အခန်း ၅၉၆

အခန်း (၅၉၆)

" ဆရာရွှင် " ရင်ကျန့်က ရွှင်ဇီကို ကြည့်လိုက်သည်။

" အမိန့်ရှိပါ။ " ရွှင်ဇီက ရှေ့တိုးလာပြီး ရိုသေစွာ ပြောလိုက်သည်။ သူက အင်ပါယာကျောင်းတော်၏ မဟာအကြီးအကဲဖြစ်သောကြောင့် သူ၏ အင်ပါယာစွမ်းအားက အလွန်သန်မာပြီး အင်မော်တယ်တစ်ယောက်ပင် သူ့ကို ယှဉ်နိုင်မည်မဟုတ်ပေ။

" အင်ပါယာကျောင်းတော်က ဟင်းလင်းပြင်ချိုးဖျက်ခြင်းအဆင့် ၃၀၀၀၀၊ သိုင်းတာအိုနတ်အသွင်အဆင့် ၃၀၀၀ နဲ့ သိုင်းတာအိုမဟာစွမ်းအားရှင်အဆင့် ၁၀၀၀ ကို ရွေးချယ်လိုက်ပါ။ သူတို့က အင်မော်တယ်ဘုံမှာ ကျောင်းတော်တွေ တည်ထောင်ပြီး သိုင်းတာအိုကို သင်ကြားပေးရမယ်။ သိုင်းတာအိုအပြင် အင်မော်တယ်လမ်းစဉ်၊ ​ဗုဒ္ဓလမ်းစဉ်၊ ဆေးဖော်စပ်ခြင်း၊ ရတနာသန့်စင်ခြင်း စတာတွေကို အင်ပါယာကျောင်းတော်ရဲ့ ၁၀ ပုံ ၇ ပုံလောက် လွှတ်ပေးရမယ်။ " ရင်ကျန့်က လေးနက်စွာ အမိန့်ပေးလိုက်သည်။

" အမိန့်အတိုင်းပါ။ ကျွန်တော်မျိုး အင်ပါယာကျောင်းတော်က ဆရာတွေဆီကို ချက်ချင်း အမိန့်ပေးလိုက်ပါမယ်။ " ရွှင်ဇီက ပြောလိုက်ပြီး ထျန်းရွှမ်ကြေးမုံမှတစ်ဆင့် အမိန့်ကို ပို့ပေးလိုက်သည်။

" ဧကရာဇ်မင်းမြတ်ကို အစီအရင်ခံပါတယ်။ " ဝမ်ကျန့်က ရှေ့တိုးလာသည်။ " အခု လူသားဘုံက တည်ငြိမ်သွားပြီ။ ကမ္ဘာကြီးလည်း အေးချမ်းသွားပြီ။ ချင်ရဲ့ စခန်းကြီးတွေက လူသားဘုံမှာ ဆက်နေဖို့ မလိုတော့ပါဘူး။ သူတို့က ချင်အတွက် နယ်မြေတိုးချဲ့ဖို့ အင်မော်တယ်ဘုံကို သွားနိုင်ပါပြီ။ "

" အဲ့ဒီကိစ္စကို ငါဆုံးဖြတ်ပြီးပါပြီ။ စခန်းတွေအားလုံးက အရည်အချင်းရှိတဲ့ စစ်သည်တွေကို ရွေးချယ်ပြီး ကျင့်ကြံခြင်းနယ်မြေထဲ ဝင်သွားကြပြီ။ ဒီကိစ္စပြီးတာနဲ့ အားလုံး အင်မော်တယ်ဘုံထဲ ဝင်ကြရမယ်။ " ရင်ကျန့်က တည်ငြိမ်စွာ ပြောလိုက်သည်။

" ဧကရာဇ်မင်းမြတ်က အမြော်အမြင်ကြီးမားလှပါတယ်။ " ဝမ်ကျန့်က ချက်ချင်း ပြန်ပြောလိုက်သည်။

