အခန်း ၄၅၀

အခန်း ၄၅၀။ တာဝန်၏ ဆုလာဘ်များနှင့် ရှားပါးသော ရွှေရောင်ကျား

တရားမဝင် အမဲလိုက်သူကို သစ်ပင်တွင် တုပ်နှောင်ထားလိုက်လေသည်။

အထူးရဲတပ်ဖွဲ့ဝင်များ ရောက်ရှိလာပြီးနောက် တရားမဝင် အမဲလိုက်သူ၏ ကိစ္စရပ်များကို လွှဲပြောင်းရယူလိုက်လေသည်။

ရွှီယန်က လူသိရှင်ကြား မဖြစ်စေရန် လေးနှင့်မြားကို သိမ်းဆည်းထားလိုက်ပြီ ဖြစ်လေသည်။

ရဲတပ်ဖွဲ့ဝင် နှစ်ယောက်က တရားမဝင် အမဲလိုက်သူ၏ ဒဏ်ရာကို စစ်ဆေးကာ သူ့ကို စောင့်ကြည့်နေကြလေသည်။

နောက်ထပ် ရဲတပ်ဖွဲ့ဝင် တစ်ယောက်ကတော့ တရားမဝင် အမဲလိုက်သူ၏ အိတ်ကို ဖွင့်လှစ် ရှာဖွေနေလေသည်။

အိတ်ဆိုသည်မှာ ဂုန်နီအိတ် တစ်အိတ်သာ ဖြစ်ပြီး ဖွင့်ကြည့်လိုက်သောအခါ အထဲတွင် သေဆုံးနေသော လင်းယုန်ရွှေ နှစ်ကောင်နှင့် သေဆုံးနေသော သိမ်းငှက် တစ်ကောင် ပါရှိနေလေသည်။

အားလုံးက အထူးကာကွယ်စောင့်ရှောက်ရမည့် ငှက်မျိုးစိတ်များ သာဖြစ်လေသည်။

သက်သေအထောက်အထား ခိုင်လုံနေပြီဖြစ်ရာ ဤလူအနေဖြင့် ထောင်နန်းစံရမည့် ကိစ္စက သေချာပေါက် လွတ်မြောက်နိုင်မည် မဟုတ်တော့ချေ။

"စောစောက ဘာတွေဖြစ်ခဲ့တာလဲ... ကျားက သူ့ကို တိုက်ခိုက်လိုက်တာလား..." ရဲတပ်ဖွဲ့ဝင် တစ်ယောက်က ရွှီယန်ကို မေးမြန်းလိုက်လေသည်။

"ဟုတ်ပါတယ်... သူတို့က ရွှေရောင် ဘင်္ဂလားကျား ကို မေ့ဆေးပေးဖို့ ကြိုးစားပေမယ့် မအောင်မြင်လို့ ဘင်္ဂလားကျား က ပြန်လည် တိုက်ခိုက်ခဲ့တာပါ..."

"ကျွန်တော် အသံကျယ်ကြီး အော်လိုက်တော့ အဲဒီ ဘင်္ဂလားကျား လည်း လန့်ပြီး ထွက်ပြေးသွားတယ်... ပြီးတော့ ကျွန်တော်လည်း ဒီတရားမဝင် အမဲလိုက်သူ ကို ဖမ်းချုပ်လိုက်တာပါ..." ရွှီယန်က ရှင်းပြလိုက်လေသည်။

ရွှီယန် ရှင်းပြသည်က အတော်လေး ယုတ္တိတန်လှပေသည်။ ထို့ကြောင့် ရဲတပ်ဖွဲ့ဝင်များ ကလည်း အများကြီး ဆက်မမေးတော့ချေ။

ထို့နောက် ရဲတပ်ဖွဲ့ဝင်များက စနစ်ထဲတွင် အချက်အလက်များ တိုက်ဆိုင်စစ်ဆေး ကြည့်လိုက်ရာ ဤလူမှာ ထွက်ပြေးလွတ်မြောက်နေသော ရာဇဝတ်ကောင် တစ်ယောက် ဖြစ်နေပြီး လက်ရှိ ဆုကြေးငွေ မှာ ယွမ်ခြောက်သိန်း အထိ ရှိနေကြောင်း တွေ့ရှိလိုက်ရလေသည်။

သူက လက်နက်ကိုင်ဆောင်ထားပြီး ကြီးလေးသော ရာဇဝတ်မှုများကို ကျူးလွန်ထားဖူးသဖြင့် ဆုကြေးငွေ က အလွန် မြင့်မားနေခြင်း ပင်ဖြစ်သည်။

