အခန်း ၈၆

အခန်း ၈၆ ဘဏ် ဓားပြတိုက်မှု အပေါ် သုံးသပ်ချက် အသစ်

လူမိုက်ဂိုဏ်းများနှင့် ပတ်သက်သော ကိစ္စရပ်များကို အမှတ် ၅ စုံစမ်းစစ်ဆေးရေးအဖွဲ့ အနေဖြင့် ဝင်ရောက် ကိုင်တွယ်ခွင့် ရှိသော်လည်း ရိုအန် နှင့် မိုနာ တို့၏ ဤတစ်ကြိမ် လှုပ်ရှားမှုမှာ လျှို့ဝှက် စစ်ဆင်ရေး တစ်ခု ဖြစ်နေလေသည်။ လူအများ၏ အာရုံစိုက်မှုကို မခံရစေရန်အတွက် ထိုကိစ္စကို အုပ်စုဖွဲ့ မှုခင်း နှိမ်နင်းရေး ဌာန မှ စုံထောက် နော်တန် ထံသို့သာ တိုက်ရိုက် ဖုန်းဆက်၍ အကြောင်းကြားလိုက်လေသည်။

အဖြစ်အပျက် အလုံးစုံကို နော်တန် ထံသို့ အသေးစိတ် ရှင်းပြလိုက်လေသည်။ ဘလက်ခ်ရီဗာ ဂိုဏ်း ဆိုသည်မှာ ငွေတိုးချေးစားသော လူမိုက်ဂိုဏ်းငယ်လေး တစ်ခုမျှသာ ဖြစ်ကြောင်း ကြားသိလိုက်ရသောအခါ နော်တန် က အထူးစစ်ဆင်ရေး တပ်ဖွဲ့ကို ခေါ်ဆောင်ကာ ဤနေရာသို့ ချက်ချင်း ရောက်ရှိလာခဲ့လေသည်။ တစ်ဖက်လူ သတိမထားမိခင် အချိန်လေး အတွင်း၌ပင် အရှိန်အဟုန်ဖြင့် ဝင်ရောက် စီးနင်းကာ ထို ဂိုဏ်းငယ်လေးကို အလွယ်တကူပင် အမြစ်ဖြတ် ရှင်းလင်းပစ်လိုက်တော့သည်။

"ဒီတစ်ကြိမ် တော့ ခင်ဗျား တော်တော် ပင်ပန်း သွားပြီ..."

အထူးစစ်ဆင်ရေး တပ်ဖွဲ့ဝင်များ ဖမ်းဆီး ခေါ်ဆောင်သွားသော ဂိုဏ်း၏ အဓိက ခေါင်းဆောင်များကို ရိုအန် က ပြီးစလွယ် တစ်ချက် လှမ်းကြည့်လိုက်ပြီး နော်တန် နှင့် လက်ဆွဲ နှုတ်ဆက်ကာ ပြုံးလျက် စကားဆိုလေသည်။

"မနက်ပိုင်း တုန်းက မှ ဂိုဏ်းကြီး တစ်ခု ကို ချေမှုန်း ပြီးတာ... နေ့လယ်ပိုင်း လည်း ကျရော ဂိုဏ်းငယ်လေး တစ်ခု ကို ထပ်ပြီး ချေမှုန်း ရပြန်ပြီ..."

"ဘာမှ မပင်ပန်း ပါဘူး..."

နော်တန် ၏ မျက်နှာ တစ်ခုလုံး ဝမ်းသာ ပျော်ရွှင်မှုများ ပြည့်နှက်နေလေသည်။ မည်သည့် နေရာမှန်း မသိဘဲ ရုတ်တရက် ထွက်ပေါ်လာသော သတင်းထောက်များကို လက်ညှိုးထိုးပြကာ ရိုအန် ကို တီးတိုး စကားဆိုလေသည်။

"တကယ်ကို ကျေးဇူးတင်ပါတယ် ရိုအန်... ငါ့ကို သတင်း တွေ ထဲ ပါဖို့ နောက်ထပ် အခွင့်အရေး တစ်ခု ထပ်ပေး လိုက်ပြန်ပြီ..."

