အခန်း ၁၁၇၂

အခန်း(၁၁၇၂)

"ဟားဟားဟား..." ပတ်ဝန်းကျင်ရှိ လူများမှာ နောက်ဆုံးတွင် မအောင့်နိုင်တော့ဘဲ ဝါးလုံးကွဲမတတ် ရယ်မောကြလေတော့သည်။

ချီရန်သည် မိမိကိုယ်မိမိ လူပြက်တစ်ယောက်ကဲ့သို့ ခံစားလိုက်ရပြီး ယခင်က ဤကဲ့သို့သော အဖြစ်အပျက်မျိုးကို တစ်ကြိမ်တစ်ခါမျှ မကြုံတွေ့ခဲ့ဖူးချေ။ သူသည် အလွန်အမင်း ဒေါသထွက်သွားသဖြင့် ကျန်ရှိသောအရာအားလုံးကို ဂရုမစိုက်တော့ဘဲ ချင်ယွမ်ဖုန်းအား ထိုနေရာ၌ပင် အသေသတ်မည်ဟု အော်ဟစ်ကာ ချင်ယွမ်ဖုန်းထံသို့ တည့်တည့်မတ်မတ် ပြေးဝင်သွားလေသည်။ သို့သော် ထိုအချိန်တွင်ပင် ရုတ်တရက်... ဓားချီတစ်ချက်သည် သူ၏ထံသို့ တိုက်ရိုက် ပြေးဝင်လာခဲ့သည်။ ယင်းဓားချီသည် သူ့အား ထိခိုက်ဒဏ်ရာရစေခြင်း မရှိဘဲ ရေမြွေတစ်ကောင်ကဲ့သို့ ချီရန်၏ ခန္ဓာကိုယ်ပတ်ပတ်လည်တွင် ရစ်ပတ်နှောင်ဖွဲ့လိုက်ချေသည်။

ချီရန်သည် မည်မျှပင် အစွမ်းထက်စေကာမူ ရုန်းထွက်နိုင်ခြင်း မရှိချေ။ ထိုအခါ သခင်မရွှယ်က "ငါ နင့်ကို အကြိမ်ကြိမ် သတိပေးခဲ့ပေမဲ့ နင်က နားမထောင်ခဲ့ဘူး။ နင်တို့ရဲ့ ရန်လုံအသင်းမျက်နှာကို ထောက်ထားပြီး..." ဟု အော်ဟစ်လိုက်သည်။ "သခင်လေးက ဒီတစ်ကြိမ်တော့ နင့်ကို ခွင့်လွှတ်ဖို့ ရည်ရွယ်ခဲ့ပေမဲ့ နင်က လက်မခံဘဲ တျန်ပေါင်မျှော်စင်ထဲမှာ ပြဿနာရှာပြီး စည်းကမ်းဖောက်ဖျက်ရဲတယ်နော်။ ဒီနေ့တော့ နင့်အလှည့်ပဲ။"

ထိုသို့ ပြောဆိုပြီးနောက် သခင်မရွှယ်သည် သူမ၏ဓားကို တစ်ချက်ခါးလိုက်ရာ ချီရန် လွင့်ထွက်သွားလေတော့သည်။ ချီရန်မှာ ပြန်လည်ခုခံရန် အင်အားပင် မရှိချေ။ သူသည် ဝဲလည်ကာ တံခါးအပြင်ဘက်သို့ ပျံထွက်သွားပြီး လမ်းမပေါ်ရှိ မြေပြင်ပေါ်သို့ ပြင်းထန်သော အသံနှင့်အတူ ဘုန်းခနဲ ကျရောက်သွားချေသည်။

