အခန်း ၃၈၈

အပိုင်း(၄၈၈)

တောင်းဆိုထားသော အချက်အလက် - ဆေရှန် ကီရို ကို တိုက်ခိုက်ရန် နည်းလမ်း။

အစီရင်ခံစာ စတင်နေပါပြီ...

“ဝေဖန်တာတော့ မဟုတ်ပါဘူး... လိုအပ်တယ်ဆိုတာ သိရလို့ ဝမ်းသာပေမဲ့ ဒီအတွက် အစီအစဉ် တကယ်ပဲ လိုအပ်လို့လား... ဆောရီး... ငါ အာရုံစိုက်လိုက်ပါ့မယ်...”

“ပထမဆုံးအနေနဲ့ သူ နာကျင်နေတယ်... ဒါပေမဲ့ မသေသေးဘူး...”

လင်းတုန်းသည် လေထဲတွင် လွင့်ထွက်နေသော ကီရို ၏ ကိုယ်ပေါ်သို့ အမြောက် နှစ်လက်စလုံးဖြင့် ပစ်ခတ်လိုက်၏။ ထိုအရာက ကီရို ကို နောက်သို့ လွင့်ထွက်သွားစေပြီး ပွင့်နေသော တံခါးပေါက်အပေါ်ရှိ နံရံနှင့် သွားရောက် ရိုက်မိသွားစေသည်။ ထိုနေရာမှ သူ၏ ခန္ဓာကိုယ်သည် အောက်သို့ ပြုတ်ကျလာပြီး ကြမ်းပြင်ပေါ်တွင် ခွေခေါက်ကျသွားသော်လည်း သူသည် တုန်ယင်စွာဖြင့် မတ်တပ်ရပ်ရန် ကြိုးစားလာခဲ့၏။

“အဲဒါ တော်တော် အရည်အသွေးမြင့်တဲ့ သံချပ်ကာပဲ... အကောင်းစားကြီး... ဆေရှန် ဝိညာဉ်ပန်းပဲဆရာ တွေက ဒီအရာနဲ့ ပတ်သက်ပြီး ကလေးကလား လုပ်ထားတာ မဟုတ်ဘူးဆိုတာတော့ ငါ သေချာပေါက် ပြောနိုင်တယ်...”

မီးခိုးရောင် မာဒြာ အပြင်ဘက် သံချပ်ကာပြားများသည် အက်ကွဲကာ ပဲ့ထွက်နေပြီး သံချပ်ကာထဲမှ မီးခိုးများ ထွက်ပေါ်နေ၏။ သို့သော် ကျိုးပဲ့နေသော အပြားများ၏ အောက်တွင် ရွေ့လျားနေသော ငွေရောင်နှင့် ရွှေရောင် အစိတ်အပိုင်းများကိုသာ မြင်တွေ့ရလေသည်။ ကီရို သည် သူ၏ သံချပ်ကာကို အသက်သွင်းလိုက်ရာ သံချပ်ကာ တစ်ခုလုံးရှိ အမြုတေကြိုး များသည် ဒရော့စ် နားမလည်သော နည်းလမ်းတစ်ခုဖြင့် ချိတ်ဆက်ကာ အလုပ်လုပ်လာကြတော့၏။ သံခမောက် အတွင်းမှနှင့် အဆစ်များ အားလုံးမှနေ၍ ရွှေရောင် အလင်းတန်းများ တောက်ပလာခဲ့သည်။

“မင်း မြင်နေရတာက... အို... ခွန်အားနဲ့ အမြန်နှုန်းကို အားဖြည့်ပေးမယ့် ကာကွယ်သူ နည်းစနစ်၊ သံချပ်ကာ အတွင်းဘက်က ဖန်တီးသူ နည်းစနစ် အကာအရံ နဲ့ ကိုယ်ပိုင် လမ်းညွှန် မှော်ပစ္စည်း ပါဝင်တဲ့ အုပ်ချုပ်သူ နည်းစနစ် တိုက်ခိုက်မှုတွေပဲ... အဲဒါက မင်းဆီကို တည့်တည့်ချိန်ရွယ်လာလိမ့်မယ်...”

