အခန်း ၉၈၆

အခန်း (၉၈၆) - တာအိုလက်တွဲဖော် ဖုန်းရှီးတာအိုအရှင်၊ အလှပဂေးလေးနှင့် ရမ္မက်ခြောက်ပါးလောကီအသီး (၄)

'လောလောဆယ်တော့ မရသေးဘူးလား...'

'အခု ရမ္မက်ခြောက်ပါးလောကီနန်းတော်ထဲကို ဝင်သွားမယ်ဆိုရင် အန္တရာယ်ရှိနေတုန်းပဲ...'

'အနည်းဆုံး တစ်လလောက် ကြာမှပဲ ရမ္မက်ခြောက်ပါးလောကီနန်းတော်ထဲကို ဝင်လို့ရမှာ...'

ကျိုးစွေ့က မေးစေ့ကို ပွတ်သပ်လိုက်ပြီး အလွန် ကျေနပ်သွားလေသည်။

အမှန်စင်စစ်အားဖြင့် ကံကြမ္မာအခွင့်အရေးကို ရယူလိုပါက အချိန်အခါမှာ အလွန်ပင် အရေးကြီးပေသည်။

အကယ်၍ အချိန်အခါ မမှန်ပါက သေဘေးနှင့် ကြုံတွေ့ရနိုင်ပြီး ရတနာကို မရရှိသည့်အပြင် အသက်ပါ ဆုံးရှုံးသွားနိုင်ချေရှိသည်။

သို့သော် အချိန်အခါ မှန်ကန်ပါက ကပ်ဘေးဒုက္ခများစွာကို ရှောင်လွှဲနိုင်ရုံသာမက အဆုံးမဲ့ အကျိုးကျေးဇူးများကိုပါ ရရှိနိုင်မည် ဖြစ်၏။

‘ကံကြမ္မာကူ’၏ စွမ်းအားမှာ ဤမျှပင် အံ့ဩဖွယ်ကောင်းလှသည်။

၎င်းသည် ပိုင်ရှင်ဖြစ်သူအား ကပ်ဘေးများမှ ရှောင်တိမ်းနိုင်ရန် အမြင့်မားဆုံး ကူညီပေးနိုင်ပြီး အကောင်းဆုံး အချိန်အခါတွင် ကံကြမ္မာအခွင့်အရေးကို ရရှိစေနိုင်သည်။

ထို့ကြောင့် သူသည် ယခုအချိန်တွင် အလွန်ပင် တည်ငြိမ်နေပြီး စိတ်လောခြင်း မရှိပေ။

အဘယ်ကြောင့်ဆိုသော် ဖီးနစ်အင်မော်တယ်စံအိမ်တော် ပွင့်လာသည့်အချိန်မှာ (၁၀) နှစ်ဖြစ်ပြီး ယခုအချိန်တွင် လအနည်းငယ်သာ ကုန်ဆုံးရသေးသဖြင့် အချိန်များစွာ ကျန်ရှိနေသေးသောကြောင့်ပင် မဟုတ်ပါလော။

မျက်တောင်တစ်ခတ်အတွင်းမှာပင် တစ်လအချိန်မှာ လျင်မြန်စွာ ကုန်ဆုံးသွားခဲ့ချေပြီ။

ရမ္မက်ခြောက်ပါးလောကီနန်းတော်၏ အနီးတစ်ဝိုက်မှာလည်း လုံးဝ တည်ငြိမ်သွားခဲ့ပြီ ဖြစ်သော်ငြား အနီရောင်မြူခိုးများက မိုင်တစ်သန်း အကျယ်အဝန်းကို ဖုံးလွှမ်းထားဆဲပင်။

ဤနယ်မြေအတွင်းသို့ ဝင်ရောက်လာသမျှ သက်ရှိတိုင်းသည် လောကီစံအိမ်တော်၏ စိတ်ကူးယဉ်ကမ္ဘာထဲသို့ ကျရောက်သွားမည်ဖြစ်ပြီး ရုန်းထွက်နိုင်မည် မဟုတ်ပေ။