ထိုအချိန်တွင်။

ရန်လုံအသင်း၏ ဥက္ကဋ္ဌသည် မိတ်ဆွေတစ်ဦးနှင့်အတူ တျန်ပေါင်မျှော်စင်ကို ဖြတ်ကျော်လျှောက်လှမ်းနေစဉ် ရုတ်တရက် ပြင်းထန်သော လေပြင်းတစ်ချက်ကို ခံစားလိုက်ရသည်။ မိမိ၏ ကြွယ်ဝလှသော အတွေ့အကြုံကို အသုံးချကာ သူသည် ထိုပြင်းထန်လှသော စွမ်းအား၏ ရိုက်ခတ်မှုကို ရှောင်ရှားရန်အတွက် သူ၏မိတ်ဆွေကို ချက်ချင်းဆွဲကာ ဘေးသို့ ခုန်ရှောင်လိုက်ရင်း မြေပြင်ပေါ်သို့ ငုံ့ကြည့်လိုက်လေသည်။

ထိုမြင်ကွင်းကို မြင်လိုက်ရသောအခါ ချီရှောင်သည် လုံးဝ ဆွံ့အမှင်တက်သွားချေသည်။

အကယ်၍ သူသာ ရှောင်မဖယ်ဘဲ တိုက်ရိုက် ဝင်ရောက်ဖမ်းဆီးခဲ့ပါက မြေပြင်ပေါ်သို့ ကျလုဆဲဆဲဖြစ်သော မိမိ၏သားကို ဖမ်းထိန်းနိုင်ခဲ့လိမ့်မည် ဖြစ်တန်ရာသည်။ သို့သော် ယခုမူ နောက်ကျသွားခဲ့ပြီ ဖြစ်ပေရာ သူ၏သားဖြစ်သူ ချီရန်သည် မြေပြင်ပေါ်သို့ ပြင်းထန်စွာ ကျရောက်သွားခဲ့ပြီး အိမ်မှနှင်ထုတ်ခံရသော ခွေးတစ်ကောင်ကဲ့သို့ ကစဉ့်ကလျား ဖြစ်နေချေပြီ။

"အလိုလေး... ဒီပြဿနာရှာတဲ့ကောင်တွေက ဘယ်ကမှန်းတောင် မသိဘူး။ လူတိုင်းသိကြတာပဲလေ..."

"တျန်ပေါင်မျှော်စင်ဆိုတာ လာကစားရမယ့်နေရာ မဟုတ်ဘူးဆိုတာ..." ချီရှောင်နှင့်အတူ ရှိနေသောသူသည်လည်း အစွမ်းထက်သော ပညာရှင်တစ်ဦးဖြစ်ပြီး အဝါရောင်နဂါးအသင်းမှ ဆရာသခင်တစ်ဦး ဖြစ်သည်။ သူသည် အခြေအနေကို သေချာစွာပင် သဘောမပေါက်သေးမီ တစ်စုံတစ်ခုကို ပြောဆိုရန် ပြင်လိုက်စဉ်မှာပင် ချီရှောင်က "ငါ့သား..." ဟု အံ့အားသင့်တုန်လှုပ်စွာ အော်ဟစ်လိုက်လေသည်။

"အဖေ..."

ချီရန်သည် မြေပြင်ပေါ်တွင် အကြိမ်အနည်းငယ် လိမ့်သွားပြီးနောက် ရုတ်တရက် ရင်းနှီးသော အသံတစ်ခုကို ကြားလိုက်ရသည်။ သူသည် ခေါင်းကို အလျင်အမြန်မော့ကာ ပတ်ဝန်းကျင်ကို ဝေ့ဝဲကြည့်ရှုလိုက်ရာ နောက်ဆုံးတွင် ဖခင်ဖြစ်သူ ရှိနေသောနေရာကို တွေ့ရှိသွားလေသည်။ သူသည် ဖခင်၏ခြေရင်းသို့ သုတ်သီးသုတ်ပျာ တိုးကပ်သွားပြီး ခြေထောက်ကို ဖက်တွယ်ကာ ငိုယိုလိုက်သည်။ "အဖေ... သား အနိုင်ကျင့်ခံလိုက်ရတယ်။ အဲဒီတျန်ပေါင်မျှော်စင်က သိပ်ကိုလွန်လွန်းတယ်။ အဖေ သားအတွက် ကလဲ့စားချေပေးရမယ်။"