ယခုအခါ ရွှီယန်က သူ့ကို ဖမ်းဆီးမိခဲ့သည့် အပြင် ရဲတပ်ဖွဲ့ကို ဆက်သွယ်ကာ တိကျသော သြဒိနိတ်များကိုပါ ပေးပို့ခဲ့လေသည်။ ဤဆုကြေးငွေ ကို သဘာဝကျကျပင် သူ ရရှိမည် ဖြစ်လေသည်။

"ဟင်... ဆုကြေးငွေ ရဦးမှာလား..." ရွှီယန်က အနည်းငယ် အံ့အားသင့်သွားလေသည်။

ဤကိစ္စကို သူ တကယ်ကို ထင်မှတ်မထားခဲ့ချေ။

သို့သော် ရရှိမည် ဆိုလျှင်လည်း ကောင်းမွန်လှပေသည်။ ပင်ပန်းကြေး အဖြစ် သတ်မှတ်၍ ရလေသည်။

အခြားတစ်ဖက်တွင် ရဲတပ်ဖွဲ့ဝင်များက ဒရုန်းကင်မရာ မှ နေရာသတ်မှတ်ပေးထားသော အခြား တရားမဝင် အမဲလိုက်သူ ရှိရာဘက်သို့ လိုက်လံ ဖမ်းဆီးနေကြလေသည်။

ဤတစ်ကြိမ် ဖမ်းဆီးရေး စစ်ဆင်ရေး၏ အဆင့်က အလွန် မြင့်မားလှပေသည်။

အဓိကအားဖြင့် ရွှီယန် တိုက်ရိုက်ထုတ်လွှင့်နေစဉ် ဖြစ်ပွားခဲ့သော ကိစ္စရပ်ဖြစ်ရာ အထက်လူကြီးများက အနည်းငယ်မျှပင် အချိန်ဆွဲမနေရဲကြချေ။

တိုက်ရိုက်ထုတ်လွှင့်မှုက ဆက်လက် လည်ပတ်နေဆဲ ဖြစ်လေသည်။ ဒရုန်းကင်မရာ၏ မှန်ဘီလူး ပေါ်တွင် အက်ကွဲရာများ ပြည့်နှက်နေသော်ငြားလည်း အလုပ်လုပ်နိုင်စွမ်း ရှိနေဆဲ ပင်ဖြစ်သည်။

အင်တာနက်သုံးစွဲသူများက ဤမြင်ကွင်းကို ကြည့်ရှုရင်း ပိုကြည့်လေ ပို၍ စိုးရိမ်ပူပန်လာလေ ဖြစ်ကြလေသည်။

တစ်လျှောက်လုံး အချိန်အတော်ကြာအောင် နောက်ယောင်ခံ လိုက်ပါခဲ့လေသည်။

ဤတရားမဝင် အမဲလိုက်သူက လိုဏ်ဂူ တစ်ခုထဲသို့ ဝင်ရောက် ပုန်းအောင်းကာ မျက်စိလှည့်စားရန် ကြိုးစားနေလေသည်။

သို့သော် သိသာထင်ရှားစွာပင် ဒရုန်းကင်မရာက ပစ်မှတ်ကို ထိုမျှလောက် လွယ်ကူစွာ အပျောက်ခံမည် မဟုတ်ချေ။

အချိန်သိပ်မကြာခင်မှာပင် ရဲတပ်ဖွဲ့ဝင်များက ဤနေရာသို့ ရောက်ရှိလာပြီး တရားမဝင် အမဲလိုက်သူကို အောင်မြင်စွာ ဖမ်းဆီးလိုက်ကြလေသည်။

[ရဲတွေ ရောက်လာပြီဟေ့]

[လခွမ်း အထူးရဲတပ်ဖွဲ့ တွေတောင် ထွက်လာတာပဲ အမြန်နှုန်း က တကယ် မြန်တာပဲ]

[လောင်ရွှီ ရော ဘယ်ရောက်သွားပြီလဲ စောစောက တရားမဝင် အမဲလိုက်တဲ့ သူ နှစ်ယောက် ထွက်ပြေးသွားတာလေ လောင်ရွှီ ဆီများ ပြန်သွားကြမလား မသိဘူး ဒီလူတွေ လက်ထဲမှာ သေနတ် တွေ ရှိတယ်နော်]

[တကယ် ဖြစ်နိုင်ချေ ရှိတယ် လောင်ရွှီ သေချာပေါက် ဒုက္ခရောက်ပြီ ထင်တယ်]

