အခန်း ၄၇၃

အခန်း (၄၇၃) ထာဝရ ညဉ့်ယံ မြို့တော်၏ ဇုန်ခြောက်ခု

အမျိုးအစား ၁ သွေးသစ်သီး ကုမ္ပဏီ၏ သူဌေးဖြစ်သော ဂျက်ဖရီ။ သူက မွန်ရိုးဂျီနာ၏ လက်အောက်ငယ်သားများထဲမှ တစ်ဦးလည်း ဖြစ်ပေသည်။

သူက မူလ ရထားမောင်းနှင်သူတစ်ဦး မဟုတ်ဘဲ ရထားဒင်္ဂါးများ သုံးစွဲကာ ဌာနေလူသားဘဝမှ ပြောင်းလဲလာသူသာ ဖြစ်၏။ သူက စွန့်စားရသည်ကို မလိုလားပေ။ ရထားမောင်းနှင်သူ ဖြစ်လာရခြင်း၏ တစ်ခုတည်းသော အကြောင်းရင်းမှာ ကမ္ဘာကျော်လွန်၍ ဆက်သွယ်နိုင်သော ရထားစနစ်ကို အသုံးပြုခွင့် ရရှိရန်အတွက်သာ ဖြစ်လေသည်။

"မင်းက သွေးစုပ်ဖုတ်ကောင်လား"

"ဟုတ်ကဲ့ပါ... ကျေးဇူးပြုပြီး စိတ်ထဲမထားပါနဲ့။ အခုလို အချိန်မျိုးမှာ ထာဝရ ညဉ့်ယံ မြို့တော်ထဲ ဆက်နေချင်ရင် ကိုယ့်ရဲ့ မျိုးနွယ်စုကို ပြောင်းလဲရမှာပါပဲ။ ကျွန်တော့် ရုပ်ထွက် အရမ်း အရုပ်ဆိုးမသွားအောင်လို့တောင် ပိုက်ဆံ တော်တော်များများ သုံးခဲ့ရသေးတယ်... အဆင့်နိမ့် သွေးစုပ်ဖုတ်ကောင်တစ်ကောင် ဖြစ်သွားပေမယ့်ပေါ့လေ"

လွန်ခဲ့သော အချိန်အတန်ကြာက လူသားများကို နှင်ထုတ်ခြင်းနှင့် အမဲလိုက်ခြင်းများ ရှိခဲ့သောကြောင့် ယခုအခါ ထာဝရ ညဉ့်ယံ မြို့တော်တွင် မကောင်းဆိုးဝါးများသာ ကျန်ရှိတော့၏။ ထိုအချက်ကို ရဲချီယန်က အနည်းငယ်မျှပင် ဂရုမစိုက်ခဲ့ချေ။

ဂျက်ဖရီက သိုလှောင်ရေး ဘီရိုထဲမှ နောက်ထပ် သေတ္တာတစ်လုံးကို ထုတ်ယူလိုက်သည်။

"သခင်မ မွန်ရိုးက သခင်ကြီးအတွက် မျိုးနွယ်စုကို ဖုံးကွယ်ထားနိုင်တဲ့ ပစ္စည်းကိုလည်း ပြင်ဆင်ပေးလိုက်ပါတယ်။ စုစုပေါင်း လေးခု ပါပါတယ်။ သခင်ကြီး စစ်ဆေးကြည့်ပါဦး"

[သွေးစုပ်ဖုတ်ကောင် ×?]

