အခန်း ၁၄၂
Vol. 15 Ch. 142
အခန်း (၁၄၂) နတ်အသွင်ပြောင်းခြင်း အဆင့် မြို့သခင်
ဆိုင်ဝန်ထမ်းက သိုလှောင်အိတ် နှစ်အိတ်ကို လှမ်းယူလိုက်ပြီး ပြောလိုက်သည်။ “ဒါဆို စီနီယာ ခဏလောက် စောင့်ပေးပါဦး၊ ကျွန်တော် အခုပဲ ပစ္စည်းတွေကို စာရင်းသွင်းပေးပါ့မယ်”
“ရတယ်၊ အေးအေးဆေးဆေးသာ စာရင်းသွင်း၊ ငါ ဒီဒုတိယထပ်မှာ ဟိုဟိုဒီဒီ လျှောက်ကြည့်နေမယ်၊ အနှောင့်အယှက်တော့ မဖြစ်ဘူးမလား”
“အနှောင့်အယှက်တော့ မဖြစ်ပါဘူး၊ ဒါပေမဲ့ စီနီယာအနေနဲ့ တခြားဝန်ဆောင်မှု ရယူ နေတဲ့ ဖောက်သည်တွေနားကိုတော့ သိပ်မသွားဖို့ မေတ္တာရပ်ခံချင်ပါတယ်၊ ကျွန်တော်တို့ စစ်ဟိုင် ကုန်သွယ်ရေးအသင်းက ဖောက်သည်တွေရဲ့ လျှို့ဝှက်ချက်ကို အင်မတန် တန်ဖိုးထားလို့ပါ”
ချန်ကျီက ပြုံး၍ ခေါင်းညိတ်ပြလိုက်သည်၊ သူ့သဘောကို သူ နားလည်သည်။
သို့သော်လည်း သူ၏ ရည်ရွယ်ချက်မှာ အခြားသူများ ပြောနေကြသည်ကို ချောင်းမြောင်းနားထောင်ရန် ဖြစ်ရာ ဆိုင်ဝန်ထမ်း ပြောသကဲ့သို့ မည်သို့ ငြိမ်ငြိမ် နေပါမည်နည်း။
“ဟမ့်... ငါက အဲဒီလူတွေနား တိုက်ရိုက်မသွားရင် ရတာပဲ၊ ခပ်လှမ်းလှမ်းကနေ ရပ်နေလည်း ငါ မကြားရဘူးလို့ ဘယ်သူပြောလဲ”
ချန်ကျီက စစ်ဟိုင် ကုန်သွယ်ရေးအသင်း၏ ဒုတိယထပ်တွင် ဟန်မပျက် ဟိုဟိုဒီဒီ လျှောက်ကြည့်နေခဲ့သည်၊ မည်သို့ပင်ဖြစ်စေ ပစ္စည်းဝယ်နေသည့် လူများအနားသို့ တိုက်ရိုက် ကပ်မသွားလျှင် ရပြီဖြစ်သည်။
စစ်ဟိုင် ကုန်သွယ်ရေးအသင်း၏ ဒုတိယထပ်တွင် ပစ္စည်းဝယ်ယူနေကြသော ကျင့်ကြံသူများမှာ အားလုံး အုတ်မြစ်ချခြင်းအဆင့်များသာ ဖြစ်ကြပြီး လောလောဆယ်တွင် ချန်ကျီ တစ်ဦးတည်းသာ ရွှေအူတိုင်အဆင့် ဖြစ်နေသည်ကို သတိပြုမိလိုက်သည်။
ထိုလူများက သူ့ကို ထူးဆန်းသော အကြည့်များဖြင့် ဝိုင်းကြည့်နေကြသော်လည်း ချန်ကျီကမူ စိုးစဉ်းမျှ ဂရုမစိုက်ဘဲ ဘာမှမဖြစ်သကဲ့သို့ ဘေးမှ ဖြည်းညှင်းစွာ ဖြတ်လျှောက်သွားခဲ့သည်။