အားလုံးက တစ်ယောက်တစ်ပေါက် ဆွေးနွေးပြောဆို နေကြလေသည်။

ဤအချိန်တွင် ဒရုန်းကင်မရာက အနောက်သို့ ပြန်လည် ပျံသန်းလာခဲ့လေသည်။

ကြည့်ရှုသူများ အားလုံး အထူးပင် စိုးရိမ်ပူပန်နေကြချိန်တွင် ရွှီယန်က တိုက်ရိုက်ထုတ်လွှင့်မှု မြင်ကွင်းထဲသို့ ပြန်လည် ရောက်ရှိလာခဲ့လေသည်။

ကြည့်ရသည်မှာ ယခင်အတိုင်းပင် လွတ်လပ်ပေါ့ပါးနေပုံ ရလေသည်။

"စောစောက တရားမဝင် အမဲလိုက်သူ တစ်ယောက်နဲ့ မထင်မှတ်ဘဲ ဆုံတွေ့ခဲ့တယ်... ဒါပေမဲ့ သူက ကျားရဲ့ ကုတ်ဖဲ့မှုကို ခံလိုက်ရပြီး အခုတော့ အဖမ်းခံလိုက်ရပြီ..."

"ဒီနေ့ ဖြစ်သွားတဲ့ ကိစ္စတွေက တကယ်ကို အဓိပ္ပာယ်မဲ့လွန်းတယ်..."

"မူလက ယာလုံဇန်ဘို မြစ်ဝှမ်း ချောက်ကမ်းပါးကြီး ထဲကို ဝင်ပြီး တစ်ပတ်လောက် လှည့်ပတ်ကာ ကမ္ဘာပေါ်မှာ အကြီးမားဆုံးသော ချောက်ကမ်းပါးကြီး ကို အားလုံးကို ပြသပေးဖို့ ရည်ရွယ်ထားခဲ့တာပါ..."

"ဒီလို ကိစ္စမျိုးနဲ့ ကြုံတွေ့ရလိမ့်မယ်လို့ ထင်မှတ်မထားခဲ့ဘူး..." ရွှီယန်က အင်တာနက်သုံးစွဲသူများကို ရှင်းပြလိုက်လေသည်။

[အစ်ကိုယန် မင်း ဘာမှမဖြစ်တာပဲ တော်ပါပြီ]

[ငါတို့တော့ စိုးရိမ်လွန်းလို့ သေတော့မလို့ပဲ]

[ဒီလူတွေက အသက်ကို ပဓာနမထားတဲ့ လူကြမ်းတွေပဲ သေချာပေါက် သတိထားရမယ် သူတို့က လူသတ်တာကို ကစားစရာ တစ်ခုလို သဘောထားတာ]

ကွန်မန့်စာသားများက အဆက်မပြတ် လိမ့်တက်နေလေသည်။

လူသူကင်းမဲ့သော တောရိုင်းမြေများတွင် မကြာခဏ လှုပ်ရှားသွားလာပါက ထူးဆန်းအံ့ဩဖွယ် ကောင်းသော ကိစ္စရပ်များနှင့် သေချာပေါက် ကြုံတွေ့ရတတ်လေသည်။

မည်သို့ပင်ဖြစ်စေ လူသူကင်းမဲ့သော နေရာများတွင် လူတို့၏ စိတ်နေသဘောထားက စမ်းသပ်မှုကို လုံးဝ ခံနိုင်ရည် မရှိကြချေ။

မည်သည့် ကိစ္စမျိုးမဆို ဖြစ်ပွားလာနိုင်ချေ ရှိလေသည်။

ဒုတိယမြောက် တရားမဝင် အမဲလိုက်သူ အဖမ်းခံရပြီးနောက် ရဲတပ်ဖွဲ့ဝင်များက ဒရုန်းကင်မရာများကို ဖွင့်လှစ်ကာ တတိယမြောက် တရားမဝင် အမဲလိုက်သူကို ဆက်လက် ရှာဖွေနေကြပြန်လေသည်။

အခြေခံအားဖြင့် ကြီးလေးသော ရာဇဝတ်ကောင်ကို ဖမ်းဆီးသည့် စံနှုန်းအတိုင်း ရှာဖွေနေကြခြင်း ပင်ဖြစ်သည်။

အဖွဲ့များစွာက တောင်ပေါ်တွင် စတင် ကင်းလှည့် နေကြလေသည်။

ဤကဲ့သို့သော ကြီးလေးသည့် ရာဇဝတ်ကောင်ကို ဖမ်းဆီးရခြင်းမှာ သေးငယ်သော ကိစ္စရပ်တစ်ခု မဟုတ်ဘဲ ဖမ်းဆီးရမိပါက ရဲတပ်ဖွဲ့ဝင်များ အတွက် ကြီးမားသော စွမ်းဆောင်ရည် တစ်ခု ဖြစ်လာမည် ဖြစ်ရာ သူတို့က အထူးပင် အာရုံစိုက် လုပ်ဆောင်နေကြလေသည်။

