အခန်း (၃၅၃-၃၅၄)

အခန်း ၃၅၃ ဧကရာဇ် ကျမ်း

ယခု ရွှမ်ယွမ် ဧကရာဇ်မင်း၏ စကားများကို ကြားလိုက်ရသောအခါ မည်သို့များ မအံ့အားသင့်ဘဲ နေနိုင်မည်နည်း။

'ဒီလိုဆိုတော့ တစ်ဖက်လူက ငါ့ရဲ့ ဘိုးဘေးကြီး ဖြစ်နေတာပေါ့'

"ဒါက တကယ်တော့ ဘယ်လိုဖြစ်ရတာလဲ... အရှင်က ဘယ်လိုလုပ်ပြီး ဒီနေရာမှာ ရောက်နေတာလဲ"

ကျိုးဟန်က အလျင်စလို ဆက်တိုက် မေးမြန်းလိုက်သည်။ သူသည် အကြောင်းအရာများကို အလွန်အမင်း သိရှိလိုစိတ် ပြင်းပြနေ၏။

မည်သည့်အကြောင်းကြောင့် နတ်ဘုရားနှင့် နတ်ဆိုး ကမ္ဘာမြေကြီး အတွင်းသို့ ရွေးချယ်ခံခဲ့ရသနည်း။

ဤအရာအားလုံး၏ နောက်ကွယ်မှ ကြိုးကိုင်နေသူမှာ မည်သူနည်း။

ဤကဲ့သို့ ထိန်းချုပ်ခံထားရသော ကံကြမ္မာကို မည်သို့ ချိုးဖျက်ရမည်နည်း။

ဤမေးခွန်း သုံးခုမှာ ကျိုးဟန်၏ ရင်ထဲတွင် အမြဲတမ်း စွဲထင်နေခဲ့သော အရာများ ဖြစ်သည်။ ယခင်က မေးမြန်းချင်ခဲ့သော်လည်း ဖြေကြားပေးနိုင်မည့်သူ တစ်ဦးတစ်ယောက်မျှ မရှိခဲ့ပေ။

သို့သော် ယခု သူ၏ အရှေ့တွင် ရှိနေသည်မှာ ရွှမ်ယွမ် ဧကရာဇ်မင်း၏ ပုံရိပ်ယောင် ပင်ဖြစ်သည်။ အမြင့်ဆုံး အဆင့်အတန်းသို့ ရောက်ရှိနေသူ ဖြစ်ရာ လျှို့ဝှက်ချက်များကို ပိုမို သိရှိထားမည်မှာ သေချာလှပေသည်။

ထို့ကြောင့် ကျိုးဟန်မှာ အချိန်မဆိုင်းနိုင်တော့ဘဲ အလျင်စလို မေးမြန်းလိုက်ခြင်း ဖြစ်သည်။

မည်သူက မိမိ၏ ကံကြမ္မာကို ကိုယ်တိုင် မခြယ်လှယ်ချင်ဘဲ နေမည်နည်း။ မျက်စိဖြင့် မမြင်နိုင်သော တည်ရှိမှု တစ်ခု၏ ခြယ်လှယ် ထိန်းချုပ်မှုကို ခံနေရခြင်းမှာ အလွန်တရာ အနေရခက်လှသည်။ လူတိုင်းက ဤကဲ့သို့သော ချည်နှောင်မှုမှ လွတ်မြောက်ချင်ကြပြီး ကျိုးဟန်သည်လည်း ချွင်းချက် မဟုတ်ပေ။

"မင်း အရာအားလုံးကို အမြန်ဆုံး သိချင်နေတယ် ဆိုတာကို ငါ သိတယ်... ဒါပေမဲ့ ဝမ်းနည်းစရာ ကောင်းတာက ငါကိုယ်တိုင်တောင် နောက်ကွယ်ကနေ ဘယ်သူ ကြိုးကိုင်နေတယ် ဆိုတာကို သေသေချာချာ မသိဘူးကွ"

ရွှမ်ယွမ် ဧကရာဇ်မင်းက အနည်းငယ် သက်ပြင်းချကာ ပြောလိုက်သည်။

သူကဲ့သို့သော အဆင့်အတန်းမျိုး ရောက်နေသည့်တိုင်အောင် မိမိ၏ ကံကြမ္မာကို ကိုယ်တိုင် မထိန်းချုပ်နိုင်သေးခြင်းမှာ ပို၍ပင် စိတ်ပျက်စရာ ကောင်းလှပေသည်။

"ပြီးတော့ အဆင့်အတန်း ပိုမြင့်လာလေလေ ထိတွေ့ရတဲ့ လျှို့ဝှက်ချက်တွေ ပိုများလာလေလေ ကိုယ့်ကိုယ်ကိုယ် ဘယ်လောက်တောင် သေးငယ် နိမ့်ကျနေသေးတယ် ဆိုတာကို ပိုပြီး ခံစားရလေလေပဲ"

“ဗျာ... အရှင်ကိုယ်တိုင်တောင် မသိဘူး ဟုတ်လား"

ကျိုးဟန် ကြားလိုက်ရချိန်တွင် သူ၏ နှလုံးသားမှာ ချောက်ကမ်းပါး အောက်သို့ ပြုတ်ကျသွားသကဲ့သို့ ခံစားလိုက်ရသည်။ ကြည့်ရသည်မှာ ဤနောက်ကွယ်မှ ကြိုးကိုင်နေသူမှာ သူ စိတ်ကူးထားသည်ထက်ပင် ပိုမို ကြောက်မက်ဖွယ် ကောင်းနေပုံ ရသည်။

"ဒါပေမဲ့ ငါ ဒီကမ္ဘာကြီးဆီကို ရောက်လာတာ နှစ်တွေ အများကြီး ကြာခဲ့ပြီလေ... ဘာမှ မရလိုက်ဘူး ဆိုတာမျိုးတော့ မဟုတ်ဘူးပေါ့... ဆက်ပြီးတော့ ငါ မင်းကို လျှို့ဝှက်ချက် တချို့အကြောင်း ပြောပြမယ်... ဒါက ဒီကမ္ဘာကြီးရဲ့ ချည်နှောင်မှု ကနေ ဘယ်လို လွတ်မြောက်အောင် လုပ်ရမလဲ လွတ်လပ်ခွင့်ကို ဘယ်လို ပြန်ယူရမလဲ အမှန်တရား အားလုံးကို ဘယ်လို ရှာဖွေရမလဲ ဆိုတာတွေနဲ့ သက်ဆိုင်နေတယ်"