ချီရှောင်သည် တံတွေးကို အနိုင်နိုင် မျိုချလိုက်ရချေသည်။ သူ၏ဘေးမှ အဝါရောင်နဂါးအသင်းမှ ပညာရှင်ကြီးပင်လျှင် ဆွံ့အသွားခဲ့ရသည်။ ဤမိုက်မဲသောကောင်သည် တျန်ပေါင်မျှော်စင်တွင် အနိုင်ကျင့်ခံခဲ့ရသည် ဟု ဆိုနေခြင်းပင်။ သူ ဘာတွေလျှောက်လုပ်ခဲ့သည်ကို မည်သူသိနိုင်မည်နည်း။ အဝါရောင်နဂါးအသင်း၏ အင်အားနှင့်ဆိုပါက ကလဲ့စားချေရန်မှာ လက်ဖျစ်တစ်ချက်တီးရုံမျှလွယ်ကူသော်လည်း ယခုမူ သူတို့၏ ပစ်မှတ်မှာ တျန်ပေါင်မျှော်စင် ဖြစ်နေသဖြင့် အနည်းငယ် ရှုပ်ထွေးသွားချေပြီ။

"အိမ်ပြန်ရောက်မှပဲ ပြောကြရအောင်။" အဝါရောင်နဂါးအသင်းမှ ပညာရှင်သည် လာရောက်ဝိုင်းအုံကြည့်ရှုလိုကြသော လူအုပ်ကြီးကို တစ်ချက်ကြည့်လိုက်သည်။ ဤကိစ္စသည် ကြီးမားသော ဂယိုက်ရိုက်ခတ်မှု ရှိလာနိုင်သည်ကို သိရှိသဖြင့် လူအများ ပိုမိုမသိရှိစေရန်အတွက် ချီရှောင်အား မိတ်ဆွေတစ်ဦးအနေဖြင့် ချက်ချင်း သတိပေးလိုက်ခြင်းပင် ဖြစ်သည်။

ချီရှောင်သည် လက်နှစ်ဖက်ကို အလျင်အမြန် ဆုပ်ကိုင်ကာ ဂါရဝပြုရင်း "အစ်ကိုကြီး... ကျွန်တော် တကယ်ပဲ အားနာပါတယ်။ အခု ချက်ချင်း ပြန်ရလိမ့်မယ်။" ဟု ဆိုလိုက်သည်။ ထိုသို့ ပြောပြီးနောက် သူသည် မိမိ၏သားကို ခေါ်ဆောင်ကာ ရန်လုံအသင်းသို့ ကပျာကယာ ပြန်သွားလေတော့သည်။

---

အိမ်သို့ ရောက်ရှိသောအခါ ချီရှောင်သည် ဒေါသကြောင့် ပေါက်ကွဲမတတ် ဖြစ်နေပြီး ချီရန်သည်လည်း ဒေါသတကြီး စိုက်ကြည့်နေချေသည်။

"ဘာဖြစ်ခဲ့တာလဲ။ ငါ့ကို ပြောစမ်း။" ဟု ချီရှောင်က မေးလိုက်သည်။

ချီရန်က "အဖေ... သားက တျန်ပေါင်မျှော်စင်မှာ ရတနာတစ်ခုခု သွားရွေးမလို့ပါပဲ။ ဒါပေမဲ့ ကျွန်တော်တို့ ရန်လုံအသင်းသားတွေကို သတ်ခဲ့တဲ့ ချင်ယွမ်ဖုန်းဆိုတဲ့ကောင်က အဲဒီမှာ ရှိနေလိမ့်မယ်လို့ မထင်ထားခဲ့ဘူး။ ဒါတင်မကသေးဘူး... ချင်ယွမ်ဖုန်းက တျန်ပေါင်မျှော်စင်က သခင်မရွှယ်နဲ့ ပူးပေါင်းပြီး သားကို တိုက်ခိုက်ခဲ့ကြတာ။ အဖေ သားအတွက် မတရားမှုကို ဖြေရှင်းပေးရမယ်။" ဟု ဆိုလေသည်။

