အခန်း ၃၄၁

အခန်း ၃၄၁ မျက်လုံး စွမ်းရည် ပေါင်းစပ်ခြင်း

"စိတ်မပူပါနဲ့... ငါ မင်းကို ရက်အနည်းငယ်လောက်ပဲ ဖမ်းထားပြီးရင် ပြန်လွှတ်ပေးမှာပါ..."

ကျိုးဟန်၏ မျက်နှာပေါ်တွင် ခင်မင်ရင်းနှီးသော အပြုံးတစ်ခုကို အတင်းဖန်တီးလိုက်ပြီး မြေအောက် ကမ္ဘာ တစ္ဆေ ဧကရာဇ် ၏ ထိတ်လန့်နေသော စိတ်ခံစားချက်ကို နှစ်သိမ့်ပေးလိုက်လေသည်။

ထိုသို့မှ မဟုတ်ပါက သူ ကိုယ့်ကိုယ်ကိုယ် သတ်သေသွားမည်ကို ကျိုးဟန် စိုးရိမ်နေမိလေသည်။

"တကယ်လား အတုလား... မင်း ငါ့ကို လာမလိမ်နဲ့နော်..."

မြေအောက် ကမ္ဘာ တစ္ဆေ ဧကရာဇ် မှာ လုံးဝ မယုံကြည်သော်လည်း ရင်ထဲ နက်နက်ရှိုင်းရှိုင်း နေရာမှ ရှင်သန်လိုသော ဆန္ဒက သူ့ကို အနည်းငယ် ယုံကြည်လာစေရန် ဖိအားပေးနေလေသည်။

အနည်းဆုံးတော့ ရှင်သန်ရန် မျှော်လင့်ချက် လေး တစ်စွန်းတစ်စ ရှိနေသေးပါက ဆက်လက် အသက်ရှင်လိုသော သတ္တိများ ရှိနေဦးမည် ဖြစ်လေသည်။

ကျိုးဟန် သည် စကားပြောပြီးနောက် ဆက်လက် ဂရုမစိုက်တော့ချေ။ သူက တစ္ဆေ ကို လိမ်ညာနေခြင်းသာ ဖြစ်လေသည်။

တစ်ဖက်လူ အနေဖြင့် ဤစကားကို ကြားပြီးနောက် ကိုယ့်ကိုယ်ကိုယ် သတ်သေမည့် အတွေးကို သေချာပေါက် ဖျောက်ဖျက်သွားမည်ဟု သူ ယုံကြည်လေသည်။ ကျိုးဟန် ၏ ရည်ရွယ်ချက်မှာလည်း အောင်မြင်သွားခဲ့ပြီ ဖြစ်ရာ မနက်ဖြန်တွင် မြေအောက် ကမ္ဘာ တစ္ဆေ ဧကရာဇ် ထံမှ ဆက်လက် လုယူနိုင်ဦးမည် ဖြစ်သဖြင့် အလွန် သာယာ ကြည်နူးဖွယ် ကောင်းလှပေသည်။

"ချင်ရွှယ်... တောက်လောင်နေသော ကောင်းကင်တမန် ရဲ့ ဆက်ခံမှုကို စတင် ရယူလိုက်တော့..."

ကျိုးဟန် သည် ရွှေရောင် အလင်းတန်းများ ကြားမှ ကယ်တင်ခြင်း လှံတံ ကို ဖမ်းဆုပ်လိုက်ပြီး ဟန်ချင်ရွှယ် ထံသို့ ကမ်းပေးလိုက်လေသည်။

"ဟန်... ချစ်တယ်နော်..."

သို့သော် ယခုအချိန်မှာ ချစ်ကြည်နူး ပြသနေရမည့် အချိန် မဟုတ်ချေ။ သန့်ရှင်းမြင့်မြတ်သော စွမ်းအင်များမှာ လျင်မြန်စွာ လျော့ကျလာနေလေသည်။

"ဝါး... ကောင်းကင်တမန် အတောင်ပံ ပဲ..."

