အခန်း ၉၉၅

အခန်း (၉၉၅) - အင်မော်တယ်ကမ္ဘာမှ အပင် ဝိညာဉ်ကြောပန်း၊ ဖီးနစ်ကို ကယ်တင်ခြင်းနှင့် ရွှမ်ဟွမ်ကမ္ဘာမှ ရှေးဟောင်းပုဂ္ဂိုလ်များ (၂)

မှန်ပေသည်၊ ဝိညာဉ်ဆေးပင် မျိုးစေ့တစ်ခုစီတိုင်းသည် သာမန်မဟုတ်သော အာနိသင်များ အသီးသီး ရှိကြပေသည်။ သို့သော်ငြား သူ့အတွက်မူ ဝိညာဉ်ကြောပန်းသည်သာ ပို၍ ထူးခြားပြီး အရေးပါလှပေသည်။

"အဋ္ဌမအဆင့် ဝိညာဉ်ဆေးပင်... ဝိညာဉ်ကြောပန်းဟုတ်လား... အဲ့ဒါက ဘာဝိညာဉ်ဆေးပင်လဲ..."

ပိုင်စုကျဲ့၊ ဟွားစစ်ချင်၊ ထောင်ချီလီနှင့် စစ်ယွီရှီးတို့ မိန်းကလေးလေးယောက်စလုံးမှာ ကျိုးစွေ့ကို သိချင်စိတ်ပြင်းပြစွာဖြင့် ကြည့်နေကြ၏။ သူတို့သည် ဤကဲ့သို့သော ဝိညာဉ်ဆေးပင်မျိုးကို တစ်ကြိမ်တစ်ခါမျှ မကြားဖူးခဲ့သလို လူသားမျိုးနွယ်၏ မှတ်တမ်းများထဲတွင်လည်း မရှိခဲ့ပေ။

သို့ရာတွင် ဤသည်မှာလည်း အလွန် သာမန်ကိစ္စရပ်တစ်ခုပင် ဖြစ်လေသည်။ အဘယ်ကြောင့်ဆိုသော် ဤသည်မှာ အင်မော်တယ်ကမ္ဘာမှ လာသော အပင်မျိုးဖြစ်ပြီး ဝိညာဉ်လောကတွင် လုံးဝမရှိသောကြောင့်ပင်။

ဖီးနစ်အင်မော်တယ်စံအိမ်တော်၌သာ ဤကဲ့သို့သော ထူးခြားသည့် ဝိညာဉ်ဆေးပင်များ ရှိနိုင်ပြီး တန်ဖိုးဖြတ်မရအောင် အဖိုးတန်လှပေသည်။

"ဝိညာဉ်ကြောပန်းဆိုတာ ထူးခြားတဲ့ ပန်းတစ်မျိုးပဲ..."

"အကယ်လို့ စိုက်ပျိုးလိုက်ပြီး ကြီးထွားလာခဲ့မယ်ဆိုရင် သူက သဘာဝအတိုင်း ဝိညာဉ်ကြောတစ်ခုကို အလိုအလျောက် ဖြစ်တည်လာစေလိမ့်မယ်..."

"သူက လေဟာနယ်နက်ရှိုင်းတဲ့ နေရာကနေ ကောင်းကင်နဲ့မြေကြီး ဝိညာဉ်ချီတွေကို အလိုအလျောက် ဝါးမြိုနိုင်ပြီး ပတ်ဝန်းကျင်က ဝိညာဉ်ချီသိပ်သည်းဆကိုပါ မြင့်တက်လာစေနိုင်တယ်..."

"အင်မော်တယ်ကမ္ဘာမှာဆိုရင် အင်အားစု တော်တော်များများက သူတို့ရဲ့ ဌာနချုပ်တွေမှာ ဝိညာဉ်ကြောပန်းတွေကို စိုက်ပျိုးလေ့ရှိပြီး ဝိညာဉ်ချီသိပ်သည်းဆကို မြှင့်တင်လို့ ပတ်ဝန်းကျင်က ကျင့်ကြံခြင်းအခြေအနေကို ကောင်းမွန်အောင် လုပ်ဆောင်ကြတယ်လို့ ဆိုကြတယ်..."

