အခန်း ၈၉၅

အခန်း (၈၉၅) - လက်သီး တစ်ချက်၏ စွမ်းအား

"အတွေး တစ်ချက်တည်းနဲ့ ဆေးဖော်စပ်တာ... ရင်ပြင် တစ်ခုလုံးကို တုန်လှုပ်သွားစေတာပဲ..."

အတွေး တစ်ချက်တည်းဖြင့် ဆေးဖော်စပ်သော နတ်ဘုရားဆန်သည့် ပညာရပ်ကို မျက်မြင်ကိုယ်တွေ့ မြင်တွေ့လိုက်ရသည့်အခါ ထိုနေရာရှိ လူတိုင်း လုံးဝ ဆွံ့အ မှင်သက်သွားကြတော့၏။

ယွင်ယိုဇီ၊ ဂိုဏ်းချုပ် ရှင်းထျန်း၊ ဝမ်ကျိုကျုံးနှင့် အခြားသူများ အားလုံး ဖုန်းဝူချန်၏ ကြီးစိုးသော စွမ်းရည်များကို ယခုမှသာ အမှန်တကယ် နားလည် သဘောပေါက်သွားကြတော့သည်။

အင်မော်တယ် လက်နက် စံအိမ်နှင့် ကျန်း မိသားစုတို့ နဂါးနတ်ဘုရား မဟာမိတ်အဖွဲ့သို့ ဝင်ရောက်ခဲ့ခြင်းမှာ အလွန်တရာ မှန်ကန်သော ဆုံးဖြတ်ချက် တစ်ခု ဖြစ်ကြောင်း၊ ထျန်းရှန်းဇီ နဂါးနတ်ဘုရား နန်းတော်၏ အကြီးအကဲချုပ် ဖြစ်လာခြင်းကလည်း မှန်ကန်ကြောင်း၊ သန့်ရှင်းသော ဝိညာဉ် ကျောင်းတော်နှင့် ပေရွှမ် ဂိုဏ်းတို့ မဟာမိတ်အဖွဲ့သို့ ဝင်ရောက်ခဲ့ခြင်းမှာ ပို၍ပင် မှန်ကန်ကြောင်း အားလုံးက သိရှိသွားကြ၏။

ယွင်ယိုဇီနှင့် ရှင်းထျန်းတို့မှာ နဂါးနတ်ဘုရား မဟာမိတ်အဖွဲ့သို့ ဝင်ရောက်ရန် သဘောတူခဲ့မိသည့် အတွက် ရင်တွင်း၌ တိတ်တဆိတ် ဝမ်းသာနေမိကြ၏။ ဆေးဧကရာဇ် တစ်ပါး၏ နောက်သို့ လိုက်ပါခွင့် ရရှိခြင်းက သူတို့အတွက်တော့ ကြီးမားလှသော ဂုဏ်ယူစရာ တစ်ရပ်ပင်။

အတွေး တစ်ချက်တည်းဖြင့် ဆေးဖော်စပ်သော ကြောက်မက်ဖွယ် နတ်ဘုရားဆန်သည့် ပညာရပ်ကို ယွင်ယိုဇီနှင့် အခြားသူများ ပထမဆုံး အကြိမ် မျက်မြင်တွေ့ရှိဖူးခြင်းပင် ဖြစ်သည်။

ယခင်က ဤပညာရပ်ကို ရှေးဟောင်း မှတ်တမ်းများတွင်သာ ဖတ်ရှုဖူးပြီး ကြားသာ ကြားဖူးခဲ့ကြသော်လည်း ယခုကဲ့သို့ လူကိုယ်တိုင် မျက်မြင် မတွေ့ဖူးခဲ့ကြချေ။ ယခု မြင်တွေ့လိုက်ရသည့် အခါတွင်မူ ဆေးဧကရာဇ် ဆိုသည်မှာ မည်သို့သော အရာဖြစ်ကြောင်း သူတို့ အမှန်တကယ် နားလည် သဘောပေါက်သွားကြပြီး အတွေး တစ်ချက်တည်းဖြင့် ဆေးဖော်စပ်ခြင်း၏ ကြောက်မက်ဖွယ် စွမ်းအားကိုလည်း ရှင်းလင်းစွာ သိရှိသွားကြ၏။

