အခန်း ၄၁၆

အခန်း(၄၁၆)

“ ဂျိန်း ”

ကောင်းကင်မိစ္ဆာလျှို့ဝှက်နယ်မြေ၏ အမည်မသိသော နေရာဒေသတစ်ခုဝယ် အလွှာကိုးလွှာပါဝင်သော စေတီတစ်ဆူက လေထဲမှာ မောက်မာထောင်လွှားစွာ လွင့်မျောနေသည်။ စေတီအပေါ်တွင် ဧရာမအနက်ရောင်မိုးတိမ်တစ်ခုက လျှို့ဝှက်ဆန်းကြယ်စွာ ထွက်ပေါ်လာသည်။ မိုးတိမ်ထဲတွင် မရေမတွက်နိုင်သော လျှပ်စီးတန်းများက ရူးသွပ်စွာ ရွေ့လျားကူးခတ်နေကြသည်။ မကြာမီ အနက်ရောင်ကပ်ဘေးဒုက္ခမိုးတိမ်က ငါးရောင်ခြယ်ကပ်ဘေးဒုက္ခမိုးတိမ်အဖြစ် အံ့ဖွယ်ကောင်းစွာ ပြောင်းလဲသွားသည်။

အလွန်ကျယ်ပြောသော ကောင်းကင်ဘုံအင်အားက ကပ်ဘေးဒုက္ခမိုးတိမ်ထံမှ ကျဆင်းလာသည်။ ထိုဖိအားတစ်ခုတည်းက ဘေးပတ်ဝန်းကျင်မှ လေဟာနယ်ကို ပရမ်းပတာ တုန်ယင်စေသည်။ လေဟာနယ်က ပုံပျက်တွန့်လိမ်သွားသည်။ တစ်စုံတစ်ယောက်သည် ကပ်ဘေးဒုက္ခမိုးတိမ်ကို လှမ်းကြည့်လိုက်လျှင် အလိုအလျောက် ကြောက်ရွံ့သွားလိမ့်မည်။

ကောင်းကင်ဘုံကပ်ဘေးဒုက္ခ…

ငါးရောင်ခြယ်ကပ်ဘေးဒုက္ခ… ဒြပ်စင်ငါးပါးကောင်းကင်ဘုံမိုးကြိုးကပ်ဘေး…

ငါးရောင်ခြယ်ကပ်ဘေးဒုက္ခသည် သာမန်ကပ်ဘေးဒုက္ခ မဟုတ်ပေ။ ယင်းက အလွန်ကြောက်စရာကောင်းသော ဒြပ်စင်ငါးပါးကောင်းကင်ဘုံကပ်ဘေးဒုက္ခ ဖြစ်သည်။ ထိုကပ်ဘေးဒုက္ခသည် ချန်းရှီရင်ဆိုင်ခဲ့သော ကပ်ဘေးဒုက္ခထက်ပင် ပိုပြီးကြောက်စရာကောင်းသည်။ အတိတ်တွင် ချန်းရှီသည် မီးဒြပ်စင်နှင့် သတ္ထုဒြပ်စင်ကပ်ဘေးဒုက္ခမိုးကြိုးကိုသာ ရင်ဆိုင်ခဲ့ရသည်။

ဒြပ်စင်ငါးပါးကောင်းကင်ဘုံမိုးကြိုးကပ်ဘေးတွင်မူ ဒြပ်စင်ငါးပါးစလုံး ပါဝင်လိမ့်မည်။ မည်သည့်ဒြပ်စင်မှ ပျောက်ကွယ်နေလိမ့်မည် မဟုတ်ချေ။ ဒြပ်စင်ငါးပါးမိုးကြိုးသွားများ၏ အဆက်မပြတ် ပစ်ခတ်မှုအောက်မှာ စတုတ္ထအကြိမ် အမြူတေဓာတ်လုံး အသွင်သဏ္ဌာန်ပြောင်းလဲခြင်းနယ်ပယ်မှ မိစ္ဆာဘုရင်တစ်ပါးသည်ပင် အခြေအနေဟန်လိမ့်မည် မဟုတ်ချေ။ ထိုသို့ကပ်ဘေးဒုက္ခက လွန်စွာ ကြောက်စရာကောင်းသည်။

