အခန်း ၄၃၁

အခန်း ၄၃၁။ ခြင်္သေမကို မီဖွားပေးခြင်း

ရွှီယန်၏ အာဖရိကမြက်ခင်းပြင် တိုက်ရိုက်ထုတ်လွှင့်မှုက လူကြိုက်အလွန်များနေသည်။

အချိန်က တဖြည်းဖြည်း နောက်ကျလာပြီး နေဝင်ဆည်းဆာအချိန် ရောက်လာပြီဖြစ်သည်။

ပြန်လည်ထွက်ခွာရမည့်အချိန် ရောက်လာပြီဖြစ်သည်။

ဓာတ်ပုံဆရာအချို့က ဒုတိယနေ့တွင် စောစောစီးစီး ရိုက်ကူးရေးစတင်နိုင်ရန် ကားထဲတွင်ပင် အိပ်စက်ကြရာ အတော်လေး ပင်ပန်းကြသည်။

ရွှီယန်လည်း ထွက်ခွာရန် ပြင်ဆင်လိုက်သည်။

မထွက်ခွာမီလေးတွင် ချီတာကျားသစ် မီမီ က ထပ်မံပြေးလာပြီး ရွှီယန်ကိုကြည့်ကာ အသံပြုလိုက်သည်။ "မြောင်ဝူး... မြောင်ဝူး..."

ဤအကောင်လေးက တကယ်ကို ချစ်စရာကောင်းလှသည်။

အိမ်ပြန်ခေါ်သွား၍ မရသောကြောင့်သာတည်း။ မဟုတ်လျှင် ရွှီယန်က ၎င်းကို လယ်ယာခြံဝင်းထဲတွင် မွေးထားချင်စိတ် ပေါက်နေသည်။

ရွှီယန်က ကားပေါ်မှဆင်းကာ ကျားသစ်ကို အချိန်အတန်ကြာ ထပ်မံပွတ်သပ်ပေးလိုက်သည်။

နေဝင်ဆည်းဆာအချိန် မြက်ခင်းပြင်ကြီးက အထူးလှပနေပြီး အပူချိန်ကျဆင်းသွားသဖြင့် တိရစ္ဆာန်အများအပြား အပြင်ထွက်ကာ လှုပ်ရှားနေကြသည်။

ပို၍ပင် စည်ကားသိုက်မြိုက်လာသကဲ့သို့ ခံစားရသည်။

အင်တာနက်သုံးစွဲသူများက ရွှီယန်နှင့် ချီတာကျားသစ်တို့ အတူရှိနေသော မြင်ကွင်းကိုကြည့်ကာ အံ့သြချီးကျူးနေကြသည်။

ဤခံစားချက်က တကယ်ကို ကောင်းမွန်လှသည်။

ထို့နောက် တိုက်ရိုက်ထုတ်လွှင့်မှုကို ပိတ်လိုက်ပြီး ရွှီယန်က ကားတစ်နာရီခန့်စီးကာ ဟိုတယ်သို့ပြန်၍ အနားယူလိုက်သည်။

နောက်တစ်နေ့တွင် ရာသီဥတုက သာယာကြည်လင်နေသည်။

နိုင်ဂျီးရီးယား၏ အချိန်က မြို့တော်အချိန်ထက် ခုနစ်နာရီခန့် နောက်ကျသည်။

ရွှီယန် နံနက်ဆယ်နာရီတွင် တိုက်ရိုက်ထုတ်လွှင့်မှု စတင်ချိန်၌ တရုတ်ပြည်တွင် ညနေငါးနာရီ ရှိနေပြီဖြစ်သည်။

ယခင်နေ့က မြင်ကွင်းအတိုင်းပင်ဖြစ်သည်။

အဆုံးအစမရှိ ကျယ်ပြောလှသော အာဖရိကမြက်ခင်းပြင်ကြီးဖြစ်သည်။

ရွှီယန်က ယနေ့ မြက်ခင်းပြင် အတွင်းပိုင်းအထိ ဝင်ရောက်စူးစမ်းရန် ရည်ရွယ်ထားသည်။

ကားမောင်းထွက်လာပြီး မကြာမီမှာပင် အရှေ့ဘက်၌ ခြင်္သေ့မနှစ်ကောင် ထွက်ပေါ်လာပြီး မြက်ပင်ရှည်တောကို လှည့်ပတ်သွားလာနေကာ ဘာလုပ်နေမှန်း မသိရပေ။