"အဘိုးကြီး... ခင်ဗျားရဲ့ ဆေးပညာကို လာပြမနေပါနဲ့... ဒါက ရှက်စရာ ကောင်းရုံပဲ ရှိမှာပါ... ခင်ဗျားရဲ့ အသက်အရွယ်နဲ့ဆိုတော့... ခင်ဗျား ဘာမှ မလုပ်ရသေးခင် ဒေါသထွက်ပြီး သေသွားမှာ စိုးလို့... ခင်ဗျားရဲ့ စိတ်ဓာတ်ကို ကျုပ် ထပ်မချိုးနှိမ်ချင်တော့ဘူး..."

ဖုန်းဝူချန်က မာနထောင်လွှားစွာ သရော်လိုက်ရာ သူ၏ စကားများတွင် မထီမဲ့မြင် ပြုမှုများ အပြည့်အဝ ပါဝင်နေတော့၏။

မိုဖုန်း (မိစ္ဆာ လေရူး အရှင်သခင်)မှာ ဒေါသကြောင့် မျက်နှာ တစ်ခုလုံး တွန့်လိမ်နေပြီး သူ၏ အိုမင်းနေသော မျက်နှာပေါ်ရှိ အရေပြားများနှင့် ကြွက်သားများ တုန်ယင်နေသော်လည်း ဘာမှ ပြန်မပြောနိုင်ခဲ့ချေ။

အတွေး တစ်ချက်တည်းဖြင့် ဆေးဖော်စပ်နိုင်သော နယ်ပယ်က ဆေးဧကရာဇ်၏ အဆင့်အတန်းသို့ ရောက်ရှိနေပြီ ဖြစ်ရာ မိုဖုန်း (မိစ္ဆာ လေရူး အရှင်သခင်) မည်မျှပင် အစွမ်းထက်နေပါစေ.. ဆေးဧကရာဇ် တစ်ပါးကိုတော့ ဘယ်လိုမှ ကျော်လွန်နိုင်မည် မဟုတ်ချေ။

"မိုဖုန်း (မိစ္ဆာ လေရူး အရှင်သခင်)... မိစ္ဆာ မျိုးနွယ်စုရဲ့ အစွမ်းထက် ပညာရှင်တွေ အများကြီးကို သန့်ရှင်းသော ဝိညာဉ် ကျောင်းတော်ဆီ ခေါ်လာတာ... ဆေးပညာရှင် ပြိုင်ပွဲကို လာကြည့်ရုံ သက်သက်တော့ သေချာပေါက် မဟုတ်ဘူးမလား..."

ဖုန်းဝူချန်က အေးစက်စက် မေးလိုက်ပြီး သူ၏ အကြည့်များက မိုဖုန်း (မိစ္ဆာ လေရူး အရှင်သခင်)ထံသို့ ဝေ့ကြည့်သွားသည်။

စကားပြောနေစဉ်မှာပင် ဖုန်းဝူချန်က လက်တစ်ချက် ဝှေ့ယမ်းလိုက်ရာ အဋ္ဌမအဆင့် ဆေးလုံးတစ်လုံးက ကျန်းဝူဟန်ထံသို့ လျင်မြန်စွာ လွင့်မျောသွားတော့သည်။

"မိသားစု ခေါင်းဆောင် ကျန်း... ဒီအဋ္ဌမအဆင့် ဆေးလုံးက ခင်ဗျားကို နတ်ဘုရားအသွင်ပြောင်းဘုံ ဆဋ္ဌမအလွှာကို တက်လှမ်းနိုင်အောင် ကူညီပေးနိုင်လိမ့်မယ်..."

ဖုန်းဝူချန်က ခပ်ရေးရေး ပြုံးရင်း ပြောလိုက်၏။

"မဟာမိတ် ခေါင်းဆောင်ကြီးရဲ့ ရက်ရောတဲ့ လက်ဆောင်အတွက် ကျေးဇူး အများကြီး တင်ပါတယ်..."

