ ပြောတာ အံ့သြစရာတော့ မဟုတ်ပါဘူး။ တကယ်ပဲ ဒီရထားတွဲကို ကန့်သတ်ချက်အထိ အဆင့်မြှင့်တင်ပေးလိုက်တာကိုး"

"ဟက်... ငါ သုံးခဲ့ရတဲ့ ပိုက်ဆံတွေနဲ့ တန်သွားပြီ"

သိုလှောင်ခန်းများ ပြောင်းလဲသွားရုံသာမက ယခုအခါ ဤရထားတွဲ တစ်ခုလုံးမှာ မီးခံသေတ္တာတစ်ခု၏ ဂုဏ်သတ္တိများကိုပါ ပိုင်ဆိုင်သွားပြီဖြစ်သည်။

တစ်နည်းအားဖြင့်ဆိုရလျှင် ရဲချီယန်၏ ရထားတွဲများ အားလုံးထဲတွင် အခိုင်ခံ့ဆုံးဟု သတ်မှတ်ရပေမည်။

ရထားတွဲကိစ္စ ပြီးစီးသွားပြီးနောက် ရဲချီယန်က အချိန်ဖြုန်းမနေခဲ့ချေ။ လက်နက်တိုက် သိုလှောင်ရုံအတွင်းသို့ တစ်ဖန် ပြန်လည် ဝင်ရောက်သွားကာ [အဆုံးမဲ့ စက်ရုပ်စစ်သည်တော်] ၏ တပ်မှူးအဆင့်ဖြစ်သော [လန်စလော့] ထံသို့ အဆင့်မြင့် အသွင်ကူးပြောင်းထားသည့် [မဟာမိတ် · ဉာဏ်ရည်ဉာဏ်သွေး · ပုံဆောင်ခဲ နှလုံးသား] ကို တပ်ဆင်ပေးလိုက်လေ၏။

ပစ္စည်းပေါင်းစပ်ပြီးနောက် လန်စလော့ကို လေ့ကျင့်ရေး ပစ်ကွင်းအတွင်း၌ ခေတ္တမျှ စမ်းသပ်ကြည့်လိုက်သည်။

ဆိုရမည်ဆိုလျှင်...

အလွန် ကြီးမားလှ၏။

အလွန် ခန့်ညားလှပေသည်။

"အခုတော့ အားလုံး အဆင်သင့်ဖြစ်သွားပြီ"

ရဲချီယန်က ပျင်းရိပျင်းတွဲဖြင့် အကြောဆန့်လိုက်လေ၏။

ကတ်ကြေးကိုမူ စိုက်ပျိုးရေး ရထားတွဲရှိ ပန်းများနှင့် အပင်များကို ပြုစုပျိုးထောင်ရန် လီဆက်ထံသို့ တိုက်ရိုက် ပေးအပ်လိုက်သည်။

— — — —

အချိန်ကား...

[၁၃း၀၀း၀၀]

ရဲချီယန်က ထာဝရ ညဉ့်ယံ မြို့တော်သို့ သွားရောက်မည့် ဖိတ်စာကတ်ကို ထုတ်ယူလိုက်လေ၏။

ယခုတစ်ကြိမ်တွင် သူက ပျော်ရွှင်အနားယူရန် သွားရောက်ခြင်း မဟုတ်ပေ။

ထိုအစား ပြဿနာရှာရန် တမင်တကာ သွားရောက်ခြင်းဖြစ်ပြီး အခွင့်အရေးရပါက ရထားဒင်္ဂါးအချို့ ရရှိနိုင်လျှင် ပို၍ပင် ကောင်းမွန်ပေလိမ့်မည်။

ထာဝရ ညဉ့်ယံ မြို့တော်။

လူသားများကို ကြိုဆိုခြင်းမရှိသော မြို့တော်တစ်ခု။

ထိုနေရာတွင် မည်ကဲ့သို့သော ကိစ္စရပ်များ ဖြစ်ပျက်လာမည်နည်း။

ရဲချီယန်၏ ရင်ထဲတွင် မျှော်လင့်တောင့်တမှုများ ပြည့်နှက်နေပေသည်။

ဖိတ်စာကတ်လေးက ဝင်ပေါက် အလင်းမျက်နှာပြင်ကို ဖြတ်သန်းသွားလေ၏။

ထိုအပေါ်တွင် စာသားများ ပေါ်ထွက်လာသည်။

[သင်၏ သုံးဆယ့်ကိုးခုမြောက် မှတ်တိုင်အဖြစ် [ထာဝရ ညဉ့်ယံ မြို့တော်] ကို ရွေးချယ်လိုက်ပါပြီ]

[ဒင်... ဖိတ်စာကတ်တွင် တည်နေရာ အမှတ်အသားများ ပါဝင်ပါသည်။ ရပ်နားမည့် ပလက်ဖောင်းအား အတည်ပြုနေပါသည် - အမျိုးအစား ၁ သွေးသစ်သီး ကုမ္ပဏီ၏ ဖုံးကွယ်ထားသော သီးသန့်နယ်မြေ ပလက်ဖောင်း]