[တပ်ဆင်ပြီးနောက် မိမိ၏ မျိုးနွယ်စုကို သွေးစုပ်ဖုတ်ကောင်အဖြစ် အသွင်ယူနိုင်ပြီး သွေးစုပ်ဖုတ်ကောင် ဗိုင်ကောင့်တစ်ဦး၏ ကိုယ်ရေးအချက်အလက်ကို ရရှိမည်ဖြစ်ပါသည်]

ဤပစ္စည်း ရှိနေခြင်းက ရဲချီယန်အတွက် ပြဿနာတော်တော်များများကို ဖြေရှင်းပေးနိုင်ပေသည်။ မည်သို့ပင်ဆိုစေ သူက လက်ရှိတွင် အလွန် ဆင်းရဲမွဲတေနေသည် မဟုတ်ပါလား။

"ဟို... သခင်ကြီး အော်တိုစ်... နောက်ထပ် ကိစ္စတစ်ခု ရှိပါသေးတယ်"

"ဘာများလဲ"

"ဟိုလေ... မျက်စိကျိန်းလောက်တဲ့ အလင်းရောင်ကြီးကို... နည်းနည်းလောက် ရုပ်သိမ်းပေးထားလို့ ရမလားခင်ဗျာ"

"အလင်းရောင်" ရဲချီယန်က မိမိကိုယ်ကိုယ် ပြန်လည် စစ်ဆေးကြည့်လိုက်လေ၏။ "ဘာအလင်းရောင်လဲ"

"အာ... အဲဒါက... အဲဒါက..."

"သြော်... နားလည်ပြီ"

ထိုအရာကား တရားသူကြီး၏ စွမ်းအားပင်။ ၎င်းမှာ ဤမကောင်းဆိုးဝါး မျိုးနွယ်စုများကို ချုပ်ချယ်ဟန့်တားရန် သီးသန့် ရည်ရွယ်ထားသော [တရားစီရင်ခြင်း] ၏ စွမ်းအား ဖြစ်ပေသည်။ ရဲချီယန်က လက်ကို ဝှေ့ယမ်းလိုက်ရာ သူ၏ ကိုယ်ပေါ်တွင် ရစ်သိုင်းနေသော တရားစီရင်ခြင်း စွမ်းအားများ ချက်ချင်း ပျောက်ကွယ်သွားလေတော့၏။ ဤသည်မှာ ဘုရားစူး ကတ်ပြား · V · တရားသူကြီး ကို ရရှိပြီးနောက် သူ၏ ခန္ဓာကိုယ်၌ စွဲကပ်နေသော စွမ်းအားအရိပ်အယောင်များသာ ဖြစ်လေသည်။

အကယ်၍ ဤစွမ်းအားအရိပ်အယောင်သာ ဂျက်ဖရီကဲ့သို့သော အဆင့်နိမ့် သွေးစုပ်ဖုတ်ကောင်အပေါ် အပြည့်အဝ ကျရောက်သွားပါက သူ၏ အသက်ကိုပါ နုတ်ယူသွားနိုင်ပေသည်။

"ငါ့ကို သခင်ကြီးလို့ ခေါ်နေစရာ မလိုပါဘူး။ အော်တိုစ်... ဒီနာမည်ကိုပဲ သုံးပါ"

အသွင်ယူခြင်း ပစ္စည်းကို တပ်ဆင်လိုက်ပြီးနောက် ရဲချီယန်က မှန်ထဲသို့ ကြည့်လိုက်ရာ အစွယ်တစ်စုံ၊ ချွန်ထက်နေသော နားရွက်များနှင့် ဖြူဖျော့နေသော အသားအရေတို့ကို မြင်တွေ့လိုက်ရသည်။ သူ၏ ပုံစံမှာ အထီးကျန်ဆန်ပြီး ခန့်ညားလှသော သွေးစုပ်ဖုတ်ကောင်တစ်ကောင်နှင့် လုံးဝ တူညီနေလေ၏။

"ငါ ကြည့်ကောင်းရဲ့လား"

"သခင်ကြီးက အရမ်းကို ခန့်ညားတာပဲ"

လီဆက်က သူမ၏ ကင်မရာကို ထုတ်ယူကာ ခလုတ်နှိပ်၍ ဓာတ်ပုံရိုက်လိုက်သည်။

"မင်းလည်း စမ်းကြည့်ပါလား"

