အခန်း ၄၇၆

အခန်း (၄၇၆)

"သူ ဘယ်မှာလဲ"

ရဲချီယန် ပျောက်ကွယ်သွားပြီး များမကြာမီမှာပင် နေရာအနှံ့မှ ရောက်ရှိလာကြသော ထာဝရ ညဉ့်ယံ မြို့တော်၏ ထိပ်သီးစွမ်းအားရှင်များက မယုံကြည်နိုင်သော မျက်နှာပေးနှင့် ခန္ဓာကိုယ်တစ်ဝက်သာ ကျန်ရှိတော့သော အမြီးနှစ်ခွ ကုတ်အင်္ကျီနှင့် လူကို ကြည့်လိုက်ကြလေ၏။

"ချားလ်စ်... မင်းမှာ လေဟာနယ်ကို ချိတ်ပိတ်နိုင်တဲ့ အရိပ်နယ်ပယ် ရှိနေတယ် မဟုတ်ဘူးလား။ ဘာဖြစ်လို့ တစ်ယောက်ယောက်ကို ဒီတိုင်း ထွက်ပြေးခွင့်ပြုလိုက်ရတာလဲ။ ဒါ့အပြင် မင်းက ဘယ်လိုလုပ်ပြီး ဒီလောက် သနားစရာကောင်းတဲ့ အခြေအနေမျိုးကို ရောက်သွားရတာလဲ"

အမြီးနှစ်ခွ ကုတ်အင်္ကျီနှင့် သွေးစုပ်ဖုတ်ကောင် ဖြစ်သော ချားလ်စ်က ပျောက်ဆုံးသွားသည့် သူ၏ ခန္ဓာကိုယ် အောက်ပိုင်းကို ပိုမို ကြီးမားသော ထိတ်လန့်ကြောက်ရွံ့မှုများဖြင့် ငုံ့ကြည့်လိုက်သည်။

"ဘယ်လိုလုပ် ဖြစ်နိုင်မှာလဲ။ ငါ... ငါ တကယ်ပဲ ပြန်လည်ကောင်းမွန်လာအောင် မလုပ်နိုင်တော့ဘူးလား။ ကျီးစားမယ့်ကောင်... ဒါက ဘယ်လိုလုပ် ဖြစ်နိုင်မှာလဲ။ အဲဒီလူသားက ဘယ်လိုလုပ်ပြီး ဒါကို လုပ်နိုင်ခဲ့တာလဲ။ ငါက အရိပ်နယ်ပယ်ကို ရှင်းရှင်းလင်းလင်းကြီး သုံးထားခဲ့တာကို"

သူက ရူးသွပ်ပြိုလဲလုမတတ် ဖြစ်နေချေပြီ။

သွေးစုပ်ဖုတ်ကောင်များက သူတို့၏ နှလုံးသား ရှိနေသရွေ့ အသက်ရှင်နိုင်ပေသည်။

သို့သော် ခန္ဓာကိုယ် အောက်ပိုင်းကို ဆုံးရှုံးသွားပြီး ပြန်လည်ရယူနိုင်စွမ်း မရှိခြင်းကား ယောက်ျားတစ်ယောက်အတွက် သေရသည်ထက်ပင် ပို၍ နာကျင်ရပေ၏။

"ကျီးစားမယ့်ကောင်... ကျီးစားမယ့်ကောင်... သေနာကောင်။ ငါ့ရဲ့ ခန္ဓာကိုယ်... ငါ့ရဲ့ ပြန်လည်မွေးဖွားနိုင်စွမ်း။ အဲဒီလူသား... အဲဒီလူသားက တကယ်တော့ ဘယ်သူလဲ"

"အင်ပါယာအမိန့်တော် အဖွဲ့အစည်းက နတ်ဆိုး စက်ယန္တရား နဂါးလူသား... အော်တိုစ်ပဲ"

