အခန်း ၃၃၃

အခန်း ၃၃၃ အတွေ့အကြုံရမှတ် အဆ ၁၄၀ တိုးမြှင့်ခြင်း

သူတို့ကဲ့သို့သော အထွတ်အထိပ် အဆင့် အစွမ်းထက်သူများပင်လျှင် မလုပ်ဆောင်နိုင်သောအရာကို ယခုအခါ ကျိုးဟန် ကဲ့သို့သော လူငယ်လေး တစ်ဦးက လုပ်ဆောင်နိုင်ခဲ့ပြီ ဖြစ်ရာ မည်သို့လျှင် မအံ့အားသင့်ဘဲ နေနိုင်မည်နည်း။

"ဒါဆို သူက..."

ဤကဲ့သို့ ထူးဆန်းသော ထိန်းချုပ်မှုမျိုးကို မြင်တွေ့လိုက်ရသောအခါ ထိုက်ရိ အထွတ်အထိပ် သခင်ကြီး မှာ အခြားသူများထက် ပိုမို တည်ကြည်လေးနက်သွားသည်။ ရွှမ်ယွမ် ဧကရာဇ်မင်း တွင်လည်း အလားတူ စွမ်းရည်မျိုး ရှိခဲ့ကြောင်းကို သူ ချက်ချင်း သတိရသွားသည်။

သို့သော် ဤအကြောင်းကို သိရှိသူ အလွန် နည်းပါးလှပေသည်။ ထိုက်ရိ အထွတ်အထိပ် သခင်ကြီး သည် တည်ရှိနေခဲ့သော အချိန်ကာလ အလွန် ကြာမြင့်ပြီ ဖြစ်သဖြင့် ဤလျှို့ဝှက်ချက် အချို့ကို တိုက်ဆိုင်စွာ သိရှိထားခဲ့ခြင်း ပင်ဖြစ်သည်။ ဤအရာက သူ၏ ရင်ထဲ၌ ခန့်မှန်းချက် အချို့ကို ထွက်ပေါ်လာစေသည်။

"ဘာဖြစ်လို့လဲ ထိုက်ရိ... မင်း ဘာတွေ တွေ့လိုက်လို့လဲ..."

မြင့်မြတ်သော သားရဲ အထွတ်အထိပ် သခင်ကြီး က ထိုက်ရိ အထွတ်အထိပ် သခင်ကြီး ၏ အမူအရာ ပျက်ယွင်းသွားမှုကို သတိပြုမိသွားပြီး အလျင်စလို မေးမြန်းလိုက်သည်။

"အင်း... လောလောဆယ်တော့ ဘာမှ မရှိသေးပါဘူး..."

ထိုက်ရိ အထွတ်အထိပ် သခင်ကြီး က ရယ်မောကာ စကားလွှဲလိုက်ပြီး သူ၏ ရင်ထဲရှိ လက်တွေ့မကျသော အတွေးအချို့ကို လျင်မြန်စွာ ပယ်ဖျက်လိုက်လေသည်။

"အထပ် နှစ်ဆယ့်ရှစ် မှာ ကျိုးဟန် ဘယ်လို စွမ်းဆောင်မလဲ ဆိုတာကို အရင် ကြည့်ကြသေးတာပေါ့..."

"အထပ် မြင့်လေလေ ရင်ဆိုင်ရမယ့် ပြိုင်ဘက်တွေက ပိုပြီး အစွမ်းထက်လာလေလေပဲ..."

