အခန်း (၁၃၉၅-၁၃၉၆)

အခန်း ၁၃၉၅

ကျူးဝူ ထိုသို့ပြောသည်ကို ကြားသောအခါ ရှောင်းယီက ခေါင်းကို အနည်းငယ် ငြိမ့်ပြပြီး ပြန်ဖြေလိုက်သည်။

"ဒါကလည်း အဓိပ္ပာယ်ရှိပါတယ်။ အပျက်အစီးနေရာကိုယ်တိုင်က လူတိုင်းကို အာကာသယာဉ်တစ်စီး ပိုမိုမြန်ဆန်စွာ ရရှိနိုင်အောင် လမ်းစရှာပေးထားတာပဲ။ တကယ်လို့ သူ့ကို ပြုပြင်ဖို့ အုတ်မြစ်ကျောက်နဲ့ အနက်ရောင်ရွှေ ပမာဏအမြောက်အမြား တကယ်ကြီး လိုအပ်မယ်ဆိုရင်တော့ ဒါက တကယ့်ကို တွက်ခြေမကိုက်တော့ဘူး။"

"သူဌေး... ဒါဆိုရင် အပျက်အစီးနေရာတစ်ခုဆီ ဘေးကင်းကင်းနဲ့ သွားနိုင်ဖို့အတွက် လက်ထဲမှာ အုတ်မြစ်ကျောက်နဲ့ အနက်ရောင်ရွှေ ဘယ်လောက်လောက် အဆင်သင့်ရှိထားသင့်လဲ။"

ကျူးဝူက မေးလိုက်သည်။

"ဒါက တကယ်ပြောရခက်တယ်။ အရင်က အသက်ရှင်ကျန်ရစ်သူတစ်ယောက် အပျက်အစီးထဲက အာကာသယာဉ်ကို ပြုပြင်ဖို့ ကုန်ကျခဲ့တဲ့ အုတ်မြစ်ကျောက်နဲ့ အနက်ရောင်ရွှေ ပမာဏကို မသိရသရွေ့တော့ ငါ့ရဲ့ အချက်အလက် တစ်ခုတည်းအပေါ် အခြေခံပြီး ကောက်ချက်ချဖို့ မဖြစ်နိုင်ဘူး။"

ရှောင်းယီက ခေါင်းခါကာ ပြန်ဖြေလိုက်သည်။ ကျူးဝူ ခေါင်းကို အနည်းငယ် ငြိမ့်လိုက်ပြီးနောက် ဆက်မေးလိုက်ပြန်သည်။

"သူဌေး... အဲဒီအပျက်အစီးနေရာထဲမှာ အာကာသယာဉ်အပြင် တခြားဘာတွေ ရှိသေးလဲ။"

"ရှိတယ်။ အဲဒါက အရမ်းသေးငယ်ပြီး အတော်လေး ပျက်စီးနေဖြစ်တဲ့ အာကာသစခန်းတစ်ခုပဲ။"

ရှောင်းယီက ဆိုသည်။

"ဒါဆို သူဌေး အဲဒီအာကာသစခန်းကိုပါ တစ်ခါတည်း သယ်လာခဲ့တာလား။"

ကျူးဝူက စူးစမ်းလိုက်၏။ ရှောင်းယီက ခေါင်းခါပြကာ ပြန်ပြောလိုက်သည်။

"အာကာသစခန်းက အရမ်းကြီးလွန်းတယ်။ ရွှေ့ပြောင်းဖို့ မလွယ်ကူဘူး။ ပြီးတော့ အဲဒီအမည်မသိ အာကာသယာဉ် ဘယ်အချိန်မှာ ပြန်လာမလဲဆိုတာလည်း မသေချာဘူး။ အဲဒါကြောင့် အာကာသယာဉ်ကိုပဲ ယူလာခဲ့လိုက်တယ်။"

"ဒါလည်း ဟုတ်တာပဲ။ ဘေးကင်းရေးက ပထမပဲ။ အဲဒီအာကာသစခန်းရဲ့ တည်နေရာကို သိနေသရွေ့ နောက်ပိုင်း ကျွန်တော်တို့ ပိုမိုဖွံ့ဖြိုးတိုးတက်လာပြီး အင်အားတောင့်တင်းလာတဲ့အခါမှ သွားယူလို့ရတယ်။"

ကျူးဝူက ထောက်ခံပြောဆိုလိုက်သည်။

"တကယ်တော့ ငါ့ရဲ့ အမြင်အရဆိုရင် ငါတို့ရဲ့ လက်ရှိအခြေအနေနဲ့ ရွှေ့ပြောင်းရခက်ခဲတဲ့ အာကာသစခန်းမျိုးက ငါတို့အတွက် မသင့်တော်သေးဘူးလို့ ငါ ခံစားရတယ်။"

ရှောင်းယီက ခပ်ပြတ်ပြတ် ပြောလိုက်သည်။ ကျူးဝူ အနည်းငယ် ကြောင်အမ်းသွား၏။ ပြီးမှ အလွန်အမင်း သဘောတူသည့်အနေဖြင့် ခေါင်းကို တရစပ် ငြိမ့်လိုက်တော့သည်။

ယခုအချိန်တွင် မည်သည့်အသက်ရှင်ကျန်ရစ်သူမှ မိမိတို့၏ အရေးပေါ်ကယ်ဆယ်ရေးယာဉ်ကို အလွန်အကျွံ မချဲ့ထွင်ရဲကြခြင်းမှာ အရေးပေါ်ကယ်ဆယ်ရေးယာဉ်တွင် လျင်မြန်ဖြတ်လတ်မှု မရှိခြင်းကြောင့်ပင် မဟုတ်ပါလော။

အာကာသစခန်းတစ်ခု ဖြစ်နေကတည်းက ၎င်း၏ အရွယ်အစားမှာ ပိုမိုကြီးမားနေမည်မှာ သေချာသည်။ ထိုကဲ့သို့ ဧရာမအရာဝတ္ထုကြီးကို ဆွဲယူလာရခြင်းက ဥက္ကာခဲများအတွက် သက်ရှိပစ်မှတ်ကြီးတစ်ခု ဖန်တီးပေးလိုက်သလိုသာ ဖြစ်သွားပေလိမ့်မည်။

