အခန်း ၂၂၉၁

အခန်း ၂၂၉၁ အနက်ရောင်ဝတ်စုံဝတ် လူများ၏ အမှန်တရား၊ ခေတ်ကာလများ၏ သားတော်များ

မျက်တောင်တစ်ခတ်မျှသာ ကြာလိုက်သလို ရှိသော်လည်း၊ မရေမတွက်နိုင်သော ရာစုနှစ်ပေါင်းများစွာ ကြာမြင့်သွားသကဲ့သို့ ခံစားရသည်။ သတိမထားမိနိုင်လောက်အောင် တိုးညှင်းသော အသံလေး တစ်သံနှင့်အတူ ဝမ်ချောင်နှင့် အာရပ်ဘုန်းတော်ကြီးတို့၏ အကြည့်များရှေ့မှာပင် ကျောက်စားပွဲပေါ်ရှိ ထိုဦးခေါင်း၏မျက်ခွံများက အနည်းငယ် တုန်လှုပ်သွားပြီးနောက် မျက်လုံးများကို ဖြည်းညှင်းစွာ ဖွင့်လာတော့သည်။

ထိုအခိုက်အတန့်တွင် အချိန်များပင် ရပ်တန့်သွားသကဲ့သို့ ဖြစ်နေခဲ့သည်။

"ဟူး… နောက်ဆုံးတော့ ဒီအချိန်ကို ရောက်လာခဲ့ပြီပဲ"

နက်ရှိုင်းစွာ သက်ပြင်းချသံ တစ်ခုနှင့်အတူ ကျောက်စားပွဲပေါ်ရှိ ခေါင်းက ရုတ်တရက် စကားပြောလာခဲ့ပြီး မျက်လုံးထဲတွင် ဖော်ပြ၍မရနိုင်သော လောကကြီးကို ဖြတ်သန်းခဲ့ရသည့် အတွေ့အကြုံရင့်ကျက်မှု တစ်မျိုး ပေါ်ထွက်နေခဲ့သည်။

မှောင်မိုက်ပြီး ရိုးရှင်းလှသော ကျောက်ခန်း တစ်ခု၊ ခန္ဓာကိုယ် မရှိသော ခေါင်းတစ်လုံး၊ မျက်စိရှေ့ရှိ အရာအားလုံးက ဖော်ပြ၍မရနိုင်လောက်အောင် ထူးဆန်းနေသော်လည်း ပို၍ထူးဆန်းသည်မှာ ခန္ဓာကိုယ် မရှိတော့လင့်ကစား ထိုခေါင်းက စကားပြောနိုင်နေဆဲ ဖြစ်ခြင်းပင် ဖြစ်သည်။

သို့သော်လည်း ဝမ်ချောင်ဖြစ်စေ၊ အာရပ်ဘုန်းတော်ကြီးဖြစ်စေ မည်သူတစ်ဦးတစ်ယောက်ကမျှ အံ့အားသင့်နေခြင်း မရှိကြဘဲ သူတို့၏ ကျင့်ကြံခြင်းအဆင့်က ကောင်းကင်နှင့် မြေကြီး၏ မူလဇစ်မြစ်ကို နားလည်သဘောပေါက်သည့်အဆင့်သို့ ရောက်ရှိနေပြီဖြစ်ရာ သာမန်လူများ၏ မျက်လုံးထဲတွင် ဒဏ္ဍာရီများအလား မဖြစ်နိုင်သော အချို့သော ကိစ္စရပ်များကို လုပ်ဆောင်နိုင်စွမ်း ရှိနေကြပြီ ဖြစ်သည်။

"စီနီယာ၊ ဒီဂျူနီယာက ရောက်လာတာ နောက်ကျသွားတယ်"

ဝမ်ချောင်သည် မျက်စိရှေ့ရှိ ဆင်းဒုဘုန်းတော်ကြီးသို့မဟုတ် ထိုက်ယွမ်ကို ကြည့်ကာ ရှေ့သို့ တိုး၍ အရိုအသေပေးလိုက်ပြီး ခေါင်းငုံ့လိုက်သည့် မျက်တောင်တစ်ခတ်အတွင်း သူ၏မျက်လုံးထဲတွင် ဝမ်းနည်းမှု အရိပ်အယောင်လေးတစ်ခု လက်သွားခဲ့သည်။

ဘုန်းတော်ကြီး၏ အချိန်များက သိပ်မရှိတော့ကြောင်းကို ဝမ်ချောင်ရင်ထဲတွင် သေချာ သိရှိနေပြီး ဤသည်မှာ မိမိနှင့်သူ၏ နောက်ဆုံးအကြိမ် စကားပြောဆိုခြင်း ဖြစ်လောက်ပေသည်။