စကားလမ်းကြောင်း လွှဲသွားသည်နှင့်အမျှ သူတို့သည်လည်း လိမ်လည်ခြင်း ကိစ္စနှင့် ပတ်သက်၍ ဆက်လက် တွေးတောမနေတော့ဘဲ ဆက်လက် စောင့်ကြည့်နေကြလေတော့သည်။

[စနစ် အသိပေးချက် - လက်ရှိ ရောက်ရှိနေသော နေရာမှာ ရွှမ်ယွမ် နန်းတော် ၏ အထပ် နှစ်ဆယ့်ရှစ် ဖြစ်ပါသည်... ရရှိမည့် လျှို့ဝှက်နယ်မြေ အမှတ် နှင့် အတွေ့အကြုံရမှတ် များမှာ နှစ်ဆယ့်ရှစ်ဆ တိုးမြင့်လာမည် ဖြစ်ပါသည်]

[တစ်ချိန်တည်းမှာပင် သင်သည် အစွမ်းထက်သော လေပြင်းများ တိုက်ခတ်မှု နှင့် မသိရှိနိုင်သော အစွမ်းထက်သည့် ရန်သူများကို ရင်ဆိုင်ရမည် ဖြစ်ပါသည်... ကျေးဇူးပြု၍ ဘေးကင်းလုံခြုံရေးကို ဂရုစိုက်ပြီး မိမိ၏ စွမ်းအားနှင့်အညီသာ လုပ်ဆောင်ပါ]

"ဟူး... ဒါက ဘယ်လို လေမျိုးလဲ... ကိုယ်ပေါ်ကို တိုက်ခတ်သွားတာ တကယ်ကို နာကျင်တာပဲကွာ..."

"လခွမ်း... တောင့်မခံနိုင်တော့ဘူး... သွေးလျော့တာ အရမ်း မြန်လွန်းတယ်..."

"ဒါက စနစ် အသိပေးထားတဲ့ လေပြင်းတွေ ပဲ ဖြစ်ရမယ်... ပြင်းအားက တစ်ဟုန်ထိုးကို ကြီးမားလာတာပဲ..."

တယ်လီပို့ လုပ်ပြီး ရောက်ရောက်ချင်းမှာပင် နောက်လိုက်များ၏ နာကျင်စွာ အော်ဟစ်သံများကို ကြားလိုက်ရလေသည်။ ဘုရင်အဆင့် အရည်အသွေးရှိသော ဝတ်စုံများပင်လျှင် ကာကွယ်မှု အကျိုးသက်ရောက်မှုမှာ သိပ်မကောင်းလှချေ။

"ဝှီး..."

"ဝှီး..."

"ဝှီး..."

"ဝှီး..."

လေပြင်းများက အဆက်မပြတ် ဟိန်းဟောက် တိုက်ခတ်နေသော်လည်း လေ ၏ နက်နဲမှုကို နားလည် သဘောပေါက်ထားသော ကျိုးဟန် အတွက်မူ အနည်းငယ်မျှပင် ထိခိုက်မှု မရှိချေ။ သို့သော် နောက်လိုက် အများစုမှာမူ တောင့်ခံနိုင်စွမ်း မရှိကြတော့ချေ။ အထပ် နှစ်ဆယ့်ရှစ် ၏ ပြင်းအားမှာ ရုတ်တရက် တစ်ဟုန်ထိုး မြင့်တက်လာခဲ့ခြင်း ပင်ဖြစ်သည်။

သို့သော် ကောင်းကျိုး တစ်ခု ရှိလေသည်။ ၎င်းမှာ လျှို့ဝှက်နယ်မြေ အမှတ် နှင့် အတွေ့အကြုံရမှတ် နှစ်မျိုးစလုံး ကြီးမားသော တိုးမြှင့်မှုကို ရရှိနိုင်ခြင်း ပင်ဖြစ်သည်။ ဤအရာက ကျိုးဟန်ကို အလွန် သက်တောင့်သက်သာ ဖြစ်စေသည်။

သူ့တွင် မူလကတည်းက မြစိမ်း သစ်သီး ၏ အတွေ့အကြုံရမှတ် ငါးဆ တိုးမြှင့်မှု ရှိထားပြီး ဖြစ်ရာ ဤ အထပ် နှစ်ဆယ့်ရှစ် တွင် ဆိုပါက အတွေ့အကြုံရမှတ် အဆ တစ်ရာ့လေးဆယ် ရရှိမည် ဖြစ်လေသည်။ ဤသို့ဆိုလျှင် အဆင့်တက်လှမ်း ရန်မှာ အလွန် လွယ်ကူ သာယာနေတော့မည် ဖြစ်သည်။

သို့သော် အဆင့်မတက်လှမ်းမီ ကျိုးဟန် အနေဖြင့် နောက်လိုက်များကို သေချာစွာ နေရာချထားပေးရန် လိုအပ်သေးသည်။

"တောင့်မခံနိုင်တဲ့ သူတွေ... ဘေးကင်း ဇုန် ထဲမှာပဲ တိုက်ရိုက် နေခဲ့ကြတော့..."

