အခန်း (၃၅၉-၃၆၀)

အခန်း ၃၅၉ အထွတ်အထိပ် အဆင့် ဝိညာဉ် တံခွန်

"ဒီတစ်ခါတော့ သေချာသွားပြီ... နန်းတော်သခင် ဒီရတနာကို ထုတ်သုံးတာ မမြင်ရတာ တော်တော်ကြာပြီပဲ"

"လခွမ်း... ဒီကောင်လေးက ငါတို့ခြောက်ယောက်လုံးကို လှည့်စားသွားတာပဲ... နန်းတော်သခင်... သူ့ကို ရက်ရက်စက်စက် သတ်ပစ်ရမယ်... အလွယ်တကူ အသေမခံနဲ့နော်"

တစ္ဆေနတ်ဘုရား နန်းတော် မှ အကြီးအကဲများ၏ မျက်နှာပေါ်တွင် နောက်ဆုံးတော့ အပြုံးများ ထွက်ပေါ်လာပြီး တစ်ယောက်ချင်းစီက ရက်စက်ကြမ်းကြုတ်စွာ ပြောလိုက်ကြသည်။

ကွေ့မု က စကားများများစားစား မပြောတော့ပေ။

သူ၏ လက်ထဲတွင် ဧရာမ ရွှေရောင် တူကြီးတစ်လက် ထွက်ပေါ်လာပြီး ပြင်းထန် တောက်ပသော အလင်းတန်းများ ထွက်ပေါ်နေသည်။

ရွှေရောင် အလင်းတန်းများ အကြားတွင် သွေးရောင် အရှိန်အဝါများ ရောယှက်နေပြီး လေဟာနယ်ထဲတွင် လွင့်မျောနေသော သဘာဝ စွမ်းအင်များမှာ ရွှေရောင် တူကြီးထံသို့ အဆက်မပြတ် စုပ်ယူခံနေရသည်။

မူလကတည်းက ကြီးမားလှသော ရွှေရောင် တူကြီးမှာ ချက်ချင်းပင် မီတာတစ်ရာကျော် အရှည်အထိ ကြီးထွားလာပြီး ကောင်းကင်နှင့် နေမင်းကိုပင် ဖုံးကွယ်သွားကာ အဆုံးအစမဲ့သော ကြောက်မက်ဖွယ် ဖိအားကြီးကို ထုတ်လွှတ်နေလေသည်။

ခမ်းနား ကြီးကျယ်လှသော စွမ်းအားများက အဆက်မပြတ် ရိုက်ခတ်ဆင်းသက်လာပြီး မှေးမှိန်သော ရွှေရောင် အကာအကွယ် အစီအရင် တစ်ခု ဖြစ်ပေါ်လာကာ ထိုနေရာရှိ လူအများကို အလုံးစုံ လွှမ်းခြုံသွားလေသည်။

"သေစမ်း... ငါ့ရဲ့ သွေးပမာဏတွေ ဖြည်းဖြည်းချင်း လျော့ကျနေတယ်... ဒီရွှေရောင် အစီအရင်က ပြဿနာ ရှိနေတာပဲ"

"တောက်... ဒါက ဘယ်လို အရည်အသွေးမျိုး ရှိတဲ့ မှော်လက်နက်လဲ... ဘာလို့ ဒီလောက်တောင် အစွမ်းထက်တဲ့ စွမ်းအားတွေ ရှိနေရတာလဲ"

"ငါတို့ရဲ့ သွေးပမာဏတွေက ဒီမှော်လက်နက်ရဲ့ စွမ်းအင်တွေ ဖြစ်သွားတာလား... လခွမ်း... ဒီအတိုင်း ဆက်သွားရင် စုပ်ယူခံရပြီး သေတော့မှာပဲ"

ထိုနေရာရှိ ကစားသမားများမှာ တစ်ခုခု မှားယွင်းနေကြောင်း ချက်ချင်းပင် ခံစားလိုက်ရသည်။

သူတို့၏ သွေးပမာဏများမှာ ဖြည်းညှင်းစွာ ယိုစိမ့်ထွက်သွားပြီး ရွှေရောင် တူကြီး ထံသို့ စွမ်းအင်များအဖြစ် အားဖြည့်ပေးနေသဖြင့် လေထဲရှိ ရွှေရောင် တူကြီးမှာ အရှိန်အဟုန်ဖြင့် ဆက်လက် ကြီးထွားနေကာ အရှိန်အဝါ စွမ်းအားများမှာလည်း ယခင်ကထက် အဆပေါင်းများစွာ ပိုမို ကြောက်မက်ဖွယ် ကောင်းလာလေသည်။

"ဟားဟားဟား... ငါ့ရဲ့ ကောင်းကင်ခွဲ ရွှေရောင်တူကြီး ကို မြင်ပြီလား"

"ဒီလို အထွတ်အထိပ် အဆင့် မှော်လက်နက် အောက်မှာ သေရတာ မင်းအတွက် ဂုဏ်ယူစရာပဲ"

ကွေ့မု ၏ မျက်နှာပေါ်တွင် ယုံကြည်မှု အပြည့်ရှိသော အပြုံးများ ထွက်ပေါ်လာသည်။

ကျိုးဟန် ၏ စွမ်းအားမှာ တကယ်ပင် လက်စွမ်းလက်စ ရှိကြောင်းကို မြင်တွေ့လိုက်ရပြီးနောက် မမျှော်လင့်ထားသော အမှားအယွင်းများ မဖြစ်ပေါ်စေရန် ကွေ့မု သည် သူ၏ အစွမ်းထက်ဆုံး ဖဲချပ်ကို တိုက်ရိုက် အသုံးပြုလိုက်ပြီး တစ်ချက်တည်းဖြင့် သေချာပေါက် သတ်ဖြတ်နိုင်ရန် ရည်ရွယ်ထားလေသည်။

"အင်း... မြင်တယ်လေ... မြန်မြန် လုပ်ပါ... ငါ စောင့်နေတယ်"

ကျိုးဟန် ၏ မျက်နှာပေါ်တွင် စိတ်လှုပ်ရှား ဝမ်းသာသော အပြုံးများ ထွက်ပေါ်လာပြီး အလျင်စလို ပြောလိုက်သည်။

