အခန်း ၄၇၅

အခန်း (၄၇၅) နတ်ဆိုး၏ လက်ဆောင်

ရဲချီယန်ကား လူဆိုးတစ်ယောက်ပင်။

အနည်းဆုံးတော့ သူကိုယ်တိုင် ထိုသို့ တွေးထင်ထားလေသည်။

သူက ပြင်ပလူများကို မည်သည့်အခါမျှ ယုံကြည်လေ့မရှိသလို မည်သူ့အတွက်မျှ ကယ်တင်ရှင်တစ်ယောက် ဖြစ်မလာချင်ခဲ့ချေ။

သို့သော် ယခုအခါတွင်မူ သူက အဘယ်ကြောင့် ဤဖျော်ဖြေရေး ရပ်ကွက်ကို ဤမျှ ပေါ်ပေါ်ထင်ထင်နှင့် တိုက်ရိုက် ဆန့်ကျင်နေရသနည်း။

အကြောင်းရင်းမှာ သူ ရွံရှာမိသောကြောင့်ပင်။

အကြောင်းရင်းက ထိုစကားလုံး တစ်ခွန်းတည်းသာ ဖြစ်ပေ၏။

"ရွံစရာကောင်းလို့"

လူတွေ သေဆုံးနိုင်သလို အသတ်လည်း ခံရနိုင်ပေသည်။

သူ၏ ကိုယ်ပိုင် ရည်မှန်းချက်များ အောင်မြင်စေရန်အတွက် အခြားသူများ၏ အသက်ကို အသုံးချရမည်ဆိုလျှင်တောင် သူ အနည်းငယ်မျှ ဂရုစိုက်မည် မဟုတ်ချေ။

မည်သူတွေ နာကျင်ခံစားနေရသလဲ သို့မဟုတ် မည်သူတွေ ဝမ်းနည်းပူဆွေးနေသလဲ ဆိုသည်ကို သူ စိတ်မဝင်စားပေ။

အကယ်၍ တစ်နေ့တွင် သူ၏ဘေးနားရှိ စက်ယန္တရားများနှင့် နတ်ဆိုးများကို အသက်ပြန်ရှင်စေရန်အတွက် ကမ္ဘာတစ်ဝန်းလုံးရှိ လူသားများ၏ အသက်နှင့် လဲလှယ်ရမည် ဆိုပါက သူ အနည်းငယ်မျှပင် တုံ့ဆိုင်းနေမည် မဟုတ်ချေ။

သို့သော် ဤနေရာ... ဤ [ဖျော်ဖြေရေး ရပ်ကွက်] ကား။

လေထုထဲတွင် ပုပ်သိုးဆွေးမြည့်နေပြီး မကောင်းဆိုးဝါး အငွေ့အသက်များ ပြည့်နှက်နေသည့် နံစော်နေသော အနံ့အသက်များနှင့် မကောင်းဆိုးဝါးများကြားတွင် နက်ရှိုင်းစွာ ရောက်ရှိနေသည်ဟူသော ခံစားချက်တို့က သူ့ကို တကယ်ပင် အန်ချင်စိတ် ပေါက်လာစေတော့သည်။

သူ ဤမျှ စောစီးစွာ ကိုယ်ထင်မပြသင့်ခဲ့ခြင်း ဖြစ်နိုင်၏။

အဘယ်ကြောင့်ဆိုသော် ဤလုပ်ရပ်က ထာဝရ ညဉ့်ယံ မြို့တော်ရှိ အခြားသော ထိပ်သီးစွမ်းအားရှင်များ၏ အာရုံစိုက်မှုကို သေချာပေါက် ဆွဲဆောင်နိုင်လိမ့်မည်ဖြစ်သောကြောင့်ပင်။

နောက်နှစ်ရက်ကြာလျှင် ကျူရှင်းထူနှင့် မွန်ရိုးဂျီနာတို့ ရှာဖွေတွေ့ရှိထားသော အင်ပါယာအမိန့်တော် အဖွဲ့အစည်းမှ အဖွဲ့ဝင်များ ဤနေရာသို့ ဝင်ရောက်လာမည်ဖြစ်ရာ သူ၏ ရင်ထဲရှိ ရွံရှာမှုကို ဖိနှိပ်ထားသင့်ပေသည်။ အလျင်စလို လုပ်ဆောင်ခြင်းက မြွေကို လန့်စေရုံသာ ရှိပေလိမ့်မည်။

ဖြစ်နိုင်တာက...