ချီရှောင်သည် ချီရန်ပြောသော စကားများ၏ ထက်ဝက်ခန့်မှာ မဟုတ်မမှန်နိုင်ကြောင်း သိသော်လည်း သူသည် သားဖြစ်သူကို အလွန်အမင်း အလိုလိုက်ထားသဖြင့် ဆက်လက်၍ မမေးမြန်းတော့ချေ။ သားဖြစ်သူ၏ စကားဆုံးသည်အထိ နားထောင်ပြီးနောက် သူက "သခင်မရွှယ် ဟုတ်လား။ ဟွန်း... အဲဒီလိုလူမျိုးကို ငါ ကိုင်တွယ်နိုင်ပါတယ်။ ဒါပေမဲ့ သား... တျန်ပေါင်မျှော်စင်ရဲ့ နောက်ကွယ်မှာ ထိန်းချုပ်ထားတဲ့ ရွှေရောင်နတ်ဘုရားအဆင့် ပညာရှင်ကြီးတွေ အများကြီး ရှိနေတယ်။" ဟု ဆိုလိုက်ချေသည်။

"ဘာ..."

ချီရန်သည် ချက်ချင်းပင် ထိတ်လန့်တုန်လှုပ်သွားပြီး မျက်နှာတစ်ခုလုံး ဖြူလျော်သွားလေသည်။ ရွှေရောင်နတ်ဘုရားအဆင့် ပညာရှင်ကြီးအချို့ ပါဝင်ပတ်သက်နေသည် တဲ့လား။ ရွှေရောင်နတ်ဘုရားအဆင့် ပညာရှင် တစ်ယောက်တည်းနှင့်ပင် သူတို့အတွက် လုံလောက်သော ဒုက္ခကို ပေးနိုင်ပေရာ ထိုသို့သော အင်အားမျိုးကို မဆွရဲချေ။ သူသည် တံတွေးကို အနိုင်နိုင် မျိုချရင်း "အဖေ... သား... သားထင်တာတော့ ဒီကိစ္စကို ဒီအတိုင်းပဲ ထားလိုက်ကြရအောင်။ သား ဒီမတရားမှုကို အောင့်အည်းခံလိုက်ပါ့မယ်။" ဟု ဆိုလေသည်။

ချီရှောင်က "ငါ့ရဲ့ အဖိုးတန်သားလေးကို ငါ ဘယ်လိုလုပ် ခံစားရအောင် ထားမလဲ။ ငါတို့ တျန်ပေါင်မျှော်စင်ရဲ့ အင်အားကို မထိရဲပေမဲ့ ချင်ယွမ်ဖုန်းက ဘာကောင်မို့လို့လဲ။ သူက ငါ့ရဲ့ ရန်လုံအသင်းသားကို သတ်ခဲ့ရုံတင်မကဘူး... မင်းကိုပါ တိုက်ခိုက်ရဲသေးတယ်။ စိတ်မပူနဲ့... ချင်ယွမ်ဖုန်း တျန်ပေါင်မျှော်စင်ကနေ ထွက်သွားတာနဲ့ တျန်ပေါင်မျှော်စင်က သူ့ကို ကာကွယ်ပေးမှာ မဟုတ်တော့ဘူး။ အဲဒီအချိန်ကျရင် ငါ မင်းအတွက် အဲဒီကောင်ကို ဧကန်မုချ သတ်ပေးမယ်။" ဟု ဆိုလိုက်သည်။

"သားကိုယ်တိုင် သူ့ကို သတ်မယ်။"