အလွန် အစွမ်းထက်သော အရှိန်အဝါ ကို ကြည့်ရင်း ဤတိုက်ခိုက်မှုကြောင့် ဖြစ်ပေါ်လာမည့် ထိခိုက်မှုမှာ သန်းတစ်ထောင် သေချာပေါက် ကျော်လွန်မည်ဟု သူ ခန့်မှန်းလိုက်မိသည်။

အကယ်၍ ဤတိုက်ခိုက်မှုကိုသာ အောင်မြင်စွာ ကာကွယ်နိုင်ပါက တိုးလာမည့် သွေးပမာဏ မှာ အလွန် များပြားလာမည် ဖြစ်လေသည်။

"ကောင်းပြီလေ... သေချင်စိတ် အရမ်းစောနေတယ် ဆိုမှတော့ မင်းဆန္ဒကို ဖြည့်ဆည်းပေးရတာပေါ့"

"ကောင်းကင်ခွဲ တူချက်... သွားသေလိုက်"

ကွေ့မု သည် ကျိုးဟန် ၏ မျက်နှာပေါ်တွင် တုန်လှုပ်ခြင်း သို့မဟုတ် ကြောက်ရွံ့ခြင်း အရိပ်အယောင်များကို မမြင်တွေ့ရသဖြင့် အလွန် မကျေမနပ် ဖြစ်သွားသည်။

သူက ဒေါသတကြီး ဟစ်အော်လိုက်ပြီး အစွမ်းထက်သော စွမ်းအင်များ ပေါက်ကွဲထွက်ပေါ်လာကာ ကောင်းကင်ခွဲ ရွှေရောင်တူကြီး ကို ထိန်းချုပ်၍ ကျိုးဟန် ထံသို့ ပြင်းထန်စွာ ရိုက်ချလိုက်လေသည်။

"လွဲချော်"

[စနစ် အသိပေးချက် - သင်၏ ဘွဲ့နာမည် ဧကရာဇ်၏ ဟန်ပန် မှ ကာကွယ်ခြင်း အကျိုးသက်ရောက်မှုကို အောင်မြင်စွာ ဖြစ်ပေါ်စေခဲ့ပါသည်... ထိခိုက်မှု၏ ၃ ရာခိုင်နှုန်းကို သွေးပမာဏ အဖြစ် ပြောင်းလဲပေးလိုက်ပြီး သင်၏ သွေးပမာဏ အမြဲတမ်း သန်းခြောက်ဆယ် တိုးလာပါသည်]

ကျိုးဟန် ၏ မျက်ခုံးများ ပင့်တက်သွားပြီး ဝမ်းသာသွားလေသည်။

ဤသိုင်းကွက် တစ်ကွက်တည်းကြောင့် ဖြစ်ပေါ်လာသော ထိခိုက်မှုမှာ သန်းနှစ်ထောင် အထိ ရောက်ရှိသွားသဖြင့် သွေးပမာဏ မှာလည်း ထပ်မံ၍ အရှိန်အဟုန်ဖြင့် တက်လှမ်းသွားကာ တကယ်ကို သာယာ ကြည်နူးဖွယ် ကောင်းလှပေသည်။

"ဘာ... အစ်ကိုကြီးက တကယ်ပဲ ဟက်ကာ သုံးထားတာလား"

လုပွန်ဝေ့ ၏ မျက်လုံးများ ပြူးကျယ်သွားပြီး တုန်လှုပ် အံ့အားသင့်မှုများ ပြည့်နှက်နေသည်။

သူတို့ကဲ့သို့သော ကစားသမားများ အနေဖြင့် ကျိုးဟန် ၏ ခေါင်းပေါ်မှ လွင့်ပျံ ထွက်ပေါ်လာသော ဧရာမ 'လွဲချော်' စာသားကြီးကို သဘာဝကျကျပင် မြင်တွေ့နိုင်ကြလေသည်။

သူတို့ အလွန် ကြောင်အမ်းသွားကြသည်။

ဤ ကောင်းကင်ခွဲ တူချက် က မည်မျှ ကြောက်မက်ဖွယ် ကောင်းကြောင်းကို မည်သူမဆို မြင်တွေ့နိုင်သော်လည်း ကျိုးဟန် က ဤမျှ အလွယ်တကူ ရှောင်တိမ်းသွားနိုင်ခြင်းမှာ တကယ်ကို ယုံနိုင်စရာ မရှိအောင် ဖြစ်နေလေသည်။

ကျိုးဟန် မည်မျှ အစွမ်းထက်ကြောင်းကို ဂိုဏ်းသားများ သိရှိထားကြသော်လည်း ယခုတစ်ကြိမ် ပြသလိုက်သော အစွမ်းထက်မှုမှာ သူတို့၏ ခန့်မှန်းချက်များကို ထပ်မံ၍ ကျော်လွန်သွားခဲ့ပြန်လေသည်။

"သေစမ်း... ဒါက တကယ်ကို မဖြစ်နိုင်တာထက်ကို ပိုပြီး မဖြစ်နိုင်လွန်းနေပြီ"

"ဒါကိုတောင် ရှောင်နိုင်သေးတယ် ဆိုတော့ အရမ်း လိမ်ညာလွန်းနေပြီလေ"

"ဘုရားရေ... ငါ တကယ်ပဲ အမြင်မှားနေတာ မဟုတ်ဘူးမလား"

ထိုနေရာရှိ လူအများမှာ ဖော်ပြ၍ မရနိုင်လောက်အောင် တုန်လှုပ် အံ့အားသင့်နေကြပြီး မိမိတို့ မြင်တွေ့လိုက်ရသော အရာကို လုံးဝ မယုံကြည်နိုင်အောင် ဖြစ်နေကြသည်။

ဤသည်မှာ တကယ်ကို ပြိုင်ဘက်ကင်းလောက်အောင် အစွမ်းထက်လွန်းလှပေသည်။

"မင်း..."

