အခန်း ၁၈၅

🍄 Chapter 185

သူမ စောင့်ကြည့်မနေပါက အနိမ့်ဆုံးအဆင့် ဘိလပ်မြေကိုသာ အမြဲတမ်းအသုံးပြုလေ့ရှိပြီး ခုံးကျော်တံတားတစ်ခု တည်ဆောက်စဉ်က လက်သန်းလောက်သာ အရွယ်ရှိသော သံမဏိချောင်းများကို အသုံးပြုရန်ပင် ကြိုးစားခဲ့ဖူးသည်။

ကံကောင်းထောက်မစွာဖြင့် အခြားနေရာမှ ခုံးကျော်တံတားတစ်ခု ပြိုကျသွားသဖြင့် နိုင်ငံတစ်ဝန်းစစ်ဆေးမှုများ ပြုလုပ်ခဲ့ရာ သူ ထိုသို့စွန့်စားရန် မရဲခဲ့တော့ချေ။

‘ငါက လုကျင်းယွီထက်တော့ သေချာပေါက်သာပါတယ်၊ ဟုတ်တယ် မဟုတ်လား'

သူမ ကိုယ့်ကိုယ်ကို ဂုဏ်ယူနေစဉ် ရုတ်တရက် ဖုန်းမြည်လာသည်။

“ဟယ်လို၊ ချန်မေ့လန်လား... ငါ လုကျင်းယွီပါ...”

သူမ မျှော်လင့်ထားသည့်အတိုင်း လုကျင်းယွီဖြစ်နေပြီး ဖုန်းကိုင်လိုက်သည်နှင့်တစ်ပြိုင်နက် သူ မောဟိုက်နေလေသည်။

ခဏအကြာမှ သူက ပြောလိုက်၏။

“နင်က တကယ်ကို အကြံကြီးတာပဲ”

လဝက်ခန့်က သူသည် သူမအား မိန်းမကြမ်းတစ်ယောက်ဖြစ်သွားပြီဟုသာ ထင်မှတ်ခဲ့သော်လည်း ယနေ့တွင် သူမသည် သူ့စီးပွားရေးကို ပြောင်တင်းတင်း ခိုးယူသွားခဲ့ပြီဖြစ်သည်။

သူ အခြားသူများကို ပြောပြလျှင်ပင် မည်သူက ယုံကြည်မည်နည်း။

လုကျင်းယွီ လုံးဝ မယုံကြည်နိုင်အောင် ဖြစ်နေလေ၏။

သူသည် ဖန်ရှန်နှင့်ဆက်ဆံရေးကို ထိန်းသိမ်းရန်နှင့် အိတ်ကပ်များထဲသို့ ငွေထည့်ပေးရန် အလုပ်များနေချိန်တွင် ချန်မေ့လန်သည် အမြင့်ဆုံးခေါင်းဆောင်ထံသို့ တိုက်ရိုက်သွားရောက်ကာ သူ၏အလုပ်ကို လုယူသွားခဲ့ခြင်း ဖြစ်သည်။

သို့သော် ချန်မေ့လန်သည် လုကျင်းယွီနှင့် စကားပြောဆိုကာ အချိန်မဖြုန်းချေ။ ယခင်ဘဝက သူမသည် မည်သည့်မကောင်းမှုကိုမျှ မလုပ်ခဲ့ဖူးသော်လည်း ဘဝတစ်သက်တာလုံး မတရားမှုများကို ခံစားခဲ့ရသည်။

ဤဘဝတွင် သူမသည် သူမ ချစ်ရသော ကလေးအနည်းငယ်ကို မတရားမှုများ မခံစားရစေရန်သာ လိုလားသည်။

လုကျင်းယွီအတွက်မူ သူသည် လုတာ့ပေါင်ကိုခေါ်ကာ တတ်နိုင်သမျှ အဝေးဆုံးသို့ ထွက်သွားနိုင်လေသည်။