ယေဘုယျအားဖြင့်ဆိုရသော် ကောင်းကင်ဘုံကပ်ဘေးဒုက္ခကိုးဆင့်က မတူညီသော မိုးကြိုးသွားကိုးစင်းကို ကိုယ်စားပြုသည်။ အဆင့်တစ်ဆင့် မြင့်တတ်သွားသည့်အခါတိုင်း မိုးကြိုးသွားတစ်စင်း ထပ်တိုးလာလိမ့်မည်။ ဥပမာအားဖြင့် ဒုတိယအကြိမ် အမြူတေဓာတ်လုံး အသွင်သဏ္ဌာန်ပြောင်းလဲခြင်းနယ်ပယ်မှ မိစ္ဆာတစ်ကောင်သည် ကပ်ဘေးဒုက္ခဖြတ်ကျော်သည့်အခါ အမျိုးအစားမတူညီသော မိုးကြိုးသွားနှစ်စင်းကို ရင်ဆိုင်ရလိမ့်မည်။

သို့ဖြစ်၍ ဒြပ်စင်ငါးပါးကောင်းကင်ဘုံကပ်ဘေးဒုက္ခသည် ပဉ္စမအကြိမ် အမြူတေဓာတ်လုံး အသွင်သဏ္ဌာန်ပြောင်းလဲခြင်းသို့ ရောက်သည့်အခါမှ ရင်ဆိုင်ရမည့် မိုးကြိုးကပ်ဘေး ဖြစ်သည်။ ထို့ကြောင့် ဤနေရာမှာ ငါးရောင်ခြယ်ကပ်ဘေးဒုက္ခ ထွက်ပေါ်လာခြင်းက အလွန်ထူးဆန်းသည်။

“ ကျစ်… ကျစ်… ”

လေထုဆုတ်ဖြဲသံက ဟင်းလင်းပြင်ထံမှ ထွက်ပေါ်လာသည်။ သတ္ထုဒြပ်စင်အထူးပြု မိုးကြိုးသွားတစ်စင်းသည် လောကဖန်ဆင်းမှုစေတီပေါ်သို့ ကျဆင်းသွားသည်။

“ ဂျိန်း ”

ထိုသတ္ထုဒြပ်စင်မိုးကြိုးသွားထဲမှာ ကိန်းအောင်းနေသော စွမ်းအားက အတိတ်၌ ချန်းရှီ ရင်ဆိုင်ဖြတ်ကျော်ခဲ့သော ကပ်ဘေးဒုက္ခမိုးကြိုးထက် နည်းနည်းမှ အားမနည်းချေ။ အကယ်၍ ထိုမိုးကြိုးသွားက အပြင်လောကမှ တောင်ပေါ်သို့ ကျဆင်းသွားမည်ဆိုလျှင် တောင်က အစိတ်စိတ်အမွှာမွှာ ပြိုကွဲပျက်စီးသွားလိမ့်မည်။

သို့သော်လည်း လောကဖန်ဆင်းမှုစေတီက ရုတ်တရက် တုန်ယင်သွားသည်။ ခရမ်းရောင်နတ်ဘုရားအလင်းက စေတီ၏ မျက်နှာပြင်ပေါ်မှာ ထွက်ပေါ်လာသည်။ ခရမ်းရောင်အလင်းက စေတီပေါ်မှာ ရေလှိုင်းကဲ့သို့ ရွေ့လျားစီးဆင်းသွားပြီး အဆုံးမဲ့သော နတ်ဘုရားအလင်းကို ထုတ်လွှတ်လိုက်သည်။

