အခန်း ၂၅၁

အခန်း ၂၅၁

တစ်ပြိုင်နက်တည်းမှာပင် အဆမတန် သိပ်သည်းဆန်းကြယ်လှသော ချီစွမ်းအင်လှိုင်းလုံးကြီးတစ်ခုက သူတို့ထံသို့ တိုးဝှေ့ကာ ရိုက်ခတ်လာခဲ့သည်။

ဤချီစွမ်းအင်များမှာ လွန်စွာ ထူထပ်လှပြီး လောကီလူသားကမ္ဘာထက် အဆပေါင်းများစွာ ပိုမိုသိပ်သည်းနေသဖြင့် သူတို့လေးဦးလုံး အံ့ဩသွားခဲ့ရသည်။

ဤအသေးစားကမ္ဘာငယ်လေးအတွင်းရှိ ချီစွမ်းအင်များမှာ ကောင်းချီးပေးထားသော နတ်ဘုရားနယ်မြေတစ်ခုအလား လွန်စွာ ကြွယ်ဝသည်။

အကယ်၍ ဤနေရာတွင်သာ တစ်နှစ်ပတ်လုံး ကျင့်ကြံပွားများမည်ဆိုပါက ကျင့်ကြံသူများအတွက် အတိုင်းထက်အလွန် ကြီးမားလှသော အကျိုးကျေးဇူးများကို ရရှိစေမည်မှာ သေချာသည်။

အထူးသဖြင့် ချီစွမ်းအင်ကြောများနှင့် ချီစွမ်းအင်ဗဟိုချက်များ ဆုံစည်းရာနေရာများတွင်မူ ချီစွမ်းအင် သိပ်သည်းဆမှာ ယခုထက်ပင် ပိုမို၍ မြင့်မားနေပေလိမ့်မည်။

ဤကဲ့သို့ ချီစွမ်းအင် ကြွယ်ဝလှသော အရပ်ဒေသများတွင်မူ ထူးဆန်းဆန်းပြားပြီး တန်ဖိုးဖြတ်မရနိုင်သော ဝိညာဉ်ဆေးပင်များနှင့် ဝိညာဉ်ပစ္စည်းမျိုးစုံ အလိုလို ဖြစ်ထွန်းလာတတ်စမြဲဖြစ်ပြီး သဘာဝတရား၏ ဝိညာဉ်ရတနာများကိုပင် သွန်းလုပ်ပေးနိုင်စွမ်း ရှိသည်။ ထို့ကြောင့်ပင် ဤကမ္ဘာငယ်လေးအတွင်း၌ ကောင်းကင်နှင့်မြေပြင်၏ ရတနာမြောက်မြားစွာ ဖြစ်တည်နေလိမ့်မည်ကို အလွယ်တကူပင် ခန့်မှန်းကြည့်နိုင်သည်။

လီချန်ရှန်း၊ ကျိချန်းဟိုင်နှင့် ထိုလူတစ်စုတို့သည် အဘယ်ကြောင့် မီးနဂါးကျောက်စိမ်းတံဆိပ်တော်ကို ရရှိရန်အတွက် နည်းလမ်းမျိုးစုံဖြင့် ကြံစည်နေကြသည်မှာ မဆန်းတော့ပေ။ ဤကမ္ဘာငယ်လေးက သေချာပေါက်ပင် ရတနာသိုက်ကြီးတစ်ခုပင်။

အကယ်၍ မည်သူမဆို ဤကမ္ဘာကို ထိန်းချုပ်နိုင်မည်ဆိုပါက အနာဂတ်တွင် ရွှေအမြုတေနယ်ပယ်၊ ယင်ဝိညာဉ်နယ်ပယ်၊ ယန်ဝိညာဉ်နယ်ပယ် သို့မဟုတ် စစ်မှန်သောမသေမျိုးနယ်ပယ်သို့ တက်လှမ်းရန်အတွက် ကျင့်ကြံခြင်းအရင်းအမြစ်များ လုံးဝခန်းခြောက်သွားမည် မဟုတ်ပေ။