ရှောင်းယီအနေဖြင့် ဤကဲ့သို့သော အကျိုးမရှိသည့် အလုပ်မျိုးကို ဘယ်တော့မှ လုပ်မည်မဟုတ်ချေ။

"သူဌေးက တကယ့်ကို အမြော်အမြင်ရှိတာပဲ။"

ကျူးဝူက ပြန်ပြောလိုက်သည်။

"ဒါနဲ့ သူဌေး... အဲဒီပိုကြီးတဲ့ အာကာသယာဉ်နဲ့ လမ်းမှာ ဆုံခဲ့သေးလား။"

"မဆုံသေးဘူး။ ငါ့နောက်ကို လိုက်မီလာမလားတော့ မသိပေမယ့် အခုတော့ ငါ အပျက်အစီးနေရာကနေ ထွက်ခွာလာခဲ့ပြီ။"

ရှောင်းယီက ခေါင်းခါပြလိုက်သည်။

"ပြဿနာက ကျွန်တော်တို့ အခုလောလောဆယ် ဘေးကင်းဇုန်ရဲ့ အတိုင်းအတာတိကျကို မသိရတာပဲ။"

ကျူးဝူက ဆိုသည်။

"ဟုတ်တယ်။ အဲဒါကြောင့်မို့လို့ ငါ့ရဲ့ မူလနေရာကို တတ်နိုင်သမျှ အမြန်ဆုံး နှုန်းနဲ့ ပြန်နေတာ။"

ရှောင်းယီက ပြန်ဖြေလိုက်သည်။

"ကောင်းပြီ... ဒါဆိုရင် သူဌေးကို ကျွန်တော် ထပ်ပြီး မနှောင့်ယှက်တော့ပါဘူး။ အများသုံးချန်နယ်ထဲမှာ သွားပြီး ခဏလောက် မွှေလိုက်ဦးမယ်။"

ကျူးဝူက စကားဝိုင်းကို ကိုယ်တိုင် အဆုံးသတ်လိုက်သည်။ ရှောင်းယီသည် အနီးနားရှိ လေဆာအာရုံခံ ကိရိယာကို ကြည့်လိုက်ရာ တခြား မည်သည့် အာကာသယာဉ်မှ ချဉ်းကပ်လာခြင်း မရှိသည်ကို မြင်ရသဖြင့် သူ၏ အာရုံကို အများသုံးချန်နယ်ဆီသို့ ပြောင်းလဲလိုက်သည်။

"လောလောဆယ် လက်ထဲမှာ အပျက်အစီးမြေပုံ ရှိနေတဲ့ အသက်ရှင်ကျန်ရစ်သူတစ်ယောက်လောက် အပျက်အစီးနေရာကို သွားပြီးတော့ အဲဒီက ပျက်စီးနေတဲ့ အာကာသယာဉ်ကို ပြုပြင်ဖို့ ပစ္စည်း ဘယ်လောက်တောင် လိုလဲဆိုတာ သွားကြည့်ပေးလို့ ရမလား။"

"ဟုတ်တယ်။ သွားကြည့်ပြီးတာနဲ့ ချက်ချင်း ပြန်ပြေးလာခဲ့လေ။ ပြီးမှ အရင်းအမြစ်တွေ အလုံအလောက် စုမိတဲ့အခါကျမှ အဲဒီကို နောက်တစ်ခေါက် ထပ်သွားတာပေါ့။"

"အာ... အဲဒီလို လုပ်လို့ ရပါ့မလား။"

"မရလောက်ဘူး ထင်တယ်။ ဘယ်လောက် ကုန်မလဲ သိချင်ရင် အဲဒီအာကာသယာဉ်ကို မဖြစ်မနေ သိမ်းပိုက်ရလိမ့်မယ်။ အကယ်လို့ သိမ်းပိုက်ပြီးမှ ပြန်မမောင်းလာရင် တခြားလူတစ်ယောက်ယောက်က လာပြီး လုသွားတာမျိုး ဖြစ်နိုင်တယ်။"

"ငါလည်း အဲဒီလိုပဲ ဖြစ်လိမ့်မယ်လို့ ထင်တယ်။ အပျက်အစီးနေရာကို ရှာဖွေတွေ့ရှိသွားပြီဆိုတာနဲ့ လူတိုင်းက လာပြီး ဝေစုခွဲလို့ ရသွားပြီဆိုတဲ့ သဘောပဲ။"

"မင်းတို့ ဒီလို ခွဲခြမ်းစိတ်ဖြာလိုက်တော့ အစက အပျက်အစီးနေရာရဲ့ အခြေအနေကို သွားကြည့်ဖို့ ပြင်နေတဲ့ အသက်ရှင်ကျန်ရစ်သူတွေ ဘယ်လိုလုပ် သွားရဲကြတော့မှာလဲ။"

"တကယ်တော့ အားလုံးပဲ ပြုပြင်ဖို့ အရင်းအမြစ် ဘယ်လောက်လိုမလဲဆိုတာကို အရမ်းကြီး စိုးရိမ်မနေကြပါနဲ့။ ဘယ်လောက်ပဲ လိုလို... ငါတို့ လက်ရှိမှာ ရှိနေတဲ့ အရင်းအမြစ်တွေက လုံးဝ မလုံလောက်သေးတာ အမှန်ပဲ။ အဲဒါကြောင့် အရင်းအမြစ်တွေကို သေသေချာချာ စုဆောင်းထားပြီးမှ နောက်မှ ဆွေးနွေးကြတာ ပိုကောင်းမယ်။"

"မှန်တယ်။ ဒီအမြင်ကို ငါလည်း ထောက်ခံတယ်။ ဘာပဲဖြစ်ဖြစ် အရင်ဆုံး ၅ သိန်းလောက်အထိ စုမိအောင် စုထားပြီးမှ အပျက်အစီးကိစ္စကို စဉ်းစားကြတာပေါ့။"