ထိုပစ္စည်းကို လီဆက်ထံသို့ တပ်ဆင်ပေးလိုက်သောအခါ သွေးစုပ်ဖုတ်ကောင်၏ လက္ခဏာရပ်များ ပေါ်ထွက်လာပြီး ယခင်ကထက်ပင် ပိုမို ဆွဲဆောင်မှုရှိသော နိုင်ငံခြားဖြစ် အလှတရားတစ်ခု သူမ၏ ရုပ်ရည်သွင်ပြင်၌ တိုးလာခဲ့လေသည်။

အသွင်ယူပြီးနောက် ရဲချီယန်က သူ၏ ဝတ်စားဆင်ယင်မှုကို သွေးစုပ်ဖုတ်ကောင်များနှင့် ပိုမို နီးစပ်သွားစေရန် အသွင်ယူခြင်း မော်ဂျူးကိုလည်း အသုံးပြုလိုက်သေး၏။ လီဆက်၏ အိမ်စေမလေး ဝတ်စုံကိုမူ ပြောင်းလဲရန် မလိုအပ်ပေ။ သွေးစုပ်ဖုတ်ကောင်နှင့် အိမ်စေမလေး တွဲဖက်မှုမှာ ပြည့်စုံပြီးသား ပေါင်းစပ်မှုတစ်ခု ဖြစ်နေသောကြောင့်ပင်။

ဂျက်ဖရီထံမှတစ်ဆင့် ထာဝရ ညဉ့်ယံ မြို့တော်၏ လက်ရှိအခြေအနေများကို ရဲချီယန် သိရှိလိုက်ရသည်။ ဤမြို့တော်ကား အမည်နှင့်လိုက်ဖက်စွာပင် အမှောင်ထုထဲ၌ ထာဝရ ကျရောက်နေပေသည်။ မြို့တော်ကို ဇုန် ခြောက်ခုအဖြစ် ခွဲခြားထားလေ၏။

ပထမတစ်ခုမှာ မဟာမိတ်အဖွဲ့ ဌာနချုပ်များ ဖြစ်သည်။ အဖွဲ့ငယ်လေးများကို ဖယ်ထားလိုက်လျှင် လက်ရှိ ထာဝရ ညဉ့်ယံ မြို့တော်အတွင်း၌ ထိပ်တန်းအဆင့် ရထားမောင်းနှင်သူ အများအပြားကို ပိုင်ဆိုင်ထားသော အဖွဲ့ကြီး လေးဖွဲ့ ရှိပေသည်။ ၎င်းတို့မှာ သွေးလမင်း၊ ငရဲတံခါး၊ ဝေါရီ နှင့် ညဉ့်ယံအမှောင် တို့ပင်။

ဒုတိယတစ်ခုမှာ သွေးအိတ် ဖန်တီးရေးစခန်း ဖြစ်သည်။ ထိုနေရာတွင် ပလက်ဖောင်းကမ္ဘာ အသီးသီးမှ အဆက်မပြတ် ဖမ်းဆီးလာသော လူသား "သွေးအိတ်များ" ရှိနေ၏။ ၎င်းတို့၏ သွေးများကို ထုတ်ယူကာ သွေးစုပ်ဖုတ်ကောင်များအတွက် အစားအစာများ ဖန်တီးခြင်း၊ ထာဝရ ညဉ့်ယံ မြို့တော်၏ သွေးနတ်ဘုရားကို ယဇ်ပူဇော်ခြင်းနှင့် ထိုလူ့အသက်များကို အသုံးပြု၍ လက်နက်များ ဖန်တီးခြင်းတို့ကို ပြုလုပ်ကြလေသည်။ ဥပမာအားဖြင့်... ယခင်က ရဲချီယန် ရရှိခဲ့သော လူသားကြိတ်စက် ဟုခေါ်သည့် စက်ယန္တရား ပုံစံကြမ်းမျိုးပင်။