သတ္ထုဒြပ်စင်အထူးပြု မိုးကြိုးသွားက လောကဖန်ဆင်းမှုစေတီ၏ မျက်နှာပြင်ပေါ်သို့ ကျဆင်းသွားသည့်အခါ လျှို့ဝှက်ဆန်းကြယ်စွာ ပျောက်ကွယ်သွားသည်။ မိုးကြိုးက မည်သည့်နေရာသို့ ရောက်သွားကြောင်း မသိရပေ။ ဤသည်မှာ အစကတည်းက မည်သည့်မိုးကြိုးမှ မကျဆင်းလာသည့်အလားပင်။

သို့မဟုတ် ဖြစ်နိုင်သည်မှာ မိုးကြိုးက လောကဖန်ဆင်းမှုစေတီ၏ ဝါးမျိုခံလိုက်ရသည်။

သို့သော်လည်း ထိုလုပ်ရပ်က ကပ်ဘေးဒုက္ခမိုးကြိုးကို ရန်စလိုက်ဟန် ရ၏။ ယင်းက ဒေါသထွက်သွားပြီး ပိုပြီးရက်စက်ကြမ်းကြုတ်သော နတ်ဘုရားမိုးကြိုးသွားများကို အဆက်မပြတ် ပစ်လွှတ်လိုက်သည်။ မိုးကြိုးနှင့် မီးတောက်က မိုးမြေကို ဖုံးလွှမ်းသွားသည်။ မိုးကြိုးသွားများက စေတီကို အရူးအမူး ပစ်ခတ်လိုက်သည်။

သို့သော်လည်း စေတီက အလွန်အံ့ဖွယ်ကောင်းသည်။ နတ်ဘုရားမိုးကြိုးက မည်မျှအားကောင်းပါစေ စေတီအပေါ် မည်သည့်ထိခိုက်ဒဏ်ရာမှ မရစေပေ။ သို့သော်လည်း စေတီ၏ မျက်နှာပြင်ပေါ်တွင် ခရမ်းရောင်အလင်းက ပိုပြီးသိပ်သည်းသွားသည်။ ဤသည်မှာ ခရမ်းရောင်အလင်းက မည်သည့်အခါမှ ငြိမ်းသတ်မသွားမည့်ပုံရ၏။ လေဒဏ်မိုးဒဏ်က မည်မျှကြမ်းတမ်းပါစေ ယင်းက တောင်ကြီးတစ်တောင်နှယ် မြဲမြံနေသည်။

လောကဖန်ဆင်းမှုစေတီ၏ ပထမအထပ်တွင် ဧရာမကျားနက်တစ်ကောင်က မြေကြီးပေါ်မှာ မလှုပ်မယှက် လဲလျောင်းနေသည်။ သူ၏ ခန္ဓာကိုယ်အပြင်ဘက်တွင်မူ ငါးရောင်ခြယ်နတ်ဘုရားအလင်းက ကောင်းကင်ယံမှ ကျဆင်းလာပြီး သူ့အား ဖုံးလွှမ်းထားသည်။ ငါးရောင်ခြယ်နတ်ဘုရားအလင်းက သူ၏ ခန္ဓာကိုယ်ထဲသို့ ဝင်ရောက်သွားသည်။

တစ်ချိန်တည်းမှာ မနှိုင်းယှဉ်သာအောင် အလွန်ပေါကြွယ်ဝသော မိုးမြေဝိညာဉ်စွမ်းအားက စေတီထဲမှာ မုန်တိုင်းတစ်ခုနှယ် တည်ရှိနေသည်။ ဝိညာဉ်စွမ်းအားက ဧရာမကျားနက်၏ ခန္ဓာကိုယ်ထဲသို့ အရူးအမူး တိုးဝင်သွားနေသည်။

ကျားနက်၏ ခန္ဓာကိုယ်က အောက်ခြေမဲ့သော တွင်းနက်နှင့် ဆင်တူသည်။ မိုးမြေဝိညာဉ်စွမ်းအားက မည်မျှပေါများပါစေ သူ့ခန္ဓာကိုယ်ဖြင့် ထိတွေ့လိုက်သည်နှင့် အရူးအမူး စုပ်ယူခံလိုက်ရသည်။ မိုးမြေဝိညာဉ်စွမ်းအားတစ်စက်မှ ကျန်မနေခဲ့ပေ။