"အများသုံးချန်နယ်ထဲမှာ ယီရန်ပင်း ဆရာကြီး စကားလာပြောတာ မမြင်ရတာ တော်တော်ကြာပြီပဲ။ ဆရာကြီးမှာ ပိုပြီး နက်နဲတဲ့ အမြင်တွေ ရှိနေလိမ့်မယ်လို့ ငါထင်တယ်။"

"ဒါတွေက အကုန်လုံး ကိုယ့်ဘာသာ လျှောက်တွေးနေကြတာပဲ။ ဆရာကြီးက အပျက်အစီးနေရာကို ကိုယ်တိုင်သွားပြီး တူးဖော်တာမျိုး မလုပ်ခဲ့ရင် သူ့မှာ ဘာထူးခြားတဲ့ အမြင်ရှိနိုင်မှာလဲ။"

ကွက်တိ ထိုအချိန်တွင်ပင် ရှောင်းယီ၏ လေဆာအာရုံခံ ကိရိယာပေါ်၌ သူ့နောက်မှ အာကာသယာဉ်တစ်စီး အမှန်တကယ် ထွက်ပေါ်လာကြောင်း ရုတ်တရက် ပြသလာပြီး ၎င်း၏အရွယ်အစားမှာ အသေးစားအာကာသယာဉ်ထက် နှစ်ဆ ပိုမိုကြီးမားသည်။

"အားလုံး သတိထားကြ။ ငါတို့နောက်မှာ အမည်မသိ အင်အားစုရဲ့ အာကာသယာဉ်တစ်စီး ပေါ်လာပြီ။"

ရှောင်းယီက တည်ငြိမ်လေးနက်သော လေသံဖြင့် ပြောလိုက်သည်။

"လက်ခံရရှိပါတယ်။"

အာကာသ ၁ နှင့် အာကာသ ၂ တို့က တညီတညွတ်တည်း ပြန်လည်ဖြေကြားလိုက်သည်။ ၎င်းတို့သည် အရှိန်အမြင့်ဆုံးဖြင့် မောင်းနှင်နေကြပြီး ယခုအခါ တစ်ဖက်လူ၏ အရှိန်က ထိုမျှအထိ မမြန်ပါစေနှင့်ဟုသာ ဆုတောင်းနိုင်တော့သည်။

သို့သော်လည်း လေဆာအာရုံခံ ကိရိယာပေါ်တွင် ခေတ္တမျှ စောင့်ကြည့်ပြီးနောက် ရှောင်းယီသည် လေးနက်သော မျက်နှာအမူအရာဖြင့် ခေါင်းကို ခါလိုက်မိတော့သည်။

အဘယ်ကြောင့်ဆိုသော် တစ်ဖက်လူ၏ အမြန်နှုန်းက ရှောင်းယီတို့ဘက်ထက် နှစ်ဆ ပိုမိုမြန်ဆန်နေသောကြောင့် ဖြစ်သည်။

ယခုမူ လိုက်တမ်းပြေးတမ်း ပြဿနာတစ်ခု ဖြစ်လာခဲ့ပြီဖြစ်သည်။ နှစ်ဦးနှစ်ဖက် အကွာအဝေးမှာ ၁၀၀ ကီလိုမီတာ ဖြစ်ပြီး နောက်လူ၏ အရှိန်က ရှေ့ကလူထက် နှစ်ဆ ပိုမြန်ကာ ရှေ့လူ၏ အရှိန်မှာ တစ်စက္ကန့်လျှင် ၁၆ ကီလိုမီတာ ဖြစ်သည်။ သို့ဆိုလျှင် နောက်လူသည် ရှေ့လူကို လိုက်မီရန် ဘယ်လောက်ကြာမည်နည်း။

အလွန်ရိုးရှင်းသော သင်္ချာပုစ္ဆာတစ်ခုဖြစ်ပြီး အဖြေမှာ ၆.၂၅ စက္ကန့် ဖြစ်သည်။

ဤ ၆.၂၅ စက္ကန့်အတွင်းတွင် ရှောင်းယီ၏ အာကာသယာဉ်သည် ၁၀၀ ကီလိုမီတာ ခရီးနှင်နိုင်မည် ဖြစ်သည်။

ခြောက်စက္ကန့်မှာ လျင်မြန်စွာ ကုန်ဆုံးသွားပြီး ရှောင်းယီသည် နောက်မှ လိုက်ပါလာသော အာကာသယာဉ်ကို သာမန်မျက်စိဖြင့်ပင် မြင်တွေ့နေရပြီ ဖြစ်သည်။

"အလတ်စား အာကာသယာဉ် - သတ်မှတ်ချက် ကန့်သတ်ချက်များ၊ စွမ်းဆောင်ရည် စသည်တို့သည် အသေးစား အာကာသယာဉ်ထက် နှစ်ဆ သာလွန်သည်။"

စနစ်၏ အသိပေးချက်က ရိုးရှင်းလှသော်လည်း ရှောင်းယီ၏ မျက်ခုံးများကို တရစပ် လှုပ်ခတ်သွားစေသည်။ နှစ်ဆ ကွာဟနေသည့် ကွာခြားချက်မှာ ယှဉ်တိုက်ရန် လုံးဝ မဖြစ်နိုင်ချေ။

ပြဿနာမှာ ကျန်ရှိသော အာကာသယာဉ် လေးစီးတွင် တိုက်ခိုက်နိုင်စွမ်း လုံးဝမရှိဘဲ သူ၏အာကာသယာဉ် တစ်စီးတည်းတွင်သာ တိုက်ခိုက်နိုင်စွမ်း အနည်းငယ် ရှိနေခြင်း ဖြစ်သည်။

"မဖြစ်မနေ လိုအပ်လာရင်တော့... အာကာသ ၁ နဲ့ အာကာသ ၂ တို့ကိုပဲ တစ်ဖက်လူကို တားဆီးဖို့ အသုံးချရတော့မှာပဲ။"

ရှောင်းယီက မိမိဘာသာ တွေးလိုက်မိသည်။ ထိုအတွေး စိတ်ထဲ၌ မငြိမ်သေးမီမှာပင် တစ်ဖက်လူက တိုက်ခိုက်မှုကို စတင်လိုက်ပြီဖြစ်သည်။