သူတို့က စကားပြောလာသူရှိရာ အရပ်ဆီသို့ အကြည့်များ ပို့လွှတ်လိုက်ကြလေ၏။

အလိုရှိ ဖမ်းဝရမ်း တစ်စောင်ကို ထုတ်ပြလာသည်။

"အမှားအယွင်း မရှိနိုင်ဘူး။ စက်ယန္တရား နဂါးရယ်၊ တွင်းနက်ကြီးရဲ့ တိုက်ခိုက်မှုရယ်၊ ပြီးတော့ သူ့ဘေးနားမှာ အမြဲတမ်း လိုက်ပါနေတဲ့ မိန်းမတစ်ယောက်လည်း ရှိတယ်။ ဒါ့အပြင်... အဲဒီလူရဲ့ ခန္ဓာကိုယ်က အငြိုးအတေးတွေနဲ့ ပြည့်နှက်နေတာ... နတ်ဆိုးတစ်ကောင်ရဲ့ အငြိုးအတေးပဲ။ နတ်ဆိုးကို... သူက ထိန်းချုပ်ထားတာ"

"အင်ပါယာအမိန့်တော် အဖွဲ့အစည်း တဲ့လား။ သူတို့ရဲ့ ခေါင်းဆောင် ဖြစ်တဲ့ ဟိုကျူရှင်းထူက တစ်ခုခုကို ရှာဖွေတွေ့ရှိသွားပြီး ငါတို့ကို ဖျက်ဆီးဖို့ တစ်ယောက်ယောက်ကို ဒီနေရာဆီ စေလွှတ်လိုက်တာများလား"

"ဖြစ်နိုင်ခြေ အရမ်းများတယ်။ ဒါက အင်ပါယာအမိန့်တော် အဖွဲ့အစည်းရဲ့ ခေါင်းဆောင်က ထာဝရ ညဉ့်ယံ မြို့တော်အပေါ် စစ်ကြေညာလိုက်တာ သေချာတယ်။ ငါတို့ဘက်က ပြန်ပြီး တန်ပြန်တိုက်ခိုက်ရမယ်"

"သန်ဘက်ခါက သွေးနတ်ဘုရားဆီ အနှစ်သာရ သွေးတွေ ဆက်သရမယ့်နေ့ပဲ။ ငါတို့ဆီမှာ ဘာမတော်တဆမှုမှ ထပ်ပြီး အဖြစ်ခံလို့ မရတော့ဘူး။ အစစ်အမှန် ဘိုးဘေးနဲ့ သွေးနတ်ဘုရားတို့ အခု လက်ရှိ လုပ်ဆောင်နေတဲ့ အစီအစဉ်ကို မမေ့ကြနဲ့။ ထာဝရ ညဉ့်ယံ မြို့တော်ရဲ့ လုံခြုံရေးကို ငါတို့ ထိန်းသိမ်းထားရမယ်"

မကောင်းဆိုးဝါးများက သူတို့အချင်းချင်း ဆူညံပွက်လောရိုက်စွာ ဆွေးနွေးလိုက်ကြလေ၏။

ထိုအချိန်တွင် ဤအရာအားလုံး၏ နောက်ကွယ်မှ တရားခံကမူ ရွှေ့ပြောင်းခြင်း ကို အဆုံးသတ်လိုက်ချေပြီ။

"သန့်စင်သော မြေစွဲကျောက်တုံးရဲ့ အဆင့်က နောက်ဆုံးမှာတော့ နည်းနည်းလေး နိမ့်နေတုန်းပဲ။ တရားစီရင်ခြင်း စွမ်းအားနဲ့ ထပ်တူကျသွားတဲ့တိုင်အောင် အဆင့်မြင့် သွေးစုပ်ဖုတ်ကောင် တစ်ကောင်ကို တိုက်ရိုက် မသတ်ဖြတ်နိုင်ဘူးဖြစ်နေတယ်"

"အလားအလာက... နည်းနည်းလေး လိုအပ်နေသေးတာပဲ"

ရဲချီယန်က သန့်စင်သော မြေစွဲကျောက်တုံးကို မရဏလေး ဘေးနားသို့ ပြန်လည် ချထားပေးလိုက်လေ၏။

ပန်းဝတ်ဆံအတွင်းရှိ ပုံရိပ်သေးသေးလေးက သမ်းဝေလိုက်ပြီး လွင့်မျောလာကာ ရဲချီယန်၏ ပခုံးပေါ်သို့ ဝင်ထိုင်လိုက်သည်။

မရဏလေးက သူ၏ ပါးပြင်ကို ချစ်စနိုးဖြင့် ပွတ်သီးပွတ်သပ် လုပ်လိုက်ပြီး သူမ၏ လက်ချောင်းသေးသေးလေးကို ဆန့်ထုတ်ကာ သန့်စင်သော မြေစွဲကျောက်တုံးဆီသို့ ညွှန်ပြလိုက်ပေ၏။