"ငါ အတောင်ပံ ဆယ့်နှစ်ခု တောင် ဖွဲ့စည်းနိုင်သွားပါလား..."

အဆင့်မြှင့်တင်ပြီးနောက် အကျိုးသက်ရောက်မှုမှာ ပို၍ပင် အံ့မခန်း ဖြစ်သွားလေသည်။ ဟန်ချင်ရွှယ် မှာ လေထဲတွင် လွင့်မျောနေပြီး သန့်ရှင်းမြင့်မြတ်သော အလင်းတန်းများ ကြားတွင် ရေချိုးနေသကဲ့သို့ ဖြစ်နေလေသည်။

သူမ၏ အေးစက် မောက်မာသော ဟန်ပန်မှာ မည်သူမျှ လာရောက် ထိပါးခြင်း မပြုနိုင်အောင် ဖြစ်နေပြီး သူမ၏ နောက်ကျောတွင် သန့်ရှင်းမြင့်မြတ်သော အလင်းတန်းများဖြင့် ဖွဲ့စည်းထားသည့် အတောင်ပံ ဆယ့်နှစ်ခု ရှိနေလေသည်။ ခန့်ညား ထည်ဝါပြီး သန့်ရှင်း မြင့်မြတ်လှရာ ကြောက်မက်ဖွယ်ကောင်းသော ဖိအားများကို သယ်ဆောင်လာလေသည်။

"အရမ်း မိုက်တာပဲ... အတောင်ပံ ဆယ့်နှစ်ခု တောက်လောင်နေသော ကောင်းကင်တမန် ဆိုတာ ဒဏ္ဍာရီ ထဲမှာပဲ ရှိတဲ့ အရာလေ... ဒီနေ့ တကယ် မြင်တွေ့လိုက်ရလိမ့်မယ်လို့ မထင်ထားဘူး..."

နောက်လိုက်များမှာ ဤကဲ့သို့ ခမ်းနား ကြီးကျယ်လှသော မြင်ကွင်းကြောင့် အလွန်အမင်း တုန်လှုပ်သွားကြပြီး တစ်ယောက်ပြီး တစ်ယောက် အံ့သြတကြီး အော်ဟစ် ရေရွတ်နေကြလေသည်။

"ဒီစွမ်းအားက နတ်ဘုရားအဆင့် ကိုတောင် ရောက်နေလောက်ပြီ... အနာဂတ်မှာ ဘယ်လောက်အထိ အစွမ်းထက်လာမလဲ ဆိုတာ တွေးတောင် မတွေးရဲဘူး..."

"အစ်ကိုကြီးရဲ့ မိန်းမ ဖြစ်ရတာ တကယ် ကံကောင်းတာပဲ... ဘာလို့ ငါက မိန်းမလှလေး တစ်ယောက် မဟုတ်ရတာလဲကွာ..."

"ဟူး... စောစောစီးစီး ကတည်းက ထိုင်းနိုင်ငံ ကို သွားပြီး ခွဲစိတ် ပြုပြင်လိုက်ရင် ကောင်းသားပဲ..."

နောက်လိုက်များ အားလုံး၏ မျက်လုံးများထဲတွင် အားကျသော အရိပ်အယောင်များ ထွက်ပေါ်လာကြလေသည်။ ရွှမ်ယွမ် နန်းတော် အတွင်းရှိ ကံကြမ္မာ အခွင့်အရေး များ အားလုံးမှာ ပြိုင်ဘက်ကင်းလောက်အောင် အစွမ်းထက်လှပေသည်။

၎င်းတို့ အထဲမှ တစ်ခုခုကို အလွယ်တကူ ရရှိလိုက်ရုံဖြင့် တကယ်ကို ကောင်းကင်သို့ ပျံတက်သွားနိုင်မည် ဖြစ်လေသည်။ ကျိုးဟန် ၏ အဆင့်မြှင့်တင်ခြင်း ကိုသာ ဖြတ်သန်းပြီးပါက အထွတ်အထိပ် အဆင့် သို့ ရောက်ရှိရန်မှာ အခြေခံ လုပ်ဆောင်ချက် သက်သက်သာ ဖြစ်လေသည်။