ကျိုးစွေ့က ဝိညာဉ်ကြောပန်းတွင် ရှိနေသော စွမ်းရည်များကို ရိုးရှင်းစွာ ရှင်းပြလိုက်သည်။

"ပတ်ဝန်းကျင်က ဝိညာဉ်ချီသိပ်သည်းဆကိုတောင် မြှင့်တင်ပေးနိုင်တာလား..."

ထိုစကားကို ကြားသောအခါ ဟွားစစ်ချင်မှာ မျက်လုံးဝိုင်းသွားပြီး အလွန် အံ့အားသင့်သွားတော့သည်။

ဤဝိညာဉ်ဆေးပင်သည် အလွန်ထူးခြားကြောင်း သိသာထင်ရှားလှပြီး ကြီးမားသော အင်အားစုတစ်ခုအတွက်ဆိုလျှင် အမြင့်မြတ်ဆုံး ရတနာတစ်ခုပင် ဖြစ်ပေလိမ့်မည်။

"မှန်တယ်..."

"ပထမအဆင့် ဝိညာဉ်ကြောပန်းက ပထမအဆင့် ဝိညာဉ်ကြောကို ဖြစ်ပေါ်စေနိုင်ပြီး ဒုတိယအဆင့် ဝိညာဉ်ကြောပန်းက ဒုတိယအဆင့် ဝိညာဉ်ကြောကို ဖြစ်ပေါ်စေနိုင်တယ်..."

"ဒီလိုပဲ ဆက်တွက်ကြည့်မယ်ဆိုရင် အဋ္ဌမအဆင့် ဝိညာဉ်ကြောပန်းက အဋ္ဌမအဆင့် ဝိညာဉ်ကြောကို ဖြစ်ပေါ်လာစေနိုင်တယ်..."

"သေချာတာပေါ့... သဘာဝအတိုင်း ဖြစ်တည်နေတဲ့ ဝိညာဉ်ကြောအစစ်အမှန်တွေနဲ့ ယှဉ်လိုက်ရင် ဝိညာဉ်ကြောပန်းက လွှမ်းခြုံနိုင်တဲ့ အတိုင်းအတာက အရမ်းသေးငယ်တယ်..."

"ခန့်မှန်းခြေအားဖြင့် ပတ်လည် ၁ ကီလိုမီတာလောက်ပဲ ရှိလိမ့်မယ်..."

"ဒါပေမဲ့ အပင်ပေါင်း ထောင်သောင်းချီ... ဒါမှမဟုတ် သန်းနဲ့ချီပြီး အောင်မြင်အောင် စိုက်ပျိုးနိုင်မယ်ဆိုရင် လွှမ်းခြုံနိုင်တဲ့ ဧရိယာက သဘာဝအတိုင်း ဖြစ်တည်နေတဲ့ ဝိညာဉ်ကြောထက်တောင် ပိုကြီးမားလာလိမ့်မယ်... ဒါက လူလုပ်ဝိညာဉ်ကြောတစ်ခုနဲ့ တူတူပဲ..."

ကျိုးစွေ့က ပြုံးလိုက်၏။

"လူလုပ်ဝိညာဉ်ကြော ဟုတ်လား..."

ထောင်ချီလီ၏ မျက်လုံးအစုံမှာ ပြူးကျယ်သွားပြီး သူမ၏ရင်တွင်း၌ မုန်တိုင်းထန်နေသည့်အလား လှိုင်းတံပိုးများ ရိုက်ခတ်သွားလေသည်။ ဤသည်မှာ တကယ်ကို အံ့မခန်းပင် မဟုတ်ပါလော။

