အခန်း ၁၀၇

(အခန်း) ၁၀၇ အမှု၏ အမှန်တရားနှင့် ဆုကြေးငွေ

"မင်္ဂလာပါ ခေါင်းဆောင်..."

ရိုအန်က တံခါးကို ခေါက်လိုက်ပြီး ဗီရိုနီးစ်၏ ရုံးခန်းအတွင်းသို့ ဝင်ရောက်သွားလေသည်။ ဗီရိုနီးစ်မှာ ယခင်အတိုင်း စာရွက်စာတမ်းများကို ခေါင်းငုံ့ကာ ရေးသားနေဆဲ ဖြစ်ပေသည်။

"ထိုင်ပါ..."

ဗီရိုနီးစ်၏ လေသံမှာ ယခင်အတိုင်း တည်ငြိမ်နေလေသည်။

ရိုအန်ကို ထိုင်ရန် အချက်ပြပြီးနောက် ဗီရိုနီးစ်က လက်ထဲရှိ စာရွက်စာတမ်းများကို မှောက်ချလိုက်ပြီး ခြေချိတ်ထိုင်ကာ ရိုအန်ကို ခေါင်းမော့ကြည့်လိုက်ချေသည်။

"အရှေ့ပိုင်း ဘဏ်ဓားပြတိုက်မှု လေးခုမှာ နေရာလာကြည့်တဲ့ သူတွေကို ဖမ်းမိပြီလို့ သြဂတ်စ် စောစောက ပြောသွားတယ်..."

"မှန်ပါတယ်..."

ရိုအန်က ပြုံးလျက် ခေါင်းညိတ်ပြလိုက်လေသည်။ ချဒ်၏ မည်သူမည်ဝါဖြစ်ကြောင်းကို မိတ်ဆက်ပေးပြီးနောက် လက်ထဲရှိ သဲလွန်စများနှင့် အချက်အလက်များ အားလုံးကို အခြေခံ၍ ဤအမှု၏ ဖြစ်စဉ်ကို ဗီရိုနီးစ်အား အကြမ်းဖျင်း ရှင်းပြလိုက်ပေသည်။

ကယ်လီဖိုးနီးယား ပြည်နယ်တွင် တည်ရှိသော ရွှေရောင်အလင်း ရုပ်ရှင်ကုမ္ပဏီမှာ စီမံခန့်ခွဲမှု ညံ့ဖျင်းသဖြင့် ငွေကြေးဆိုင်ရာ ပြဿနာများ ပေါ်ပေါက်လာပြီး ဒေဝါလီခံရမည့် အခြေအနေသို့ ရောက်ရှိနေချေသည်။

ရွှေရောင်အလင်း ရုပ်ရှင်ကုမ္ပဏီ၏ သူဌေး ဟင်နရီနှင့် ဖအေတူ မအေကွဲ ညီအစ်ကို တော်စပ်သူမှာ အခြားနိုင်ငံများတွင် ဆယ်နှစ်ကျော်ကြာ စစ်မှုထမ်းခဲ့ပြီး ဤနှစ်အစောပိုင်းကမှ နိုင်ငံသို့ ပြန်လည်ရောက်ရှိလာသော အမေရိကန် စစ်သား အိုင်ဇက် ပင် ဖြစ်လေသည်။ ထိုအကြောင်းကို သိရှိသွားပြီးနောက် အိုင်ဇက်က သူ၏ အစ်ကိုဖြစ်သူကို ကူညီရန် ဆုံးဖြတ်လိုက်ပေသည်။

အိုင်ဇက် အနေဖြင့် ငွေကို လွယ်လွယ်ကူကူ ရလိုသောကြောင့်သာ ဖြစ်ပြီး အစ်ကိုဖြစ်သူကို ကူညီခြင်းမှာ နောက်မှ ပေါ်လာသော အကြံအစည် ဖြစ်နိုင်ခြေကိုလည်း ဖယ်ထုတ်၍ မရနိုင်ချေ။

တိုက်ဆိုင်စွာပင် ထိုအချိန်၌ ဖလက်ချာက သူ၏ ဇာတ်ညွှန်းကို ဟောလိဝုဒ်ဘက်သို့ ပေးပို့ကာ မှတ်ပုံတင်ခဲ့လေသည်။