လင်းတုန်း၏ အမြောက်ကြောင့် ပဲ့ထွက်သွားသော ကြမ်းပြင်မှ ကျောက်တုံး အပိုင်းအစများကို အဝါရောင် မြေကြီး အော်ရာ က လက်သီးဆုပ်အရွယ် ဘောလုံးများအဖြစ် ပုံဖော်လိုက်၏။ အဝါရောင် အလင်းများ တောက်ပလာပြီး ၎င်းတို့သည် လင်းတုန်းထံသို့ ပြင်းထန်စွာ ပစ်လွှတ်ခြင်း ခံလိုက်ရသည်။ လင်းတုန်းသည် ပထမ တစ်လုံးကို ရှောင်တိမ်းလိုက်ပြီး ဒုတိယ တစ်လုံးကို သူ၏ သံချပ်ကာဖြင့် ကာကွယ်လိုက်၏။ သို့သော် တတိယ တစ်လုံး ရောက်လာချိန်တွင် ကီရို သည် လက်ထဲတွင် ဓားကို ကိုင်ဆောင်လျက် သူ၏ အပေါ်သို့ ရောက်ရှိနေပြီ ဖြစ်လေသည်။

“ဒီ သံချပ်ကာအသစ်သာ မပါရင် သူ သေနေလောက်ပြီ... မင်း အသက်ရှင်ဖို့ အခွင့်အရေးက ငါးဆယ်ရာခိုင်နှုန်း ရှိပြီး သူ့ကို သတ်နိုင်မယ့် အခွင့်အရေးကတော့ နှစ်ဆယ်ရာခိုင်နှုန်းပဲ ရှိတယ်လို့ ငါ ယူဆတယ်...”

“ဝိုး... မင်း တကယ်ပဲ အစီအစဉ်တစ်ခု လိုအပ်နေပုံရတယ်...”

လင်းတုန်းသည် စကိုင်းဆွန်းများ၏ အရေးပေါ် လေ အကာအရံကို အသက်သွင်းလိုက်သောအခါ သူ၏ အစိမ်းရောင် သံချပ်ကာထံမှ လေပြင်းများ ပေါက်ကွဲထွက်လာခဲ့၏။ ထိုလေပြင်းက ကီရို ကို နောက်သို့ ခြေတစ်လှမ်း ဆုတ်သွားစေပြီး သူ၏ ဝိညာဉ်အကြွင်းအကျန် လက်ဖြင့် ရန်သူ၏ သံချပ်ကာကို လှမ်းဖမ်းလိုက်သည်။ ဆာလောင်မှု အမြုတေကြိုး က သံချပ်ကာ၏ စွမ်းအင်များကို စုပ်ယူစားသောက်လိုက်လေ၏။

“ဒါက အလုပ်ဖြစ်တယ်... အုပ်ချုပ်သူ အမြုတေကြိုး က စွမ်းအင်တွေ ကုန်ခမ်းသွားတဲ့အတွက် မင်းကို ပစ်ခတ်နေတာ ရပ်တန့်သွားတယ်... အချိန်ကိုက်ပဲ... မင်းရဲ့ သံချပ်ကာက အက်ကွဲလာနေပြီလေ... ကီရို က ပြန်တိုက်ခိုက်ဖို့ ကြိုးစားပေမဲ့ အချိန်မီ လုံလောက်တဲ့ စွမ်းအင်ကို မစုစည်းနိုင်ဘူး... စွမ်းအင်မဲ့နေတဲ့ သတ္တုခွံထဲမှာ ပိတ်မိနေပြီး သူ မြေပြင်ပေါ်ကို လဲကျသွားတယ်...”

“ဒါက အလုပ်မဖြစ်ဘူး... ကီရို က နောက်ကို တစ်လှမ်းဆုတ်သွားပြီး မင်းက မင်းရဲ့ အဖြူရောင် လက်နဲ့ လှမ်းဆွဲလိုက်တယ်... ဒါပေမဲ့ အဆင့်နိမ့် အရှင်သခင် က အရမ်း မြန်နေတယ်... သူက ဓားကို မြှောက်လိုက်တဲ့အတွက် မင်းက လက်ကို ပြန်ဆွဲရုပ်လိုက်ရတယ်၊ မဟုတ်ရင် လက်ပြတ်သွားလိမ့်မယ်...

“အခုတော့ မင်း နောက်ဆုတ်သွားရပြီး ကီရို က အသာစီးရသွားပြီ... ကီရိုက မင်းကို နောက်ဘက် တွန်းပို့နေချိန်မှာ အုပ်ချုပ်သူ မှော်ပစ္စည်းက မင်းကို ကျောက်ခဲတွေနဲ့ ဆက်တိုက် ပစ်ခတ်နေပြီး မင်းရဲ့ စကိုင်းဆွန်းသံချပ်ကာကို တစ်စစီ ချိုးဖျက်ပစ်နေတယ်...”

