အခန်း ၄၃၃

အခန်း ၄၃၃။ အထူး ရတနာရှာဖွေရေး တာဝန်၊ ပြေးတော့ ရွှီယန်

[အာဖရိက မြက်ခင်းပြင်ကြီး ရဲ့ လမ်းသရဲ ကြီး]

[မြက်ခင်းပြင် ကြီး ရှုပ်ထွေးမရှုပ်ထွေး ဆိုတာ အစ်ကိုယန် အပေါ်မှာပဲ မူတည်တယ်]

[ဟန်နီဘက်ဂျာ တောင် မင်းလောက် လျှောက်မလည်နိုင်ဘူး]

တိုက်ရိုက်ထုတ်လွှင့်မှု အခန်းထဲတွင် အင်တာနက်သုံးစွဲသူများ၏ ပြောဆိုမှုများက အတော်လေး စိတ်ဝင်စားစရာ ကောင်းလှပေသည်။ အားလုံးက တိုက်ရိုက်ထုတ်လွှင့်မှု အခန်းထဲတွင် ဟာသများ လုပ်နေကြပြီး ပျော်ရွှင်စွာ ရယ်မောနေကြလေသည်။

ဤအချိန် ဤအခိုက်အတန့်တွင် ရွှီယန်က ကားပေါ်မှ ဆင်းလာခဲ့ပြီဖြစ်ပြီး အရှေ့ဘက်သို့ လမ်းလျှောက် ထွက်လာခဲ့လေသည်။ အရှေ့ဘက်တွင် ကွေ့ကောက်နေသော မြစ်ရှည်ကြီး တစ်စင်း ရှိနေပြီး မြက်ခင်းပြင်ကြီးကို နှစ်ပိုင်း ပိုင်းခြားထားလေသည်။

ကျွဲ အုပ်ကြီး တစ်အုပ်က မြစ်ကို ဖြတ်ကူးနေကြပြီး ၎င်းတို့က တံတားတစ်စင်း အဖြစ် ချိတ်ဆက်သွားသည့် အလား ပင်ဖြစ်သည်။ ဖြတ်သန်းသွားသော နေရာတိုင်းတွင် လှိုင်းလုံးများ ထကြွနေပြီး မြင်ကွင်းက အလွန် ကြီးကျယ်ခမ်းနား လှပေသည်။

ပတ်ဝန်းကျင်တွင် မိကျောင်း အများအပြားက အခွင့်ကောင်းကို စောင့်ကြည့် နေကြလေသည်။ ကျွဲ အငယ်လေး အချို့ ကလည်း မြစ်တစ်ဖက်ကမ်းသို့ ရောက်ရန် အစွမ်းကုန် ကြိုးစား လျှောက်လှမ်း နေကြလေသည်။

ရွှီယန်က ဤကဲ့သို့သော မြင်ကွင်းကို မြင်သောအခါ အနီးကပ် လေ့လာ ကြည့်ရှုရန် ရည်ရွယ်လိုက်လေသည်။ သို့သော် သေချာပေါက် အရမ်း အနားကပ်သွားမည်တော့ မဟုတ်ချေ။ မည်သို့ပင်ဖြစ်စေ မြစ်ကမ်းဘေးတွင် မိကျောင်း အများအပြား ရှိနေသောကြောင့် ပင်ဖြစ်သည်။

အာဖရိကမှ မိကျောင်းများက တရုတ်ပြည်မှ မိကျောင်းများ ကဲ့သို့ နူးညံ့သိမ်မွေ့ခြင်း မရှိချေ။ ဤဘက်ရှိ မိကျောင်းများက အထူးပင် ရက်စက်ကြမ်းကြုတ် လှပေသည်။

ရွှီယန်က ရတနာရှာဖွေရေး တာဝန်ကို စတင်ရန်ပင် မရည်ရွယ်တော့ချေ။ အကယ်၍ တာဝန်က မိကျောင်းများနှင့် သက်ဆိုင်နေပါက အတော်လေး ပြဿနာ တက်နိုင်သောကြောင့် ပင်ဖြစ်သည်။

