အခန်း ၄၇၉

အခန်း (၄၇၉)

လူသားများနှင့် သွေးစုပ်ဖုတ်ကောင်များကြားရှိ စစ်ပွဲကြီး စတင်သွားချေပြီ။

ဆော်လမွန် မြို့တော်အတွင်း၌ အင်ပါယာအမိန့်တော် အဖွဲ့အစည်းမှ အဖွဲ့ဝင်များသာ ရှိနေခဲ့ခြင်း မဟုတ်ပေ။

စစ်ကြောရေးခုံရုံး... ပိုမို တိကျစွာ ဆိုရလျှင် ယခင် စစ်ကြောရေးခုံရုံးမှ ပြန်လည် ရောက်ရှိလာနိုင်သော စစ်ကြောရေးမှူး အားလုံးက အဆင့်မြင့် ဘူတာရုံကမ္ဘာများရှိ သူတို့၏ တိုးတက်မှုများကိုပင် စွန့်လွှတ်ကာ ချက်ချင်း ထွက်ခွာနိုင်ရန် ရထားဒင်္ဂါး အမြောက်အမြားကို သုံးစွဲခဲ့ကြလေ၏။

အဆက်အသွယ် လုံးဝ မရရှိသူများနှင့် ရောက်မလာနိုင်သူများကို ဖယ်ထုတ်လိုက်ပါက စုစုပေါင်း စစ်ကြောရေးမှူး ၁၀၇၂ ဦးတို့မှာ ဤစတုတ္ထမြောက် အလွှာ၌ စုရုံးနေကြပြီ ဖြစ်ပေသည်။

သူတို့၏ တရားသူကြီးချုပ် ကျောက်ရှီးက သူမ၏ ရထားထက်၌ မတ်တပ်ရပ်နေ၏။ သူမ၏ သေးသွယ်သော ခန္ဓာကိုယ်လေးမှာ ကြီးမြတ်သော အရှိန်အဝါများဖြင့် ပြည့်နှက်နေပြီး စစ်ကြောရေးမှူး အားလုံးက သူမ၏ အမိန့်ကို စောင့်ဆိုင်းနေကြလေတော့သည်။

"သတ်"

ထိုအသံလေးမှာ တည်ငြိမ်နေသော်လည်း စွမ်းအားများ အပြည့်အဝ ပါဝင်နေပေ၏။

ထိုစကားတစ်ခွန်းတည်းသော အမိန့်သံ ကျဆင်းသွားသည့် အခိုက်အတန့်၌ ကျောက်ရှီး၏ ခန္ဓာကိုယ် သေးသေးလေးထဲမှ ပြင်းထန်လှသော တရားစီရင်ခြင်း စွမ်းအားများ အဆက်မပြတ် ရိုက်ခတ် ထွက်ပေါ်လာလေတော့သည်။

သူမ၏ ဆံပင်များက ငွေဖြူရောင်အဖြစ် ပြောင်းလဲသွားပြီး မိုးကြိုးလျှပ်စီးများက သူမပတ်လည်၌ တဖြောင်းဖြောင်း မြည်ဟည်းနေချေပြီ။

ရှည်လျားသော လှံတစ်လက်က သူမ၏ နောက်ကျောဘက်၌ လွင့်မျောနေပေသည်။

သူမက ကောင်းကင်ယံသို့ မြင့်မားစွာ ခုန်တက်သွားပြီး သူမနောက်မှ စစ်ကြောရေးမှူး များစွာကလည်း နေရာအနှံ့၌ ပြန့်ကျဲနေသော အစွမ်းထက် သွေးစုပ်ဖုတ်ကောင်များထံသို့ ပြေးဝင်သွားကြလေ၏။

စစ်ကြောရေးမှူး ၁၀၇၂ ဦးထဲတွင် ခုနစ်ဆယ့်တစ်ဦးမှာ ရထားအဆင့် ၄၅ အထက်ရှိသော ထိပ်တန်းအဆင့် ရထားမောင်းနှင်သူများ ဖြစ်ကြပေသည်။

ရထားအဆင့် ၃၀ အထက်ရှိသူများမှာ ၁၀၀၁ ဦး ရှိလေ၏။

ဆော်လမွန် မြို့တော်၏ စတုတ္ထမြောက် အလွှာ။

ဤနေရာတွင် ကျန်ရစ်နေသော ရထားမောင်းနှင်သူများနှင့် ဌာနေလူသားများ အားလုံးက ဤစစ်ပွဲကြီး ရှိနေမှန်း သိရှိထားကြပြီး အချို့မှာ ကိုယ်တိုင်ကိုယ်ကျပင် ပါဝင်ဆင်နွှဲနေကြချေပြီ။