ရွှမ်ယွမ် ဧကရာဇ်မင်းက သူ၏ စိတ်ခံစားချက်ကို ပြန်လည် ထိန်းချုပ်လိုက်ပြီး ဖြည်းညှင်းစွာ စတင် ပြောဆိုလိုက်သည်။ သူ၏ မျက်နှာထားမှာ အနည်းငယ် လေးနက် တည်ကြည်နေ၏။

ကျိုးဟန် ခေါင်းညိတ်လိုက်သည်။ အချိန်တိုင်း အမည်မသိ တည်ရှိမှု တစ်ခု၏ စောင့်ကြည့်ခြင်းကို ခံနေရခြင်းမှာ လှောင်အိမ်ထဲ ပိတ်လှောင်ခံထားရသော သားရဲ တစ်ကောင်ကဲ့သို့ အလွန် နေရခက်လှပေသည်။

ထို့ကြောင့် ကျိုးဟန်မှာ စိတ်အားထက်သန်လာပြီး အလျင်စလို နားစွင့်လိုက်သည်။

ရွှမ်ယွမ် ဧကရာဇ်မင်းက သူ့ကို မည်သည့်အတွက်ကြောင့် ဤအရာများ ပြောပြနေသနည်း ဆိုသည်ကို မသိသော်လည်း သေချာပေါက် အကြောင်းရင်း တစ်ခုခုတော့ ရှိနေမည်သာ ဖြစ်သည်။

သို့သော် ဤလျှို့ဝှက်ချက်များမှာ အလွန် အရေးကြီးလှသဖြင့် ကျိုးဟန် အများကြီး တွေးမနေတော့ပေ။

"တကယ်တော့ ခေတ်ကာလတိုင်းမှာ ကစားသမား တစ်စုကို ရွေးချယ်ပြီး နတ်ဘုရားနဲ့ နတ်ဆိုး ကမ္ဘာမြေကြီး ထဲကို ဝင်ရောက်စေခဲ့တာကွ"

"ငါ့အရင်တုန်းက ဖန်ကူး... နွီဝါ... ဖူရှီ... ဟုန်ကျွင်း... ပြီးတော့ ဒဏ္ဍာရီလာ နာမည်ကြီး ဘိုးဘေးတွေ အများကြီးပဲ... သူတို့ အများစုက ဒီကမ္ဘာကြီးထဲကို ရွေးချယ်ခံခဲ့ရဖူးတယ်"

ရွှမ်ယွမ် ဧကရာဇ်မင်း စကားစလိုက်သည်နှင့် ကျိုးဟန်မှာ ခေါင်းနပန်းကြီးသွားရလောက်အောင် တုန်လှုပ်သွားလေသည်။

ဤသူများ အားလုံးမှာ ဒဏ္ဍာရီများထဲမှ အလွန် အစွမ်းထက်သော တည်ရှိမှုများ ဖြစ်ကြပြီး တစ်ယောက်ချင်းစီတိုင်းမှာ ကောင်းကင်နှင့် မြေကြီးကို တုန်လှုပ်စေနိုင်လောက်သည့် ခမ်းနား ကြီးကျယ်သော စွမ်းအားများကို ပိုင်ဆိုင်ထားကြသူများ မဟုတ်ပါလား။

ယခင်က ရှေးဟောင်း ဒဏ္ဍာရီများကို ဖတ်ရှုစဉ်က သူတို့ကဲ့သို့ အစွမ်းထက်သည့် သူများက မည်သို့သော အကြောင်းကြောင့် သမိုင်း ရေစီးကြောင်းထဲတွင် ရုတ်တရက် ပျောက်ကွယ်သွားခဲ့ရသနည်း ဟု ကျိုးဟန် တွေးတောခဲ့ဖူးသည်။

သို့သော် ယခု ရွှမ်ယွမ် ဧကရာဇ်မင်း၏ စကားများကို ကြားလိုက်ရသောအခါ သူတို့ ပျောက်ကွယ်သွားရခြင်း၏ အကြောင်းရင်းကို ကျိုးဟန် နောက်ဆုံးတော့ နားလည် သဘောပေါက်သွားလေပြီ။ တကယ်တော့ သူတို့ အားလုံးသည်လည်း နတ်ဘုရားနှင့် နတ်ဆိုး ကမ္ဘာမြေကြီး အတွင်းသို့ ဝင်ရောက်လာခဲ့ကြခြင်း ပင်ဖြစ်သည်။

"နတ်ဘုရားနဲ့ နတ်ဆိုး... ဒါက နတ်ဘုရားနဲ့ နတ်ဆိုး ကမ္ဘာမြေကြီး လို့ နာမည်တွင်လာရတဲ့ အကြောင်းရင်းလား... ဒါဆို သူတို့က ဒီကမ္ဘာကြီးထဲမှာ ရှိနေသေးလား"

ကျိုးဟန်က အလျင်စလို မေးမြန်းလိုက်သည်။

"ဘိုးဘေးတွေက ဒီကမ္ဘာကြီးကနေ ထွက်သွားခဲ့တာ ကြာပြီကွ... ချည်နှောင်မှုတွေကနေ လွတ်မြောက်သွားကြပြီ"

"ဧကရာဇ် အဆင့် ကို ရောက်သွားပြီဆိုရင် အထူး မစ်ရှင် တစ်ခုကို လက်ခံရရှိလိမ့်မယ်... အဲဒီ အထူး မစ်ရှင် ကို ပြီးမြောက်အောင် လုပ်နိုင်ရင် လွတ်လပ်ခွင့်ကို ရရှိနိုင်ပြီ"

"ဒါတွေ အားလုံးက ငါ့ဆရာ ကောင်းကင်ကိုးထပ် ရွှမ်နွီ ပြောပြခဲ့တာလေ... သူကိုယ်တိုင်လည်း ဒီကမ္ဘာကြီးကနေ လွတ်မြောက်သွားခဲ့ပြီ"

ရွှမ်ယွမ် ဧကရာဇ်မင်းက ခေါင်းမော့၍ ကောင်းကင်ကို ကြည့်လိုက်ပြီး သူ၏ မျက်ဝန်းများထဲတွင် လွမ်းဆွတ် တမ်းတမှုများ ပြည့်နှက်နေလေသည်။ ၎င်းမှာ အလွန်တရာ ကြာမြင့်ခဲ့ပြီ ဖြစ်သော အတိတ်ကာလမှ အကြောင်းအရာ တစ်ခု ဖြစ်ပေသည်။