ထို့ကြောင့် နောက်လိုက်များ အားလုံး ရင်ထဲမှ တိတ်တဆိတ် ဆုတောင်းနေကြလေသည်။ မိမိသာ အသုံးပြု၍ ရပြီး အခြား မည်သူမျှ အသုံးပြု၍ မရနိုင်သော ကံကြမ္မာ အခွင့်အရေး မျိုး ထွက်ပေါ်လာရန် ပင်ဖြစ်သည်။ ထိုသို့ဆိုလျှင် မည်သူကမျှ မိမိနှင့် လုယူမည် မဟုတ်တော့ချေ။

ဟန်ချင်ရွှယ် မှာ လေထဲတွင် လွင့်မျောနေပြီး မျက်လုံးများကို အနည်းငယ် မှိတ်ထားကာ တောက်လောင်နေသော ကောင်းကင်တမန် ၏ ဟန်ပန် တိုးမြှင့်မှုကို ရရှိနေသည်ကို မြင်တွေ့လိုက်ရလေသည်။

ယခင်ကထက် ပိုမို တောက်ပ လှပပြီး ဆွဲဆောင်မှု ရှိလာကာ တစ်ချက် ကြည့်လိုက်ရုံဖြင့် အကြည့်လွှဲ၍ မရနိုင်တော့သော အလှအပမျိုး ပင်ဖြစ်သည်။

အမျိုးမျိုးသော အရှိန်အဝါများ ရောယှက်နေပြီး တစ်ခါတစ်ရံတွင် အေးစက် မောက်မာသော သူတော်စင်မ လေး အလား တစ်ခါတစ်ရံတွင်မူ ဆွဲဆောင်မှု အပြည့်ရှိသော ရင့်ကျက်သည့် အမျိုးသမီး တစ်ဦး အလား ဖြစ်နေလေသည်။

ဤကဲ့သို့ ပြည့်စုံလှသော ဆွဲဆောင်မှုများက လူတိုင်းကို လုံးဝ ရပ်တန့်၍ မရနိုင်လောက်အောင် ဖြစ်စေလေသည်။

ဟန်ချင်ရွှယ် ၏ ဤကဲ့သို့သော အပြောင်းအလဲများ အတွက် ကျိုးဟန် လည်း အလွန် ပျော်ရွှင်နေမိလေသည်။

သို့သော် တောက်လောင်နေသော ကောင်းကင်တမန် ၏ ဆက်ခံမှု မှာ ထိုမျှ လျင်မြန်စွာ ပြီးဆုံးမည် မဟုတ်ကြောင်းကို မြင်တွေ့ရသဖြင့် ကျိုးဟန် သည်လည်း အချိန်ဆွဲ မနေတော့ချေ။

သူသည် ကျွမ်းကျင်မှုစွမ်းရည် သိုင်းကျမ်း ဖြစ်သော တစ္ဆေ မျက်လုံး လျှို့ဝှက် ချောင်းကြည့်ခြင်း ကို ထုတ်ယူလိုက်ပြီး တိုက်ရိုက်ပင် ပေါင်းစပ်ခြင်းကို စတင်လိုက်လေသည်။ မည်သို့ပင်ဆိုစေ အချိန် ကန့်သတ်ချက် ရှိသော ပစ္စည်း ဖြစ်ရာ အလုပ်များနေရင်းဖြင့် မေ့သွားမည်ကို ကျိုးဟန် စိုးရိမ်နေမိသည်။ ထိုသို့သာ ဖြစ်သွားပါက ကြီးမားသော အရှုံးကြီးနှင့် ရင်ဆိုင်ရမည် ဖြစ်လေသည်။

အနည်းငယ် စစ်ဆေး ကြည့်လိုက်ပြီးနောက် မြေအောက် ကမ္ဘာ တစ္ဆေ ဧကရာဇ် သည် မိမိ၏ အချက်အလက်များကို မည်သို့ သိရှိသွားခဲ့ကြောင်းကို ကျိုးဟန် နားလည်သွားလေသည်။ အဘယ်ကြောင့်ဆိုသော် ဤ တစ္ဆေ မျက်လုံး ကျွမ်းကျင်မှုစွမ်းရည် ကို အသုံးပြု၍ သိရှိသွားခဲ့ခြင်း ပင်ဖြစ်သည်။

"အခု တိုက်ရိုက်ပဲ ပေါင်းစပ်လိုက်တော့မယ်..."