"ဒင်... ဒင်"

"မင်း ပြောချင်တာက... မကြာခင်မှာ အဲဒါ ထပ်ပြီး အားကောင်းလာနိုင်မယ်လို့ ဆိုလိုတာလား"

"လင်... လင်"

"ဒါဆိုရင် မင်းကိုပဲ အပ်လိုက်တော့မယ်"

ရဲချီယန်က မရဏလေး၏ မျက်နှာသေးသေးလေးကို ပွတ်သပ်ပေးလိုက်ပြီးနောက် ပန်းဝတ်ဆံအတွင်းသို့ ပြန်လည် ထည့်ပေးလိုက်လေ၏။

သူက ရထားပေါ်မှ တစ်ဖန် ပြန်လည် ထွက်ခွာလာခဲ့သည်။

ထို့နောက် လီဆက်နှင့် အမဲလိုက် စက်ယန္တရားနဂါး နှစ်ခုလုံးကို လက်နက်တပ်ဆင်မှု နေရာလွတ်ထဲမှ ထုတ်လွှတ်လိုက်ပေ၏။

"နောက်ထပ် နှစ်ရက်"

သူက သော့တစ်ချောင်းဖြင့် တံခါးကို ဖွင့်လှစ်လိုက်ပြီးနောက် အမျိုးအစား ၁ သွေးသစ်သီး ကုမ္ပဏီ၏ သူဌေးရုံးခန်းအတွင်းသို့ နောက်တစ်ကြိမ် လျှောက်လှမ်း ဝင်ရောက်သွားလေတော့၏။

"သောက်ကျိုးနည်း... ဘယ်... ဘယ်သူလဲဗျာ"

ဂျက်ဖရီမှာ လန့်ဖျပ်သွားခဲ့သည်။

သူ၏ စားပွဲပေါ်တွင် တင်ထားသော ခေါက်ဆွဲပြုတ်ပန်းကန်မှာ မှောက်ကျလုမတတ် ဖြစ်သွားချေပြီ။

"ကျွန်တော့်ကို သေမလောက် လန့်သွားစေတာပဲ။ အို... သခင်ကြီး အော်တိုစ် ပါလား။ ဘာလို့ ဒီလောက် မြန်နေရတာလဲ... အာ... ခုနက အပြင်ဘက်က အလင်းရောင်ကများ..."

သူက အလွန် ပါးနပ်ပြီး ဤထူးဆန်းသော ဖြစ်ရပ်အပေါ် ချက်ချင်း တုံ့ပြန်နိုင်ခဲ့လေ၏။

"ဂျက်ဖရီ... မင်းမှာ ကိုယ်ပိုင် ရထားရှိတယ် မဟုတ်လား"

ဂျက်ဖရီက လျင်မြန်စွာ ခေါင်းညိတ်ပြလိုက်သည်။

"အသုံးပြုချင်လို့လားခင်ဗျာ။ ကျွန်တော် ချက်ချင်းပဲ..."

"အသုံးပြုရမယ့်သူက မင်းပဲ"

ရဲချီယန်က ဆိုဖာပေါ်တွင် ထိုင်လိုက်ပြီး လီဆက်က ရထားပေါ်၌ တိုက်ဆိုင်စွာ ဖျော်စပ်ပေးခဲ့သော ကိုကိုးပူပူ တစ်ခွက်ကို ယူကာ မှုတ်သောက်လိုက်လေ၏။

"ငါ မင်းကို အကြံတစ်ခု ပေးမယ်။ ဒီမြို့တော်ကနေ စောစောစီးစီး ထွက်သွားလိုက်ပါ"

ဂျက်ဖရီက ခေါင်းငုံ့သွားသည်။

"ကျွန်တော်... ကျွန်တော် ထွက်သွားလို့ မရဘူး..."

"အကြောင်းရင်းက ဘာလဲ"

"ကျွန်တော် လူသားတစ်ယောက်အဖြစ် ပြန်ပြောင်းချင်လို့ပါ။ သခင်မ မွန်ရိုးက ဒီကိစ္စ ပြီးသွားရင် ကျွန်တော့်ကို လူသားအဖြစ် ပြန်ပြောင်းပေးမယ်လို့ ပြောထားတယ်..."