ကွေ့မု ၏ မျက်လုံးများ ကျုံ့ဝင်သွားသည်။

အထိအခိုက်မရှိ အကောင်းပကတိ ဖြစ်နေသော ကျိုးဟန် ကို မြင်တွေ့လိုက်ရသောအခါ သူ၏ မျက်နှာကြွက်သားများ တုန်ရီသွားပြီး ရင်ထဲတွင် သံသယများ ပြည့်နှက်သွားလေသည်။

သို့သော် မကြာမီမှာပင် သူ၏ ရင်ထဲရှိ စိုးရိမ်ပူပန်မှုများကို သူကိုယ်တိုင် ပြန်လည် ပယ်ဖျက်လိုက်လေသည်။

"ငါ့ရဲ့ ကောင်းကင်ခွဲ တူချက် ကို အထိခံလိုက်ရတာတောင် နည်းနည်းလေးမှ တုံ့ပြန်မှု မရှိတာ လုံးဝ မဖြစ်နိုင်ဘူး"

"မင်း ဆက်ပြီး ဟန်ဆောင် တောင့်ခံနေလိုက်ဦးပေါ့"

ကွေ့မု သည် ရူးသွပ် ကြမ်းတမ်းသော တိုက်ခိုက်မှုများကို ဆက်လက် ပြုလုပ်လိုက်ပြန်သည်။

သူ၏ အဆက်မပြတ် တိုက်ခိုက်မှုများ အောက်တွင် ကျိုးဟန် မှာ မကြာမီမှာပင် တောင့်ခံနိုင်တော့မည် မဟုတ်ကြောင်း သူ ယုံကြည်နေလေသည်။

သို့သော် ရလဒ်အနေဖြင့် သူ မှားယွင်းနေကြောင်းကို သက်သေပြနေပြီး အလွန် လွန်ကဲစွာ မှားယွင်းနေခဲ့ခြင်း ပင်ဖြစ်သည်။

"လွဲချော်"

"လွဲချော်"

"လွဲချော်"

ဤကဲ့သို့သော စာသားများမှာ ကျိုးဟန် ၏ ခေါင်းပေါ်တွင် အဆက်မပြတ် ထွက်ပေါ်လာလေသည်။

"လခွမ်း... ရှောင်တိမ်းနိုင်စွမ်း က ဒီလောက်တောင် မြင့်မားနေတာလား... တကယ်ကို ပြိုင်ဘက်ကင်းပဲ"

"အရမ်းမိုက်တယ်ကွာ... ကျိုးဟန် က အထွတ်အထိပ် အဆင့်ကို ရောက်နေပြီပဲ... ငါတို့ မော့ကြည့်ရလောက်တဲ့ အမြင့်ဆုံး တည်ရှိမှုကြီး ဖြစ်နေပြီ"

"အရမ်း ကြမ်းတာပဲ... တကယ်ကို ယုံနိုင်စရာ မရှိဘူး"

ကစားသမားများမှာ သက်ပြင်းချကာ ပြောဆိုလိုက်ကြပြီး ကျိုးဟန် ၏ စွမ်းဆောင်ရည်များ အောက်တွင် လုံးဝ အညံ့ခံသွားကြလေသည်။

တရုတ် နိုင်ငံ တွင် ဤမျှ အစွမ်းထက်သော ထိပ်တန်း ကစားသမား တစ်ယောက် ရှိနေခြင်းကို သူတို့ အလွန် အားကျနေကြသည်။

မိမိတို့ နိုင်ငံမှ အစွမ်းထက်သူ များမှာမူ ကျိုးဟန် ၏ ညီငယ်များကိုပင် ယှဉ်နိုင်ပုံ မရချေ။

ဤသို့ နှိုင်းယှဉ်ကြည့်လိုက်သောအခါ တကယ်ကို ရင်နာစရာ ကောင်းလှပေသည်။

ဟန်ချင်ရွှယ်... ကက်သရင်း နှင့် မေအောက်ရွှယ် တို့ သုံးယောက်မှာ လေထဲတွင် ရှိနေသော ပြိုင်ဘက်ကင်း အစွမ်းထက်သည့် ကျိုးဟန် ကို ကြည့်ရင်း မျက်နှာပေါ်တွင် ဂုဏ်ယူ ဝင့်ကြွားသော အရိပ်အယောင်များ ထွက်ပေါ်နေကြသည်။

ဤသည်မှာ သူတို့ ချစ်မြတ်နိုးရသော အမျိုးသား ပင်ဖြစ်သည်။

ကျိုးဟန် ကဲ့သို့သော ပြိုင်ဘက်ကင်း အစွမ်းထက်သူ တစ်ယောက်၏ အချစ်ကို ရရှိခြင်းမှာ တကယ်ကို ဘိုးဘေးဘီဘင်များ ကောင်းချီးပေးခြင်း ပင်ဖြစ်သည်။

"တိုက်လေ... ဆက်တိုက်လေ"

"မရပ်နဲ့"

ကျိုးဟန် က အနည်းငယ် မကျေမနပ်ဖြင့် အလျင်စလို တိုက်တွန်းလိုက်သည်။

ရူးသွပ် ကြမ်းတမ်းသော ဗုံးကြဲ တိုက်ခိုက်မှု များကို ဖြတ်သန်းပြီးနောက် သူသည် သွေးပမာဏ သန်းငါးရာ ကို ရရှိခဲ့လေသည်။

ဤသို့ သာယာ ကြည်နူးစွာ ရယူနေစဉ် ရုတ်တရက် ရပ်တန့်သွားသဖြင့် သူ၏ စိတ်ခံစားချက်မှာ သေချာပေါက် အလွန် ဆိုးရွားသွားမည် ဖြစ်လေသည်။

"ဟူး..."

"ဟူး..."