သီရှီထျန်၏ ခန္ဓာကိုယ်အတွင်းမှ မိစ္ဆာသန့်စင်ခြင်းမီးဖိုထဲတွင် ကြာပန်းနက်က အရူးအမူး လှည့်ပတ်နေပြီး အဆုံးမဲ့သော နတ်ဆိုးအလင်းတန်းများကို ထုတ်လွှတ်နေသည်။ ကြာပန်းနက်၏ အလွှာသုံးလွှာအနက် တစ်လွှာတွင် မိစ္ဆာချီက အဆက်မပြတ် ပေါ်လျှိုးလာနေပြီး ကြာပန်းနက်၏ အလယ်ဗဟိုမှ အနက်ရောင်ပုလဲလုံးဆီသို့ ဦးတည်သွားသည်။ ထိုအနက်ရောင်ပုလဲလုံးထဲမှာ သူ့ခန္ဓာကိုယ်တစ်ခုလုံးမှ မိစ္ဆာချီ ကိန်းအောင်းနေသည်။

မတူညီသော အင်အားစုနှစ်ခုက အတူတကွ ရောယှက်သွားသည်။ သို့သော်လည်း ထိုနှစ်ခု ပေါင်းစပ်သွားရန် အလွန်ခက်ခဲသည်။ တစ်ချိန်တည်းမှာ ငါးရောင်ခြယ်နတ်ဘုရားအလင်းက မိစ္ဆာစံအိမ်ထဲမှာ တိုက်ရိုက် ထွက်ပေါ်လာပြီး ကြာပန်းနက်ဆီသို့ တန်းမတ်စွာ ဦးတည်သွားသည်။

လျှို့ဝှက်ဆန်းကြယ်သော ငါးရောင်ခြယ်နတ်ဘုရားအလင်းသည် ကြာပန်းနက်ထဲသို့ ဝင်ရောက်သွားသည်နှင့်ချက်ချင်း ကြားခံနယ်သဖွယ် ဖြစ်လာသည်။ ယင်းက လိုအင်ဆန္ဒစွမ်းအားနှင့် မိစ္ဆာချီကို အံ့ဖွယ်ကောင်းစွာ အတူတူ ပေါင်းစပ်သွားစေသည်။

“ ကောင်းတယ်… ငါက ဒီအခိုက်အတန့်ကို စောင့်နေတာ… လိုအင်ဆန္ဒစွမ်းအားက နတ်ဆိုးဆန်တယ်… အဲ့ဒါက သက်ရှိတွေရဲ့ အမှောင်ဘက်ခြမ်းကနေ မွေးဖွားလာတဲ့အရာဖြစ်တယ်… ဒါကြောင့် ပုံမှန်အခြေအနေမှာဆိုရင် လိုအင်ဆန္ဒစွမ်းအားကို မိစ္ဆာချီနဲ့ ပေါင်းစပ်ဖို့ လုံးဝ မဖြစ်နိုင်ဘူး… ဒါပေမဲ့ ကောင်းကင်ဘုံကပ်ဘေးဒုက္ခထဲမှာ ကိန်းအောင်းနေတဲ့ ဖန်ဆင်းခြင်းစွမ်းအားကိုပါ ထပ်ပေါင်းလိုက်မယ်ဆိုရင် အခြေအနေက ပြောင်းလဲသွားလိမ့်မယ်… ဖန်ဆင်းခြင်းစွမ်းအားကို ကြားခံနယ်အဖြစ် သဘောထားမယ်ဆိုရင် မတူညီတဲ့ စွမ်းအားနှစ်မျိုးက အတူတကွ ပေါင်းစပ်သွားပြီး အံ့ဖွယ်ကောင်းတဲ့ ပြိုင်ဘက်ကင်းဧကရာဇ်ချီကို ဖွဲ့စည်းပေးနိုင်လိမ့်မယ် ”