တတိယမြောက်မှာ ဖျော်ဖြေရေး ရပ်ကွက် ဖြစ်သည်။ ထိုနေရာတွင် နေထိုင်သူ အများစုမှာ တခြားမျိုးနွယ်စုများအဖြစ် အတင်းအကျပ် ပြောင်းလဲခံခဲ့ရသော သာမန်လူများဖြစ်ပြီး ထိုမကောင်းဆိုးဝါးများကို ဖျော်ဖြေမှု ပေးစွမ်းကာ အသက်မွေးဝမ်းကျောင်း ပြုနေကြရရှာသည်။

စတုတ္ထတစ်ခုကား စီးပွားရေး ကျွန်း ဖြစ်ပေ၏။ ဤနေရာမှာ အမျိုးအစား ၁ သွေးသစ်သီး ကုမ္ပဏီ တည်ရှိရာ နေရာဖြစ်ပြီး ထာဝရ ညဉ့်ယံ မြို့တော်ရှိ မကောင်းဆိုးဝါးများအတွက် ကုန်ပစ္စည်း အမျိုးမျိုးကို အဓိက ထုတ်လုပ်ပေးနေခြင်းဖြစ်သည်။ ထို့ပြင် သွေးသစ်သီး ဟူသည်မှာ လူသားများ၏ သောက်စရာများနှင့် ဆင်တူလေ၏။ ၎င်းကို သွေးနှင့် အခြားပါဝင်ပစ္စည်းများ ရောစပ်ကာ ဖန်တီးထားခြင်းဖြစ်ပြီး ထာဝရ ညဉ့်ယံ မြို့တော်ရှိ သွေးစုပ်ဖုတ်ကောင်များကြားတွင် ကျယ်ကျယ်ပြန့်ပြန့် ဖြန့်ဖြူးထားပေသည်။

ပဉ္စမမြောက်မှာ အထက်တန်းလွှာ လမ်းမ ဖြစ်သည်။ အမည်နှင့်လိုက်ဖက်စွာပင် ထိုနေရာမှာ မကောင်းဆိုးဝါးများထဲမှ အထက်တန်းလွှာများ နေထိုင်ရာ နယ်မြေဖြစ်၏။ ဂျက်ဖရီက သွေးသစ်သီး ကုမ္ပဏီ၏ သူဌေးတစ်ဦးအနေဖြင့် ထိုနေရာသို့ တစ်ကြိမ် ရောက်ဖူးခဲ့သည်။ ဇိမ်ခံမှု၊ ရူးသွပ်မှုနှင့် အစွန်းရောက်မှုတို့ကို အနုပညာတစ်ရပ်အဖြစ် အသုံးပြုကြသော သွေးစုပ်ဖုတ်ကောင် အထက်တန်းလွှာများကြောင့် ထိုနေရာသို့ သွားရောက်ပြီးနောက် ရက်ပေါင်းများစွာတိုင် သူ အစာမစားနိုင် ဖြစ်ခဲ့ရလေသည်။

ဆဋ္ဌမမြောက်မှာ သွေးနတ်ဘုရား မဏ္ဍပ် ဖြစ်ပေ၏။ ထာဝရ ညဉ့်ယံ မြို့တော်ရှိ သွေးစုပ်ဖုတ်ကောင်များ အားလုံးက သွေးနတ်ဘုရားကို ကိုးကွယ်ကြရသည်။ နောက်နှစ်ရက်ကြာလျှင် ဤသွေးနတ်ဘုရားအတွက် သီးသန့် ဖန်တီးထားသော သွေးအနုပညာ ပွဲတော် ကျရောက်လာတော့မည်ဖြစ်သည်။ ထိုနေ့တွင် သွေးစုပ်ဖုတ်ကောင်များ အားလုံးက ၎င်းတို့၏ ကိုယ်ပိုင်သွေး တစ်စက်ကို သွေးနတ်ဘုရားထံ ဆက်သကြရမည်ဖြစ်၏။ သွေးနတ်ဘုရား၏ တမန်တော်များ ဆင်းသက်လာသည်ကို မြင်တွေ့နိုင်မည့် နေ့တစ်နေ့လည်း ဖြစ်ပေသည်။

"ဒီကနေ နောက်နှစ်ရက်နေရင်တဲ့လား... အံ့သြစရာတော့ မဟုတ်ပါဘူး"