စူးရှသော အလင်းတန်းနှစ်ခုသည် အာကာသ ၂ ရှိနေသည့် အာကာသယာဉ်ဆီသို့ တည့်တည့်မတ်မတ် ဦးတည်လာ၏။

အာကာသ အသိဉာဏ်ရှိ စက်ရုပ်ဖြစ်သည့်အားလျော်စွာ ၎င်းသည် အရေးကြီးသော အစိတ်အပိုင်းများကို ရှောင်ကွင်းနိုင်ရန် အရေးပေါ် တိမ်းရှောင်မှုတစ်ခုကို ပြုလုပ်လိုက်သည်။

ရှောင်းယီ မြင်လိုက်ရသည်မှာ သူ့အနောက် ညာဘက်အခြမ်းရှိ အာကာသယာဉ် နှစ်စီးထဲမှ တစ်စီး ထိမှန်သွားပြီး မည်သည့်အသံမျှ မထွက်ဘဲ ပေါက်ကွဲသွားခြင်းပင် ဖြစ်သည်။

"အာကာသ ၂... ပျက်စီးမှု အခြေအနေကို သတင်းပို့စမ်း။"

ရှောင်းယီက တည်ငြိမ် လေးနက်စွာ မေးလိုက်သည်။

"ကျွန်းပိုင်ရှင်ကို အစီရင်ခံပါတယ်။ အာကာသယာဉ်ရဲ့ ကိုယ်ထည် ပြင်းထန်စွာ ပျက်စီးသွားပေမယ့် ရှေ့ကိုတော့ ဆက်ပြီး မောင်းနှင်နိုင်ပါသေးတယ်။"

အာကာသ ၂ က ပြန်ဖြေလာခဲ့သည်။ အာကာသ ၂ မှာ စက်ရုပ်တစ်ရုပ်သာ ဖြစ်သဖြင့် ယာဉ်ကိုယ်ထည် ပြင်းထန်စွာ ပျက်စီးသွားခြင်းက သူ့အပေါ် မည်သည့်သက်ရောက်မှုမှ မရှိချေ။

ရှောင်းယီ အနည်းငယ် စဉ်းစားပြီးနောက် အာကာသ ၂ အား အချိန်ပိုမို ဆွဲထားနိုင်ရန် မျှော်လင့်ချက်ဖြင့် ကျွန်းအထိမ်းအမှတ်ကျောက်တိုင်ပေါ်တွင် ပြုပြင်ရန် ချက်ချင်း ရွေးချယ်လိုက်သည်။

"အုတ်မြစ်ကျောက် ၁ သိန်းနဲ့ အနက်ရောင်ရွှေ ၁ သိန်း လိုအပ်ပါတယ်။ ပြုပြင်လိုပါသလား။"

ကျွန်းအထိမ်းအမှတ်ကျောက်တိုင်ပေါ်ရှိ အသိပေးချက်ကို မြင်လိုက်ရသည်နှင့် ရှောင်းယီ ချက်ချင်း သဘောတူလိုက်ပြီးနောက် စတင်တွေးတောလိုက်တော့သည်။

ဤတစ်ကြိမ် ပြုပြင်ရန် လိုအပ်သော အုတ်မြစ်ကျောက်နှင့် အနက်ရောင်ရွှေ ပမာဏမှာ ယခင်ကနှင့် ထပ်တူထပ်မျှ တူညီနေ၏။

ဒါက အာကာသစခန်းကိုလည်း ငါတို့ရှေ့က အာကာသယာဉ်ကပဲ ဖျက်ဆီးခဲ့တာလို့ ဆိုလိုတာလား။

ယခင်က ပြင်းထန်စွာ ပျက်စီးသွားသော ယာဉ်ကိုယ်ထည်သည် ချက်ချင်းပင် ပြီးပြည့်စုံသော အခြေအနေသို့ ပြန်လည်ကောင်းမွန်သွားခဲ့သည်။ နောက်မှ လိုက်လာသော အာကာသယာဉ်သည် ခဏမျှ ကြောင်အမ်းသွားသည်မှာ သိသာလှ၏။ ထို့နောက်တွင်မူ နောက်ထပ် တိုက်ခိုက်မှုတစ်ခုကို ထပ်မံပြုလုပ်လိုက်ပြန်သည်။

နောက်ထပ် အလင်းတန်းနှစ်ခုသည် အာကာသ ၂ မောင်းနှင်နေသည့် အာကာသယာဉ်ဆီသို့ ထပ်မံ ဦးတည်လာခဲ့သည်။

ထို့ပြင် ဤတိုက်ခိုက်မှု ပြီးဆုံးပြီးနောက်တွင် တစ်ဖက်လူသည် လုံးဝ တုံ့ဆိုင်းမနေဘဲ အာကာသ ၁ ရှိနေသည့် အာကာသယာဉ်ကိုပါ စတင် ပစ်ခတ်တော့သည်။

အာကာသ ၁ နှင့် အာကာသ ၂ တို့သည် ယခုအခါ ရှောင်းယီ၏ ရှေ့သို့သာ ဆက်လက်မောင်းနှင်ရန် အမိန့်ကို တိကျစွာ လိုက်နာရင်း နည်းဗျူဟာမြောက် တိမ်းရှောင်မှုများကို လုပ်ဆောင်နေကြသည်။

၎င်းတို့၏ တိမ်းရှောင်မှုများသည် ၎င်းတို့မောင်းနှင်နေသည့် အာကာသယာဉ်များ၏ လောင်စာဆီသိုလှောင်ကန်၊ တွန်းကန်အားစနစ် ကဲ့သို့သော အရေးကြီးသည့် နေရာများ အထိမနာစေရန်သာ အာမခံနိုင်တော့ပေသည်။

အခန်း ၁၃၉၆

မည်သည့် မမျှော်လင့်ထားစရာမျှ မရှိဘဲ အာကာသ ၁ နှင့် အာကာသ ၂ တို့ မောင်းနှင်နေသည့် အာကာသယာဉ်များမှာ ထပ်မံ၍ ဖျက်ဆီးခြင်း ခံလိုက်ရပြန်သည်။