၎င်းမှာ ကမ္ဘာငယ်လေးတစ်ခုမျှသာ မဟုတ်ဘဲ ကြီးမြတ်လှသော ကံတရား၏ အခွင့်အလမ်းကြီးတစ်ခုပင်။ အကယ်၍ ၎င်းကိုသာ လက်ဝယ်ပိုင်ဆိုင်နိုင်ကာ ဆုပ်ကိုင်နိုင်မည်ဆိုပါက မသေမျိုးအသက်ကိုပင် ရရှိပိုင်ဆိုင်နိုင်ပေလိမ့်မည်။

သို့သော်ငြားလည်း ဤနေရာတွင် ချီစွမ်းအင်များ သိပ်သည်းနေသော်လည်း ဟင်းလင်းပြင်ကြီးမှာမူ ပိုမို၍ တည်ငြိမ်ခိုင်မာနေခဲ့ပြီး ကုယွမ်သည် သူ၏ ကျင့်ကြံခြင်းစွမ်းအားများ တစ်နည်းတစ်ဖုံ ကန့်သတ်ခံထားရသည်ကို ခပ်ဖျော့ဖျော့ ခံစားလိုက်ရသည်။

သူ၏ နှလုံးသားထဲတွင် အတွေးတစ်ခု လက်ခနဲ ပေါ်လာခဲ့ပြီး ချီစွမ်းအင်စစ်မှန်ခြင်း တစ်ဝါးခန့်ကို လှုံ့ဆော်လိုက်ရာ တစ်ခဏအတွင်းမှာပင် ပတ်ဝန်းကျင်ရှိ ရေငွေ့ဓာတ်များ စုစည်းလာခဲ့ပြီး လက်သီးဆုပ်ခန့်အရွယ်အစားရှိသော ရေလုံးလေးတစ်ခုအသွင် ကပ်ငြိသွားခဲ့တော့သည်။

“တကယ်ပဲ... ငါ့ရဲ့ ကျင့်ကြံခြင်းစွမ်းအားက ကန့်သတ်ခံထားရတာပဲ။”

ကုယွမ်က တွေးတောဆင်ခြင်လိုက်မိသည်။

ပြင်ပလောကတွင်မူ သူ၏ ချီစွမ်းအင်စစ်မှန်ခြင်း တစ်ဝါးခန့်ဖြင့် လူဦးခေါင်းခန့်ကြီးမားသော ရေလုံးကြီးတစ်ခုကို ဖန်တီးနိုင်သော်လည်း ယခု အနီရောင်မသေမျိုးနန်းတော်အတွင်း၌မူ လက်သီးဆုပ်ခန့်အရွယ်အစားမျှသာ ဖန်တီးနိုင်တော့သည်။

ဤအရာက ဤကမ္ဘာငယ်လေး၏ နတ်ဘုရားစည်းမျဉ်းများမှာ ပြင်ပလောကနှင့် လုံးဝကွဲပြားခြားနားနေကြောင်း ပြသနေခြင်းပင်။

ကျိချန်းဟိုင်သည် ယခင်ကတည်းကပင် အနီရောင်မသေမျိုးနန်းတော်အတွင်းရှိ ထူးခြားသော အခြေအနေများနှင့်ပတ်သက်၍ ပြောကြားခဲ့ဖူးပြီး စစ်မှန်သောမသေမျိုးအဆင့်ရှိသူမှလွဲ၍ မည်သူပင် ဝင်ရောက်လာခဲ့သည်ဆိုစေဦးတော့ စွမ်းအားများ ကန့်သတ်ခြင်း ခံရမည်ဟု ဆိုခဲ့သည်။

ကျင့်ကြံခြင်းအဆင့် မြင့်မားလေလေ ကန့်သတ်ချက်ဖိအားမှာ ပိုမိုကြီးမားလေလေ ဖြစ်ပေလိမ့်မည်။

ကုယွမ်သည် သူ၏ ကျင့်ကြံခြင်းစွမ်းအားမှာ သုံးပုံတစ်ပုံခန့်အထိ လျော့ကျသွားကြောင်း သိရှိလိုက်ရပြီး အခြားသော လူသုံးဦး၏ ကျင့်ကြံခြင်းအဆင့်မှာ သူထက် မြင့်မားကြသဖြင့် သူတို့ ခံစားရမည့် ဖိအားဒဏ်မှာ ပိုမိုပြင်းထန်လိမ့်မည်ဟု ခန့်မှန်းလိုက်မိသည်။