ဖြစ်နိုင်ခြေတွေ အများကြီး ရှိနေပေ၏။

ဒါပေမဲ့...

သူက ဘာလို့ သည်းခံနေရမှာလဲ။

သူ ရဲချီယန်က ကျူရှင်းထူ စီစဉ်ထားသော လှုပ်ရှားမှုများကို ပြီးမြောက်ရန် ဤနေရာသို့ လာခဲ့ခြင်း မဟုတ်ပေ။

သူ လာချင်သောကြောင့်သာ ဤနေရာသို့ ရောက်လာခဲ့ခြင်း ဖြစ်၏။

အခြားသူများ၏ အစီအစဉ်များက သူနှင့် ဘာမျှ သက်ဆိုင်ခြင်း မရှိချေ။

သူ ရဲချီယန်သည် တစ်ကိုယ်ကောင်းဆန်၏။ ကိုယ်ကျိုးရှာတတ်၏။ လောဘကြီးပြီး မာနထောင်လွှားတတ်ပေသည်။

သူ့အပေါ် ကျရောက်လာမည့် မည်သည့် အဆိုးမြင် စကားလုံးကိုမဆို သူ ဂရုမစိုက်ပေ။

သို့သော် အချက်တစ်ချက် ရှိပေ၏။

သူက လူသားတစ်ဦး ဖြစ်သည်။

မည်သည့် အခွင့်အရေးဖြင့် သူ၏ မျက်စိရှေ့မှောက်၌ သူ၏ မျိုးနွယ်တူ လူသားများကို မကောင်းဆိုးဝါးများက သတ်ဖြတ်နေသည်ကို ခွင့်ပြုပေးရမည်နည်း။

ထိုအရာက သူ့ကိုယ်သူ စော်ကားလိုက်ခြင်းပင်။

ရဲချီယန် အလွန် စိတ်အနှောင့်အယှက် ဖြစ်နေမိ၏။

ရဲချီယန်ကား နတ်ဆိုးတစ်ကောင်ပင်။

ရဲချီယန်က ဤနေရာရှိ မကောင်းဆိုးဝါးများအတွက် အလင်းရောင်များ အပြည့်အဝ ပါဝင်သော လက်ဆောင်တစ်ခုကို ပေးအပ်တော့မည် ဖြစ်လေသည်။

"မကောင်းဆိုးဝါးကြီးတစ်ကောင် ဖြစ်လာဖို့ အချိန်က နည်းနည်းလေး စောသွားပုံရတယ်။ ပွဲကြီး မစခင်မှာ မင်းတို့အားလုံးအတွက် လက်ဆောင်ငယ်လေးတစ်ခု ပေးလိုက်မယ်"

[ရှူး...]

အသံများ ပျောက်ကွယ်သွားပုံရလေ၏။

ဤသည်မှာ ရဲချီယန်က အမဲလိုက် စက်ယန္တရားနဂါး၏ အကန့်အသတ်ကျော်လွန် ထိပ်ဖူးကို အသုံးပြုလိုက်ခြင်း မဟုတ်ပေ။

ထိုအစား သူ၏ သန့်စင်သော မြေစွဲကျောက်တုံးက သီးသန့်နယ်မြေအတွင်းရှိ စိုက်ပျိုးရေး ရထားတွဲ၌ နိုးထလာသော မရဏလေးနှင့် ယခုအခါ ပဲ့တင်ထပ်နေခြင်းသာ ဖြစ်ပေ၏။

ထိုရုပ်လုံးသေးသေးလေးက သူမ၏ ကိုယ်ပိုင် မျက်နှာလေးကို ပုတ်လိုက်ပြီး ခြေထောက်သေးသေးလေးများကို လွှဲယမ်းကာ သမ်းဝေလိုက်လေသည်။

အနက်ရောင်နှင့် အနီရောင် ရောယှက်နေသော အလင်းတန်း သေးသေးလေးတစ်ခုက လေဟာနယ်ကို ဖြတ်သန်းသွားကာ သန့်စင်သော မြေစွဲကျောက်တုံးနှင့် ပေါင်းစပ်သွားတော့သည်။