ဒုတိယထပ်တွင် ပစ္စည်းဝယ်ယူသူများ တစ်သုတ်ပြီးတစ်သုတ် ပြောင်းလဲသွားခဲ့သော်လည်း ချန်ကျီကို ဝန်ဆောင်မှုပေးသည့် ဆိုင်ဝန်ထမ်းမှာမူ သိုလှောင်အိတ် နှစ်အိတ်ထဲမှ ပစ္စည်းများကို စာရင်းမတွက်ရသေးပေ။
ချန်ကျီကလည်း စိတ်မလောဘဲ စကားသံများကို ဆက်လက် ချောင်းနားထောင်ရင်း စိတ်ထဲ၌ တိတ်တဆိတ် မှတ်သားထားလိုက်သည်။
အချိန်အတော်ကြာ ကုန်လွန်သွားပြီးနောက် ဆိုင်ဝန်ထမ်းက နဖူးမှ ချွေးများကို သုတ်ရင်း ချန်ကျီ၏ ရှေ့သို့ ရောက်ရှိလာခဲ့သည်။ “စီနီယာ... စီနီယာ့ရဲ့ ပစ္စည်းတွေကို အားလုံး စာရင်းတွက်ပြီးပါပြီ၊ ဒါက စာရင်းစာရွက် ပါ၊ ကျန်ရစ်တာမျိုး ရှိသေးလားလို့ တစ်ချက်လောက် ကြည့်ပေးပါဦး”
“ကောင်းပြီ” ချန်ကျီက ပြန်ဖြေ လိုက်ပြီး စာရင်းစာရွက် ကို လှမ်းယူလိုက်သည်၊ ဤအရာက ဆိုင်ဝန်ထမ်းက စာရင်းစာအုပ်ပေါ်မှ ကူးရေးပေးထားသည့် စာရင်း ဖြစ်ရပေမည်။
ချန်ကျီက သေသေချာချာ အသေးစိတ် လိုက်မကြည့်တော့ဘဲ အရေးကြီးသော ပစ္စည်းအချို့၏ ဈေးနှုန်းကိုသာ ကြည့်လိုက်သည်။ “ ကျောက် စိမ်းကြာပန်း တစ်ပွင့်ကို အဆင့်နိမ့် ဝိညာဉ်ကျောက်တုံး ၂၀၀၀၊ ဒီဈေးက သိပ်မကြီးလှဘူးပဲ၊ အနန္တဆိုင်ရဲ့ ပြန်လည်ဝယ်ယူတဲ့ ဈေးထက်တောင် နည်းနည်း လျော့နေသေးတယ်”
ချန်ကျီက နောက်တစ်ချက်ကို ဆက်ကြည့်လိုက်သည်။ “အဆင့်သုံး မိစ္ဆာသားရဲ အူတိုင်က ၃၀၀၀ ပါလား၊ ဒီပစ္စည်းက ဒီလောက်အထိ တန်ဖိုးရှိလိမ့်မယ်လို့ မထင်ထားမိဘူး”
ထို့နောက် ချန်ကျီက အခြားသော စာရင်း အချို့ကို ဆက်ကြည့်လိုက်ရာ ယေဘုယျအားဖြင့် အနန္တနေရာလွတ်၏ ပြန်လည်ဝယ်ယူသည့် ဈေးနှုန်းနှင့် သိပ်မကွာခြားလှပေ။ “ဒီလိုကြည့်ရရင် အနန္တဆိုင်ရဲ့ ပြန်လည်ဝယ်ယူတဲ့ ဈေးနှုန်းက တော်တော်လေး သင့်တင့်မျှတတယ်လို့ ပြောလို့ရတာပဲ”
“ရတယ်၊ ဒီဈေးအတိုင်းပဲ ရှင်းလိုက်တော့”
ချန်ကျီက ကျေနပ်စွာဖြင့် ပြောလိုက်သည်။