သို့သော်လည်း ကုယွမ်သည် ချီစွမ်းအင်များ၏ သိပ်သည်းဆနှင့် ကမ္ဘာ့စည်းမျဉ်းများ၏ ကွဲပြားခြားနားမှုကို အံ့ဩ၍ မဆုံးနိုင်သေးမီမှာပင် သူ၏ အာရုံစိုက်မှုမှာ အခြားတစ်နေရာသို့ အလျင်အမြန်ပင် ရောက်ရှိသွားခဲ့ရတော့သည်။

သူ၏ ရှေ့မှောက်တွင် ဆန်းကြယ်လှသော အချက်အလက်များ ဆက်တိုက်ဆိုသလို ပေါ်ထွက်လာခဲ့သည်။

[တာအိုအနှစ်သာရအမှတ် +၁၂]

[တာအိုအနှစ်သာရအမှတ် +၁၁]

[တာအိုအနှစ်သာရအမှတ် +၁၃]

[တာအိုအနှစ်သာရအမှတ် +၉] ...

‘ဒါက ဘာဖြစ်တာလဲ...ဒီကမ္ဘာတစ်ခုလုံးမှာ တာအိုအနှစ်သာရအမှတ်တွေ နေရာအနှံ့ ပျံ့နှံ့နေတာများလား။’

ဤအရပ်ဒေသသည် ရှေးဟောင်းကမ္ဘာပျက်စီးခြင်းမှ ကြွင်းကျန်ရစ်သော ကမ္ဘာ့အပိုင်းအစတစ်ခု ဖြစ်နိုင်သည်ဟူသော အချက်ကို ပြန်လည်တွေးတောလိုက်မိရင်း ကုယွမ်၏ နှလုံးသားထဲတွင် ခန့်မှန်းချက်တစ်ခု ဖြစ်ပေါ်လာခဲ့သည်။

ဤတာအိုအနှစ်သာရအမှတ်များက ပြန့်ကျဲ၍ ပေါ်ထွက်နေခဲ့သည်ဆိုပါက အချိန်ကာလတစ်ခု ကြာမြင့်လာသည်နှင့်အမျှ ၎င်းတို့မှာ သေချာပေါက်ပင် မရေမတွက်နိုင်အောင် များပြားလာပေလိမ့်မည်။

‘ဒီတာအိုအနှစ်သာရအမှတ်တွေအတွက်တင်... ဒီတစ်ခေါက် အနီရောင်မသေမျိုးနန်းတော်ခရီးစဉ်က တန်ဖိုးဖြတ်လို့မရအောင် ထိုက်တန်နေပြီပဲ။’

ကုယွမ်၏ စိတ်အာရုံမှာ လွန်စွာ ကြည်နူးချမ်းမြေ့သွားခဲ့ရသည်။

ကျိချန်းဟိုင်သည် မြေပုံတစ်ခုကို ထုတ်ယူလိုက်ပြီး သေသေချာချာ ကြည့်ရှုစစ်ဆေးလိုက်ပြီးနောက် သူတို့သုံးဦးကို လှည့်၍ ပြောလိုက်သည်။

“မိတ်ဆွေတို့ ကြည့်လိုက်ကြပါဦး... ဒီမြေပုံက အရာအားလုံးကို အသေးစိတ် မဖော်ပြနိုင်သေးဘူးဆိုပေမဲ့ နေရာအများစုကိုတော့ လွှမ်းခြုံထားပါတယ်။ အခု ငါတို့ရောက်နေတဲ့နေရာက အစွန်းအဖျားဒေသတစ်ခုဖြစ်ပြီး ရွှံ့နွံနက်တောအုပ်နဲ့ အဝေးဆုံးနေရာပဲ။ အဲဒီနောက်မှာတော့ ခွီလင်တောင်ကြားနဲ့ မိစ္ဆာနယ်မြေတောင်တန်းတွေ ရှိနေပြီး လက်ရှိ ငါတို့နဲ့ အနီးဆုံးနေရာကတော့ မီးတောက်ထောင်သောင်းတောင်ပဲ။ ဒါကြောင့် ငါတို့ အခု ချက်ချင်း မီးတောက်ထောင်သောင်းတောင်ဘက်ကို ဦးတည်သွားကြရင် ဘယ်လိုလဲ။”