ဘေးဘက်တွင်လည်း ဝန်ထမ်းအချို့က ခရီးသွားများကို ခေါ်ဆောင်လာကြသည်။

ဝန်ထမ်းများ၏ စိတ်ခံစားမှုက အလွန်လှုပ်ရှားနေပုံရကြောင်း ရွှီယန် သတိထားမိလိုက်သည်။

တစ်ခုခုကို အော်ဟစ်နေကြသည့်အလားပင်ဖြစ်သည်။

ခရီးသွားများကလည်း ပါးစပ်ကိုအုပ်ထားကြပြီး မျက်နှာပေါ်တွင် မယုံကြည်နိုင်သော အရိပ်အယောင်များ ပြည့်နှက်နေသည်။

ရွှီယန်က ဘာအခြေအနေလဲဟု စူးစမ်းချင်စိတ် ဖြစ်ပေါ်နေစဉ် ရုတ်တရက် စနစ်၏ သတိပေးသံက ခေါင်းထဲတွင် ထွက်ပေါ်လာခဲ့သည်။

[ရတနာရှာဖွေရေး တာဝန်ကို စတင်ပါပြီ ကလေးဖွားမြင်ပေးခြင်း ခြင်္သေ့ဘုရင်အသစ်]

[တာဝန် အကြောင်းအရာ သားဖွားရခက်ခဲနေသော ခြင်္သေ့မအား ကလေးဖွားမြင်နိုင်ရန် ကူညီပေးပါ]

[တာဝန် ကျွမ်းကျင်မှု တိရစ္ဆာန် သားဖွားဆရာဝန် အယာယီ တိရစ္ဆာန်များကို သားဖွားပေးသည့် ကျွမ်းကျင်မှုများကို ကျွမ်းကျင်စွာ တတ်မြောက်ခြင်း]

[တာဝန် ဆုလာဘ် ခြင်္သေ့ဘုရင်၏ ခင်မင်ရင်းနှီးမှု]

သတိပေးသံကို ကြားသောအခါ ရွှီယန် တစ်ကိုယ်လုံး ကြောင်အမ်းအမ်း ဖြစ်သွားရသည်။

'ဘာကြီးလဲ...'

'ခြင်္သေ့ကို သားဖွားပေးရမယ်...'

တောရိုင်းထဲတွင် အကူအညီလိုအပ်နေသော တောရိုင်းတိရစ္ဆာန်များနှင့် တွေ့ဆုံရပါက စနစ်က ရတနာရှာဖွေရေး တာဝန်ကို စတင်လေ့ရှိသည်။

ရွှီယန်ကလည်း ဝမ်းသာအားရ ကူညီပေးတတ်သည်။

သို့သော် ယနေ့တာဝန်က အတော်လေး အဓိပ္ပာယ်မဲ့လွန်းနေသည်။

'ခြင်္သေ့ကို ကလေးမွေးပေးရမယ်...'

'ဒါက ခြင်္သေ့လေ... အိမ်မွေးကြောင်လေး မှ မဟုတ်တာ...'

'တခြား ခြင်္သေ့တွေကလည်း ဘေးနားမှာ ကြည့်နေကြတာလေ...'

ရွှီယန်က ကားပေါ်မှဆင်းကာ အနားသို့သွားရောက် ကြည့်ရှုလိုက်သည်။

မြက်ခင်းပြင်အလယ်တွင် အားနည်းနေသော ခြင်္သေ့မတစ်ကောင် လဲလျောင်းနေသည်ကို သူ မြင်တွေ့လိုက်ရသည်။

ဤခြင်္သေ့မက ဆာလောင်မွတ်သိပ်လွန်းသဖြင့် ပိန်ချုံးနေပြီး အမွေးအမျှင်များကလည်း ညစ်ပတ်နေကာ မြေပြင်ပေါ်တွင် လဲလျောင်းရင်း အသက်ရှူရ ခက်ခဲနေသည်။

ဝမ်းဗိုက်တွင်လည်း သွေးရည်များ ရှိနေသည်။

ပတ်ပတ်လည်တွင် ယင်ကောင်များ အုံခဲနေသည်။

အခြား ခြင်္သေ့မနှစ်ကောင်က သူ့ကို စောင့်ကြပ်နေကြပြီး ကြည့်ရသည်မှာ သူ၏ အပေါင်းအသင်းများ ဖြစ်ပုံရသည်။