ကျန်းဝူဟန်က အလောတကြီး ကျေးဇူးတင်စကား ဆိုလိုက်ရာ သူ၏ ရင်ထဲတွင် အလွန်အမင်း ဝမ်းသာရွှင်မြူးနေတော့၏။

အဋ္ဌမအဆင့် ဆေးလုံးများကို ဤမျှ ပေါ့ပေါ့ပါးပါး ပေးကမ်းနေခြင်းက ဖုန်းဝူချန်၏ မျက်လုံးထဲတွင် ဆေးလုံးများ ဆိုသည်မှာ မည်သို့မျှ တန်ဖိုး မကြီးမားကြောင်းကို ရှင်းလင်းစွာ ပြသနေ၏။ လိုအပ်သော ဆေးဖက်ဝင် အပင်များသာ ရှိပါက သူက အချိန်မရွေး လွယ်လွယ်ကူကူ ဆေးဖော်စပ်နိုင်သည် လေ။

အကယ်၍ အဋ္ဌမအဆင့် ဆေးလုံးများကို မျက်တောင်တစ်ခတ်စာ အချိန်အတွင်း ဖော်စပ်နိုင်ပါက မည်သည့် ဆေးလုံးက ဖုန်းဝူချန်ကို အခက်တွေ့စေနိုင်ပါမည်နည်း။

ထိုအခိုက်အတန့်တွင် ဖုန်းဝူချန်၏ ကြောက်မက်ဖွယ် နတ်ဘုရားဆန်သည့် ပညာရပ်များကို မျက်မြင်တွေ့ရှိလိုက်ရသဖြင့် လူတိုင်း၏ မျက်လုံးများထဲတွင် အလွန်အမင်း ရိုသေလေးစားမှုများနှင့် အံ့အားသင့်မှုများ ပြည့်နှက်နေတော့၏။

ထိုနေရာရှိ လူအများစုမှာ နဂါးနတ်ဘုရား မဟာမိတ်အဖွဲ့မှ ဖြစ်ကြသော်လည်း အများစုမှာ သူတို့၏ ဂိုဏ်းများက မဟာမိတ်အဖွဲ့သို့ ဝင်ရောက်ရန် ဆုံးဖြတ်ခဲ့ခြင်းကြောင့်သာ လိုက်ပါလာကြသည်။ ဖုန်းဝူချန် ဆိုသော မဟာမိတ် ခေါင်းဆောင်ကြီး အကြောင်းကို သိပ်မသိရှိကြချေ။ အချို့ဆိုလျှင် သူ့ကို လုံးဝ အရေးပင် မစိုက်ခဲ့ကြပေ။

သို့သော် ယခုအခါ အခြေအနေများ ပြောင်းလဲသွားခဲ့၏။ ဖုန်းဝူချန်၏ ကြောက်မက်ဖွယ် စွမ်းအားများနှင့် နတ်ဘုရားဆန်သည့် ပညာရပ်များကို မျက်မြင်တွေ့ရှိလိုက်ရပြီးနောက် သူတို့ အားလုံး အလွန်အမင်း အံ့အားသင့် ထိတ်လန့်သွားကြပြီး နဂါးနတ်ဘုရား မဟာမိတ်အဖွဲ့သို့ ဝင်ရောက်ခဲ့မိသည့် အတွက်လည်း ရင်တွင်း၌ တိတ်တဆိတ် ဝမ်းသာနေမိကြသည်။

မိုဖုန်း (မိစ္ဆာ လေရူး အရှင်သခင်)က ဘာမှ ပြန်မဖြေခဲ့ချေ။

သို့သော် ထျန်းကုက ရေခဲတမျှ အေးစက်စွာ ဝင်ရောက် စိန်ခေါ်လိုက်သည်။

"ဖုန်းဝူချန်... ငါနဲ့ တိုက်စမ်း..."

"ဆေးပညာမှာ ရှုံးသွားတော့... အခု အင်အားနဲ့ ငါ့ကို နိုင်ဖို့ ကြိုးစားတော့မလို့လား..."