ကုယွမ်က ခေါင်းညိတ်ပြလိုက်ရင်း

“ကျွန်တော့်ဘက်ကတော့ ကန့်ကွက်စရာမရှိပါဘူး။”

သူ ဤနေရာသို့ ဝင်ရောက်လာခဲ့သည့် ရည်ရွယ်ချက်မှာ လွန်စွာ ရှင်းလင်းရိုးစင်းသည်။ သူ၏ ကျင့်ကြံခြင်းအဆင့်ကို တိုးမြှင့်ပေးနိုင်မည့် ခရမ်းပြာကြာပန်း အနည်းငယ်ကို ရှာဖွေရန်

နှင့် သူ၏ ငွေရောင်နဂါးရေနတ်ဘုရားဓားကို အသစ်တစ်ဖန် ပြန်လည်သွန်းလုပ်ရန်အတွက် ဝိညာဉ်သံမဏိနတ်ဘုရားရွှေရည် အချို့ကို ရရှိရန်သာ ဖြစ်ပေတော့သည်။

၎င်းအပြင် သူ၏ ဝိညာဉ်အိမ်မွေးတိရစ္ဆာန် ခုနစ်ကောင်ကို အစာကျွေးရန်နှင့် ၎င်းတို့၏ ကြီးထွားမှုကို ပိုမိုမြန်ဆန်လာစေရန်အတွက် အစွမ်းထက်လှသော မိစ္ဆာသားရဲများနှင့် မိစ္ဆာကောင်များကို အမဲလိုက်ရန်လည်း ရည်ရွယ်ထားသေးသည်။

ကျန်ရှိနေသော လူသုံးဦး၏ ရည်ရွယ်ချက်များနှင့် ပတ်သက်၍မူ ကုယွမ်သည် ကျိချန်းဟိုင်၏ ရည်ရွယ်ချက်ကို အနည်းငယ် ခန့်မှန်းမိထားသော်လည်း အခြားနှစ်ဦး၏ ရည်ရွယ်ချက်ကိုမူ သူ မသိရှိပေ။

ကျိချန်းဟိုင်က ရယ်မောလိုက်ရင်း တုန်းချန်နှင့် စုချိုးယွဲ့တို့ကို ကြည့်ကာ

“မိတ်ဆွေတို့ကော ဘယ်လိုလဲ... ဘာအကြံဉာဏ်တွေ ရှိကြသေးလဲ။”

တုန်းချန်က တည်ငြိမ်စွာ ပြုံးလိုက်ရင်း

“အစ်ကိုကြီးကျီ ဆုံးဖြတ်တဲ့အတိုင်းပါပဲ... ငါ့ဘက်ကတော့ ဘာမှ ကန့်ကွက်စရာမရှိပါဘူး။”

စုချိုးယွဲ့ကလည်း ခေါင်းယမ်းပြလိုက်ရင်း

“ကျွန်မဘက်ကလည်း ကန့်ကွက်စရာမရှိပါဘူးရှင်။”

မည်သူမျှ ကန့်ကွက်ခြင်းမရှိသည်ကို မြင်တွေ့လိုက်ရသောအခါ ကျိချန်းဟိုင်က

“ကောင်းပါပြီ... ဒါဆိုရင် ငါတို့ ထွက်ခွာကြတာပေါ့။”

ထို့နောက်တွင် မတော်တဆမှုတစ်ခုခုကြောင့် သူတို့လေးဦး လမ်းခွဲမိသွားပြီး ပန်းတိုင်ကို ရှာမတွေ့နိုင်တော့မည့် အခြေအနေမျိုးကို ရှောင်ရှားနိုင်ရန်အတွက် ကျိချန်းဟိုင်သည် မြေပုံ၏ အစိတ်အပိုင်းအချို့ကို ကျောက်စိမ်းပေလွှာအချို့ထက်သို့ ကူးယူကာ ကုယွမ်နှင့် အခြားသူများထံသို့ ခွဲဝေပေးလိုက်သည်။