မြက်ခင်းပြင်ကြီးကို မြစ်က ပိုင်းခြားထားရာ တစ်ဖက်ကမ်းသို့ ကူးရန် အတွက် ကြီးမားသော အကွေ့ကြီး တစ်ခုကို ပတ်သွားရမည် သို့မဟုတ် တိုက်ရိုက် ဖြတ်ကူးရမည် သာ ဖြစ်လေသည်။ တိရစ္ဆာန်များမှာ အချိန်ဆွဲနေရန် အချိန်မရှိသဖြင့် မျိုးနွယ်စု၏ အစိတ်အပိုင်း အနည်းငယ်ကို စတေးရန် ရွေးချယ်လိုက်ကြပြီး ကျန်ရှိသော မျိုးနွယ်စုကို အသက်ဆက်ခွင့် ရစေရန် လုပ်ဆောင်ကြခြင်း ပင်ဖြစ်သည်။

"အရှေ့ဘက် ကတော့ နိုင်းမိကျောင်း တွေ နေထိုင်တဲ့ နေရာ ဖြစ်သွားပြီ... ဒီတစ်ခေါက်တော့ ကျွန်တော် အနားမကပ် တော့ဘူး..."

"နိုင်းမိကျောင်း တွေရဲ့ ခန္ဓာကိုယ် အရှည်က ခြောက်မီတာ အထိ ရှည်လျားနိုင်ပြီး ကိုယ်အလေးချိန် က ကီလိုဂရမ် တစ်ရာ ကနေ တစ်ထောင် အထိ ရှိနိုင်တယ်..."

"ပြောရမယ် ဆိုရင် အလေးဆုံး နိုင်းမိကျောင်း က တစ်တန်လောက် အထိ လေးနိုင်တယ်..."

"အဲဒီအကောင် ကြီးတွေက တင့်ကားကြီး တစ်စီး အတိုင်းပဲ..."

"လုံးဝကို ပြဿနာ သွားရှာလို့ မရဘူး..."

ရွှီယန်က အရှေ့သို့ ခြေလှမ်း အနည်းငယ် လျှောက်သွားပြီး အားလုံးကို ပြောပြလိုက်လေသည်။

ရွှီယန်၏ စကားကို ကြားသောအခါ အားလုံး ချက်ချင်းပင် ကြောင်အမ်းအမ်း ဖြစ်သွားကြရလေသည်။ ဘာကြီးလဲ ဟု တွေးလိုက်ကြလေသည်။ တစ်တန်တောင် အလေးချိန် ရှိတာလား ဟု အံ့ဩသွားကြလေသည်။ တကယ်လား အတုလား ဟုလည်း စူးစမ်းချင်စိတ် ဖြစ်ပေါ်သွားကြလေသည်။

[အစ်ကိုယန် ငါက စာဖတ်နည်းတယ် ဆိုပေမယ့် ငါ့ကိုတော့ မလိမ်ပါနဲ့ တစ်တန် ဆိုတာ ဘယ်လို ပမာဏ မျိုးလဲ ဆိုတာ မင်း သိရဲ့လား]

[တစ်တန် အလေးချိန် ရှိတဲ့ မိကျောင်း တဲ့လား နောက်နေတာတော့ မဟုတ်ပါဘူးနော်]

[ဟယ် အဲဒီဘက်မှာ အဲဒီလောက်တောင် အဓိပ္ပာယ်မဲ့လွန်း နေတာလား ငါတို့ ဒီဘက်က ယန်ဇီ မိကျောင်း တွေက အရမ်း ချစ်စရာ ကောင်းကြတယ်လေ အားလုံးက အစာတောင် သွားကျွေး ကြသေးတာ]

[တရုတ်ပြည် က မိကျောင်း တွေကပဲ ပိုကောင်းပါတယ် အပြင်က မိကျောင်း တွေက အရမ်း ကြောက်စရာ ကောင်းလွန်းတယ်]

တိုက်ရိုက်ထုတ်လွှင့်မှု အခန်းထဲတွင် သံသယဖြစ်နေသော စကားသံ အများအပြား ထွက်ပေါ် နေလေသည်။

ရွှီယန်က မူလနေရာတွင် ရပ်လျက် မှန်ပြောင်းကို ထုတ်ယူကာ မြစ်ကမ်းဘေးသို့ လှမ်းကြည့် နေလိုက်လေသည်။ အချိန်သိပ်မကြာခင် မှာပင် သူက ဧရာမ မိကျောင်းကြီး တစ်ကောင်ကို တကယ်ကြီး ရှာဖွေ တွေ့ရှိ သွားခဲ့လေသည်။

သူက ချက်ချင်းပင် ဒရုန်းကင်မရာကို ထိန်းချုပ်ကာ အရှေ့ဘက်သို့ ချိန်ရွယ် ရိုက်ကူး လိုက်လေသည်။ တိုက်ရိုက်ထုတ်လွှင့်မှု မြင်ကွင်းက ကျယ်လာပြီး မကြာခင်မှာပင် ကျောကုန်းပေါ်တွင် အဖုအပိမ့် နှစ်တန်း ပါရှိသော အမည်းရောင် မိကျောင်းကြီး တစ်ကောင်ကို အားလုံး မြင်တွေ့ လိုက်ကြရလေသည်။