မလှမ်းမကမ်းတွင်လည်း ဟိုင်အီနာ အချို့က အခွင့်ကောင်းကို စောင့်ကြည့်နေကြသည်။

ဟိုင်အီနာ ဆိုသည့် အကောင်များက နေရာတိုင်းတွင် ရှိနေတတ်ပြီး တကယ်ကို စိတ်အနှောင့်အယှက် ဖြစ်စရာကောင်းလှသည်။

ခြင်္သေ့မများ ကလေးမွေးဖွားချိန်တွင် မျိုးနွယ်စုနှင့် ဝေးကွာသော အလွန် ခေါင်ဖျားသည့် နေရာသို့ သွားရောက်လေ့ရှိကြောင်း ရွှီယန် သိရှိထားပြီး ဤသည်မှာ ဟိုင်အီနာများကို ရှောင်ရှားရန်အတွက် ပင်ဖြစ်သည်။

ခြင်္သေ့ပေါက်လေးများ အနည်းငယ် ကြီးပြင်းလာသော အခါမှသာ ၎င်းတို့ကို ခေါ်ဆောင်၍ ဖခင်ဖြစ်သူထံသို့ သွားရောက်ကြခြင်း ဖြစ်သည်။

သိသာထင်ရှားစွာပင် ဤခြင်္သေ့မထံတွင် ပြဿနာ တစ်ခုခု ဖြစ်ပေါ်နေလေပြီ။

ဤဘက်ရှိ ဝန်ထမ်းများက စိုးရိမ်တကြီးဖြင့် အကူအညီ ခေါ်ဆိုနေကြသည်။

သူတို့က ဤခြင်္သေ့မကို ကယ်ဆယ်ရန် ဆရာဝန်များကို ဆက်သွယ်နေကြခြင်း ဖြစ်သည်။

လက်ရှိ အခြေအနေအရ ကြည့်လျှင် ခြင်္သေ့မ၏ အခြေအနေက အလွန် ဆိုးရွားနေပြီဖြစ်ရာ အချိန်အကြာကြီး တောင့်ခံထားနိုင်တော့မည် မဟုတ်ချေ။

"ဟိုဘက်ကို ကြည့်လိုက်... ခြင်္သေ့မ တစ်ကောင် ပြဿနာ ဖြစ်နေတယ်... အခု အခြေအနေ အရ ကြည့်ရရင် သားဖွားရ ခက်ခဲလို့ သွေးထွက်လွန် နေတာ ဖြစ်လောက်တယ်..."

"တကယ်လို့ ဆက်မွေးလို့ မရဘူး ဆိုရင် ခြင်္သေ့မ ရော ကလေး ရော သေသွားနိုင်တယ်..."

ရွှီယန်က မလှမ်းမကမ်းသို့ ကြည့်ရင်း အင်တာနက်သုံးစွဲသူများကို ရှင်းပြလိုက်သည်။

အင်တာနက်သုံးစွဲသူများကလည်း ဤမြင်ကွင်းကို မြင်တွေ့လိုက်ကြသည်။

မြင်ကွင်းက အနည်းငယ် သနားစရာ ကောင်းလှပေသည်။

"ဘုရားရေ... ကြည့်ရတာ အရမ်း သနားစရာ ကောင်းတာပဲ..."

"ဘေးနားက လူတွေက ဝန်ထမ်းတွေ မဟုတ်လား... သူ့ကို မြန်မြန် ကူညီပေးကြပါဦး..."

"ဘယ်လို လုပ်ကူညီမလဲ... တခြား ခြင်္သေ့မ နှစ်ကောင် လည်း အဲဒီမှာ စောင့်နေတာလေ..."

"သူ့ရဲ့ မျက်လုံး တွေကို ကြည့်လိုက်... သေတော့မယ့် ပုံစံမျိုး ဖြစ်နေပြီ..."

တိုက်ရိုက်ထုတ်လွှင့်မှု အခန်းထဲတွင် ကွန်မန့်စာသားများက အဆက်မပြတ် လိမ့်တက်နေလေသည်။

အားလုံးက ဤကဲ့သို့သော မြင်ကွင်းမျိုးကို မကြည့်ရက်ကြဘဲ ခြင်္သေ့များ ဘေးကင်းလုံခြုံစေရန်သာ မျှော်လင့်နေကြသည်။