ယခင်က ဝိညာဉ် ဖိနှိပ်ရေး မျှော်စင် တွင် ရှိနေစဉ် ကတည်းက ပိုမို မြင့်မားသော အဆင့်ရှိသည့် မျက်လုံး ကျွမ်းကျင်မှုစွမ်းရည် များကို ရယူရန် သူ စဉ်းစားခဲ့ဖူးလေသည်။ ယခု ဤ တစ္ဆေ မျက်လုံး မှာလည်း ကျိုးဟန် ၏ မျှော်မှန်းချက် များနှင့် အလွန် ကိုက်ညီနေလေသည်။

ကုန်တိုက် အတွင်းမှ မျက်လုံး ကျွမ်းကျင်မှုစွမ်းရည် သိုင်းကျမ်း အချို့ကို ဝယ်ယူပြီးနောက် ကျိုးဟန် သည် ရင်ထဲမှ တိတ်တဆိတ် ရေရွတ်ကာ ပေါင်းစပ်ခြင်း ကို စတင်လိုက်လေသည်။

[စနစ် အသိပေးချက် - သင်သည် အပြာရောင် မျက်လုံး နှင့် အဖြူရောင် မျက်လုံး ကျွမ်းကျင်မှုစွမ်းရည်များကို ပေါင်းစပ်လိုက်ပါသည်]

[ပေါင်းစပ်ခြင်း အောင်မြင်သွားပါပြီ... အရည်အသွေး တစ်ဆင့် တက်လှမ်းသွားပြီး ကျွမ်းကျင်မှုစွမ်းရည် အသစ် မြစိမ်းရောင် အလင်း မျက်လုံး ကို ဖန်တီးလိုက်ပါသည်]

[စနစ် အသိပေးချက် - သင်သည် မြစိမ်းရောင် အလင်း မျက်လုံး နှင့် ကောင်းကင်ဆန့်ကျင် ငွေရောင် မျက်လုံး ကျွမ်းကျင်မှုစွမ်းရည်များကို ပေါင်းစပ်လိုက်ပါသည်]

[ပေါင်းစပ်ခြင်း အောင်မြင်သွားပါပြီ... အရည်အသွေး နှစ်ဆင့် တက်လှမ်းသွားပြီး ကျွမ်းကျင်မှုစွမ်းရည် အသစ် ပုံတူကူး စက်ဝန်း မျက်လုံး ကို ဖန်တီးလိုက်ပါသည်]

...

[စနစ် အသိပေးချက် - သင်သည် ပုံတူကူး စက်ဝန်း မျက်လုံး နှင့် သွေးသတ်ဖြတ်မှု မြင်ကွင်း ကျွမ်းကျင်မှုစွမ်းရည်များကို ပေါင်းစပ်လိုက်ပါသည်]

[ပေါင်းစပ်ခြင်း အောင်မြင်သွားပါပြီ... အရည်အသွေး နှစ်ဆင့် တက်လှမ်းသွားပြီး ကျွမ်းကျင်မှုစွမ်းရည် အသစ် ပန်းတစ်သောင်း ပုံတူကူး စက်ဝန်း မျက်လုံး ကို ဖန်တီးလိုက်ပါသည်]

မျက်လုံး ကျွမ်းကျင်မှုစွမ်းရည် ဆယ်မျိုးကျော်မှာ ကျိုးဟန် ၏ ထိန်းချုပ်မှု အောက်တွင် အဆက်မပြတ် ပေါင်းစပ်သွားကြလေသည်။