ယင်းနောက် သူတို့သည် သူတို့၏ အလင်းတန်းကိုယ်စီကို စီးနင်းလျက် မီးတောက်ထောင်သောင်းတောင်ရှိရာ အရပ်မျက်နှာဆီသို့ ပျံသန်းကာ ထွက်ခွာခဲ့ကြတော့သည်။

ကုယွမ်သည် ကျောက်စိမ်းပေလွှာအတွင်းရှိ မြေပုံနှင့် သူ၏ဆရာဖြစ်သူ ဟော်လင်တရားမင်း ပေးအပ်ထားသော မြေပုံတို့ကို အပြန်အလှန် နှိုင်းယှဉ်စစ်ဆေးကြည့်လိုက်ရာ ကျိချန်းဟိုင်၏မြေပုံမှာ လွှမ်းခြုံမှုအပိုင်းတွင် ပိုမိုသေးငယ်ပြီး အနည်းငယ် ရိုးရှင်းလွန်းနေကာ တစ်စုံတစ်ရာ မှားယွင်းချို့ယွင်းနေခြင်းမျိုးမူ မရှိသည်ကို တွေ့ရှိလိုက်ရသည်။

...

“ဝူး...”

ပေပေါင်းရာချီ မြင့်မားလှပြီး ဝါညိုရောင်အမွေးအမှင်များ ဖုံးလွှမ်းနေသည့် ဧရာမ ဝံပုလွေမျောက်ဝံကြီးတစ်ကောင်က ဟိန်းဟောက်လိုက်ရင်း တောအုပ်ကြီးအတွင်း ရူးသွပ်စွာ ပြေးလွှားတိုက်ခိုက်နေခဲ့သည်။

“ဝုန်း... ဝုန်း... ဝုန်း...”

ထိုဝံပုလွေမျောက်ဝံကြီး၏ ကြီးမားလှသော ခန္ဓာကိုယ်ကြီးထက်တွင် သိပ်သည်းလှသော မိစ္ဆာချီစွမ်းအင်များ ဝန်းရံနေခဲ့ပြီး ရှေးဟောင်းသစ်ပင်ကြီး အမြောက်အမြားမှာမူ ၎င်း၏ ခါးလောက်အထိပင် မမီကြပေ။

၎င်း ဖြတ်သန်းသွားရာ လမ်းကြောင်းတစ်လျှောက်ရှိ ရှေးဟောင်းသစ်တောများနှင့် တောင်ကုန်းများမှာ ကြေမွပျက်စီးကုန်ကြရပြီး မြေပြင်ကြီးမှာလည်း ဤဧရာမသားရဲကြီး၏ နင်းခြေမှုကြောင့် လမ်းကြောင်းတစ်ခုအလား ဖြစ်ပေါ်ကာ ကျန်ရစ်ခဲ့သည်။

ထိုဝံပုလွေမျောက်ဝံကြီး၏ အရှေ့ဘက်တွင်မူ အလင်းတန်းအနည်းငယ်က ကောင်းကင်ယံထက်တွင် အပြင်းအထန် ပျံသန်းကာ မောင်းနှင်နေကြသည်။

နေ့တစ်ဝက်လုံး လိုက်လံမောင်းနှင်ပြီးနောက် အကွာအဝေးမှာ ပိုမိုကွာဟလာသည်ကို မြင်လိုက်ရသောအခါ ဝံပုလွေမျောက်ဝံကြီးသည် မြေပြင်ထက်မှ ဧရာမ မြေတုံး၊ ကျောက်တုံးကြီးများကို လှမ်း၍ ဆွဲယူလိုက်ပြီးနောက် အလွန်ရှည်လျားလှသော လှံကြီးတစ်စင်းအသွင် သွန်းလုပ်လိုက်တော့သည်။

၎င်းမှာ ပေပေါင်းရာချီ ရှည်လျားလှပြီး ရထားတွဲတစ်တွဲစာခန့် ထူထဲသည်။

ဝံပုလွေမျောက်ဝံကြီးသည် သူ၏ အတိုင်းအဆမဲ့သော ခွန်အားကို အသုံးပြုလျက် ထိုဝါဖြူရောင် ကျောက်လှံကြီးကို ရှေ့မှောက်ရှိ အလင်းတန်းများထံသို့ ရုတ်တရက် လှမ်း၍ ပစ်ပေါက်လိုက်တော့သည်။

“ဝူး... ဝူး...”