ဖုန်းဝူချန်၏ နှုတ်ခမ်းထောင့်များက အန္တရာယ်များသော အပြုံးတစ်ခု အဖြစ် ကွေးတက်သွားပြီး သူ၏ အေးစက်စက် အကြည့်များက ထျန်းကုထံသို့ စူးစိုက်သွားသည်။

ဖုန်းဝူချန်က ညှာတာမှု ကင်းမဲ့စွာ သရော်လိုက်သည်။

"မင်းက ငါ့ပြိုင်ဘက် မဟုတ်ပါဘူး... ပြီးတော့ အခု မင်းက ဒဏ်ရာရထားတာလေ... မင်းကို နိုင်သွားလည်း ငါ့အတွက် ဘာဂုဏ်ယူစရာမှ မရှိဘူး..."

ဖုန်းဝူချန်၏ မထီမဲ့မြင် ပြုမှုက ထျန်းကုကို နောက်တစ်ကြိမ် ဒေါသပေါက်ကွဲသွားစေပြီး လူသတ် အငွေ့အသက်များ ထိန်းချုပ်၍ မရနိုင်လောက်အောင် ပေါက်ကွဲထွက်လာတော့၏။

"မင်းက အချိန်မရွေး ငါ့ကို နိုင်နိုင်တဲ့ ပုံစံမျိုးနဲ့ လာမပြောစမ်းနဲ့..."

ထျန်းကုက ဒေါသတကြီး ဟိန်းဟောက်လိုက်ရာ မိစ္ဆာ မျိုးနွယ်စု၏ ကြောက်မက်ဖွယ် စွမ်းအားများ ရူးသွပ်စွာ ပေါက်ကွဲထွက်လာတော့၏။

"ဝှစ်.. ဝီ"

တောက်ပသော အနက်ရောင် အလင်းတန်းများ ယှက်သိုင်းနေ၏။ ဖျက်ဆီးခြင်း စွမ်းအင်များ ရူးသွပ်စွာ တိုက်ခတ်သွားရာ လေဟာနယ်များပင် တစ်လွှာပြီး တစ်လွှာ ပြိုကျ ပျက်စီးသွားသည်။ သန့်ရှင်းသော ဝိညာဉ် ကျောင်းတော် တစ်ခုလုံး အမှောင်ကျသွားပြီး ထျန်းကုကို ဗဟိုပြုကာ မုန်တိုင်းကြီး တစ်ခု ဖြစ်ပေါ်လာတော့သည်။

ဒဏ်ရာရထားသည့် အခြေအနေတွင်ပင် ထျန်းကု၏ အရှိန်အဝါက နတ်ဘုရားအသွင်ပြောင်းဘုံ ပထမအလွှာသို့ ရောက်ရှိနေဆဲ ဖြစ်ရာ အမှန်တကယ်ပင် အလွန်တရာ အစွမ်းထက်လှ၏။

"အုန်း.."

ထျန်းကုက အလကား စကားများကို ထပ်မပြောတော့ဘဲ လေဟာနယ်ကို အားကုန် နင်းလိုက်ရာ ရင်ပြင်ထက်တွင် ဧရာမ တွင်းနက်ကြီး တစ်ခု ဖြစ်ပေါ်သွားသည်။ ထျန်းကု၏ ပုံရိပ်က လျှပ်စီးတန်း တစ်ခုပမာ ပစ်ထွက်သွားခဲ့၏။

ဖုန်းဝူချန်က မျက်မှောင်အနည်းငယ် ကြုတ်လိုက်ပြီး မြေပြင်ကို ခြေဖျားဖြင့် ခပ်ဖွဖွ နင်းလိုက်၏။ နောက်တစ်စက္ကန့်တွင် သူက ကျောင်းတော် အထက် ကောင်းကင်ယံသို့ လျှပ်တစ်ပြက် ရောက်ရှိသွားခဲ့၏။

ကျောင်းတော် အတွင်း၌ တိုက်ခိုက်မည် ဆိုပါက အစွမ်းထက် ပညာရှင်များ၏ အကာအကွယ် ရှိနေသည့်တိုင် အပြစ်မဲ့သူများ ထိခိုက် သေဆုံးမှုများ သေချာပေါက် ရှိလာမည်သာ ဖြစ်၏။

ထျန်းကုက စတင် တိုက်ခိုက်လာပြီ ဖြစ်ရာ ဖုန်းဝူချန် အနေဖြင့်လည်း ပြန်လည် ရင်ဆိုင်ရုံမှလွဲ၍ အခြား ရွေးချယ်စရာ မရှိတော့ချေ။

"ဘုန်း.."