ကွေ့မု မှာ အသက်ကို ပြင်းပြင်းရှူနေရပြီး ကျိုးဟန် ကို ကြည့်နေသော အကြည့်များထဲတွင် အဆုံးအစမဲ့သော ထိတ်လန့် ကြောက်ရွံ့မှုများ ပြည့်နှက်နေလေသည်။

ဤကောင်လေးမှာ ထူးဆန်းလွန်းတဲ့ကောင် တစ်ကောင်အလား သူ ပြုလုပ်လိုက်သော ထိခိုက်မှုများမှာ အနည်းငယ်မျှသာ အကျိုးသက်ရောက်မှု ရှိလေသည်။

ဤသည်မှာ ကွေ့မု အတွက် ဤကဲ့သို့ ထူးဆန်းသော အခြေအနေမျိုးကို ပထမဆုံး အကြိမ် ကြုံတွေ့ရခြင်း ပင်ဖြစ်သည်။

"မြန်မြန် ဆက်တိုက်လေ... ဒါမှမဟုတ်ရင်တော့ ဟဲဟဲ"

ကျိုးဟန် ၏ မျက်ဝန်းများထဲတွင် သေမင်း၏ ခြိမ်းခြောက်မှုများ ပြည့်နှက်နေလေသည်။

'ငါ တကယ်ကို ခွန်အား မရှိတော့ဘူး... ဒီလို ထူးဆန်းလွန်းတဲ့ကောင် တစ်ကောင်ကို သွားပြီး ရန်စမိလိမ့်မယ်လို့ မထင်ထားခဲ့ဘူး... အရမ်းကို ပေါ့ဆသွားခဲ့ပြီ'

ကျိုးဟန် သည် အကြိမ်အနည်းငယ် အတည်ပြု ကြည့်ရှုလိုက်ပြီးနောက် ကွေ့မု မှာ တကယ်ပင် ခွန်အား မရှိတော့ကြောင်း တွေ့ရှိလိုက်ရသည်။

ဤသို့ဆိုလျှင် သူ့ကို အသုံးချစရာ တန်ဖိုး သိပ်မရှိတော့ချေ။

လုံးဝ အသုံးမဝင်တော့သည်တော့ မဟုတ်ဘဲ ဝိညာဉ် တံခွန် ၏ အဓိက ဝိညာဉ် အဖြစ် သိမ်းပိုက်နိုင်သေးသည်။

မည်သို့ပင်ဆိုစေ ကြယ်သုံးပွင့် အထွတ်အထိပ် အဆင့် ရှိသော အစွမ်းထက်သူ တစ်ယောက် အနေဖြင့် အဓိက ဝိညာဉ် အဖြစ် ရောက်ရှိသွားပါက တိုက်ခိုက်ရေး စွမ်းအားမှာ ပိုမို မြင့်တက်လာမည် ဖြစ်လေသည်။

ဤနေရာသို့ တွေးမိသောအခါ ကျိုးဟန် သည် ဓားချီ စွမ်းအင် အနည်းငယ်ကို တိုက်ရိုက် ပစ်လွှတ်လိုက်လေသည်။

ကွေ့မု ၏ သွေးပမာဏ မှာ အလွန် ထူထဲနေသေးသဖြင့် တစ်ချက်တည်း သေဆုံးသွားမည်ကို စိုးရိမ်စရာ မလိုချေ။

အခြားသော အကြီးအကဲ များကိုမူ ဓားချီ စွမ်းအင် အနည်းငယ် လျှော့ချ၍ ပစ်လွှတ်လိုက်သည်။

အဓိကအားဖြင့် တစ်ချက်တည်း သေဆုံးသွားမည်ကို စိုးရိမ်သောကြောင့် ပင်ဖြစ်သည်။

သူတို့ကို ဒဏ်ရာ အပြင်းအထန် ရရှိသွားစေပြီးနောက် ကျိုးဟန် သည် ဝိညာဉ် တံခွန် ကို ထုတ်ယူကာ သူတို့ အားလုံးကို လွှမ်းခြုံ ဖမ်းဆီးလိုက်လေသည်။

[စနစ် အသိပေးချက် - ဂုဏ်ယူပါသည်... သင်၏ ဝိညာဉ် တံခွန် မှာ ကြယ်သုံးပွင့် အထွတ်အထိပ် အဆင့် တစ္ဆေနတ်ဘုရား နန်းတော်-ကွေ့မု ကို အောင်မြင်စွာ သိမ်းပိုက်နိုင်ခဲ့ပြီး သတ္တမမြောက် အဓိက ဝိညာဉ် အဖြစ် ရောက်ရှိသွားပါပြီ... သက်ဆိုင်ရာ ထူးခြားချက် လက္ခဏာများ ဖြစ်ပေါ်လာပြီ ဖြစ်သဖြင့် ကျေးဇူးပြု၍ စစ်ဆေးကြည့်ရှုပါ]

[စနစ် အသိပေးချက် - စိတ်မကောင်းပါဘူး... သင်၏ ဝိညာဉ် တံခွန် မှာ အဓိက ဝိညာဉ် ကို သိမ်းပိုက်သည့် လုပ်ငန်းစဉ် အတွင်း ကျရှုံးသွားပါသည်... ၎င်း ဝိညာဉ် မှာ ဖျက်ဆီးခံလိုက်ရပြီ ဖြစ်ပြီး သင်သည် အတွေ့အကြုံရမှတ်များ ရရှိပါသည်]

[စနစ် အသိပေးချက် - ဂုဏ်ယူပါသည်... သင်၏ ဝိညာဉ် တံခွန် မှာ ကြယ်ခုနစ်ပွင့် နတ်ဘုရားအဆင့် တစ္ဆေနတ်ဘုရား နန်းတော် အကြီးအကဲ ကို အောင်မြင်စွာ သိမ်းပိုက်နိုင်ခဲ့ပြီး အဋ္ဌမမြောက် အဓိက ဝိညာဉ် အဖြစ် ရောက်ရှိသွားပါပြီ... သက်ဆိုင်ရာ ထူးခြားချက် လက္ခဏာများ ဖြစ်ပေါ်လာပြီ ဖြစ်သဖြင့် ကျေးဇူးပြု၍ စစ်ဆေးကြည့်ရှုပါ]

...