သို့သော် ကိစ္စရပ်များက အမြဲတမ်း လူတို့၏ ဆန္ဒအတိုင်း ဖြစ်မလာတတ်ချေ။

ဤအချိန်တွင် ရွှီယန်က ကားပေါ်မှ ဟိုရှာဒီရှာ လုပ်ပြီးနောက် ဆေးသေတ္တာ တစ်လုံးကို ထုတ်ယူလိုက်သည်။

အာဖရိက ကဲ့သို့သော နေရာမျိုးတွင် ဆေးသေတ္တာ က မရှိမဖြစ် လိုအပ်လှပေသည်။

အထဲတွင် မြွေဆိပ်ဖြေဆေး၊ သွေးတိတ် ပတ်တီး အစရှိသည်တို့ ပါဝင်ပြီး အရေးပေါ် အခြေအနေအတွက် ကြိုတင် ပြင်ဆင်ထားခြင်း ပင်ဖြစ်သည်။

မည်သို့ပင်ဖြစ်စေ ဤနေရာတွင် တိရစ္ဆာန်များ အလွန်များပြားလွန်းပြီး အဆိပ်ရှိသော ပိုးမွှားများနှင့် ခြင်များက ရေတွက်၍ပင် မရနိုင်ချေ။

ရွှီယန်က အရှေ့သို့ တက်သွားကာ ဝန်ထမ်းများနှင့် စကားပြောဆိုလိုက်ပြီး သူက ဤခြင်္သေ့ကို ကူညီပေးနိုင်ကြောင်းနှင့် ယခု သွားရောက် ကယ်ဆယ်မည် ဖြစ်ကြောင်း ပြောပြလိုက်သည်။

ဝန်ထမ်းများလည်း ကြောင်အမ်းအမ်း ဖြစ်သွားကြရသည်။

သူတို့က ရွှီယန်ကို စစ်မြေပြင် ဆရာဝန် ကဲ့သို့သော လူမျိုးဟုသာ ထင်မှတ်လိုက်ကြသည်။

ဘေးနားတွင်လည်း ဓာတ်ပုံဆရာ အချို့က မှတ်တမ်းတင် ရိုက်ကူးနေကြသည်။

ဤမြင်ကွင်းက တကယ်ကို ရိုင်းစိုင်းကြမ်းတမ်းသော အသွင်ကို ဆောင်နေကြောင်း ဝန်ခံရမည်သာ ဖြစ်လေသည်။

အာဖရိက မြက်ခင်းပြင်ကြီးပေါ်တွင် ခြင်္သေ့မ တစ်ကောင်ကို သားဖွားပေးရမည် ဖြစ်လေသည်။

ဘေးနားတွင်လည်း အခြား ခြင်္သေ့များ ရှိနေသေးလေသည်။

ကျွမ်းကျင်သော အဖွဲ့အစည်း တစ်ခုသာ မရှိပါက သာမန်လူများ အနေဖြင့် တကယ်ပင် သွားရဲမည် မဟုတ်ချေ။

ရွှီယန်က စကားပြောဆိုပြီးနောက် ဆေးသေတ္တာကို ဆွဲကာ တိုက်ရိုက်ပင် အရှေ့သို့ တက်သွားတော့သည်။

မျှော်လင့်မထားစွာပင် ဒဏ်ရာရနေသော ခြင်္သေ့မကို အဖော်ပြုပေးနေသည့် အခြား ခြင်္သေ့မ နှစ်ကောင်က ရွှီယန် လာနေသည်ကို မြင်သောအခါ ဆယ်မီတာခန့် အကွာသို့ နောက်ဆုတ်သွားကြလေသည်။

၎င်းတို့က ရွှီယန် လာရောက် ကူညီပေးမည်ကို သိရှိနေသည့်အလား ပင်ဖြစ်သည်။

"အစ်ကိုယန် သွားပြီဟေ့..."

"လခွမ်း... သူက ဘာလို့ အရာအားလုံးကို လုပ်ရဲနေတာလဲ..."

"ဟို ခြင်္သေ့မ နှစ်ကောင် လည်း နောက်ဆုတ်သွားကြပြီ..."

"ဒီလိုတောင် သွားရဲတာလား... ဒါက တောရိုင်း ခြင်္သေ့ တွေလေ..."