အမေရိကန် နိုင်ငံ၏ ဥပဒေ အရ လူမိုက်ဂိုဏ်းများကို နှိမ်နင်းရာတွင် ပြီးစလွယ် ပြုလုပ်၍ မရချေ။ တရားဥပဒေ စိုးမိုးရေး အဖွဲ့အစည်းများ အနေဖြင့် ဂိုဏ်းခေါင်းဆောင်များကို တိကျစွာ ပြစ်ဒဏ် ချမှတ်နိုင်မည့် သက်သေခံ ပစ္စည်းများ လိုအပ်သည့် အပြင် တရားခွင် တွင် ထွက်ဆိုပေးနိုင်မည့် သက်သေ လူပုဂ္ဂိုလ် များလည်း မဖြစ်မနေ လိုအပ်လေသည်။

တိုက်တိုက်ဆိုင်ဆိုင် ပင် ယခုအချိန်တွင် အယ်လ်ကန် တို့ မိသားစုမှာ ဘား အတွင်း၌ ဖမ်းဆီး ချုပ်နှောင် ခံထားရသဖြင့် အခက်ခဲဆုံး ဖြစ်သော သက်သေ လူပုဂ္ဂိုလ် ကို အလွယ်တကူ ရရှိသွားပြီ ပင် ဖြစ်လေသည်။ ကျန်ရှိနေသော သက်သေခံ ပစ္စည်း များမှာမူ အက်ဖ်ဘီအိုင် အနေဖြင့် ရှာဖွေရန် လုံးဝ ခက်ခဲမည် မဟုတ်ပေ။

နော်တန် ၏ အမြင်တွင် ဤ ဂိုဏ်းငယ်လေးကို နှိမ်နင်းခြင်းမှာ ရိုအန် က သူ၏ လက်ထဲသို့ အလကား ထည့်ပေးလိုက်သော ဂုဏ်သတင်း တစ်ရပ်သာ ဖြစ်လေသည်။ ယခု အချိန်တွင် နော်တန် အနေဖြင့် ရိုအန် ကို သူ၏ စုံစမ်းစစ်ဆေးရေး အဖွဲ့ အတွင်းသို့ ချက်ချင်း ဆွဲသွင်းလိုစိတ်များ ပြင်းပြနေတော့သည်။

"အားနာ စရာ မလိုပါဘူး..."

ရိုအန် က ပြုံးလျက် လက်ယမ်းပြလိုက်သည်။ မနက်ပိုင်းတွင် မိမိက နော်တန် ကို ကူညီပေးခဲ့သဖြင့် နော်တန် က ဤသဲလွန်စကို ပြန်လည် ပေးအပ်ခဲ့ခြင်း ဖြစ်လေသည်။ ထိုသဲလွန်စကို စုံစမ်း စစ်ဆေးပြီးနောက် တရားခံများကို နော်တန် ၏ လက်ထဲသို့ ပြန်လည် အပ်နှံခဲ့ခြင်း ပင် ဖြစ်လေသည်။

အပြင်ပန်းတွင် ကြည့်လျှင် ရိုအန် အနေဖြင့် အနည်းငယ် အရှုံးပေါ်နေသည်ဟု ထင်ရသော်လည်း နော်တန် မှာ အုပ်စုဖွဲ့ မှုခင်း နှိမ်နင်းရေး ဌာန မှ ဖြစ်ပြီး လူမိုက်ဂိုဏ်းများနှင့် အမြဲတမ်း ထိတွေ့ ဆက်ဆံနေရသူ ဖြစ်လေသည်။ သူတို့၏ လက်ထဲတွင် မည်သို့သော သဲလွန်စများ ရှိနေမည်ကို မည်သူမျှ ကြိုတင် ခန့်မှန်းနိုင်မည် မဟုတ်ချေ။

လူမိုက်ဂိုဏ်း တစ်ခုတည်း ဆိုလျှင် ကိစ္စ မရှိသော်လည်း အုပ်စုဖွဲ့ မှုခင်း နှိမ်နင်းရေး ဌာန ၏ လက်ထဲတွင် နယူးယောက် မြို့ တစ်ခုလုံး၏ ရှစ်ဆယ် ရာခိုင်နှုန်းသော လူမိုက်ဂိုဏ်း သတင်း အချက်အလက်များ ရှိနေလေသည်။ ထို လူမိုက်ဂိုဏ်းများ က နယူးယောက် မြို့ တစ်ခုလုံးကို ဖြန့်ကြက် လွှမ်းမိုးထားသည့် အပြင် လျှို့ဝှက် ထောက်လှမ်းရေးများ ပါဝင်နေသေးသည်။