မျိုးနွယ်စု တစ်ကြိမ် ပြောင်းလဲပြီးပါက မိမိ၏ မူလ မျိုးနွယ်စုသို့ ပြန်လည် ပြောင်းလဲ၍ မရနိုင်တော့ချေ။

ဤအချက်ကို အမျိုးမျိုးသော မျိုးနွယ်စု ပြောင်းလဲရေး ပစ္စည်းများ၏ ရှင်းလင်းချက်များတွင် ရေးသားဖော်ပြထားပြီး ဖြစ်သည်။

သို့သော် အရာအားလုံးတွင် ချွင်းချက်ဆိုသည်မှာ ရှိစမြဲပင်။ မဖြစ်နိုင်ဟု ဆိုထားသော်လည်း မွန်ရိုးဂျီနာ၏ ယဇ်ပူဇော်ခြင်း ကတ်ပြား အတွင်း၌ တစ်စုံတစ်ယောက်ကို သူတို့၏ မူလ မျိုးနွယ်စုသို့ ပြန်လည် ရောက်ရှိစေနိုင်သော ပစ္စည်းတစ်ခုခု သို့မဟုတ် စွမ်းအားတစ်ခုခု ရှိနေနိုင်သည်သာ ဖြစ်ပေ၏။

ရဲချီယန်က သူ့ကို ထပ်မံ ဖျောင်းဖျရန် မကြိုးစားတော့ဘဲ ဂျက်ဖရီ၏ စားပွဲပေါ်ရှိ ခေါက်ဆွဲပြုတ်ကို တစ်ချက် လှမ်းကြည့်လိုက်သည်။

"မင်း ဒါကို စားတာလား"

အနည်းဆုံးတော့ သူက ကုမ္ပဏီတစ်ခု၏ သူဌေးကြီးတစ်ဦး ဖြစ်သည်။ ရုပ်သေးရုပ် သူဌေးတစ်ဦးသာ ဖြစ်လင့်ကစား ခေါက်ဆွဲပြုတ် စားရမည့် အခြေအနေအထိ ရောက်ရှိမနေသင့်ပေ။

ဂျက်ဖရီက ရှက်ရွံ့စွာ ပြုံးပြလိုက်လေ၏။

"သွေးစုပ်ဖုတ်ကောင်တွေက ချက်ပြုတ်ထားတဲ့ အစားအစာတွေကို စားလို့မရဘူးလေ။ သာမန် လူသားတွေရဲ့ အစားအစာတွေကို ပါးစပ်ထဲ ထည့်လိုက်ရင် အန်ထွက်လာမှာပဲ။ ကျွန်တော်က... အနံ့လေး ရှူရုံပဲ တတ်နိုင်တာပါ..."

နောက်ထပ် နှစ်ရက်တာ ကာလတစ်လျှောက်လုံးတွင် ရဲချီယန် အနည်းငယ်မျှပင် အားမနေခဲ့ချေ။

[နတ်ဆိုး ကတ်ပြား · မာနတရား] နှင့် [နတ်ဆိုး ကတ်ပြား · ဖြားယောင်းသွေးဆောင်ခြင်း] တို့ကို အားကိုးကာ သူ နေ့စဉ် ပြုလုပ်ခဲ့သည့် အရာမှာ ယာဉ်မောင်းမပါသော မကောင်းဆိုးဝါး တက္ကစီတစ်စီးကို ငှားရမ်းပြီး သူ တစ်စိတ်တစ်ပိုင်း ဖျက်ဆီးထားခဲ့သော ဖျော်ဖြေရေး ရပ်ကွက်ဆီသို့ ဦးတည်သွားရောက်ခြင်းပင် ဖြစ်လေ၏။

အမဲလိုက် စက်ယန္တရားနဂါး ကို အသုံးပြု၍ အကန့်အသတ်ကျော်လွန် ထိပ်ဖူး တစ်ခုကို ပစ်ချစေကာ ထာဝရ ညဉ့်ယံ မြို့တော်မှ လိုက်လံ ဖမ်းဆီးနေကြသော စွမ်းအားရှင်များ၏ အကူအညီမဲ့နေသော ဒေါသတကြီး အော်ဟစ်သံများကြားတွင် နေရာရွှေ့ပြောင်းအမှတ်အသား ၏ ရွှေ့ပြောင်းခြင်း စွမ်းရည်ကို အသုံးပြု၍ တိုက်ရိုက် ဆုတ်ခွာသွားလေ့ ရှိပေသည်။