ထို့နောက် သွေးသတ်ဖြတ်မှု မြင်ကွင်း နှင့် ပေါင်းစပ်ပြီးနောက် ကြယ်ကိုးပွင့် နတ်ဘုရားအဆင့် အရည်အသွေးရှိသော ပန်းတစ်သောင်း ပုံတူကူး စက်ဝန်း မျက်လုံး ကို ရရှိသွားခဲ့လေသည်။

"ဟူး... နောက်တစ်ဆင့် ကတော့ ကြယ်ကိုးပွင့် နတ်ဘုရားအဆင့် အရည်အသွေး ရှိတဲ့ ထိပ်တန်း မျက်လုံး စွမ်းရည် နှစ်ခုကို ပေါင်းစပ်ရတော့မယ်..."

"ဘယ်လို အံ့သြစရာတွေ ထွက်လာမလဲ ဆိုတာ မသိရသေးဘူး..."

ကျိုးဟန် သည် ခပ်တိုးတိုး ရေရွတ်လိုက်ပြီး ရင်ထဲတွင် အနည်းငယ် မျှော်လင့်ချက် ကြီးမားနေသလို အနည်းငယ်လည်း စိတ်လှုပ်ရှား နေမိလေသည်။

အဘယ်ကြောင့်ဆိုသော် နောက်တစ်ဆင့် ထပ်တက်သွားပါက အထွတ်အထိပ် အဆင့် အရည်အသွေး သို့ ရောက်ရှိသွားမည် ဖြစ်သောကြောင့် ပင်ဖြစ်သည်။

စနစ် ၏ တိုးမြှင့်ခြင်း ကို ဖြတ်သန်းပြီး သော်လည်း ဤအဆင့်အတန်း အရည်အသွေး မျိုးကို ပေါင်းစပ်ပြီးနောက် အရည်အသွေး သေချာပေါက် တက်လှမ်းသွားမည်ဟု အာမခံ၍ မရနိုင်ချေ။

ဆိုလိုသည်မှာ မျက်လုံး စွမ်းရည် နှစ်မျိုး ကို ပေါင်းစပ်ပြီးနောက် ကြယ်တစ်ပွင့် အထွတ်အထိပ် အဆင့် သို့မဟုတ် ၎င်းထက် ပိုမို မြင့်မားသော အရည်အသွေးသို့ ရောက်ရှိသွားနိုင်ခြေ အချို့ ရှိသလို ကြယ်ကိုးပွင့် နတ်ဘုရားအဆင့် အရည်အသွေး တွင်သာ မပြောင်းမလဲ ဆက်လက် ရှိနေနိုင်ခြေ လည်း ရှိနေလေသည်။

ထို့ကြောင့် ကျိုးဟန် ၏ ရင်ထဲတွင် အနည်းငယ် စိုးရိမ် ပူပန်နေမိသည်မှာ သဘာဝကျလှပေသည်။

မည်သို့ပင်ဆိုစေ စွမ်းရည် ပေါင်းစပ်ခြင်း မှာ နတ်ဘုရားအဆင့် သိုင်းကျမ်း ဖြစ်သော အစဦး ရှေးဟောင်း ကျမ်းလိပ် ၏ အခြေခံ အခန်းဆက် မှ ကျွမ်းကျင်မှုစွမ်းရည် တစ်ခု သက်သက်သာ ဖြစ်လေသည်။

ကျိုးဟန် ၏ အဆင့်မြှင့်တင်ခြင်း ကို ခံထားရသော်လည်း အထွတ်အထိပ် အဆင့် အထိတော့ လွှမ်းမိုး ထိန်းချုပ်နိုင်စွမ်း မရှိသေးချေ။

ထို့ကြောင့် စောစောက ကျရှုံးနိုင်ခြေ အချို့ ရှိကြောင်း စနစ် က ကျိုးဟန် ကို အသိပေးလာချိန်တွင် သူ အစပိုင်း၌ အနည်းငယ် မှင်သက်သွားခဲ့သော်လည်း ချက်ချင်းပင် ထိုအကြောင်းရင်းများကို နားလည် သဘောပေါက်သွားခဲ့လေသည်။

