အခန်း ၃၃၈

အခန်း ၃၃၈ တောက်လောင်နေသော ကောင်းကင်တမန် ဆက်ခံမှု

ကံကြမ္မာ အခွင့်အရေး နေရာသို့ အနီးမကပ်ရသေးမီမှာပင် မြင့်မြတ်သော ရွှေရောင် အလင်းတန်းများက ဆူပွက်နေသော ရေနွေးအလား ပွက်ပွက်ဆူလာလေသည်။

ကျိုးဟန် ၏ အဖွဲ့ထဲတွင် တစ်စုံတစ်ရာက ဤရွှေရောင် အလင်းတန်း၏ အာရုံစိုက်မှုကို ဆွဲဆောင်သွားသည့်ပုံ ပေါ်နေသည်။

"ဟန်... ငါ ကောင်းကင်တမန်ရဲ့ စွမ်းအားတွေကို ခံစားမိနေတယ်"

"ဒီစွမ်းအားက ကောင်းကင်တမန် ဆက်ခံမှုနဲ့ သက်ဆိုင်လောက်တယ်"

ဟန်ချင်ရွှယ် က စိတ်လှုပ်ရှားစွာဖြင့် ပြောလိုက်လေသည်။

သူမသည် ဧဝံဂေလိ တရားဟောဆရာ အသက်မွေးဝမ်းကျောင်း ဖြစ်ပြီး အက်စ်အက်စ် အဆင့် မွေးရာပါ စွမ်းရည် ကောင်းကင်တမန် ဆက်ခံမှု ကိုလည်း ရရှိထားရာ ဤမြင့်မြတ်သော အလင်းတန်း စွမ်းအားများနှင့် ပတ်သက်၍ အလွန် ရှင်းလင်းစွာ သိရှိနားလည်ထားလေသည်။

"အရမ်းကောင်းတယ်... ဒါဆိုရင် ဒီကံကြမ္မာ အခွင့်အရေးက မင်းအတွက်ပဲပေါ့"

ကျိုးဟန် က လက်ကို ဝှေ့ယမ်းကာ တိုက်ရိုက်ပင် ပြောလိုက်လေသည်။

မိမိ၏ ချစ်သူ အတွက် ကံကြမ္မာ အခွင့်အရေး တစ်ခုမျှက ဘာများ အရေးကြီးမည်နည်း။

ထို့အပြင် ဟန်ချင်ရွှယ် မှာ အထောက်အကူပြု အသက်မွေးဝမ်းကျောင်း ဖြစ်ရာ သူမ ပိုမို အစွမ်းထက်လာပါက ကျိုးဟန် သည်လည်း အထောက်အကူပြု စွမ်းရည်များ၏ တိုးမြှင့်မှုကို ခံစားရမည် ဖြစ်လေသည်။

ကျိုးဟန် ၏ လက်ရှိ စွမ်းအားဖြင့် လောလောဆယ်တွင် အသုံးမလိုသေးသော်လည်း တကယ်တမ်း အထောက်အကူပြု စွမ်းရည်များကို အသုံးပြုရန် လိုအပ်လာပါက အလွန် အရေးပါသော အကျိုးသက်ရောက်မှုကို ရရှိစေမည် ဖြစ်လေသည်။

အထူးသဖြင့် ရွှမ်ယွမ် နန်းတော် အတွင်း၌ နောက်ဆုံး အထပ် အနည်းငယ်တွင် ကြုံတွေ့ရမည့် အဟန့်အတားများမှာ အလွန် ကြီးမားလိမ့်မည်ဟု ကျိုးဟန် ခန့်မှန်းထားလေသည်။

ပြင်းထန်သော တိုက်ပွဲများက စွမ်းအင် အလွန် ကုန်ခမ်းစေမည် ဖြစ်ရာ ထိုအချိန်ကျလျှင် ဟန်ချင်ရွှယ် ၏ အထောက်အကူပြု စွမ်းရည်များကို အသုံးပြုရမည်မှာ သေချာလှပေသည်။

"ဟန်... နင်က တကယ်ကို ကောင်းလွန်းတာပဲ"

"ချစ်တယ်နော်... မွ"