“အဆုံးမှာတော့ မင်း နည်းလမ်းတွေ ကုန်ခမ်းသွားပြီး အဆင့်နိမ့် အရှင်သခင် ရဲ့ ဓားနဲ့ ကြမ်းပြင်ပေါ်မှာ ဖိချုပ်ထားခံလိုက်ရတယ်...”

“တကယ်လို့ မင်းသာ ထွက်ပြေးဖို့အတွက် တိုက်ခိုက်မယ်ဆိုရင် ပိုကောင်းတဲ့ အခွင့်အရေး ရနိုင်တယ်... ဒါပေမဲ့ အဲဒါ မင်း လိုချင်တဲ့အရာ မဟုတ်ဘူးဆိုတာ ငါ သိတယ်... မင်း အနိုင်ရချင်တယ်ဆိုတာ ငါ ပြောနိုင်တယ်...

“မင်းအတွက် အစီအစဉ်တစ်ခု ငါ့ဆီမှာ ရှိတယ်... ဒါပေမဲ့ အဲဒါက လွယ်ကူတဲ့ အစီအစဉ်တော့ မဟုတ်ဘူး... မင်း အန္တရာယ်တချို့ကိုတော့ ရင်ဆိုင်ရလိမ့်မယ်...”

...

ယီရင်...

ယီရင်သည် သူမ၏ အဆုံးမဲ့ ဓား လမ်းစဉ် ကို လေပြင်းတစ်ရပ်အလား အသုံးပြုလိုက်၏။ မျက်စိဖြင့် မမြင်ရသည့် ဓားချက်တစ်ခုက မေရာ ၏ တံစဉ် ကို ဝင်တိုက်ကာ သူမ၏ ကိုယ်ပေါ်သို့ မခုတ်ပိုင်းမိမီ နောက်သို့ လွင့်ထွက်သွားစေခဲ့၏။

"နင် သူ့ကို ဓားနဲ့ ထိုးခဲ့တယ်..."

မေရာ က ရေရွတ်ရင်း ယီရင် ထံသို့ သူမ၏ လက်နက်ကို ဝှေ့ယမ်းကာ စင်္ကြံလမ်းအတိုင်း ခုန်ဝင်လာခဲ့သည်။

"နင် သူ့ကို ခုတ်ခဲ့တယ်... နင် သူ့ကို နာကျင်စေခဲ့တယ်... နင် သူ့ကို သွေးထွက်အောင် လုပ်ခဲ့တယ်..."

သူမ၏ တံစဉ် မှ အစိမ်းရောင် မီးတောက်သည် ကျောက်တုံးကို ထိခိုက်မှု မရှိဘဲ ဖြတ်သန်းသွားသော်လည်း ဝှေ့ယမ်းလိုက်သည့် အကြိမ်တိုင်းသည် ယီရင် အပေါ်သို့ ဖိအားများ ပိုမိုသက်ရောက်စေပြီး စင်္ကြံလမ်း၏ အနောက်ဘက်သို့ ဆုတ်ခွာသွားစေခဲ့၏။

မေရာ၏ ခန္ဓာကိုယ်သည် ဝိညာဉ်မီးတောက် ဖြင့် ပြန်လည် ပုံသွင်းခံထားရသော်လည်း ယီရင် ၏ သွေးရည်ကြို သံမဏိအဆင့် ခန္ဓာကိုယ်က သူမကို ယှဉ်ပြိုင်နိုင်ရန် လုံလောက်သော ရုပ်ပိုင်းဆိုင်ရာ ခွန်အားကို ပေးစွမ်းထားလေသည်။ ကံမကောင်းစွာဖြင့် ရုပ်ပိုင်းဆိုင်ရာ ခွန်အားမှာ ယီရင် လိုချင်သလောက် အသုံးဝင်မလာခဲ့ပေ။