"အားလုံးပဲ... မိုးလင်းပြီ"

နေ့အလင်းရောင်ကို မည်သည့်အခါမျှ မမြင်တွေ့ရသော ဤမြို့တော်၏ အထက်ကောင်းကင်ယံ၌။

[နေမင်းကြီး] တစ်စင်း ပေါ်ထွက်လာလေ၏။

သန့်စင်ခြင်းနှင့် တရားစီရင်ခြင်းကို သယ်ဆောင်ထားသော [နေမင်းကြီး] က တဖြည်းဖြည်းချင်း ထွက်ပေါ်လာချေပြီ။

ဤဖျော်ဖြေရေး ရပ်ကွက်အပေါ်သို့ ပထမဆုံး အလင်းတန်းတစ်ခု ကျရောက်လာသောအခါ။

ပထမဆုံး သွေးစုပ်ဖုတ်ကောင်က ဤအလင်းရောင်နှင့် ထိတွေ့မိသည်နှင့် တစ်ပြိုင်နက် နာကျင်စွာ အော်ဟစ်လိုက်သောအခါ။

ညဉ့်ယံ၏ ဤမကောင်းဆိုးဝါး သတ္တဝါများမှာ ဤသန့်စင်ခြင်း စွမ်းအားဖြင့် တဖြည်းဖြည်းချင်း နှိပ်စက်သတ်ဖြတ်ခံရကာ ပြာအဖြစ်သို့ ပြောင်းလဲသွားကြလေတော့သည်။

သူတို့ ထွက်ပြေးရန် စတင်ကြိုးစားကြသော်လည်း ဤအလင်းရောင် ထွန်းလင်းနေသော နေရာ၌ မည်သည့်နေရာသို့ ပြေးနိုင်မည်နည်း။

မကောင်းဆိုးဝါးများကြားတွင် သေဆုံးခြင်းများ ပြန့်နှံ့သွား၏။ ငိုကြွေးသံများ၊ အော်ဟစ်သံများနှင့် နာကျင်စွာ အော်ဟစ်သံများက လောင်ကျွမ်းနေသော သန့်စင်ခြင်း အလင်းရောင်ထဲ၌ ပဲ့တင်ထပ်သွားပေသည်။

"လူသား... မင်းက သေလမ်းကို ရှာနေတာပဲ"

အဝေးမှ ဒေါသတကြီး အော်ဟစ်သံတစ်ခု ထွက်ပေါ်လာလေ၏။

အနက်ရောင် အမြီးနှစ်ခွ ကုတ်အင်္ကျီကို ဝတ်ဆင်ထားပြီး ဖောက်ထွင်းမြင်ရသော အလင်းမျက်နှာပြင်ဖြင့် လွှမ်းခြုံထားသည့် သွေးစုပ်ဖုတ်ကောင်တစ်ကောင်က ဖျော်ဖြေရေး ရပ်ကွက်ထဲမှ ပျံသန်းထွက်ပေါ်လာသည်။

"လူသား... ထာဝရ ညဉ့်ယံ မြို့တော်မှာ ဒီလောက် ရိုင်းစိုင်းစွာ ပြုမူရဲတဲ့ မင်းရဲ့ သတ္တိကတော့ မဆိုးဘူးပဲ။ ဒီတရားစီရင်ခြင်း စွမ်းအားကို ကြည့်ရတာ မင်းက ဆော်လမွန် မြို့တော်က ဟိုပုပုရွရွ မိန်းမယုတ်ရဲ့ လူတွေထဲက တစ်ယောက် ဖြစ်ရမယ်"

တစ်နည်းအားဖြင့် ဆိုရလျှင် ဤအမြီးနှစ်ခွ ကုတ်အင်္ကျီနှင့် လူမှာ မှားယွင်းနေခြင်း မရှိချေ။

မည်သို့ပင်ဆိုစေကာမူ ရဲချီယန်က စစ်ကြောရေးခုံရုံး အဖွဲ့ဝင်တစ်ဦး၏ အဆင့်အတန်းကို အမှန်တကယ် ပိုင်ဆိုင်ထားပေသည်။