"ဟင်းဟင်း အသက်ရှင်ခြင်းနဲ့ သေဆုံးခြင်းဆိုတာ ကံကြမ္မာပါပဲ၊ ဒါ့အပြင် ဘုန်းကြီးအိုကြီးက နှစ်ပေါင်း သောင်းချီပြီး အသက်ရှင်ခဲ့ပြီးပြီဆိုတော့ သာမန်လူတွေထက် အများကြီး သာလွန်နေပါပြီ၊ နောင်တရစရာ ဘာမှ မရှိပါဘူး။ အရာအားလုံးက အတက်အကျ ဆိုတာ ရှိစမြဲပါပဲ၊ အရှင် ဘုန်းကြီးအိုကြီးအတွက် ဝမ်းနည်းနေစရာ မလိုပါဘူး"

ထိုက်ယွမ်၏ မျက်နှာမှာ တည်ငြိမ်နေပြီး မျက်လုံးထဲတွင် လောကကြီးကို နားလည်သဘောပေါက်ထားသည့် တည်ငြိမ်မှု အရိပ်အယောင်လေးတစ်ခု ပေါ်ထွက်နေခဲ့သည်။

"ဒါ့အပြင် ဘုန်းကြီးအိုကြီး တစ်ယောက်တည်းရဲ့အသက်ရှင်ခြင်း သေဆုံးခြင်းထက် ပိုအရေးကြီးတဲ့ ကိစ္စတစ်ခု ရှိသေးတယ်၊ ဒါကလည်း ဘုန်းကြီးအိုကြီး သေခါနီး အချိန်လေးမှာ အရှင့်ကို မိုင်ထောင်ချီ အဝေးကနေ အထူးတလည် ခေါ်ယူရတဲ့ အကြောင်းရင်းပဲ"

နောက်ဆုံး စကားတစ်ခွန်းကို ပြောလိုက်ချိန်တွင် ထိုက်ယွမ်၏ မျက်နှာအမူအရာက အများကြီး ပိုမိုလေးနက်သွားခဲ့သည်။

ဝမ်ချောင်၏ ရင်ထဲတွင် တစ်ချက် ခုန်သွားပြီး အလိုအလျောက် လှမ်းကြည့်လိုက်မိသည်။

"‘ထျန်း’က မကြာခင် ထွက်ပေါ်လာတော့မယ်"

ထိုက်ယွမ်က အသံနှိမ့်ကာ ပြောလိုက်သည်။

ထိုက်ယွမ်၏ ပေါ့ပေါ့ပါးပါး ပြောလိုက်သော စကားတစ်ခွန်းက ဧရာမ ကျောက်တုံးကြီးတစ်ခု ပြုတ်ကျလာသကဲ့သို့ ဝမ်ချောင်၏ရင်ထဲတွင် မျက်တောင်တစ်ခတ်အတွင်း လှိုင်းလုံးကြီးများ ရုတ်တရက် ထကြွလာစေခဲ့သည်။

"ဘာ…"

ကောင်းကင်နတ်ဘုရား အဖွဲ့အစည်းအကြောင်းကို အနည်းငယ်မျှ သိရှိထားသူတိုင်း ထိုက်ယွမ်၏ ဤစကားက ဘာကိုဆိုလိုကြောင်းကို သေချာပေါက် နားလည်ကြမည် ဖြစ်သည်။

လက်ရှိအချိန်အထိ ကုန်းမြေကမ္ဘာကြီး တစ်ခုလုံးတွင် ‘ထျန်း’သည် ရှန်ဝူအဆင့်သို့ ရောက်ရှိနေပြီဖြစ်ကြောင်း အတိအကျ သိရှိထားသော တစ်ဦးတည်းသော သိုင်းပညာရှင်ဖြစ်ပြီး အတိုင်းအတာ တစ်ခုအထိ "နတ်ဘုရား"ဟု ခေါ်ဆိုနိုင်သော တစ်ဦးတည်းသော လူလည်း ဖြစ်သည်။

ဤအချက်ကို ယခင် သူတော်စင် ဧကရာဇ်ပင်လျှင် ရောက်ရှိခဲ့ဖူးခြင်း မရှိပေ။

လက်ရှိအချိန်အထိ ဝမ်ချောင်အနေဖြင့် ကောင်းကင်နတ်ဘုရား အဖွဲ့အစည်းမှ လူများကို ဖိနှိပ်ထားနိုင်ခဲ့ပြီး ထိုက်ရှီကိုပင် သတ်ဖြတ်နိုင်ခဲ့ခြင်းမှာ ‘ထျန်း’ ၏ မူလခန္ဓာကိုယ်က အမြဲတမ်း ပိတ်လှောင်ခံထားရသည့် အခြေအနေတွင် ရှိနေသောကြောင့်ပင် ဖြစ်သည်။