'ဧကရာဇ် တစ်ပါး ဖြစ်လာမှ အထူး မစ်ရှင် ကို လက်ခံရရှိနိုင်မယ် ဟုတ်လား... ဘယ်အချိန်ကစပြီး ဧကရာဇ် အဆင့် ဆိုတာက တံခါးပေါက် ဝင်ခွင့် လောက်ပဲ ဖြစ်သွားရတာလဲ... ဒါက တကယ်ကို သာမန် ခက်ခဲတာမျိုး မဟုတ်တော့ဘူး'

"ဟက်... ဧကရာဇ် အဆင့် ဆိုတဲ့ ဂုဏ်ပုဒ်က တကယ်ကို မြင့်မားတယ် ဆိုပေမယ့် အစွမ်းထက်တဲ့ ဘိုးဘေးတွေရဲ့ ရှေ့မှာတော့ ဘာမှ မဟုတ်သေးဘူးကွ"

"ဒါပေမဲ့ နှောင်းလူတွေရဲ့ စွမ်းအားက တဖြည်းဖြည်း ကျဆင်းလာတာနဲ့အမျှ ဧကရာဇ် ဆိုတာက ဒီကမ္ဘာကြီးရဲ့ အမြင့်ဆုံး အဆင့်အတန်း တစ်ခု ဖြစ်လာခဲ့တာပဲ"

"ကစားသမား အများစု ကတော့ ထွက်ခွာနိုင်ဖို့ မျှော်လင့်ချက် မရှိကြတော့ဘူးလေ... ဒီနေရာမှာပဲ အခြေချ နေထိုင်ပြီး မျိုးဆက်တွေ ပွားလာကြတယ်... ဒီက ဒေသခံတွေ ဆိုတာ သူတို့ရဲ့ မျိုးဆက်တွေပဲ"

"ဒါပေမဲ့ မွေးဖွားလာတဲ့ မျိုးဆက်သစ် တွေမှာ စနစ် ပါမလာကြတော့ဘူးလေ"

ကျိုးဟန်၏ သံသယကို ခံစား သိရှိလိုက်သည့်အလား ရွှမ်ယွမ် ဧကရာဇ်မင်းက ပြုံး၍ ရှင်းပြလိုက်သည်။

"ဒါဆို အရှင်မင်းကြီးရဲ့ အထူး မစ်ရှင် က ကျွန်တော်နဲ့ သက်ဆိုင်နေတာလား"

နားထောင်ပြီးနောက် ကျိုးဟန်က အနည်းငယ် စဉ်းစားကာ မှန်းဆချက် တစ်ခုဖြင့် မေးလိုက်သည်။

မည်သို့ပင်ဆိုစေ နဂါး နိုင်ငံ၏ ကစားသမား အများအပြားမှာ ရွှမ်ယွမ် ဧကရာဇ်မင်း၏ မျိုးဆက်များ ဖြစ်ကြသော်လည်း သူက ကျိုးဟန်ကိုသာ ဤအရာများ ပြောပြပြီး အခြားသူများကို မပြောပြခြင်းမှာ သေချာပေါက် လျှို့ဝှက်ချက် တစ်ခုခု ရှိနေမည်ကို ကျိုးဟန် သိရှိနေသည်။

"အဲဒီလို ပြောလို့လည်း ရပါတယ်"

"ငါ့ရဲ့ အထူး မစ်ရှင် က ဧကရာဇ် အဆင့်ရှိတဲ့ အစွမ်းထက်သူ တစ်ယောက်ကို ပျိုးထောင်ပေးဖို့ပဲ... ပြီးတော့ ငါ့ရဲ့ မျိုးဆက်သစ်တွေ ထဲကပဲ ဖြစ်ရမယ်"

ရွှမ်ယွမ် ဧကရာဇ်မင်းက ပြုံး၍ ပြောလိုက်သော်လည်း ထိုအပြုံးထဲတွင် ခါးသီးမှု အနည်းငယ် ပါဝင်နေလေသည်။

ဧကရာဇ် အဆင့်ရှိသော အစွမ်းထက်သူ တစ်ယောက် ဆိုသည်မှာ ပျိုးထောင်ချင်တိုင်း ပျိုးထောင်၍ ရနိုင်သော အရာမျိုး မဟုတ်ပေ။ အစွမ်းထက်သော မွေးရာပါ အရည်အချင်း လိုအပ်ရုံသာမက လုံလောက်သော ကံတရားလည်း ရှိရန် လိုအပ်သေးသည်။ ထိုသို့မဟုတ်ပါက မည်မျှပင် အရည်အချင်း ကောင်းမွန်နေပါစေ လမ်းခုလတ်တွင်ပင် အသက်ဆုံးရှုံးသွားနိုင်ခြေ ရှိလေသည်။

သူ ဤကမ္ဘာကြီးသို့ ရောက်ရှိလာသည်မှာ အချိန် မည်မျှပင် ကြာမြင့်ခဲ့ပြီမှန်း မသိတော့ပေ။ သို့သော် ဧကရာဇ် တစ်ပါး ဖြစ်လာနိုင်သူ မည်မျှ ရှိခဲ့သနည်း။

ထို့ကြောင့် ဤ အထူး မစ်ရှင် ၏ အခက်အခဲမှာ မည်မျှ ကြီးမားကြောင်းကို တွေးကြည့်ရုံဖြင့် သိနိုင်ပေသည်။

"ဒါကြောင့် အရှင်မင်းကြီးက ရွှမ်ယွမ် နန်းတော် ကို ဖန်တီးပြီး ထူးချွန်တဲ့ ပါရမီရှင်တွေကို ရွေးချယ် စစ်ထုတ်နေခဲ့တာပေါ့... ဒီလိုဆိုရင် သူတို့ထဲက အကောင်းဆုံး အရည်အချင်းရှိတဲ့ သူတွေကို ရွေးချယ်ပြီး မစ်ရှင် ပြီးမြောက်အောင် ပျိုးထောင်ပေးဖို့ပေါ့"