ထို့ကြောင့် ဤနေရာသည် သက်ရှိများအတွက် တားမြစ်နယ်မြေတစ်ခု ဖြစ်လာခဲ့လေသည်။

ထိုမျိုးနွယ်ခြား ကျင့်ကြံသူများအနေဖြင့် စိတ်ထဲတွင် မကျေမချမ်း ဖြစ်နေကြလျှင်ပင် ယခုအခါ ဤမြူခိုးနယ်မြေအတွင်းသို့ မဝင်ရဲကြတော့ပေ။

အနည်းငယ်မျှ သတိလွတ်သွားသည်နှင့် တစ်ပြိုင်နက် ၎င်းတို့သည် စိတ်ကူးယဉ်ကမ္ဘာထဲသို့ ကျရောက်သွားမည်ဖြစ်ပြီး ရှေးဟောင်းသားရဲများ၏ သတ်ဖြတ်ခြင်းကို ခံရမည်ဖြစ်သည်။

ရမ္မက်ခြောက်ပါးလောကီသစ်သီးများက အမှန်တကယ် အရေးကြီးသော်ငြား မိမိတို့၏ အသက်လေးက ပို၍ အရေးကြီးသည် မဟုတ်ပါလော။

ရမ္မက်ခြောက်ပါးလောကီနန်းတော်အတွင်းရှိ ရှေးဟောင်းသားရဲများမှာလည်း အိပ်မောကျနေသည့် အခြေအနေသို့ ရောက်ရှိနေပုံရသည်။

အဘယ်ကြောင့်ဆိုသော် ၎င်းတို့သည် မျိုးနွယ်ခြား မဟာယာနအဆင့် ကျင့်ကြံသူများနှင့် တိုက်ပွဲကြီးဆင်နွှဲခဲ့ရသဖြင့် အလွန်ပြင်းထန်စွာ ဒဏ်ရာရရှိထားသောကြောင့်ပင် ဖြစ်လေသည်။

သဘာဝကျကျပင် ၎င်းတို့၏ ခန္ဓာကိုယ်ပေါ်ရှိ ဒဏ်ရာများကို ပြန်လည်သက်သာလာစေရန် အချိန်အတိုင်းအတာတစ်ခုအထိ လိုအပ်ပေသည်။

ထိုရမ္မက်ခြောက်ပါးလောကီသစ်ပင်ကြီးမှာလည်း တစ်ဖန် ပြန်လည်အိပ်မောကျသွားပုံရသည်။

ထင်ရှားလှသည်မှာ ယခုအချိန်သည် ရမ္မက်ခြောက်ပါးလောကီနန်းတော်ထဲသို့ ဝင်ရောက်ရန် အကောင်းဆုံးအချိန်ပင် ဖြစ်လေသည်။

'ဟားဟား... ‘ကံကြမ္မာကူ’လို့ ခေါ်ရတာ တန်ပါပေတယ်... တစ်လကြာပြီးတဲ့နောက် အကောင်းဆုံးအချိန်အခါ ဖြစ်နေတာပဲ...'

ကျိုးစွေ့မှာ အလွန် စိတ်လှုပ်ရှားနေခဲ့၏။

သူ ဤမျှကာလကြာရှည်စွာ စောင့်ဆိုင်းခဲ့ရပြီးနောက် နောက်ဆုံးတွင် အချိန်အခါကောင်းကို ရရှိသွားခဲ့ချေပြီ။

ရွှစ်...