"သခင်ကြီး အော်တိုစ်... ဆက်ပြီး ဘာလုပ်ဖို့ အစီအစဉ်ရှိပါသလဲ။ အကူအညီ လိုအပ်တာရှိရင် ပြောပါ။ သခင်ကြီးကို ကူညီပေးလိုက်တာနဲ့ ဟိုသခင်မကို ပေးဆပ်ရမယ့် ကံကြမ္မာကြွေးကို ပြန်ဆပ်နိုင်မှာပါ... ကျွန်တော် ဆပ်လို့ ပြီးသလောက်တောင် ဖြစ်နေပါပြီ"

ပြီးသလောက် ဖြစ်နေပြီတဲ့လား... တကယ်ပဲ ဆပ်လို့ ပြီးတော့မှာလား။ မွန်ရိုးဂျီနာက ဤကုမ္ပဏီကို စွန့်ပစ်ပြီး သူမအတွက် ခိုင်မာသော သတင်းအချက်အလက်များ ထောက်ပံ့ပေးနိုင်မည့် လက်အောက်ငယ်သားတစ်ဦးကို လွှတ်ပေးလိုက်မည်တဲ့လား။ ရဲချီယန်က မွန်ရိုးဂျီနာကို အဆိုးမြင်နေခြင်း မဟုတ်သော်လည်း အကယ်၍ သူသာဆိုလျှင် ဂျက်ဖရီကို ဆက်လက် အသုံးချနိုင်မည့် နည်းလမ်းများကို ဆက်ရှာဖွေနေမည်မှာ အသေအချာပင်။

"ငါ တစ်ခုခု လိုအပ်ရင် မင်းဆီ လာခဲ့ပါ့မယ်"

"ဟုတ်ကဲ့ပါ သခင်ကြီး... သခင်ကြီးမှာ ဘာအစီအစဉ်များ ရှိပါသလဲ"

"ဘာအစီအစဉ်မှ မရှိဘူး"

"အာ..." ရဲချီယန်က ခပ်ဟဟ ရယ်မောလိုက်လေ၏။

"ငါလည်း ဒီကို ပထမဆုံးအကြိမ် လာဖူးတာလေ။ အရင်ဆုံး လိုက်ကြည့်ရဦးမယ်။ မကောင်းဆိုးဝါးတွေ နေတဲ့ မြို့တော်ဆိုတာကို တော်တော်လေး စပ်စုချင်နေတာ။ ဒါနဲ့... မင်းဆီမှာ ပိုက်ဆံရှိလား။ နောက်မှ ငါ ပြန်ဆပ်မယ်"

ဂျက်ဖရီထံမှ ရထားဒင်္ဂါး ၃၀၀၀ ကို လက်ခံရယူကာ အမျိုးအစား ၁ သွေးသစ်သီး ကုမ္ပဏီမှ ရဲချီယန် ထွက်ခွာလာချိန်တွင် လမ်းမများထက်၌ လူအုပ်ကြီးဖြင့် ပြည့်နှက်နေပေသည်။ မဟုတ်သေးပေ... မကောင်းဆိုးဝါးအုပ်ကြီးဖြင့် ပြည့်နှက်နေခြင်းသာ။

သွေးစုပ်ဖုတ်ကောင်များ၊ လူ-ဝံပုလွေများ၊ ပိုးကောင်လူသားများ၊ မာကျောသော ကျောက်ဆင်းတု မကောင်းဆိုးဝါးများနှင့် သေမင်းတမန် စုန်းများ... ဤမြို့တော်၏ နေရာတိုင်းတွင် မကောင်းဆိုးဝါး မျိုးနွယ်စု အမျိုးမျိုးကို တွေ့မြင်နိုင်ပေသည်။ ဤနေရာတွင် မည်သည့် စည်းမျဉ်းစည်းကမ်းမှ ရှိပုံမရချေ။ သို့မဟုတ် ထိုမကောင်းဆိုးဝါးများက အမိန့်များကို လုံးဝ မနာခံနိုင်ကြခြင်းလည်း ဖြစ်နိုင်ပေ၏။