ကျိုးဟန် ချက်ချင်းပင် သဘောပေါက်သွားလေသည်။

"မှန်တယ်... ရွှမ်ယွမ် နန်းတော် က အဲဒီ စမ်းသပ်မှုတွေ ထဲက တစ်ခုတည်းသော နေရာပဲ"

"တခြား နေရာတွေမှာလည်း ငါ ဒီလို ဆင်တူတဲ့ စမ်းသပ်မှုတွေ အများကြီး ဖန်တီးထားတယ်လေ... ဘာပဲဖြစ်ဖြစ် ပိုက်ကွန် အကျယ်ကြီး ချထားမှ ငါးကြီးကြီး ဖမ်းမိနိုင်မှာပေါ့"

"မင်းရဲ့ စွမ်းဆောင်ရည်တွေကို ငါ အကုန်လုံး မြင်တွေ့ခဲ့ရတယ်... တကယ်ကို အရမ်း ကျေနပ်စရာ ကောင်းတယ်"

ရွှမ်ယွမ် ဧကရာဇ်မင်းက သူ၏ ရှည်လျားသော မုတ်ဆိတ်မွေးများကို သပ်ကာ ပြုံး၍ ပြောလိုက်သည်။

အထွတ်အထိပ် သခင်ကြီး ကိုးပါး က အခက်အခဲကို မတိုးမြှင့်ခဲ့လျှင်တောင်မှ သူ ကိုယ်တိုင် အခက်အခဲကို မြှင့်တင်ပေးခဲ့မည်သာ ဖြစ်သည်။ ဤသို့လုပ်ဆောင်မှသာ အရှေ့မှ လူငယ်လေး၏ အစွမ်းထက်သော စွမ်းအား အစစ်အမှန်ကို မြင်တွေ့နိုင်မည် မဟုတ်ပါလား။

"ဒါကြောင့် မင်းက ငါ ရွေးချယ်ထားတဲ့ တပည့်ရင်း သုံးယောက်ထဲက တစ်ယောက်ပဲ"

"မင်း ငါ့ရဲ့ တပည့်ရင်း အဖြစ် ခံယူဖို့ ဆန္ဒရှိလား"

ရွှမ်ယွမ် ဧကရာဇ်မင်းက ပြုံး၍ မေးလိုက်သည်။ အချို့သော မစ်ရှင် ၏ စည်းမျဉ်း ကန့်သတ်ချက်များ ကြောင့်ဖြစ်သည်။

နှစ်တစ်ရာ လျှင် တစ်ကြိမ် သူသည် အများဆုံး တပည့်ရင်း သုံးယောက်သာ လက်ခံခွင့် ရှိလေသည်။

ယခင်က လက်ခံခဲ့သော တပည့်ရင်း များမှာ ဧကရာဇ် တစ်ပါး ဖြစ်လာရန် အခွင့်အရေး အလွန် နည်းပါးလှပြီး မျှော်လင့်ချက် မမြင်ရတော့ချေ။

ယခု အသုတ်တွင်မူ နေရာလွတ် တစ်ခုသာ ကျန်ရှိတော့သည်။

ရွှမ်ယွမ် ဧကရာဇ်မင်းက ကျိုးဟန်၏ ကြီးမားလှသော ကြီးထွားနိုင်စွမ်းကို မြင်တွေ့လိုက်ရသဖြင့် အများကြီး မစဉ်းစားတော့ဘဲ ဤနေရာလွတ်ကို ကျိုးဟန်အတွက် တိုက်ရိုက် ချန်ထားပေးခဲ့ခြင်း ဖြစ်သည်။ မည်သို့ပင်ဆိုစေ ကျိုးဟန်၏ ကိုယ်ပေါ်ရှိ မုန်တိုင်း နဂါးဘုရင် ၏ စွမ်းအားများကို သူ ခံစား သိရှိနေရသဖြင့် အကယ်၍ ကောင်းကင် ဆန့်ကျင် နဂါး ဧကရာဇ် ကသာ ကြားဖြတ် လုယူသွားပါက သူ အလွန် နစ်နာသွားမည် ဖြစ်လေသည်။

[စနစ် အသိပေးချက် - ရွှမ်ယွမ် ဧကရာဇ်မင်းမှ သင့်အား တပည့်အဖြစ် လက်ခံရန် တောင်းဆိုလာပါသည်... လက်ခံမည်လား]

"ကျွန်တော် လက်ခံပါတယ်"

ကျိုးဟန်က ခေါင်းညိတ် သဘောတူလိုက်သည်။

ဤမျှ များပြားလှသော လျှို့ဝှက်ချက်များကို ကြားသိခဲ့ရပြီးပြီ ဖြစ်ရာ မိမိ ဆန္ဒမရှိပါဟု ကျိုးဟန် ငြင်းဆန်နိုင်ပါဦးမည်လား။

ထို့အပြင် ရွှမ်ယွမ် ဧကရာဇ်မင်း၏ တပည့်ရင်း တစ်ယောက် ဖြစ်လာခြင်းမှာ အရှုံးပေါ်မည့် ကိစ္စတော့ မဟုတ်ချေ။

မည်သို့ပင်ဆိုစေ ဤ အထူး မစ်ရှင် ကို ပြီးမြောက်အောင် လုပ်ဆောင်ရန် အတွက် မိမိဘက်မှ ပိုမို အစွမ်းထက်သော ကြီးထွားနိုင်စွမ်း နှင့် စွမ်းအားများကို ထုတ်ဖော်ပြသနိုင်သရွေ့ ရွှမ်ယွမ် ဧကရာဇ်မင်းက သေချာပေါက် အစွမ်းကုန် ကူညီ ထောက်ပံ့ပေးပြီး အရင်းအမြစ်များကို မိမိထံသို့ ပုံအောပေးမည်သာ ဖြစ်သည်။

ဤကဲ့သို့သော အစွမ်းထက်သည့် အကူအညီများ ရှိလာပါက သူ၏ စွမ်းရည်များမှာ ပိုမို လျင်မြန်စွာ တက်လှမ်းလာမည်ဟု ကျိုးဟန် ယုံကြည်နေသည်။

"အရမ်းကောင်းတယ်... ဆရာ မင်းကို ဧကရာဇ် ကျမ်း သင်ပေးမယ်”