သူသည် တုံ့ဆိုင်းမနေတော့ဘဲ ခန္ဓာကိုယ်ကို တစ်ချက်လှုပ်ရှားလိုက်ကာ အဝေးရှိ ရမ္မက်ခြောက်ပါးလောကီနန်းတော်ဆီသို့ ချက်ချင်း ပျံသန်းသွားလေသည်။

တစ်ချိန်တည်းမှာပင် သူ၏ခန္ဓာကိုယ်ကို နှလုံးသားမျက်လုံးစွမ်းအားဖြင့် ဖုံးအုပ်လိုက်ပြီး ခန္ဓာကိုယ်ပေါ်ရှိ အငွေ့အသက်အားလုံးကို ဖုံးကွယ်လိုက်၏။

အဘယ်ကြောင့်ဆိုသော် ထိုမဟာယာနအဆင့် ရှေးဟောင်းသားရဲများမှာ အိပ်မောကျနေသည့် အခြေအနေတွင် ရှိနေသော်ငြား အကယ်၍ အငွေ့အသက်များ ယိုစိမ့်ထွက်သွားပါက ၎င်းတို့ကို လန့်နိုးသွားစေမည်မဟုတ်ဟု အာမမခံနိုင်သောကြောင့်ပင်။

အနည်းငယ် နှမြောစရာကောင်းသည်မှာ သေဆုံးသွားသော မျိုးနွယ်ခြား မဟာယာနအဆင့် ကျင့်ကြံသူ (၇) ယောက်၏ အလောင်းများကို ရှေးဟောင်းသားရဲများက စားသောက်သွားခဲ့ကြပြီး ၎င်းတို့၏ ခန္ဓာကိုယ်ပေါ်ရှိ သိုလှောင်အိတ်များကိုပင် ယခင် ထျန်းဖန်မျိုးနွယ်စု မဟာယာနအဆင့် ကျင့်ကြံသူများက လုယူသွားခဲ့ပုံရခြင်းပင် ဖြစ်လေသည်။

ထို့ကြောင့် ဤနေရာတွင် မည်သည့်အရာမျှ ကျန်ရစ်နေခဲ့ခြင်း မရှိပေ။

သို့မဟုတ်ပါက သူသည် ယခုတစ်ကြိမ် ဖီးနစ်အင်မော်တယ်စံအိမ်တော်ထဲတွင် မည်သည့်ရတနာမျှ မရရှိခဲ့လျှင်ပင် ဤမဟာယာနအဆင့် ကျင့်ကြံသူများ၏ သိုလှောင်အိတ်များကို ရရှိရုံဖြင့် ကြီးစွာသော ချမ်းသာကြွယ်ဝမှုကြီးကို ရရှိပြီဟု သတ်မှတ်နိုင်ပေသည်။

သို့သော် သူသည် အလွန်အမင်း နှမြောတသဖြစ်ခြင်း မရှိပေ။ အဘယ်ကြောင့်ဆိုသော် သူ၏ ကံကြမ္မာအခွင့်အရေးကို မရရှိသေးသောကြောင့်ပင် မဟုတ်ပါလော။

အချိန်သိပ်မကြာလိုက် ကျိုးစွေ့သည် ရမ္မက်ခြောက်ပါးလောကီနန်းတော်အတွင်းသို့ တိုက်ရိုက် ရောက်ရှိသွားခဲ့၏။

ဤနန်းတော်တွင် မည်သည့် တားမြစ်အစီအရင်မျှ မရှိပုံရပြီး တံခါးများ အဟောင်းသား ပွင့်ဟနေသည်ကို မြင်တွေ့လိုက်ရသည်။

သို့သော် သေချာတွေးကြည့်လျှင်လည်း အလွန်ပင် ပုံမှန်ဖြစ်နေသည်။ ရမ္မက်ခြောက်ပါးလောကီသစ်ပင်ကြီး ရှိနေခြင်းကပင် အင်အားအကောင်းဆုံး ကာကွယ်ရေးစွမ်းအား ဖြစ်နေသည်မဟုတ်ပါလော။