ထိုလူ၏ ခြေရင်းရှိ အရိပ်က အလင်းရောင်နှင့် ရင်ဆိုင်ပွတ်တိုက်သွားလေ၏။

ပြင်းထန်လှသော သန့်စင်ခြင်းနှင့် တရားစီရင်ခြင်း စွမ်းအားများကြောင့် ထိုလူ၏ ခန္ဓာကိုယ်မှာ အလိုအလျောက် တုန်ယင်သွားတော့သည်။

"လူသား... မင်း ဘာလုပ်ချင်သလဲဆိုတာ ငါ သိတယ်။ အောက်မှာရှိနေတဲ့ ဒီကျွန်တွေ၊ ဒီသွေးအိတ်တွေကို မင်း ကယ်တင်ချင်တာမလား... တကယ်ကို ရယ်စရာကောင်းလိုက်တာ။ မင်းတို့ကိုယ်မင်းတို့ ဖြောင့်မတ်မှန်ကန်တဲ့ တရားသူကြီးတွေလို့ သတ်မှတ်ထားကြပေမယ့် လူသားတွေက အသားစားပြီး လူမဟုတ်တဲ့ သတ္တဝါတွေကို ဖျော်ဖြေရေးအတွက် သတ်ဖြတ်နေကြတာတောင် လူသားတွေက တခြားသူရဲ့ အစားအစာ ဖြစ်သွားတာကိုတော့ မင်းတို့ ကြည့်မနေနိုင်ကြဘူးပေါ့။ လူသားတွေ အသားစားသလိုပဲ ငါတို့က လူ့သွေးကို သောက်တာလေ... ဒါက သဘာဝတရားပဲ"

[စိတ်ပိုင်းဆိုင်ရာ အခြေအနေ - အမှန်တရားနှင့် အထင်အမြင်လွဲမှားခြင်းလား]

[စိတ်စွမ်းအား တဖြည်းဖြည်း ကျဆင်းနေပါသည်...]

[အငြင်းပွားမှု၏ အသိဉာဏ် လွှမ်းမိုးမှုသည် သင့်အပေါ် သက်ရောက်မှု မရှိပါ]

ဤသွေးစုပ်ဖုတ်ကောင်က သူ၏ စိတ်နှလုံးနှင့် ဆန္ဒကို လွှမ်းမိုးရန် စကားလုံးများကို အသုံးပြုလိုနေခြင်း ဖြစ်သည်။

ထို့ကြောင့်ပင် သူက အဓိပ္ပာယ်မရှိသော စကားများကို ဤမျှ များစွာ ပြောဆိုနေခြင်း ဖြစ်ပေ၏။

ဤသည်ကို ရဲချီယန်က လှောင်ပြောင် ရယ်မောလိုက်ရုံသာ ပြုလုပ်လိုက်လေသည်။

"ဒါဆိုရင် ငါ မင်းကို သတ်တာကလည်း သဘာဝကျတာပေါ့"

"ယာ - အတုအယောင် စက်ယန္တရားမြွေငယ်... သူ့ကို သတ်လိုက်စမ်း"

သူ၏ စကားလုံးများက သက်ရောက်မှု မရှိသည်ကို မြင်လိုက်ရသောအခါ အမြီးနှစ်ခွ ကုတ်အင်္ကျီနှင့် လူက သူ၏ စွမ်းရည်ကို ချက်ချင်း ထုတ်ဖော်လိုက်တော့သည်။

မီတာ တစ်ရာကျော် ရှည်လျားသော ဧရာမ မြွေနက်ကြီးတစ်ကောင်က ထိုလူ၏ အရိပ်ထဲမှ ခုန်ထွက်လာပြီး အထပ်မြင့် အဆောက်အအုံ၏ အပြင်ဘက်တွင် လိမ်ကောက် ဝေ့ဝဲကာ သွေးလွှမ်းနေသော ၎င်း၏ ပါးစပ်ကြီးကို ဖြဲဟ၍ ရဲချီယန်ထံသို့ ထူထပ်သော အဆိပ်ငွေ့များ မှုတ်ထုတ်လိုက်လေ၏။