ဟန်ချင်ရွှယ် မှာ ပျော်ရွှင်စွာ ပြုံးရွှင်သွားလေသည်။

မကြာမီ သူတို့သည် ရွှေရောင် အလင်းတန်းများ၏ အရင်းအမြစ်သို့ ရောက်ရှိလာကြသည်။

ယခင်က ရွှေရောင် အလင်းတန်းများမှာ အလွန် ထူထပ်လွန်းနေသဖြင့် အသေးစိတ်ကို ရှင်းလင်းစွာ မစစ်ဆေးနိုင်ခဲ့ချေ။

အနီးကပ် ရောက်ရှိသွားချိန်တွင်မှ လူတိုင်းက သေချာစွာ မြင်တွေ့လိုက်ရလေသည်။

တကယ်တမ်းတွင် ဤရွှေရောင် အလင်းတန်းများ အားလုံးမှာ မှော်တောင်ဝှေး တစ်ချောင်းထံမှ ထွက်ပေါ်နေခြင်း ပင်ဖြစ်သည်။

မှော်တောင်ဝှေး ၏ အရွယ်အစားမှာ သာမန် မှော်တောင်ဝှေး များနှင့် အနည်းငယ်မျှ ကွာခြားခြင်း မရှိသော်လည်း အပေါ်တွင် နက်နဲသော စာလုံးများကို ထွင်းထုထားလေသည်။

မြင့်မြတ် တောက်ပသော အလင်းရောင်များက မှော်တောင်ဝှေး ပေါ်တွင် အဆက်မပြတ် လှည့်ပတ်နေပြီး စာလုံးများကို ဖြတ်သန်းသွားတိုင်း ပိုမို လှပသော အရောင်အဝါများကို ဖြစ်ပေါ်စေကာ ထူးဆန်းသော စွမ်းအင်များ အဆက်မပြတ် ပေါက်ကွဲ ထွက်ပေါ်နေလေသည်။

သေချာပေါက် နောက်လိုက်များ၏ စွမ်းအားမှာ မလုံလောက်သေးသဖြင့် အရင်းအမြစ်ကို မမြင်တွေ့နိုင်ကြချေ။

ကျိုးဟန် က အာရုံစူးစိုက်၍ ကြည့်ရှုလိုက်ရာ မြင့်မြတ်သော အလင်းတန်းများ အလယ်တွင် အေးစက် မောက်မာပြီး အလွန် မြင့်မြတ်လှသည့် ပုံရိပ်ယောင် တစ်ခုက ရွှေရောင် အလင်းတန်းများကြား ရေချိုးနေသကဲ့သို့ လေထဲတွင် တိတ်ဆိတ်စွာ လွင့်မျောနေသည်ကို မြင်တွေ့လိုက်ရလေသည်။

သူမ၏ ကိုယ်ပေါ်တွင် မြင့်မြတ်သော အလင်းတန်းများဖြင့် ပေါင်းစပ် ဖွဲ့စည်းထားသည့် အတောင်ပံ ဆယ့်နှစ်ခု ပါရှိနေပြီး ကြည့်ရသည်မှာ ဒဏ္ဍာရီလာ အတောင်ပံ ဆယ့်နှစ်ခု ကောင်းကင်တမန် နှင့် အလွန် ဆင်တူလှပေသည်။

ကျိုးဟန် သည်လည်း အကဲဖြတ်ခြင်း စွမ်းရည်ကို အသုံးပြုလိုက်ရာ မကြာမီ အချက်အလက်များ အားလုံး ထွက်ပေါ်လာလေသည်။

[စနစ် အသိပေးချက် - ကယ်တင်ခြင်း လှံတံ]

[၎င်းအတွင်း၌ အဆုံးအစမဲ့သော မြင့်မြတ် တောက်ပသည့် စွမ်းအားများ ကိန်းအောင်းနေပြီး ကောင်းကင်တမန် ဘုရင် အသုံးပြုခဲ့ဖူးသော လက်နက် ဖြစ်ပါသည်]