အဘယ်ကြောင့် တားမြစ်အစီအရင်များကို ထပ်မံလိုအပ်နေဦးမည်နည်း။

ဤသည်က ရမ္မက်ခြောက်ပါးလောကီသစ်ပင်ကြီး၏ မူရင်းရည်ရွယ်ချက်ပင် ဖြစ်နိုင်ပြီး ရန်သူများကို ဤနေရာသို့ ရောက်လာအောင် ဆွဲဆောင်ကာ စားသောက်ပြီး မြေဩဇာအဖြစ် ပြောင်းလဲပစ်ရန် ရည်ရွယ်ထားပုံရသည်။

မည်သို့ပင်ဆိုစေကာမူ ဤသစ်ပင်ကြီးမှာ အလွန်အန္တရာယ်များလှသော မိစ္ဆာသစ်ပင်တစ်ပင် ဖြစ်သည်မှာ အသေအချာပင် ဖြစ်လေသည်။

'အင်း... ဖုန်းရှီးတာအိုအရှင်က တကယ်ကို ဒီမှာရှိနေတာပဲ...'

ကျိုးစွေ့၏ စိတ်ထဲ၌ လှုပ်ရှားသွားပြီး သူ၏ နှလုံးသားမျက်လုံးစွမ်းအားဖြင့် အနည်းငယ် အာရုံခံကြည့်လိုက်၏။

ထိုအခါ နန်းတော်၏ အလယ်ဗဟိုတည့်တည့်တွင် ပေတစ်ထောင်ကျော် မြင့်မားသော သစ်ပင်ကြီးတစ်ပင် ထိုးထွက်နေသည်ကို ချက်ချင်း သတိပြုမိလိုက်သည်။ ၎င်း၏ ကိုယ်ထည်တစ်ခုလုံးမှာ ပန်းရောင်သန်းနေပြီး ချယ်ရီပင်တစ်ပင်နှင့် ဆင်တူကာ သစ်ကိုင်းများပေါ်တွင် ရောင်စုံသစ်သီးများ တွဲလောင်းကျနေလေသည်။

တစ်ချိန်တည်းမှာပင် ၎င်း၏ခန္ဓာကိုယ်ပေါ်မှ အနီရောင်မြူခိုးများ အမြောက်အမြား ထွက်ပေါ်နေပြီး မွှေးပျံ့သောရနံ့များက နှာခေါင်းထဲသို့ တိုးဝင်လာ၏။

အနီးသို့ ချဉ်းကပ်လာသော ကျင့်ကြံသူတိုင်း ချက်ချင်း တွေဝေမိန်းမောသွားမည်ဖြစ်ပြီး လောကီစံအိမ်တော်၏ စိတ်ကူးယဉ်ကမ္ဘာထဲသို့ ကျရောက်သွားကာ ရုန်းထွက်နိုင်မည်မဟုတ်ပေ။

သစ်ပင်ကြီး၏ အောက်တွင်မူ မဟာယာနအဆင့် ရှေးဟောင်းသားရဲများ နေရာယူထားကြလေသည်။

ထို့အပြင် အလွန်လှပသော လူသားမျိုးနွယ် အမျိုးသမီးတစ်ဦးလည်း သစ်ပင်အောက်တွင် တင်ပျဉ်ခွေထိုင်နေသည်ကို မြင်တွေ့ရ၏။ သို့ရာတွင် ယခုအခါ သူမသည် မျက်လုံးများကို တင်းတင်းပိတ်ထားပြီး အိပ်မောကျနေသည့်အခြေအနေသို့ ရောက်ရှိနေပုံရသည်။

'ဒီလိုကိုး... မဟာယာနအဆင့် ကျင့်ကြံသူတွေက ဒီနေရာကို လာချင်နေတာ အံ့ဩစရာတော့ မရှိဘူး...'

'သစ်ကိုင်းတွေပေါ်က ရမ္မက်ခြောက်ပါးလောကီသစ်သီးတွေကို ရချင်နေကြတာ ဖြစ်ရမယ်...'