“ဝီ... ဝီ…”

ထျန်းကုက ကောင်းကင်ယံသို့ ထိုးတက်လာရာ လေဟာနယ်ပင် ပြင်းထန်စွာ တုန်ခါသွားသည်။ သူ၏ အမြန်နှုန်းမှာ အလွန်တရာ မြန်ဆန်လွန်းလှသဖြင့် မျက်တောင်တစ်ခတ်စာ အချိန်အတွင်းမှာပင် ရောက်ရှိလာခဲ့၏။

“ဝီ... ဝီ…”

ဖုန်းဝူချန်က စွမ်းအားများကို လျင်မြန်စွာ အသက်သွင်းလိုက်ပြီး သူ၏ တိုက်ပွဲဝင် ချပ်ဝတ်နှင့် လက်အိတ်များကို ဆင့်ခေါ်လိုက်၏။ တောက်ပသော သွေးရောင် အလင်းတန်းများ ကောင်းကင်ယံသို့ ထိုးတက်သွားပြီး ကြီးမား ကျယ်ပြန့်သော အရှိန်အဝါ တစ်ခု လွှမ်းခြုံလာတော့သည်။ ဖုန်းဝူချန်က သွေးမိစ္ဆာ နတ်ဘုရားကြီး တစ်ပါးပမာ ရပ်တည်နေပြီး သူ၏ အရှိန်အဝါက နတ်ဘုရား

အသွင်ပြောင်းဘုံ ပထမအလွှာ အထွတ်အထိပ်သို့ ရူးသွပ်စွာ ထိုးတက်သွားသည်။

‘ဟူး…’

ကြောက်မက်ဖွယ် စွမ်းအားကြီး ပေါက်ကွဲထွက်လာမှုကို မြင်လိုက်ရသည့်အခါ နဂါးနတ်ဘုရား မဟာမိတ်အဖွဲ့မှ လူများမှာ ကြောက်လန့်တကြား လေအေးများ ရှူသွင်းလိုက်မိကြတော့သည်။

"ဖုန်းဝူချန်က တကယ်ပဲ ဒီလောက် ကြောက်စရာ့ စွမ်းအားကို ပိုင်ဆိုင်ထားတာလား... နတ်ဘုရားအသွင်ပြောင်းဘုံ ပထမအလွှာ အထွတ်အထိပ်ပါလား..."

သန့်ရှင်းသော ဝိညာဉ် ကျောင်းတော်မှ ပါရမီရှင် ကျောင်းသား တစ်ဦးက အလွန်အမင်း ထိတ်လန့်တကြား အော်ဟစ်လိုက်၏။

"ဘယ်လိုလုပ် ဖြစ်နိုင်မှာလဲ... ငါတို့ ကျောင်းတော်ရဲ့ နံပါတ်တစ် ပါရမီရှင်ထက်တောင် ပိုပြီး အစွမ်းထက်နေသေးတယ်..."

"ဒါက မဟာမိတ် ခေါင်းဆောင်ကြီးရဲ့ တကယ့် စွမ်းအား အစစ်အမှန်ပဲလား... အဋ္ဌမအဆင့် အဆင့်မြင့် အင်မော်တယ် လက်နက်တွေ ပါလား..."

"အရမ်း... အစွမ်းထက်တာပဲ..."

သန့်ရှင်းသော ဝိညာဉ် ကျောင်းတော်မှ ကျောင်းသားများ အားလုံး အလွန်အမင်း ကြောက်လန့်နေကြတော့၏။ ဖုန်းဝူချန်က ဤမျှ ရက်စက်ကြမ်းကြုတ်သော စွမ်းအားကို ပိုင်ဆိုင်ထားလိမ့်မည်ဟု မည်သူမျှ ထင်မှတ်မထားခဲ့ကြချေ။

ဝမ်ကျိုကျုံး၊ ရှင်းထျန်းနှင့် အခြားသူများလည်း ဖုန်းဝူချန်၏ ကြောက်မက်ဖွယ် စွမ်းအားကြောင့် အလွန်အမင်း အံ့အားသင့်သွားကြရသည်။

"သူ့ရဲ့ အရှိန်အဝါက ငါ့ထက်တောင် ပိုစွမ်းနေပါလား..."