သူမက တည်ငြိမ်စွာ ပြောလိုက်၏။

“ရှင် ဖုန်းမှားဆက်မိပြီ”

ထို့နောက် ကလစ်ဟူသော အသံနှင့်အတူ ဖုန်းချလိုက်လေ၏။

နှစ်သစ်ကူးအကြိုနေ့ နီးကပ်လာပြီဖြစ်ရာ မနက်ဖြန်တွင် ယွမ်ယွမ် စန္ဒရားသွားလေ့ကျင့်တော့မည်မဟုတ်ပေ။

ရှောင်ဝမ်လည်း ဆောင်းရာသီကျောင်းပိတ်ရက် အိမ်စာများပြီးစီးသွားပြီဖြစ်ပြီး မိသားစုတွင် အတူတကွ ကြည့်ရှုရန် တီဗွီဖန်သားပြင်အကြီးကြီး ရှိနေပြီဖြစ်သည်။

သို့သော် သူတို့၏ တင်းမာသောမျက်နှာထားရှိသည့် ဖခင်ကမူ ညစာစားပြီးသည်နှင့်တစ်ပြိုင်နက် ရှောင်လန်ကိုခေါ်ကာ မြင်းစီးဟန် လေ့ကျင့်စေလိုနေသည်။

ရှောင်ဝမ်က အနည်းငယ်မကျေမနပ်ဖြင့် မေးလိုက်၏။

“ဖေဖေ၊ ရှောင်လန်က မြင်းစီးဟန် လုပ်ရမယ်ဆိုရင် ယွမ်ယွမ်ကကော ဘာလို့ လုပ်စရာမလိုတာလဲ”

ယန်ကျောက်က နောက်ကျောဘက်တွင် လက်ပိုက်ထားရင်း ပြန်လည်မေးခွန်းထုတ်လိုက်သည်။

“အကယ်၍ ယန်ရှန်းနန် အနိုင်ကျင့်ခံရရင် မင်းက ကာကွယ်ပေးမယ်လို့ မင်း ငါ့ကိုပြောခဲ့ဖူးတယ်လေ၊

မင်း ညီမကို ကာကွယ်ပေးနိုင်ဖို့ မင်းကိုယ်မင်း ပိုသန်မာအောင် လုပ်ချင်တယ်လို့ ငါထင်ခဲ့တာ၊ အခုကြည့်ရတာ အဲဒီလိုမဟုတ်ဘူးထင်တယ် မင်းညီမက မင်းကို ပြန်ကာကွယ်ပေးတာကို မင်း လိုချင်နေတာလား”

ယွမ်ယွမ်သည် ရေချိုးခန်းထဲတွင် သူမ၏မိခင်နှင့်အတူ ရေချိုးနေပြီး သီချင်းဆိုကာ ရယ်မောနေလေသည်။

ရှောင်ဝမ်၏ ညည်းတွားသံကို ကြားသွားပုံရပြီး မိခင်ဖြစ်သူက လှမ်းခေါ်လိုက်၏။

“ရှောင်ဝမ်၊ မြင်းစီးဟန်ကို သေချာလေ့ကျင့်နော်၊ မနက်ဖြန်ကျရင် မေမေ သားအတွက် အီကြာကွေးအကြီးကြီးတွေ ကြော်ပေးမယ်”

ရှောင်ဝမ် ချက်ချင်းပင် ရင်ဘတ်ကိုကော့လိုက်သည်။

‘ငါ မြင်းစီးဟန် လေ့ကျင့်ရုံသာမက သဲအိတ်ကိုပါ ပြင်းပြင်းထန်ထန် ထိုးကြိတ်ရမယ်၊ တကယ့်ယောကျ်ားစစ်ဆိုတာ ကြံ့ခိုင်နေရမယ်လေ'