'ဒီလို ထူးဆန်းတဲ့ သစ်သီးမျိုးက ဝိညာဉ်မူလစွမ်းအားကို မြှင့်တင်ပေးနိုင်ရုံသာမကဘဲ စိတ်မိစ္ဆာကပ်ဘေးကို ခုခံရာမှာလည်း ကျင့်ကြံသူတွေကို ကူညီပေးနိုင်တယ်...'

'မဟာယာနအဆင့် ကျင့်ကြံသူတွေအတွက်တောင် ကြီးမားတဲ့ အသုံးဝင်မှုတွေ ရှိနေပြီး တကယ့်ကို ကပ်ဘေးကျော်ဖြတ်ဖို့ အထောက်အကူပြုတဲ့ ရတနာတစ်ခုပဲ...'

ကျိုးစွေ့သည် နှလုံးသားမျက်လုံးကို အသုံးပြု၍ အရာဝတ္ထုများကို ခွဲခြားသိမြင်နိုင်စွမ်းကို အသုံးချလိုက်သည်။ သူသည် ဤကဲ့သို့သော ထူးဆန်းသည့် သစ်သီးမျိုးကို တစ်ခါမျှ မမြင်ဖူးခဲ့လျှင်ပင် ၎င်းသည် မည်သည့်အရာဖြစ်ကြောင်းကို သိရှိနိုင်ပြီး တစ်ချိန်တည်းမှာပင် ၎င်း၏ အသုံးဝင်မှု အချို့ကိုလည်း နားလည်သဘောပေါက်နိုင်လေသည်။

သူသည် အလွန်တရာ ဝမ်းမြောက်ဝမ်းသာ ဖြစ်သွားခဲ့၏။

သူ ကပ်ဘေးကျော်ဖြတ်ချိန်တွင် ‘အိပ်မက်ဝိညာဉ်ကူ’၏ အကူအညီရှိသဖြင့် မည်သည့် ရမ္မက်ခြောက်ပါးလောကီသစ်သီးမျှ မလိုအပ်သည်မှာ မှန်သော်ငြား သူ၏တာအိုလက်တွဲဖော် များပြားလှသဖြင့် သူမတို့ ကပ်ဘေးကျော်ဖြတ်ချိန်တွင် ရမ္မက်ခြောက်ပါးလောကီသစ်သီးက အများကြီး ကူညီပေးနိုင်သည်။

အဆိုးဆုံးအခြေအနေတွင် ၎င်းတို့ကို ရောင်းချလိုက်ကာ အင်မော်တယ်သလင်းကျောက် အမြောက်အမြားကို ရယူနိုင်သည် သို့မဟုတ် အခြားသော အဖိုးတန်ရတနာများနှင့် လဲလှယ်နိုင်ပေသည်။

ကျင့်ကြံသူ အများအပြားက ဝယ်ယူရန် ဆန္ဒရှိကြမည်ဟု သူ ယုံကြည်လေသည်။

အကယ်၍ ဤရမ္မက်ခြောက်ပါးလောကီသစ်သီးများကို ရရှိနိုင်ပါက ၎င်းတို့မှ ရရှိလာမည့် အကျိုးကျေးဇူးများမှာ မည်မျှကြီးမားမည်ကိုပင် မသိနိုင်တော့ပေ။

အဘယ်ကြောင့်ဆိုသော် ဤသည်မှာ အဋ္ဌမအဆင့် ဝိညာဉ်သစ်သီး အမျိုးအစားတွင် ပါဝင်နေသောကြောင့်ပင်။

'ဖုန်းရှီးတာအိုအရှင်က ဒီနေရာမှာ ပိတ်မိနေလိမ့်မယ်လို့ မထင်ထားဘူး...'

'ထင်ရှားလှတာကတော့ ရမ္မက်ခြောက်ပါးလောကီ အငွေ့အသက်တွေကြောင့် လောကီစံအိမ်တော်ရဲ့ စိတ်ကူးယဉ်ကမ္ဘာထဲကို ကျရောက်သွားတာပဲ...'