ယနေ့ ကြုံတွေ့ခဲ့ရသော အတွေ့အကြုံများ အားလုံးက အတော်လေး အဓိပ္ပာယ်မဲ့လွန်းလှပေသည်။

ထို့နောက် ရဲတပ်ဖွဲ့ဝင်များက ရွှီယန်၏ ရှေ့ဆက် အစီအစဉ်ကို မေးမြန်းလာကြပြီး သူတို့ အနေဖြင့် ရွှီယန်ကို တစ်ပါတည်း ပြန်လည် ခေါ်ဆောင်သွားပေးနိုင်ကြောင်း ပြောဆိုကြလေသည်။

ရွှီယန်ကတော့ ဤနေရာတွင် ဆက်လက် လှုပ်ရှားသွားလာရန်သာ ရည်ရွယ်ထားလေသည်။ မည်သို့ပင်ဖြစ်စေ အလည်အပတ် လာရောက်ခြင်း သာဖြစ်လေသည်။

"ဒီနေရာက အတော်လေး အန္တရာယ် များတယ်... တောရိုင်း ကျား ဖြစ်ဖြစ် ကျန်နေသေးတဲ့ တရားမဝင် အမဲလိုက်သူ တွေ ဖြစ်ဖြစ် ရှိနေနိုင်သေးတယ်..."

"ခင်ဗျား အနေနဲ့ ဒီမှာ တစ်ယောက်တည်း ဆက်မနေတာ အကောင်းဆုံးပဲ..."

"လိုက်ဖ်လွှင့်ရင်လည်း ကိုယ့်ရဲ့ လုံခြုံရေးကို ဂရုစိုက်ပါဦး..." ရဲတပ်ဖွဲ့ဝင်က ရွှီယန်ကို စေတနာကောင်းဖြင့် သတိပေးလိုက်လေသည်။

"စိတ်ချပါ... ကျွန်တော် ဘာလုပ်ရမယ် ဆိုတာ သိပါတယ်..."

"ကျွန်တော် ဒီမှာ တစ်ပတ်လောက် လှည့်ပတ် ကြည့်ပြီးတာနဲ့ ညနေပိုင်း ကျရင် ပြန်မှာပါ..."

"အဲဒီ ရွှေရောင် ဘင်္ဂလားကျား က တကယ်ကို တွေ့ရခဲတယ်... ကျွန်တော် ထပ်ပြီး သွားကြည့်ချင်သေးလို့ပါ..." ရွှီယန်က ပေါ့ပေါ့ပါးပါးပင် ပြန်လည် ဖြေကြားလိုက်လေသည်။

ရဲအင်အား အများအပြား ထွက်ပေါ်လာသဖြင့် တတိယမြောက် တရားမဝင် အမဲလိုက်သူ လည်း အချိန်သိပ်မကြာခင်မှာပင် အဖမ်းခံလိုက်ရလေသည်။

သူတို့၏ တိုက်ဆိုင်စစ်ဆေးမှုများ အရ ဤတရားမဝင် အမဲလိုက်သူများ အားလုံးမှာ ထွက်ပြေးလွတ်မြောက်နေသော ရာဇဝတ်ကောင်များ သာဖြစ်ကြောင်း တွေ့ရှိရလေသည်။

ဤတစ်ကြိမ် အမှုက ကြီးလေးသော အမှုကြီး တစ်ခုတွင် ပါဝင်ပြီး ရဲစခန်းမှ အထက်လူကြီးများက ဂုဏ်ပြုဆုချီးမြှင့်ပွဲပင် ကျင်းပပေးရမည် ဖြစ်ရာ ကြီးမားသော စွမ်းဆောင်ရည်ကြီး တစ်ခု ပင်ဖြစ်သည်။

သူတို့က ရွှီယန် အပေါ်တွင်လည်း အထူးပင် ကျေးဇူးတင်နေကြလေသည်။

ထို့အပြင် လူတစ်ယောက်တည်း ဆုကြေးငွေ ရှိနေခြင်း မဟုတ်ဘဲ လူသုံးယောက်စလုံး တွင် ဆုကြေးငွေများ ရှိနေကြလေသည်။

နောက်လူ နှစ်ယောက်၏ ဆုကြေးငွေ က အနည်းငယ် နိမ့်ကျပြီး ယွမ်တစ်သိန်း စီသာ ရှိလေသည်။

ဤသို့ ကြည့်မည်ဆိုပါက ရွှီယန်၏ ယခုတစ်ကြိမ် တောင်ပေါ်သို့ လာရောက်ခြင်းက ဆုကြေးငွေမုဆိုး ၏ အလုပ်တစ်ခုကို လုပ်ဆောင်လိုက်ရသကဲ့သို့ ပင်ဖြစ်သည်။