"ကျန်တဲ့သူတွေက ငါ့နောက်ကို ဆက်လိုက်ခဲ့..."

ကျိုးဟန်က အမိန့်ပေးလိုက်လေသည်။

ဤနေရာ၏ တည်ဆောက်ပုံမှာ ပထမထပ် နှင့် များစွာ မကွာခြားလှဘဲ ဘေးကင်း ဇုန် နှင့် တိုက်ခိုက်ရေး ဇုန် ဟူ၍ ခွဲခြားထားလေသည်။

ဘေးကင်း ဇုန် အတွင်း၌ မည်သည့် ထိခိုက်မှုမျှ ရရှိမည် မဟုတ်ချေ။ ထို့အပြင် ၎င်းအတွင်း၌ ဝိညာဉ် မြက်ပင်များ နှင့် မျိုးစုံသော သလင်းကျောက်များ အများအပြား ရှိနေပြီး အရည်အသွေးများမှာလည်း မဆိုးလှချေ။ ကြယ်တောက်ပ အဆင့် မှ ဘုရင်အဆင့် အရည်အသွေး အထိ အစုံအလင် ရှိနေလေသည်။

ဘေးကင်း ဇုန် မှာ ဤနေရာနှင့် သိပ်မဝေးလှချေ။ မော့ကြည့်လိုက်ရုံဖြင့် ဆေးဥယျာဉ် ၊ ကျင့်ကြံရေး ခန်းမ ၊ စာကြည့်တိုက် အစရှိသော အဆောက်အအုံများကို မြင်တွေ့နိုင်လေသည်။

အကယ်၍ ကံကောင်းမည် ဆိုပါက အရည်အသွေး မဆိုးလှသော သိုင်းကျမ်းများ ၊ မှော်ဆေးလုံးများ အစရှိသည့် ရှားပါး ပစ္စည်းများကို ရရှိနိုင်ခြေ ရှိလေသည်။ မည်သို့ပင်ဆိုစေ မည်သည့် နောက်လိုက်က ကံကောင်းမည် ဆိုသည်ကိုသာ စောင့်ကြည့်ရမည် ဖြစ်သည်။

သို့သော် ကျိုးဟန် သည် ဤအရာများ အပေါ် လောလောဆယ်တွင် စိတ်ဝင်စားမှု မရှိချေ။ သူ၏ တစ်ခုတည်းသော ရည်မှန်းချက်မှာ အထပ် ကိုးဆယ့်ကိုး သို့ ဝင်ရောက်ပြီး ရွှမ်ယွမ် ဧကရာဇ်မင်း ၏ စမ်းသပ်မှု (၁) ဟူသော မစ်ရှင်ကို ပြီးမြောက်အောင် လုပ်ဆောင်ရန် ပင်ဖြစ်သည်။ အခြားသော မှော်ဆေးလုံးများ နှင့် သိုင်းကျမ်းများ ဆိုသည်မှာ သူ၏ တွေးတော စဉ်းစားမှု အပိုင်းအခြား အတွင်း၌ မရှိချေ။

"ဟုတ်ကဲ့ပါ အစ်ကိုကြီး... ကျွန်တော်တို့ အခုပဲ သွားလိုက်ပါ့မယ်..."

"ဒီလောက် အရင်းအမြစ်တွေ အများကြီး ရှိနေမှတော့ သိပ်ပြီး အရှုံးပေါ်တယ် လို့ မဆိုနိုင်ပါဘူးလေ..."