“စီနီယာ... စီနီယာက ဝိညာဉ်ကျောက်တုံး တိုက်ရိုက်ယူမှာလား၊ ဒါမှမဟုတ် ကျွန်တော်တို့ စစ်ဟိုင် ကုန်သွယ်ရေးအသင်းရဲ့ အဖွဲ့ဝင်ကတ် ပဲ ပြုလုပ်မလား။ ကျွန်တော်တို့ စစ်ဟိုင် ကုန်သွယ်ရေးအသင်းရဲ့ အဖွဲ့ဝင်ကတ်က သယ်ဆောင်ရ လွယ်ကူရုံတင်မကဘဲ တာ့ချန်မင်းဆက် တစ်ခု လုံး ရှိတဲ့ ကျွန်တော်တို့ ဆိုင်ခွဲတွေ အားလုံးမှာ အသုံးပြုလို့ရပါတယ်။ပြီးတော့ အဖွဲ့ဝင်အဆင့်အလိုက် ပစ္စည်းတွေ ဝယ်ယူတဲ့အခါမှာလည်း အထူးလျှော့စျေးတွေ ရရှိဦးမှာပါ၊ အဆင့်မြင့်တဲ့ အဖွဲ့ဝင်တွေဆိုရင် လေလံပွဲ ဝင်ကြေးတွေကိုပါ ကင်းလွတ်ခွင့် ရရှိနိုင်မယ့်အပြင် လေလံတင်ပစ္စည်းတွေရဲ့ ဝန်ဆောင်ခ ကိုလည်း လျှော့စျေး ရရှိနိုင်ပါတယ်”
ချန်ကျီက စိတ်ထဲမှ တွေးတောတွက်ချက်လိုက်သည်။ “ဒီလို လုပ်ဆောင်ချက်က တော်တော်လေး ခေတ်ရှေ့ပြေးတာပဲ၊ ဒါပေမဲ့ ငါ့အတွက်တော့ သိပ်ပြီး အသုံးမဝင်လှဘူး။ ဝိညာဉ်ကျောက်တုံးဆိုတာလည်း ကျင့်ကြံခြင်းအရင်းအမြစ် တစ်ခုပဲ၊ ဒါကို စစ်ဟိုင် ကုန်သွယ်ရေးအသင်းထဲမှာ ထည့်သိမ်းထားရင် ကိန်းသေ ပိုက်ဆံ ဖြစ်သွားမှာပေါ့။ ပြီးတော့ အဆင့်မြင့်အဖွဲ့ဝင် ဖြစ်ဖို့အတွက် သေချာပေါက် ဝိညာဉ်ကျောက်တုံး အမြောက်အမြား အပ်နှံထားရမှာ ဒီအဖွဲ့ဝင်ကတ်ကို မလုပ်တာပဲ ကောင်းပါတယ်”
ချန်ကျီက ပြုံး၍ ပြောလိုက်သည်။ “မလိုတော့ပါဘူး၊ ငါ့ကို ဝိညာဉ်ကျောက်တုံးပဲ ပေးပါ”
ဆိုင်ဝန်ထမ်းက လက်မလျှော့ချင်သေးဘဲ ထပ်မံ ကြိုးစားကြည့်ချင်သေးသည်။ “စီနီယာက သန်ဘက်ခါကျရင် ကျွန်တော်တို့ စစ်ဟိုင် ကုန်သွယ်ရေးအသင်းရဲ့ လေလံပွဲကို တက်ရောက်မှာ မဟုတ်လား။ တကယ်လို့ စီနီယာမှာ ကျွန်တော်တို့ အဖွဲ့ဝင်ကတ် ရှိမယ်ဆိုရင် စီနီယာ လေလံတင်ချင်တဲ့ ပစ္စည်းတွေ ရှိလာတဲ့အခါ ဝန်ဆောင်ခ အချို့ကို ကင်းလွတ်ခွင့် ရရှိနိုင်မှာပါ”
“ကိစ္စမရှိပါဘူး၊ ငါ သန်ဘက်ခါကျရင်လည်း အမြင်ကျယ်အောင် လာကြည့်ရုံသက်သက်ပဲ၊ လေလံတင်စရာ ပစ္စည်းလည်း မရှိပါဘူး၊ နောက်မှ လိုအပ်လာရင် ပြုလုပ်တာပေါ့”
ချန်ကျီက ဤမျှအထိ ပြတ်ပြတ်သားသား ပြောလိုက်ပြီ ဖြစ်ရာ ဆိုင်ဝန်ထမ်းလည်း ဆက်လက် တိုက်တွန်းရန် အဆင်မပြေတော့ပေ။ “ကောင်းပါပြီ စီနီယာ၊ ဒါဆိုရင် ကျွန်တော် စီနီယာ့အတွက် ဝိညာဉ်ကျောက်တုံး သွားယူပေးပါ့မယ်၊ ခဏလောက် စောင့်ပေးပါ”