တိုက်ရိုက်ထုတ်လွှင့်မှု အခန်းထဲရှိ ကြည့်ရှုသူများ အားလုံး အံ့သြမှင်တက် သွားကြရသည်။

ရွှီယန်၏ တိုက်ရိုက်ထုတ်လွှင့်မှု အကြောင်းအရာများက အမြဲတမ်း ဤသို့ပင် မျှော်လင့်မထားသည်များ ဖြစ်ပေါ်လာတတ်လေသည်။

ဒရုန်းကင်မရာက ခပ်ဝေးဝေးမှ ရိုက်ကူးနေပြီး အနီးကပ် မြင်ကွင်း မပြဘဲ အလုံးစုံ မြင်ကွင်းကိုသာ ပြသထားလေသည်။

ဤသို့ဆိုလျှင် အသေးစိတ် အချက်အလက်များကို အားလုံး ရှင်းလင်းစွာ မြင်တွေ့နိုင်မည် မဟုတ်ချေ။

ရွှီယန်က ခြင်္သေ့၏ ဘေးနားတွင် ဆောင့်ကြောင့်ထိုင်နေပြီး အဝေးတွင် အခြား ခြင်္သေ့မ နှစ်ကောင်က စောင့်ကြည့်နေကာ အခြားတစ်ဖက်တွင် လမ်းကြမ်းမောင်းယာဉ် အချို့နှင့် ဆူညံပွက်လောရိုက်နေသော လူအုပ်ကြီးကိုသာ မြင်တွေ့နိုင်လေသည်။

လူတိုင်းက ဖုန်းများကို ကိုင်ကာ ဓာတ်ပုံရိုက် နေကြလေသည်။

ရွှီယန်၏ ဤလုပ်ရပ်က နိုင်ငံခြား အင်တာနက် စာမျက်နှာများတွင် သေချာပေါက် ပျံ့နှံ့သွားမည်သာ ဖြစ်လေသည်။

ရွှီယန်က အနားသို့ ရောက်သွားသောအခါ ပထမဆုံး အနေဖြင့် သေချာစွာ စစ်ဆေးကြည့်လိုက်ရာ ကလေး၏ အနေအထား မှားယွင်းနေသဖြင့် တစ်ဆို့နေခြင်း ဖြစ်ကြောင်း တွေ့ရှိလိုက်ရသည်။

သူက တစ်ခါသုံး ပိုးသတ်လက်အိတ်ကို စွပ်လိုက်ပြီး ပထမဆုံး အနေဖြင့် ခြင်္သေ့မကို ကလေး အနေအထား မှန်အောင် ပြင်ဆင်ပေးလိုက်သည်။

ဤမြင်ကွင်းက အနည်းငယ် ကြည့်ရဆိုးလှပေသည်။

သို့သော် ဆေးကုသမှု ဖြစ်ရာ ထိုမျှလောက် ဂရုစိုက်၍ မရနိုင်ချေ။

သူက အချိန်အတန်ကြာ လှုပ်ရှား လုပ်ဆောင်နေပြီး တစ်ခါတစ်ရံ ပိုးသတ်အရက်ပျံဖြင့် ခြင်္သေ့၏ ဝမ်းဗိုက်နှင့် အခြားနေရာများကို သုတ်သင် ရှင်းလင်းပေးလေသည်။

အချိန်သိပ်မကြာခင်မှာပင် စေးကပ်ကပ် ဖြစ်နေသော ခြင်္သေ့ပေါက်လေး တစ်ကောင်ကို သူက သားဖွားပေးနိုင်ခဲ့လေသည်။

ခြင်္သေ့လေး ထွက်လာသည်ကို မြင်သောအခါ ပတ်ဝန်းကျင်ရှိ လူများ အားလုံး ချက်ချင်းပင် ဝမ်းသာအားရ အော်ဟစ်လိုက်ကြသည်။

အားလုံးက ရွှီယန်ကို အံ့အားသင့်စွာ ကြည့်ရှုနေကြပြီး အကြည့်များထဲတွင် လေးစားချီးကျူးမှုများ ပြည့်နှက်နေလေသည်။

ဝန်ထမ်းများ ကလည်း မနေနိုင်ဘဲ လက်ခုပ်တီးကာ အားပေးလိုက်ကြသည်။

အင်တာနက်သုံးစွဲသူများ၏ မြင်ကွင်းက အတော်လေး ဝေးကွာသော်လည်း ရွှီယန်က ခြင်္သေ့ပေါက်လေး တစ်ကောင်ကို သားဖွားပေးလိုက်ကြောင်းကိုတော့ မြင်တွေ့နိုင်လေသည်။

တိုက်ရိုက်ထုတ်လွှင့်မှု အခန်းလေးမှာ ချက်ချင်းပင် ပေါက်ကွဲထွက်သွားတော့သည်။

"ဘုရားရေ... အစ်ကိုယန် က တကယ်ကြီး ခြင်္သေ့ပေါက်လေး တစ်ကောင်ကို မွေးပေးလိုက်နိုင်တာပဲ..."