ယခု နော်တန် ပေးအပ်ခဲ့သော သဲလွန်စမှာ အမှုဖော်ထုတ်ရာတွင် အသုံးမဝင် ခဲ့သော်လည်း နောက်တစ်ကြိမ် နော်တန် ပေးအပ်လာမည့် သဲလွန်စမှာ အရေးကြီးသော အချိန်တွင် အသုံးဝင်လာမည် မဟုတ်ဟု မည်သူမျှ မပြောနိုင်ချေ။ မိတ်ဆွေ တစ်ယောက် တိုးလာခြင်းက လမ်းကြောင်း တစ်ခု ပိုမို ရရှိခြင်း ပင် ဖြစ်လေသည်။ ရိုအန် အနေဖြင့် နော်တန် ၏ စရိုက်လက္ခဏာ နှင့် ကိုယ်ရေး အချက်အလက်များကို အကြမ်းဖျင်း လေ့လာ သိရှိထားပြီး ဖြစ်သဖြင့် ရေရှည် ရင်းနှီးမြှုပ်နှံမှုကိုသာ ပိုမို အလေးထားခြင်း ပင် ဖြစ်လေသည်။

သတင်းထောက်များ၏ အင်တာဗျူး ဖြေဆိုရန် သွားရောက်မည့် နော်တန် ကို ဆက်လက် အနှောင့်အယှက် မပေးတော့ဘဲ ရိုအန် က လှည့်ကာ အယ်လ်ကန် တို့ မိသားစု ရှိရာသို့ လျှောက်သွားလိုက်လေသည်။

မိုနာ က ထိုနေရာတွင် အယ်လ်ကန် ၏ သမီးဖြစ်သူ ဆယ်လီနာ ကို နှစ်သိမ့်ပေးနေသည့် အပြင် အခြားသော အကြောင်းရင်း တစ်ခုလည်း ရှိနေသေးလေသည်။ ထိုအချက်မှာ အယ်လ်ကန် ကဲ့သို့ တစ်သက်လုံး ရိုးသား ကြိုးစားစွာ နေထိုင်လာခဲ့သော သာမန် နယူးယောက် မြို့သား တစ်ယောက်က မည်သည့်အတွက်ကြောင့် လူမိုက်ဂိုဏ်းများ၏ ငွေကြေးကို အသုံးပြု၍ အကြွေးလည်ပတ်သည့် ကစားပွဲကို ဆင်နွှဲရဲသနည်း ဆိုသည့် အချက်ကို ရိုအန် လုံးဝ နားမလည်နိုင်အောင် ဖြစ်နေသောကြောင့် ပင် ဖြစ်လေသည်။

"ဘာဖြစ်လို့လဲ ဆိုတော့ ကျွန်တော် က ပိုက်ဆံ အရမ်း လိုချင် နေခဲ့လို့ပါ..."

ရိုအန် ၏ မေးခွန်းကို ကြားလိုက်ရသောအခါ လက်ချောင်း လေးချောင်း ပြတ်တောက် နေသော အယ်လ်ကန် ၏ မျက်လုံးများ အတွင်းမှ နောင်တရနေသော မျက်ရည်များ စီးကျလာတော့သည်။ လူမိုက်ဂိုဏ်း၏ ရောင်းစားခြင်းကို ခံရလုနီးပါး ဖြစ်ခဲ့သော ဇနီးသည် နှင့် သမီးဖြစ်သူ ဆယ်လီနာ အပြင် ထိုနေရာတွင် တုန်ရီစွာ ထိုင်နေသော သက်ကြီးရွယ်အို မိဘ နှစ်ပါးကို ကြည့်ကာ စကားဆိုလေသည်။

"လွန်ခဲ့တဲ့ အချိန်ကာလ တစ်ခု တုန်းက ကျွန်တော့် ရဲ့ ဆိုင် ကို အဝတ် လာလျှော် တဲ့ လူလတ်ပိုင်း တစ်ယောက် နဲ့ စကားပြော ဖြစ်ခဲ့တယ်... အဲ့ဒီ အချိန် တုန်းက သူ က လွန်ခဲ့တဲ့ ရက်ပိုင်း က လမ်း နည်းနည်း ဝေးတဲ့ နေရာ က လူမိုက် ဂိုဏ်း တစ်ခု ဆီကနေ ငွေ နည်းနည်း သွားချေး ခဲ့တယ် လို့ ပြောပြ ခဲ့တယ်..."