ချန်ကျီက ပြုံး၍ ခေါင်းညိတ်ပြလိုက်ပြီး ဆိုင်ဝန်ထမ်း ထွက်ခွာသွားသည်ကို လိုက်ကြည့်နေခဲ့သည်။
“တော်သေးတာပေါ့၊ နောက်ဆုံးတော့ ကပ်လွတ်သွားပြီ၊ ဘာလို့ ဘယ်နေရာသွားသွား ကတ်လုပ်ဖို့ ဒီလောက်တောင် တိုက်တွန်းနေကြတာလဲ မသိဘူး၊ နောင်ကျရင် ငါ့ရဲ့ ကုန်စုံဆိုင်တွေမှာတော့ ဒီလို မကောင်းတဲ့ အလေ့အကျင့် တွေကို လုံးဝ အမြစ်ပြတ် တားဆီးရမယ်”
ဆိုင်ဝန်ထမ်းက ချန်ကျီ၏ ပစ္စည်းများကို ပြန်လည်ဝယ်ယူရန်အတွက် တာဝန်ခံထံသို့ ဝမ်းသာအားရဖြင့် သွားတင်ပြလေသည်။
မကြာမီ အချိန်အတွင်းမှာပင် ဆိုင်ဝန်ထမ်းက သိုလှောင်အိတ် တစ်အိတ်ကို ကိုင်ကာ ပြန်လည်ရောက်ရှိလာခဲ့သည်။
“စီနီယာ... အားလုံးပေါင်း အဆင့်နိမ့် ဝိညာဉ်ကျောက်တုံး ၃၀၀၀၀ ပါ၊ တစ်ချက်လောက် စစ်ဆေးကြည့်ပေးပါဦး”
ချန်ကျီက ပြုံး၍ ဆိုင်ဝန်ထမ်း ကမ်းပေးလာသော သိုလှောင်အိတ်ကို လှမ်းယူလိုက်ပြီး ဝိညာဉ်အာရုံဖြင့် စစ်ဆေးကြည့်ရာ အမှန်တကယ်ပင် အဆင့်နိမ့် ဝိညာဉ်ကျောက်တုံး ၃၀၀၀၀ တိတိ ရှိနေသည်။
ထို့နောက်တွင် ချန်ကျီက အတွေး တစ်ချက်ဖြင့် သိုလှောင်အိတ်အတွင်းရှိ ဝိညာဉ်ကျောက်တုံးအားလုံးကို အပြင်သို့ လွှဲယူလိုက်ပြီး သိုလှောင်အိတ်ထဲတွင် အဆင့်နိမ့် ဝိညာဉ်ကျောက်တုံး ၁၀၀ ကိုသာ ချန်ထားခဲ့သည်။
ဆိုင်ဝန်ထမ်းက တစ်စုံတစ်ခုကို အာရုံခံမိလိုက်ပုံရပြီး ချန်ကျီ၏ လက်ချောင်းတွင် ဝတ်ဆင်ထားသော သိုလှောင်လက်စွပ်ကို အားကျသော မျက်လုံးများဖြင့် လှမ်းကြည့်လိုက်သည်။
ချန်ကျီက အားလုံးကို လုပ်ပြီးနောက် သိုလှောင်အိတ်ကို ဆိုင်ဝန်ထမ်းထံသို့ ပြန်လည်ကမ်းပေးလိုက်သည်။
ဆိုင်ဝန်ထမ်းက ချန်ကျီ၏ အပြုအမူကို မြင်လိုက်ရသောအခါ လျင်မြန်စွာ ပြောလိုက်သည်။ “စီနီယာ... မလိုပါဘူး၊ ဒီသိုလှောင်အိတ်က ကျွန်တော်တို့ စစ်ဟိုင် ကုန်သွယ်ရေးအသင်းကနေ စီနီယာ့ကို လက်ဆောင်ပေးတာပါ”