ပိုမိုများပြားသော သွေးစုပ်ဖုတ်ကောင် စွမ်းအားရှင်များ ဤနေရာသို့ ဦးတည်လာနေကြပြီ ဖြစ်သည်။

ဤကောင်၏ ရည်ရွယ်ချက်မှာ ရဲချီယန်ကို ဤနေရာ၌ အချိန်ဆွဲထားပြီး ထာဝရ ညဉ့်ယံ မြို့တော်မှ ထိပ်တန်းအဆင့် ရထားမောင်းနှင်သူများ ရောက်ရှိလာပါက ဝိုင်းဝန်း တိုက်ခိုက်ရန်ပင်။

ထိုအတွက်ကြောင့် သူက ဤနေရာရှိ လေဟာနယ်ကို ချိတ်ပိတ်ရန်နှင့် နေရာရွှေ့ပြောင်းနိုင်သော လွတ်မြောက်ရေး ပစ္စည်းများ အသုံးပြုခြင်းကို ကန့်သတ်ရန် အရိပ်များကိုပင် အသုံးပြုခဲ့သေး၏။

"နည်းနည်းတော့ နှမြောစရာ ကောင်းပေမယ့်လည်း..."

လွင့်မျောကြယ် သန့်စင်သော အမှတ်အသားက အဆိပ်ငွေ့များ အားလုံးကို တားဆီးပေးထားလေသည်။

လီဆက်က လက်နက်တပ်ဆင်မှု နေရာလွတ်အတွင်းသို့ ဝင်ရောက်သွားပြီး ရဲချီယန်က အမဲလိုက် စက်ယန္တရားနဂါး၏ ဦးချိုများကို ညင်သာစွာ ပွတ်သပ်ပေးလိုက်၏။

အမဲလိုက် စက်ယန္တရားနဂါးက နားလည်သဘောပေါက်သွားကာ ၎င်း၏ ပါးစပ်ကြီးကို ဖွင့်ဟလိုက်ပြီး ပြောင်းပြန် ကြက်ခြေခတ် သင်္ကေတ ရေးထိုးထားသော အကန့်အသတ်ကျော်လွန် ထိပ်ဖူးက ပါးစပ်ထဲမှ တဖြည်းဖြည်း ထွက်ပေါ်လာတော့သည်။

ရဲချီယန်က လက်ကို သေနတ်ပုံစံ ပြုလုပ်လိုက်ရာ အလင်းမျက်နှာပြင်တစ်ခု ပေါ်ထွက်လာလေ၏။

သူက အောက်ဘက်သို့ ချိန်ရွယ်လိုက်သည်။

ဧရာမ အဆိပ်မြွေကြီးကို ပစ်မှတ်ထားလိုက်၏။

"အကန့်အသတ်ကျော်လွန် ထိပ်ဖူး"

"ပစ်"

အလင်းရောင်၊ အမှောင်ထု၊ အသံများ၊ အရာအားလုံး...

မည်သူမျှ ဘာကိုမျှ မမြင်တွေ့ရတော့သလို မကြားရတော့ချေ။

ဝီ...

တိုးညင်းသော တုန်ခါသံလေးက တဖြည်းဖြည်း ပိုမို ကျယ်လောင်လာသောအခါ။

လူများ၏ အမြင်အာရုံနှင့် အကြားအာရုံများ ပြန်လည် ရရှိလာသောအခါ။

အရာအားလုံးကို စုပ်ယူသွားသော [တွင်းနက်ကြီး] က အတုအယောင် စက်ယန္တရားမြွေငယ် ဟု သိကြသည့် ထိုသတ္တဝါကို အလယ်မှနေ၍ ပေါက်ကွဲသွားစေသောအခါတွင်ဝယ်

နားကန်းလုမတတ် ဆူညံနေသော အဆုံးစွန် ဟိန်းဟောက်သံကြီးကို ဤထာဝရ ညဉ့်ယံ မြို့တော်ရှိ လူတိုင်း ကြားလိုက်ရလေတော့သည်။

ခလွမ်း...