ရှောင်လန်မှာမူ အချိန်အကြာကြီးမရပ်နိုင်ဘဲ နန်ပေါင်မုန့်ကို ထပ်စားချင်လာပြန်၏။ ထို့အပြင် သူသည် မျက်နှာထားတင်းမာသောဖခင်အား ကြောက်ရမည်ကို မသင်ယူရသေးချေ။

ရလဒ်အနေဖြင့် သူသည် မီးဖိုချောင်ထဲသို့ တိတ်တဆိတ်ဝင်သွားပြီး အနံ့ခံကာ လိုက်သွားရာ သူ့ဖခင်က နန်ပေါင်မုန့်ကို ရေခဲသေတ္တာ အပေါ်ရှိ ခြင်းတောင်းငယ်လေးထဲတွင် သူ မမီနိုင်အောင် တင်ထားကြောင်း တွေ့လိုက်ရသည်။

ယန်ကျောက်က ပြတ်သားစွာ အမိန့်ပေးလိုက်၏။

“ယန်မင်လန်၊ အခုချက်ချင်းသွားပြီး မြင်းစီးဟန် နောက်ထပ်မိနစ်နှစ်ဆယ် သွားလုပ်စမ်း”

ရှောင်လန်က သူ့အား လျစ်လျူရှုထားပြီး သူ့မျက်လုံးများက ပေါင်မုန့်ကိုသာ ကြည့်နေလေသည်။

သူ မီအောင်ယူရန်အတွက် ခွေးခြေခုံတစ်ခုကို ကြိုးစားရှာဖွေနေဆဲတွင် သူ့ဖခင်ထံမှ ပထမဆုံးအကြိမ်အဖြစ် တင်ပါးရိုက်ချက်တစ်ခု ကျရောက်လာလေသည်။

ဤဝဝဖိုင့်ဖိုင့်နှင့် တုံ့ပြန်မှု နှေးကွေးသော ကလေးငယ်သည် မီးဖိုချောင်အပြင်သို့ ဆွဲထုတ်ခံရပြီး ခြံဝင်းအတွင်းသို့ ချထားခံရမှသာ နောက်ဆုံးတွင် “အီး၊ နာတယ်” ဟု အော်ငိုလိုက်တော့သည်

သူ၏ ဖခင်မှာ မျက်နှာမည်းရုံသာမက နှလုံးသားပါ မည်းနက်လေသည်။

သို့သော် ဤဆူညံမှုက ကြီးမားသောအကျိုးသက်ရောက်မှု ရှိသွားသည်။

ညဆယ်နာရီ ရောက်သောအခါ ရှောင်လန်မှာ အလွန်ပင်ပန်းသွားသဖြင့် ဆာလောင်မှုကိုပင် မေ့လျော့သွားပြီး ကန်ကုတင်ပေါ်တွင် ဟောက်နေလေတော့သည်။

ထိုအခါမှသာ ယန်ကျောက်သည် တီဗွီကို ဖွင့်ကာ ဗီဒီယိုခွေဖွင့်စက်ကို ချိတ်ဆက်လိုက်ပြီး ချန်မေ့လန်အား တိတ်ခွေဖွင့်ရန် အမူအရာပြလိုက်သည်။

သူ ကိုယ်တိုင်ကမူ သူနှင့် ချန်မေ့လန်တို့ ယနေ့ဝတ်ဆင်ခဲ့သော အတွင်းခံများအား သွားရောက်လျှော်ဖွတ်ဦးမည်ဖြစ်သည်။

လိမ်လည်မှုတားဆီးကာကွယ်ရေး ပညာပေးဇာတ်ကားမှာ အင်ဂျင်နီယာဆိုင်ရာ လိမ်လည်မှုများနှင့် လှည့်စားမှုများအကြောင်းဖြစ်ပြီး လိင်ကိစ္စများနှင့် ငွေကြေး-အာဏာ အပေးအယူများလည်း မလွှဲမရှောင်သာ ပါဝင်နေမည်ဖြစ်သည်။