ဤမိကျောင်းကြီးက ကမ်းစပ်ပေါ်တွင် ဖြည်းညင်းစွာ လမ်းလျှောက် နေပြီး ကြည့်ရသည်မှာ အတော်လေး ကြောက်စရာ ကောင်းလှပေသည်။

"ဒီတစ်ကောင် က တစ်တန်လောက် ရှိနေပြီ..."

"အာဖရိက မြက်ခင်းပြင်ကြီး ပေါ်မှာ တိရစ္ဆာန် တွေ အရမ်း များလွန်းတယ်... အားလုံးက ရေသောက် ရတာဆိုတော့ မိကျောင်း တွေ အတွက် အစာ မရှားပါဘူး..."

"ဒီဘက်မှာ ရေလမ်းကြောင်း တွေကလည်း ပေါများတော့ နိုင်းမိကျောင်း တွေရဲ့ အရေအတွက် ကလည်း လန့်စရာ ကောင်းလောက်အောင် များပြားပါတယ်..."

"ရုပ်ဆိုးတာလေး တစ်ခုပါပဲ... ကျွန်တော် ကတော့ သိပ်စိတ်မဝင်စား ပါဘူး..."

ရွှီယန်က မိကျောင်းကို ကြည့်ရင်း ရှင်းပြ လိုက်လေသည်။

အင်တာနက်သုံးစွဲသူများက မိကျောင်းကြီးကို မြင်သောအခါ မှသာ ရွှီယန်၏ စကားကို ယုံကြည် သွားကြတော့သည်။

[အပြင်လောကကြီး က အရမ်း အန္တရာယ် များလွန်းတယ်]

အားလုံးက မနေနိုင်ဘဲ သက်ပြင်းချကာ မှတ်ချက်ပေး လိုက်ကြလေသည်။

"မိကျောင်း က တကယ်တမ်းတော့ ဘာမှ မဟုတ်သေးပါဘူး... အာဖရိက မှာ သေစေနိုင်တဲ့ တိရစ္ဆာန် တွေ အများကြီး ရှိတယ်... မိကျောင်း တွေက အဆင့် သတ်မှတ်ချက် အရ နောက်ပိုင်း မှာတောင် ရှိနေသေးတာ..."

"ကျွန်တော် မှတ်မိသလောက် စာရင်း တစ်ခု အရ ဆိုရင် မိကျောင်း ထက် လူတွေကို ပိုသေစေနိုင်တဲ့ တိရစ္ဆာန် တွေထဲမှာ ရေမြင်း တွေ... ယင်ကောင် တစ်မျိုး နဲ့ အဆိပ်ရှိတဲ့ ခြင် တွေ ပါဝင်တယ်..."

"အပူပိုင်း ဒေသမှာ ဗိုင်းရပ်စ် တွေ အရမ်း များလွန်းတယ်... ဒီလို နေရာမျိုး ကို လာမယ် ဆိုရင်တော့ သေချာ သတိထား ရမှာပါပဲ..."

ရွှီယန်က အားလုံးကို ရှင်းပြ နေလေသည်။

ထိုစဉ်မှာပင် အနောက်ဘက်မှ မြောင်ဝူး မြောင်ဝူး ဟူသော အော်မြည်သံ တစ်ခု ရုတ်တရက် ထွက်ပေါ် လာခဲ့လေသည်။ ဤအသံက အနည်းငယ် ရင်းနှီးနေသကဲ့သို့ ခံစားရလေသည်။

ရွှီယန်က ချက်ချင်းပင် နောက်လှည့် ကြည့်လိုက်လေသည်။ နောက်လှည့် ကြည့်လိုက်သည်နှင့် တစ်ပြိုင်နက် ချီတာကျားသစ် တစ်ကောင်က မလှမ်းမကမ်းတွင် ရပ်လျက် သူ့ကိုကြည့်ကာ ညင်သာစွာ အော်မြည် နေသည်ကို မြင်တွေ့ လိုက်ရလေသည်။ လွန်ခဲ့သော နှစ်ရက်ခန့်က တွေ့ခဲ့ရသော ချီတာကျားသစ်လေး ပင်ဖြစ်သည်။

"မီမီ... မင်း ဘယ်လိုလုပ်ပြီး ရောက်လာတာလဲ..."