အိုင်ဇက်သည် မည်သည့် နည်းလမ်းကို အသုံးပြုခဲ့သနည်း မသိရသော်လည်း ဟင်နရီ၏ လမ်းကြောင်းမှ တစ်ဆင့် ထိုဇာတ်ညွှန်းကို ရရှိသွားခဲ့ပေသည်။

ထိုဇာတ်ညွှန်းကို အကြမ်းဖျင်း ဖတ်ရှုပြီးနောက် သူ၏ အတွေ့အကြုံများအရ အနည်းငယ် ပြင်ဆင် မွမ်းမံလိုက်လေသည်။ ထို့နောက် အိုင်ဇက်က လေယာဉ်စီးကာ နယူးယောက်သို့ ချက်ချင်း ထွက်ခွာလာပြီး ယခင်က သူနှင့်အတူ စစ်တိုက်ခဲ့ဖူးသော ရဲဘော်ဟောင်း ဟိုဆေးကို လာရောက် ရှာဖွေခဲ့ချေသည်။

ဟိုဆေး၏ ဘဝနေထိုင်မှု အဆင့်အတန်းမှာ အမြဲတမ်း ဆိုးရွားနေခဲ့သဖြင့် သူ၏ ရဲဘော်ဟောင်း၏ ဖျောင်းဖျမှုကို အလွယ်တကူ လက်ခံသွားခဲ့ပေသည်။

သို့သော် ဟိုဆေးမှာ လိင်တူချစ်သူ အမျိုးသား တစ်ဦး ဖြစ်နေကြောင်းကို သတိရသွားသောအခါ အိုင်ဇက် အနေဖြင့် ဟိုဆေးကို ဖျောင်းဖျရသည့် လုပ်ငန်းစဉ်မှာ ထိုမျှအထိ ရိုးရှင်းလိမ့်မည် မဟုတ်ကြောင်း ရိုအန် တွေးတောမိလိုက်လေသည်။

အိုင်ဇက်က ဟိုဆေးကို မည်ကဲ့သို့ ဖျောင်းဖျခဲ့သည် ဖြစ်စေ ထိုလူနှစ်ဦးမှာ အချိန်အတန်ကြာ သေချာစွာ စီစဉ်ပြီးနောက် နယူးယောက်တွင် တရားဝင် စတင် လှုပ်ရှားခဲ့ကြပေသည်။

လမ်းသွားလမ်းလာ တစ်ဦး မြင်တွေ့ခဲ့ရသော တက်တူး မှာလည်း ဇာတ်ညွှန်းထဲတွင် ရေးသားထားသည့်အတိုင်း ဟိုဆေးက ရဲတပ်ဖွဲ့ကို လှည့်စားရန် ရည်ရွယ်ချက်ဖြင့် လက်မောင်းပေါ်တွင် တမင်တကာ ရေးဆွဲထားခြင်း ပင် ဖြစ်လေသည်။

ဟိုဆေးအား တက်တူး ရေးဆွဲပေးခဲ့သူမှာ မည်သူနည်း ဆိုသည်နှင့် ပတ်သက်၍ ဝီလျံ အပါအဝင် နည်းပညာ ကျွမ်းကျင်သူများ ရှာဖွေတွေ့ရှိထားသော အချက်အလက်များအရ အိုင်ဇက်သည် စစ်မှုထမ်းနေစဉ် ကာလက တက်တူးထိုးခြင်းကို သင်ယူခဲ့ဖူးပြီး အသင်းဖော်များကို တက်တူး ထိုးပေးခဲ့ဖူးကြောင်း သိရှိရချေသည်။

"ဒီ အမှု တစ်ခုလုံး ရဲ့ အကြမ်းဖျင်း ဖြစ်စဉ် ကတော့ ဒီအတိုင်း ပါပဲ..."