"အရမ်း အစွမ်းထက်တဲ့ ယောကျ်ားပဲ..."

"သူက အရမ်း ကြမ်းတမ်းလွန်းတယ်... အာဖရိက မြက်ခင်းပြင် ကြီးဆီ ပြေးသွားပြီး ခြင်္သေ့ကို ကလေး သွားမွေးပေးနေတာ..."

"အသားကျသွားရင် ရပါပြီ... အခု ငါက အစ်ကိုယန် ရဲ့ လိုက်ဖ် ကို ကြည့်ရတာ အသားကျနေပြီ... မင်းတို့က သူ့ကို နေရာအနှံ့ လှည့်လည်သွားလာနေတဲ့ ရသေ့ တစ်ပါး လို့ပဲ သဘောထားလိုက်ပါ..."

ရွှီယန်၏ တိုက်ရိုက်ထုတ်လွှင့်မှု ရေပန်းစားမှုက ထပ်မံ၍ နံပါတ်တစ် နေရာသို့ ရောက်ရှိသွားပြန်သည်။

ထို့အပြင် သူ၏ ပရိသတ် အရေအတွက်က အလွန် များပြားလှပြီး စစ်မှန်သော ကျော်ကြားမှု ပင်ဖြစ်ကာ အနည်းငယ်မျှပင် အတုအယောင် မရှိချေ။

အင်တာနက်ပေါ်တွင် အသိအမှတ်ပြု ခံရမှု ကလည်း အထူးပင် မြင့်မားလှပေသည်။

ရွှီယန်က တိုက်ရိုက်ထုတ်လွှင့်မှု၏ အခြေအနေကို ဂရုမစိုက်နိုင်တော့ဘဲ ခြင်္သေ့ပေါက် တစ်ကောင် မွေးဖွားပေးပြီးနောက် ဒုတိယ တစ်ကောင်ကို ထပ်မံ သားဖွားပေးရန် စတင်လိုက်လေသည်။

ခြင်္သေ့မ၏ အခြေအနေက သိသာစွာ တိုးတက် ကောင်းမွန်လာခဲ့လေသည်။

အသက်ရှူနှုန်း ကလည်း အနည်းငယ် တည်ငြိမ်လာခဲ့သည်။

ခုနက ယင်ကောင် အုပ်ကြီး ဝိုင်းရံနေခဲ့သော်လည်း ယခု ရွှီယန် ရောက်လာမှုကြောင့် ယင်ကောင်များ အားလုံး ဘယ်ဆီသို့ လွင့်စင် ပျောက်ကွယ်သွားမှန်း မသိရတော့ချေ။

ကြည့်ရသည်မှာ အတော်လေး သန့်ရှင်း သပ်ရပ်နေလေသည်။

အချိန်သိပ်မကြာခင်မှာပင် ဒုတိယ တစ်ကောင်ကိုပါ ရွှီယန်က သားဖွားပေးနိုင်ခဲ့လေသည်။

ထို့နောက် ရွှီယန်က ခြင်္သေ့၏ ဝမ်းဗိုက်ကို စမ်းသပ် ကြည့်လိုက်သည်။

တတိယ ခြင်္သေ့ပေါက်လေး တစ်ကောင် ကျန်ရှိနေသေးလေသည်။

သားဖွားရ ခက်ခဲသည်မှာလည်း အံ့သြစရာ မရှိတော့ချေ။

ကလေး သုံးကောင်တောင် ကိုယ်ဝန် ဆောင်ထားရခြင်း ပင်ဖြစ်သည်။

ရွှီယန်က ထပ်မံ၍ သားဖွားပေးလိုက်ရာ တတိယမြောက် ခြင်္သေ့ပေါက်လေး ကလည်း အဆင်ပြေချောမွေ့စွာ ထွက်ပေါ်လာခဲ့လေသည်။

"ရေရှိလား... ဘယ်သူ့ဆီမှာ ရေရှိလဲ..."