ချီတာကျားသစ်ကို ပြန်လည် မြင်တွေ့လိုက်ရသောအခါ ရွှီယန်၏ မျက်နှာပေါ်တွင် အံ့သြဝမ်းသာမှုများ ပြည့်နှက် သွားရလေသည်။ ခွဲခွာနေရပြီးမှ ပြန်လည် ဆုံတွေ့ရသော ခံစားချက်က တကယ်ကို ကောင်းမွန် လှပေသည်။

ချီတာကျားသစ်က ရွှီယန် ရှိရာဘက်သို့ အသံစူးစူးလေးဖြင့် နှစ်ချက်ခန့် အော်မြည် လိုက်ပြီး မြစ်ရှိရာ အရပ်သို့ လှမ်းကြည့် နေလေသည်။ ရွှီယန်က အခြေအနေ အကြမ်းဖျင်းကို နားလည် သဘောပေါက် လိုက်လေသည်။ ချီတာကျားသစ်က မြစ်ကို ဖြတ်ကူးချင်နေသော်လည်း အနည်းငယ် အန္တရာယ် များနေသဖြင့် ရွှီယန်ကို ကူညီပေးရန် လာရောက် တောင်းဆိုခြင်း ပင်ဖြစ်သည်။

ပုံမှန်အားဖြင့် တိရစ္ဆာန်များ မြစ်ကို ဖြတ်ကူးရာတွင် မြစ်ကြောင်း ကျဉ်းမြောင်းသော နေရာကို ရွေးချယ်လေ့ ရှိကြပြီး ဤသို့ဆိုပါက အန္တရာယ် ရင်ဆိုင်ရမှု ပိုနည်းပါးမည် ဖြစ်လေသည်။ သို့သော် မိကျောင်းများ ကလည်း ထိုနေရာများတွင် ချောင်းမြောင်း နေတတ်ကြလေသည်။

ချီတာကျားသစ်က ရွှီယန်၏ ဘေးနားသို့ လျှောက်လာခဲ့ပြီ ဖြစ်ရာ ရွှီယန်က လက်ဆန့်ထုတ်ကာ ၎င်း၏ ခေါင်းကို ပွတ်သပ် ပေးလိုက်လေသည်။ ဤအကောင်လေးက အထူးပင် ပေါ့ပါး သွက်လက် လှပေသည်။ ခေါင်းက အလွန် သေးငယ်ပြီး ခြေလက်များက သွယ်လျ ရှည်လျား လေသည်။

ကြောင်မျိုးနွယ် တိရစ္ဆာန်များထဲတွင် ပြေးလွှားရာ၌ အကျွမ်းကျင်ဆုံး အမျိုးအစား ပင်ဖြစ်သည်။ ထို့အပြင် သားရဲတိရစ္ဆာန် ဖြစ်သော်ငြားလည်း စရိုက်က အထူး ကောင်းမွန် လှပေသည်။ ကြည့်ရသည်မှာပင် ချစ်စရာ ကောင်းနေလေသည်။

ချီတာကျားသစ်က မြစ်ကို ဖြတ်ကူးရန် ရည်ရွယ်ထားမှတော့ ၎င်းကို ခေါ်ဆောင် သွားပေးမည် ဟု ရွှီယန် စဉ်းစား လိုက်လေသည်။

အင်တာနက်သုံးစွဲသူများက ကျားသစ်ကို မြင်သောအခါ အထူးပင် စိတ်လှုပ်ရှား နေကြလေသည်။

[ဒီအလုပ်သမား ကျားသစ်လေး ပြန်ရောက် လာပြန်ပြီ]

[လောင်ရွှီ က ဘယ်နေရာ သွားသွား သားရဲ တိရစ္ဆာန် တွေ အနောက်က လိုက်ဖို့ မရှားပါဘူး တကယ် အစွမ်းထက်တာပဲ]

[မင်းက သဘာဝတရား ရဲ့ သားတော် ရဲ့ စွမ်းဆောင်ရည် ကို သံသယ ဝင်နေတာလား]

[ဟားဟားဟား မွေးရာပါ တောင်စောင့်နတ် ခန္ဓာကိုယ် သဘာဝ ပါကွာ]

"သူက မြစ်ကို ဖြတ်ကူးချင်နေတယ် လို့ ခံစားရတယ်..."

"ကျားသစ် တွေ မြစ်ကူးတာ ကလည်း အတော်လေး အန္တရာယ် များပါတယ်..."