အခန်း ၃၅၄ ဧကရာဇ် ရွှေစာလုံး

ကျိုးဟန် ကြားလိုက်ရချိန်တွင် သူ၏မျက်လုံးများ အရောင်လက်သွားသည်။ ဤ ဧကရာဇ် ကျမ်း ဟူသော အမည်နာမမှာ ကြားလိုက်ရုံဖြင့်ပင် အလွန် ခန့်ညားထည်ဝါလှပြီး မည်သည့် အဆင့်အတန်း အရည်အသွေးမျိုး ဖြစ်မည်ကိုမူ မသိရသေးချေ။

ထိုသို့ တွေးတောနေစဉ်မှာပင် အသိပေးချက် အသံက သူ၏ ခေါင်းထဲတွင် ထွက်ပေါ်လာသည်။

[စနစ် အသိပေးချက် - ရွှမ်ယွမ် ဧကရာဇ်မင်း မှ သင့်အား ဧကရာဇ် ကျမ်း ကို သင်ကြား ပို့ချပေးနေပါသည်... လက်ခံမည်လား]

"လက်ခံတယ်"

ကျိုးဟန် က အလျင်အမြန်ပင် သဘောတူလိုက်သည်။

စကားသံ ဆုံးသွားသည်နှင့် တစ်ပြိုင်နက် ပြိုင်ဘက်ကင်းလောက်အောင် ခမ်းနား ကြီးကျယ်လှသော စွမ်းအားတစ်ရပ်က ကျိုးဟန် ၏ ခန္ဓာကိုယ် အတွင်းသို့ ရိုက်ခတ် ဝင်ရောက်လာသည်။

"ရှီး"

ပြင်းထန်လွန်းလှသော နာကျင်မှုကြောင့် သူသည် လေအေးတစ်ချက်ကို ပြင်းပြင်းထန်ထန် ရှူသွင်းလိုက်မိသည်။ ဤစွမ်းအားမှာ အဆုံးအစမဲ့သော သမုဒ္ဒရာကြီးအလား အလွန် ကြီးမား ကျယ်ပြန့်လှပေသည်။ ကျိုးဟန် ကဲ့သို့ အလွန် အစွမ်းထက်သော ခန္ဓာကိုယ်မျိုး ပိုင်ဆိုင်ထားသူ ပင်လျှင် ဤစွမ်းအားကို ခုခံနိုင်ရန် အလွန် ခက်ခဲလှပေသည်။

မျက်စိတစ်မှိတ် အတွင်းမှာပင် သူ၏ ခန္ဓာကိုယ်မှာ တစ်လက်မချင်းစီ ကွဲအက်လာပြီး အဆက်မပြတ် ပျက်စီး ယိုယွင်းလာသဖြင့် ကျိုးဟန် ၏ ရင်ထဲတွင် အလွန် ထိတ်လန့် တုန်လှုပ်သွားရသည်။

ကံကောင်းထောက်မစွာဖြင့် ရွှမ်ယွမ် ဧကရာဇ်မင်း က သူ၏ ကြီးမားလှသော လက်ကြီးကို ဝှေ့ယမ်းလိုက်ပြီး အခြား ထူးဆန်းသော စွမ်းအင် တစ်ရပ်ကို ကျိုးဟန် ၏ ခန္ဓာကိုယ် အတွင်းသို့ ရိုက်သွင်းပေးလိုက်သည်။

ကျိုးဟန် ၏ ခန္ဓာကိုယ် လုံးဝ ပျက်စီးတော့မည့် အချိန်တွင် အလိုအလျောက် ပြန်လည် ကုစားခြင်း စတင်သွားသည်။

ဤသို့ဖြင့် ခန္ဓာကိုယ်မှာ အဆက်မပြတ် ပျက်စီးသွားလိုက် ပြန်လည် ကောင်းမွန်လာလိုက်ဖြင့် သူ၏ ခန္ဓာကိုယ်ကို ရူးသွပ် ကြမ်းတမ်းစွာ သွေးထွက်သံယို လေ့ကျင့်ပေးနေသကဲ့သို့ ဖြစ်နေသည်။

အစပိုင်းတွင် ကျိုးဟန် မှာ အနည်းငယ် နာကျင်မှုကို ခံစားခဲ့ရသော်ငြားလည်း မကြာမီတွင် ဤခံစားချက်ကို အလွန် သာယာ ကြည်နူးလာသည်။ သူ၏ ခန္ဓာကိုယ် အတွင်းမှ ထူးဆန်းသော ပြောင်းလဲမှုများကို သူ အလွန် ရှင်းလင်းစွာ ခံစား သိရှိနေရပေသည်။

၎င်းမှာ သက်ရှိ တစ်ခု၏ အဆင့်အတန်း မြင့်မားလာခြင်း ပင်ဖြစ်သည်။ သူသည် ပိုမို မြင့်မားသော သက်ရှိ အဆင့်အတန်း တစ်ခုသို့ ခြေလှမ်း ဝင်ရောက်တော့မည် ဖြစ်သည်။

[စနစ် အသိပေးချက် - ဂုဏ်ယူပါသည်... ဧကရာဇ် ကျမ်း ၏ ပထမတွဲကို အောင်မြင်စွာ ကျင့်ကြံနိုင်ခဲ့ပါပြီ... အခြေခံစွမ်းရည်များ အားလုံး ဖြစ်ပေါ်လာပြီ ဖြစ်သဖြင့် ကျေးဇူးပြု၍ အချက်အလက်များကို စစ်ဆေးကြည့်ရှုပါ]

'ဧကရာဇ် ကျမ်း ကို အဆင့်မြှင့်တင်လို့ ရနိုင်မလား'

ကျိုးဟန် က သူ၏ ရင်ထဲတွင် မေးမြန်းလိုက်သည်။

[သေချာပေါက် ရနိုင်ပါသည်... သို့သော် ကနဦး ဆယ်ကြိမ်မြှင့် တင်ခြင်း မှလွဲ၍ ဧကရာဇ် အဆင့် ကျင့်စဉ် တစ်ခု ဖြစ်သည့်အတွက် အဆင့်မြှင့်တင်ရာတွင် ကုန်ကျမည့် အထွတ်အထိပ် အဆင့်မြှင့်တင်ရေး အမှတ်များမှာ ပိုမို များပြားလာမည် ဖြစ်ပါသည်]

"ဘာ... ဧကရာဇ် အဆင့် ကျင့်စဉ် ဟုတ်လား"