သူ၏ လက်ရှိ စိတ်စွမ်းအားဖြင့်ဆိုပါက ကိုယ်ခံစွမ်းအားကို အသုံးပြုရန် မလိုအပ်ဘဲ အကန့်အသတ်ကျော်လွန် ထိပ်ဖူး၏ သုံးစွဲမှုကို တစ်စက္ကန့်ကြာအောင် ထိန်းသိမ်းထားနိုင်ပြီး သူ၏ အစွမ်းထက်သော ပြန်လည်ပြည့်ဖြိုးမှု အရှိန်နှင့်လည်း ပေါင်းစပ်ထားနိုင်ပေ၏။

တစ်နေ့လျှင် နှစ်ချက် ပစ်ခတ်ရခြင်းမှာ အထူးတလည် ပြောစရာပင် မလိုတော့ချေ။

ထိုစွမ်းအားရှင်များက နည်းလမ်းပေါင်းစပ်များစွာကို စဉ်းစားထားပုံရလေသည်။ လေဟာနယ်ကို ကန့်သတ်ခြင်း၊ ခံစစ်များ တည်ဆောက်ခြင်း၊ ဖျော်ဖြေရေး ရပ်ကွက်ကို ချိတ်ပိတ်ခြင်းနှင့် ဝင်ပေါက်များကို ကိုယ်တိုင်ကိုယ်ကျ ပိတ်ဆို့ထားခြင်းများအထိ ပြုလုပ်ခဲ့ကြ၏။

သို့သော်... အလွန် စိတ်ဝင်စားစရာကောင်းသော အချက်တစ်ခုကား။

ရဲချီယန်က ခန္ဓာကိုယ် တစ်ဝက် ဆုံးရှုံးသွားသော ချားလ်စ် အမည်ရှိ ထိုသွေးစုပ်ဖုတ်ကောင်အပေါ်တွင် တရားမျှတမှု အမှတ်အသား တစ်ခုကို ချန်ထားရစ်ခဲ့ခြင်းပင်။

တရားမျှတမှု အမှတ်အသားမှတစ်ဆင့် သူက ထိုကောင်များ ရှိနေသည့် နေရာများကို အပြည့်အဝနှင့် တိကျစွာ ရှာဖွေနိုင်ခဲ့လေသည်။

ရှောင်ရှားခြင်းဖြစ်စေ၊ ရှာဖွေခြင်းဖြစ်စေ ဤမကောင်းဆိုးဝါးများက သူတို့၏ လုပ်ရပ်တိုင်းကို [နတ်ဆိုး စက်ယန္တရား နဂါးလူသား] က ကြိုတင် ခန့်မှန်းထားသကဲ့သို့ အဘယ်ကြောင့် ဖြစ်နေရသနည်းဆိုသည်ကို လုံးဝ နားမလည်နိုင်အောင် ဖြစ်နေကြရပေသည်။

နောက်ဆုံးတွင်တော့။

တတိယမြောက်နေ့ ရောက်ရှိလာခဲ့ပြီ။

သွေးအနုပညာ ပွဲတော်။

ဒိုင်း...

"မင်းတို့အားလုံးက အသုံးမကျတဲ့ အကောင်တွေပဲ။ မင်းတို့ တစ်အုပ်စုလုံးက ထာဝရ ညဉ့်ယံ မြို့တော်ထဲမှာ လူသားတစ်ယောက်ကိုတောင် မဖမ်းနိုင်ဘူးလား"

"လူ-ဝံပုလွေတွေရဲ့ နှာခေါင်းတွေက ကျိုးကုန်ပြီလား။ ဒါမှမဟုတ် သွေးစုပ်ဖုတ်ကောင်တွေရဲ့ အာရုံခံနိုင်စွမ်းတွေက ပျောက်ကွယ်သွားပြီလား"

သွေးစုပ်ဖုတ်ကောင် မင်းသား၊ အဲလ်ဖရက်ဒ်။

သူက ခေါင်းငုံ့ကာ ဘာမှမပြောဘဲ တစ်ဖက်တစ်ချက်စီတွင် ထိုင်နေကြသော ထိပ်တန်းအဆင့် ရထားမောင်းနှင်သူ အုပ်စုကို မေးခွန်းထုတ်လိုက်ပြီးနောက် နောက်ဆုံးတွင် သူ၏ အကြည့်များက ခန္ဓာကိုယ် တစ်ဝက်သာ ကျန်ရှိတော့သည့် ချားလ်စ်အပေါ်သို့ ကျရောက်သွားလေ၏။