အကယ်၍ ‘ထျန်း’က ပိတ်လှောင်မှုမှ လွတ်မြောက်လာပြီး အောင်မြင်စွာ ထွက်ပေါ်လာမည်ဆိုပါက အရာအားလုံးက လုံးဝပြောင်းလဲသွားမည်ဖြစ်ပြီး ဤကမ္ဘာကြီးအတွက်မူ...... ထိုအချိန်ကျလျှင် အမှန်တကယ်ပင် "ကမ္ဘာပျက်မည့်နေ့" ဖြစ်သွားလောက်ပေသည်။

ဝမ်ချောင်သည် ဘေးနားရှိ အာရပ်ဘုန်းတော်ကြီးကို အလိုအလျောက် တစ်ချက် လှမ်းကြည့်လိုက်ရာ တစ်ဖက်လူ၏ မျက်နှာမှာ တည်ငြိမ်နေပြီး ဤကိစ္စကို စောစီးစွာကပင် သိရှိထားကြောင်း သိသာထင်ရှားလှပေသည်။

"ဒါပေမဲ့ မင်း လောလောဆယ် စိုးရိမ်နေစရာ မလိုသေးပါဘူး၊ အခြေအနေက အဲဒီအဆင့်ထိ မရောက်သေးပါဘူး။ ဒါပေမဲ့ ‘ထျန်း’က ဒီလို စလုပ်နေပြီ၊ ဒီတစ်ကြိမ် သူက ထိုက်စု၊ ထိုက်ရှန်နဲ့ ထိုက်ကျုံးတို့ကို လွှတ်လိုက်တာက ငါ့ဆီမှာရှိတဲ့ အမှတ်အသား တစ်ခုကို ယူဖို့ပဲ"

"အမှတ်အသား"

ဝမ်ချောင်၏ မျက်မှောင်များ ကြုတ်သွားပြီး ပြန်မေးလိုက်သည်။

"ဒါပဲ"

ဤအချိန်မှာပင် ဘေးနားရှိ အာရပ်ဘုန်းတော်ကြီးက လက်ဝါးကို ဆန့်ထုတ်လိုက်ရာ တောက်ပသော ဂန်ချီ တစ်ခုက သူ၏လက်ဝါးထဲမှ ပန်းထွက်လာပြီး လေထဲတွင် စုစည်းသွားကာ လက်ဖဝါးအရွယ်အစားရှိသော အဝိုင်းပုံစံ အမှတ်အသားတစ်ခုကို ပုံဖော်လိုက်သည်။

အမှတ်အသားမှာ အနက်ရောင်နှင့် ရွှေရောင် ရောစပ်နေပြီး အလယ်တွင် မီးတောင်ချော်ရည် မီးတောက်များ၏ ပုံစံ ပါရှိနေသည်။

"ကမ္ဘာပျက် အမှတ်အသား"

အာရပ်ဘုန်းတော်ကြီး၏ လက်ဖဝါးထဲရှိ ပုံစံကို မြင်လိုက်ရချိန်တွင် ဝမ်ချောင်ခန္ဓာကိုယ် တစ်ခုလုံး ပြင်းထန်စွာ တုန်ယင်သွားပြီး အလိုအလျောက် ရေရွတ်လိုက်မိသည်။

"ဒါ ဘယ်လိုလုပ် ဖြစ်နိုင်မှာလဲ"

ဝမ်ချောင်သည် ကမ္ဘာပျက် အမှတ်အသားနှင့် မစိမ်းလှသော်လည်း သူသိထားသလောက် ကမ္ဘာပျက် အမှတ်အသား၏ အသုံးဝင်မှုမှာ ကမ္ဘာကြီး၏တံခါးကို ဖွင့်လှစ်ပေးပြီး ထို အခြားကမ္ဘာ ကျူးကျော်သူများကို အစုလိုက်အပြုံလိုက် ဝင်ရောက်လာစေရန် ဖြစ်ရာ ‘ထျန်း’ လွတ်မြောက်လာမှုနှင့် ဘာကြောင့် ထပ်ပြီး ဆက်စပ်နေရတာလဲ။

"မင်း ဒါကို သိနေတာလား"

ဝမ်ချောင်၏ တုံ့ပြန်မှုကို မြင်လိုက်ရသောအခါ အာရပ်ဘုန်းတော်ကြီးနှင့် ထိုက်ယွမ်တို့ နှစ်ဦးစလုံး အံ့အားသင့်သွားကြပြီး ဝမ်ချောင်ကို ပြိုင်တူ ကြည့်လိုက်ကြသည်။

သူတို့ သိထားသလောက်ဆိုလျှင် ဝမ်ချောင်သည် ယခင်က ဤအရာကို တစ်ကြိမ်တစ်ခါမျှ မမြင်ဖူးသင့်ပေ။

"ဒီကိစ္စက ပြောရရင် ရှည်တယ်၊ စီနီယာ၊ ဒီ အမှတ်အသားက တကယ်တော့ ဘာလဲ။ ဘာလို့ ပိတ်လှောင်ခံထားရတဲ့ ‘ထျန်း’ကို လွှတ်ပေးနိုင်ရတာလဲ။ ပြီးတော့ အရင်တုန်းက ‘ထျန်း’ကို ဘယ်သူက ပိတ်လှောင်ခဲ့တာလဲ။ ကောင်းကင်နတ်ဘုရား အဖွဲ့အစည်းဆိုတာက တကယ်တော့ ဘာလဲ"