“ဒါဆိုရင်တော့ ဒါကို မင်းပဲ ယူလိုက်တော့၊ ငါ့အတွက် ထားလည်း အသုံးမဝင်ဘူး၊ ဒီသိုလှောင်အိတ်ထဲမှာ ငါ အဆင့်နိမ့် ဝိညာဉ်ကျောက်တုံး ၁၀၀ ချန်ထားပေးတယ်၊ ဒါနဲ့ပဲ ငါ့ကို သန်ဘက်ခါ လေလံပွဲအတွက် ဝင်ခွင့်လက်မှတ် တစ်ခါတည်း လုပ်ပေးလိုက်ပါ”
ချန်ကျီက ဆိုင်ဝန်ထမ်းကို ပြုံး၍ ကြည့်ကာ သိုလှောင်အိတ်ကို ကမ်းပေးလိုက်သည်။
“ကောင်းပါပြီ စီနီယာ၊ ခဏလေး စောင့်ပါ၊ ကျွန်တော် အခုပဲ သွားလုပ်ပေးပါ့မယ်” ဆိုင်ဝန်ထမ်းက ဒွန်တွဲမနေဘဲ ချက်ချင်းပင် လှမ်းယူလိုက်သည်၊ ပုံမှန်အားဖြင့် သူက ဤကဲ့သို့သော မုန့်ဖိုး များကို မနည်းမနော လက်ခံရရှိဖူးပုံရသည်။
မကြာမီ အချိန်အတွင်းမှာပင် ဆိုင်ဝန်ထမ်းက ပြန်လည်ရောက်ရှိလာခဲ့သည်၊ သူ၏ လက်ထဲတွင် သိုလှောင်အိတ် မရှိတော့ဘဲ ၎င်းအစား တိုကင် တစ်ခု ပါလာခဲ့သည်။
“စီနီယာ... သန်ဘက်ခါကျရင် စီနီယာအနေနဲ့ ဒီတိုကင်ကို ပြပြီး လေလံပွဲကို ဝင်နိုင်ပါတယ်၊ တိုကင်ရဲ့ ကျောဘက်မှာ နံပါတ်တစ်ခု ပါဝင်ပါတယ်၊ ဒါက သန်ဘက်ခါ လေလံပွဲမှာ စီနီယာ ထိုင်ရမယ့် ထိုင်ခုံနံပါတ်ပါ၊ ဒီထိုင်ခုံက ကျန်ရှိနေတဲ့ နေရာတွေထဲမှာ ကျွန်တော် စီနီယာ့အတွက် အကောင်းဆုံး တစ်နေရာကို ရွေးချယ်ပေးထားတာပါ”
ချန်ကျီလည်း အများကြီး မတွေးတော့ပေ၊ ဆိုင်ဝန်ထမ်း ပြောသည်မှာ အမှန် ဟုတ်မဟုတ် မသိသော်လည်း ဆိုင်ဝန်ထမ်း ပြောသမျှကိုပဲ နားထောင်လိုက်ရုံသာ ရှိသည်။
ချန်ကျီက တိုကင်ကို လှမ်းယူလိုက်ပြီးနောက် ပြုံး၍ မေးမြန်းလိုက်သည်။ “ငါ့မှာ တခြား မေးစရာ မေးခွန်းအချို့ ရှိသေးတယ်၊ မင်း ဖြေရတာ အဆင်ပြေမလား မသိဘူး”
ချန်ကျီ ဤသို့ ပြောလိုက်သည်ကို ကြားသောအခါ ဆိုင်ဝန်ထမ်းက စိတ်ထဲမှ သဘောပေါက်သွားခဲ့သည်၊ စောစောက သိုလှောင်အိတ်နှင့် ဝိညာဉ်ကျောက်တုံးများကို အလကားသက်သက် ပေးခဲ့ခြင်း မဟုတ်ကြောင်း သိလိုက်ရသည်။
“စီနီယာ မေးပါ၊ အလွန် လျှို့ဝှက်ဆန်းကြယ်တဲ့ ကိစ္စ တွေ မဟုတ်ရင်တော့ ကျွန်တော် သိသမျှ အကုန်လုံးကို အမှန်အတိုင်း ဖြေပေးပါ့မယ်”