[ဤလက်နက်၏ အသိအမှတ်ပြုမှုကို အောင်မြင်စွာ ရရှိပါက တောက်လောင်နေသော ကောင်းကင်တမန် ၏ ဆက်ခံမှုကို ဖွင့်လှစ်နိုင်မည် ဖြစ်ပါသည်]

[သန့်ရှင်းမြင့်မြတ်သော အသက်မွေးဝမ်းကျောင်း များသာ အသုံးပြုရန် ကန့်သတ်ထားပြီး အခြားသော အသက်မွေးဝမ်းကျောင်း များအနေဖြင့် အသိအမှတ်ပြုမှု လုံးဝ ရရှိနိုင်မည် မဟုတ်ပါ]

"မိုက်တယ်ဟေ့... တောက်လောင်နေသော ကောင်းကင်တမန် ရဲ့ ဆက်ခံမှုပဲ"

"ရွှမ်ယွမ် နန်းတော် ပီသပါပေတယ်... ဒီလောက် အစွမ်းထက်တဲ့ ဆက်ခံမှုမျိုးတောင် ထွက်လာတယ် ဆိုတော့ တကယ်ကို ကြမ်းတာပဲကွာ"

"တောက်လောင်နေသော ကောင်းကင်တမန် ရဲ့ အထောက်အကူပြု စွမ်းရည်ကိုသာ ရလိုက်ရင် သာမန်လူတောင်မှ ကောင်းကင်ကို တိုက်ရိုက် ပျံတက်သွားနိုင်လောက်တယ်နော်"

"ကျွတ်ကျွတ်ကျွတ်... အားကျလွန်းလို့ မျက်ရည်တောင် ကျလာပြီ"

အချက်အလက်များကို ဖတ်ရှုပြီးနောက် နောက်လိုက်များ အလွန် တုန်လှုပ်သွားကြလေသည်။

"ဟန်... အဲဒါက ငါ့ကို ခေါ်နေတယ်"

ဟန်ချင်ရွှယ် က ကယ်တင်ခြင်း လှံတံ ၏ ခေါ်ဆောင်မှုကို ခံစားသိရှိလိုက်ရသဖြင့် စိတ်လှုပ်ရှားစွာ ပြောလိုက်လေသည်။

မည်သို့ပင်ဆိုစေ သူမသည် သန့်ရှင်းမြင့်မြတ်သော အသက်မွေးဝမ်းကျောင်း ဖြစ်သည့်အပြင် ကောင်းကင်တမန် ဆက်ခံမှု မွေးရာပါ စွမ်းရည်လည်း ရှိထားရာ ကယ်တင်ခြင်း လှံတံ ၏ မျက်နှာသာပေးမှုကို ရရှိခြင်းမှာ အလွန် ပုံမှန်ကိစ္စရပ် တစ်ခု ပင်ဖြစ်သည်။

"ကောင်းပြီလေ... ငါ အခုပဲ ယူပေးမယ်"

ကျိုးဟန် ပြုံးလိုက်ပြီး ကယ်တင်ခြင်း လှံတံ ကို လှမ်းယူရန် ပြင်လိုက်လေသည်။

ထိုခဏမှာပင် လေဟာနယ် တစ်ခုလုံး လှုပ်ခတ်သွားပြီး လေဟာနယ် စွမ်းအင်များ စုစည်းသွားကာ ဗလာကျင်းနေသော အက်ကွဲကြောင်း အတွင်းမှ တစ္ဆေ အရိပ် တစ်ခု ထွက်ပေါ်လာလေသည်။

"ကျိုးဟန်... နောက်ဆုံးတော့ မင်းကို ငါ ရှာတွေ့သွားပြီ"

တစ္ဆေ အရိပ်မှာ သွားကိုက်ကာ အဆုံးအစမဲ့သော ဒေါသနှင့် အမုန်းတရားများ ပြည့်နှက်နေသည့် လေသံဖြင့် ပြောလိုက်လေသည်။

"ဟင်..."