ဤအားနည်းသော နောက်လိုက်များက အလျင်စလို ခေါင်းညိတ်လိုက်ကြသည်။ သူတို့သည်လည်း ကျိုးဟန် ၏ နောက်သို့ လိုက်ပါကာ ပိုမို မြင့်မားသော အထပ်များဆီသို့ သွားရောက်လိုကြသော်လည်း စွမ်းအားက ခွင့်မပြုချေ။

အထပ် နှစ်ဆယ့်ရှစ် ရှိ ဤရူးသွပ်ကြမ်းတမ်းသော လေပြင်းများကိုပင် သူတို့ တောင့်မခံနိုင်ရာ ပိုမို မြင့်မားသော အထပ်များ ဆိုလျှင် တွေးကြည့်ရန်ပင် မလိုတော့ချေ။ သူတို့ ကိုယ်သူတို့ အတိုင်းအတာ သိရှိကြလေသည်။

မကြာမီမှာပင် နောက်လိုက် တစ်ထောင့်နှစ်ရာ ကျော်ခန့်က ဤအထပ်၏ ဘေးကင်း ဇုန် အတွင်း၌ နေထိုင်ရန် ရွေးချယ်လိုက်ကြလေသည်။

ဖြေရှင်း ပြီးစီးသွားပြီးနောက် ကျိုးဟန် လည်း တိုက်ရိုက်ပင် စတင် သတ်ဖြတ်လေတော့သည်။ ဤကဲ့သို့သော အခွင့်အရေးမျိုးမှာ နှစ်တစ်ထောင် ကြာမှ တစ်ကြိမ်သာ ကြုံတွေ့ရနိုင်ခဲသော အရာ ဖြစ်လေသည်။

"မိုးကြိုး နယ်မြေ... ပွင့်စမ်း..."

ကျိုးဟန် ကျယ်လောင်စွာ ဟိန်းဟောက်လိုက်ရာ ဆံပင်နှင့် မုတ်ဆိတ်များ လွင့်ပျံသွားပြီး သူ၏ ကိုယ်ပေါ်တွင် ရူးသွပ်ကြမ်းတမ်းသော လျှပ်စီးတန်းများ တောက်ပလာလေသည်။ ရေတွက်၍ မရနိုင်သော မိုးကြိုး စပါးကြီးမြွေများ က အမိန့်ကို နာခံကာ ဤလေဟာနယ် အတွင်းရှိ ရုပ်သေးရုပ်များ နှင့် မှော်သားရဲများကို ရူးသွပ်ကြမ်းတမ်းစွာ ဗုံးကြဲ တိုက်ခိုက်လေတော့သည်။

မိုးကြိုးများ ရိုက်ခတ်သွားသော နေရာတိုင်းတွင် ပြာအဖြစ်သို့ မပြောင်းလဲသွားသည်မှာ မရှိချေ။ မိုးကြိုး ၏ ဖျက်ဆီးခြင်း စိတ်ဆန္ဒကို လုံးဝ တားဆီး၍ မရနိုင်ဘဲ ကြီးမား ကျယ်ပြန့်သော ထိခိုက်မှု တန်ဖိုးများ အဆက်မပြတ် လွင့်ပျံ ထွက်ပေါ်လာလေသည်။

အနည်းဆုံး ထိခိုက်မှု ကုဋေတစ်ဆယ် မှ စတင်ကာ အားလုံးကို တစ်ချက်တည်းဖြင့် သတ်ဖြတ်ပစ်လိုက်ပြီး အနည်းငယ်မျှပင် အဟန့်အတား မရှိခဲ့ချေ။