ချားလ်စ်က သွေးစုပ်ဖုတ်ကောင် မင်းသား၏ ဒေါသတကြီး အကြည့်ကို ခံစားလိုက်ရပြီး အံတင်းတင်းကြိတ်ကာ ရှင်းပြရန် စကားဆိုလိုက်သည်။

"မင်းသား... အဲဒီလူသားက အင်ပါယာအမိန့်တော် အဖွဲ့အစည်းက နတ်ဆိုး စက်ယန္တရား နဂါးလူသားပါ။ မှတ်တမ်းတွေအရ သူက [နတ်ဆိုး ကတ်ပြား · မာနတရား] လို့ အမည်ရတဲ့ ကတ်ပြား အစီအစဉ် တစ်ခုကို ပိုင်ဆိုင်ထားပြီး သူ့ရဲ့ တည်နေရာကို အတည်ပြုနိုင်ဖို့ ကျွန်တော်တို့ဆီမှာ ဘာနည်းလမ်းမှ မရှိပါဘူး"

"ဒါ့အပြင် အော်တိုစ်လို့ ခေါ်တဲ့ ဒီလူသားက ဘယ်လိုနည်းလမ်းကို အသုံးပြုခဲ့သလဲဆိုတာ ကျွန်တော် မသိပေမယ့် သူက လေဟာနယ် ချိတ်ပိတ်ထားမှုကို လျစ်လျူရှုပြီး တည်နေရာ ရွှေ့ပြောင်းထွက်ပြေးသွားနိုင်စွမ်း ရှိနေပါတယ်"

"ကျွန်တော်တို့က ပစ္စည်းပေါင်းများစွာကို အသုံးပြုခဲ့သလို မော်ဂျူး အချို့ ဒါမှမဟုတ် စနစ် ခွင့်ပြုချက်တွေကိုတောင် အသုံးပြုခဲ့ပေမယ့် သူ့ရဲ့ ဒီစွမ်းရည်ကို မဖြေရှင်းနိုင်ခဲ့ပါဘူး... ဒါကြောင့်မို့..."

"ဒါကြောင့် မင်းတို့က ထာဝရ ညဉ့်ယံ မြို့တော်ထဲမှာ နေမင်းကြီးကို တစ်ကြိမ်ပြီးတစ်ကြိမ် ပေါ်လာအောင် ခွင့်ပြုပေးခဲ့တယ်ပေါ့လေ။ အသုံးမကျတဲ့ အမှိုက်ကောင်တွေ"

အဲလ်ဖရက်ဒ် ဒေါသထွက်သွားချေပြီ။

သူက လှည့်ကာ ကြမ်းပြင်မှ မျက်နှာကြက်အထိ ရှည်လျားသော ပြတင်းပေါက်ဆီသို့ လျှောက်သွားလိုက်ပြီး အပြင်ဘက်ရှိ ကြက်သွေးရောင်များကို ငေးကြည့်နေလိုက်၏။

"ကတ်ပြား အစီအစဉ်တွေကို ကိုင်တွယ်ဖြေရှင်းမယ့် နည်းလမ်းတွေနဲ့ မြို့တော်ထဲက ထိပ်သီးစွမ်းအားရှင် အများစုကို ကာစတိန်း က ခေါ်ဆောင်သွားခဲ့ပေမယ့် အခု ထာဝရ ညဉ့်ယံ မြို့တော်မှာ ငါတို့ပဲ ကျန်တော့တယ်"

"ဒါပေမဲ့ ဒီနေ့က သွေးအနုပညာ ပွဲတော်ပဲ။ ဘာပဲဖြစ်ဖြစ် အဲဒီလူသားကို ထပ်ပြီး ဖျက်ဆီးခွင့်ပြုလို့ မဖြစ်ဘူး"

"မင်းတို့ ဘယ်လို နည်းလမ်းတွေ သုံးသုံး ငါ ဂရုမစိုက်ဘူး။ သွေးနတ်ဘုရား မဏ္ဍပ်... အဲဒီနေရာမှာတော့ လုံးဝ အမှားအယွင်း အဖြစ်ခံလို့ မရဘူး"