မျှော်လင့်မထားသော ဝင်ငွေ ပင်ဖြစ်သည်။

ရဲတပ်ဖွဲ့ဝင်များက သူ့ကို အချိန်အတော်ကြာအောင် ကြည့်ရှုနေကြလေသည်။

ယခုအခါ အင်တာနက် တစ်ခွင်လုံးတွင် ရွှီယန်၏ ဒဏ္ဍာရီများ ပြည့်နှက်နေခဲ့ပြီ ဖြစ်လေသည်။

ရဲတပ်ဖွဲ့ဝင်များမှာ တစ်ခဏမျှ ဘာပြောရမည်ကိုပင် မသိတော့ချေ။

သို့သော် တရားမဝင် အမဲလိုက်သူ သုံးယောက်စလုံးကို ဖမ်းဆီးမိသွားပြီဖြစ်ရာ ဤဘက်တွင် နှိုင်းယှဉ်ချက်အရ အတော်လေး ဘေးကင်းလုံခြုံ သွားခဲ့လေပြီ။

မည်သည့်အရာကိုမျှ ထိခိုက်စေတော့မည် မဟုတ်ချေ။

[ရှားပါးအဆင့် ရတနာရှာဖွေရေး တာဝန် ပြီးမြောက်ပါပြီ]

[ဆုလာဘ် ရရှိပါသည် ကျွမ်းကျင်မှု သေနတ်ပစ် စွမ်းရည်]

[ပိုင်ရှင် သည် သေနတ် ပစ်ခတ်ခြင်း ကျွမ်းကျင်မှု စွမ်းရည်ကို ရရှိပါမည်]

တတိယမြောက် တရားမဝင် အမဲလိုက်သူကို ဖမ်းဆီးမိပြီးနောက် ရွှီယန်၏ ခေါင်းထဲတွင် စနစ်၏ သတိပေးသံ ထွက်ပေါ်လာခဲ့လေသည်။

ပထမဆုံးမှာ ကျွမ်းကျင်မှု ပင်ဖြစ်သည်။

ဤကျွမ်းကျင်မှု က တပ်မတော်ထဲတွင် ဆိုပါက အလွန် အသုံးဝင်မည် ဖြစ်သော်ငြားလည်း နှမြောစရာ ကောင်းသည်မှာ သူက ထိုအသက်အရွယ်ကို ကျော်လွန်သွားခဲ့ပြီ ဖြစ်လေသည်။

ယခုအခါ ကစားကွင်းများတွင် ပစ်မှတ်များကို သွားရောက် ပစ်ခတ်ကာ အရုပ်လေးများ ရယူရန် သက်သက်သာ အသုံးပြုနိုင်တော့မည် ဖြစ်လေသည်။

[အထူး အာနိသင်ရှိ ဓာတ်မြေဩဇာ စက်ရုံ လုပ်ဆောင်ချက် ဖွင့်လှစ်ပါသည် ပိုင်ရှင် သည် ဓာတ်မြေဩဇာ စက်ရုံ တွင် ဓာတ်မြေဩဇာ များကို လဲလှယ် ရယူနိုင်ပါသည်]

[ဆုလာဘ် ရရှိပါသည် ကျားခေါင်းပုံ တစ်ပုံစံတည်း တူညီသော ပုံတူပစ္စည်း ကျားခေါင်း၏ မူလပစ္စည်းနှင့် တူညီသော စုဆောင်းမှု ပစ္စည်း ဖြစ်ပြီး အချိန်၏ သက်တမ်းရင့်မှု မပါဝင်ခြင်း သက်သက်သာ ဖြစ်ပါသည်]

[အပို ဆုလာဘ် ရရှိပါသည် တိုက်ရိုက်ထုတ်လွှင့်မှု အသုံးပြု ဒရုန်းကင်မရာ အသစ် တစ်စီး]

[အပို ဆုလာဘ် ရရှိပါသည် ကျား၏ နှစ်သက်မှု]

အချက်အလက်ပြကွက် ပေါ်ရှိ ဆုလာဘ်များကို ကြည့်ရင်း ရွှီယန် လည်း သက်ပြင်းချလိုက်မိလေသည်။

ဤတစ်ကြိမ် ဆုလာဘ်များက မဆိုးလှဟု ဆိုရမည် ဖြစ်လေသည်။

တောင်ပေါ်ရှိ ရှုခင်းများက လှပနေဆဲ ပင်ဖြစ်ပြီး တရားမဝင် အမဲလိုက်သူများ၏ ကိစ္စရပ်ကြောင့် ဤနေရာတွင် အနည်းငယ် စည်ကားသိုက်မြိုက် သွားစေခဲ့လေသည်။