"မြေအောက် ကမ္ဘာ တစ္ဆေ ဧကရာဇ် လား... ဘာလဲ မင်းက သေချင်လို့ လာတာလား"

အစပိုင်းတွင် ကျိုးဟန် အနည်းငယ် သံသယ ဖြစ်သွားသော်လည်း တစ္ဆေ အရိပ် ၏ အချက်အလက် များကို စစ်ဆေး ကြည့်လိုက်ပြီးနောက် တစ်ဖက်လူ၏ မည်သူမည်ဝါ ဖြစ်ကြောင်းကို ချက်ချင်း သိရှိသွားလေသည်။

တကယ်တမ်းတွင် ရန်သူဟောင်းကြီး ဖြစ်နေလေသည်။

မူလက ကျိုးဟန် သည် တစ္ဆေ တစ်ရာ ည တိုက်ပွဲ အစမ်းသပ်ခံနယ်မြေ ပြီးဆုံးသွားပါက မြေအောက် ကမ္ဘာ တစ္ဆေ ဧကရာဇ် ထံသို့ သွားရောက် ရှင်းလင်းရန် ဆုံးဖြတ်ထားခဲ့သည်။

ယခုမူ အလွန် ကောင်းမွန်သွားလေပြီ။ တစ်ဖက်လူက ကိုယ်တိုင် လာရောက် အသေခံသဖြင့် အလုပ်ရှုပ် သက်သာသွားစေလေသည်။

"ကျိုးဟန်... မင်းကို သတ်ပစ်ချင်လွန်းလို့ အိပ်မက်ထဲတောင် မက်တယ်ကွာ"

"ဒီနေ့တော့ အဲဒီ အချိန်ကို နောက်ဆုံးတော့ ရောက်လာခဲ့ပြီပဲ... ဟားဟားဟား"

မြေအောက် ကမ္ဘာ တစ္ဆေ ဧကရာဇ် ၏ ရုပ်ဆိုးလှသော မျက်နှာကြီးမှာ ဒေါသကြောင့် ပိုမို တွန့်လိမ် ရှုံ့မဲ့နေပြီး လွတ်လပ် ပေါ့ပါးစွာ ရူးသွပ်သကဲ့သို့ ရယ်မောနေလေသည်။

ဤကဲ့သို့သော အရှက်တကွဲ ဖြစ်မှုကို သူ သေချာပေါက် ဆေးကြောပစ်ရမည် ဖြစ်လေသည်။

"ဟက်... မင်းလို ကောင်မျိုးကများ"

"ကိုယ့်အဆင့်ကိုယ် ဘာမှန်း မသိဘူးလား"

ကျိုးဟန် က အထင်သေးစွာဖြင့် ပြောလိုက်လေသည်။

မြေအောက် ကမ္ဘာ တစ္ဆေ ဧကရာဇ် က သူ့ကို မည်သို့ ရှာတွေ့ခဲ့သည် ဆိုသည်ကို မသိရှိသော်လည်း ဤအရာက အရေးကြီးပါသလား။ သေရတော့မည့် လူတစ်ယောက် အတွက် ဂရုစိုက်စရာ မလိုချေ။

"ငါ့စွမ်းအားက မင်းကို မယှဉ်နိုင်ဘူး ဆိုတာ ငါသိပါတယ်... ဒါပေမဲ့ ငါက ဘာပြင်ဆင်မှုမှ မရှိဘဲနဲ့ လာရဲမယ်လို့ မင်း ထင်နေတာလား"

"စီနီယာ အကြီးအကဲတို့... ကျေးဇူးပြုပြီး ထွက်လာပေးကြပါ"

မြေအောက် ကမ္ဘာ တစ္ဆေ ဧကရာဇ် ၏ မျက်နှာပေါ်တွင် အောင်ပွဲခံနေသော အေးစက်သည့် အပြုံးများ ထွက်ပေါ်လာပြီး ခပ်တိုးတိုး အော်ဟစ်လိုက်လေသည်။

သူ၏ လက်ထဲရှိ မည်းနက်နေသော အဆောင်စာရွက် တစ်ရွက်မှ ပြင်းထန်သော မှင်ရည်များအလား တောက်ပသော အလင်းရောင်များ ဖြာထွက်လာပြီး ကြီးမားသော ပိတ်ကားကြီး တစ်ခုအဖြစ် ပြောင်းလဲကာ လွှမ်းခြုံလာလေသည်။