ရိုအန်က မိမိ မျက်စိရှေ့ရှိ ကောက်ကြောင်း အချိုးအစား ပြေပြစ်လှသော ခန္ဓာကိုယ်ကို ကြည့်ကာ ပါးစပ်ကြီးဖြဲ၍ ပြုံးလျက် စကားဆိုလိုက်လေသည်။

"ကျွန်တော်တို့ အမှတ် ၅ စုံစမ်းစစ်ဆေးရေးအဖွဲ့ အနေနဲ့ ဆက်လုပ်ဖို့ ကိစ္စ နှစ်ခု ကျန်နေပါသေးတယ်... ပထမ တစ်ခု က ကျန်တဲ့ ဘဏ်ဓားပြတိုက်မှု သုံးခု မဖြစ်ခင် နေရာလာကြည့် တဲ့ သူတွေကို ရှာဖွေဖို့ ဖြစ်ပြီး... ဒုတိယ တစ်ခု ကတော့ ဟိုဆေး နဲ့ အိုင်ဇက် ကို ချက်ချင်း ဖမ်းဆီး ဖို့ပါပဲ... သြဂတ်စ် က ဒီ တာဝန် နှစ်ခု စလုံး ကို အသေအချာ ခွဲဝေ ချထား ပေးပြီးပါပြီ..."

သေချာသည်မှာ ဤအမှု တစ်ခုလုံးတွင် အဖြေမရသေးသော ပြဿနာ တစ်ခု ကျန်ရှိနေသေးလေသည်။ ၎င်းမှာ ပဉ္စမမြောက်နှင့် ဆဋ္ဌမမြောက် ဓားပြတိုက်မှုများမှ ဓားပြများ ဖြစ်သော ဘရန်ဒန် ပြောဆိုခဲ့သည့် ပျောက်ဆုံးနေသော အပျော်မယ်များနှင့် ပြည့်တန်ဆာ ခေါင်းဆောင်တို့၏ ကိစ္စ ပင် ဖြစ်ပေသည်။

သို့သော် ထိုလူများ အားလုံးမှာ ထိုနယ်မြေရှိ လူမိုက်ဂိုဏ်းများနှင့် ပတ်သက်နေကြောင်းကို စဉ်းစားမိသောအခါ နောင်တစ်ချိန် နော်တန် နှင့်အတူ ငါးသွားမျှားသည့် အချိန်ကျမှ သူ၏ ဘက်တွင် ၎င်းနှင့် ပတ်သက်သော သတင်းများ ရှိမရှိ စုံစမ်းကြည့်ရန် ရိုအန် ဆုံးဖြတ်လိုက်လေသည်။

"အရမ်း ကောင်းတယ်..."

ရိုအန်၏ ရှင်းပြချက်ကို နားထောင်ပြီးနောက် ဗီရိုနီးစ်၏ မျက်လုံးအိမ်များ ကျဉ်းမြောင်းသွားပြီး နှုတ်ခမ်းထောင့်များ မြင့်တက်သွားကာ အလွန် ကျေနပ်သော အမူအရာဖြင့် ခေါင်းညိတ်လိုက်ချေသည်။

ထို့နောက် ရိုအန် စကားပြန်ပြောခွင့် မရလိုက်မီမှာပင် ဗီရိုနီးစ်၏ မျက်နှာထားမှာ မူလအတိုင်း ပြန်လည် တည်ငြိမ်သွားလေသည်။ ချောင်းတစ်ချက် ဟန့်လိုက်ပြီးနောက် အေးအေးဆေးဆေးပင် စကားဆိုလိုက်ပေသည်။

"အမှု က ဖော်ထုတ် နိုင်သွားပြီ ဆိုတော့... ဒီကိစ္စ ကို အထက် လူကြီး တွေဆီ ခဏနေရင် ငါ သွားပြီး အစီရင်ခံ လိုက်မယ်... ဒီတစ်ခါ မင်း လိုက်ခဲ့စရာ မလိုဘူး..."