"တစ်ခါတလေ ခြင်္သေ့ တွေတောင် အကိုက်ခံရတတ်တာ ဆိုတော့ ကျားသစ် ဆိုရင်တော့ ပြောစရာတောင် မလိုတော့ပါဘူး..."

"ဒီကောင်လေး ကလည်း ဉာဏ်ကောင်းပါတယ်... ကျွန်တော့်ဆီ အကူအညီ လာတောင်းတာပဲ..."

ရွှီယန်က ချီတာကျားသစ်ကို ကြည့်ရင်း အင်တာနက်သုံးစွဲသူများကို ရှင်းပြ လိုက်လေသည်။

မြက်ခင်းပြင်ကြီး ပေါ်ရှိ တိရစ္ဆာန်များက အလွန် များပြားလွန်းလှပြီး တစ်ချက် ကြည့်လိုက်သည်နှင့် နေရာတိုင်းတွင် ပြေးလွှား လှုပ်ရှားနေသော သက်ရှိများကိုသာ မြင်တွေ့ နေရလေသည်။ ချီတာကျားသစ်က ၎င်းတို့ထဲတွင် ထိုမျှလောက် ထင်ရှား ပေါ်လွင်ခြင်း မရှိချေ။

ရွှီယန်က ကျားသစ်ကို ခေါ်ဆောင်ကာ မြစ်ကြောင်း အတော်လေး ကျဉ်းမြောင်းသော နေရာ တစ်ခုကို ရှာဖွေရန် ရည်ရွယ် လိုက်လေသည်။ ဤဘက်ရှိ တိရစ္ဆာန်များ အားလုံး မြစ်ကို ဖြတ်ကူး သွားပြီးနောက် ဤနေရာတွင် အစားအစာ မရှိတော့ဘဲ သားရဲတိရစ္ဆာန်များ ကလည်း မြစ်ကို ဖြတ်ကူးကြတော့မည် ဖြစ်လေသည်။

အားနေသည်နှင့် အတူတူပင် ဖြစ်လေသည်။ ဤနေ့ရက်များတွင် အတော်လေး အလုပ်များ နေလေသည်။ ချီတာကျားသစ် ကလည်း ဉာဏ်ကောင်းလှပြီး ရွှီယန် အနောက်သို့ လိုက်ပါပါက ပို၍ သက်သောင့်သက်သာ ရှိမည်ကို သိရှိထားပုံ ရကာ ရွှီယန်ကို မြင်သည်နှင့် တစ်ပြိုင်နက် အကူအညီ လာရောက် တောင်းဆိုခြင်း ပင်ဖြစ်သည်။

ထို့နောက် ရွှီယန်က လမ်းကြမ်းမောင်းယာဉ်ကို ခေါ်ယူလိုက်ပြီး ကျားသစ်ကို ခေါ်ဆောင်ကာ ကားပေါ်တက်လိုက်ပြီး မြစ်ကြောင်း အတော်လေး ကျဉ်းမြောင်းသော နေရာဆီသို့ မောင်းနှင် သွားတော့သည်။

ထိုနေရာသို့ ရောက်ရှိသွားသောအခါ ပတ်ဝန်းကျင်တွင် မိကျောင်းများ ရှိမရှိ ကိုပါ တစ်ချက် လှည့်ပတ် စစ်ဆေး လိုက်သေးလေသည်။ ဤနေရာက အလွန် ကျဉ်းမြောင်းသဖြင့် ပေါ့ပေါ့ပါးပါး ပင် ဖြတ်ကူး နိုင်လေသည်။

ကျားသစ်က ခန္ဓာကိုယ်ကို ဆန့်ထုတ်ကာ တစ်ချက် ခုန်လိုက်ပြီး တစ်ဖက်ကမ်းသို့ ကူးသွားကာ ရွှီယန်ကို နောက်လှည့်၍ တစ်ချက် ကြည့်လိုက်လေသည်။

"သွားတော့လေ... တာ့တာ..."