၎င်းသည် သူမ၏ တစ်ခုတည်းသော အားသာချက် ဖြစ်၏။ အခြား ရွေးချယ်စရာ လမ်းမရှိတော့မှသာ သူမသည် သူမ၏ သွေးအရိပ် ကို ဆင့်ခေါ်နိုင်မည် ဖြစ်သည်။ ၎င်းသည် ယခုအခါ အလွန် အစွမ်းထက်နေပြီ ဖြစ်ပြီး စကားပင် ပြောနိုင်နေပြီ ဖြစ်၏။ ၎င်းသည် သူမကို စုပ်ယူမပစ်ဘဲ ထိန်းချုပ်ထားခြင်းမှာ ၎င်း၏ သဘောဆန္ဒအရသာ ဖြစ်လေသည်။ အကယ်၍ ၎င်းက စိတ်ပြောင်းသွားပါက မည်သို့ဖြစ်မည်နည်း။ ၎င်းက သူမကို အခွံချည်းသာ ချန်ထားခဲ့ပြီး အဝတ်အစားတစ်ခုလို ဝတ်ဆင်သွားမည်လား။ သူမ၏ ကိုယ်ယောင်ကို ယူကာ လင်းတုန်း သတိလက်လွတ်ဖြစ်နေချိန်တွင် သူ့ထံသို့ လျှောက်သွားမည်လား။

မဖြစ်နိုင်ပေ၊ သွေးအရိပ် သည် ရွေးချယ်စရာ နည်းလမ်းတစ်ခု မဟုတ်ချေ။ ဤတိုက်ပွဲကို သူမကိုယ်တိုင် အနိုင်ယူရမည် ဖြစ်၏။

"ငါ နင့်ကို သတ်ပစ်မယ်..."

မေရာ က ပြောလိုက်ရာ သူမ၏ အသံမှာ ရုတ်တရက် သာယာငြိမ့်ညောင်းနေလေသည်။

"နင်က နှာကြောင်နေတာပဲ..."

ယီရင် က ပြောရင်း သူမ၏ ပြိုင်ဘက်ထံသို့ လှိုင်းထနေသော ဓား နည်းစနစ် တစ်ခုကို ရိုက်ပုတ်လိုက်၏။ ငွေရောင် ဓားချက်သည် လေထဲတွင် ပျံသန်းသွားပြီး မေရာ က လွယ်ကူစွာ ရှောင်တိမ်းသွားသော်လည်း အဓိက ရည်ရွယ်ချက်မှာ အချိန်ဆွဲရန်သာ ဖြစ်သည်။ ယီရင် သည် သူတို့နှစ်ဦးကြားတွင် နောက်ထပ် အကွာအဝေး ပေအနည်းငယ်မျှ ဖန်တီးလိုက်လေ၏။

သံခမောက်ဆောင်းထားသော မေရာ၏ ခေါင်းသည် တစ်ချက် တွန့်သွား၏။ သူမသည် လက်တစ်ဖက်ကို ဆန့်ထုတ်ကာ အစိမ်းရောင် အလင်းဘောလုံး တစ်လုံးကို စုစည်းလိုက်ပြီးနောက် ယီရင် ထံသို့ ချိန်ရွယ်လိုက်သည်။

သက်စောင့်-မာဒြာ လှံတံတစ်ခုသည် ယီရင် ထံသို့ ပြင်းထန်စွာ ဝင်ရောက်လာရာ သူမသည် အလင်းတန်းကို ဖမ်းဆီးနိုင်ရန် သူမ၏ အဖြူရောင် ဓားပြားကို အချိန်မီ မြှောက်ကာကွယ်လိုက်နိုင်၏။

"ငါ ရူးနေတာ မဟုတ်ဘူး..."

မေရာ က ရုတ်တရက် တည်ငြိမ်စွာဖြင့် ပြောလိုက်သည်။

"ငါ သူ့အပေါ်မှာ အကြွေးတင်နေတယ်... ငါ့ မိသားစုက ငါ့ကို မလိုချင်တော့တဲ့ အချိန်မှာ သူက ငါ့ကို ခေါ်ထားခဲ့တယ်... သူ့ ကိုယ်ပိုင် စရိတ်နဲ့ ငါ့ကို လေ့ကျင့်သင်ကြားပေးခဲ့တယ်... ငါ ကလေးဘဝ ကတည်းက နေ့တိုင်း သူ ငါနဲ့အတူ ရှိနေခဲ့တယ်... သူက ပညာရှိပြီး ကိုယ်ကျိုးမဖက်တဲ့ အုပ်ချုပ်သူ တစ်ယောက် ဖြစ်လာလိမ့်မယ်... ဒါကြောင့် သူ့ကို ကာကွယ်ပေးဖို့ ငါ သစ္စာဆိုထားတယ်..."