ကျိုးဟန် ၏ မျက်နှာထားမှာ အံ့အားသင့်သွားရသည်။ မူလက သူ၏ ရင်ထဲတွင် ဤသို့ မှန်းဆထားချက်များ ရှိခဲ့သော်လည်း စနစ်မှ အတည်ပြုပေးလိုက်သောအခါ သူ၏ စိတ်နှလုံးမှာ ပို၍ပင် လှုပ်ရှားလာခဲ့သည်။

ဧကရာဇ် အဆင့် ဆိုသည်မှာ မည်သို့သော အဓိပ္ပာယ်မျိုးနည်း... ၎င်းမှာ တကယ်ကို အလွန် အစွမ်းထက်လှပေသည်။ မိမိ၏ စွမ်းအားများ ဤမျှ လျင်မြန်စွာ တက်လှမ်းလာခြင်းမှာ အံ့သြစရာ မဟုတ်တော့ချေ။

ဤနေရာသို့ တွေးမိသောအခါ ကျိုးဟန် သည် အလျင်စလိုပင် အဆင့်မြှင့်တင်ခြင်းကို အသုံးပြုလိုက်သည်။

[စနစ် အသိပေးချက် - သင်သည် မွေးရာပါ စွမ်းရည် ဖြစ်သော အဆုံးမဲ့ အဆင့်မြှင့်တင်ခြင်း ကို အသုံးပြုလိုက်ပါသည်... ဧကရာဇ် အဆင့် ကျင့်စဉ် ဧကရာဇ် ကျမ်း ကို (၁၀ ကြိမ်မြှင့်) ခြင်း အောင်မြင်သွားပါပြီ... အချက်အလက် အသစ်များကို အချက်အလက် မျက်နှာပြင်ပေါ်တွင် ဖော်ပြထားပြီ ဖြစ်သဖြင့် ကျေးဇူးပြု၍ စစ်ဆေးကြည့်ရှုပါ]

အဖြူရောင် အလင်းတန်းများ အဆက်မပြတ် လှုပ်ရှားသွားသည်။ ရွှမ်ယွမ် ဧကရာဇ်မင်း ၏ မျက်လုံးများ စူးရှသွားပြီး မိမိ၏ ဤတပည့်မှာ တကယ်ပင် လက်စွမ်းလက်စ ရှိနေကြောင်း တွေးတောလိုက်သည်။

ကျိုးဟန် သည် ကျွမ်းကျင်မှုစွမ်းရည် မျက်နှာပြင်ကို ဖွင့်၍ စစ်ဆေးကြည့်လိုက်သည်။

[ဧကရာဇ် ကျမ်း (၁၀ ကြိမ်မြှင့်)]

[အရည်အသွေး - ဧကရာဇ် အဆင့်]

[အမျိုးအစား - အကျိုးသက်ရောက်မှု တိုးမြှင့်ရေး ကျင့်စဉ်]

[ဖော်ပြချက် - ရွှမ်ယွမ် ဧကရာဇ်မင်း ကိုယ်တိုင် ဖန်တီးထားသော ကျင့်စဉ် ဖြစ်ပြီး ၎င်းအတွင်း၌ တိုက်ပွဲ အတွေ့အကြုံများ... နယ်ပယ် အဆင့်အတန်း နားလည် သဘောပေါက်မှုများ... ကောင်းကင်နှင့် မြေကြီးကို ကြည့်ရှု ရှုမှတ်ခြင်း များ စသည်ဖြင့် မှတ်တမ်းတင် ထားပါသည်... လက်ရှိတွင် ပထမတွဲ ဖြစ်သော ခန္ဓာကိုယ် သန့်စင်ခြင်း အခြေခံ အခန်း ဖြစ်ပြီး ခန္ဓာကိုယ် အတွင်းရှိ စွမ်းအားများ... တိုက်ခိုက်ရေး နည်းစနစ်များ နှင့် သက်ရှိ အဆင့်အတန်း မြင့်မားလာခြင်း တို့အပေါ် ကြီးမားသော အကျိုးကျေးဇူးများ ရှိပါသည်]

[အကျိုးသက်ရောက်မှု - ဤကျင့်စဉ်ကို အောင်မြင်စွာ ကျင့်ကြံပြီးနောက် သွေးပမာဏ ၁၀ ဆ တိုးလာမည် ဖြစ်ပြီး တိုက်ခိုက်မှု စွမ်းအား ၅ ဆ နှင့် ကာကွယ်မှု စွမ်းအား ၅ ဆ တိုးလာမည် ဖြစ်ပါသည်... ဧကရာဇ် အဆင့် နယ်ပယ် နှင့် ပတ်သက်၍ ပိုမို ရှင်းလင်းသော သိမြင် နားလည်မှုကို ရရှိမည် ဖြစ်ပြီး ဧကရာဇ် အဆင့်သို့ ချိုးဖောက် ဝင်ရောက်ရာတွင် ကြီးမားသော အထောက်အကူကို ရရှိစေမည် ဖြစ်ပါသည်]

လှိုင်းလုံးကြီးများအလား ရိုက်ခတ်လာသော စွမ်းအားများ ထွက်ပေါ်လာပြီး အဆင့်မြှင့်တင်ပြီးနောက် အကျိုးသက်ရောက်မှုများ လုံးဝ ပေါ်လွင်လာခဲ့သည်။ ကျိုးဟန် ၏ မျက်နှာပေါ်တွင် ဝမ်းသာသော အရိပ်အယောင်များ ထွက်ပေါ်လာပြီး ဧကရာဇ် ကျမ်း ၏ အကျိုးသက်ရောက်မှုကို မြင်တွေ့လိုက်ရသဖြင့် အလွန် ကျေနပ် အားရနေသည်။

ပထမဆုံး အနေဖြင့် သွေးပမာဏ ၁၀ ဆ တိုးလာပြီး တိုက်ခိုက်မှု စွမ်းအား နှင့် ကာကွယ်မှု စွမ်းအား များမှာ ၅ ဆစီ တိုးလာခဲ့သည်။ ယခုအခါ အခြေခံစွမ်းရည်များ အားလုံး သန်းတစ်ရာ အထိ ရောက်ရှိတော့မည်ဟု ကျိုးဟန် ခံစားလိုက်ရသည်။

သေချာပေါက် အခြေခံစွမ်းရည်များ တိုးတက်လာခြင်းမှာ အလွန် အစွမ်းထက်လှပေသည်။ သို့သော် အရေးကြီးဆုံးမှာ ဧကရာဇ် အဆင့်အတန်း အပေါ် နားလည် သဘောပေါက်မှု ပင်ဖြစ်သည်။ ဤသည်မှာ အရေးကြီးဆုံး အချက် ဖြစ်ပေသည်။