“ကောင်းပြီ... မင်းသဘောအတိုင်း ဖြစ်စေရမယ်။ ငါ သူ့ကို အပြင်းအထန် ရိုက်နှက်ဆုံးမပြီးရင် သူ့ကို ဘယ်လိုကိုင်တွယ်မလဲဆိုတာ မင်းဘာမင်း ဆုံးဖြတ်ပေါ့။” ဟု ချီရှောင်က ဆိုလေသည်။

“ဒါပေမဲ့ အဖေ... ချင်ယွမ်ဖုန်းက အခု ငါတို့နဲ့ အင်အားချင်းတူတဲ့ အစိမ်းရောင်နဂါးအသင်းရဲ့ အကာအကွယ်ကို ရထားတာ။ သူ့ကို တိုက်ရိုက် သွားတိုက်လို့ မရဘူး။” ချီရန်သည် မုန်းတီးမှုကြောင့် မျက်စိကန်းမနေသေးချေ။

ချီရှောင်က ပြုံးလျက် "အဲဒါ ဘာခက်လို့လဲ။ ငါတို့ ပေါ်ပေါ်ထင်ထင် လုပ်လို့မရရင် ကွယ်ရာမှာပဲ လုပ်ကြတာပေါ့။" ဟု ဆိုလိုက်သည်။ ထိုသို့ ပြောပြီးနောက် သူသည် လက်ခုပ်တစ်ချက်တီးလိုက်ရာ ဟင်းလင်းပြင်သည် ရုတ်တရက် လှိုင်းထလာခဲ့သည်။ ဟင်းလင်းပြင်သည် ဝဲကရက်တစ်ခုကဲ့သို့ ဆုတ်ဖြဲခံလိုက်ရပြီး ခဏအကြာတွင် အလွန်ဆွဲဆောင်မှုရှိပြီး လှပကျော့ရှင်းသော ကိုယ်လုံးကိုယ်ပေါက်ရှိသည့် အမျိုးသမီးတစ်ဦး လျှောက်လှမ်းထွက်ပေါ်လာခဲ့သည်။

ဤအမျိုးသမီး၏ ခန္ဓာကိုယ်အစိတ်အပိုင်းတိုင်းနီးပါးသည် အမျိုးသားများ၏ မျက်လုံးထဲတွင် စွဲမက်ဖွယ်ကောင်းလှပေသည်။ သူမ၏ ကျပ်ထုပ်နေသော အဝတ်အစားများက သူမ၏ ကိုယ်လုံးကိုယ်ပေါက်ကို အစွမ်းကုန် ပေါ်လွင်စေချေသည်။

ထို့ပြင် သူမ၏ မျက်နှာသည် နှင်းပွင့်ကဲ့သို့ ဖြူစင်ဝင်းပနေပြီး ယင်းသည် သူမ၏ ပူပြင်းလှပသော ကိုယ်လုံးနှင့် ပေါင်းစပ်သွားသောအခါ ပြင်းထန်သော အမြင်အာရုံဆိုင်ရာ ရိုက်ခတ်မှုကို ဖြစ်ပေါ်စေချေသည်။ ချီရန်သည် မိမိကိုယ်မိမိ ထိန်းချုပ်နိုင်စွမ်း ကင်းမဲ့သွားသကဲ့သို့ ခံစားလိုက်ရပြီး တံတွေးကို အနိုင်နိုင် မျိုချရင်း သူ၏ဖခင်အား "ဒါ... ဒါက..." ဟု မေးလိုက်လေသည်။

ချီရှောင်က သားဖြစ်သူ၏ အကျင့်ကို သိရှိသဖြင့် "သူ့နာမည်က ရွှယ်ဟွာ။ ငါ သူ့ကို အရိပ်ထဲမှာပဲ အမြဲတမ်း ကျင့်ကြံဖို့ စီစဉ်ပေးခဲ့တာ။ ဒါတင်မကဘူး... သူကျင့်ကြံတဲ့ ကျင့်ကြံခြင်းပညာရပ်က တားမြစ်ပညာရပ်တစ်ခုပဲ။ သူ တစ်ယောက်ယောက်ကို မျက်စိကျပြီဆိုရင် ဘယ်သူမှ မလွတ်နိုင်ဘူး... အထူးသဖြင့် ယောက်ျားတွေပေါ့။" ဟု ဆိုလိုက်သည်။