ထို့နောက် လေဟာနယ် တွင် အက်ကွဲကြောင်း အချို့ ထွက်ပေါ်လာပြီး လူရိပ် ရှစ်ခုက တစ်ဆက်တည်း ထွက်ပေါ်လာကာ ဤအထပ် အတွင်းသို့ တစ်ယောက်ပြီး တစ်ယောက် ရောက်ရှိလာကြလေသည်။

ထိုသူများမှာ သွေးတစ္ဆေ ဂိုဏ်း မှ လူများပင် ဖြစ်လေသည်။

"မြင်ပြီလား... သူတို့ အားလုံးက ငါတို့ တစ္ဆေနယ်မြေ ရဲ့ စီနီယာ အစွမ်းထက်သူကြီးတွေပဲ... အားလုံးက နတ်ဘုရားအဆင့် ကနေ စတာချည်းပဲကွ"

"သေပြီသာ မှတ်တော့... ကျိုးဟန်... ဒီနေ့ မင်း သေချာပေါက် သေရတော့မယ်"

မြေအောက် ကမ္ဘာ တစ္ဆေ ဧကရာဇ် မှာ ရူးသွပ်နေသော အပြုံးများ ထွက်ပေါ်လာလေသည်။ မည်သို့ပင်ဆိုစေ ကျိုးဟန်ကို သတ်ဖြတ်ရန် အတွက် မည်သည့် တန်ဖိုးကိုမဆို သူ ပေးဆပ်ရန် ဆန္ဒရှိနေခဲ့လေသည်။

အဘယ်ကြောင့်ဆိုသော် သူ၏ လက်ထဲတွင် အထူး မှော်လက်နက် တစ်ခု ရှိနေပြီး သတ်မှတ်ထားသော အတိုင်းအတာ တစ်ခု အတွင်း၌ ရန်သူ၏ တည်နေရာကို ရှာဖွေနိုင်ကာ ရန်သူ၏ ဘေးသို့ တိုက်ရိုက် တယ်လီပို့ လုပ်နိုင်သောကြောင့် ပင်ဖြစ်သည်။

ထို့ကြောင့် သွေးတစ္ဆေ ဂိုဏ်း မှ လူများက မြေအောက် ကမ္ဘာ တစ္ဆေ ဧကရာဇ် ကို ဆက်သွယ်လာခဲ့ခြင်း ဖြစ်သည်။

သူတို့ အားလုံးမှာ တူညီသော ရည်ရွယ်ချက် ရှိနေကြသဖြင့် သဘာဝကျကျပင် အလွယ်တကူ သဘောတူညီမှု ရရှိသွားခဲ့ကြလေသည်။

မြေအောက် ကမ္ဘာ တစ္ဆေ ဧကရာဇ် က သဘောတူညီလိုက်ပြီး တစ်ခုတည်းသော စည်းကမ်းချက် မှာ ကျိုးဟန်ကို ဖမ်းဆီး ချုပ်နှောင်ကာ နေ့စဉ်နေ့တိုင်း ပြင်းထန်စွာ နှိပ်စက် ညှဉ်းပန်းခွင့် ရရှိမှသာ သူ၏ ရင်ထဲရှိ အမုန်းတရားများကို ဖြေဖျောက်နိုင်မည် ဖြစ်လေသည်။

"အိုး... အကူအညီ ခေါ်လာသေးတာလား"

"စိတ်ဝင်စားစရာပဲ... ကိုယ်လက်လှုပ်ရှားလို့ ရပြီပေါ့"

ကျိုးဟန် က တည်ငြိမ်သော အမူအရာဖြင့် အနည်းငယ်မျှပင် ဂရုမစိုက်ဘဲ ပြောလိုက်လေသည်။

တစ်ချက် ဝေ့ကြည့်လိုက်ရာ မြေအောက် ကမ္ဘာ တစ္ဆေ ဧကရာဇ် ပြောသည့်အတိုင်း အားလုံးမှာ နတ်ဘုရားအဆင့် အရည်အသွေး ရှိသော အစွမ်းထက်သူများ ဖြစ်ကြသည်။