အထူးရဲတပ်ဖွဲ့ဝင်များက တရားမဝင် အမဲလိုက်သူများကို ဖမ်းဆီးရန် အလုပ်များနေကြပြီး ကားမောင်းလာသော ရဲများကတော့ တောင်ပေါ်သို့ တက်လာရန် အချိန်မရလိုက်ကြချေ။

ရွှီယန်ကတော့ တိုက်ရိုက်ထုတ်လွှင့်မှုကို ဆက်လက် လုပ်ဆောင်နေပြီး အားလုံးကို သစ်တော၏ မြင်ကွင်းများကို ပြသပေးနေလေသည်။

"ရဲတွေ ရောက်လာပြီး တရားမဝင် အမဲလိုက်တဲ့ သူ သုံးယောက်စလုံးကို ဖမ်းမိသွားပြီ... လုပ်ဆောင်နိုင်စွမ်း က တော်တော်လေး မြင့်မားတယ်..."

"သူတို့ရဲ့ အိတ်တွေ ထဲမှာ ဖမ်းဆီး ခံထားရတဲ့ တောရိုင်း တိရစ္ဆာန် မနည်းမနော ကို တွေ့ခဲ့ရတယ်..."

"အသက်ရှင်နေပြီး ကယ်လို့ရတဲ့ အကောင်တွေကိုတော့ ပြန်ယူသွားပြီး ကယ်တင်ထားကြတယ်..."

"တောရိုင်း တိရစ္ဆာန်တွေကို တရားမဝင် အမဲလိုက်တာက ကြီးလေးတဲ့ ရာဇဝတ်မှု တစ်ခုပါ... အားလုံးပဲ တစ်ခုခု ထူးခြားတာ တွေ့ရင် အချိန်မီ တိုင်ကြားနိုင်ပါတယ်..."

ရွှီယန်က အသိပညာ ဗဟုသုတ ဝေမျှရန် မမေ့လျော့ဘဲ ကောင်းမွန်သော စိတ်ဓာတ်ခွန်အားများကို ဖြန့်ဝေပေးနေလေသည်။

[ဒီနေ့ တကယ်ကို စိတ်လှုပ်ရှားစရာ ကောင်းတာပဲ အနောက်ဘက်မှာ ဘာတွေ ဖြစ်သွားလဲ ဆိုတာကို ငါတို့ကို လုံးဝ မပြတော့ဘူး]

[အဲဒီ တရားမဝင် အမဲလိုက်တဲ့ သူတွေက တကယ်ပဲ လူသတ်ရတာကို မျက်တောင် မခတ်တဲ့ သူတွေလား ငါ ရုပ်ရှင်တွေထဲမှာ ကြည့်ဖူးတယ် ပစ်သတ်မယ် ဆိုတာနဲ့ တိုက်ရိုက်ကို ပစ်သတ်ကြတာ]

[လောင်ရွှီ အရမ်း သတ္တိကောင်းတာပဲ]

[ရဲအင်အား ဒီလောက် အများကြီး ထွက်လာတာ ဆိုတော့ ကိစ္စက မသေးဘူးပဲ]

အားလုံးက တစ်ယောက်တစ်ပေါက် ဆွေးနွေးပြောဆို နေကြချိန်တွင် ရွှီယန်က ထိုရွှေရောင် ဘင်္ဂလားကျား ကို မြင်တွေ့လိုက်ရပြီ ဖြစ်လေသည်။

ဘင်္ဂလားကျား၏ ရှားပါးအဆင့် မျိုးဗီဇ ကွဲလွဲမှု ဖြစ်ပြီး အဖြူရောင် ဘင်္ဂလားကျား ထက်ပင် ပိုမို ရှားပါးသော အဆင့် ဖြစ်လေသည်။

ထို့အပြင် တရုတ်နိုင်ငံ ပြည်တွင်းတွင် တောရိုင်း ဘင်္ဂလားကျား အနည်းငယ် ရှိနေပြီး ဤတစ်ကောင် ကလည်း တရုတ်နိုင်ငံ၏ နိုင်ငံတော်အဆင့် တစ် ကာကွယ်စောင့်ရှောက်ရမည့် တိရစ္ဆာန် သာဖြစ်လေသည်။

ဘင်္ဂလားကျား ၏ မျက်နှာပေါ်ရှိ သွေးကွက်များကို တစ်စိတ်တစ်ပိုင်း ရှင်းလင်းထားပြီး ဖြစ်ရာ ကြည့်ရသည်မှာ အတော်လေး သန့်ရှင်း နေပုံရလေသည်။