ရွှီယန်က ၎င်းကို လက်ဝှေ့ယမ်း နှုတ်ဆက် လိုက်လေသည်။ ချီတာကျားသစ်က ရွှီယန်ကို ကြည့်ကာ တစ်ချက် အော်မြည် လိုက်ပြီးနောက် လေဟုန်စီး သွားသည့် အလား အမြန် ပြေးထွက် သွားတော့သည်။

ချီတာကျားသစ် အဝေးသို့ ထွက်ခွာသွားသည်ကို ကြည့်ရင်း ရွှီယန် လည်း ပြုံးလိုက်မိပြီး ပေါ့ပါး ပျော်ရွှင် သွားသကဲ့သို့ ခံစားလိုက်ရလေသည်။ ရှားပါးအဆင့် တာဝန် တစ်ခု လုပ်ဆောင်ရန် ကျန်ရှိ နေသေးသည်ကို စဉ်းစားမိသောအခါ ရွှီယန်က ခဏမျှ တွေးတော လိုက်ပြီး ရတနာရှာဖွေရေး တာဝန်ကို စတင်ရန် ရွေးချယ် လိုက်လေသည်။

[ရတနာရှာဖွေရေး တာဝန်ကို စတင်ပါပြီ ပြေးလွှားနေသော ပိုင်ရှင်]

[တာဝန် အကြောင်းအရာ ပိုင်ရှင် အနေဖြင့် တောရိုင်း မြင်းကျား တစ်ကောင်၏ လိုက်လံ ဖမ်းဆီးမှု အောက်တွင် မြင်းကျား၏ အထိအတွေ့ကို မခံရဘဲ တစ်မိနစ် တောင့်ခံနိုင်ပါက အောင်မြင်မည် ဖြစ်ပါသည်]

[တာဝန် ဆုလာဘ် အမည်းနှင့် အဖြူစင်း အတွင်းခံဘောင်းဘီ ငါးထည် တောရိုင်း မြင်းကျား ခေါင်းဆောင်၏ နှစ်သက်မှု]

ဤရတနာရှာဖွေရေး တာဝန် ထွက်ပေါ် လာသည်နှင့် တစ်ပြိုင်နက် ရွှီယန် မှာ ချက်ချင်းပင် ကြောင်အမ်းအမ်း ဖြစ်သွားရလေသည်။

'ဘာကြီးလဲ...'

'ပြေးလွှားနေတဲ့ ပိုင်ရှင်...'

'ငါက ဘာကို ပြေးရမှာလဲ...'

'တောရိုင်း မြင်းကျား ရဲ့ လိုက်လံ ဖမ်းဆီးမှု ဟုတ်လား...'

'ဘယ်က တောရိုင်း မြင်းကျား လာမှာလဲ...'

ရွှီယန် သံသယ ဖြစ်နေစဉ် မှာပင် မလှမ်းမကမ်းတွင် သန်စွမ်း တောင့်တင်းသော တောရိုင်း မြင်းကျား တစ်ကောင်က ရွှီယန်ကို အကြည့်မလွှဲဘဲ စူးစိုက် ကြည့်ရှု နေသည်ကို မြင်တွေ့ လိုက်ရလေသည်။

'စနစ်... ဘာတွေ လျှောက်လုပ် နေပြန်တာလဲ...'

'လိုက်တမ်းပြေးတမ်း တာဝန် တောင် ရှိသေးတာလား...'

ရွှီယန်က စိတ်ထဲမှ တိတ်တဆိတ် အပြစ်တင် နေလိုက်လေသည်။

ဤအချိန်တွင် အင်တာနက်သုံးစွဲသူများ ကလည်း ပုံမှန်မဟုတ်သော အခြေအနေကို သတိထားမိ သွားကြလေသည်။

[ဟိုဘက်ကို ကြည့်လိုက် မြင်းကျား တစ်ကောင် လောင်ရွှီ ကို စူးစိုက် ကြည့်နေတယ်]

[လောင်ရွှီ ရဲ့ ခင်မင်စရာ ကောင်းတဲ့ ပုံစံ ကို မြင်ပြီး လာအပွတ်သပ် ခံချင်လို့များလား]

[တကယ်ပဲ ဒီလို ဖြစ်နိုင်ခြေ ရှိတယ်]

အင်တာနက်သုံးစွဲသူများက သိသိသာသာကို နားလည်မှု လွဲမှား နေကြလေသည်။ ဤအချိန်တွင် တောရိုင်း မြင်းကျား က ရွှီယန် ရှိရာဘက်သို့ ပြေးလာ နေပြီ ဖြစ်လေသည်။

မြင်းကျားများ၏ ဉာဏ်ရည် က အလွန် နိမ့်ကျပြီး ၎င်းတို့၏ တွေးခေါ်မှု ပုံစံ ကလည်း အလွန် ထူးဆန်း လှပေသည်။ ၎င်းတို့၏ လုပ်ရပ် အတော်များများကို လူသားများ နားမလည် နိုင်ကြချေ။ ဤနှစ်ပေါင်းများစွာ ကြာသည်အထိ မြင်းကျားများကို ယဉ်ပါးအောင် မယဉ်ကျေးနိုင် ခဲ့ခြင်းကလည်း ဤအကောင်များ ကို ယဉ်ပါးအောင် လုပ်၍ မရနိုင်ကြောင်း လူသားများ တွေ့ရှိ သွားသောကြောင့် ပင်ဖြစ်သည်။ အရမ်းကို တုံးအ လွန်းလှပေသည်။