[စနစ် အသိပေးချက် - သင်သည် ကြယ်တစ်ပွင့် ဧကရာဇ်အဆင့် အရည်အသွေးရှိသော သွေးဒေါသ ရုပ်သေးရုပ် အား အောင်မြင်စွာ သတ်ဖြတ်နိုင်ခဲ့ပါသည်... လက်ရှိ ရောက်ရှိနေသော နေရာမှာ ရွှမ်ယွမ် နန်းတော် ၏ အထပ် နှစ်ဆယ့်ရှစ် ဖြစ်ကြောင်း စစ်ဆေးတွေ့ရှိရသဖြင့် တိုးမြှင့်ခံရပြီးနောက် လျှို့ဝှက်နယ်မြေ အမှတ် ၃၀၀၀၀ နှင့် အတွေ့အကြုံရမှတ် ၂၈၀၀၀၀ ရရှိပါသည်... ပစ္စည်းများ ကျဆင်းလာပါသည်]

[စနစ် အသိပေးချက် - သင်သည် ကြယ်နှစ်ပွင့် ဧကရာဇ်အဆင့် အရည်အသွေးရှိသော အမှောင်ည ပင့်ကူ အား အောင်မြင်စွာ သတ်ဖြတ်နိုင်ခဲ့ပါသည်... လက်ရှိ ရောက်ရှိနေသော နေရာမှာ ရွှမ်ယွမ် နန်းတော် ၏ အထပ် နှစ်ဆယ့်ရှစ် ဖြစ်ကြောင်း စစ်ဆေးတွေ့ရှိရသဖြင့် တိုးမြှင့်ခံရပြီးနောက် လျှို့ဝှက်နယ်မြေ အမှတ် ၃၅၀၀၀ နှင့် အတွေ့အကြုံရမှတ် ၃၅၀၀၀၀ ရရှိပါသည်... ပစ္စည်းများ ကျဆင်းလာပါသည်]

[စနစ် အသိပေးချက် - သင်သည် ကြယ်နှစ်ပွင့် ဧကရာဇ်အဆင့် အရည်အသွေးရှိသော မြေအောက်ကမ္ဘာ ရုပ်သေးရုပ် အား အောင်မြင်စွာ သတ်ဖြတ်နိုင်ခဲ့ပါသည်... လက်ရှိ ရောက်ရှိနေသော နေရာမှာ ရွှမ်ယွမ် နန်းတော် ၏ အထပ် နှစ်ဆယ့်ရှစ် ဖြစ်ကြောင်း စစ်ဆေးတွေ့ရှိရသဖြင့် တိုးမြှင့်ခံရပြီးနောက် လျှို့ဝှက်နယ်မြေ အမှတ် ၃၅၀၀၀ နှင့် အတွေ့အကြုံရမှတ် ၃၅၀၀၀၀ ရရှိပါသည်... ပစ္စည်းများ ကျဆင်းလာပါသည်]

[စနစ် အသိပေးချက် - သင်သည် ကြယ်တစ်ပွင့် ဧကရာဇ်အဆင့် အရည်အသွေးရှိသော အလင်း လင်းနို့ အား အောင်မြင်စွာ သတ်ဖြတ်နိုင်ခဲ့ပါသည်... လက်ရှိ ရောက်ရှိနေသော နေရာမှာ ရွှမ်ယွမ် နန်းတော် ၏ အထပ် နှစ်ဆယ့်ရှစ် ဖြစ်ကြောင်း စစ်ဆေးတွေ့ရှိရသဖြင့် တိုးမြှင့်ခံရပြီးနောက် လျှို့ဝှက်နယ်မြေ အမှတ် ၃၀၀၀၀ နှင့် အတွေ့အကြုံရမှတ် ၂၈၀၀၀၀ ရရှိပါသည်... ပစ္စည်းများ ကျဆင်းလာပါသည်]

အချက်အလက် မျက်နှာပြင် ပေါ်တွင် အဆက်မပြတ် ရွေ့လျားနေသော အသိပေးချက်များကို ကြည့်ရှုရင်း ကျိုးဟန် မှာ အလွန် ဝမ်းသာနေမိသည်။ မိုးကြိုး နယ်မြေ ကို ဖွင့်လှစ်ကာ သတ်ဖြတ်ရခြင်းက တကယ်ကို အစွမ်းထက်လှပေသည်။