သူမသည် သူမ၏ တံစဉ် ကို နောက်သို့ ဆွဲလိုက်ရာ ဓားသွားသည် အစိမ်းရောင် မီးတောက်များ တောက်လောင်နေ၏။

"ပြီးတော့ သူ ငါ့ရဲ့ ကာကွယ်မှုအောက်မှာ ရှိနေတဲ့ အချိန်မှာ နင်က သူ့ကို ကျောကနေ ဓားနဲ့ ထိုးခဲ့တယ်..."

ယီရင်၏ မျက်နှာပေါ်မှ ချွေးပေါက်များ ကျဆင်းလာခဲ့သည်။ သူမသည် ထို တိုက်ခိုက်သူ နည်းစနစ် ကို မနည်း တားဆီးထားရပြီး သူမ၏ သက်စောင့်ကြိုး မှာလည်း ယိမ်းယိုင်နေပြီ ဖြစ်၏။ အကယ်၍ သူမသာ ခြေချော်သွားပြီး ထိုကဲ့သို့သော တိုက်ခိုက်မှုမျိုးကို အဝင်ခံလိုက်ရမည်ဆိုလျှင်... တံစဉ် ၏ နောက်ထပ် တစ်ချက် အဝှေ့ခံလိုက်ရမည် ဆိုလျှင်... အရာအားလုံး ပြီးဆုံးသွားမည် ဖြစ်သည်။ သူမ၏ လမ်းစဉ် သည်လည်း အဆုံးသတ်သွားမည် ဖြစ်၏။

အကယ်၍ မေရာ သာ စကားပြောရန် ရပ်တန့်မနေဘဲ ထိုတိုက်ခိုက်မှုကို ဆက်လက် ပြုလုပ်ခဲ့ပါက သူမ သေဆုံးသွားလောက်ပြီ ဖြစ်လေသည်။

ယီရင်သည် သေမင်းနှင့် ဤမျှ နီးကပ်စွာ ဖြတ်သန်းသွားရသည့် ခံစားချက်ကြောင့် တုန်ရီသွားခဲ့သော်လည်း အဆင့်နိမ့် အရှင်သခင်မ သူမထံသို့ ပြန်လည် ပြေးဝင်လာသောအခါ သူမ၏ လေ့ကျင့်မှုများက အလိုအလျောက် အလုပ်လုပ်လာခဲ့၏။

သူမသည် သူမ၏ ရွှေအဆင့် အမှတ်အသား ခြောက်ခုစလုံးဖြင့် အဆုံးမဲ့ ဓား လမ်းစဉ် ကို အသက်သွင်းလိုက်ပြီး ငွေရောင် စွမ်းအင် မုန်တိုင်းတစ်ခုကို ဖန်တီးလိုက်သည်။ ဤနေရာတွင် သက်စောင့် အော်ရာ များ အားကောင်းသော်လည်း ဓားအော်ရာ များ များများစားစား မရှိလှပေ... ထို့ပြင် ရှိခဲ့လျှင်ပင် ထို အော်ရာ များသည် ယီရင် ၏ ရွှေအဆင့် စိတ်ဝိညာဉ် ဖြင့် အပြည့်အဝ ထိန်းချုပ်နိုင်ရန် အလွန် အားကောင်းလွန်းနေခဲ့၏။ ထို့ကြောင့် အဆုံးမဲ့ ဓား လမ်းစဉ် သည် ပုံမှန်ထက် ပို၍ အစွမ်းထက်မနေခဲ့ပေ။

သို့သော် သူမသည် သူမ၏ မာဒြာ များကို ၎င်းအတွင်းသို့ လောင်းထည့်လိုက်ပြီး ထိန်းချုပ်ရန်ပင် ဂရုမစိုက်တော့ချေ။

သူမ၏ ပတ်လည် လေထုထဲတွင် မျက်စိဖြင့် မမြင်ရသော ဓားပေါင်း ထောင်သောင်းချီ၍ ဝဲပျံနေစဉ် ခေါင်းလောင်းတစ်ခုကဲ့သို့ မြည်ဟည်းသွား၏။ သူမ၏ ကိုယ်ပိုင် အစိမ်းရောင် သံချပ်ကာသည် ပဲ့ထွက်ကာ စင်းကြောင်းများ ထင်သွားသည်။ နည်းစနစ်က သူမနှင့် အနည်းငယ် နီးကပ်စွာ ဖြတ်သန်းသွားသောအခါ သူမ၏ အရေပြားပေါ်တွင် စက္ကူကဲ့သို့ ပါးလွှာသော ဒဏ်ရာသစ် အနည်းငယ် ပေါ်လာခဲ့သည်။