ရွှီယန်က ပတ်ဝန်းကျင်ရှိ လူများကို မေးမြန်းလိုက်သည်။

လူများ နားမလည်မည်ကို စိုးရိမ်သဖြင့် အင်္ဂလိပ်လို တစ်ခေါက် ထပ်မေးလိုက်လေသည်။

ခရီးသွား နှစ်ဦးက သောက်ရေသန့်ဘူး နှစ်ဘူးကို အလျင်အမြန် ယူကာ ရွှီယန်ထံသို့ ပစ်ပေးလိုက်ကြသည်။

ရွှီယန်က လက်အိတ်ကို ချွတ်လိုက်ပြီး ပထမဆုံး အနေဖြင့် ခြင်္သေ့ပေါက်များကို ရိုးရှင်းစွာ ဆေးကြောပေးလိုက်ကာ ခြင်္သေ့မ၏ အရှေ့သို့ သွားရောက်၍ ရေအနည်းငယ် တိုက်ပေးလိုက်လေသည်။

ရေသန့်ဘူးဖြင့် ရေတိုက်ရသည်မှာ အနည်းငယ် ခက်ခဲသော်လည်း ခြင်္သေ့မက လျှာကို ထုတ်ကာ ရေနှစ်ငုံခန့် သောက်လိုက်လေသည်။

ဤသို့ လှုပ်ရှား လုပ်ဆောင်ပြီးနောက် ခြင်္သေ့မ၏ အခြေအနေ ကလည်း အတော်လေး ပြန်လည် ကောင်းမွန်လာခဲ့လေပြီ။

မလှမ်းမကမ်းတွင် ဟိုင်အီနာများ က စောင့်ကြည့်နေဆဲ ပင်ဖြစ်သည်။

၎င်းတို့က တစ်ဖက်တွင် ခြင်္သေ့မကို စောင့်ကြည့်နေပြီး အခြားတစ်ဖက်တွင် အခုမှ မွေးခါစ ခြင်္သေ့ပေါက်လေးများကို စောင့်ကြည့်နေကြခြင်း ပင်ဖြစ်သည်။

ထို့အပြင် ဤအကောင်များက ခြင်္သေ့မ အားနည်းနေသည်ကို ရိပ်မိသွားကြသဖြင့် စုဝေးလာသော အရေအတွက်က ပို၍ပို၍ များပြားလာကာ ရှစ်ကောင် ကိုးကောင်ခန့် အထိ ရှိနေပြီ ဖြစ်လေသည်။

ထိုစဉ်မှာပင် လူတစ်ယောက်က ရုတ်တရက် အသံကျယ်ကြီးဖြင့် အော်ဟစ်လိုက်လေသည်။

"ဟိုဘက်ကို ကြည့်လိုက်..."

လူအုပ်ကြီး၏ အံ့သြတုန်လှုပ်စွာ အော်ဟစ်သံများနှင့်အတူ မလှမ်းမကမ်းတွင် ခွန်အားကြီးမားသော ခြင်္သေ့ထီး နှစ်ကောင်က ရင်ကော့ခေါင်းမော့လျက် ခြင်္သေ့မ ရှိရာ အရပ်သို့ တိုက်ရိုက် ဦးတည်ကာ ပြေးလာနေသည်ကို မြင်တွေ့လိုက်ရလေသည်။

ဤခြင်္သေ့ထီး နှစ်ကောင်စလုံးက အထူးပင် ကျန်းမာ သန်စွမ်းကြပြီး ခေါင်းပေါ်ရှိ အမွေးအမျှင်များက ထူထပ်ကာ ချောမွေ့နေသဖြင့် မြင်လိုက်သည်နှင့် ထိပ်တန်း အမဲလိုက် သတ္တဝါများ ဖြစ်ကြောင်း သိသာ ထင်ရှားလှပေသည်။

တကယ်တမ်းတွင် ခြင်္သေ့မများက ထိုမျှလောက် ကြောက်စရာ မကောင်းလှချေ။

သို့သော် ခြင်္သေ့ထီးများ ကတော့ မတူညီချေ။

ဩဇာအာဏာ လွှမ်းမိုးမှု အပြည့်အဝ ရှိလေသည်။

လူများက ခြင်္သေ့ထီးများကို မြင်သောအခါ အသီးသီး ကားပေါ်သို့ ပြန်တက်သွားကြပြီး အောက်သို့ ဆင်းရန် မရဲကြတော့ဘဲ ကားပေါ်မှသာ ဓာတ်ပုံရိုက် နေကြရလေသည်။