ရှောင်းယီသည် ရှေ့သို့ တဟုန်ထိုး ပြေးလွှားနေရင်း တစ်ဖက်မှလည်း အုတ်မြစ်ကျောက်နှင့် အနက်ရောင်ရွှေ စုစုပေါင်း ၂ သိန်းစီ ထပ်မံအသုံးပြုကာ ပြုပြင်မှုများကို ဆက်တိုက် လုပ်ဆောင်နေခဲ့သည်။

ရှောင်းယီ၏ အာကာသယာဉ်မှာ ချက်ချင်းပင် မူလအခြေအနေသို့ ပြန်လည်ရောက်ရှိသွားသည်ကို မြင်လိုက်ရသောအခါ တစ်ဖက်ရန်သူမှာ ပို၍ စိတ်လှုပ်ရှားလာပုံရပြီး မဆုတ်မနစ် နောက်မှ လိုက်လံပစ်ခတ်တော့သည်။

နောက်ထပ် ၂ သိန်း...။

နောက်ထပ် ၂ သိန်း...။

နောက်ထပ် ၂ သိန်း...။

ရှောင်းယီ စုဆောင်းထားခဲ့သော အုတ်မြစ်ကျောက်များနှင့် အနက်ရောင်ရွှေများသည် တရစပ် ကုန်ဆုံးနေ၏။

"ဒီအတိုင်းသာ ဆက်သွားနေရင်တော့ ငါ့ရဲ့ အုတ်မြစ်ကျောက်နဲ့ အနက်ရောင်ရွှေတွေ ဘယ်လိုမှ တောင့်ခံနိုင်မှာ မဟုတ်တော့ဘူး။"

ရှောင်းယီက မျက်မှောင်ကြုတ်လိုက်၏။

"နောက်ဆုံးတစ်ခေါက်ပဲ... အကယ်လို့ အဆင်မပြေသေးဘူးဆိုရင် အရင်ဆုံး တစ်စီးကို စွန့်လွှတ်ရတော့မယ်။"

အုတ်မြစ်ကျောက်နှင့် အနက်ရောင်ရွှေ ၂ သိန်း ထပ်မံအသုံးပြုပြီးနောက် အာကာသ ၁ နှင့် အာကာသ ၂ တို့ မောင်းနှင်နေသည့် အာကာသယာဉ်မှာ မူလအခြေအနေသို့ ပြန်လည် ကောင်းမွန်သွားခဲ့ပြန်သည်။

"အာကာသ ၂... အရှိန်လျှော့ပြီး နောက်ကနေ ပိတ်ဆို့ထားလိုက်။"

ရှောင်းယီက အံကြိတ်ကာ အမိန့်ပေးလိုက်သည်။

"ဟုတ်ကဲ့ပါ။"

အာကာသ ၂ က ပြန်ဖြေလိုက်သည်။ ၎င်းသည် မည်သည့် တွေဝေမှုမျှမရှိဘဲ အရှိန်ကို ချက်ချင်းလျှော့ချလိုက်ပြီး အာကာသ ၁ ၏ နောက်ကွယ်ရှိ လမ်းကြောင်းကို ပိတ်ဆို့လိုက်တော့သည်။

ရှောင်းယီအနေဖြင့် အာကာသ ၂ ကို အသုံးပြုကာ တစ်ဖက်လူ၏ လေဆာအလင်းတန်းကို ပိတ်ဆို့ပြီး ရန်သူ့ယာဉ်ကို ဝင်တိုက်ရန် ပြင်ဆင်နေစဉ်မှာပင် ထိုအလတ်စား အာကာသယာဉ်ကြီးမှာ ရုတ်တရက် အရှိန်ရပ်တန့်သွားခဲ့သည်။

ရန်သူသည် ဘယ်ညာသို့ အနည်းငယ် ဝဲပျံလှုပ်ရှားပြီးနောက် ချက်ချင်းပင် လှည့်ပြန်သွားခဲ့တော့သည်။

"ဘာဖြစ်တာလဲ။ သူတို့ ငါတို့ကို မမြင်ရတော့လို့လား။"

ရှောင်းယီသည် သူ့ရှေ့က မြင်ကွင်းကို အံ့အားသင့်စွာ ကြည့်ရင်း ချက်ချင်းပင် သဘောပေါက်သွားခဲ့သည်။

"ဒါက ဘေးကင်းဇုန်ရဲ့ နယ်နိမိတ်ပဲ ဖြစ်ရမယ်။"

ရှောင်းယီသည် အုတ်မြစ်ကျောက်နှင့် အနက်ရောင်ရွှေ စုစုပေါင်း ၁ သန်းခွဲစီ အသုံးပြုခဲ့ရပြီး နောက်ဆုံးတွင်တော့ ထိုအသေးစား အာကာသယာဉ် လေးစီးလုံးကို ဘေးကင်းစွာ သယ်ဆောင်လာနိုင်ခဲ့ပြီ ဖြစ်သည်။

ကုန်ကျခဲ့သည့် ပစ္စည်းပမာဏမှာ များပြားလှသော်လည်း တကယ့်ကို ထိုက်တန်လှပေသည်။ အရေးပေါ်ကယ်ဆယ်ရေးယာဉ် လေးစီးကို အသေးစား အာကာသယာဉ် လေးစီးအဖြစ် အဆင့်မြှင့်တင်ရန်အတွက် အုတ်မြစ်ကျောက်နှင့် အနက်ရောင်ရွှေ စုစုပေါင်း သန်း ၄၀ စီ လိုအပ်သည်ကို ထည့်တွက်ရမည် ဖြစ်သည်။ ဤသို့ တွက်ချက်ကြည့်ပါက ရှောင်းယီအနေဖြင့် အမြတ်အစွန်းအမြောက်အမြား ရရှိခဲ့ခြင်း ဖြစ်ပေသည်။

ရှောင်းယီသည် ရန်သူ ဆုတ်ခွာသွားခဲ့သည့် တည်နေရာကို မြေပုံပေါ်တွင် မှတ်သားထားလိုက်၏။ ဘေးကင်းဇုန်၏ နယ်နိမိတ်ကို သိရှိထားခြင်းက နောက်နောင် လုပ်ဆောင်မှုများအတွက် ပိုမိုလွယ်ကူစေမည် ဖြစ်သည်။