"နောက်ပိုင်း ကျတော့ အဲ့ဒီ လူမိုက် ဂိုဏ်း က နှိမ်နင်း ခံလိုက်ရပြီး... အဲ့ဒီ ချေးထားတဲ့ ပိုက်ဆံ တွေ အကုန်လုံး က သူ့ရဲ့ အိတ်ကပ် ထဲကို ထာဝရ ရောက်သွား ခဲ့တယ်... ဘယ်သူ က မှ လည်း အကြွေး လာတောင်း တာမျိုး မရှိတော့ဘူး တဲ့..."

ထိုစကားကို ကြားလိုက်ရသောအခါ ရိုအန် ၏ မျက်မှောင်များ တစ်ချက် ပင့်တက်သွားပြီး တစ်စုံတစ်ခုကို သဘောပေါက် နားလည်သွားသကဲ့သို့ ဖြစ်သွားလေသည်။

ထင်ထားသည့် အတိုင်းပင် အယ်လ်ကန် က ဆက်လက် စကားဆိုလေသည်။

"သမီး လေး တက္ကသိုလ် တက်ရောက်ခွင့် ထောက်ခံစာ ရခဲ့ပြီ ဆိုတာ ကို သိလိုက်ရတဲ့ အချိန် မှာ သူ့အတွက် ဂုဏ်ယူ မိသလို တစ်ဖက် ကလည်း အရမ်း ကို စိတ်ပူပန် ခဲ့ရတယ်... ဘာဖြစ်လို့လဲ ဆိုတော့ သမီး ကို တက္ကသိုလ် ထားပေး နိုင်လောက်တဲ့ ပိုက်ဆံ မျိုး ကျွန်တော့် မှာ လုံးဝ မရှိခဲ့လို့ပဲ... သမီး လေး အနေနဲ့ အနည်းဆုံး အနှစ် နှစ်ဆယ် လောက် ပြန်ဆပ် ရမယ့် အတိုးနှုန်း အရမ်း မြင့်တဲ့ တက္ကသိုလ် ပညာရေး ချေးငွေ ကို ရွေးချယ် ရတော့မယ့် အခြေအနေ ကိုပဲ လက်ပိုက် ကြည့်နေခဲ့ရတယ်..."

"အချိန် အတော်ကြာ သေချာ စဉ်းစား ပြီးတဲ့ နောက်မှာတော့... အဲ့ဒီ အဝတ် လာလျှော် တဲ့ လူလတ်ပိုင်း လုပ်သလို မျိုး တုပ ပြီး... အနီးအနား က ဟိုင်အီးနား ဂိုဏ်း ဆီမှာ ငွေ သွားချေး ဖို့ ဆုံးဖြတ် လိုက်တာပါ..."

ရိုအန် ၏ မျက်မှောင်များ တင်းတင်း ကြုတ်သွားပြီး သံသယဖြစ်စွာဖြင့် မေးမြန်းလိုက်သည်။

"ဒီလို ငွေချေး တဲ့ လုပ်ရပ် မျိုး ကို လုပ်ဖို့ ဆိုတာ က... အဲ့ဒီ လူမိုက် ဂိုဏ်း အနေနဲ့ မကြာခင် အနှိမ်နင်း ခံရတော့မယ် ဆိုတာ ကို မင်း ကြိုတင် ပြီး သိထား ဖို့ လိုအပ်တယ် လေ... ဒါပေမဲ့ ဟိုင်အီးနား ဂိုဏ်း က ဒီနေ့ မတိုင်ခင် အထိ အရမ်း ကို အင်အား ကြီးမား နေသေးတာ ပဲ... မင်း က..."

အယ်လ်ကန် က လေသံ တိုးတိုးဖြင့် ပြန်လည် ဖြေကြားလေသည်။

"ကျွန်တော့် ရဲ့ အဝတ်လျှော်ဆိုင် လေး ဒီ နေရာ မှာ ဖွင့်လာတာ နှစ်ပေါင်း ဆယ်ချီ နေပါပြီ... အဲ့ဒါကြောင့် ကျွန်တော် သိတဲ့ လူ တွေ အရမ်း ကို များပါတယ်... နယူးယောက် ရဲတပ်ဖွဲ့ က လူတွေ သာမက ဒီအီးအေ က လူတွေ နဲ့ တချို့ ခင်ဗျား တို့ အက်ဖ်ဘီအိုင် က လူတွေ ကိုပါ သိထားပါတယ်..."