ကျန်ရှိနေသော နောက်လိုက် ခုနစ်ရာကျော် မှာလည်း လက်လှုပ်ရှားရန် မလိုတော့ဘဲ စစ်တလင်း ကို ရှင်းလင်း သိမ်းဆည်းရန်သာ တာဝန်ယူရတော့သည်။

ကျိုးဟန် သည် မိုးကြိုး နတ်ဘုရား တစ်ပါးအလား မိုးကြိုး စပါးကြီးမြွေများကို အဆက်မပြတ် ထိန်းချုပ်ကာ မှော်သားရဲများ များပြားသော နေရာများဆီသို့ တိုက်ခိုက်မှုများ ပြုလုပ်နေလေသည်။

[စနစ် အသိပေးချက် - သင်သည် ဧကရာဇ်အဆင့် အရည်အသွေးရှိသော မှော်သားရဲ ကောင်ရေ တစ်သောင်း ကို အောင်မြင်စွာ သတ်ဖြတ်နိုင်ခဲ့ပါသည်... အဆင့်၏ နယ်မြေအရှင်သခင် ထွက်ပေါ်လာပြီ ဖြစ်ပြီး ၎င်းအား အောင်မြင်စွာ အနိုင်ယူနိုင်ပါက နောက်တစ်ထပ် သို့ ဝင်ရောက်နိုင်မည် ဖြစ်ပါသည်]

ကျိုးဟန် အရှိန်ရနေစဉ်မှာပင် စနစ်၏ အသိပေးချက် ထွက်ပေါ်လာလေသည်။ မသိမသာဖြင့် ကောင်ရေ တစ်သောင်းကျော်မျှ သတ်ဖြတ်ပြီးသွားခဲ့လေပြီ။

အဘယ်ကြောင့်ဆိုသော် ဧကရာဇ်အဆင့် အရည်အသွေးရှိသော မှော်သားရဲများ အပြင် ဘုရင်အဆင့် အရည်အသွေးရှိသော ကောင်ရေ အများအပြားလည်း ပါဝင်နေသော်လည်း စနစ်က ထည့်သွင်း ရေတွက်ပေးခြင်း မရှိသောကြောင့် ပင်ဖြစ်သည်။

"အရမ်း ကောင်းတယ်... ဒါဆိုရင်လည်း နယ်မြေအရှင်သခင် ကို ရှင်းလင်းပြီး နောက်တစ်ထပ် ကို ဝင်ရောက်ကာ ပိုပြီး မြင့်မားတဲ့ တိုးမြှင့်မှု တွေကို ရယူလိုက်တာပေါ့..."

ကျိုးဟန်က ခေါင်းအနည်းငယ် ညိတ်လိုက်လေသည်။

ထို့နောက် ဟိန်းဟောက်သံကြီး တစ်ခုကို ကြားလိုက်ရလေသည်။

"မင်းတို့ ကောင်တွေ... ဘယ်လိုတောင် ရဲတင်းနေတာလဲ..."

ခေါင်းသုံးလုံး ပါရှိပြီး တစ်ကိုယ်လုံး သွေးရောင် အလင်းတန်းများ ထွက်ပေါ်နေသော တောခွေးရိုင်း ကြီးက ထွက်ပေါ်လာသည်နှင့် တစ်ပြိုင်နက် ကြွားလုံးထုတ်ရန် ပြင်ဆင်လိုက်လေသည်။

သို့သော် ကောင်းကင် တစ်ခုလုံးကို ဖုံးလွှမ်းနေသော မိုးကြိုး စပါးကြီးမြွေများကို မြင်တွေ့လိုက်ရသောအခါ ၎င်း၏ ခန္ဓာကိုယ်မှာ တုန်ရီသွားလေသည်။

'လခွမ်း... ဒါက ဘာ သရဲတစ္ဆေ တွေလဲဟ...'

'အစ်ကိုကြီး... တိုက်မယ်ဆိုလည်း တိုက်လေ... ဒီလောက်များပြားတဲ့ မိုးကြိုး စပါးကြီးမြွေ တွေကို မဆင့်ခေါ်ဘဲ နေလို့ မရဘူးလား... ကြောက်စရာ ကောင်းလိုက်တာ...'