ဗီရိုနီးစ်၏ စကားကို ကြားလိုက်ရသောအခါ ရိုအန်၏ မျက်နှာပေါ်တွင် မည်သည့် မကျေနပ်မှုမျှ မရှိဘဲ အပြုံးများက ဆက်လက် တည်ရှိနေလေသည်။

ရိုအန်ကိုယ်တိုင်မှာ သာမန် အောက်ခြေ အဆင့် စုံထောက် တစ်ဦးသာ ဖြစ်လေသည်။ ဌာနခွဲမှူး ဗီရိုနီးစ်ထံသို့ မကြာခဏ လာရောက် တွေ့ဆုံခြင်းကို အဖွဲ့ခေါင်းဆောင် သြဂတ်စ် ကိုယ်တိုင် ခွင့်ပြုထားပြီး သူတို့ အားလုံးမှာ ကိုလံဘတ်စ် ရန်ပုံငွေအဖွဲ့ တစ်ခုတည်းမှ ဖြစ်နေသောကြောင့် ပင် ဖြစ်ချေသည်။

အထူးကိုယ်စားလှယ် ဌာနမှူး ကော်ဘတ် မှာ ဌာနခွဲမှူးများ၏ အထက်လူကြီး ဖြစ်သော်လည်း တစ်ဖက်လူနှင့် ကိုလံဘတ်စ် ရန်ပုံငွေအဖွဲ့ အကြား မည်သို့သော ဆက်နွှယ်မှု ရှိကြောင်းကို ဗီရိုနီးစ် နှင့် သြဂတ်စ် တို့ထံမှ ရိုအန် တစ်ခါမှ မကြားဖူးခဲ့ပေ။

ဗီရိုနီးစ် ဆိုသော အားကိုးရာ တောင်ပို့ကြီးမှာ မှီခိုရသည်မှာ အလွန် သက်သောင့်သက်သာ ရှိလှသဖြင့် ရိုအန် အနေဖြင့် လက်ရှိအချိန်တွင် အခြားသူတစ်ဦးထံသို့ ပြောင်းလဲ မှီခိုလိုသော စိတ်ကူး လုံးဝ မရှိသေးချေ။

ထို့ကြောင့် ကော်ဘတ် ကဲ့သို့သော အက်ဖ်ဘီအိုင် အထက်အရာရှိကြီးမျိုးကို တတ်နိုင်သမျှ မတွေ့ဆုံခြင်းက ပို၍ ကောင်းမွန်မည်ဟု ရိုအန် တွေးတောမိလေသည်။

ပထမ အချက်မှာ မိမိ အနေဖြင့် ခေါင်းဆောင် ပြောင်းလဲလိုသော စိတ်ကူး မရှိကြောင်း ဗီရိုနီးစ်ကို စိတ်အေးစေရန် ဖြစ်ပြီး ဒုတိယ အချက်မှာမူ...

တစ်ဦးမှာ တစ်ကြိမ်သာ တွေ့ဆုံဖူးပြီး စကားဆယ်ခွန်းပင် မပြည့်အောင် ပြောဆိုခဲ့ဖူးကာ မိမိအပေါ် မည်သို့သော သဘောထား ရှိကြောင်းကို မသိရသည့် အပြင် ထိပ်ပြောင်နေသော လူဖြူ အဘိုးကြီး တစ်ဦး ဖြစ်လေသည်။

အခြားတစ်ဦးမှာမူ အကြိမ်ပေါင်းများစွာ တွေ့ဆုံဖူးပြီး စကားအများအပြား ပြောဆိုဖူးကာ မိမိကို အလွန် အသိအမှတ်ပြုသော အပြင် ကောက်ကြောင်း အချိုးအစား အလွန် ပြေပြစ်လှသည့် ဆွဲဆောင်မှု အပြည့်ရှိသော အမျိုးသမီး အထက်အရာရှိ တစ်ဦး ပင် ဖြစ်ချေသည်။

မည်သူ့ကို ရွေးချယ်ရမည် ဆိုသည်ကို အရူးပင်လျှင် သိနိုင်လေသည်။

"အရမ်း ကောင်းတယ်..."