အင်တာနက်သုံးစွဲသူများက ဘင်္ဂလားကျား၏ ပုံစံကို ရှင်းလင်းစွာ မြင်တွေ့လိုက်ရသောအခါ အံ့ဩမှင်တက် သွားကြရလေသည်။

[ဒါက ကျား လား သူ့ရဲ့ အမွေးတွေက ဘယ်လိုလုပ် ရွှေရောင် ဖြစ်နေရတာလဲ]

[ဘုရားရေ အရမ်း လှတာပဲ]

အားလုံးက အထူးပင် အံ့ဩတုန်လှုပ် နေကြလေသည်။

ရွှေရောင်ကျား၏ ခန္ဓာကိုယ် အရွယ်အစားက အလွန် ကြီးမားလှပေရာ သန်စွမ်းသော နွားကြီး တစ်ကောင်နှင့် ပင် ယှဉ်နိုင်လေသည်။

အမွေးအမျှင်များ ထူထပ်နေသော ခေါင်းကြီးက လူ၏ ခေါင်းထက်ပင် အဆပေါင်းများစွာ ပိုမို ကြီးမားလေသည်။

ကျားလက်ဝါး ကြီးက ပို၍ပင် ကြီးမား ထူထပ်လှပေရာ သာမန် တိရစ္ဆာန်များ အနေဖြင့် ၎င်း၏ လက်ဝါးရိုက်ချက် တစ်ချက်ကို အမှန်တကယ်ပင် ခံနိုင်ရည် ရှိမည် မဟုတ်ချေ။

ယခင်က ခွေးတစ်ကောင်က ကျားနှင့် ဆုံတွေ့ရာတွင် သွားရောက် ရန်စရဲသဖြင့် ကျား၏ လက်ဝါးရိုက်ချက် တစ်ချက်တည်းဖြင့် မြေပြင်ပေါ်သို့ ဖိချခံလိုက်ရပြီး ပြန်လည် ခုခံရန် အခွင့်အရေးပင် မရရှိခဲ့ချေ။

ရွှီယန်က မူလနေရာတွင် ရပ်လျက် ၎င်းကို ကြည့်ရှုရင်း စကားဆိုလိုက်လေသည်။ "စောစောက အနောက်မြောက် တိရစ္ဆာန် အရင်းအမြစ် ကာကွယ်စောင့်ရှောက်ရေး ဗဟိုဌာန က လူတွေ ကျွန်တော်နဲ့ စကားပြောသွားတယ်... ဒီရွှေရောင် ကျား ကို တည်နေရာပြ ကိရိယာ တပ်ဆင်ပြီး အမြင့်ဆုံး အဆင့်နဲ့ ကာကွယ် စောင့်ရှောက် သွားမယ် လို့ ပြောတယ်..."

"လင်းပိုင် တွေရဲ့ ကာကွယ်ရေး အဆင့်အတိုင်း ပေါ့..."

"ပြီးတော့ ကျွန်တော့်ကိုပါ တစ်ပါတည်း ကြေညာပေးဖို့ ပြောသွားသေးတယ်..."

"ကျား ကို အစိုးရ က တရားဝင် ကာကွယ် စောင့်ရှောက် သွားမှာ ဖြစ်သလို စောင့်ကြည့် စစ်ဆေးမှု တွေလည်း လုပ်ဆောင်သွားမှာပါ..."

"တခြား တရားမဝင် အမဲလိုက်တဲ့ သူတွေ စွန့်စားမှု ထပ်မလုပ်ရဲအောင် လို့ပါ..."

"ရှာတွေ့တာနဲ့ ကြီးလေးတဲ့ ရာဇဝတ်မှု အဖြစ် သတ်မှတ် အရေးယူခံရမှာပါ..."

ရွှီယန်က အရှေ့သို့ ခြေနှစ်လှမ်းခန့် လျှောက်သွားလိုက်ရာ ရွှေရောင်ကျား က ကြည့်ရသည်မှာ အနည်းငယ် စိုးရိမ် ထိတ်လန့်နေဆဲ ပင်ဖြစ်သည်။

မည်သို့ပင်ဖြစ်စေ စောစောက ဖြစ်ပွားခဲ့သော ကိစ္စရပ်များကြောင့် ၎င်း အနည်းငယ် ထိတ်လန့်နေခဲ့ခြင်း ပင်ဖြစ်သည်။

ကျားများက လူသားများကို ရန်စ၍ မလွယ်ကူကြောင်း သိရှိထားကြသဖြင့် သာမန်အားဖြင့် လူသားများနှင့် အလွယ်တကူ ပတ်သက်ဆက်နွှယ်လေ့ မရှိကြချေ။