ရွှီယန်က မြင်းကျား ၎င်းထံသို့ ပြေးဝင် လာသည်ကို မြင်သောအခါ ကျောပိုးအိတ်ကို မြေပြင်ပေါ်သို့ ပစ်ချ လိုက်ပြီး နောက်သို့ ချက်ချင်း လှည့်ပြေး တော့သည်။ သူ၏ အမြန်နှုန်း က အတော်လေး မြန်ဆန် လှပေသည်။ အထူးသဖြင့် အပြေးစတင်ချိန် အမြန်နှုန်း ကို မြှင့်တင် ထားသောကြောင့် ပင်ဖြစ်သည်။

ပတ်ဝန်းကျင်တွင် သစ်ပင် မရှိသဖြင့် သစ်ပင်ပေါ်သို့ တက်ရန် နည်းလမ်း မရှိချေ။ လမ်းကြမ်းမောင်းယာဉ် ကလည်း သူနှင့် အကွာအဝေး တစ်ခုတွင် ရှိနေလေသည်။

ဤအချိန်တွင် ရွှီယန်၏ စနစ် မျက်နှာပြင် ပေါ်၌ စက္ကန့် ခြောက်ဆယ် နောက်ပြန် ရေတွက်မှု တစ်ခု ထွက်ပေါ် လာခဲ့ပြီး ဂဏန်းများ က အလျင်အမြန် ခုန်ပေါက် လာတော့သည်။

အင်တာနက်သုံးစွဲသူများ မှာ ကြည့်ရှုရင်း မှင်တက် သွားကြရလေသည်။ ဘာအခြေအနေကြီးလဲ ဟု တွေးလိုက်ကြလေသည်။ ဒါက ဘာလုပ်နေကြတာလဲ ဟုလည်း စူးစမ်းချင်စိတ် ဖြစ်ပေါ် နေကြလေသည်။ ဘယ်လိုလုပ်ပြီး ရုတ်တရက်ကြီး လိုက်တမ်းပြေးတမ်း ကစား နေကြတာလဲ ဟု တွေးတော နေကြလေသည်။

မြင်းကျား က မည်သို့ပင် ဆိုစေ မြင်း တစ်ကောင် ဖြစ်ရာ အမြန်နှုန်း က လူသားများ ထက် အများကြီး ပိုမြန် လေသည်။ ယူစိန် ဘော့ လာလျှင်ပင် အရှေ့ မီတာ အနည်းငယ် တွင် ပိုမြန် နိုင်သော်လည်း နောက်ပိုင်း တွင်တော့ သေချာပေါက် အမီလိုက် ခံရမည် သာ ဖြစ်လေသည်။

ရွှီယန် လည်း ဤအချက်ကို သိရှိ ထားသဖြင့် မြင်းကျား နှင့် ပတ်ပြေးရန် ရွေးချယ် လိုက်လေသည်။ အရှေ့အနောက် ခေါက်တုံ့ခေါက်ပြန် ပြေးလွှားပြီး ကားရှိရာ အရပ်သို့ ဦးတည် ကာ ပြေးလွှား နေလေသည်။ မြင်းကျား မှာလည်း ယာယီ အားဖြင့် သူ့ကို ဘာမှ လုပ်၍ မရနိုင် သေးချေ။

စက္ကန့် လေးဆယ်... စက္ကန့် သုံးဆယ်... စက္ကန့် နှစ်ဆယ်... မြင်းကျား က သူ့အနားသို့ အလွန် နီးကပ် လာပြီ ဖြစ်ပြီး နောက်ပြန် ရေတွက်မှု ကလည်း ပြီးဆုံး တော့မည် ဖြစ်လေသည်။