ဝမ်ချောင်က အသံနှိမ့်ကာ ပြောလိုက်ပြီး မေးခွန်းများစွာကို ဆက်တိုက် မေးလိုက်သည်။

"မင်း ဒီအရာတွေကို မမေးရင်တောင်မှ ငါ မင်းကို ပြောပြမှာပါ"

ထိုက်ယွမ်၏ မျက်နှာအမူအရာမှာ သိပ်များများစားစား ပြောင်းလဲသွားခြင်း မရှိဘဲ ဝမ်ချောင်ဤသို့ မေးလိမ့်မည်ကို စောစီးစွာကပင် ကြိုတင် ခန့်မှန်းထားခဲ့ပုံ ရသည်။

"ဒီတစ်ကြိမ် သန့်စင်ခြင်း အစီအစဉ်ကို ဖြတ်သန်းခဲ့ရပြီးနောက် လူသားတွေရဲ့ ယဉ်ကျေးမှု ဆိုတာ အမြဲတမ်း မပြောင်းမလဲ တည်ရှိနေတာ မဟုတ်ဘူးဆိုတာကို မင်း အစောကြီးကတည်းက သိလောက်ပါပြီ။ အချိန်ကာလတစ်ခုရောက်တိုင်း အရာအားလုံးက ဖျက်ဆီးခံရလေ့ရှိတယ်။ အဲဒီဖျက်ဆီးမှုဆိုတာက ကုန်းမြေတွေ ရေခဲဖုံးသွားတာကို မင်း မြင်တွေ့ရတာမျိုး မဟုတ်ဘဲ ကမ္ဘာကြီး တစ်ခုလုံးက လုံးဝ ဖျက်ဆီးခံလိုက်ရတာကို ဆိုလိုတာပါ"

"အဲဒီလို အခြေအနေမျိုး ရောက်သွားပြီဆိုရင် လူသားတွေရဲ့ ယဉ်ကျေးမှုက သုညကနေ ပြန်စရတော့မှာဖြစ်ပြီး ယဉ်ကျေးမှု အသစ်ကလည်း အပျက်အစီးတွေ အပေါ်မှာ အသစ်ပြန်လည် မွေးဖွားလာပြီး အစကနေ ပြန်စရလိမ့်မယ်။ ဒီလို တက်လိုက်ကျလိုက်နဲ့ လည်ပတ်နေတဲ့ သံသရာ တစ်ခုကို မင်းက ကပ်ကာလတစ်ခုလို့ ခေါ်နိုင်ပြီး ငါတို့ကတော့ ခေတ်ကာလတစ်ခုလို့ ခေါ်တယ်"

"အမှတ်အသား ဆိုတာက မင်းပြောတဲ့ ကမ္ဘာပျက် အမှတ်အသားက ကမ္ဘာကြီး တစ်ခုလုံး ပြိုကျပျက်စီးသွားပြီးနောက် ကျန်ရစ်ခဲ့တဲ့ မူလဇစ်မြစ် အရာတချို့ ဖြစ်ပြီး အဲဒီအထဲမှာ ကောင်းကင်နဲ့ မြေကြီးရဲ့ စည်းမျဉ်းတွေ၊ ကမ္ဘာကြီးရဲ့ မူလဇစ်မြစ်တွေအပြင် တခြား ရှုပ်ထွေးတဲ့ အရာတချို့ ပါဝင်နေတယ်။ ခေတ်ကာလတစ်ခု ပြီးဆုံးသွားတိုင်းမှသာ အမှတ်အသား တစ်ခု မွေးဖွားလာနိုင်ချေ ရာခိုင်နှုန်း တစ်ခု ရှိတတ်တဲ့အတွက် အရမ်းကို တန်ဖိုးကြီးမားတယ်၊ အခုအချိန်အထိ ဒီလို အမှတ်အသားမျိုးက ခုနစ်ခုပဲ ရှိသေးတယ်"

ဝမ်ချောင်သည် စကားမပြောဘဲ သေချာစွာသာ နားထောင်နေခဲ့ပြီး ထိုက်ယွမ်ပြောသော စကားလုံး တစ်လုံးကိုမျှ လွတ်မခံခဲ့ပေ။

ယခင်က အရာအားလုံးကို ဝမ်ချောင်သည် ယခင်ဘဝက မှတ်ဉာဏ်များကို အားကိုး၍ တိတ်တဆိတ်သာ ခန့်မှန်းခဲ့ရသော်လည်း ဤသည်မှာ အရာအားလုံး၏ မူလအစကို သူ၏ရှေ့တွင် ပထမဆုံးအကြိမ် လာရောက် ပြောပြသူ ပင်ဖြစ်သည်။

ယနေ့ ထိုက်ယွမ်ပြောသော စကားများသည် မိမိအတွက်သာမက နောင်အနာဂတ် ကမ္ဘာကြီး တစ်ခုလုံး အပေါ်တွင်ပါ အလွန်ကြီးမားသော အကျိုးသက်ရောက်မှုများ ဖြစ်ပေါ်လာစေလိမ့်မည်ကို ဝမ်ချောင်ရင်ထဲတွင် သေချာ သိရှိနေခဲ့သည်။

"ငါတို့နဲ့ ပတ်သက်ပြီးတော့......"