သီရှီထျန်၏ စိတ်က ဖော်မပြနိုင်အောင် တည်ငြိမ်အေးချမ်းနေသည်။ စေတီအပြင်ဘက်မှာ ထွက်ပေါ်လာသော ကောင်းကင်ဘုံကပ်ဘေးဒုက္ခက သူ့အတွက် ရည်ရွယ်သည်။ ယင်းက သူ့အတွက် ပထမအဆင့် ကောင်းကင်ဘုံကပ်ဘေးဒုက္ခ ဖြစ်သည်။ သူ၏ စိတ်က လိုအင်ဆန္ဒဘုံထဲမှာ ရှိနေသည်။

သူက ပြိုင်ဘက်ကင်းဧကရာဇ်နှလုံးသားကျမ်းစာကို အသုံးပြု၍ သူ့စိတ်ကို ထုဆစ်သန့်စင်နေသည်။ တစ်ချိန်တည်းမှာ နှလုံးသားကျမ်းစာက ဝမ်းနည်းခြင်းစိတ်ဆန္ဒ သူ့အပေါ် မသက်ရောက်နိုင်ရန် တားဆီးကာကွယ်ပေးသည်။

ဝမ်းနည်းခြင်းအတွေးတစ်မျှင်ကို သူဆွဲထုတ်လိုက်တိုင်း ဘဝတစ်ခုကို တွေ့ကြုံခံစားရလိမ့်မည်။ ယင်းက ပြန်လည်မွေးဖွားခြင်းနှင့် ဆင်တူသည်။ ဘဝတစ်ခုကို သူဖြတ်ကျော်ပြီးသွားတိုင်း ဉာဏ်အလင်းရသွားသည်။

သူ၏ အတွေးဘုံက တဖြည်းဖြည်း ကျယ်ပြောလာသည်။ နောက်ဆုံးမှာ ယင်းက ဆင့်ကဲပြောင်းလဲမှုဖြစ်လာသည်။

သူက ဝမ်းနည်းဖွယ်အတွေးများနှင့်အတူ ဘဝပေါင်းထောင်သောင်းချီကို တွေ့ကြုံခံစားပြီးပြီဖြစ်ကြောင်း သီရှီထျန် သိသည်။ သူက ဤအခိုက်အတန့်လေးမှာ မရေမတွက်နိုင်သော ဝမ်းနည်းမှုပေါင်းမျိုးစုံကို ကိုယ်တိုင်တွေ့ကြုံခံစားခဲ့သည်။

ဘဝတစ်ခုကို ဖြတ်ကျော်ပြီးတိုင်း သူဉာဏ်အလင်းရသွားသည်။ ထို့နောက် သူက ပြိုင်ဘက်ကင်းဧကရာဇ်နှလုံးသားကျမ်းစာကို အသုံးပြု၍ သူရရှိလာသော ဉာဏ်အလင်းများကို အတွေးဘုံဆီသို့ ပို့လွှတ်သည်။ ထိုသို့လုပ်ဆောင်နေစဉ် ဝမ်းနည်းမှုစိတ်ဆန္ဒက သူ့အပေါ် သက်ရောက်မှုမရှိတော့ပေ။ သူက ပင်လယ်ထဲမှ ငါးသဖွယ် လွတ်လွတ်လပ်လပ် ကူးခတ်နေသည်။

ဉာဏ်အလင်းရလာခြင်း၊ ဉာဏ်အလင်းများကို အတွေးဘုံနှင့် ပေါင်းစပ်ခြင်း။ ယင်းတို့ကို ထပ်ခါတလဲလဲ သူလုပ်ဆောင်ပြီးနောက် ဝမ်းနည်းမှုစိတ်ဆန္ဒကို အမှန်တကယ် သူကျော်လွှားနိုင်သွားသည်။