တတိယမြောက် အလွှာရှိ များပြားလှသော မဟာမိတ်အဖွဲ့များထဲတွင် အလွန် နည်းပါးသော အရေအတွက်ကသာ ထွက်ခွာရန် ရွေးချယ်ခဲ့ကြသည်။

ဒုတိယမြောက် အလွှာရှိ ရထားမောင်းနှင်သူများ အားလုံးလည်း နောက်ချန်နေရစ်ခဲ့ကြပေ၏။

ပထမမြောက် အလွှာတွင် နေထိုင်ကြသော သာမန်လူများပင်လျှင် သူတို့ တတ်စွမ်းသမျှ အစွမ်းကုန် ကြိုးစားနေကြသည်။ အပေါ်ဆုံး အလွှာသုံးခုရှိ စစ်ပွဲအတွက် အရေးမပါနိုင်သော ခဲယမ်းမီးကျောက်များကို ဖြစ်စေ၊ ရထားမောင်းနှင်သူ တစ်ယောက်က ပေါ့ပေါ့ပါးပါး ဖန်တီးနိုင်သော အစိတ်အပိုင်းများကို ဖြစ်စေ သယ်ယူပို့ဆောင်ပေးနေကြလေ၏။

သို့မဟုတ်... သူတို့က စက်ရုပ်များကို မောင်းနှင်ကာ သာမန်လူများအနေဖြင့် ရက်စက်ကြမ်းကြုတ်ပြီး ကြာရှည်မည့် ဤစစ်ပွဲကြီးထဲသို့ ဝင်ရောက်လာကြခြင်းလည်း ဖြစ်နိုင်ပေသည်။

ကျောက်လင်က ဒုတိယမြောက် အလွှာတွင် ရှိနေပေသည်။

သူမ၏ ခန္ဓာကိုယ်လေးမှာ တုန်ယင်နေ၏။ သူမ ကြောက်ရွံ့ပြီး စိတ်လှုပ်ရှားနေသော်လည်း နေရစ်ရန်သာ ရွေးချယ်ခဲ့သည်။

"ကံကောင်းတယ်... ကံကောင်းတယ်။ အင်း... ပြဿနာမရှိဘူး။ ဒီနေ့က လုံးဝကို ကံကောင်းမယ့်နေ့ပဲ။ အင်း... အရမ်း... အရမ်းကို ကံကောင်းမယ့်နေ့"

ယနေ့တွင် သူမ အလွန်အမင်း ကံကောင်းနေခဲ့ပေ၏။

"မင်း ကြောက်နေတာလား"

ကျောက်လင်၏ ဘေးနားမှ အမျိုးသမီး တစ်ဦး၏ အသံ ထွက်ပေါ်လာလေသည်။

ထိုအမျိုးသမီးက ရင်ဖုံးအင်္ကျီကို ဝတ်ဆင်ထားပြီး တိုတောင်း၍ သပ်ရပ်သော ဆံပင်ရှိကာ ကိုလာသောက်ရင်း အာလူးကြော်ကို စားနေပေ၏။ သူမ၏ နောက်ကျောဘက်တွင် မတူညီသော ပုံသဏ္ဌာန်ရှိသည့် ကတ်ပြား အစီအစဉ် ဆယ်ခု ရှိနေလေသည်။

"အစ်မယွမ်ရှန်း... ညီမ... ညီမ မကြောက်ပါဘူး"

ရာသီခွင် ကတ်ပြားများကို ပိုင်ဆိုင်ထားသော ဝူယွမ်ရှန်း။ အင်ပါယာအမိန့်တော် အဖွဲ့အစည်း၏ အဖွဲ့ဝင် တစ်ဦးပင်။

သူမက ကျောက်လင်၏ ပခုံးကို ပုတ်လိုက်ပြီး အားရပါးရ ရယ်မောလိုက်လေ၏။

"မင်း မကြောက်သရွေ့တော့ စိတ်မပူပါနဲ့။ အစ်မကြီးက မင်းကို ကာကွယ်ပေးမယ်လို့ ပြောထားတယ်လေ။ ကဲ... ငါ အရင်တက်သွားတော့မယ်။ ဂရုစိုက်ဦးနော်"

သူမ၏ ဦးခေါင်းထက်၌ နဂါးဂျိုတစ်စုံ ပေါ်ထွက်လာပြီး တိမ်တိုက်များက သူမပတ်လည်၌ ဝေ့ဝဲသွားကာ သွေးစုပ်ဖုတ်ကောင်များထံသို့ ပြေးဝင်သွားလေတော့သည်။

"ဟူး... ဟူး..."