ရိုအန် က ထိုစကားကို ကြားလိုက်ရသောအခါ စိတ်ထဲမှ တိတ်တဆိတ် သက်ပြင်းချလိုက်မိလေသည်။ အမေရိကန်တွင် လျှို့ဝှက်ချက် ဆိုသည်မှာ ပေါက်ကြားရန် အတွက်သာ ရှိသည် ဆိုသော စကားမှာ အမှန်တကယ်ပင် မှားယွင်းခြင်း မရှိပေ။

အယ်လ်ကန် ၏ ပြောပြချက်များအရ လွန်ခဲ့သော အချိန်ကာလ တစ်ခုတုန်းက အနီးအနားရှိ လူမိုက် ဂိုဏ်းငယ်လေး တစ်ခု မကြာမီ နှိမ်နင်းခံရတော့မည် ဆိုသည့် သတင်းကို လူအချို့၏ ပါးစပ်မှတစ်ဆင့် ကြားသိခဲ့ရလေသည်။ ထို့ကြောင့် ထိုဂိုဏ်းငယ်လေးထံမှ ဒေါ်လာ ဆယ်ဂဏန်းခန့်ကို စမ်းသပ် ချေးယူကြည့်ခဲ့လေသည်။

ရက်အနည်းငယ် အကြာတွင် ထိုဂိုဏ်းငယ်လေးမှာ အမှန်တကယ်ပင် နှိမ်နင်းခံလိုက်ရပြီး နောက်ပိုင်းတွင်လည်း မည်သူမျှ သူ့ထံသို့ အကြွေးလာတောင်းခြင်း မရှိခဲ့ချေ။

ထိုအချိန်မှစ၍ အယ်လ်ကန် သည် နယူးယောက် မြို့၏ ရပ်ကွက် အသီးသီးရှိ လူမိုက်ဂိုဏ်းများကို ပိုမို အာရုံစိုက် လေ့လာလာခဲ့ပြီး ချေးယူသည့် ငွေပမာဏ မှာလည်း တဖြည်းဖြည်း ကြီးမားလာခဲ့တော့သည်။ ဤကာလ အတွင်း၌ အယ်လ်ကန် အနေဖြင့် အကြွေးအချို့ကို ပြန်လည် ပေးဆပ်ခဲ့ဖူးသော်လည်း ထိုသို့ ပြန်လည် ပေးဆပ်ခြင်းမှာ နောက်တစ်ကြိမ်တွင် ငွေကြေး ပိုမို ချေးယူနိုင်ရန် အတွက်သာ ဖြစ်လေသည်။

အမှတ် ၅ စုံစမ်းစစ်ဆေးရေး အဖွဲ့ သို့ ပြန်ရောက်လာပြီးနောက် မိုနာ က ကုလားထိုင်ပေါ်တွင် ဖင်ချထိုင်လိုက်ပြီး ခန္ဓာကိုယ်ကို အကြောဆန့်လိုက်လေသည်။

ရိုအန် ကမူ ကုလားထိုင်ပေါ်တွင် ထိုင်လျက် ကွင်းဆက် ဘဏ် ဓားပြတိုက်မှု မှတ်တမ်းများ ပါဝင်သော ဖိုင်တွဲကို ကြည့်ရှုကာ မေးစေ့ကို ပွတ်သပ်ရင်း နက်နက်နဲနဲ တွေးတော နေလေသည်။

"ဘာဖြစ်လို့လဲ ရိုအန်..."

ယခုအချိန်တွင် မိုနာ ၏ စိတ်ခံစားချက်မှာ အတော်လေး ကောင်းမွန်နေသဖြင့် ရိုအန် ၏ စဉ်းစား သုံးသပ်နေသော မျက်နှာ အမူအရာကို မြင်တွေ့လိုက်ရသောအခါ ခေါင်းစောင်းကာ မေးမြန်းလိုက်သည်။

"ဒီ အမှု က ဖော်ထုတ် ပြီးသွားပြီ မဟုတ်ဘူးလား... ဘဏ် ဓားပြတိုက်မှု မဟုတ်ဘူး ဆိုပေမဲ့... အဝတ်လျှော်ဆိုင် ပိုင်ရှင် ကလည်း ဘဏ် ဓားပြ တွေ နဲ့ ဘာမှ ပတ်သက် ဆက်နွှယ် နေတာ မှ မရှိတာ..."

"မဟုတ်ဘူး မိုနာ..."