ကလေးများကို ထိုအရာများ စောစောစီးစီးမမြင်စေလိုသဖြင့် သူတို့အား အမြန်အိပ်ရာဝင်စေခဲ့ခြင်းဖြစ်သည်။

တီဗွီလိုင်းတွင် “ခြံစည်းရိုးဘေးမှ အမျိုးသမီးများနှင့် ခွေးများ” ဇာတ်လမ်းတွဲကို ပြသနေသည်။

ဇာတ်လမ်း ပြီးဆုံးသွားပြီဖြစ်ပြီး မော်အာမင် သီဆိုထားသော ဇာတ်သိမ်းသီချင်း “ခြံစည်းရိုး၏အရိပ်” ကို ဖွင့်ထားလေသည်။

‘ကြယ်တွေက အရင်ကြယ်တွေပဲ၊ လကလည်း အရင်လပဲ'

ဝါရင့်အဆိုတော်၏အသံမှာ တကယ်ကို လှပလှသည်။

မေ့လန် အဆုံးအထိ နားထောင်လိုသော်လည်း ယန်ကျောက်က ခွင့်မပြုခဲ့ချေ။

“တိတ်ခွေကို ဖွင့်လိုက်၊ မင်းရဲ့ အဝတ်တွေကို ငါကူလျှော်ပေးမယ်”

ဗီဒီယို စတင်ဖွင့်လိုက်သည်နှင့်တစ်ပြိုင်နက် ချန်မေ့လန် တစ်ခုခုမှားယွင်းနေကြောင်း ခံစားလိုက်ရသည်။

အရည်အသွေးညံ့ဖျင်းသော ဖန်သားပြင်ပေါ်တွင် ပေါ်လာသောအမျိုးသားမှာ အနောက်တိုင်းသားတစ်ဦးနှင့် ဆင်တူပြီး နိုင်ငံခြားသူအမျိုးသမီးတစ်ဦးနှင့် စကားပြောနေသည်။

အမျိုးသမီးမှာ အပေါ်ထပ် အင်္ကျီပါးလေးတစ်ထည်သာ ဝတ်ဆင်ထားပြီး အမျိုးသားမှာ ဝတ်စုံပြည့်ဝတ်ဆင်ထားသော်လည်း သူ၏မျက်နှာအမူအရာမှာ ထူးဆန်းနေ၏။

ယန်ကျောက်လည်း မျက်မှောင်ကြုတ်သွားသော်ငြား အလျင်အမြန် ရှင်းပြလိုက်၏။

“ဒါက နိုင်ငံတကာရာဇဝတ်မှု ကာကွယ်တားဆီးရေးဇာတ်ကားကြီး ဖြစ်ရမယ်”

ချန်မေ့လန်မှာမယ မှားယွင်းနေဆဲဖြစ်ကြောင်း ခံစားနေရသည်။

တိုင်းပြည်က တံခါးဖွင့်ဝါဒ ကျင့်သုံးနေပြီဖြစ်သော်လည်း ပြည်သူ့လုံခြုံရေးဗျူရိုအနေဖြင့် နိုင်ငံခြားသားများကို ငှားရမ်းကာ ပညာပေးဇာတ်ကားများ ရိုက်ကူးနိုင်သည့်အဆင့်အထိတော့ မရောက်သေးချေ။

၎င်းမှာ ညစ်ညမ်းဗီဒီယိုတစ်ခုဖြစ်မည်ဟု သူမ သံသယဝင်သွားပြီး ကြမ်းတမ်းသော ညစ်ညမ်းဗီဒီယိုမျိုး ဖြစ်မည်ဟု ထင်လိုက်သည်။

သူမ ထင်သည့်အတိုင်းပင် နောက်ပြကွက်တွင် အမျိုးသမီးက ကိုင်းညွတ်ကာ သူမ၏လက်ဖြင့် အောက်သို့ လှမ်းကိုင်လိုက်သည်။