ကျောက်လင်က ကောင်းကင်ယံသို့ မော့ကြည့်လိုက်ပြီး အသက်ပြင်းပြင်း ရှူလိုက်ပေ၏။

ဆော်လမွန် မြို့တော်၏ အလယ်ဗဟို ဓာတ်လှေကားမှစ၍ မြို့အပြင်ဘက်နှင့် အရပ်မျက်နှာ အသီးသီးမှ သွေးစုပ်ဖုတ်ကောင်များက အဆုံးအစမရှိသော မကောင်းဆိုးဝါး လှိုင်းတံပိုးကြီးများကို ဦးဆောင်ကာ ရောက်ရှိလာကြချေပြီ။

"စီနီယာတွေ အများကြီး ရှိနေတယ်။ လူတွေလည်း အများကြီးပဲဆိုတော့ ငါတို့ သေချာပေါက် နိုင်မှာပါ။ ဟုတ်တယ်... သေချာပေါက်ကို နိုင်မှာ"

"အစ်ကိုချီယန်ဘက်မှာရော အခြေအနေ ဘယ်လိုနေမလဲ မသိဘူး"

"အဲဒီမှာလည်း... အရမ်း အန္တရာယ်များလောက်တယ်"

— — — —

ထာဝရ ညဉ့်ယံ မြို့တော်၊ သွေးနတ်ဘုရား မဏ္ဍပ်။

ဘုန်း...

ကောင်းကင်ယံမှ ကျယ်လောင်သော အသံကြီး ထွက်ပေါ်လာလေ၏။

သွေးနတ်ဘုရား မဏ္ဍပ်၏ အထက်တွင် တစ္ဆေဝိညာဉ် ကတ်ပြား ခြောက်ကတ်ကို သယ်ဆောင်ထားသော အာချွမ်းက သွေးစုပ်ဖုတ်ကောင် ကျွမ်းကျင်သူ နှစ်ဦးနှင့် အသေအလဲ တိုက်ခိုက်နေပေသည်။

"စီနီယာ လင်းယို့... ခင်ဗျား ဝင်မကူတော့ဘူးလား"

"မကူနိုင်ပါဘူး... မကူနိုင်ပါဘူး။ ငတုံး အာချွမ်းရဲ့... ဒါက နဂါးဥ ကိုယ်ပွားလေးပဲလို့ ငါ ပြောထားတယ် မဟုတ်လား။ အသေခံဗုံးခွဲဖို့ သက်သက် ဖန်တီးထားတာ။ ပြီးတော့ မင်းက အသွင်ပြောင်းလိုက်တာနဲ့ လုံးဝ တခြားလူတစ်ယောက်လို ဖြစ်သွားပြီး လူကြီးသူမကိုတောင် ရိုသေလေးစားမှု မရှိတော့ဘူး"

အာချွမ်း၏ ပခုံးထက်တွင် လက်ရှိ ဆော်လမွန် မြို့တော်၌ ရှိနေသော လင်းယို့နှင့် တစ်ပုံစံတည်း တူညီသည့် ရုပ်သေးသေးလေး တစ်ခု ရှိနေလေ၏။

"အသုံးမကျတဲ့ စီနီယာ လင်းယို့... ခင်ဗျားကို မလိုဘူး။ ကျွန်တော့်ဘာသာ ကျွန်တော် သတ်မယ်"

အာချွမ်း၏ မျက်နှာပေါ်တွင် စိတ်လှုပ်ရှားမှုများနှင့် ရူးသွပ်မှုများ အပြည့်အဝ ရှိနေပေသည်။

ထိတ်လန့်ဖွယ်ကောင်းသော တစ္ဆေဝိညာဉ် အရှိန်အဝါက အမှောင်ထုထဲတွင် နေထိုင်ကြသော ဤသွေးစုပ်ဖုတ်ကောင်များကိုပင် အေးစက်တုန်လှုပ်သွားစေ၏။