ထိုစကားကို ကြားလိုက်ရသောအခါ ရိုအန် ၏ မျက်လုံးများ ကျဉ်းမြောင်းသွားပြီး ခေါင်းကို ဖြည်းညင်းစွာ ခါယမ်းလိုက်သည်။

"သူတို့ ကြားမှာ ပတ်သက် ဆက်နွှယ် မှု ရှိနေတယ်..."

မိုနာ တစ်ယောက် ကြောင်အမ်းအမ်း ဖြစ်သွားပြီး နားမလည်နိုင်စွာဖြင့် မေးမြန်းလိုက်သည်။

"ဘာသဘော လဲ..."

ရိုအန် က မိုနာ ၏ မေးခွန်းကို တိုက်ရိုက် မဖြေဆိုသေးဘဲ ဘဏ် ဓားပြတိုက်မှု ကြီး၏ ဖိုင်တွဲကို သူမ ၏ မျက်စိရှေ့သို့ ချထားပေးလိုက်ပြီး လေသံ တိုးတိုးဖြင့် စကားဆိုလေသည်။

"မိုနာ... ဒီ ဘဏ် ဓားပြတိုက်မှု ခြောက်ခု စလုံး ကို... လူတစ်စု တည်း က လုပ်သွားတာ လို့ နင် ထင်လား..."

မိုနာ က နားမလည်နိုင်အောင် ဖြစ်သွားရပြီး ဖိုင်တွဲကို သေချာစွာ ကြည့်ရှုလိုက်ကာ ခေါင်းမော့၍ မေးမြန်းလိုက်လေသည်။

"မဟုတ်လို့လား..."

စောစောက ရောဘတ် ၏ ထွက်ဆိုချက်တွင် ဆဋ္ဌမမြောက် ဘဏ် ဓားပြတိုက်မှု ကို အဝတ်လျှော်ဆိုင် ပိုင်ရှင် က ကျူးလွန်ခဲ့ခြင်း ဖြစ်ကြောင်း ပြောဆိုခဲ့လေသည်။ သို့သော် ယခုအခါ တစ်ဖက်လူမှာ ဘဏ်ဓားပြ လုံးဝ မဟုတ်ကြောင်းနှင့် အမှုဖြစ်ပွားသည့် အချိန်တွင် အယ်လ်ကန် မှာ လူမိုက်ဂိုဏ်း ထံမှ ငွေကြေး သွားရောက် ချေးယူနေကြောင်း သက်သေပြနိုင်ခဲ့ပြီ ဖြစ်လေသည်။

အဝတ်လျှော်ဆိုင် အတွင်းရှိ အမည်းရောင် အဝတ်အစား များမှာလည်း ဘေးအိမ်ရှိ စားသောက်ဆိုင် ပိုင်ရှင် ၏ သာမန် အဝတ်အစားများ သာလျှင် ဖြစ်ကြောင်း အယ်လ်ကန် က ပြန်လည် စဉ်းစား အတည်ပြုပေးခဲ့လေသည်။ ထို့အပြင် ရိုအန် နှင့် မိုနာ တို့ ကိုယ်တိုင် ဘေးအိမ်ရှိ စားသောက်ဆိုင် ပိုင်ရှင် ၏ အိမ်သို့ သွားရောက် စစ်ဆေး ကြည့်ရှုခဲ့ရာတွင်လည်း အမှန်တကယ်ပင် ထိုအတိုင်း ဖြစ်နေကြောင်း တွေ့ရှိခဲ့ရလေသည်။

ဤသို့သော အခြေအနေ မျိုး အောက်တွင် မည်သည့်အတွက်ကြောင့် ရိုအန် အနေဖြင့် ဓားပြတိုက်မှု ခြောက်ကြိမ် စလုံးကို လူတစ်စုတည်းက ကျူးလွန်ခဲ့ခြင်း မဟုတ်ဟု တွေးတော နေရသနည်း။

မိုနာ ၏ သံသယကို ကြားသိလိုက်ရသောအခါ ရိုအန် က လေးနက် တည်ကြည်သော မျက်နှာထားဖြင့် ရှင်းပြလေသည်။

"စောစောက အယ်လ်ကန် ပြောသွားတဲ့ စကား ထဲက 'တုပ' တယ် ဆိုတဲ့ စကားလုံး လေး က ငါ့ကို သတိပေး လိုက်တာပဲ..."