ဝိညာဉ်လောကထဲတွင် ဝိညာဉ်ကြောများဆိုသည်မှာ သဘာဝအတိုင်းသာ ဖြစ်တည်လေ့ရှိပြီး လူသားတို့ ဖန်တီးနိုင်သည့်အရာ လုံးဝမဟုတ်ပေ။ ဝိညာဉ်ကြောများကို ရွှေ့ပြောင်းနိုင်သည့် လျှို့ဝှက်ပညာရပ်အချို့ ရှိသော်ငြား ၎င်းတို့မှာ သဘာဝအတိုင်း ဖြစ်တည်နေသည်များသာ ဖြစ်လေသည်။

သို့သော် ဝိညာဉ်ကြောပန်းမှာမူ မတူညီပေ။ ၎င်းကိုယ်တိုင်က ဝိညာဉ်ကြောတစ်ခု၏ အရင်းအမြစ်ဖြစ်ပြီး လေဟာနယ်နက်ရှိုင်းရာမှ ကောင်းကင်နှင့်မြေကြီး ဝိညာဉ်ချီများကို အဆက်မပြတ် ဝါးမြိုနိုင်သောကြောင့် လူလုပ်ဝိညာဉ်ကြောနှင့် များစွာကွာခြားမှု မရှိတော့ပေ။

အကယ်၍ ဤအပင်နှင့် ပတ်သက်သည့် သတင်းသာ ပျံ့နှံ့သွားပါက ဝိညာဉ်လောကတစ်ခုလုံး တုန်လှုပ်သွားမည်မှာ သေချာလှသည်။ အစစ်အမှန်ဝိညာဉ်မျိုးနွယ်စုများပင်လျှင် သွားရည်ကျလာကြပေလိမ့်မည်။

"မှန်တယ်... လူလုပ်ဝိညာဉ်ကြောပဲ..."

"အရေအတွက်သာ လုံလုံလောက်လောက်ရှိပြီး ဖုန်းရှီးကျွန်းပေါ်မှာ စိုက်ပျိုးလိုက်မယ်ဆိုရင် ဖုန်းရှီးကျွန်းရဲ့ သတ္တမအဆင့် ဝိညာဉ်ကြောကနေ အဋ္ဌမအဆင့် ဝိညာဉ်ကြောအဖြစ် အဆင့်တက်သွားနိုင်တယ်..."

"အဲ့ဒီအချိန်ကျရင် ဖုန်းရှီးကျွန်းက အဋ္ဌမအဆင့် ကျွန်းတစ်ကျွန်း ဖြစ်လာလိမ့်မယ်..."

ကျိုးစွေ့၏ မျက်လုံးများတွင် စိတ်လှုပ်ရှားမှုအရိပ်အယောင်များ တောက်ပလာခဲ့သည်။

မူလက သူသည် ‘ပစ္စည်းရှာဖွေကူ’၏ စွမ်းအားကို အသုံးပြုကာ အဋ္ဌမအဆင့် ကျွန်းတစ်ကျွန်းကို ရှာဖွေပြီး ရွှေ့ပြောင်းရန် တွေးတောထားခဲ့သည်။ သို့သော် ယခု ကြည့်ရသည်မှာ ဝိညာဉ်ကြောပန်းကို ရရှိပြီးနောက် မည်သည့် အဋ္ဌမအဆင့် ကျွန်းကိုမျှ ရှာဖွေနေရန် မလိုအပ်တော့ချေ။

ဝိညာဉ်ကြောပန်း၏ စွမ်းအားကို အသုံးပြု၍ သတ္တမအဆင့် ဝိညာဉ်ကြောကို အဋ္ဌမအဆင့် ဝိညာဉ်ကြောဖြစ်လာရန် လုံးဝ အဆင့်မြှင့်တင်နိုင်ပေသည်။

ထိုအချိန်ရောက်လျှင် သူသည် အဋ္ဌမအဆင့် ဝိညာဉ်ကြောများကို အစုလိုက်အပြုံလိုက် ထုတ်လုပ်နိုင်ကောင်း ထုတ်လုပ်နိုင်ပေလိမ့်မည်။ ဤသည်မှာ သံသယဖြစ်ဖွယ်မရှိ ခေတ်တစ်ခေတ်ကို ပြောင်းလဲစေနိုင်သည့် အပြောင်းအလဲတစ်ခုပင် ဖြစ်သည်။

"ဒါပေမဲ့ ဝိညာဉ်ကြောပန်းကို အောင်မြင်အောင် စိုက်ပျိုးဖို့ဆိုတာ အဲ့ဒီလောက်တော့ မလွယ်ကူလောက်ဘူးမလား..."