မကြာမီမှာပင် ဝိညာဉ် တံခွန် မှာ ကျိုးဟန် ၏ အမိန့်ပေးမှု အောက်တွင် ဝါးမြိုခြင်းကို စတင်လိုက်ပြီး အလင်းတန်းများ အဆက်မပြတ် တောက်ပသွားလေသည်။

အချက်အလက် မျက်နှာပြင် ပေါ်တွင်လည်း အချက်အလက်များ အလျင်အမြန် လိမ့်ဆင်းလာလေသည်။

[စနစ် အသိပေးချက် - ဂုဏ်ယူပါသည်... လက်ရှိတွင် သင့်ထံ၌ အဓိက ဝိညာဉ် ၉ ခု ရှိနေပြီ ဖြစ်ပြီး ကြယ်တစ်ပွင့် အထွတ်အထိပ် အဆင့်သို့ အဆင့်တက်လှမ်းနေပါပြီ... ဤလုပ်ငန်းစဉ် အတွင်း ဝါးမြိုခြင်းကို အလိုအလျောက် ရပ်တန့်ထားမည် ဖြစ်ပါသည်]

အခန်း ၃၆၀ အထွတ်အထိပ် အဆင့် အစွမ်းထက်သူ ကိုးဦး ရောက်ရှိလာခြင်း

ကျိုးဟန် ၏ မျက်နှာပေါ်တွင် အပြုံးတစ်ခု ထွက်ပေါ်လာလေသည်။

ဤရလဒ်အပေါ် သူ အလွန် ကျေနပ်အားရနေသည်။ အထွတ်အထိပ် အဆင့် အရည်အသွေးရှိသော အဓိက ဝိညာဉ်ကို ရရှိခဲ့ရုံသာမက ဝိညာဉ် တံခွန် ၏ အရည်အသွေးမှာလည်း ကြီးမားစွာ တက်လှမ်းသွားပြီး အထွတ်အထိပ် အဆင့်သို့ ရောက်ရှိသွားခဲ့ရာ ဤတစ်ကြိမ် ရိတ်သိမ်းမှုမှာ တကယ်ကို ပြည့်စုံလွန်းလှပေသည်။

အတွေးများထဲ နစ်မျောနေစဉ်မှာပင် ဝိညာဉ် တံခွန် သည် လေထဲတွင် ဧရာမ အရွယ်အစားအထိ ကြီးထွားလာပြီး ယခင်ကထက် ပို၍ပင် အံ့မခန်း ဖြစ်နေလေသည်။

ကောင်းကင်ယံထက်တွင် နေမင်းကိုပင် ဖုံးကွယ်ထားနိုင်သော ကန့်လန့်ကာကြီး တစ်ခုအလား နေရာတစ်ခုလုံးကို ရုတ်တရက် မှောင်မိုက်သွားစေသည်ကို လူအများ မြင်တွေ့လိုက်ရသည်။ ထို့နောက် ရွှေရောင် အလင်းတန်းများက သူတို့၏ မျက်နှာများထက်သို့ ထိုးကျလာလေသည်။

"အရမ်းကို အစွမ်းထက်လွန်းတယ်... တစ္ဆေနယ်မြေက အစွမ်းထက်သူတွေ ပြောတာ ကြားဖူးတယ် ဒါက ဝိညာဉ် တံခွန် တဲ့... အဆက်မပြတ် အဆင့်တက်လှမ်းနိုင်တဲ့ အလွန် အစွမ်းထက်တဲ့ မှော်လက်နက်ပဲ"

"လခွမ်း... ဒါက ဘယ်အဆင့်ထိများ တက်လှမ်းသွားမှာလဲ"

လူအများမှာ ကျိုးဟန် ကို ကြည့်ရင်း ရင်ထဲမှ ကိုးကွယ်ယုံကြည်မှုများက အဆုံးစွန်ထိ မြင့်တက်လာကြသည်။

သို့သော် ကျိုးဟန် ကမူ သူတို့ကို ဂရုမစိုက်နေပေ။ ယခုအချိန်တွင် ဝိညာဉ် တံခွန် မှာ အမြင့်ဆုံး ကန့်သတ်ချက်အထိ ကြီးထွားလာခဲ့ပြီ ဖြစ်ပြီး နတ်ဘုရားအဆင့် မှော်လက်နက် မှ အထွတ်အထိပ် အဆင့် သို့ အဆင့်တက်လှမ်းခြင်း လုပ်ငန်းစဉ်ကို အောင်မြင်စွာ ပြီးမြောက်သွားခဲ့လေပြီ။

ထို့နောက် ကျိုးဟန် သည် သက်ဆိုင်ရာ အချက်အလက် မျက်နှာပြင်ကို ဖွင့်၍ ကြည့်ရှုလိုက်သည်။

အဓိက ဝိညာဉ် နေရာ ကန့်သတ်ချက်မှာ ကိုးဆယ့်ကိုး နေရာအထိ ရောက်ရှိသွားပြီး ၎င်း၏ ဝိညာဉ် အရေအတွက်မှာလည်း သန်းတစ်ရာ အထိ ရောက်ရှိသွားကာ တိုက်ခိုက်ရေး စွမ်းအားမှာ နောက်ထပ် အဆင့်တစ်ခုသို့ တက်လှမ်းသွားကြောင်း တွေ့ရှိလိုက်ရသည်။

ဝါးမြိုခံလိုက်ရသော အထွတ်အထိပ် အဆင့် အဓိက ဝိညာဉ် ၏ အကျိုးသက်ရောက်မှုမှာလည်း အလွန် အစွမ်းထက်လှပေသည်။ သွေးမျိုးဆက်နှင့် ဝိညာဉ်ကို လုယူနိုင်စွမ်းရှိသော တစ္ဆေ ဝိညာဉ် ဝါးမြိုခြင်း အထူး အကျိုးသက်ရောက်မှုကို ပိုင်ဆိုင်ထားသည်။

ဤသို့ဖြင့် ကျိုးဟန် ၏ ဝိညာဉ် စွမ်းအား မှာလည်း ကြီးမားစွာ တိုးတက်လာနိုင်ပြီး လက်နက်ဝိညာဉ် ကို နိုးထစေရန် အတွက် ပိုမို လွယ်ကူသွားခဲ့ပြီ ဖြစ်သည်။

ကျိုးဟန် အကြည့်များကို ပြန်လည် ရုပ်သိမ်းလိုက်ချိန်မှာပင်...