ထျန်းကုမှာ အကြီးအကျယ် တုန်လှုပ်သွားရ၏။ ဖုန်းဝူချန်၏ တိုက်ခိုက်နိုင်စွမ်းက ဤမျှ ကြောက်စရာ ကောင်းလိမ့်မည်ဟု သူ လုံးဝ ထင်မှတ်မထားခဲ့ချေ။

မိစ္ဆာ မျိုးနွယ်စု၏ ထိပ်တန်း ပါရမီရှင် တစ်ဦး အနေဖြင့် ထျန်းကုက သူ၏ သိုင်းပညာနှင့် ဆေးပညာ ပါရမီမှာ မည်သူ့ထက်မဆို သာလွန်သည်ဟု အမြဲ ယုံကြည်ထားခဲ့၏။ သို့သော် ဖုန်းဝူချန်ကို ရင်ဆိုင်ရချိန်တွင်မူ သူ၏ စွမ်းအားနှင့် ဆေးပညာ နှစ်ခုစလုံးမှာ ဖိနှိပ်ခံလိုက်ရပြီး သူ၏ မာနတရားများ အားလုံး ဖုန်းဝူချန်၏ ခြေအောက်တွင် ညှာတာမှု ကင်းမဲ့စွာ နင်းချေခံလိုက်ရသည့်အလား ခံစားနေရတော့သည်။

ခဏမျှ အံ့အားသင့်သွားပြီးနောက် ထျန်းကု၏ မျက်နှာမှာ နောက်တစ်ကြိမ် မှောင်မိုက်လာပြန်၏။ ယခုအခါ မြားက လေးကြိုးပေါ် ရောက်နေပြီ ဖြစ်ရာ ပစ်လွှတ်ရုံမှ လွဲ၍ အခြား ရွေးချယ်စရာ မရှိတော့ချေ။

"အုန်း အုန်း"

“ဝီ... ဝီ…”

ထျန်းကုက လျှပ်တစ်ပြက် ရောက်ရှိလာပြီး အားပြင်းသည့် လက်သီး တစ်ချက် ပစ်သွင်းချလိုက်၏။ ဖုန်းဝူချန်ကလည်း နည်းနည်းလေးမျှ ကြောက်ရွံ့ခြင်း မရှိဘဲ ထိပ်တိုက် ရင်ဆိုင်လိုက်ရာ ကမ္ဘာနှင့် မြေကြီးကို တုန်လှုပ်စေသော ပေါက်ကွဲသံ ထွက်ပေါ်လာပြီး ကြောက်မက်ဖွယ် စွမ်းအင် လှိုင်းဂယက်များ တွန့်ခေါက်သွားတော့သည်။

သို့သော် ဤထိပ်တိုက် ဝင်တိုက်မိမှုတွင် ထျန်းကုမှာ အနောက်သို့ လွင့်စင်ထွက်သွားခဲ့ပြီး သူ၏ ပါးစပ်မှ သွေးစိမ်းများ ယိုစီးကျလာကာ လက်မောင်း တစ်ဖက်လုံးလည်း အရိုးများ ကျိုးကြေသွားသည့်အလား ပြင်းထန်စွာ နာကျင်နေတော့၏။

ဤရက်စက်ကြမ်းကြုတ်သော ဝင်တိုက်မိမှုကြောင့် ထျန်းကု တစ်ယောက် နောက်ထပ် တစ်ကြိမ် ဒဏ်ရာ ရရှိသွားခဲ့၏။

"ဒီလောက် လွှမ်းမိုးဖိနှိပ်နိုင်စွမ်းရှိတဲ့ စွမ်းအား... ဒါ ဘယ်လိုလုပ် ဖြစ်နိုင်မှာလဲ..."