ကျောက်လှံကြီးသည် လွန်စွာ လျင်မြန်လှသော အရှိန်အဟုန်ဖြင့် လေထုကို ဖြတ်သန်းသွားခဲ့ရာ လေပြင်းမုန်တိုင်းတစ်ခုကို ဖန်တီးလိုက်ပြီး ၎င်း၏ နောက်ကွယ်တွင် ရှည်လျားလှသော အဖြူရောင် လေခွင်းလမ်းကြောင်းကြီးတစ်ခု ချန်ရစ်ခဲ့သည်။

အရှိန်အဟုန် ပြင်းထန်လွန်းလှသဖြင့် လေခွင်းသံကြီးပင် ပျံ့လွင့်မလာနိုင်သေးမီမှာပင် ကျောက်လှံကြီးသည် အရှေ့ဘက်ရှိ အလင်းတန်းများ၏ အနီးနားသို့ ဆိုက်ဆိုက်မြိုက်မြိုက် ရောက်ရှိလာခဲ့ပြီ ဖြစ်သည်။

“အားလုံး... လူစုခွဲကြ။”

ကျိချန်းဟိုင်က အခြားသူများထံသို့ အလျင်အမြန် လျှို့ဝှက်အသံလွှင့်ကာ သတိပေးလိုက်တော့သည်။

ကုယွမ်သည် တုံ့ဆိုင်းမနေဘဲ သူ၏အလင်းတန်းကို ချက်ချင်းပင် လမ်းကြောင်းလွှဲလိုက်ပြီး အခြားအရပ်မျက်နှာတစ်ခုဆီသို့ ပျံသန်းထွက်ခွာခဲ့သည်။

ကျန်ရှိသော လူသုံးဦးသည်လည်း ထိုနည်းတူပင် လှုပ်ရှားခဲ့ကြသည်။

သို့သော်ငြားလည်း ကုယွမ်၏ မျက်နှာအမူအရာမှာ ရုတ်ချည်းပင် ပျက်ယွင်းသွားခဲ့ရတော့သည်။

အဘယ်ကြောင့်ဆိုသော် သူ၏ အရပ်မျက်နှာထံသို့ ဦးတည်လျက် နောက်ထပ် ကျောက်လှံသုံးစင်း ထပ်မံပစ်လွှတ်ခြင်း ခံလိုက်ရသောကြောင့်ပင်။

၎င်းအနက် တစ်စင်းမှာ သူ၏ နောက်ကျောဘက်ဆီမှ တည့်တည့်မတ်မတ် တိုးဝင်လာနေခဲ့ပြီး တုန်လှုပ်ခြောက်ခြားဖွယ် ကောင်းလှသော အရှိန်အဟုန်ဖြင့် ပိုမိုနီးကပ်လာနေခဲ့ပြီ ဖြစ်သည်။

ကုယွမ်သည် မည်မျှပင် အရပ်မျက်နှာများကို ပြောင်းလဲစေကာမူ ဤဧရာမ ကျောက်လှံကြီးသည်လည်း လမ်းကြောင်းကို လိုက်လျောညီထွေစွာ ပြောင်းလဲလျက် သူ့နောက်သို့ မဆုတ်မနစ် လိုက်လံအမဲလိုက်နေခဲ့သည်။

“သောက်ကျိုးနည်း... ‘ဖြူစင်ပုလဲသီး’ အနည်းငယ်အတွက်နဲ့ ဒီလောက်အထိ လုပ်စရာ လိုလို့လား…..ဘာလို့များ ဒီလောက်အထိ ဇွဲနပဲနဲ့ လိုက်နေရတာလဲ။”

ကုယွမ်သည် တစ်ကိုယ်လုံး ကြက်သီးမွေးညင်းများ ထောင်ထလာခဲ့ရပြီး အထူးသဖြင့် သူ၏နောက်ကွယ်မှ ကျောက်လှံကြီးအတွင်း ကိန်းအောင်းနေသော ကြောက်မက်ဖွယ် စွမ်းအားများကို အာရုံခံမိလိုက်ချိန်တွင် သူ၏ နောက်ကျောတစ်ခုလုံး ချွေးစေးများ ပျံထွက်လာခဲ့ရတော့သည်။