ဝမ်းနည်းဖွယ်အတွေးများကို ဘဝပေါင်းထောင်သောင်းချီ တွေ့ကြုံခံစားပြီးနောက် ဝမ်းနည်းမှုအပေါ် သူ၏ နားလည်သဘောပေါက်မှုက အကန့်အသတ်သို့ ရောက်ရှိသွားသည်။ သူ၏ စိတ်က ဖော်မပြနိုင်အောင် ကြည်လင်ပြတ်သားလာသည်။ သူ၏ စိတ်က ဝမ်းနည်းမှုကို ကျော်လွန်သွားလေရာ မည်သည့်ဝမ်းနည်းစိတ်မှ သူ့အပေါ် မသက်ရောက်နိုင်တော့ပေ။

မှန်ပေသည်။ ယင်းက သူ့ဆီမှာ ဝမ်းနည်းသော စိတ်ခံစားမှု လုံးဝ ပျောက်ကွယ်သွားခြင်း မဟုတ်ပေ။ ယင်းအစား သူ၏ စိတ်ဝိညာဉ်နှင့် နှလုံးသားက သန့်စင်သွားခြင်း ဖြစ်သည်။ သူ၏ အတွေးဘုံက အဆင့်မြင့်တတ်သွားသည်။

ဤအခိုက်အတန့်မှာ ဝမ်းနည်းမှုစွမ်းအားက သူ၏ ထိန်းချုပ်မှုအောက်သို့ အပြည့်အဝ ကျရောက်သွားသည်။ တစ်ချိန်တည်းမှာ သီရှီထျန်၏ ကျင့်ကြံခြင်းစွမ်းအားက အထွတ်အထိပ်သို့ ရောက်ရှိသွားသည်။ သို့ဖြစ်၍ သူက အဆင့်တတ်လှမ်းရန် ကောင်းကင်ဘုံကပ်ဘေးဒုက္ခကို ဆွဲဆောင်လိုက်ခြင်းပင်။

ကောင်းကင်ဘုံကပ်ဘေးဒုက္ခကို သီရှီထျန် မကြောက်ပေ။ ဆန့်ကျင်ဘက်အနေနှင့် ယင်းက သူမျှော်လင့်နေသောအရာ ဖြစ်သည်။ အဘယ့်ကြောင့်ဆိုသော် သူဖန်တီးလိုက်သော ပြိုင်ဘက်ကင်းဧကရာဇ်ကျမ်းစာအရ ပြိုင်ဘက်ကင်းဧကရာဇ်ချီကို ဖွဲ့စည်းချင်သည်ဆိုလျှင် ကောင်းကင်ဘုံကပ်ဘေးဒုက္ခ၏ ဖန်ဆင်းခြင်းစွမ်းအားကို လိုအပ်လိမ့်မည်။ ဖန်ဆင်းခြင်းစွမ်းအားကသာလျှင် လိုအင်ဆန္ဒစွမ်းအားနှင့် မိစ္ဆာချီကို အတူတကွ ပေါင်းစပ်နိုင်စေလိမ့်မည်။ သို့မှသာ ပြိုင်ဘက်ကင်းဧကရာဇ်ချီက ဤလောကမှာ ပေါ်ထွက်လာလိမ့်မည်။

ဖန်ဆင်းခြင်းစွမ်းအားက သူ၏ ခန္ဓာကိုယ်ထဲသို့ အဆက်မပြတ် ဝင်ရောက်လာပြီး ကြာပန်းနက်ထဲသို့ ဦးတည်သွားသည်။ နောက်အခိုက်အတန့်မှာ ဖန်ဆင်းခြင်းစွမ်းအားက ပင်လယ်ကြီးတစ်စင်းပမာ ကျယ်ပြောလာပြီး လိုအင်ဆန္ဒစွမ်းအားနှင့် မိစ္ဆာချီကို ဖုံးလွှမ်းသွားသည်။