'ဒါပေမဲ့ ဒါက ဖုန်းရှီးတာအိုအရှင်အတွက်တော့ ဆိုးရွားတဲ့ကိစ္စ မဟုတ်ဘူး...'

'အကယ်လို့ စိတ်ကူးယဉ်ကမ္ဘာကို အောင်မြင်အောင် ဖောက်ထွင်းမြင်နိုင်မယ်ဆိုရင် သူမအတွက် တာအိုနှလုံးသားကို ဖြူစင်စေတဲ့ အကျိုးသက်ရောက်မှု ရှိလာနိုင်တယ်...'

'အဲဒီအချိန်ရောက်ရင် မဟာယာနအဆင့်ကို တက်လှမ်းတဲ့အခါမှာ သေချာမှုတစ်စိတ်တစ်ပိုင်း ပိုများလာမှာပဲ...'

'ဒါကလည်း ဖုန်းရှီးတာအိုအရှင်အတွက်တော့ ကံကြမ္မာအခွင့်အရေးတစ်ခုလို့ သတ်မှတ်လို့ရတယ်...'

'ဒါပေမဲ့ ဒီမှာစောင့်ကြပ်နေတဲ့ ရှေးဟောင်းသားရဲတွေက သူမကို ဘာလို့ မသတ်ကြတာလဲ... သူမကို သူတို့ရဲ့ အဖော်အဖြစ် သတ်မှတ်ထားကြပုံပဲ...'

'နေဦး... သူမရဲ့ ခန္ဓာကိုယ်ထဲက ဖီးနစ်သွေးမျိုးဆက်နဲ့များ သက်ဆိုင်နေမလား...'

ထိုအချိန်တွင် ကျိုးစွေ့သည် ဖုန်းရှီးတာအိုအရှင်၏ ခန္ဓာကိုယ်ပိုင်းဆိုင်ရာ ထူးခြားချက်ကို သတိရသွားခဲ့လေသည်။

ထိုအရာမှာ ဖုန်းရှီးတာအိုအရှင်၏ ခန္ဓာကိုယ်ထဲတွင် ဖီးနစ်သွေးမျိုးဆက် အနည်းငယ်ပါဝင်နေပြီး သွေးမျိုးဆက်သန့်စင်မှုမှာလည်း မနိမ့်ကျသောကြောင့်ပင် ဖြစ်၏။

ထို့ကြောင့်ပင် သူမ၏ပါရမီက ဤမျှလောက် အံ့မခန်း ဖြစ်နေခြင်း ဖြစ်လေသည်။

သွေးမျိုးဆက်သန့်စင်မှုအရ ဆိုရလျှင် သူမသည် ဖီးနစ်၏ လက်အောက်ခံ မျိုးနွယ်တစ်ခုအဖြစ် သတ်မှတ်နိုင်ပေသည်။

ဤနေရာသည် ဖီးနစ်အင်မော်တယ်စံအိမ်တော် ဖြစ်ကြောင်းကို သိထားရမည် မဟုတ်ပါလော။

အင်မော်တယ်စံအိမ်တော်အတွင်း၌ နေထိုင်ကြသော သက်ရှိများမှာ အခြေခံအားဖြင့် ဖီးနစ်၏ လက်အောက်ခံ မျိုးနွယ်များချည်းသာ ဖြစ်ကြလေသည်။

တစ်နည်းအားဖြင့် ဆိုရသော် အင်မော်တယ်စံအိမ်တော်အတွင်းရှိ သက်ရှိများက ဖုန်းရှီးတာအိုအရှင်ကို မိမိတို့၏လူအဖြစ် သတ်မှတ်ထားခြင်းမှာလည်း ထူးဆန်းသော ကိစ္စရပ်တစ်ခု မဟုတ်ပေ။

အကယ်၍ သွေးမျိုးဆက်သန့်စင်မှုသာ ပိုမိုမြင့်မားနေပါက ခေါင်းဆောင်အဖြစ်ပင် သတ်မှတ်ခံရနိုင်ချေရှိသည်။