"ကျီးစားမယ့် အင်ပါယာအမိန့်တော် အဖွဲ့အစည်း။ မုန်းစရာကောင်းတဲ့ လူသားတွေ။ ဒီလိုအချိန်မျိုးမှာ ထာဝရ ညဉ့်ယံ မြို့တော်ကို ခိုးကြောင်ခိုးဝှက် လာတိုက်ခိုက်ရဲတယ်ပေါ့လေ"

အစွမ်းထက် မကောင်းဆိုးဝါးများက ဤဘက်သို့ စုရုံးလာကြပြီး အာချွမ်းကို ဝိုင်းရံပိတ်ဆို့လိုက်ကြတော့သည်။

"ကောင်လေး... အရမ်း စိတ်မလောစမ်းပါနဲ့။ ငါတို့ရဲ့ အစီအစဉ်က သွေးနတ်ဘုရားရဲ့ နှလုံးသားကို ဖောက်ခွဲဖို့ ငါ့ရဲ့ ဒီကိုယ်ပွားကို အသုံးပြုရမှာလေ"

"အဲဒီကောင်မှာ စုစုပေါင်း နှလုံးသား သုံးခု ရှိတယ်။ တစ်ခုက သူ့ခန္ဓာကိုယ်ထဲမှာ၊ တစ်ခုက ဒီမှာ၊ တတိယတစ်ခုကို ဘယ်မှာ ဝှက်ထားလဲဆိုတာ ငါတို့ မသိဘူး။ နှလုံးသား အားလုံးကို မဖျက်ဆီးနိုင်ဘူးဆိုရင် ဆော်လမွန် မြို့တော်က စစ်ပွဲလည်း ပြီးဆုံးမှာ မဟုတ်ဘူး"

လင်းယို့၏ ရုပ်သေးသေးလေးက အာချွမ်း၏ ပခုံးကို ကိုင်ကာ ရှေ့နောက် လှုပ်ယမ်းလိုက်သော်လည်း အသွင်ပြောင်းထားသော အာချွမ်းက ထိုအရုပ်လေးကို အိတ်ကပ်ထဲသို့ တိုက်ရိုက် ထိုးထည့်ကာ ဇစ်ဆွဲပိတ်လိုက်လေတော့၏။

"ပါးစပ်ပိတ်ထား... ခင်ဗျား အရမ်း ဆူညံလွန်းတယ်"

သူက စိတ်လှုပ်ရှားနေသည်။ သူက ရူးသွပ်နေသည်။ သူက တိုက်ပွဲကို ပျော်မွေ့နေခဲ့ပေ၏။

အာချွမ်းက ကျယ်လောင်စွာ ဟိန်းဟောက်လိုက်ရာ ဝိညာဉ် နေရာလွတ်ထဲမှ တစ္ဆေဝိညာဉ် အမြောက်အမြား ပျံသန်းထွက်ပေါ်လာပြီး အပြင်ဘက်ရှိ သာမန် သွေးစုပ်ဖုတ်ကောင်များ အားလုံးကို တားဆီးကာ သတ်ဖြတ်လိုက်ကြလေသည်။

"ဒီအသုံးမကျတဲ့ အကောင်တွေကို ဖယ်ရှားလိုက်စမ်း"

အစီအစဉ်နဲ့ ပတ်သက်ပြီးတော့... အရင်ဆုံး တိုက်ပွဲကို အဆုံးသတ်လိုက်ကြတာပေါ့။

"ကျွတ် ကျွတ် ကျွတ်... ဒီကောင်လေးက အားကိုးလို့ မရဘူးဆိုတာ ငါ သိသားပဲ"

သွေးနတ်ဘုရား မဏ္ဍပ်၏ အထက်ဆုံးနေရာ၌ ဇိမ်ခံအိတ်တစ်လုံးကို သယ်ဆောင်ထားပြီး ချစ်စရာကောင်းသော အသုံးအဆောင် အမျိုးမျိုးကို ဆင်မြန်းကာ ကျောင်းသူဝတ်စုံကို ဝတ်ဆင်ထားသော မိန်းကလေး တစ်ဦးက အကြောဆန့်လိုက်လေ၏။ လက်သည်းဆိုးထားသော သူမ၏ လက်ချောင်းများက သူမ၏ ခေါက်ဖုန်းပေါ်တွင် အဆက်မပြတ် နှိပ်နေပေသည်။