ဖန်ဆင်းခြင်းစွမ်းအား ဝင်ရောက်လာသည့်အခါ မိစ္ဆာချီဖြစ်စေ လိုအင်ဆန္ဒစွမ်းအားဖြစ်စေ ယင်းတို့နှစ်ခုစလုံးက ချက်ချင်း သက်ဝင်နိုးကြားလာသည်။ တစ်ချိန်တည်းမှာ ယင်းတို့နှစ်ခုစလုံးက ဖန်ဆင်းခြင်းစွမ်းအားကို အငမ်းမရ ဝါးမျိုလိုက်ကြသည်။

ဖန်ဆင်းခြင်းစွမ်းအားကို ဝါးမျိုလိုက်သည့်အခါ မိစ္ဆာချီနှင့် လိုအင်ဆန္ဒစွမ်းအားက အသိဉာဏ်ရှိလာကြသည်။ မူလက တသီးတခြားရှိနေကြသော စွမ်းအင်နှစ်မျိုးက ဤအခိုက်အတန့်မှာ တူညီသော အရှိန်အဝါကို တစ်ပြိုင်နက် ထုတ်လွှတ်လိုက်ကြသည်။ ဤသည်မှာ ထိုစွမ်းအင်နှစ်မျိုးက ဇစ်မြစ်တူညီသွားသည့်အလားပင်။ ထိုသို့အခြေအနေကြောင့် လိုအင်ဆန္ဒစွမ်းအားနှင့် မိစ္ဆာချီက အတူတကွ ယှက်ထွေသွားကြပြီး ပေါင်းစပ်သွားကြသည်။

“ ရှဲ ”

ဤသည်မှာ ဖန်ဆင်းခြင်းစွမ်းအားက လိုအင်ဆန္ဒစွမ်းအားနှင့် မိစ္ဆာချီကို ပေါင်းကူးတံတားလုပ်ပေးလိုက်သည့်အလားပင်။ မူလက ဆန့်ကျင်ဘက်ဖြစ်နေသော စွမ်းအင်နှစ်မျိုးက ဤအခိုက်အတန့်မှာ ပေါင်းစည်းသွားကြသည်။ ယင်းတို့ကြားမှာ မည်သည့်အတားအဆီးမှ မရှိတော့ပေ။ လိုအင်ဆန္ဒစွမ်းအားနှင့် မိစ္ဆာချီ ပေါင်းစပ်သွားသည့်အခါ ရွှေရောင်ဖျော့ဖျော့အရည်တစ်စက်က အလယ်မှာ ထွက်ပေါ်လာသည်။ ထိုရွှေရောင်အရည်စက်သည် ပြိုင်ဘက်ကင်းဧကရာဇ်အရှိန်အဝါကို ထုတ်လွှတ်နေသည်။ ယင်းမှာ အထွတ်အမြတ် ဧကရာဇ်တစ်ပါး၏ ကြီးမြတ်ထည်ဝါမှု ရှိ၏။ အထွတ်အမြတ် ဧကရာဇ်တစ်ပါး၏ ကြီးမြတ်ထည်ဝါမှုကို မည်သည့်အရာကမှ မဖုံးကွယ်နိုင်ပေ။ ယင်းက အရည်တစ်စက်မျှသာ ဖြစ်သော်လည်း မိစ္ဆာချီနှင့် လိုအင်ဆန္ဒစွမ်းအားထက် အများကြီး ပိုအစွမ်းထက်သည်။

ယင်း၏ စွမ်းအားက လွန်စွာကြီးမြတ်လေရာ ဤလောကတွင် မည်သည့်အရာကမှ ယင်းကို မတုယှဉ်နိုင်သည့်အလားပင်။ ကြီးမြတ်ထည်ဝါသော ထိုအရှိန်အဝါကို သီရှီထျန်သည်လည်း ခံစားမိသည်။ သူ၏ စိတ်အခြေအနေက ထိုအရှိန်အဝါအောက်မှာ ထုဆစ်သန့်စင်ခံလိုက်ရသည်။ သူ၏ နှလုံးသား၊ ခန္ဓာကိုယ်နှင့် အရှိန်အဝါက ပေါကြွယ်ဝသော အာဟာရဓာတ်များကို ရရှိသွားပြီး တဖြည်းဖြည်း မြင့်တတ်သွားသည်။