မေရာသည် အဆုံးမဲ့ ဓား လမ်းစဉ် ထဲသို့ မျက်နှာချင်းဆိုင် တိုးဝင်သွားခဲ့၏။

အော်ရာ ဓားသွားများက သူမ၏ အညိုရောင် သံချပ်ကာပြားများပေါ်တွင် အစင်းကြောင်းရှည်ကြီးများ ဖြစ်သွားစေသောအခါ သူမ၏ သံချပ်ကာထံမှ စူးရှသောအသံများ ထွက်ပေါ်လာပြီး မီးပွားများ လွင့်စင်သွားခဲ့သည်။ သူမ၏ သံခမောက်မှ အပိုင်းအစတစ်ခု ပဲ့ထွက်သွားပြီး အောက်ဘက်ရှိ အစိမ်းရောင်နှင့် ငွေရောင် ဝိညာဉ်အကြွင်းအကျန် အစိတ်အပိုင်းများကို မြင်တွေ့လိုက်ရသည်။ ထို့ပြင် ရင်ဘတ်၊ ပခုံးနှင့် ခြေလက်များမှ သေးငယ်သော အပိုင်းအစများလည်း ပြဲထွက်သွားခဲ့၏။

သို့သော် မေရာ သည် မိမိကိုယ်ကို ကာကွယ်ခြင်း မပြုခဲ့ပေ။

သူမသည် ကာကွယ်မှုကို ဂရုမစိုက်ဘဲ အတင်းတိုးဝင်လာကာ တံစဉ် ကို သေစေနိုင်လောက်သော အရှိန်ဖြင့် ဝှေ့ယမ်းလိုက်တော့သည်။

အစိမ်းရောင် မီးတောက် ဓားသွားသည် နီးကပ်လာ၏။ ယီရင်သည် သူမ ဆရာ၏ ဓားကို မြှောက်ကာ ထိုလက်နက်ကို ရင်ဆိုင်ရန် ပြင်လိုက်သော်လည်း သေမင်းက သူမ၏ နောက်ကျောဘက်မှ ဝင်သက်ထွက်သက် မှုတ်ထုတ်နေသကဲ့သို့ သူမ ခံစားနေရသည်။

သူမသည် လင်းတုန်း ကို တိတ်တဆိတ် တောင်းပန်လိုက်မိ၏။ အီသန်၊ အော်သို နှင့် မာစီ တို့ကိုပါ တောင်းပန်လိုက်သည်။ သူမ သေဆုံးသွားပြီးနောက် သူတို့ မည်မျှ နာကျင်ရမည်ကို သူမ သိနေခဲ့၏။

သို့သော် သူမသည် အနည်းငယ် သက်သာရာရသလိုလည်း ခံစားမိသည်။ အနည်းဆုံးတော့ သူမက အရင် ထွက်သွားရမည် ဖြစ်သောကြောင့် သူတို့ကို ဆုံးရှုံးရမည့် နာကျင်မှုကို သူမ ခံစားရတော့မည် မဟုတ်ပေ။

သူမ၏ ဝိညာဉ်မီးတောက် ထဲမှ တစ်စုံတစ်ခု လှုပ်ရှားသွားခဲ့၏။

ယီရင်၏ ဓားသည် တံစဉ် ထံသို့ ရောက်ရှိသွားပြီး တံစဉ် သည်လည်း သူမထံသို့ ရောက်ရှိလာခဲ့သည်။ မည်သည့်အရာက အရင် ထိမှန်မည်ကို သူမ မခန့်မှန်းနိုင်တော့ချေ။

ထိုစဉ် အနီရောင် လက်တစ်ဖက်သည် သူမ၏ ရင်ဘတ်ထဲမှ ထွက်ပေါ်လာခဲ့၏။

၎င်းက တံစဉ် ကို လှမ်းဖမ်းလိုက်ပြီး ယီရင်၏ ဓားချက် ထိမှန်ရန် အချိန်လုံလောက်သည်အထိ တားဆီးပေးထားလိုက်သည်။ လက်နက်သည် ဘေးသို့ လွင့်စင်သွားသော်လည်း မေရာ သည် ယီရင် ၏ နောက်ကျောကို ရည်ရွယ်ကာ ကိုယ်ကို လှည့်၍ ကန်ချလိုက်၏။

သွေးအရိပ်သည် အပြည့်အဝ ထွက်ပေါ်လာခဲ့လေပြီ။

***