"ဟူး... ဒီနေ့ ငါ့ရဲ့ ဘလော့ဂ်ကို အပ်ဒိတ်မလုပ်ရသေးဘူး။ တကယ်ပါပဲ... ဒီကိစ္စ ပြီးသွားရင် ဆော်လမွန် မြို့တော်ကို သွားပြီး ကူညီပေးရဦးမယ်ဆိုတော့ နေ့စဉ် အကြောင်းအရာတွေကို တင်ဖို့ အချိန်တောင် ပိုနည်းသွားဦးမယ်။ ဒီက တိုက်ပွဲ ရုပ်သံမှတ်တမ်းတွေကိုပဲ တိုက်ရိုက် တင်လိုက်ရင် ကောင်းမလား"

"ဒီမှာ လူသားတစ်ယောက် ရှိတယ်... သူ့ကို ဖမ်းစမ်း"

တစ်စုံတစ်ယောက်က သူမ ရှိနေသည်ကို ရှာဖွေတွေ့ရှိသွားခဲ့လေပြီ။

အင်ပါယာအမိန့်တော် အဖွဲ့အစည်း၏ အဖွဲ့ဝင် တစ်ဦးလည်းဖြစ်သော စတေစီယာပင်။

အာချွမ်းကဲ့သို့ပင် သူမက မွန်ရိုးဂျီနာ၏ နှလုံးသား ဖောက်ခွဲရေး အစီအစဉ်ကို ပြီးမြောက်ရန် ဤနေရာသို့ ရောက်ရှိနေခြင်း ဖြစ်သော်လည်း သူ့လိုမဟုတ်ဘဲ သွေးနတ်ဘုရား ဖုံးကွယ်ထားသော တတိယမြောက် နှလုံးသားကို သူမ ရှာဖွေရန် လိုအပ်နေပေသည်။

"အရမ်း တုံးအတာပဲ။ အခုမှပဲ ငါ့ကို သတိထားမိကြတော့တယ်"

စတေစီယာက သူမ၏ အိတ်ကို ဖွင့်လိုက်လေ၏။

ထိုအထဲမှ မတူညီသော အရောင်များရှိသည့် ကတ်ပြား အစီအစဉ် ခုနစ်ခု ပျံသန်းထွက်ပေါ်လာသည်။

[ဒြပ်စင် ကတ်ပြားများ]

ဤအရာများက သူမ ပိုင်ဆိုင်ထားသော ကတ်ပြား အစီအစဉ်များပင်။

စတေစီယာက တိုးညင်းစွာ ရေရွတ်လိုက်ရာ သူမ လက်ထဲရှိ ဖုန်းလေးက ပန်းရောင်နှင့် အဖြူရောင် မှော်တုတ်တံတစ်ခုအဖြစ် တိုက်ရိုက် ပြောင်းလဲသွားလေတော့၏။

"လေ... မီး"

သူမက တိုးတိုးလေး ရွတ်ဆိုလိုက်ရာ ကတ်ပြား အစီအစဉ်ထဲမှ လေနှင့် မီးတို့က အနည်းငယ် တလက်လက် တောက်ပသွားသည်။

"ထလော့"

ဧရာမ မီးလေဆင်နှာမောင်း အများအပြားက လေဟာနယ်ထဲမှ ရုတ်တရက် ပေါ်ထွက်လာပြီး စုရုံးရောက်ရှိလာသော မကောင်းဆိုးဝါးများကို လွှမ်းခြုံကာ မီးသွေးခဲများအဖြစ် လောင်ကျွမ်းပစ်လိုက်လေတော့၏။

"မှော်မိန်းကလေး စတေစီယာက လူသားတွေအတွက် နတ်ဆိုး သွေးစုပ်ဖုတ်ကောင်တွေကို ချေမှုန်းပေးလိုက်ပါပြီ။ ဟီးဟီး... ဒီနေ့တော့ ငါ့ရဲ့ ဘလော့ဂ်ကို ဒါလေးနဲ့ပဲ အပ်ဒိတ်လုပ်လိုက်တော့မယ်"

အပြင်ဘက်မှ ဆူညံပွက်လောရိုက်မှုများက သွေးနတ်ဘုရား မဏ္ဍပ်အတွင်းရှိ သွေးစုပ်ဖုတ်ကောင် အများအပြား၏ အာရုံကိုလည်း ဖမ်းစားသွားခဲ့လေ၏။