အမြီးနှစ်ခွ ကုတ်အင်္ကျီနှင့် လူ၏ ဖြူဖျော့နေပြီဖြစ်သော မျက်နှာမှာ ယခုအခါ ပို၍ပင် ဆိုးရွားနေချေပြီ။

သူက ပျောက်ဆုံးသွားသော သူ၏ ခန္ဓာကိုယ် အောက်ပိုင်းကို ကြည့်လိုက်ပြီးနောက် လုံးဝ တိတ်ဆိတ်ငြိမ်သက်သွားပြီဖြစ်သော ယာ - အတုအယောင် စက်ယန္တရားမြွေငယ်ကို ကြည့်လိုက်လေ၏။

မြေပြင်ပေါ်တွင် နက်ရှိုင်းသော တွင်းကြီးတစ်ခု ပေါ်ထွက်လာသည်။

"လူသား... ဒါက မင်းရဲ့ ကယ်တင်ခြင်းလား။ ဒီသေသွားတဲ့လူတွေက ဒီထက်ပိုပြီး အသက်ရှင်နိုင်သေးတယ်... ဒါပေမဲ့ မင်းရဲ့ လုပ်ရပ်တွေကြောင့် သူတို့ စောစောစီးစီး သေသွားကြပြီ"

ဤကောင်က ရှေ့သို့ ထပ်မံ ထွက်လာရန် မဝံ့ရဲတော့ချေ။ အကယ်၍ အကန့်အသတ်ကျော်လွန် ထိပ်ဖူး ပေါ်ထွက်လာသည့် အခိုက်အတန့်တွင် ထွက်ပြေးရန် ခွင့်ပြုပေးခဲ့သော သူ၏ ထိပ်တန်းအဆင့် ရထားမောင်းနှင်သူ တစ်ယောက်၏ တိုက်ပွဲအတွေ့အကြုံသာ မရှိခဲ့ပါက သူ၏ ကံကြမ္မာမှာလည်း နက်ရှိုင်းသော တွင်းကြီးထဲတွင် ပျောက်ကွယ်သွားသော သေဆုံးသူများနှင့် ခြားနားမည် မဟုတ်ပေ။

ထို့ကြောင့် သူက ရဲချီယန်ကို စကားလုံးများဖြင့် ထပ်မံ လွှမ်းမိုးရန် ကြိုးစားလိုက်ခြင်း ဖြစ်၏။

ကံမကောင်းစွာဖြင့် ၎င်းမှာ သက်ရောက်မှု မရှိခဲ့ချေ။

အမဲလိုက် စက်ယန္တရားနဂါးက လက်နက်တပ်ဆင်မှု နေရာလွတ်အတွင်းသို့ ဝင်ရောက်သွားလေသည်။

ကောင်းကင်ယံ၌ ရဲချီယန် တစ်ယောက်တည်းသာ ပျံသန်းနေပေ၏။

ခန္ဓာကိုယ် တစ်ဝက်သာ ကျန်ရှိတော့သော ဤကောင်အား အသိဉာဏ်ကင်းမဲ့သော အရူးတစ်ယောက်ကို ကြည့်သကဲ့သို့ သူ ကြည့်လိုက်သည်။

"ငါ ကျေနပ်နေသရွေ့ တခြားလူတွေ ဘာတွေးနေသလဲဆိုတာကို ငါက ဘာလို့ ဂရုစိုက်ရမှာလဲ။ ဒါ့အပြင်..."

"ငါက အကြမ်းဖက် အဖွဲ့အစည်းတစ်ခုက နတ်ဆိုးတစ်ကောင်ပဲ... လူသားတွေကို ကယ်တင်မယ့် ကယ်တင်ရှင် မဟုတ်ဘူး"

[နေရာရွှေ့ပြောင်းအမှတ်အသား]

"မင်းက အရမ်းတုံးအနေတော့ နောက်ထပ် ရက်အနည်းငယ်လောက် ဆက်အသက်ရှင်လိုက်ဦး"

"ဒါဆိုရင်..."

"နှုတ်ဆက်ပါတယ်"

သူ၏ ခန္ဓာကိုယ်က နောက်ဘက်သို့ တိမ်းယိမ်းသွားပြီး အောက်ခြေမရှိသော ချောက်နက်ကြီးထဲသို့ ကျဆင်းသွားလေတော့သည်။

[စတင်ရွှေ့ပြောင်းမယ် —]