ထိုက်ယွမ်သည် ဤနေရာသို့ ရောက်သောအခါ ခဏမျှ ရပ်တန့်သွားပြီး ဝမ်ချောင်ကို တစ်ချက် လှမ်းကြည့်ကာ ဖြည်းညှင်းစွာ ဆက်ပြောလိုက်သည် -

"မင်းလည်း ခန့်မှန်းမိလောက်ပါပြီ၊ ငါတို့ ထိုက်အဆင့်တွေဆိုတာ ခေတ်ကာလ အသီးသီးကနေ အသက်ရှင် ကျန်ရစ်ခဲ့တဲ့ လူသားတွေဖြစ်ပြီး ကောင်းကင်နတ်ဘုရား အဖွဲ့အစည်းဆိုတာက ငါတို့တွေ အတူတကွ စုစည်းပြီး ကျပန်း နာမည်ပေးထားတာ သက်သက်ပါပဲ။ ဒါ့အပြင် ငါတို့ကို ပိုပြီး တိကျတဲ့ အခေါ်အဝေါ်နဲ့ ခေါ်ရမယ်ဆိုရင် ခေတ်ကာလများ၏ သားတော်များလို့ ခေါ်သင့်တယ်"

ထိုက်ယွမ်၏စကားကို ကြားလိုက်ရသောအခါ ဝမ်ချောင်သည် နားနှစ်ဖက်စလုံး အူသွားသည်ကိုသာ ခံစားလိုက်ရသည်။

ခေတ်ကာလများ၏ သားတော်များ။

ခေတ်ကာလတစ်ခုလုံးကို ကျော်ဖြတ်ပြီး အသက်ရှင်ခဲ့တယ်။

ထိုက်ယွမ်ပြောပြသော အချက်အလက်များက ဝမ်ချောင်၏ အသိပညာများကို လုံးဝမှောက်လှန်ပစ်လိုက်ပြီဖြစ်ပြီး အမှန်တရားက ဤကဲ့သို့ ဖြစ်နေလိမ့်မည်ဟု သူ မည်သည့်အခါကမျှ မတွေးထင်ခဲ့ဖူးပေ။

လူတစ်ယောက်က တကယ်တော့ ဘယ်လောက်ကြာကြာ အသက်ရှင်နိုင်မှာလဲ။

ဆယ်နှစ်၊ အနှစ်တစ်ရာ၊ အနှစ်တစ်ထောင်၊ ဒါမှမဟုတ် အနှစ်တစ်သောင်းထိလား။

အကယ်၍ ယခင်ကသာ ဆိုလျှင် ဤအရာအားလုံးမှာ အဓိပ္ပာယ်မရှိသော စကားများသာ ဖြစ်သည်ဟု ဝမ်ချောင်တွေးထင်ခဲ့မည် ဖြစ်သော်လည်း ကောင်းကင်နတ်ဘုရား အဖွဲ့အစည်း၏ ထိုက်အဆင့်ရှိ သိုင်းပညာရှင်တစ်ဦးအနေဖြင့် ထိုက်ယွမ်သည် မိမိကို လိမ်ညာပြောဆိုနေရန် လုံးဝ မလိုအပ်ပေ။

အချိန်အတော်ကြာကတည်းက ဝမ်ချောင်သည် ကောင်းကင်နတ်ဘုရား အဖွဲ့အစည်းကို နောက်ကွယ်မှနေ၍ လူသားများ၏ ယဉ်ကျေးမှုကို တိတ်တဆိတ် ခြယ်လှယ်နေသော လျှို့ဝှက်ကြံစည်သူများ၊ မျက်တောင်မခတ်ဘဲ လူသတ်တတ်သော ဆိုးယုတ်သည့် အဖွဲ့အစည်း တစ်ခုအဖြစ် အမြဲတမ်း သတ်မှတ်ထားခဲ့သော်လည်း ထိုက်ယွမ်၏ အဆိုအရ သူတို့မှာ တကယ်တော့ လူသား ယဉ်ကျေးမှု အသီးသီးမှ အသက်ရှင် ကျန်ရစ်သူများသာ ဖြစ်ကြသည်။