ဟွားစစ်ချင်က လေးနက်သောအသံဖြင့် ပြောလိုက်သည်။

ဤကဲ့သို့သော ဝိညာဉ်ပန်းများ ကြီးထွားလာရန်အတွက် တွေးထားသလောက် မလွယ်ကူနိုင်ကြောင်း သူမက အလိုလို သိမြင်နေခဲ့သည်။ ပို၍ အဖိုးတန်သော အပင်များဖြစ်လေလေ၊ ကြီးထွားရန် အခြေအနေများက ပို၍ ခက်ခဲကြမ်းတမ်းလေလေပင် ဖြစ်၏။

"မှန်တယ်... မင်းပြောသလိုပါပဲ..."

"ဝိညာဉ်ကြောပန်းကို အောင်မြင်အောင် စိုက်ပျိုးဖို့က ထင်ထားသလောက် မလွယ်ကူဘူး..."

"ပထမအချက်အနေနဲ့ သူတို့ရဲ့သက်တမ်းက အရမ်းရှည်လျားတယ်... အဋ္ဌမအဆင့် ဝိညာဉ်ကြောပန်းအဖြစ် ကြီးထွားလာဖို့အတွက် အနည်းဆုံး နှစ်ပေါင်းတစ်သိန်းလောက် အချိန်ယူရလိမ့်မယ်..."

"အဲ့ဒီလိုမှပဲ သူတို့က ရင့်ကျက်တဲ့ အရွယ်ရောက်လာပြီး မျိုးစေ့အသစ်တွေကို မွေးဖွားပေးနိုင်မှာ..."

"အကယ်လို့ ဝိညာဉ်လောကက ကျင့်ကြံသူတွေသာ ဝိညာဉ်ကြောပန်းကို ရခဲ့မယ်ဆိုရင် ဝိညာဉ်ကြောပန်း ထောင်သောင်းချီရလာဖို့အတွက် အချိန်အကြာကြီး လိုအပ်လိမ့်မယ်... ဒါက အင်အားကြီးမားတဲ့ အဖွဲ့အစည်းတစ်ခုက နှစ်သန်းပေါင်းများစွာ အချိန်ယူပြီး တည်ဆောက်ရမယ့် မဟာစီမံကိန်းကြီးတစ်ခုပဲ..."

ကျိုးစွေ့က ရှင်းပြလိုက်၏။

အင်မော်တယ်ကမ္ဘာထဲတွင်ပင် ဝိညာဉ်ကြောပန်းကို အင်အားစုတိုင်းက ပိုင်ဆိုင်ထားခြင်း မဟုတ်ကြောင်း သိသာထင်ရှားလှပေသည်။ အကယ်၍ ရှေးဟောင်းအင်အားစုမျိုး မဟုတ်ခဲ့ပါက ကြီးထွားရန်အတွက် လုံခြုံသော ပတ်ဝန်းကျင်ကို မည်သည့်နေရာမှ ရနိုင်ပါမည်နည်း။

မည်သို့ပင်ဆိုစေ ဝိညာဉ်ကြောပန်းသည်လည်း အလွန် နူးညံ့သိမ်မွေ့ကာ ပြင်ပစွမ်းအားများ၏ တိုက်ခိုက်မှုကို ခံရပါက အလွယ်တကူ သေဆုံးသွားနိုင်ပေသည်။

ဤသည်မှာ အလွန် ဂရုစိုက်ရခက်သော အင်မော်တယ်ကမ္ဘာမှ အပင်တစ်မျိုး ဖြစ်လေသည်။ ဂရုတစိုက် စောင့်ရှောက်နိုင်မှသာ အောင်မြင်စွာ စိုက်ပျိုးနိုင်မည် ဖြစ်၏။