သဘာဝအတိုင်းပင် ရှောင်းယီအနေဖြင့် လောလောဆယ် ဤပတ်ဝန်းကျင်ရှိ ဘေးကင်းဇုန် တည်နေရာကိုသာ အတည်ပြုနိုင်ခြင်း ဖြစ်ပြီး ဘေးကင်းဇုန်၏ ပုံသဏ္ဌာန်မှာ ပုံမှန်အတိုင်း ဟုတ်မဟုတ်ဆိုသည်မှာတော့ မသေချာသေးချေ။

မှတ်သားပြီးနောက် ရှောင်းယီက ချက်ချင်း အမိန့်ပေးလိုက်သည်။

"ပြန်ကြမယ်...။"

လိုက်လံဖမ်းဆီးသူ မရှိတော့သဖြင့် ကျန်ရှိသော ခရီးစဉ်မှာ များစွာ စိတ်ချမ်းသာစရာ ကောင်းနေတော့သည်။

ရှောင်းယီသည် ဆေးကြောထားသော ပန်းသီးတစ်လုံးကို ထုတ်ယူကာ ကိတ်မုန့်စားသလို မြိန်ရေရှက်ရေ ဝါးစားရင်း အများသုံးချန်နယ်ကို စောင့်ကြည့်နေမိသည်။

"ကြီးမားတဲ့ ရှာဖွေတွေ့ရှိမှုကြီးပဲဟေ့။ ငါတို့ ပတ်ပတ်လည်မှာရှိတဲ့ ဥက္ကာခဲပတ်လမ်းထဲမှာ အနက်ရောင်ရွှေ မြင့်မားစွာပါဝင်တဲ့ ဥက္ကာခဲတွေ တော်တော်များများ ရှိနေတယ်။"

"တကယ်ကြီးလား။ ငါ စုဆောင်းရသမျှကတော့ သာမန် သတ္တုအရင်းအမြစ်တွေနဲ့ ရေအရင်းအမြစ်တွေချည်းပဲ ဖြစ်နေတယ်။ ဒါက ဘာကြောင့်လဲ။"

"ဒါတော့ ငါလည်း မသိဘူး။ ငါ အခုတင် စုဆောင်းလို့ ပြီးသွားတဲ့ ဥက္ကာခဲရိုင်းကြီးဆီကနေ အနက်ရောင်ရွှေ ၂ သောင်းလောက် ရလိုက်တယ်။ ငါ့ဆီကို ကံကောင်းခြင်းနတ်သမီး ရောက်လာတာများလား။"

"ဘာ... ၂ သောင်းတောင်လား။ ဒါ...တော်တော်များတာပဲ။"

"ဟုတ်ပါ့။ မင်းရဲ့ စုဆောင်းချိန်နဲ့ တွက်ကြည့်ရင် ဒီပမာဏက ဥက္ကာခဲမိုးရွာသွန်းမှုတုန်းက ဥက္ကာခဲတွေထက်တောင် ပါဝင်မှုနှုန်း ပိုမြင့်နေသေးတယ်။ ဒီလို ဥက္ကာခဲမျိုးကို ဘယ်လိုလုပ်ပြီး သွားဖမ်းမိသွားတာလဲ။"

"ငါ ဥက္ကာခဲပတ်လမ်းထဲ ရောက်တာနဲ့ တွေ့တဲ့ ဥက္ကာခဲတစ်ခုကို လှမ်းဖမ်းပြီး စုဆောင်းလိုက်တာပဲ။ ဒီလောက် ဥက္ကာခဲတွေ အများကြီးထဲမှာ ဘယ်ဥက္ကာခဲထဲ ဘာရှိမလဲဆိုတာ ဘယ်သူမှ မသိနိုင်ဘူးလေ။ အားလုံးက ကံတရားပေါ်မှာပဲ မူတည်နေတာ မဟုတ်ဘူးလား။"

"ဟူး... ကမ္ဘာ့စည်းမျဉ်းတွေက ငါတို့ကို ပေးတဲ့ စမ်းသပ်ချက်တွေက ကိုယ့်ရဲ့ ကံတရားပေါ်မှာပဲ လုံးဝ မူတည်နေတယ်ဆိုတာကို ငါ သဘောပေါက်သွားပြီ။"

"ဟုတ်ပါ့။ ငါ့လို ကံမကောင်းတဲ့လူမျိုးကျ ဘယ်လိုလုပ်ပြီး ရှင်သန်ရတော့မှာလဲ။"

"ကိုယ့်ကံကြမ္မာကို ညည်းတွားမနေကြပါနဲ့။ ကံတရားဆိုတာ ထိန်းချုပ်လို့မရတဲ့ အရာတစ်ခုပဲ။ စိတ်အေးအေးထားပြီး ကိုယ့်ဘာသာ ဖွံ့ဖြိုးတိုးတက်အောင်ပဲ အာရုံစိုက်ထားကြစမ်းပါ။ အခွင့်အရေး ရောက်လာတဲ့အခါမှ လက်လွှတ် ဆုံးရှုံးလိုက်ရတာမျိုး မဖြစ်ပါစေနဲ့။ အဲဒါကမှ တကယ့်ကို နောင်တရစရာ ဖြစ်လိမ့်မယ်။"

"အမှန်ပဲ။ ပထမအဆင့်တုန်းကလည်း ကံတရားကို မကိုးစားခဲ့ဘဲနဲ့ ဒီအထိ ဖြတ်သန်းလာနိုင်ခဲ့တာပဲ မဟုတ်ဘူးလား။"

"သေစမ်း... ငါလည်း ကံမကောင်းဘူးလို့ ပြောမလို့ပဲ ရှိသေးတယ်။ ဒါကြီး ထွက်လာတယ်ဟေ့။ [ပစ္စည်းစုဆောင်းကိရိယာ ထုတ်လုပ်မှုပုံစံ] (အဆင့် B) ၁။"

"ဝိုး... တကယ့်ကို အားကျမိတယ်ကွာ။ စိတ်ဓာတ်မြှင့်တင်ရေး စကားတွေ နားမထောင်ချင်တော့ဘူး။ ငါလည်း ကံကောင်းချင်ပြီ။ ကံကောင်းခြင်းနတ်သမီးလေးရေ... ငါ့ဘက်ကို လှည့်ကြည့်ပေးပါဦး။"