ထိပ်တန်းအဆင့် သွေးစုပ်ဖုတ်ကောင် အများစုကို ဆော်လမွန် မြို့တော်သို့ စစ်ပွဲဆင်နွှဲရန် ခေါ်ဆောင်သွားခဲ့သောကြောင့် ထာဝရ ညဉ့်ယံ မြို့တော်၏ ကိုယ်ပိုင်ခံစစ်တပ်တွင် အစွမ်းအထက်ဆုံးဟု ဆိုနိုင်သူမှာ ထိုသွေးစုပ်ဖုတ်ကောင် မင်းသား တစ်ပါးတည်းသာ ကျန်ရှိတော့ပေသည်။

ပြီးတော့ သွေးအနုပညာ ပွဲတော် စတင်ပြီးနောက် ဘာအမှားအယွင်းမှ မဖြစ်စေရန် နှလုံးသားအနီး၌ သူ ဆက်လက် နေထိုင်ရဦးမည် ဖြစ်သည်။

ကျန်ရှိနေသူများထဲတွင် တိုက်ခိုက်ရေးစွမ်းရည်အရ အစွမ်းအထက်ဆုံး ဖြစ်သင့်သော သွေးစုပ်ဖုတ်ကောင်မှာ ရဲချီယန်ကြောင့် ခန္ဓာကိုယ် တစ်ဝက်သာ ကျန်ရှိတော့ပေ၏။

ထို့ကြောင့် စတေစီယာနှင့် အာချွမ်းတို့၏ တိုက်ခိုက်မှုများကို ရင်ဆိုင်ရာတွင် အခြား မကောင်းဆိုးဝါးများအတွက် သူတို့ကို တားဆီးနိုင်ရန် အလွန် ခက်ခဲလှပေသည်။

ဤအရာအားလုံးကို ရဲချီယန်က မြင်တွေ့နေရလေ၏။

ထိုသီးသန့် နားနေခန်းအတွင်း၌ နောက်ဆုံး အမည်းရောင် မြေအောက်ကမ္ဘာ သစ်သီးမှာ အရည်ညှစ်ခံလိုက်ရပြီး ယဇ်ပလ္လင်ထဲသို့ စီးကျသွားကာ ခုန်လှုပ်နေသော နှလုံးသားနှင့် ပေါင်းစပ်သွားချေပြီ။

"ဆော်လမွန် မြို့တော်မှာ တိုက်ပွဲတွေ စတင်နေပြီ ထင်တယ်"

"ဘာဖြစ်လို့ ဒီထာဝရ ညဉ့်ယံ မြို့တော်က တကယ်ပဲ ပိုပြီး ဘေးကင်းနေတယ်လို့ ခံစားရတာလဲ"

ရဲချီယန်က ခုန်လှုပ်နေသော နှလုံးသားကို စိုက်ကြည့်ရင်း သီးသန့်နယ်မြေ ပလက်ဖောင်းကို ဖွင့်လှစ်ပေးမည့် သော့ကို ထုတ်ယူလိုက်လေ၏။

"ဒါက... ရန်သူ့စခန်းကို ဝင်စီးတာလို့ သတ်မှတ်လို့ ရမလား"

ခွမ်း...

ဒိုင်းလွှား ကိုင်ဆောင်ထားသော ဗီလိန်က သွေးနတ်ဘုရား မဏ္ဍပ်အတွင်းသို့ ပထမဆုံး ပြေးဝင်လာသည့် အခိုက်အတန့်နှင့်အတူ ကြမ်းပြင်မှ မျက်နှာကြက်အထိ ရှည်လျားသော ပြတင်းပေါက်ကြီး အစိတ်စိတ်အမွှာမွှာ ကွဲကြေသွားတော့သည်။

ရဲချီယန်၏ မျက်စိရှေ့မှောက်တွင် စနစ်၏ အလင်းမျက်နှာပြင်က ရုတ်တရက် ပေါ်ထွက်လာလေ၏။

လူသားများနှင့် သွေးစုပ်ဖုတ်ကောင်များကြားရှိ စစ်ပွဲတာဝန်က သူ၊ အာချွမ်းနှင့် စတေစီယာတို့၏ ရှေ့မှောက်တွင်လည်း ပေါ်လာခဲ့ပေသည်။

[လက်ခံမည်လား]

[သင်၏ ရွေးချယ်မှုကား...]

[လက်ခံမည်]