မျက်လုံး ကျွမ်းကျင်မှုစွမ်းရည် နှင့် ပတ်သက်၍ အရည်အသွေး မြင့်မားလေလေ တိုက်ခိုက်ရေး စွမ်းအား ပဲ ဖြစ်ဖြစ် အထောက်အကူပြု အကျိုးသက်ရောက်မှု ပဲ ဖြစ်ဖြစ် ပိုမို အစွမ်းထက်လာမည် ဖြစ်ကြောင်းကို ကျိုးဟန် ရှင်းလင်းစွာ သိရှိထားလေသည်။

ဤအရာများကို လှိုင်းလုံး ဉာဏ်ပညာ မျက်လုံး နှင့် သွေးသတ်ဖြတ်မှု မြင်ကွင်း ဟူသော ကျွမ်းကျင်မှုစွမ်းရည် နှစ်ခု အပေါ်တွင် ကျိုးဟန် စောစောစီးစီး ကတည်းက မျက်မြင်ကိုယ်တွေ့ ခံစား သိရှိထားခဲ့ပြီး ဖြစ်လေသည်။

အမျိုးမျိုးသော အရှိန်အဝါ များကို ခံစားသိရှိနိုင်ရုံ သာမက ကြီးမား ကျယ်ပြန့်သော သတ်ဖြတ်မှု အကျိုးသက်ရောက်မှု ကိုလည်း ပိုင်ဆိုင်ထားလေသည်။

ကျိုးဟန် ၏ မှော်သားရဲများကို သတ်ဖြတ်သည့် အမြန်နှုန်း တိုးတက်လာခြင်း နှင့် အန္တရာယ် များကို ကြိုတင် သိရှိနိုင်မှုကြောင့် အကျပ်အတည်း များထဲသို့ မကျရောက်ခဲ့ရခြင်း တို့တွင် ဤကဲ့သို့သော မျက်လုံး ကျွမ်းကျင်မှုစွမ်းရည် များက လျစ်လျူရှု၍ မရနိုင်သော အရေးပါသည့် အခန်းကဏ္ဍမှ ပါဝင်ခဲ့သည်ဟု ဆိုနိုင်ပေသည်။

ထို့ကြောင့် အစွမ်းထက်သော မျက်လုံး ကျွမ်းကျင်မှုစွမ်းရည် တစ်ခုမှာ မည်မျှ အစွမ်းထက်ပြီး မည်မျှ ကြီးမားသော အကျိုးသက်ရောက်မှုကို ဖန်တီးပေးနိုင်ကြောင်းကို အထူးတလည် ပြောဆိုနေရန်ပင် မလိုအပ်တော့ချေ။

"အစ်ကိုကြီး... ခင်ဗျား ကျွမ်းကျင်မှုစွမ်းရည် တွေကို ပေါင်းစပ်တော့မလို့လား..."

"လခွမ်း... မိုက်လှချည်လား... ကြယ်ကိုးပွင့် နတ်ဘုရားအဆင့် မျက်လုံး စွမ်းရည်ကြီး ပါလား..."

ကျိုးဟန် ၏ လက်ထဲရှိ ကျွမ်းကျင်မှုစွမ်းရည် သိုင်းကျမ်း ဖြစ်သော တစ္ဆေ မျက်လုံး လျှို့ဝှက် ချောင်းကြည့်ခြင်း ကို မြင်တွေ့လိုက်ရပြီးနောက် အိုးဟွမ် က အလွန်အမင်း အံ့အားသင့်စွာဖြင့် ပြောလိုက်လေသည်။

"မှန်တယ်... အခု ကြယ်ကိုးပွင့် နတ်ဘုရားအဆင့် အရည်အသွေး ရှိတဲ့ မျက်လုံး စွမ်းရည် နှစ်ခု ရပြီ..."

"ကြယ်တစ်ပွင့် အထွတ်အထိပ် အဆင့် ကို တက်လှမ်းနိုင်မလား ဆိုတာကတော့ ဒီတစ်ကြိမ် အပေါ်မှာပဲ မူတည်နေတော့တယ်..."