ဗီရိုနီးစ်၏ စကားကို ကြားပြီးနောက် ရိုအန်၏ မျက်နှာပေါ်တွင် မည်သည့် မကျေနပ်မှုမျှ မပေါ်ထွက်လာသည်ကို မြင်တွေ့လိုက်ရသောအခါ ဗီရိုနီးစ်၏ မျက်နှာထားမှာ ပြောင်းလဲခြင်း မရှိသော်လည်း ရင်ထဲတွင်မူ အလွန် ကျေနပ်နေမိချေသည်။

တကယ်ကိုပင် သူမ လူရွေး မမှားခဲ့ပေ။ ထို့ကြောင့် ဗီရိုနီးစ် က အပိုစကားများ မပြောတော့ဘဲ တိုက်ရိုက်ပင် စကားဆိုလိုက်လေသည်။

"ဒီ အမှု ကို သတ်မှတ် ထားတဲ့ အချိန် အတွင်း အောင်မြင်စွာ ဖြေရှင်း နိုင်ခဲ့ရင် မင်း ကို အကြီးတန်း စုံထောက် အဖြစ် ရာထူး တိုးပေးမယ် လို့ အရင်က ငါ ပြောခဲ့ဖူးတယ်... ပြီးခဲ့တဲ့ တစ်ခေါက် မင်းကို ခေါ်ပြီး အထူးကိုယ်စားလှယ် ဌာနမှူး ဆီ သွားတွေ့ တုန်းက လည်း တစ်ဖက်လူ က ဒီ အချက် ကို သဘောတူ ထားပြီးသား ပါ..."

"ဒီ အမှု ကို လုံးဝ အပြီးသတ် ဖြေရှင်း ပြီးသွား ရင်... သက်ဆိုင်ရာ စာရွက်စာတမ်း တွေက မင်းတို့ အမှတ် ၅ စုံစမ်းစစ်ဆေးရေးအဖွဲ့ ဆီကို တရားဝင် ရောက်လာ လိမ့်မယ်..."

"ကျေးဇူးတင်ပါတယ် ခေါင်းဆောင်..."

ထိုစကားကို ကြားလိုက်ရသောအခါ ရိုအန်၏ မျက်နှာပေါ်တွင် တောက်ပသော အပြုံးတစ်ခု ပေါ်ထွက်လာလေသည်။ စက္ကန့်အနည်းငယ်မျှ ရပ်တန့်သွားပြီးနောက် မျက်ခုံးများ တစ်ချက် ပင့်တက်သွားကာ စကားဆိုလိုက်ပေသည်။

"ဒါဆို ခေါင်းဆောင် ရော... ကျွန်တော် မှတ်မိ သလောက် ဆိုရင်..."

ယခင်က ဗီရိုနီးစ် ပြောခဲ့ဖူးသည်မှာ ဤအမှုကို ဖော်ထုတ်နိုင်ပါက သူမ အနေဖြင့် ရာထူး တစ်ဆင့် ထပ်တက်ရန် အခွင့်အရေး ရှိသည် ဟူ၍ ပင် ဖြစ်လေသည်။ ဌာနခွဲမှူး အနေဖြင့် ရာထူး တစ်ဆင့် ထပ်တက်မည် ဆိုပါက အထူးကိုယ်စားလှယ် ဌာနမှူး နေရာ ပင် ဖြစ်ချေသည်။

၎င်းမှာ ရိုအန် အနေဖြင့် ကော်ဘတ် နှင့် အများကြီး အဆက်အသွယ် မလုပ်လိုသော အခြား အကြောင်းရင်း တစ်ခုလည်း ဖြစ်ပေသည်။ မိမိ၏ အားကိုးရာ တောင်ပို့ကြီးက အထူးကိုယ်စားလှယ် ဌာနမှူး အသစ် ဖြစ်လာမည့် အခွင့်အရေး ရှိနေသည် ဆိုပါက အရင် အထူးကိုယ်စားလှယ် ဌာနမှူးကို သွားရောက် ဖားယား နေစရာ အကြောင်း မရှိတော့ချေ။

ရိုအန်၏ မေးခွန်းကို ကြားလိုက်ရသောအခါ ဗီရိုနီးစ် အနည်းငယ် ကြောင်အမ်းအမ်း ဖြစ်သွားရလေသည်။ အချိန်အနည်းငယ် ကြာပြီးနောက် ဗီရိုနီးစ်၏ မျက်လုံးအိမ်များ ကျဉ်းမြောင်းသွားပြီး ရိုအန်ကို နက်ရှိုင်းသော အဓိပ္ပာယ် များဖြင့် ကြည့်လိုက်လေသည်။ ခန္ဓာကိုယ်ကို နောက်သို့ မှီချလိုက်ပြီး ချိတ်ထားသော ခြေထောက်ကို ပြောင်းလဲ လိုက်ကာ အေးအေးဆေးဆေးပင် စကားဆိုလိုက်ပေသည်။