"ဒါပေမဲ့ ယောက်ျားဆီမှာ အပင်တွေရဲ့ ကြီးထွားချိန်ကို တိုတောင်းသွားစေနိုင်တဲ့ စွမ်းရည်ရှိနေတယ်လေ... ဆိုလိုတာက ယောက်ျားအနေနဲ့ အချိန်တိုအတွင်း အဋ္ဌမအဆင့် ဝိညာဉ်ကြောပန်း အများအပြားကို ပြုစုပျိုးထောင်နိုင်တယ်ဆိုတဲ့ သဘောပဲ..."

ဟွားစစ်ချင်၏ လှပသော မျက်လုံးများမှာ ရုတ်တရက် တောက်ပလာခဲ့သည်။ ဤဝိညာဉ်ကြောပန်း ထွက်ပေါ်လာခြင်းသည် မိမိခင်ပွန်းအတွက် သီးသန့် ဖန်တီးပေးထားခြင်းဖြစ်ကြောင်း သံသယဖြစ်ဖွယ် မရှိပေ။

ရက်အနည်းငယ် ကြာပြီးနောက်။

ဖုန်းရှီးတာအိုအရှင်သည်လည်း နောက်ဆုံးတွင် အိပ်စက်ခြင်းမှ နိုးထလာခဲ့လေသည်။

သူမသည် ဖီးနစ်အင်မော်တယ်စံအိမ်တော်မှ ထွက်ခွာလာပြီး ဖုန်းရှီးကျွန်းသို့ ပြန်လည်ရောက်ရှိနေကြောင်း မကြာမီပင် သတိထားမိလိုက်သည်။ ထို့အပြင် သူမ၏ ခန္ဓာကိုယ်ထဲရှိ ဖီးနစ်သွေးဆက် သိပ်သည်းဆမှာ အလွန် ကြီးမားစွာ တိုးတက်လာခဲ့ကြောင်းကိုလည်း သူမ တွေ့ရှိလိုက်ရသည်။

တစ်ချိန်တည်းမှာပင် သူမ၏ ခန္ဓာကိုယ်၌လည်း ကောင်းကင်နှင့်မြေကြီး မှောက်ခုံလှန်သွားသကဲ့သို့ ပြောင်းလဲမှုများ ဖြစ်ပေါ်လာခဲ့သည်။ အသားအရေမှာ ပို၍ ဖြူစင်နူးညံ့လာပြီး ခန္ဓာကိုယ်အချိုးအစားမှာလည်း ပို၍ ပြည့်ဖြိုးကာ ဆွဲဆောင်မှု ရှိလာခဲ့လေသည်။ ထို့အပြင် မျက်ခုံးနှစ်ခုကြားတွင်လည်း ရွှေရောင် ဖီးနစ်အက္ခရာတစ်ခု ပေါ်လာခဲ့ပြီး ဆန်းကြယ်နက်ရှိုင်းလှပေသည်။

စိတ်ဆန္ဒတစ်ချက် ဖြစ်ပေါ်လာသည်နှင့် အဆုံးမဲ့သော ကောင်းကင်နှင့်မြေကြီး မီးတောက်များကို ထိန်းချုပ်နိုင်စွမ်းရှိသည့်အလား ထင်မှတ်ရလေသည်။ ခန္ဓာကိုယ်ထဲတွင် ဖီးနစ်အစစ်အမှန်မီးတောက်များကိုပင် မွေးဖွားလာနိုင်ခဲ့သည်။

ဤကဲ့သို့သော ကောင်းကင်နှင့်မြေကြီး ထူးခြားမီးတောက်၏ စွမ်းအားမှာ အလွန် ကြောက်မက်ဖွယ်ကောင်းလှပြီး ကောင်းကင်နှင့်မြေကြီး ဥပဒေသများနှင့် များစွာကွာခြားမှု မရှိတော့ပေ။ သူမ၏ကျင့်ကြံမှုမှာ များစွာ တိုးတက်လာခြင်း မရှိသော်ငြား တိုက်ခိုက်ရေးစွမ်းရည်မှာမူ တစ်ဆထက်မက တိုးတက်လာခဲ့သည်မှာ သံသယဖြစ်ဖွယ် မရှိပေ။

"မင်း ဘာပြောလိုက်တယ်... ယွီရှီး... မင်းတောင်မှ ဒီယောက်ျားနဲ့ လက်ထပ်လိုက်ပြီ ဟုတ်လား..."