သို့သော် ဤကဲ့သို့သော လူသား ယဉ်ကျေးမှုများ၏ အချိန်ကာလ တွက်ချက်မှုမှာ ကီဂန်အင်ပါယာ သို့မဟုတ် လန်ရှာ ယဉ်ကျေးမှုတို့ထက် များစွာပိုမိုရှည်လျားနေခဲ့သည်။

အကယ်၍ ထိုက်ယွမ်ပြောသည်သာ မှန်ကန်ပါက ကောင်းကင်နတ်ဘုရား အဖွဲ့အစည်းသည် အဘယ်ကြောင့် ဤမျှ များပြားသော ကျင့်စဉ်များ၊ နည်းပညာများနှင့် မှော်လက်နက်များကို ပိုင်ဆိုင်ထားရသနည်း ဆိုသည်ကိုလည်း ရှင်းပြနိုင်မည်ဖြစ်ပြီး အကယ်၍ ဤအချက်သာ မှန်ကန်ပါက ‘ထျန်း’အပါအဝင် ကောင်းကင်နတ်ဘုရား အဖွဲ့အစည်းမှ လူများ အသက်ရှင်နေထိုင်ခဲ့သည့် အချိန်ကာလမှာ အပြင်ဘက်ကမ္ဘာရှိ ဒဏ္ဍာရီများထက်ပင် များစွာ ပိုမို ရှည်လျားနေလောက်ပေသည်

"ခင်ဗျား ပြောတာကို ကြည့်ရရင် ခင်ဗျားတို့က မူလက တစ်သွေးတည်း တစ်သားတည်း ဖြစ်ခဲ့တာပဲ၊ နောက်ပိုင်း ဘာလို့ လမ်းခွဲသွားကြတာလဲ။ ‘ထျန်း’က ခင်ဗျားကို တိုက်ခိုက်ဖို့ ထိုက်စု၊ ထိုက်ရှန်နဲ့ ထိုက်ကျုံးတို့ကိုတောင် လွှတ်လိုက်သေးတယ်"

မျက်တောင်တစ်ခတ်မျှ အချိန်လေးအတွင်းမှာပင် ဝမ်ချောင်သည် သတိပြန်ဝင်လာပြီး အသံနှိမ့်ကာ မေးလိုက်သည်။

ဝမ်ချောင်၏စကားကို ကြားလိုက်ရသောအခါ ဘေးနားရှိ အာရပ်ဘုန်းတော်ကြီး၏ မျက်လုံးထဲတွင် တစ်ချက် လှုပ်ရှားသွားခဲ့ပြီး ထိုက်ယွမ်၏ မျက်နှာပေါ်တွင်လည်း သက်ပြင်းချသည့် အရိပ်အယောင်လေးတစ်ခု ပေါ်ထွက်လာခဲ့သည်။

"မင်းပြောတာ မှန်ပါတယ်၊ ပုံမှန် အခြေအနေဆိုရင် ငါတို့က တကယ်ပဲ တစ်သွေးတည်း တစ်သားတည်းပါ၊ ထိုက်အဆင့် ဆယ့်နှစ်ယောက်က ခေတ်ကာလများ၏ သားတော်များ ဆယ့်နှစ်ယောက်ကို ကိုယ်စားပြုပြီး ငါတို့ အားလုံးနီးပါးက ‘ထျန်း’က ကြီးမားတဲ့ ဘေးအန္တရာယ်ဆိုးကြီး ထဲကနေ ကယ်တင်ပေးခဲ့တဲ့ လူတွေပါ။ အခုအချိန်မှာ မင်းက ငါတို့ ထိုက်အဆင့်တွေ အားလုံးက ‘ထျန်း’ရဲ့ လက်အောက်ခံတွေလို့ ထင်ကောင်းထင်နေလိမ့်မယ်၊ ဒါပေမဲ့ အစောပိုင်း အချိန်တွေတုန်းကတော့ ငါတို့ကြားက ဆက်ဆံရေးက သူငယ်ချင်းတွေနဲ့ ပိုတူပါတယ်။ ဝမ်းနည်းစရာ ကောင်းတာကတော့ လောကကြီးမှာ ဘယ်အရာမှ အမြဲတမ်း မပြောင်းမလဲ တည်ရှိနေတာ မဟုတ်ပါဘူး"

"ဒီအရာတွေ အားလုံးက ‘ထျန်း’ရဲ့ သန့်စင်ခြင်း အစီအစဉ်ကနေ စတင်ခဲ့တာပါ"

"မင်း အအေးလှိုင်း အရင်းအမြစ်နေရာကို သွားခဲ့ဖူးတယ်ဆိုတော့ အတိုင်းအတာ တစ်ခုအထိတော့ နားလည်ထားလောက်ပါပြီ"