"အက်ဖ်ဘီအိုင် နယူးယောက် ဌာနခွဲ ရဲ့ အထူးကိုယ်စားလှယ် ဌာနမှူး အဖြစ် တာဝန် ထမ်းဆောင် လာတဲ့ ကော်ဘတ် ဟာ အလုပ်သက်တမ်း လည်း ရင့်သလို အလုပ်လုပ်နိုင်စွမ်း လည်း အလွန် ကောင်းမွန် လို့ ဝါရှင်တန် ဌာနချုပ် က သူ့ကို အာရုံစိုက် လာခဲ့ပြီ... မျှော်လင့် မထားတဲ့ ကိစ္စတွေ မဖြစ်လာဘူး ဆိုရင်... ကိုးလ အကြာမှာ သူ က ငါတို့ အက်ဖ်ဘီအိုင် နယူးယောက် ဌာနခွဲ ရဲ့ ညွှန်ကြားရေးမှူး နဲ့ ဒုတိယ ညွှန်ကြားရေးမှူး တို့နဲ့ အတူ ဝါရှင်တန် ဌာနချုပ် ကို ရာထူး တိုးမြှင့် ပြောင်းရွှေ့ သွားလိမ့်မယ်..."

"ကိုးလ ဟုတ်လား..."

ရိုအန်၏ မျက်လုံးများ အရောင်တောက်သွားပြီး ဗီရိုနီးစ်၏ စကားထဲမှ အဓိက သော့ချက် စကားလုံးများကို ချက်ချင်း ကောက်ယူ ဖမ်းဆုပ်လိုက်လေသည်။

"မှန်တယ်..."

ရိုအန်၏ တုံ့ပြန်မှု မြန်ဆန်ခြင်း အပေါ် ဗီရိုနီးစ်၏ မျက်လုံးများ အတွင်း၌ ကျေနပ် အားရသော အရိပ်အယောင်များ ပေါ်ထွက်လာချေသည်။

ဤနေရာသို့ ရောက်သောအခါ သူတို့ နှစ်ဦးစလုံး အကြောင်းအရာကို ပြောင်းလဲလိုက်ကြလေသည်။ ဗီရိုနီးစ် က အမှု၏ အသေးစိတ် အချက်အလက် အချို့ကို မေးမြန်းပြီးနောက် နေရာမှ ထရပ်ကာ ရုံးခန်း အတွင်းမှ ထွက်ခွာရန် ပြင်ဆင်လိုက်ပေသည်။

"အော် ဒါနဲ့..."

တစ်ဝက်ခန့် ထရပ်ပြီးမှ ဗီရိုနီးစ် က ကိစ္စ တစ်ခုကို ရုတ်တရက် သတိရသွားပြီး နေရာတွင် ပြန်လည် ထိုင်ချလိုက်ကာ ရိုအန် ကို စကားဆိုလိုက်လေသည်။

"ဒီ ဘဏ် ခြောက်ခု ကို ဓားပြတိုက် ခဲ့တဲ့ ဓားပြ တွေကို ဖမ်းမိ ရင်... အဲ့ဒီ ဘဏ် ခြောက်ခု က ဆုကြေးငွေ တစ်ချို့ ထုတ်ပေးမယ် လို့ အရင်က ငါ ပြောခဲ့ဖူး တာကို မှတ်မိ သေးလား..."

"မှတ်မိပါတယ်..."

ရိုအန် ခေါင်းညိတ်လိုက်လေသည်။ သူ အနေဖြင့် ဤအမှုကို ဖော်ထုတ်နိုင်ရန် မည်သည့် အတွက်ကြောင့် ဤမျှ အားထုတ် ကြိုးပမ်း နေရသနည်း ဆိုလျှင် ဤ ဆုကြေးငွေများ ကြောင့်ပင် မဟုတ်ပါလား။

"ဒါပေမဲ့ ဘဏ် ဆိုတာ ကလည်း ဘဏ် တွေပဲလေ... သူတို့ ပေးမယ့် ဆုကြေးငွေ က အရမ်းကြီး များပြား လိမ့်မယ် လို့တော့ မထင်နဲ့..."