လူတိုင်း ထိုအဆင့် B ပစ္စည်းစုဆောင်းကိရိယာကို မြင်လိုက်ရပြီးနောက် ခုနတင် မျိုချထားမိသည့် စိတ်ဓာတ်မြှင့်တင်ရေး ကြက်စွပ်ပြုတ်များကို ချက်ချင်း ပြန်အန်ထုတ်လိုက်ကြတော့သည်။

"လူအချင်းချင်း ဘာလို့ ဒီလောက်တောင် ကွာဟချက် ကြီးမားရတာလဲ။ ငါတို့အားလုံး သာမန်အဆင့် စုဆောင်းကိရိယာတွေကို သုံးနေရတုန်းပဲရှိသေးတယ်။ သူက ဘာလို့ B အဆင့်ကြီး ရသွားရတာလဲ။"

"သာမန်အဆင့် စုဆောင်းကိရိယာက ဥက္ကာခဲမိုးကြောင့် ရောက်လာတဲ့ ဥက္ကာခဲတွေဆီကနေ တစ်မိနစ်ကို အနက်ရောင်ရွှေ တစ်ယူနစ်ပဲ စုဆောင်းနိုင်တယ်။ ဒီ B အဆင့်ကိရိယာဆိုရင် တစ်မိနစ်ကို လေးယူနစ်လောက် စုဆောင်းနိုင်မှာ မဟုတ်ဘူးလား။"

"အနည်းဆုံး လေးယူနစ်ပဲ။ ဒါက စွမ်းဆောင်ရည်ပိုင်းမှာ အဆမတန် မြင့်တက်သွားတာပဲ။ တကယ့်ကို အားကျစရာပဲ။"

"အားလုံးပဲ ငါ့ကို အားမကျကြပါနဲ့။ ငါ ဥက္ကာခဲမိုးရွာတုန်းက ဥက္ကာခဲတစ်လုံးမှ ကြားဖြတ် မဖမ်းဆွဲနိုင်ခဲ့ဘူး။"

"မဖြစ်နိုင်တာ။ ဘာလို့ မင်းရဲ့ အရေးပေါ်ကယ်ဆယ်ရေးယာဉ်ကို သုံးပြီး တစ်လုံးလောက် မထိန်းထားခဲ့တာလဲ။"

"ငါ မလုပ်ရဲလို့လေ။ ဥက္ကာခဲတွေ အများကြီး တစ်ပြိုင်နက် ပျံသန်းလာတာကို မြင်ရတာ အရမ်း ကြောက်ဖို့ကောင်းလွန်းတယ်။ ဘေးကင်းဖို့အတွက် ဘေးနားမှာပဲ ကပ်ပုန်းနေလိုက်ရတယ်။"

"ညီအစ်ကို... မင်းကလည်း အရမ်းဂရုစိုက်လွန်းနေတာပဲ။ သတ္တိရှိမှ ချမ်းသာမှာပေါ့။"

"ငါကတော့ ဘေးကင်းကင်းနဲ့ ကစားရတာကိုပဲ ပိုသဘောကျတယ်။"

"မြင်းဆိုတာ ညဘက် မြက်မစားရင် မဝလာနိုင်ဘူး။ လူဆိုတာလည်း မထင်မှတ်တဲ့ လာဘ်မပွင့်ရင် မချမ်းသာနိုင်ဘူး။ ဒီလို ဘေးကင်းကင်းနဲ့ပဲ သွားနေရင် အဆင့်မြှင့်တင်ဖို့ လိုအပ်တဲ့ အရင်းအမြစ်တွေကို ဘယ်လောက်တောင် ကြာအောင် စုနေရမှာလဲ။"

"ရပါတယ်။ အခု ငါ့မှာ အဆင့်မြင့် စုဆောင်းကိရိယာ ရှိနေပြီဆိုတော့ မကြာခင်မှာ အပျက်အစီးမြေပုံကို စုဆောင်းမိလိမ့်မယ်။ အာကာသယာဉ် ရဖို့အတွက်တော့ အပျက်အစီးနေရာတွေကိုပဲ အားကိုးရတော့မှာပဲ။"

"ဟူး... အပျက်အစီးနေရာတွေကို အားကိုးရတာလည်း မသေချာပါဘူး။ ဘာပဲဖြစ်ဖြစ် အပျက်အစီးတွေက ဘေးကင်းဇုန် မဟုတ်တဲ့နေရာတွေမှာ ရှိနေနိုင်တာပဲ။ အဲဒီကို သွားတာက ပိုပြီး မြန်မြန်သေအောင် လုပ်သလိုပဲ ဖြစ်လိမ့်မယ်။"

"အခုလောလောဆယ် ငါတို့အတွက် အပျက်အစီးတွေအကြောင်း လုံးဝ အမှောင်ကျနေပြီး ဘာမှ မသိရသေးဘူး။ တစ်ယောက်ယောက်က ငါတို့အတွက် လမ်းသွားစူးစမ်းပေးရင် အရမ်းကောင်းမှာပဲ။"

ထိုအခြေအနေကို မြင်လိုက်ရသောအခါ ရှောင်းယီ အနည်းငယ် စဉ်းစားလိုက်ပြီး အချိန်ကို စစ်ဆေးကြည့်ရာ ညကိုးနာရီကျော်နေပြီ ဖြစ်သည်။ ထို့ကြောင့် သူက အများသုံးချန်နယ်တွင် မက်ဆေ့ခ်ျတစ်ခု တင်လိုက်သည်။