"ရွှစ်"

"ရွှစ်"

"ရွှစ်"

လေဟာနယ်ကို ထိုးခွဲလာသော အသံကိုးခုနှင့် အတူ ယခင်က တစ်ကြိမ်တစ်ခါမျှ မရှိခဲ့ဖူးသော ပြိုင်ဘက်ကင်းလောက်အောင် ခမ်းနား ကြီးကျယ်လှသည့် အရှိန်အဝါကြီးများ ထွက်ပေါ်လာသည်ကို ခံစားလိုက်ရသည်။

"အင်း... ငါ့ကို လာပြီး ပြဿနာရှာမယ့်သူ ထပ်ရောက်လာပြန်ပြီလား"

ကျိုးဟန် မှာ အနည်းငယ်မျှ ထိတ်လန့်သွားခြင်း မရှိဘဲ မျက်နှာပေါ်တွင် အပြုံးတစ်ခု ပေါ်လာကာ စိတ်လှုပ်ရှားစွာဖြင့် တီးတိုးရေရွတ်လိုက်သည်။

"လာတာ အတော်ပဲ... ငါ သွေးပမာဏ တွေ ထပ်ပြီး စုဆောင်းလို့ ရပြန်ပြီပေါ့"

ဤကဲ့သို့သော ကိစ္စမျိုးကို သူ အလွန် လိုလားနေခဲ့သည် မဟုတ်ပါလား။

ထိုနေရာရှိ လူအများမှာမူ သဘာဝကျကျပင် ထိုမျှ အစွမ်းထက်သော ခံစားသိရှိနိုင်စွမ်း မရှိကြပေ။

သူတို့ တုံ့ပြန်မှု မပြုနိုင်သေးမီမှာပင် ပုံရိပ်ကိုးခုမှာ ကျိုးဟန် ၏ အရှေ့သို့ တညီတညွတ်တည်း ဆင်းသက်လာကြလေပြီ။

"မင်းတို့ကရော ငါနဲ့ လာတိုက်ချင်လို့လား"

"မြန်မြန် လုပ်ကြလေ"

ကျိုးဟန် သည် အလျင်စလို ပြောလိုက်ပြီး သူ၏ တစ်ကိုယ်လုံးတွင် တိုက်ခိုက်လိုစိတ်များ အပြည့်အဝ ပြည့်နှက်နေလေသည်။

ဤလူများ အားလုံးမှာ အလွန် အစွမ်းထက်ကြောင်းကို သူ ခံစားသိရှိနေသည်။

သို့သော် သူ၏ ကိုယ်ပေါ်တွင် ဧကရာဇ်၏ ဟန်ပန် ရှိနေသည့်အပြင် အသုံးမပြုရသေးသော ရူးသွပ် ကြမ်းတမ်းခြင်း ဆေးလုံး တစ်လုံးလည်း ရှိနေသေးရာ လုံလောက်သော အားကိုးစရာ ရှိနေသဖြင့် အနည်းငယ်မျှပင် ဖိအား မခံစားရချေ။

ဟန်ချင်ရွှယ် အပါအဝင် မိန်းကလေး သုံးယောက်၏ ရင်ထဲတွင် တင်းကျပ်သွားသည်။

အစွမ်းထက်သော အမွေအနှစ် များကို ရရှိထားကြသော သူတို့သည် ဤလူများ အားလုံးမှာ ကြယ်ပွင့် အဆင့်မြင့်မားသော အထွတ်အထိပ် အဆင့် အစွမ်းထက်သူများ ဖြစ်ကြပြီး စောစောက တစ္ဆေနတ်ဘုရား နန်းတော် ၏ နန်းတော်သခင် နှင့် လုံးဝ နှိုင်းယှဉ်၍ မရနိုင်ကြောင်းကို သဘာဝကျကျပင် ခံစားသိရှိနေကြလေသည်။

ထို့ကြောင့် သူတို့၏ ရင်ထဲတွင် စိုးရိမ်ပူပန်မှုများ ပြည့်နှက်နေကြသည်။

သို့သော် နောက်ဆက်တွဲ ထွက်ပေါ်လာသော စကားများကြောင့် လူတိုင်းမှာ မျက်လုံးပြူး မျက်ဆံကြွတ် ဖြစ်သွားကြပြီး မိမိတို့ နားကြားမှားလေသလားဟုပင် သံသယ ဝင်သွားကြသည်။

"ညီလေး ကျိုးဟန်... မင်း ငါတို့ကို အထင်လွဲနေပြီကွ... ငါတို့က မေတ္တာ စေတနာ အပြည့်နဲ့ ရောက်လာခဲ့တာပါ... မင်းနဲ့ သူငယ်ချင်း ဖြစ်ချင်လို့လေ"

ထိုက်ရိ အထွတ်အထိပ် သခင်ကြီး သည် အရှေ့ဆုံးတွင် ရပ်နေကာ အလျင်စလို ရှင်းပြလိုက်သည်။ သူ၏ အမူအရာတွင် အနည်းငယ် မျက်နှာချိုသွေးချင်သော အရိပ်အယောင်များပင် ပါဝင်နေလေသည်။

တတ်နိုင်မည်မထင်ပေ။ သူတို့ ကိုးယောက်စလုံးသည် ကျိုးဟန် ၏ အစွမ်းထက်လှသော တိုက်ခိုက်ရေး စွမ်းအားကို မျက်မြင်ကိုယ်တွေ့ မြင်တွေ့ခဲ့ရသည် မဟုတ်ပါလား။

ထို့အပြင် ကျိုးဟန် မှာ ဤမျှ ငယ်ရွယ်နေသေးပြီး အဆုံးအစမဲ့သော ကြီးထွားနိုင်စွမ်းကို ပိုင်ဆိုင်ထားလေသည်။

အထပ် ကိုးဆယ့်ကိုး အတွင်းရှိ မြင်ကွင်းကို သူတို့ မမြင်တွေ့ခဲ့ရသော်လည်း ကျိုးဟန် ထွက်ပေါ်လာပြီးနောက် သူ၏ ကိုယ်ပေါ်မှ ထွက်ပေါ်နေသော ဧကရာဇ် တစ်ပါး၏ ဟန်ပန် အရှိန်အဝါ ကို သူတို့ ခံစား သိရှိနေကြသည်။

ဤသို့ ကြည့်မည်ဆိုပါက ရွှမ်ယွမ် ဧကရာဇ်မင်း ၏ အသိအမှတ်ပြုမှုကို သေချာပေါက် ရရှိထားပြီး ဧကရာဇ် ၏ တပည့်ရင်း တစ်ဦး ဖြစ်လာခဲ့ပြီမှာ သံသယဝင်စရာ မလိုတော့ချေ။

ထို့ကြောင့် အထွတ်အထိပ် သခင်ကြီး ကိုးပါး မှာ အလျင်စလို ရောက်ရှိလာခဲ့ကြခြင်း ဖြစ်သည်။