အစွမ်းထက်ဆုံး တစ်ယောက်မှာ သွေးတစ္ဆေ ဂိုဏ်းချုပ် ဖြစ်ပြီး ကြယ်ခြောက်ပွင့် နတ်ဘုရားအဆင့် အရည်အသွေး သို့ပင် ရောက်ရှိနေလေသည်။ အညံ့ဆုံး ဆိုလျှင်တောင် ကြယ်သုံးပွင့် နတ်ဘုရားအဆင့် တွင် ရှိနေလေသည်။

ဤကဲ့သို့သော စွမ်းအားစု တစ်ခုမှာ အမှန်တကယ်ပင် အလွန် အစွမ်းထက်လှရာ မြေအောက် ကမ္ဘာ တစ္ဆေ ဧကရာဇ် ယခုကဲ့သို့ အောင်ပွဲခံ ဂုဏ်ယူနေသည်မှာလည်း နားလည်ပေး၍ ရနိုင်လေသည်။

"သေရတော့မယ့် အချိန်တောင် ရောက်နေပြီကို မောက်မာနေတုန်းပဲလား ကောင်လေး"

"ဝိညာဉ် တံခွန် ကို လိမ္မာပါးမယ်စွာ ထုတ်ပေးလိုက်စမ်း... အလဟဿ ရုန်းကန် မနေနဲ့တော့"

အကြီးအကဲ တစ်ဦးက အေးစက်စွာ ရယ်မော၍ ပြောလိုက်ပြီး သူ၏ အမူအရာတွင် မောက်မာမှုများ ပြည့်နှက်နေလေသည်။

သူ၏ အမြင်တွင် သူကဲ့သို့ နတ်ဘုရားအဆင့် အစွမ်းထက်သူ တစ်ယောက် အတွက် ဤကဲ့သို့သော လူငယ်လေးကို ကိုင်တွယ်ရန်မှာ အလွန် လွယ်ကူသော ကိစ္စရပ် တစ်ခုသာ ဖြစ်လေသည်။

"ရိုးရိုးသားသား နေစမ်း... အဲဒါမှ မင်းကို အလောင်းအပြည့်အစုံ ချန်ပေးထားနိုင်မယ်"

"အဲဒီလိုမှ မဟုတ်ရင် မင်းရဲ့ ဝိညာဉ် တံခွန် ကို လုယူရုံတင် မကဘူး... မင်းရဲ့ ဝိညာဉ် ကိုပါ အထဲမှာ ပိတ်လှောင်ပစ်မယ်"

အခြား အကြီးအကဲ တစ်ဦးကလည်း ကြမ်းတမ်း ခက်ထန်စွာ ပြောလိုက်လေသည်။ သူသည် ဝိညာဉ် တံခွန် နှင့် ပတ်သက်၍ လုံလောက်သော နားလည်မှု ရှိထားပြီး သူ၏ မျက်ဝန်းများထဲတွင် လောဘများ ပြည့်နှက်နေလေသည်။

"ကျွတ်ကျွတ်ကျွတ်... ငါ့ရဲ့ ဝိညာဉ် ကို သန့်စင်မယ် ဟုတ်လား"

"ဒါက နည်းလမ်းကောင်း တစ်ခုပဲ... မင်းတို့ ကောင်တွေရဲ့ ဝိညာဉ် တွေကို ဒီအဘိုးကြီး က အကုန် သိမ်းလိုက်မယ်ကွာ"

ကျိုးဟန် ၏ အကြည့်များ အေးစက်သွားပြီး သတ်ဖြတ်လိုသော အရှိန်အဝါများ လှိမ့်တက်လာလေသည်။

တိုက်ဆိုင်စွာပင် ဝိညာဉ် တံခွန် အတွင်း၌ အဓိက ဝိညာဉ် ခုနစ်ခု နေရာ လွတ်နေသေးရာ ယခုအခါ လာသမျှကို အကုန် လက်ခံရုံ ပင်ဖြစ်သည်။

မည်သို့ပင်ဆိုစေ အားလုံးမှာ နတ်ဘုရားအဆင့် အရည်အသွေးများ ဖြစ်ကြရာ အဓိက ဝိညာဉ် များ အဖြစ် အသုံးပြုရန် လုံလောက်လှပေသည်။