[ပြင်ဆင်ခြင်း — — — — ]

[သီးသန့်မော်ဂျူး · ကံကြမ္မာ လမ်းဆုံလမ်းခွကို အသက်သွင်းလိုက်ပါပြီ]

[သုံးဆယ့်ကိုးခုမြောက် မှတ်တိုင်အဖြစ် ရပ်နားရန် အောက်ပါ ပလက်ဖောင်းများထဲမှ တစ်ခုကို ရွေးချယ်ပါ]

[ပလက်ဖောင်း ၁ - အမျိုးအစား ၁ သွေးသစ်သီး ကုမ္ပဏီ သီးသန့်နယ်မြေ ပလက်ဖောင်း]

[ပလက်ဖောင်း ၂ - သွေးနတ်ဘုရား ရုံးတော် · တမန်တော် သီးသန့် ပလက်ဖောင်း]

"သွေးနတ်ဘုရား ရုံးတော် တဲ့လား... မှတ်ထားလိုက်မယ်"

"ငါ ပလက်ဖောင်း ၁ ကို ရွေးတယ်"

[ရွေးချယ်မှု ပြီးစီးပါပြီ]

[ရထားမောင်းနှင်သူ ရဲချီယန်... သင်၏ သုံးဆယ့်ကိုးခုမြောက် မှတ်တိုင်မှာ... ထာဝရ ညဉ့်ယံ မြို့တော် ဖြစ်ပါသည်]

[သင်၏ခရီးစဉ် အဆုံးအစမရှိ ရှေ့ဆက်နိုင်ပါစေ]

ဘာမျှမရှိသော လေဟာနယ်ကြီး ပေါ်ထွက်လာလေ၏။

ထိုအရာက လေထဲတွင်ရှိနေပြီး အမည်းရောင် ရထားသံလမ်းများနှင့် ချိတ်ဆက်သွားပေသည်။

ရထားဥသြဆွဲသံ ထွက်ပေါ်လာပြီး လေပြင်းများ မည်မျှပင် တိုက်ခတ်နေပါစေ ရထားမောင်းနှင်သူများ၏ နောက်ထပ်မှတ်တိုင်ဆီသို့ သွားမည့်ခရီးကိုမူ ဟန့်တားနိုင်စွမ်း မရှိချေ။

ဝှစ်...

လေဟာနယ်ကို ဖြတ်သန်းသွားပြီးနောက် ရထားကြီးက အရှိန်လျော့ကျသွားလေတော့သည်။

ပြတင်းပေါက်အပြင်ဘက်၌ လေပြင်းတိုက်ခတ်သံများ မရှိတော့ဘဲ ထိုအစား ရင်းနှီးနေသော သာမန် ရထားပလက်ဖောင်းတစ်ခုသာ ရှိနေပေ၏။

"ဒီနေရာက ဆော်လမွန် မြို့တော်က သီးသန့်နယ်မြေ ပလက်ဖောင်းနဲ့ အရမ်းတူတာပဲ"

"အမျိုးအစား ၁ သွေးသစ်သီးတဲ့လား... ဟက်... ဒီနာမည်ကို ကြည့်ရတာ သူမကလည်း နာမည်ပေးတဲ့နေရာမှာ ငါ့လိုပဲ ညံ့ဖျင်းပုံရတယ်"

သူက တံခါးဖွင့်ခလုတ်ကို နှိပ်လိုက်ပြီး ရထားပေါ်မှ ဆင်းသက်လိုက်သည်။

ဆော်လမွန် မြို့တော်ရှိ သီးသန့်နယ်မြေ ပလက်ဖောင်း၏ မှတ်ဉာဏ်များကို အသုံးချကာ ဤနေရာမှ ထွက်ခွာမည့် တံခါးပေါက်ကို သူ လျင်မြန်စွာ ရှာတွေ့သွားလေ၏။

ရဲချီယန်က ဤပလက်ဖောင်းပေါ်တွင် တည်နေရာ အမှတ်အသားတစ်ခု ချန်ထားရစ်ခဲ့သည်။

ထို့နောက် သူနှင့် လီဆက်တို့ ထိုပလက်ဖောင်းငယ်လေးပေါ်မှ လျှောက်ထွက်သွားကြလေတော့သည်။

သူတို့ အပြင်သို့ ခြေချလိုက်သည်နှင့် တစ်ပြိုင်နက် မျက်စိရှေ့တွင် မြင်လိုက်ရသည်မှာ ဇိမ်ခံ ရုံးခန်းကြီးတစ်ခုပင်။

အပြင်အဆင်မှာ ကောင်းကင်ယံဥယျာဉ်ရှိ ယီရှီ ကိုလာ ကုမ္ပဏီနှင့် ဘာမျှ ကွာခြားမှု မရှိချေ။

"ဘယ်... ဘယ်သူတွေလဲ။ မင်း... မင်းတို့နှစ်ယောက်"