ဗီရိုနီးစ်၏ စကားကို ကြားလိုက်ရသောအခါ ရိုအန်၏ မျက်နှာပေါ်တွင် မည်သည့် အမူအရာမျှ ပြောင်းလဲခြင်း မရှိပေ။ ဤအချက် အတွက် သူ ကြိုတင်၍ စိတ်ပိုင်းဆိုင်ရာ ပြင်ဆင်ထားပြီး ဖြစ်လေသည်။

အမေရိကန်ပြည်ထောင်စု မှာ အရင်းရှင် နိုင်ငံ တစ်ခု ဖြစ်ပြီး ဘဏ်များ ဆိုသည်မှာ အရင်းရှင်များထဲမှ အရင်းရှင်များ ပင် ဖြစ်ချေသည်။ အရင်က ဆာဘီနာ ကဲ့သို့ ဆုကြေးငွေ အဖြစ် အမေရိကန် ဒေါ်လာ တစ်သန်း အထိ ပေးလာလိမ့်မည် ဟု မျှော်လင့်ထားခြင်း မှာ သမ္မတကြီး ကိုယ်တိုင် လာရောက် တောင်းဆိုလျှင်ပင် ဖြစ်နိုင်မည် မဟုတ်ချေ။

မျှော်လင့်ထားသည့် အတိုင်းပင် ဗီရိုနီးစ် က ဆက်လက် စကားဆိုလေသည်။

"ဒီ အမှု ကို စပြီး လက်ခံ လိုက်ကတည်းက အဲ့ဒီ ဘဏ် တွေဆီ ငါ ဆက်သွယ် ခဲ့တယ်... ဒီ ဓားပြ တွေကို ဖမ်းမိ တဲ့ အခါ ကျရင် ဆုကြေးငွေ အဖြစ် အမေရိကန် ဒေါ်လာ တစ်သိန်း ကို ထုတ်ပေး ဖို့ သူတို့ အားလုံး က သဘောတူ ထားကြတယ်..."

ထိုစကားကို ကြားလိုက်ရသောအခါ ရိုအန်၏ မျက်လုံးများ အရောင်တောက် သွားတော့လေသည်။ ဤပမာဏ မှာ သူ ယခင်က ခန့်မှန်း ထားသည်ထက် အများကြီး ပိုမို များပြား နေပေသည်။

ဘဏ် တစ်ခုတည်းက ပေးသော ငွေပမာဏမှာ နည်းပါးသည် ဟု ထင်ရသော်လည်း ဓားပြတိုက် ခံခဲ့ရသော ဘဏ် အရေအတွက်မှာ များပြားနေသည် မဟုတ်ပါလား။

ဘဏ် တစ်ခုလျှင် အမေရိကန် ဒေါ်လာ တစ်သိန်း ဆိုပါက ဘဏ် ခြောက်ခု အတွက် စုစုပေါင်း ခြောက်သိန်း ပင် ဖြစ်ချေသည်။

သေချာသည်မှာ ဤငွေများ အားလုံးသည် အမှတ် ၅ စုံစမ်းစစ်ဆေးရေးအဖွဲ့မှ လူတိုင်းနှင့် သက်ဆိုင်ပေသည်။ သို့သော် ရိုအန် ရရှိမည့် ဝေစုမှာလည်း လုံးဝ နည်းပါးလိမ့်မည် မဟုတ်ချေ။

ရိုအန် တစ်ယောက် မိမိ အနေဖြင့် ငွေမည်မျှ ရရှိနိုင်မည်ကို ခေါင်းငုံ့ကာ တွက်ချက်နေစဉ်မှာပင် ဗီရိုနီးစ် က ဘေးနားရှိ ဖိုင်တွဲ များထဲမှ တစ်ခုကို ဆွဲထုတ်ကာ ရိုအန်၏ ရင်ခွင်ထဲသို့ ပစ်ပေါက်လိုက်ပြီး စကားဆိုလိုက်လေသည်။

"နောက်ထပ် ကိစ္စ တစ်ခု ကျန်သေးတယ်…”