သူတို့နောက်သို့ လိုက်လံတိုက်ခိုက်နေသော ဧရာမ မျောက်ဝံကြီးသည် ရှေးဟောင်းခေတ်ဦးကာလမှ ထူးဆန်းဆန်းပြားလှသော မိစ္ဆာသားရဲတစ်ကောင် ဖြစ်သည်။

၎င်းသည် ခန္ဓာကိုယ်ထည် ကြီးမားရုံတင်မကဘဲ ခန္ဓာကိုယ်တည်ဆောက်ပုံမှာလည်း တောင့်တင်းခိုင်မာလှသဖြင့် လက်သီးတစ်ချက်တည်းဖြင့်ပင် တောင်ကုန်းတစ်ခုလုံးကို ကြေမွပျက်စီးသွားစေနိုင်သည်။

၎င်းအပြင် ၎င်း၏ မွေးရာပါ မြေဓာတ်နတ်ဘုရားအတတ်ပညာများမှာလည်း အထွတ်အထိပ်သို့ ရောက်ရှိနေခဲ့ပြီဖြစ်ကာ အတိုင်းအဆမဲ့သော စွမ်းရည်ကြီးမားမှုကို ပိုင်ဆိုင်ထားသည်။

လွန်ခဲ့သော ခဏက ဆေးပင်များ ခူးဆွတ်ချိန်တွင်သာ သူတို့လေးဦးဘက်မှ ဉာဏ်ပညာရှိရှိနှင့် ကြိုတင်ပြင်ဆင်မှုများ မရှိခဲ့ကြလျှင် ထိုမျောက်ဝံကြီး၏ မြေဓာတ်နတ်ဘုရားအတတ်ပညာကြောင့် ကျောက်ထောင်ချောက်အတွင်း ပိတ်မိသွားခဲ့ကာ ၎င်း၏ ဧရာမလက်သီးကြီးများအောက်၌ အသားစိမ်းဖတ်ဖြစ်အောင် ချေမှုန်းခြင်းကို ခံလိုက်ရပေလိမ့်မည်။

ဤမျောက်ဝံကြီး၏ ကျင့်ကြံခြင်းအဆင့်မှာ ယခင်က သေဆုံးသွားခဲ့သော ဆရာကြီးစိမ်းပြာရောင်သစ်သား၏ အဆင့်နှင့် မခြားနားဘူးဟု ဆိုပါက ၎င်း၏ မွေးရာပါ တောင့်တင်းလှသော ခန္ဓာကိုယ်နှင့် အထွတ်အထိပ်ရောက်နေသော နတ်ဘုရားအတတ်ပညာများကြောင့် သာမန် ရွှေအမြုတေနယ်ပယ် ကျင့်ကြံသူတစ်ဦးဦးသာ ၎င်းနှင့် ထိပ်တိုက်ရင်ဆိုင်ရပါက သေချာပေါက် အသက်ပျောက်ပေလိမ့်မည်။

အကယ်၍ ကျင့်ကြံသူနှစ်ဦး ပူးပေါင်းတိုက်ခိုက်မည်ဆိုလျှင်ပင် နှစ်ဦးစလုံး ကျဆုံးသွားနိုင်သည့်အထိ အစွမ်းထက်သည်။

သူတို့လေးဦးသည် ကျင့်ကြံခြင်းလောကအတွင်းရှိ မျိုးဆက်သစ်လူငယ်များကြားတွင် အတော်ဆုံး ထိပ်သီးပါရမီရှင်များ ဖြစ်ကြကာ ယခုကဲ့သို့ ခံစစ်လွန်စွာ ကောင်းမွန်ပြီး တိုက်စစ်အလွန် ပြင်းထန်လှသော ရန်သူမျိုးနှင့် ထိပ်တိုက်တွေ့ရသည့်အခါတွင်မူ သူတို့၌လည်း မည်သို့မျှ တုံ့ပြန်နိုင်စွမ်း မရှိကြတော့ပေ။