“ဒါဆို သား...” ချီရန်သည် ချီရှောင်အား မျှော်လင့်ချက်အပြည့်ဖြင့် စိုက်ကြည့်လိုက်သည်။ သူ၏ဖခင်ထံတွင် ဤမျှ ဆွဲဆောင်မှုရှိသော အမျိုးသမီးတစ်ဦးကို ဝှက်ထားသည် ဖြစ်ပေရာ သူသည် ချက်ချင်းပင် အရင်ဆုံး မြည်းစမ်းကြည့်ချင်စိတ် ပေါ်ပေါက်လာခြင်းပင် ဖြစ်သည်။

“သူနဲ့ အတူနေတဲ့ ယောက်ျားဟာ မိမိရဲ့ ယန်ချီတွေ အကုန်လုံး စုပ်ယူခံရလိမ့်မယ်။ မင်း စမ်းကြည့်ချင်လား။” ဟု ချီရှောင်က သားဖြစ်သူ၏ ရည်ရွယ်ချက်ကို ရိပ်မိပြီးသား ဖြစ်သဖြင့် ဆိုလိုက်လေသည်။

ချီရန်သည် ချက်ချင်းပင် ပါးစပ်ပိတ်သွားတော့သည်။ ယန်ချီဆိုသည်မှာ ဘာနည်း။ ယင်းသည် အမျိုးသားတစ်ယောက်၏ ယောက်ျားပီသသော အရှိန်အဝါမျှသာ မဟုတ်ချေ။ ကျင့်ကြံခြင်းတွင်မူ ယင်းသည် ယန်စိတ်ဝိညာဉ် ဖြစ်ပင်။ သိုင်းပညာရှင်မှသည် နတ်ဘုရားနယ်ပယ်အထိ ကျင့်ကြံခြင်းဟူသည် ယန်စိတ်ဝိညာဉ်ကို ကျင့်ကြံခြင်းပင်။

တစ်ဦးတစ်ယောက်၏ ခန္ဓာကိုယ်အတွင်းရှိ ယန်ချီသည် ယန်စိတ်ဝိညာဉ်ကို ဖွဲ့စည်းတည်ဆောက်ရန်အတွက် အဓိက အစိတ်အပိုင်း ဖြစ်ချေသည်။ အကယ်၍ သူ၏ ရန်ချီသာ စုပ်ယူခံလိုက်ရပါက သူသည် သွားပြီ ဖြစ်ပေသည်။ ပျက်စီးသွားရုံတင်မကဘဲ အသက်ပင် အာမခံချက်ရှိတော့မည် မဟုတ်ချေ။

ရွှယ်ဟွာဟု အမည်ရသော ဤအမျိုးသမီးတွင် ဤမျှ အံ့အားသင့်ဖွယ်ကောင်းသော စွမ်းရည်မျိုး ရှိလိမ့်မည်ဟု သူ လုံးဝ မထင်မှတ်ထားခဲ့ချေ။

"ဒီကိစ္စကို ရွှယ်ဟွာဆီပဲ အပ်ထားလိုက်။ မင်းက ရလဒ်ကိုပဲ စောင့်ကြည့်နေပေါ့။" ဟု ချီရှောင်က ဆိုလိုက်ပြီး ရွှယ်ဟွာအား အချက်ပြလိုက်သည်။ ရွှယ်ဟွာသည် ကျောက်စိမ်းကတ်ပြားကို လက်ခံရရှိပြီးနောက် ခေါင်းညိတ်ပြကာ ထွက်ခွာသွားလေတော့သည်။