ထိုသတင်းကို ကြားပြီးနောက် ဖုန်းရှီးတာအိုအရှင်မှာ ဆွံ့အသွားခဲ့ပြီး မည်သို့ ပြောရမည်ကိုပင် လုံးဝ မသိတော့ချေ။

သူမအနားရှိ ညီအစ်မများမှာ ဤအမျိုးသားနှင့် တစ်ယောက်ပြီးတစ်ယောက် လက်ထပ်သွားခဲ့ကြလေပြီ။ ယခုအခါ သူမတစ်ယောက်သာ ကျန်ရှိတော့သည်။

ဤယောက်ျားစုတ်သည် သူမကိုပါ သိမ်းပိုက်ရန် စိတ်ကူးနေခြင်းမျိုး ဖြစ်နိုင်မည်လော။

ယခင်က ဤအမျိုးသားသည် အမှန်တကယ်ပင် ဆင်းရဲဒုက္ခခံ၍ အပတ်တကုတ်ကျင့်ကြံနေသူတစ်ဦးဟု ထင်မှတ်ထားခဲ့မိသည်မှာ အလကားပင် ဖြစ်သွားခဲ့၏။ ဤမျှ ကြောက်စရာကောင်းသော ရည်မှန်းချက်မျိုး ရှိနေမည်ဟု မထင်ထားခဲ့မိပေ။

တိတ်တဆိတ်ဖြင့် သူမ၏ ညီအစ်မများအားလုံးကို သိမ်းပိုက်သွားခဲ့ပြီး တစ်ယောက်စီတိုင်းမှာလည်း နာခံကျိုးနွံနေကြသည်။ သူမ မည်သို့ ပြောရမည်ကိုပင် မသိတော့ချေ။

ယခုအချိန်တွင် သူမ၏ရင်တွင်း၌ ရသစုံခံစားနေရပြီး ဒေါသလည်းထွက်၊ စိတ်လည်းဆိုးနေမိသည်။ မိမိ၏ ညီအစ်မများကို ဆက်လက် ဒုက္ခမပေးနိုင်စေရန် ထိုအမျိုးသား၏ ပြဿနာအရင်းအမြစ်ကို ဖြတ်တောက်ပစ်ချင်စိတ်များပင် ပေါ်လာခဲ့၏။

ထို့ထက်ပို၍ ဒေါသထွက်စရာကောင်းသည်မှာ သူမ၏ ညီအစ်မများက ကိုယ်တိုင်အစပြုခဲ့ခြင်းဖြစ်ပြီး ထိုအမျိုးသားက လိုက်လံပိုးပန်းခဲ့ခြင်း မဟုတ်ပေ။ ဤသည်က မိန်းမတို့၏သိက္ခာကို ပို၍ ကျဆင်းစေလေသည်။

"မှန်ပါတယ်... အဲ့ဒီအစား ဖုန်းရှီးအစ်မလည်း ယောက်ျားနဲ့တူတူ လက်ထပ်လိုက်တာ ပိုကောင်းမယ်... ဒီလိုဆို နောင်ကျရင် အားလုံးက မိသားစုဝင်တွေ ဖြစ်သွားပြီပေါ့..."

စစ်ယွီရှီးက သူမ၏အကြံပြုချက်ကို ပြောလိုက်ပြီး မျက်လုံးရွှဲကြီးများကို ပုတ်ခတ်ပုတ်ခတ်လုပ်ကာ ဖုန်းရှီးတာအိုအရှင်ကို အလွန်ရိုးသားစွာ ကြည့်နေလေတော့သည်။