ပထမ အချက်မှာ ကျိုးဟန် နှင့် မိတ်ဆွေဖွဲ့ သိကျွမ်းရန် ဖြစ်ပြီး ဒုတိယ အချက်မှာမူ ကျိုးဟန် ၏ ညီငယ်များ အကြားတွင် အစွမ်းထက်သော မွေးရာပါ အရည်အချင်း ရှိသူများ အများအပြား ပါဝင်နေသောကြောင့် ဖြစ်သည်။

အထူးသဖြင့် ရွှမ်ယွမ် နန်းတော် အတွင်း၌ ကံကြမ္မာ အခွင့်အရေး များကို ရရှိခဲ့ကြသူများ ဖြစ်ရာ အထွတ်အထိပ် သခင်ကြီး ကိုးပါး မှာ သဘာဝကျကျပင် သူတို့ကို တပည့်အဖြစ် လက်ခံကာ မိမိတို့၏ အမွေအနှစ်များကို ပိုမို ကြီးထွားလာစေရန် အလွန် စိတ်အားထက်သန် နေကြခြင်း ပင်ဖြစ်သည်။

"ညီလေး ကျိုးဟန် က တကယ်ကို ခန့်ညား ထည်ဝါပြီး အရည်အချင်း ရှိတဲ့သူပဲ... အနာဂတ်မှာ တကယ်ကို မျှော်လင့်ချက် ကြီးမားလှပါတယ်... ငါကတော့ ရှူလော အထွတ်အထိပ် သခင်ကြီး ပါ... ဒီကို ရောက်လာတာက မင်းရဲ့ ခန့်ညား ထည်ဝါမှု ကို လာပြီး ခံစားကြည့်တာပါ"

"ငါကတော့ လော်ဟန် အထွတ်အထိပ် သခင်ကြီး ပါ... ငါက..."

"ဟုတ်ပါတယ်... ငါကတော့..."

မကြာမီမှာပင် ဤ အထွတ်အထိပ် သခင်ကြီး များမှာ မိမိတို့၏ မည်သူမည်ဝါ ဖြစ်ကြောင်းကို စတင် မိတ်ဆက်လာကြပြီး သူတို့၏ အမူအရာများတွင် မေတ္တာ စေတနာများ ပြည့်နှက်နေလေသည်။

သူတို့ အားလုံးသည် တန်းတူရည်တူ အဆင့်အတန်းဖြင့် စကားပြောဆိုနေကြခြင်း ဖြစ်သည်။ ဧကရာဇ် ၏ တပည့်ရင်း ဆိုသော ဂုဏ်ပုဒ် ရှိနေသဖြင့် သူတို့၏ လေယူလေသိမ်းမှာ အထူး ယဉ်ကျေးနေလေသည်။

"အိုးမိုင်ဂေါ့... အရူးအမူးပဲ အရူးအမူးပဲ"

လွတ်လပ်သောနိုင်ငံ မှ ကစားသမား တစ်ယောက်မှာ အလွန် ကြောင်အမ်းသွားပြီး ထိုနေရာတွင် ဘုရားတကာ သူ၏ ရင်ထဲရှိ တုန်လှုပ်မှုကို ဖော်ပြနေလေသည်။

"ဒါက အရမ်းကို အံ့မခန်း ဖြစ်လွန်းနေပြီ... အထွတ်အထိပ် သခင်ကြီး ကိုးပါး လုံး ကတောင် ကိုယ်တိုင် လာပြီး မိတ်ဆွေဖွဲ့ကြတယ်ပေါ့လေ"

"နတ်ဘုရားသတ်ဖြတ်ခြင်း နန်းတော် က ကျိုးဟန် က တကယ်ကို အစွမ်းထက်လွန်းတာပဲ"

ဤသူများ အားလုံးမှာ ဂုဏ်သတင်း ကြီးမားလှသော ထိပ်တန်း အစွမ်းထက်သူ များ ဖြစ်ကြပြီး သာမန် အချိန်များတွင် မည်သို့များ မြင်တွေ့နိုင်မည်နည်း။ သူတို့၏ ခန့်ညား ထည်ဝါမှုကို ဖူးမျှော်ချင်လျှင်တောင်မှ ထိတွေ့ရန် အခွင့်အရေး မရှိချေ။

သို့သော် ယခုအခါ သူတို့သည် ကျိုးဟန် အပေါ် ဤမျှ ရိုသေ လေးစားနေကြသဖြင့် ကစားသမား များ၏ ကမ္ဘာ့အမြင်ကို လုံးဝ ပြောင်းလဲသွားစေခဲ့လေသည်။

ထို့ကြောင့် အချက်တစ်ချက်ကိုသာ ရှင်းပြနိုင်တော့သည်။ ၎င်းမှာ ကျိုးဟန် လက်ရှိ ရောက်ရှိနေသော အမြင့်ဆုံး အဆင့်အတန်းမှာ သူတို့၏ စိတ်ကူးများထက် များစွာ ကျော်လွန်နေပြီ ဖြစ်ကြောင်းပင်တည်း။

"အစ်ကိုကြီးက တကယ်ကို ကြမ်းတာပဲ... ဒါက မျက်နှာပန်း လှတာပဲကွ... တွေ့ကြပြီလား... ဒါက ငါတို့ နတ်ဘုရားသတ်ဖြတ်ခြင်း နန်းတော် ရဲ့ အစ်ကိုကြီးပဲ... ဘယ်လောက်တောင် အာဏာရှင် ဆန်လိုက်လဲ"

ကျန်းရှောင်ပိုင် က စိတ်လှုပ်ရှားစွာဖြင့် အော်ဟစ်လိုက်သည်။ ဤမြင်ကွင်းက သူ့ကိုလည်း အလွန် တုန်လှုပ်သွားစေခဲ့လေသည်။

"အထွတ်အထိပ် သခင်ကြီး ကိုးပါး လုံး က လာရောက် ဂါရဝပြုရတယ် ဆိုတော့ ဒီ အဆင့်အတန်း က အရမ်းကို မြင့်မားလွန်းနေပြီ... အစ်ကိုကြီး ရဲ့ အဆင့်အတန်း က တစ်ကြိမ်ပြီး တစ်ကြိမ် ငါတို့ရဲ့ နားလည်မှုကို ကျော်လွန်သွားခဲ့တာပဲ... သူ ဘယ်အချိန် ဧကရာဇ် တစ်ပါး ဖြစ်လာမလဲ ဆိုတာကိုတောင် ငါ လုံးဝ အံ့သြတော့မှာ မဟုတ်ဘူး"