ကျိုးဟန် က တည်ကြည်လေးနက်သော အမူအရာဖြင့် ပြောလိုက်လေသည်။

မည်သို့ပင်ဆိုစေ မျက်လုံး စွမ်းရည် ဆိုသည်မှာ မူလကတည်းက အလွယ်တကူ ရရှိနိုင်သော အရာ မဟုတ်ချေ။ ဤ ကြယ်ကိုးပွင့် နတ်ဘုရားအဆင့် အရည်အသွေး ရှိသော ပန်းတစ်သောင်း ပုံတူကူး စက်ဝန်း မျက်လုံး မှာလည်း များပြားလှသော မျက်လုံး ကျွမ်းကျင်မှုစွမ်းရည် သိုင်းကျမ်း များကို အသုံးပြု၍မှ ပေါင်းစပ် ဖန်တီးထားရခြင်း ပင်ဖြစ်သည်။

၎င်းတို့ အထဲတွင် လျှို့ဝှက်နယ်မြေ အမှတ် များကို အသုံးပြု၍ ဝယ်ယူထားခြင်း၊ တစ္ဆေ နတ်ဘုရား ပုလဲ အပိုင်းအစ များကို အသုံးပြု၍ ဝယ်ယူထားခြင်း နှင့် ရှောင်ယန် စုဆောင်းထားသော အရာ အချို့ ပါဝင်လေသည်။ စုဆောင်းရန် အခက်အခဲ မည်မျှ ကြီးမားကြောင်းကို တွေးကြည့်ရုံဖြင့် သိနိုင်ပေသည်။

အကယ်၍ ကျိုးဟန် ကို ကြယ်ကိုးပွင့် နတ်ဘုရားအဆင့် အရည်အသွေး ရှိသော မျက်လုံး ကျွမ်းကျင်မှုစွမ်းရည် နောက်တစ်ခု ထပ်မံ ရှာဖွေခိုင်းမည် ဆိုပါက အချိန် အမြောက်အမြား ကို သေချာပေါက် ကုန်ဆုံးရမည် ဖြစ်လေသည်။

"နှစ်... နှစ်အုပ်တောင်... လခွမ်းပဲ..."

အိုးဟွမ် မှာ ကြားလိုက်ရပြီးနောက် ပို၍ပင် အံ့အားသင့်သွားလေသည်။

"အိုးဟွမ်... မင်း ရောက်လာတာ အတော်ပဲ... မင်းရဲ့ ကံကောင်းမှု လေးကို နည်းနည်းလောက် ငှားသုံးမယ်ကွာ... အဲဒီလိုဆိုရင် အောင်မြင်မှု ရာခိုင်နှုန်း က သေချာပေါက် အများကြီး တက်သွားမှာပဲ..."

ကျိုးဟန် က ပြုံး၍ ပြောလိုက်လေသည်။ မည်သို့ပင်ဆိုစေ ဤအရာမှာ အလွန် နက်နဲ ခန့်မှန်းရခက်သော ကိစ္စရပ် တစ်ခု ဖြစ်လေသည်။

"အစ်ကိုကြီး ကို ကူညီနိုင်မယ် ဆိုရင်တော့ အကောင်းဆုံး ပေါ့ဗျာ..."

အိုးဟွမ် က ခေါင်းညိတ်လိုက်လေသည်။ ကူညီချင်သော်လည်း သူ၏ လက်ထဲတွင် စွမ်းရည် ပေါင်းစပ်ခြင်း ကျွမ်းကျင်မှုစွမ်းရည် မရှိသဖြင့် အခြား နည်းလမ်း မရှိချေ။

သူတို့ နှစ်ယောက် အချိန်အနည်းငယ်မျှ စကားပြောဆို ပြီးနောက်...

ကျိုးဟန် သည် သက်ပြင်းရှည်ကြီး တစ်ချက် ချလိုက်ပြီး တိုက်ရိုက်ပင် ပေါင်းစပ်ခြင်း ကို စတင်လိုက်လေတော့သည်။