“စိတ်ချပါ၊ မင်းကို အကျပ်ရိုက်စေမယ့် ကိစ္စမျိုး လုံးဝ မဟုတ်ပါဘူး၊ ငါက ဒီလုံချင်းမြို့ကို အသစ် ရောက်ခါစဆိုတော့ အရာတော်တော်များများကို နားမလည်သေးလို့၊ လူတစ်ယောက်ယောက်ဆီကနေ စုံစမ်းချင်ရုံ သက်သက်ပါ”
“ဒါဆိုရင်တော့ စီနီယာ လူမှန်ကို ရှာတွေ့တာပဲ၊ ကျွန်တော်က လုံချင်းမြို့မှာ ကြီးပြင်းလာတဲ့ ဒေသခံစစ်စစ် ဖြစ်တဲ့အတွက် လုံချင်းမြို့အကြောင်းကို အကုန် သိပါတယ်၊ စီနီယာ မေးနိုင်ပါတယ်”
“တကယ့်ကို တိုက်ဆိုင်တာပဲ၊ ဒါဆို ငါ မေးတော့မယ်”
“စီနီယာ မေးပါ”
“ဒီလုံချင်းမြို့မှာ ကျင့်ကြံခြင်းအဆင့် အမြင့်ဆုံးက မြို့သခင် လား”
“ဒါပေါ့၊ ကျွန်တော်တို့ မြို့သခင် က တာ့ချန်မင်းဆက်အတွက် ကြီးမားတဲ့ စစ်မှုထမ်းကောင်းတွေကို မွေး ပေးခဲ့ဖူးတာပါ၊ သူရဲကောင်းကြီး ဖြစ်တဲ့အပြင် သူက နတ်အသွင်ပြောင်းခြင်း အဆင့် ကျင့်ကြံသူကြီး ဖြစ်ပါတယ်” ဆိုင်ဝန်ထမ်းက မြို့သခင် အကြောင်းကို ပြောပြနေစဉ် သူ၏ မျက်နှာပေါ်တွင် ဂုဏ်ယူဝင့်ကြွားနေသော အမူအရာက အထင်းသား ပေါ်လွင်နေခဲ့သည်။
“နတ်အသွင်ပြောင်းခြင်း အဆင့် ဟုတ်လား” ချန်ကျီက အနည်းငယ် တုန်လှုပ်အံ့သြသွားခဲ့သည်၊ အခြေတည်ဝိညာဉ်အဆင့် နောက်ပိုင်းရှိ ကျင့်ကြံခြင်းအဆင့်ကို တစ်စုံတစ်ဦးက ဤအဆင့်သို့ ရောက်ရှိထားကြောင်း သူ ပထမဆုံးအကြိမ် ကြားဖူးခြင်း ဖြစ်သည်၊ ယခင်ကမူ စာအုပ်များထဲတွင်သာ ဖတ်ဖူးခြင်း ဖြစ်သည်။
“ဟုတ်ပါတယ်၊ နတ်အသွင်ပြောင်းခြင်း အဆင့်ပါ၊ ပြီးတော့ ကောလာဟလတွေအရ မြို့သခင် က နတ်အသွင်ပြောင်းခြင်း အဆင့် နှောင်းပိုင်း အဆင့်ကို ရောက်ရှိနေပြီဖြစ်ပြီး အချိန်မရွေး နောက်ထပ် အဆင့်တစ်ခုကို တက်လှမ်းနိုင်ဖို့ အလားအလာ ရှိနေပါတယ်”
“မြို့သခင် က နတ်အသွင်ပြောင်းခြင်း အဆင့်အထိ တောင် ရောက်နေပြီကို ဘာဖြစ်လို့ မြို့သခင် တစ်နေရာစာလောက်ကိုပဲ ရွေးချယ်ပြီး တာဝန်ယူထားရတာလဲ”
ဆိုင်ဝန်ထမ်းက ချန်ကျီ ဤသို့ မေးသည်ကို ကြားလိုက်ရသောအခါ စိတ်ထဲ၌ အနည်းငယ် မကျေမနပ် ဖြစ်သွားပုံရပြီး မျက်နှာအမူအရာမှာလည်း မသာမယာ ဖြစ်သွားခဲ့သည်။