သူတို့၏ ရုတ်တရက် ပေါ်ထွက်လာမှုက သူဌေးကုလားထိုင်ပေါ်တွင် ထိုင်နေသော အမျိုးသားတစ်ဦးကို လန့်ဖျပ်သွားစေခဲ့သည်။

သူ၏ ပါးစပ်ထဲမှ အစွယ်များနှင့် ဖြူဖျော့နေသော အသားအရေတို့ကို ကြည့်ခြင်းအားဖြင့် သူက လူသားတစ်ဦး မဟုတ်မှန်း သိသာလှပေ၏။

ထိုအမျိုးသားက အထိတ်တလန့် မတ်တပ်ရပ်လိုက်သော်လည်း သူတို့နှစ်ဦး ထွက်ပေါ်လာရာ နေရာကို သတိပြုမိသွားပြီးနောက် တံတွေးမြိုချလိုက်ကာ သတိကြီးစွာဖြင့် မေးမြန်းလိုက်သည်။

"ခင်ဗျားက... သခင်ကြီး အော်တိုစ်လား"

အလိုရှိ ဖမ်းဝရမ်းပေါ်ရှိ ရဲချီယန်၏ အမည်ကို သူ သိရှိနေခြင်းမှာ မွန်ရိုးဂျီနာက ဤကိစ္စမတိုင်မီ သူနှင့် ဆက်သွယ်ခဲ့ပြီး ရဲချီယန် ဤနေရာသို့ လာမည်ဖြစ်ကြောင်း ဤလူအား ပြောပြထားခဲ့သောကြောင့်ပင်။

"မင်း ငါ့ကို သိနေတာလား"

"ဟုတ်ကဲ့ပါ... သခင်မ မွန်ရိုးက လွန်ခဲ့တဲ့ အချိန်တိုလေးအတွင်းမှာ ကျွန်တော့်ကို တာဝန်တစ်ခု ပေးထားခဲ့ပါတယ်။ နောက်ရက်အနည်းငယ်အတွင်း ဟိုပလက်ဖောင်းငယ်လေးကနေ ချောမောတဲ့ လူငယ်တစ်ယောက် ထွက်ပေါ်လာရင် ဒီပစ္စည်းကို ပေးလိုက်ဖို့ ပြောထားပါတယ်"

ထိုအမျိုးသားက သူ၏ နောက်ကျောဘက်ရှိ သိုလှောင်ရေး ဘီရိုဆီသို့ ပြေးသွားပြီးနောက် အဖြူရောင် ဆလင်ဒါပုံစံ ပစ္စည်းတစ်ခုကို ဆွဲထုတ်လာလေ၏။

[ထာဝရ ညဉ့်ယံ မြို့တော် · သီးသန့်နယ်မြေ ပလက်ဖောင်း၏ သော့]

[ဤကမ္ဘာကြီးအတွင်းရှိ မည်သည့်နေရာတွင်မဆို ဤသော့နှင့် ချိတ်ဆက်ထားသော သီးသန့်နယ်မြေ ပလက်ဖောင်း တံခါးကို ဖွင့်လှစ်နိုင်ပါသည်]

[ဖွင့်လှစ်ခြင်း ရိုးရာဓလေ့ — — ရထားမောင်းနှင်သူ E-3 - 1102 ရဲချီယန်မှ လက်ခံရယူရန် လိုအပ်ပါသည်။ ရယူပြီးသည်နှင့် တစ်ပြိုင်နက် ရိုးရာဓလေ့ ပြီးမြောက်သွားပြီး ဤသော့ ပွင့်သွားမည်ဖြစ်သည်]

[လက်ရှိ အခြေအနေ - ပွင့်နေပါသည်]

"ကျေးဇူးပဲ"

ရဲချီယန်က ထိုအရာကို သိုလှောင်ခန်းအတွင်းသို့ ထည့်သွင်းလိုက်လေ၏။ သူ၏ နောက်ကျောဘက်ရှိ သီးသန့်နယ်မြေ ပလက်ဖောင်း တံခါးမှာလည်း ပျောက်ကွယ်သွားချေပြီ။ ဤသော့ကို အသုံးပြုမှသာ နောက်တစ်ကြိမ် ပြန်လည် ဖွင့်လှစ်နိုင်မည်ဖြစ်သည်။

"ကြီးမြတ်တဲ့ သခင်မ မွန်ရိုးနဲ့ သခင်ကြီး အော်တိုစ်တို့ကို အလုပ်အကျွေးပြုခွင့်ရတာ ဂျက်ဖရီရဲ့ ကြီးမားတဲ့ ဂုဏ်ယူဝမ်းမြောက်စရာပါပဲ"

"အို... ပြီးတော့ သခင်မ မွန်ရိုးက သခင်ကြီး အော်တိုစ်ကို ပြောပြခိုင်းလိုက်သေးတယ်။ အကယ်၍ သခင်ကြီးက ထာဝရ ညဉ့်ယံ မြို့တော်ထဲမှာ လှုပ်ရှားမယ်ဆိုရင် မျိုးနွယ်စုကို ဖုံးကွယ်ထားတာ အကောင်းဆုံးပဲတဲ့"