အကယ်၍ အနည်းငယ်မျှ မကျေမနပ် ဖြစ်သွားပါက သူတို့က ချက်ချင်း ရန်ပွဲစတင်ကြပြီး တစ်ဖက်လူ သေဆုံးသွားသည့်တိုင်အောင် တိုက်ခိုက်ကြကာ အကြွင်းအကျန်မရှိ ဝါးမျိုစားသောက်လေ့ ရှိကြသည်။

"သခင်ကြီး... ကျွန်မတို့ ဘယ်ကို သွားကြမလဲ" လီဆက်က ရဲချီယန်၏ နားနားသို့ကပ်ကာ တိုးတိုးလေး မေးမြန်းလိုက်လေ၏။

"သွေးနတ်ဘုရား မဏ္ဍပ်ကို သွားဖို့ အလျင်လိုစရာ မရှိသေးပါဘူး။ နောက်နှစ်ရက်နေမှပဲ သွားကြတာပေါ့။ လောလောဆယ် ဖျော်ဖြေရေး ရပ်ကွက်ကို အရင် သွားကြည့်ရအောင်။ သူတို့ရဲ့ ဖျော်ဖြေမှုပုံစံက သာမန်လူတွေနဲ့ ဘယ်လို ကွာခြားသလဲဆိုတာ ငါ အရမ်း သိချင်နေပြီ"

"ဒါနဲ့ စဉ်းစားကြည့်ရရင်... ထာဝရ ညဉ့်ယံ မြို့တော်ကို ဘယ်သူတွေများ ထပ်လာဦးမလဲ မသိဘူး။ နတ်ဘုရား သတ်ဖြတ်တဲ့ ကိစ္စသာဆိုရင် အစ်မရှာယာများ လာနိုင်မလား"

သူတို့က ရေဘဝဲ မကောင်းဆိုးဝါး တက္ကစီတစ်စီးကို တားလိုက်ကြသည်။ အင်ဂျင်ခန်းတွင် တွယ်ကပ်နေသော ရေဘဝဲ မကောင်းဆိုးဝါးက ၎င်း၏ ရေဘဝဲလက်တံများကို ဆန့်တန်းကာ စွမ်းအင်အဖြစ် အသုံးပြုပြီးနောက် လမ်းကြမ်းကြမ်းဖြင့် မောင်းနှင်ကာ မြို့တော်၏ ဖျော်ဖြေရေး ရပ်ကွက်ဆီသို့ နောက်ဆုံးတွင် ဆိုက်ရောက်သွားကြလေတော့၏။

နီယွန်မီးရောင်များတဲ့လား။ လုံးဝ မရှိခဲ့ချေ။ ထိုနေရာတွင် ရှိနေသမျှကား သွေးများနှင့် ပျက်စီးဆုံးရှုံးမှုများသာ ဖြစ်ပေသည်။ လူသားများ၏ ငိုကြွေးသံများ၊ ထိတ်လန့်ကြောက်ရွံ့မှုများနှင့် ဝမ်းနည်းပူဆွေးမှုများက... လေထုထဲတွင် စုဆုံနေလေ၏။

သွေးများက ချောင်းသဖွယ် စီးဆင်းနေပြီး အလောင်းကောင်များမှာ တောင်လိုပုံနေချေပြီ။

ဤနေရာရှိ ဖျော်ဖြေရေးဟု ဆိုသော အရာများမှာ... လူသတ်ခြင်းပင်။ ထိုအရာက ညှဉ်းပန်းနှိပ်စက်ခြင်း ဖြစ်၏။ ၎င်းကား လိုအင်ဆန္ဒများကို ရူးသွပ်စွာ ပေါက်ကွဲထုတ်လွှတ်ခြင်းသာ ဖြစ်ပေတော့သည်။

"...တကယ်ကို... ရွံစရာကောင်းလိုက်တာ"