"အောဝူး..."

မိုးကြိုး အလင်းတန်းများ လှုပ်ရှားသွားပြီး တောခွေးရိုင်းကြီး ထံမှ နာကျင်စွာ အော်ဟစ်သံကြီး ထွက်ပေါ်လာကာ လုံးဝ လွှမ်းမိုး နစ်မြုပ်သွားလေတော့သည်။ ဤကဲ့သို့သော စွမ်းအားမျိုးမှာ ၎င်းအနေဖြင့် အနည်းငယ်မျှပင် တောင့်ခံနိုင်စွမ်း မရှိသော အရာ ဖြစ်လေသည်။

[စနစ် အသိပေးချက် - သင်သည် ကြယ်ငါးပွင့် ဧကရာဇ်အဆင့် နယ်မြေအရှင်သခင် သွေးခွေးရိုင်း ခေါင်းသုံးလုံး အား အောင်မြင်စွာ သတ်ဖြတ်နိုင်ခဲ့ပါသည်... လေဟာနယ် လမ်းကြောင်း ပွင့်သွားပြီ ဖြစ်သဖြင့် စက္ကန့် သုံးဆယ် အတွင်း နောက်တစ်ထပ် သို့ ဝင်ရောက်ပါ]

ကျိုးဟန် သည် နောက်လိုက်များနှင့် အတည်ပြု ကြည့်လိုက်ရာ ကြယ်မှုန် အပိုင်းအစ များ ကျဆင်းလာခြင်း မရှိကြောင်း သိရှိလိုက်ရသဖြင့် အနည်းငယ် စိတ်ပျက်သွားမိသည်။ ကျဆင်းနိုင်ခြေမှာ အလွန် နည်းပါးလွန်းလှပြီး ဤမျှများပြားအောင် သတ်ဖြတ်ခဲ့သည်တောင်မှ တစ်ခုမျှ ကျဆင်းမလာခဲ့ချေ။

လေဟာနယ် လမ်းကြောင်း ပွင့်နေပြီ ဖြစ်ရာ ကျိုးဟန် လည်း အချိန်ဆွဲမနေတော့ဘဲ အထပ် နှစ်ဆယ့်ကိုး သို့ တိုက်ရိုက် ဝင်ရောက်သွားလေသည်။

ထို့နောက်တွင်မူ ကျိုးဟန် သည် ဝါးရုံကို ဓားဖြင့်ခုတ်ပိုင်းသကဲ့သို့ အဟန့်အတားမရှိ လမ်းတစ်လျှောက်လုံး ရှင်းလင်းသွားလေသည်။

ဖြတ်သန်းသွားသော နေရာတိုင်းတွင် တစ်ချက်မျှပင် ခုခံနိုင်သော ရန်သူ မရှိခဲ့ချေ။ မိုးကြိုး အလင်းတန်းများ ၊ လေဆင်နှာမောင်းများ ၊ မီးတောက်များ နှင့် ဓားစွမ်းအင်များ က လေဟာနယ် အတွင်း၌ အဆက်မပြတ် တောက်ပနေပြီး ရူးသွပ်ကြမ်းတမ်းသော စွမ်းအားများက ဖျက်ဆီးခြင်း အရှိန်အဝါများကို သယ်ဆောင်လာလေသည်။

ရောက်ရှိနေသော အထပ် အရေအတွက်မှာလည်း တည်ငြိမ်စွာဖြင့် တစ်ထပ်ပြီး တစ်ထပ် မြင့်တက်လာခဲ့လေသည်။

"အစ်ကိုကြီး... မြန်မြန် ကြည့်ပါဦး... ကျွန်တော့်ဆီကနေ သော့ တစ်ချောင်း ကျလာတယ်..."

ကုံးလျို့ က အနည်းငယ် စိတ်လှုပ်ရှားစွာဖြင့် ပြောလိုက်လေသည်။