အတိတ်၌ သူ၏ ခန္ဓာကိုယ်ထဲမှာ မထင်မရှားရှိနေခဲ့သော အထွတ်အမြတ် ဩဇာအာဏာအရှိန်အဝါက ဤအခိုက်အတန့်မှာ တစ်ဟုန်ထိုး တိုးတတ်သွားသည်။ မကြာမီ ဩဇာအာဏာအရှိန်အဝါက သူ့ခန္ဓာကိုယ်၏ အပြင်ဘက်မှာ ထွက်ပေါ်လာသည်။ အကယ်၍ တစ်စုံတစ်ယောက်သာ လောကဖန်ဆင်းမှုစေတီထဲမှာ ရှိနေမည်ဆိုလျှင် သီရှီထျန်၏ ခန္ဓာကိုယ်က တစ်စုံတစ်ခုပြောင်းလဲသွားကြောင်း ရှင်းလင်းစွာ မြင်နိုင်လိမ့်မည်။

ပထမဆုံးအနေနှင့် အထွတ်အမြတ် ဩဇာအာဏာအရှိန်အဝါက သီရှီထျန်၏ ခန္ဓာကိုယ်ပေါ်မှာသာ လှည့်ပတ်နေသည်။ ထို့နောက် သူအသက်ရှူထုတ်လိုက်သည့်အခါ ဩဇာအာဏာအရှိန်အဝါက ဘေးပတ်ဝန်းကျင်ဆီသို့ ပျံ့နှံ့သွားသည်။ ယင်းက မီတာဒါဇင်ခန့်အကွာအဝေးကို ဖြန့်ကြက်သွားသည်။ ထိုဧရိယာထဲမှာရှိသော ပန်းပင်များနှင့် သစ်ပင်များသည် သီရှီထျန်၏ ဦးတည်ရာထံသို့ ဦးညွတ်လိုက်ကြသည်။

အထွတ်အမြတ် ဩဇာအာဏာအရှိန်အဝါဖြင့် သက်ရောက်ခံရသည့်အခါ သက်ရှိအားလုံးသည် မခုခံနိုင်ဘဲ ချက်ချင်း ဦးညွတ်ကြရသည်။

ကောင်းကင်ဘုံကပ်ဘေးဒုက္ခထဲမှာ အကန့်အသတ်မဲ့သော အဖျက်စွမ်းအား ကိန်းအောင်းနေသည်။ ယင်းက မိုးမြေ၏ စမ်းသပ်မှုတစ်ခု ဖြစ်သည်။ သို့သော်လည်း ကောင်းကင်ဘုံကပ်ဘေးဒုက္ခထဲမှာ အဖျက်စွမ်းအားသာမက ဖန်ဆင်းခြင်းစွမ်းအားလည်း ကိန်းအောင်းနေသည်။ ဖန်ဆင်းခြင်းစွမ်းအားသည် အံ့ဖွယ်ထူးခြားသော အသက်ဓာတ်တစ်မျိုး ဖြစ်သည်။ ဖန်ဆင်းခြင်းစွမ်းအားသည် ဤလောက၏ လျှို့ဝှက်ဆန်းကြယ်မှုများအနက် တစ်ခုဖြစ်သည်။ ဒဏ္ဍာရီအရ ခရမ်းရွှေကုန်းမြေပေါ်မှ သက်ရှိများသည် ဖန်ဆင်းခြင်းစွမ်းအားကြောင့် ဖြစ်တည်လာကြခြင်း ဖြစ်သည်။

ယင်းက မိုးမြေ၏ လျှို့ဝှက်ဆန်းကြယ်သော အန္တိမစွမ်းအားတစ်မျိုး ဖြစ်သည်။