ဟိုင်အီနာ အုပ်စုက ခြင်္သေ့ထီးများကို မြင်သောအခါ ကြောက်ရွံ့သော အရိပ်အယောင်များကို ပြသလာကြပြီး ခဏမျှ တွန့်ဆုတ် နေကြပြီးနောက် နောက်သို့ ခြေလှမ်း အနည်းငယ် ဆုတ်သွားကြကာ အခွင့်အရေး ရှိမရှိ တစ်ခါတစ်ရံ နောက်လှည့်ကြည့်ရန်သာ ရဲကြတော့သည်။

ရွှီယန်က ဆေးသေတ္တာကို ကိုင်ထားရင်း လမ်းသွားလမ်းလာများ၏ တုံ့ပြန်မှုများမှ တစ်ဆင့် ခြင်္သေ့ထီးများကို မြင်တွေ့လိုက်ရလေသည်။

သူကလည်း ချက်ချင်းပင် ခြေလှမ်းအနည်းငယ် နောက်ဆုတ်လိုက်ပြီး ကားဘေးသို့ သွားရောက်လိုက်လေသည်။

တိုက်ရိုက်ထုတ်လွှင့်မှု အခန်းလေးမှာ ပို၍ပင် စည်ကားသိုက်မြိုက် လာတော့သည်။

"ခြင်္သေ့ထီး တွေ လာပြီဟေ့..."

"လခွမ်း... အရမ်း အထာကျတာပဲ... တကယ့်ကို မြက်ခင်းပြင် ရဲ့ နံပါတ်တစ် အစ်ကိုကြီး တွေပဲ..."

"ဒါကိုတော့ အပြစ်ပြောလို့ မရဘူး... ဒီအကောင်တွေ က တကယ်ကို ကြမ်းတမ်းလွန်းတယ်..."

"အဲဒါတောင် နှစ်ကောင် အတူတူ လာတာ... ဆွေမျိုးမသိ စတိုင် နဲ့ လျှောက်လာကြတာ..."

"ဟားဟားဟား... ကိုယ့်ပိုင်နက် ထဲမှာ ဆိုတော့ သက်သောင့်သက်သာ ဖြစ်နေတာ... အရှေ့မြောက် ကျား တွေ တောထဲမှာ မြေကြီးပေါ် လဲလျောင်းပြီး အိပ်ပျော်နေတဲ့ ခံစားချက် မျိုး နဲ့ အတူတူပဲ..."

အင်တာနက်သုံးစွဲသူများက ပို၍ပင် စိတ်လှုပ်ရှား လာကြတော့သည်။

ယနေ့ လာသည်နှင့် တစ်ပြိုင်နက် ရုပ်ရှင်ကားကြီး တစ်ကားကို ကြည့်ရှုလိုက်ရသဖြင့် တကယ်ကို စိတ်လှုပ်ရှားစရာ ကောင်းလှပေသည်။

အချိန်သိပ်မကြာခင်မှာပင် ခြင်္သေ့ထီးနှင့် ခြင်္သေ့မ တို့ ဆုံတွေ့သွားကြပြီး အချင်းချင်း ခေါင်းဖြင့် ပွတ်သီးပွတ်သပ် လုပ်ကြပြီးနောက် ကလေးမွေးထားသော ခြင်္သေ့မကို လာရောက် စောင့်ရှောက် ကြတော့သည်။

ကလေးမွေးထားသော ခြင်္သေ့မ ကလည်း ခက်ခက်ခဲခဲ ထိုင်ထလိုက်ပြီး ခြင်္သေ့ပေါက်လေးများကို စောင့်ရှောက် နေလေသည်။

ခြင်္သေ့ပေါက်လေးများက မျက်စိ မဖွင့်ကြသေးဘဲ စေးကပ်ကပ် ဖြစ်နေကာ ပါးစပ်ကို ဟလျက် အော်ဟစ် နေကြလေသည်။

သူတို့၏ အသက်ကို လူသား တစ်ဦးက ကယ်တင်ပေးခဲ့ကြောင်းကို သူတို့ ကိုယ်တိုင်ပင် သိရှိလိုက်မည် မဟုတ်ချေ။

ရွှီယန်က ခြင်္သေ့ပေါက်လေးများ သွက်လက်စွာ လှုပ်ရှားနေသည်ကို မြင်သောအခါ သူလည်း ပြုံးလိုက်လေသည်။

အသက်ကယ်တင် နိုင်လိုက်သည်ကပင် ကောင်းမွန်လှပေသည်။

သူ၏ အားထုတ်မှုများက အချည်းနှီး မဖြစ်ခဲ့ချေ။