အမှန်တကယ်တော့ ဘရိုဆန် တွင် အမှု ဖော်ထုတ်နိုင်စွမ်း မရှိဟု ရိုအန် လုံးဝ မတွေးတော ခဲ့ပေ။ အမှု ဖော်ထုတ်နိုင်သည့် အရည်အချင်း ကို သီးသန့် ပြောရမည် ဆိုလျှင် ဘရိုဆန် အပေါ် ရိုအန် အနေဖြင့် အလွန် လေးစား အသိအမှတ် ပြုထားလေသည်။

လူ့ကျင့်ဝတ် အရသာ အလွန် ရှုံးနိမ့်လွန်း နေခြင်း ပင် ဖြစ်လေသည်။

သို့သော် တစ်ဖက်လူ အနေဖြင့် ယနေ့ အချိန်အထိ အမှုကို ဖော်ထုတ်နိုင်ခြင်း မရှိသေးသည့် အခြေအနေ မျိုးတွင် ဖြစ်နိုင်ချေ နှစ်ခု သာလျှင် ရှိတော့လေသည်။

ပထမ အချက် မှာ ဤ ဘဏ် ဓားပြ နှစ်ဦး သည် အလွန် ကောက်ကျစ် စဉ်းလဲလွန်း နေပြီး ဘရိုဆန် ကဲ့သို့သော ဝါရင့် အက်ဖ်ဘီအိုင် အရာရှိကြီး ပင်လျှင် သူတို့၏ သဲလွန်စ တစ်စက်လေး ကိုမျှ ရှာဖွေ မတွေ့ရှိနိုင်ခြင်း ပင် ဖြစ်လေသည်။

ဒုတိယ အချက် မှာ ဘရိုဆန် ၏ စုံစမ်း စစ်ဆေးမှု လမ်းကြောင်း မှားယွင်း နေခြင်း ပင် ဖြစ်လေသည်။

အခြေအနေ နှစ်ရပ်လုံး ကို နှိုင်းယှဉ် ကြည့်လိုက်သောအခါ ရိုအန် အနေဖြင့် ပထမ အချက်ထက် ဒုတိယ အချက်ကို ပိုမို ယုံကြည် နေမိလေသည်။ အကယ်၍ တကယ့် အခြေအနေ အမှန်မှာ ဒုတိယ အချက် ဖြစ်နေမည် ဆိုပါက ဘရိုဆန် ၏ အမှုဖော်ထုတ်ရေး လုပ်ငန်းစဉ် တစ်လျှောက်လုံး တွင် အဓိက ဦးတည်ထားသော အချက်များကို သေချာစွာ ပြန်လည် လေ့လာ ကြည့်ရှု ရမည် ဖြစ်လေသည်။

ထိုအထဲမှ အရေးအကြီးဆုံး အချက် မှာ ဤ ဘဏ် ဓားပြတိုက်မှု ခြောက်ခု စလုံး ကို လူတစ်စုတည်း ကသာ ကျူးလွန်ခဲ့ခြင်း ဖြစ်ပြီး ထိုလူများမှာ စစ်မှုထမ်းဟောင်း များ သို့မဟုတ် စစ်တပ် အတွင်း တာဝန် ထမ်းဆောင်ဖူးသည့် အတွေ့အကြုံ ရှိသူများ ဖြစ်နိုင်သဖြင့် လှုပ်ရှားမှု လုပ်ငန်းစဉ် တစ်ခုလုံး မှာ အလွန် သွက်လက် ပြတ်သား နေခြင်း ပင် ဖြစ်သည် ဟူသော အချက်ပင် ဖြစ်လေသည်။

ရိုအန် ၏ ခွဲခြမ်း စိတ်ဖြာမှုကို နားထောင်ပြီးနောက် မိုနာ က ပါးစပ်ကို လက်ဖြင့် အုပ်ကာ အံ့ဩတကြီး ရေရွတ်လိုက်လေသည်။

"ဒါဆို နင့် ရဲ့ ဆိုလိုရင်း က... ဘဏ် ဓားပြတိုက်မှု ခြောက်ခု စလုံး ကို လူတစ်စု တည်း က ကျူးလွန် ခဲ့တာ မဟုတ်တဲ့ အပြင်... စစ်တပ် ထဲမှာ တာဝန် ထမ်းဆောင် ခဲ့တဲ့ အတွေ့အကြုံ လည်း မရှိဘူး ဆိုတဲ့ သဘော လား…”