ဤအချိန်တွင် တိုက်ရိုက်ထုတ်လွှင့်မှု အခန်းထဲရှိ ကြည့်ရှုသူများ အားလုံး အထူးပင် စိုးရိမ်ပူပန် နေကြလေသည်။

ပြဿနာ တစ်ခုခု ထပ်ဖြစ်လာမည်ကို အမြဲတမ်း စိုးရိမ်နေကြခြင်း ပင်ဖြစ်သည်။ မည်သို့ပင်ဖြစ်စေ ကျား သာဖြစ်လေသည်။

ထို့နောက် ရွှီယန်က လျှောက်သွားကာ ကျား၏ ခေါင်းကို နှစ်ချက်ခန့် ပွတ်သပ်လိုက်ပြီး ကျားကြီးကို လုံးဝ တည်ငြိမ်သွားအောင် နှစ်သိမ့်ပေးလိုက်သည်ကို အားလုံး မြင်တွေ့လိုက်ကြရလေသည်။

အားလုံးက အသားကျနေပြီ ဖြစ်သော်ငြားလည်း ကိုယ်တိုင်ကိုယ်ကျ မြင်တွေ့လိုက်ရသောအခါ အံ့ဩတုန်လှုပ် နေကြဆဲ ပင်ဖြစ်သည်။

[လောင်ရွှီ မင်း ဒါကို ဘယ်လို လုပ်လိုက်တာလဲ]

[လာပြန်ပြီလား]

[လခွမ်း တကယ် အစွမ်းထက်လွန်းတယ်]

[ဒီလိုနဲ့ပဲ ယဉ်ပါးသွားပြီလား]

ဤကဲ့သို့သော မေးခွန်းများကို ရင်ဆိုင်ရရာတွင် ရွှီယန်က မည်သည့်အရာကိုမျှ ရှင်းမပြတော့ချေ။

"နောက်ပိုင်း တည်နေရာပြ ကိရိယာ တပ်ဆင်တဲ့ အခါကျရင် ကျွန်တော်ပဲ လုပ်ရလောက်မယ် ထင်တယ်..."

"အားလုံး စိတ်ချလို့ ရပါတယ်... အခုခေတ် နည်းပညာတွေက အရမ်း တိုးတက်နေပြီ ဆိုတော့ ကျားရဲ့ နေထိုင်မှု ဘဝအပေါ် ဘာသက်ရောက်မှု မှ ရှိမှာ မဟုတ်ပါဘူး..."

"လူဆိုးတွေ က တော်တော်လေး များနေလို့ ဒီလို ကာကွယ် စောင့်ရှောက် ရတာပါ..."

"ဒါကလည်း မတတ်သာတဲ့ ကိစ္စပါပဲ..."

ဤတစ်ကြိမ် တိုက်ရိုက်ထုတ်လွှင့်မှု က အထူးပင် ရင်ခုန် စိတ်လှုပ်ရှားစရာ ကောင်းလှပေသည်။

အချိန်များက အလွန် မြန်ဆန်စွာ ကုန်လွန်သွားပြီး မျက်စိတစ်မှိတ် အတွင်း နေဝင်ရီတရော အချိန်သို့ ရောက်ရှိလာခဲ့လေပြီ။

ရွှီယန်က ရွှေရောင်ကျား နှင့်အတူ အချိန်အတန်ကြာ ဆော့ကစား ပြီးနောက် အင်တာနက်သုံးစွဲသူများကို နှုတ်ဆက်လိုက်လေသည်။

ထို့နောက် သူက ကျားကြီးကို တည်နေရာပြ ကိရိယာ တပ်ဆင်ပေးမည့် ကိစ္စအတွက် စတင် အလုပ်များ နေတော့သည်။

၎င်းကို သေချာစွာ ကာကွယ်စောင့်ရှောက် ရမည် ဖြစ်လေသည်။

'ရွှေရောင် ဘင်္ဂလားကျား ပါလား...'

'တကယ်ကြီး ရှိနေလိမ့်မယ်လို့ ထင်မှတ်မထားခဲ့ဘူး...'

'သူ ဒီချောက်ကမ်းပါးကြီး ထဲမှာပဲ ကောင်းကောင်းမွန်မွန် ရှင်သန် နေထိုင်သွားနိုင်ဖို့ မျှော်လင့်ပါတယ်...'

'ဘာပဲဖြစ်ဖြစ် တောရိုင်း ကျားတွေက အရမ်းကို နည်းပါးလွန်းနေပြီ လေ...'

ရွှီယန်က စိတ်ထဲမှ တွေးတော နေလိုက်လေသည်။