"မင်္ဂလာပါ အသက်ရှင်ကျန်ရစ်သူတို့...ငါ အခုတင် အပျက်အစီးနေရာတစ်ခုကို အောင်မြင်စွာ တူးဖော်ပြီး သတင်းအချက်အလက်အချို့ ရရှိခဲ့ပါတယ်။ အခု ဒီသတင်းအချက်အလက်တွေကို အနက်ရောင်ရွှေ ၅ ယူနစ်နဲ့ ရောင်းချဖို့ ပြင်ဆင်နေပါတယ်။ ဒီအချက်အလက်တွေထဲမှာ အနည်းဆုံး ဒီတစ်ခေါက် ပျက်စီးနေတဲ့ အာကာသယာဉ်ကို ပြုပြင်ဖို့ လိုအပ်တဲ့ အရင်းအမြစ်ပမာဏ၊ အပျက်အစီးနေရာရဲ့ အတွင်းပိုင်းအခြေအနေ၊ အာကာသယာဉ်ကို မောင်းထွက်လာပြီးနောက် ဘယ်လောက်အကြာမှာ အာကာသယာဉ် တိုက်ခိုက်မှုကို ရင်ဆိုင်ခဲ့ရလဲ၊ ငါ့ကို တိုက်ခိုက်ခဲ့တဲ့ အာကာသယာဉ်ရဲ့ အဆင့်နဲ့ ငါ အတည်ပြုနိုင်ခဲ့တဲ့ ဘေးကင်းဇုန်ရဲ့ တိကျတဲ့ တည်နေရာ စတာတွေ အားလုံး ပါဝင်ပါတယ်။"

ရှောင်းယီ၏ မက်ဆေ့ခ်ျကို မြင်လိုက်ရသောအခါ အများသုံးချန်နယ်တစ်ခုလုံး ခဏမျှ ဆိတ်ငြိမ်သွားပြီးနောက် ချက်ချင်းပင် ဆွေးနွေးမှုများဖြင့် ဆူညံပွက်လောရိုက်သွားတော့သည်။

"အားးး ဒါကမှ တကယ့် ဆရာကြီးပဲ။ ငါတို့က ဆွေးနွေးရုံပဲ ရှိသေးတယ်။ ဆရာကြီးက အပျက်အစီးနေရာတစ်ခုကိုတောင် ရှင်းလင်းပြီးသွားပြီ။"

"ဒါတင်မကသေးဘူး။ သတင်းအချက်အလက် အမြောက်အမြားကိုပါ အနှစ်ချုပ်ပေးထားသေးတယ်တဲ့လား။ ဆရာကြီးက အရမ်း အံ့ဩဖို့ကောင်းတာပဲ။ ကျွန်တော် တစ်စုံ ဝယ်မယ်ဗျာ။"

"ဆရာကြီးက အနက်ရောင်ရွှေ ၅ ယူနစ် တောင်းတယ်လို့ ကြားတုန်းက သူ့သတင်းအချက်အလက်က ဘာလို့ ဒီလောက်တောင် ဈေးကြီးရတာလဲလို့ ညည်းမိမလို့။ ဒါပေမဲ့ သူနောက်က ပြောပြတဲ့အချက်တွေကို ကြားပြီးတာနဲ့ ငါ ချက်ချင်း ဝယ်လိုက်ပြီ။"

"ဟုတ်တယ်။ ဆရာကြီးက ဈေးကြီးကြီးတောင်းလို့ အနက်ရောင်ရွှေကို ရူးသွပ်နေတာနေမှာလို့ ပြောမလို့ပဲ ရှိသေးတယ်။ ဒါပေမဲ့ ဒါပ ကုန်ရကျိုး တကယ်နပ်လိမ့်မယ်လို့ မမျှော်လင့်ထားမိဘူး။"

ယနေ့တွင် လေးဆတိုးအခြေအနေရှိနေသဖြင့် ရှောင်းယီအနေဖြင့် ၎င်းကို အပြည့်အဝ အသုံးချရမည် ဖြစ်သည်။ လောလောဆယ်တွင် တခြား ထူးခြားသော ဖွံ့ဖြိုးတိုးတက်မှု မရှိသေးသဖြင့် သူ ယခုရရှိခဲ့သော အပျက်အစီးနေရာ၏ သတင်းအချက်အလက်အပေါ်တွင်သာ အားကိုးရမည် ဖြစ်သည်။

လူများသည် ရှောင်းယီထံသို့ သီးသန့်မက်ဆေ့ခ်ျများ ဆက်တိုက် ပို့လာကြပြီး ကုန်သွယ်မှုများကို စတင်လုပ်ဆောင်ကြတော့သည်။

"အနက်ရောင်ရွှေ ၅ - အခမဲ့လဲလှယ်ခြင်း။"

သူ တည်ဆောက်ထားခဲ့သော နာမည်ကောင်းမှာ နောက်ဆုံး၌ အသုံးဝင်လာခဲ့ပြီ ဖြစ်သည်။ ရှောင်းယီက ၎င်းတို့၏ အနက်ရောင်ရွှေများကို ယူပြီး ထွက်ပြေးလိမ့်မည်ဟု မည်သူမျှ မသံသယမဖြစ်ကြချေ။

ဤတစ်ကြိမ် အရောင်းအဝယ် ပြုလုပ်မှုသည် ရှောင်းယီကို ပိုမိုအံ့အားသင့်စေခဲ့၏။ အကြောင်းမှာ စုစုပေါင်း အရောင်းအဝယ်ပမာဏ သုံးသန်းကျော်အထိ ရှိခဲ့သောကြောင့် ဖြစ်သည်။

"ဒီတစ်ခေါက် ကုန်ကျစရိတ်က အတော်လေး မြင့်မားတာမို့ ကျုပ်အနေနဲ့ အများသုံးချန်နယ်ထဲမှာ တင်ပေးမှာ မဟုတ်ပါဘူး။ အားလုံးပဲ ခဏလောက် စောင့်ပေးကြပါ။ ငွေပေးချေပြီးသား အသက်ရှင်ကျန်ရစ်သူ အားလုံးဆီကို အုပ်စုလိုက်စာတိုအနေနဲ့ ပို့ပေးသွားပါမယ်။"

ရှောင်းယီက အဖွဲ့ချက်ထဲတွင် ပြောလိုက်သည်။

အနက်ရောင်ရွှေ ၅ ယူနစ်လေးကိုပင် မပေးချေချင်ဘဲ အလကား နှိုက်စားချင်နေကြသူများမှာ ကြောင်အမ်းကာ ဆွံ့အသွားကြရတော့သည်။