ထိုက်ယွမ်က ပြောလိုက်သည်။

ဝမ်ချောင်သည် စကားမပြောဘဲ ခေါင်းညိတ်ရုံသာ ညိတ်ပြလိုက်သည်။

"သန့်စင်ခြင်း အစီအစဉ်"၊ ပိုမို တိကျသော အခေါ်အဝေါ်မှာ လူသားမျိုးနွယ် မျိုးသုဉ်းရေး အစီအစဉ် ဖြစ်ပြီး အကယ်၍ ‘ထျန်း’ကိုသာ အောင်မြင်ခွင့် ပေးလိုက်မည်ဆိုပါက ကမ္ဘာကြီး တစ်ခုလုံးတွင် လူမည်မျှ သေဆုံးသွားမည်ကို မသိနိုင်ဘဲ ကျန်ရစ်နေသော လူသားများမှာလည်း ‘ထျန်း’က မွေးမြူထားသော ရုပ်သေးရုပ်များ အဖြစ်သို့ ပြောင်းလဲသွားမည်သာ ဖြစ်သည်။

ဝမ်ချောင်သည် စစ်ရေးနတ်ဘုရားဖြစ်ပြီး အလောင်းများ တောင်လိုပုံကာ သွေးများ ပင်လယ်လို စီးဆင်းအောင် သတ်ဖြတ်ခဲ့သူဟု နာမည်ကြီးကာ ယခုအချိန်အထိ သူ သတ်ဖြတ်ခဲ့သော နိုင်ငံအသီးသီးမှ စစ်သည်များမှာ သန်းချီ၍ ရှိနေပြီဖြစ်သော်လည်း ‘ထျန်း’၏ သန့်စင်ခြင်း အစီအစဉ် နှင့် နှိုင်းယှဉ်ပါက လုံးဝ ပြောပလောက်သည့် အရာ မဟုတ်ပေ။

"‘ထျန်း’က တကယ်တော့ ဘာလုပ်ချင်နေတာလဲ။ လူသားမျိုးနွယ်တစ်ခုလုံးကို မျိုးသုဉ်းအောင် လုပ်ချင်နေတာလား။ ဒီလိုလုပ်တာက သူ့အတွက် ဘာအကျိုးကျေးဇူး ရှိလို့လဲ"

ဝမ်ချောင်က အသံနှိမ့်ကာ ပြောလိုက်သည်။

"မင်း မှားနေပြီ၊ ‘ထျန်း’ရဲ့ ရည်ရွယ်ချက်က မကောင်းတာတော့ မဟုတ်ပါဘူး၊ ဒါပေမဲ့ သူ အသုံးပြုတဲ့ နည်းလမ်းတွေကို ငါတို့ လက်မခံနိုင်တာ သက်သက်ပါပဲ"

ထိုက်ယွမ်က ခေါင်းခါလိုက်ပြီး ဆက်ပြောလိုက်သည်။

"‘ထျန်း’က သန့်စင်ခြင်း အစီအစဉ်ကို အကောင်အထည် ဖော်ရတဲ့ အကြောင်းရင်းနဲ့ အရာအားလုံးက အခြားကမ္ဘာ ကျူးကျော်သူများ ကနေ စတင်ခဲ့တာပါ"

နောက်ဆုံး စကားလုံး အနည်းငယ်ကို ကြားလိုက်ရချိန်တွင် ဝမ်ချောင်၏ ခန္ဓာကိုယ် တစ်ခုလုံး ပြင်းထန်စွာ တုန်ယင်သွားခဲ့သည်။

ထိုက်ယွမ်ပြောပြခဲ့သော သတင်းအချက်အလက်များ အားလုံးထဲတွင် ‘ထျန်း’၏ သတင်းမှလွဲ၍ ဝမ်ချောင်၏ အာရုံကို အခြားကမ္ဘာ ကျူးကျော်သူများ ဟူသော စကားလုံးလောက် ဖမ်းစားနိုင်သည့် သတင်း မရှိတော့ပေ။

အကယ်၍ ဤကမ္ဘာပေါ်တွင် အခြားကမ္ဘာ ကျူးကျော်သူများ၏ အမှန်တရားကို သိရှိသူတစ်ဦး ရှိနေမည်ဆိုလျှင် ၎င်းမှာ ကောင်းကင်နတ်ဘုရား အဖွဲ့အစည်းသာ လုံးဝ ဖြစ်မည်ဖြစ်ပြီး ဝမ်ချောင်သည် ဘဝနှစ်ခုစလုံးကို ဖြတ်သန်းခဲ့ရသော်လည်း ဤကိစ္စရပ်တွင်မူ ကောင်းကင်နတ်ဘုရား အဖွဲ့အစည်းနှင့် လုံးဝ နှိုင်းယှဉ်၍ ရနိုင်မည် မဟုတ်ပေ။

"မင်း ဒါကို သိပြီးပြီလား"

ဘေးနားရှိ အာရပ်ဘုန်းတော်ကြီး၏ မျက်မှောင်များ ပင့်သွားပြီး အနည်းငယ် အံ့အားသင့်စွာဖြင့် မေးလိုက်သည်။