မည်သို့ပင်ဆိုစေ ကျိုးဟန် လက်ရှိ ရောက်ရှိနေသော အဆင့်အတန်း အရ အစောကြီး မဟုတ်လျှင်တောင်မှ နောက်ပိုင်းတွင် ဧကရာဇ် အဆင့်သို့ သေချာပေါက် ခြေလှမ်း ဝင်ရောက်ရမည် ဖြစ်သည်။

ယခုအခါ အလွန် ကောင်းမွန်သွားခဲ့ပြီ ဖြစ်သည်။ နားလည် သဘောပေါက်မှု အချို့ ပိုမို ရရှိလာပါက အလွန် အသုံးဝင်မည် ဖြစ်ပြီး အခြေခံ အုတ်မြစ် တစ်ခု ရှိသွားသကဲ့သို့ ဖြစ်ကာ နားလည်ရန် ပိုမို လွယ်ကူသွားမည် ဖြစ်သည်။

ကျိုးဟန် ၏ ခေါင်းထဲတွင် နက်နဲ ခန့်မှန်းရခက်သော ရွှေရောင် စာလုံး ကိုးလုံး ထွက်ပေါ်လာသည်။ စာလုံး တစ်လုံးချင်းစီတိုင်းတွင် ထူးဆန်းပြီး ထိတ်လန့် အံ့အားသင့်ဖွယ် ကောင်းလှသော စွမ်းအားများ တောက်ပနေပြီး မျက်နှာပြင်ပေါ်တွင် အဆက်မပြတ် လွင့်မျော လှည့်ပတ်ကာ ပြင်းထန်သော လှုပ်ခတ်မှုများကို ထုတ်လွှတ်နေသည်။

'ဒီ ရွှေရောင် စာလုံး တွေက ဧကရာဇ် အဆင့် နယ်ပယ် နဲ့ သက်ဆိုင်နေတာလား'

ကျိုးဟန် အနည်းငယ် တုန်လှုပ်သွားပြီး ခပ်တိုးတိုး ရေရွတ်လိုက်သည်။

သူ၏ ပထမဆုံး တုံ့ပြန်မှုမှာ ဧကရာဇ် အဆင့် နှင့် သက်ဆိုင်နေကြောင်း သိရှိလိုက်ခြင်း ပင်ဖြစ်သည်။ မည်သို့ပင်ဆိုစေ ဤအရာများမှာ ယခင်က မရှိခဲ့ဘဲ ဧကရာဇ် ကျမ်း ကို သင်ယူပြီးနောက် မှသာ ထွက်ပေါ်လာခြင်း မဟုတ်ပါလား။

[စနစ် အသိပေးချက် - သင် မှန်းဆထားသည်မှာ မှန်ကန်ပါသည်... ဤအရာများမှာ ဧကရာဇ် ရွှေစာလုံး များ ဖြစ်ပြီး အဆုံးအစမဲ့သော စွမ်းအားများကို ထောက်ပံ့ပေးနိုင်ပါသည်... သို့သော် ကြိုတင် သတ်မှတ်ချက် အနေဖြင့် သင်သည် ၎င်းတို့ကို လှုံ့ဆော် အသုံးပြုနိုင်ရန် လိုအပ်ပါသည်]

"ဧကရာဇ် ရွှေစာလုံး"

"ဧကရာဇ် အဆင့်ကို ခြေလှမ်း ဝင်ရောက်ဖို့က ဒီအရာတွေနဲ့ ဆက်စပ်မှု ရှိနေလို့လား"

ကျိုးဟန် ထပ်မံ၍ မေးမြန်းလိုက်သည်။ သူသည် ဧကရာဇ် အဆင့် နှင့် ပတ်သက်၍ လုံလောက်သော သိမြင် နားလည်မှု မရှိသေးပေ။

သို့သော် ယခုကဲ့သို့သော အခွင့်အရေးမျိုး ရှိနေပြီ ဖြစ်ရာ သူ သေချာပေါက် လက်လွှတ်မည် မဟုတ်ချေ။ ပိုမို သိရှိ နားလည်လေလေ အကျိုးကျေးဇူးများမှာ ပိုမို ကြီးမားလေလေ ပင်ဖြစ်သည်။

[လုံလောက်သော ရွှေစာလုံး အရေအတွက် ကို လွှမ်းမိုး ထိန်းချုပ်ထားနိုင်ခြင်းမှာ ဧကရာဇ် အဆင့် ဖြစ်လာခြင်း၏ သင်္ကေတ ပင်ဖြစ်ပါသည်... လွှမ်းမိုး ထိန်းချုပ်ထားသော အရေအတွက် များလေလေ စွမ်းအားမှာ ပိုမို အစွမ်းထက်လေလေ ဖြစ်ပါသည်]

[သင် ဘာမေးချင်သလဲ ဆိုတာကို သိပါသည်... ဧကရာဇ် တစ်ပါး၏ စံသတ်မှတ်ချက် မှာ ရွှေစာလုံး အရေအတွက် ကိုးဆယ့်ကိုး လုံး ထက် မနည်းစေရပါ]

ကျိုးဟန် ထပ်မံ၍ မေးမြန်းရန် ပြင်ဆင်နေသည်ကို မြင်တွေ့လိုက်ရသဖြင့် စနစ် က လူသားဆန်စွာဖြင့် ဖြေကြားပေးလိုက်သည်။

"ကိုးဆယ့်ကိုး လုံး တောင်လား"

"တကယ်ကို အစွမ်းထက်တာပဲ"

ကျိုးဟန် က သက်ပြင်းချကာ ပြောလိုက်သည်။

သူ၏ ခေါင်းထဲတွင် ဧကရာဇ် ရွှေစာလုံး ကိုးလုံး ရှိနေခြင်း ဖြင့်ပင် ထိုအထဲမှ ခမ်းနား ကြီးကျယ်လှသော စွမ်းအားများကို သူ ခံစား သိရှိနေရပေသည်။ အကယ်၍ ကိုးဆယ့်ကိုး လုံး သာ ဆိုပါက မည်မျှတိုင်အောင် အစွမ်းထက်မည်နည်း။