လုပွန်ဝေ့ မှာလည်း အလွန် တုန်လှုပ်နေပြီး တစ်ကိုယ်လုံး စိတ်လှုပ်ရှား တက်ကြွနေလေသည်။

သေချာပေါက် နတ်ဘုရားသတ်ဖြတ်ခြင်း နန်းတော် မှ အဖွဲ့ဝင်တိုင်းမှာ စိတ်မလှုပ်ရှားဘဲ မနေနိုင်ကြချေ။

မည်သို့ပင်ဆိုစေ ကျိုးဟန် ပိုမို အစွမ်းထက်လာလေလေ နတ်ဘုရားသတ်ဖြတ်ခြင်း နန်းတော် မှာ ပိုမို အစွမ်းထက်သော ဖွံ့ဖြိုး တိုးတက်မှု များကို ရရှိလာမည် ဖြစ်ပြီး အဖွဲ့ဝင်များ ရရှိမည့် အကျိုးကျေးဇူး များမှာလည်း သဘာဝကျကျပင် ပိုမို များပြားလာမည် ဖြစ်လေသည်။ လူတိုင်းသည် ဂုဏ်သိက္ခာ နှင့် အရှက်တရား ကို အတူတကွ မျှဝေခံစားကြပြီး ခွဲခြား၍ မရနိုင်သော အဖွဲ့အစည်း တစ်ခု အဖြစ် ပြောင်းလဲသွားခဲ့ကြပြီ ဖြစ်သည်။

"ဘာ... တိုက်ခိုက်ဖို့ လာတာ မဟုတ်ဘူးလား... အဲဒါဆို အရသာ မရှိတော့ဘူးပေါ့"

"ဒါမှမဟုတ် မင်းတို့ သိုင်းကွက် ထုတ်ပြီး ငါ့ကို အချက်အနည်းငယ်လောက် လာလုပ်ပေးကြမလား"

ကျိုးဟန် ကြားလိုက်ရချိန်တွင် အရသာ ပျက်သွားလေသည်။ အလှလေးများလည်း မဟုတ်ဘဲ မိတ်ဆွေဖွဲ့ရန် ဆိုသည်မှာ သူ လုံးဝ စိတ်ဝင်စားမှု မရှိချေ။

[စနစ် အသိပေးချက် - သင့်အပေါ် မကောင်းဆိုးဝါး ရည်ရွယ်ချက် မရှိသူများက သင့်ကို တိုက်ခိုက်ပြီးနောက် ဧကရာဇ်၏ ဟန်ပန် ၏ ကာကွယ်ခြင်း အကျိုးသက်ရောက်မှု ဖြစ်ပေါ်လာသော်လည်း သင်သည် သွေးပမာဏ တိုးမြှင့်ခြင်း ကို ရရှိမည် မဟုတ်ပါ]

ကျိုးဟန် ခေါင်းညိတ်လိုက်သည်။ ဤကဲ့သို့သော အကျိုးသက်ရောက်မှု မျိုးနှင့် ပတ်သက်၍ အတိအလင်း မပြောထားသော်လည်း တွေးကြည့်လိုက်ရုံဖြင့် ဤကဲ့သို့သော ကန့်သတ်ချက်များ ရှိနေမည်ကို သိရှိနိုင်ပေသည်။

ထိုသို့မဟုတ်ပါက မိမိနှင့် ရင်းနှီးသော ထိပ်တန်း အစွမ်းထက်သူ အချို့ကို ရှာဖွေကာ မိမိအပေါ် အဆက်မပြတ် တိုက်ခိုက်ခိုင်းပြီး မှန်းဆ၍ မရနိုင်လောက်အောင် များပြားလှသော သွေးပမာဏ များကို ရယူလိုက်ရုံဖြင့် တကယ်ကို ကမ္ဘာပေါ်တွင် ပြိုင်ဘက်ကင်း ဖြစ်သွားမည် မဟုတ်ပါလား။

"ညီလေး ကျိုးဟန် ရဲ့ လုပ်ရပ်တွေက တကယ်ကို တစ်မူထူးခြားတာပဲ... ပြိုင်ဘက်ကင်း ပါရမီရှင် ပီသပါပေတယ်"

မြင့်မြတ်သော သားရဲ အထွတ်အထိပ် သခင်ကြီး က ပြုံး၍ ပြောလိုက်သည်။

"ဟုတ်တယ်လေ... အစစ်အမှန် ပါရမီရှင် တွေက ထူးဆန်းတဲ့ အကျင့်လေးတွေ ရှိတတ်ကြတယ်လေ... ညီလေး ကျိုးဟန် က ဒီလို ဖြစ်နေတာလည်း အပြစ်ဆိုစရာ မရှိပါဘူး"

နောက်ထပ် မြှောက်ပင့် ပြောဆိုသော စကားများကြောင့် ကျိုးဟန် မှာ အနည်းငယ် စကားပိတ်သွားရလေသည်။

'ငါ့ရင်ထဲက အထွတ်အထိပ် သခင်ကြီး တွေက ဒီလောက်တောင် အဆင့်အတန်း နိမ့်ကျနေတာလား... နည်းနည်းလေးတောင်မှ ခန့်ညား ထည်ဝါမှု မရှိပါလား'

ဤသို့ စကားပြောဆိုနေမှုတွင် အထွတ်အထိပ် အဆင့် အစွမ်းထက်သူ တစ်ယောက်၏ မောက်မာမှုများ အနည်းငယ်မျှပင် မရှိချေ။

"ခင်ဗျားတို့က ကျွန်တော့်ကို ဘယ်လိုလုပ် သိတာလဲ... ဒီတစ်ခေါက် လာတာကရော ဘာရည်ရွယ်ချက် ရှိလို့လဲ"

ကျိုးဟန် သည် စကားကို လိုရင်းသာ တိုက်ရိုက် မေးလိုက်သည်။ သူနှင့် အဘိုးအို တစ်စု အကြားတွင် တူညီသော စကားပြောဆိုစရာ အကြောင်းအရာ များများစားစား မရှိချေ။