"အင်း"

ဝမ်ချောင်က မငြင်းဆန်ခဲ့သော်လည်း ကျောက်စားပွဲပေါ်ရှိ ထိုက်ယွမ်မှာမူ မျက်နှာအမူအရာ ပုံမှန်အတိုင်းပင် ဖြစ်နေပြီး အံ့အားသင့်နေခြင်း မရှိပေ။

"အဲဒီ အခြားကမ္ဘာ ကျူးကျော်သူများ က တကယ်တော့ ဘာတွေလဲ"

ဝမ်ချောင်က အသံနှိမ့်ကာ မေးလိုက်ပြီး မျက်နှာအမူအရာမှာ ယခင်က တစ်ကြိမ်တစ်ခါမျှ မရှိခဲ့ဖူးလောက်အောင် အာရုံစူးစိုက်နေခဲ့ကာ ဤအခိုက်အတန့်တွင် ဝမ်ချောင်၏ ရင်ထဲ၌ပင် အနည်းငယ် စိတ်လှုပ်ရှားနေသည်ကို မတားဆီးနိုင်ခဲ့ပေ။

ကံကြမ္မာ ကျောက်တုံး၏ အကူအညီဖြင့် ပြန်လည်မွေးဖွားလာခဲ့ရာ ယခင်ဘဝက မသိရှိခဲ့သော အမှန်တရား များစွာကို ဝမ်ချောင်သိရှိခဲ့သော်လည်း ထို အခြားကမ္ဘာ ကျူးကျော်သူများနှင့် ပတ်သက်၍မူ ဝမ်ချောင်တွင် ယခုအချိန်အထိ မည်သည့် သဲလွန်စမျှ မရှိသေးပေ။

"ဒါက...... ငါတောင် မင်းကို မဖြေနိုင်လောက်ဘူး"

လုံးဝမျှော်လင့်မထားသည်မှာ ထိုက်ယွမ်က ခေါင်းခါလိုက်ပြီး တိုက်ရိုက် ငြင်းပယ်လိုက်သည် -

"ငါတို့ သိထားတာက ဒီအခြားကမ္ဘာ ကျူးကျော်သူများက အချိန်ကာလ တစ်ခု ရောက်တိုင်း ပေါ်လာတတ်တယ် ဆိုတာပဲ၊ ငါတို့ သူတို့ရဲ့ လျှို့ဝှက်ချက်တွေကို စုံစမ်းဖို့ ကြိုးစားခဲ့ဖူးပေမယ့် အားလုံး ကျရှုံးခဲ့တယ်"

"စကြာဝဠာထဲမှာ ကြီးမားတဲ့ အတားအဆီး ကြီးတစ်ခု ရှိနေတယ်၊ ငါတို့ အဲဒီနေရာကို လုံးဝဖြတ်ကျော်သွားလို့ မရဘူး၊ ‘ထျန်း’က ငါတို့ အားလုံးထဲမှာ စွမ်းအားအကြီးဆုံး ဖြစ်လို့ သူက အခြားကမ္ဘာ ကျူးကျော်သူတွေ နဲ့ ပတ်သက်တဲ့ လျှို့ဝှက်ချက်တွေကို ပိုသိတယ်"

"ခေတ်ကာလ အနည်းငယ်လောက်က ‘ထျန်း’အဲဒီ အတားအဆီးကို ဖြတ်ကျော်သွားခဲ့ဖူးတယ်လို့ ငါ ဝေဝါးဝါး မှတ်မိနေတယ်၊ ဒါပေမဲ့ မကြာခင်မှာပဲ သူ ပြန်ရောက်လာခဲ့တယ်၊ အဲဒီနောက်ပိုင်း ‘ထျန်း’က အဲဒီ အတွေ့အကြုံနဲ့ ပတ်သက်ပြီး လုံးဝ နှုတ်ဆိတ်နေခဲ့ပြီး နောက်ထပ် တစ်ခါမှ ထပ်မပြောတော့ဘူး"

"ဒါပေမဲ့ အခြားကမ္ဘာ ကျူးကျော်သူများကတော့ အဲဒီအတွက် ဖြေရှင်းခံလိုက်ရတာ မဟုတ်ဘဲ အချိန်ကာလ တစ်ခုရောက်တိုင်း ငါတို့ရဲ့ကမ္ဘာကြီးထဲကို အမြောက်အမြား ဝင်ရောက်လာတုန်းပဲ"

စကြာဝဠာ အတားအဆီး။

ဝမ်ချောင်၏မျက်လုံးများ အနည်းငယ် မှေးသွားပြီး ထိုက်ယွမ်၏ စကားထဲမှ အရေးကြီးသော သတင်းအချက်အလက် တစ်ခုကို ထက်မြက်စွာ ရိပ်မိသွားခဲ့သည်။

"အဲဒီနောက်ရော"

ဝမ်ချောင်က ဆက်မေးလိုက်သည်။

******