ရွှီယန် က မူလကတည်းက မြင်းကျားကို မကြောက်ရွံ့ သော်လည်း တာဝန် သတ်မှတ်ချက် က အထိအတွေ့ မခံရရန် ဖြစ်နေသဖြင့် အနည်းငယ် ခက်ခဲ နေလေသည်။ ကံကောင်းစွာ ဖြင့် ရွှီယန်၏ ကိုယ်ဟန် လှုပ်ရှားမှု က လုံလောက်အောင် ပေါ့ပါး သွက်လက် လှပေသည်။ ဤသို့ဖြင့် နောက်ဆုံး စက္ကန့် အနည်းငယ် အထိ တောင့်ခံ ထားနိုင်ခဲ့ပြီး မြင်းကျား က သူ့ကို မထိလိုက် နိုင်ခဲ့ချေ။

တိုက်ရိုက်ထုတ်လွှင့်မှု အခန်းထဲရှိ အင်တာနက်သုံးစွဲသူများ မှာ အစောကြီး ကတည်းက အဆက်မပြတ် ရယ်မော နေကြလေပြီ။

[ဟားဟားဟား လောင်ရွှီ လည်း ဒီလို နေ့မျိုး ရောက်လာတာပဲ အရမ်း ရယ်ရတာပဲ]

[ခန့်ညားတဲ့ မြက်ခင်းပြင် ရဲ့ လမ်းသရဲ ကြီး က မြင်းကျား ရဲ့ အလိုက်ခံ နေရတယ် ပေါ့]

[မပြောနဲ့နော် ဒီမြင်းကျား က တော်တော် ကြီးတယ် တကယ်ပဲ ရင်ဆိုင်ရတာ မလွယ်ဘူး]

[ဟားဟားဟား အရမ်း ရယ်ရတာပဲ]

ဖန်သားပြင် အပြည့် ဟားဟားဟား များဖြင့်သာ ပြည့်နှက် နေလေသည်။

ဤအချိန်တွင် နောက်ပြန် ရေတွက်မှု ပြီးဆုံး သွားပြီး ရွှီယန်၏ တာဝန် လည်း ပြီးမြောက် သွားခဲ့ပြီ ဖြစ်လေသည်။ သူ လည်း ဖုံးကွယ် မထားတော့ချေ။

မြင်းကျား ထပ်မံ ပြေးဝင် လာသည်ကို မြင်သောအခါ တိုက်ရိုက်ပင် ဘေးသို့ ရှောင်ထွက် လိုက်ပြီး အရှိန် နှင့်အတူ မြင်းကျား၏ လည်ပင်းကို ဖက်ကာ အပေါ်သို့ ခွစီး လိုက်တော့သည်။ ရွှီယန် လည်း ၎င်းကို စီးရန် မရည်ရွယ် ထားချေ။ ဤအကောင် က စီး၍ မရနိုင်ချေ။ ရွှီယန် က အားကုန် သုံးကာ တစ်ချက် လှုပ်ရမ်း လိုက်ပြီး မြင်းကျားကို ဘေးတိုက် မြေပြင်ပေါ်သို့ လဲကျ သွားစေ လိုက်တော့သည်။

ထို့နောက် လူတစ်ယောက် နှင့် မြင်းတစ်ကောင် က တစ်ချိန်တည်း တွင် လဲကျ သွားကြလေသည်။ မြက်ခင်းပြင် ဖြစ်ပြီး မြက်များ က အတော်လေး နူးညံ့ သဖြင့် မည်သည့် ထိခိုက် ဒဏ်ရာ မျှ မရရှိ ခဲ့ကြချေ။ ရွှီယန် က ပိုမြန်စွာ ထရပ် လိုက်ပြီး အရှေ့သို့ ပြေးဝင်ကာ မြင်းကျား၏ လည်ပင်းကို ဖိထားပြီး မြင်းကျားကို တိုက်ရိုက်ပင် ပါးနှစ်ချက် ရိုက်ချ လိုက်တော့သည်။

"ဖြန်း... ဖြန်း..."

"ငါ့ကို ဘာလို့ လိုက်နေတာလဲ... မင်း ရူးနေလား..."

"ငါက မင်းကို အဖက်မလုပ်ချင်တာကို မင်းက အတင့်ရဲ နေတယ်ပေါ့..."

ရွှီယန်၏ လှုပ်ရှားမှုကို မြင်သောအခါ တိုက်ရိုက်ထုတ်လွှင့်မှု အခန်းထဲရှိ အင်တာနက်သုံးစွဲသူများ မှာ ချက်ချင်းပင် ကြောင်အမ်းအမ်း ဖြစ်သွားကြရလေသည်။ ဤကိုယ်ဟန် လှုပ်ရှားမှု... ဤနည်းလမ်း များကို ကြည့်ကာ အရမ်းကို ကြမ်းတမ်း လွန်းလှတယ် ဟု တွေးလိုက်ကြလေသည်။