မူလက ကျိုးဟန် ၏ စွမ်းအားများမှာ မကြာသေးမီက လျင်မြန်စွာ တက်လှမ်းလာခဲ့သဖြင့် သူ၏ စိတ်ထားမှာ အနည်းငယ် မောက်မာနေခဲ့သည်။ သို့သော် ဤအရာများ အားလုံးကို ခံစား သိရှိလိုက်ရပြီးနောက် သူ ချက်ချင်းပင် ပြန်လည် တည်ငြိမ်သွားခဲ့သည်။

သူသည် ဧကရာဇ် အဆင့် နှင့် အလွန် အလှမ်းဝေးနေသေးသည်။ ထို့ကြောင့် ဆက်လက်၍ ကြိုးစား အားထုတ်ရန် လိုအပ်ပေသည်။ မိမိကိုယ်ကိုယ် ကျေနပ်နေသော စိတ်ထားမှာ မိမိကိုယ်ကို စောစီးစွာ သေတွင်းသို့ ပို့ဆောင်ရုံသာ ရှိမည် ဖြစ်သည်။

"စနစ် ရှိနေတာကြောင့် ကျင့်စဉ်တွေ သင်ပေးရတာ လွယ်ကူသွားတာပေါ့"

ကျိုးဟန် အောင်မြင်စွာ လက်ခံ ရရှိသွားသည်ကို မြင်တွေ့လိုက်ရသဖြင့် ရွှမ်ယွမ် ဧကရာဇ်မင်း က သူ၏ ရှည်လျားသော မုတ်ဆိတ်မွေးများကို သပ်ကာ ပြုံး၍ ပြောလိုက်သည်။

"ဘယ်လိုလဲ... ဧကရာဇ် နဲ့ သက်ဆိုင်တဲ့ အရာတွေ အကုန်လုံးကို စနစ် က မင်းကို ပြောပြပြီးပြီ မဟုတ်လား"

"ဆရာ့ရဲ့ သင်ကြား ပို့ချပေးမှု အတွက် ကျေးဇူးတင်ပါတယ်... ဧကရာဇ် အဆင့် နဲ့ ပတ်သက်ပြီး ပိုပြီး နက်နက်ရှိုင်းရှိုင်း သိရှိ နားလည်သွားပါပြီ... ဧကရာဇ် အဆင့်ကို ချိုးဖောက် ဝင်ရောက်ဖို့ ကလည်း ပိုပြီး လွယ်ကူသွားမှာပါ"

ကျိုးဟန် က ကျေးဇူးတင်စွာဖြင့် ပြောလိုက်သည်။

ရွှမ်ယွမ် ဧကရာဇ်မင်း က ဧကရာဇ် ကျမ်း ကို သင်ကြား ပို့ချပေးခြင်းမှာ ရည်ရွယ်ချက် တစ်ခု ရှိနေခြင်း ဖြစ်သော်ငြားလည်း...

အဘယ်ကြောင့်ဆိုသော် ၎င်းအတွင်း၌ ဧကရာဇ် ရွှေစာလုံး များ ရှိနေခြင်းကြောင့် ကျိုးဟန် အနေဖြင့် ဧကရာဇ် အဆင့်သို့ စောစီးစွာ တက်လှမ်းနိုင်ရန် ကူညီပေးနိုင်မည် ဖြစ်သည်။ ထို့ကြောင့် ရွှမ်ယွမ် ဧကရာဇ်မင်း အနေဖြင့် မိမိ၏ အထူး မစ်ရှင် ကို ပြီးမြောက်အောင် လုပ်ဆောင်ရန် အတွက် တွန့်တိုခြင်း မရှိဘဲ သင်ကြား ပြသပေးခဲ့ခြင်း ပင်ဖြစ်သည်။

သို့သော် တစ်ခုနှင့် တစ်ခု မတူညီချေ။ ကျိုးဟန် အနေဖြင့် ၎င်းထဲမှ အကျိုးကျေးဇူးများကို အမှန်တကယ် ရရှိခဲ့သဖြင့် ကျေးဇူးတင်စကား ဆိုခြင်းမှာ သဘာဝပင် ဖြစ်သည်။

"အရမ်း ကောင်းတယ်... ကြည့်ရတာ မင်း ဧကရာဇ် ရွှေစာလုံး တွေကို ရသွားပြီထင်တယ်... ဧကရာဇ် အဆင့် တက်လှမ်းတာနဲ့ သက်ဆိုင်တဲ့ လျှို့ဝှက်ချက် တွေကို သိသွားပြီပေါ့"

"ဧကရာဇ် တစ်ပါး ဖြစ်လာဖို့ ဆိုတဲ့ လမ်းခရီးက ရှည်လျားပြီးတော့ အလွန် ခက်ခဲကြမ်းတမ်းတယ်... ငါ ပေးနိုင်တဲ့ အကူအညီ ကလည်း အကန့်အသတ် ရှိတယ်လေ... ကျန်တာတွေက မင်း ကိုယ်တိုင် အပေါ်မှာပဲ မူတည်တော့တယ်"

ရွှမ်ယွမ် ဧကရာဇ်မင်း က လေးနက်သော အသံဖြင့် ပြောလိုက်သည်။

ကျိုးဟန် ၏ ကြီးထွားနိုင်စွမ်းကို သူ သဘောကျသော်လည်း ၎င်းမှာ သဘောကျခြင်း အဆင့်တွင်သာ ရှိသေးသည်။ ဤအဆုံးအစမဲ့သော အချိန်ကာလများ အတွင်း သူသည် ကျိုးဟန် ကဲ့သို့သော ထူးချွန်သည့် ပါရမီရှင် အချို့နှင့် ကြုံတွေ့ခဲ့ဖူးသည်။

သို့သော် ချွင်းချက်မရှိ အားလုံးမှာ သေဆုံးသွားခြင်း (သို့မဟုတ်) ဧကရာဇ် အဆင့်သို့ တက်လှမ်းရန် ကျရှုံးသွားခြင်း များသာ ဖြစ်ခဲ့ကြသည်။ အဘယ်ကြောင့်ဆိုသော် ဤလမ်းခရီးမှာ အလွန် ခက်ခဲလွန်းသောကြောင့် ပင်ဖြစ်သည်။ အစွမ်းထက်သော စွမ်းအားများ လိုအပ်ရုံသာမက ကြီးမားလှသော ကံတရားလည်း လိုအပ်ပေသည်။