ထျန်းကု၏ နှလုံးသားမှာ ကြောက်ရွံ့မှုကြောင့် နိမ့်ကျသွားပြီး သူ၏ မျက်နှာတွင် မယုံကြည်နိုင်မှုများ အပြည့်အဝ ဖုံးလွှမ်းနေတော့၏။

သူ၏ အကောင်းဆုံး အခြေအနေတွင်ပင် ဖုန်းဝူချန်ကို မယှဉ်နိုင်ခဲ့ရာ ယခုကဲ့သို့ ဒဏ်ရာရထားချိန်တွင် ဆိုလျှင်မူ ပို၍ပင် ဆိုဖွယ်ရာ မရှိတော့ချေ။

‘ဂလု…’

လက်သီး တစ်ချက်တည်းဖြင့် ထျန်းကုကို လွင့်စင်သွားအောင် လုပ်နိုင်ခဲ့သည်တဲ့လား။

ဒါက ဘယ်လောက်တောင် ကြောက်စရာကောင်းတဲ့ စွမ်းအားလဲ။ လူအုပ်ကြီး တစ်ခုလုံး အလွန်အမင်း ထိတ်လန့် ကြောက်ရွံ့သွားကြတော့၏။

မိုချန်ဟွာ ကဲ့သို့သော မိစ္ဆာ မျိုးနွယ်စုမှ အစွမ်းထက် ပညာရှင်များပင်လျှင် အကြီးအကျယ် တုန်လှုပ်သွားကြရသည်။

"ကိုယ့်အဆင့်ကိုယ် မသိတဲ့ သူ..."

ဖုန်းဝူချန်က အေးစက်စက် သရော်လိုက်၏။

လျှပ်တစ်ပြက် နေရာရွှေ့ပြောင်းခြင်း။

အလွန်တရာ ဆန်းကြယ်ပြီး မှော်ဆန်လှသော ခြေကွက် တစ်ခုကို အသုံးပြုလိုက်သည့်အခိုက် ဖုန်းဝူချန်၏ ပုံရိပ်က လျှို့ဝှက်ဆန်းကြယ်စွာ ပျောက်ကွယ်သွားလေသည်။

မျက်တောင်တစ်ခတ်စာ အချိန်အတွင်းမှာပင် ဖုန်းဝူချန်က ထျန်းကု၏ အရှေ့တွင် ရုတ်တရက် ထွက်ပေါ်လာပြီး လက်သီး ပင့်ထိုးလိုက်တော့သည်။

"ဘာ..."

ထျန်းကု၏ မျက်နှာအမူအရာ ဆိုးရွားစွာ ပြောင်းလဲသွားပြီး ထိတ်လန့်တကြား အော်ဟစ်လိုက်၏။

"မိစ္ဆာစွမ်းအင် အကာအကွယ်လွှာ... ဆန်းကြယ်ဝိညာဉ် တိုက်ပွဲဝင် ချပ်ဝတ်..."

သွေးရောင် အလင်းတန်းများ လျှပ်တစ်ပြက် တောက်ပနေသော လက်သီး ဝင်တိုက်မိသည့်အခိုက် ထျန်းကု၏ စွမ်းအင် အကာအကွယ်လွှာကို လုံးဝ ကြေမွ ပျက်စီးသွားစေတော့၏။ မိစ္ဆာ လက်နက်များ ဖြစ်သော တိုက်ပွဲဝင် ချပ်ဝတ်ကို ဖြတ်ကျော်ပြီး ဝင်ရောက်လာရာ ထျန်းကု တစ်ယောက် သွေးအန်လျက် အဝေးသို့ အမြောက်ဆံ တစ်ခုပမာ ပစ်လွင့်သွားတော့သည်။

"ဒါ ဘယ်လိုလုပ် ဖြစ်နိုင်မှာလဲ... သူက ငါ့ရဲ့ ကာကွယ်မှုတွေကို လုံးဝ လျစ်လျူရှုပြီး တိုက်ခိုက်လိုက်တာလား... ဒါက ဘယ်လို စွမ်းအားမျိုးလဲ..."

ထျန်းကုမှာ ရင်တွင်း၌ အလွန်အမင်း ထိတ်လန့်သွားပြီး သူ၏ မိစ္ဆာစွမ်းအင် အကာအကွယ်လွှာနှင့် မိစ္ဆာ လက်နက် ချပ်ဝတ်တို့က ဖုန်းဝူချန်၏ စွမ်းအားကို လုံးဝ မခံနိုင်ကြောင်း တွေ့ရှိလိုက်ရတော့၏။