" ဧကရာဇ်မင်းမြတ် လူသားဘုံက ကိစ္စတွေ တည်ငြိမ်သွားတာက ထျန်းရွှမ်ကြေးမုံက အဓိကနေရာမှာ ပါဝင်ပါတယ်။ ဧကရာဇ်မင်းမြတ် အင်မော်တယ်ဘုံထဲ ဝင်တဲ့အခါ အရာရှိတွေကို ခေါ်သွားဖို့ လိုအပ်ပါတယ်။ အိမ်ရှေ့စံမင်းသားက လူသားဘုံထက် လူဦးရေပိုများတဲ့ နယ်မြေတွေကို သိမ်းပိုက်ထားပြီဖြစ်လို့ အရည်အချင်းရှိတဲ့ အရာရှိတွေ အများကြီး လိုအပ်ပါတယ်။ " လွီပုဝေကလည်း အကြံပေးလိုက်သည်။

" မှန်တယ်။ " ရင်ကျန့်က ခေါင်းညိမ့်လိုက်သည်။

မြေကြီးအင်မော်တယ်ဘုံ၊ အရှေ့တိုက်ကြီး။

ကျောက်ဖုန်း၏ အမိန့်အောက်တွင် ခွန်လွန်ဂိုဏ်း၏ လက်အောက်မှ လူသားနိုင်ငံများကို အပြည့်အဝ ထိန်းချုပ်ပြီးနောက် နယ်မြေတိုးချဲ့ခြင်းကို ရပ်တန့်လိုက်သည်။ ချင်က တိုက်ခိုက်မှုများကို ရပ်တန့်လိုက်ပြီး စစ်တပ်များက နယ်စပ်ကို စောင့်ကြပ်နေကြသည်။

နယ်မြေအတွင်း အင်မော်တယ်များနှင့် နတ်ဘုရားများက လူသားများကို အစာများအဖြစ် မွေးမြူထားသည်ဟူသော သတင်းက ပျံ့နှံ့သွားသည်။ အင်မော်တယ်တက်လှမ်းခြင်းအခမ်းအနား၏ စစ်မှန်သော ရည်ရွယ်ချက်ကို သိလိုက်ရသောအခါ ပြည်သူအားလုံး ထိတ်လန့်သွားရသည်။

" အင်မော်တယ်တွေက တကယ် နတ်ဆိုးတွေပဲ။ "

" သူတို့က ငါတို့ လူသားတွေရဲ့ အသွေးအသားကို စားသုံးနေကြတယ်။ "

" အင်မော်တယ်တက်လှမ်းခြင်းအခမ်းအနားက ဝက်ခြံထဲက ပိုဝတဲ့ ဝက်တွေကို ရွေးချယ်သွားတာပဲ။ စိတ်ဝိညာဉ်အမြစ်ရှိတဲ့သူတွေက မရှိတဲ့သူတွေထက် ပိုအရသာရှိလို့ပဲ။ "

" ငါ့ဦးလေးက လွန်ခဲ့တဲ့နှစ်တွေကတည်းက အင်မော်တယ်ဂိုဏ်းကို ဝင်သွားပြီး ပြန်မလာတော့ဘူး။ အရင်က သူ အင်မော်တယ်ဖြစ်သွားတယ်လို့ ထင်ခဲ့တာ။ အခုတော့ အင်မော်တယ်တွေနဲ့ နတ်ဘုရားတွေရဲ့ အစာဖြစ်သွားလောက်ပြီ။ "

" ငါတို့ အမြဲတမ်း ရိုသေကိုးကွယ်ခဲ့တဲ့ အင်မော်တယ်တွေနဲ့ နတ်ဘုရားတွေက တကယ် နတ်ဆိုးတွေပဲ။ "

" ဒါ အရှင်မင်းကြီးရဲ့ ကျေးဇူးကြောင့်ပဲ။ အရှင်မင်းကြီးသာမရှိရင် ငါတို့က အင်မော်တယ်တွေနဲ့ နတ်ဘုရားတွေရဲ့ စစ်မှန်တဲ့ ရည်ရွယ်ချက်ကို ဘယ်တော့မှ သိမှာမဟုတ်ဘူး။ "

" အရှင်မင်းကြီးရဲ့ ကျေးဇူးက ကြီးမားလှပါတယ်။ "

" အခုဆိုရင် အရှင်မင်းကြီးက ထျန်းရွှမ်ကြေးမုံနဲ့ သိုင်းတာအိုကျင့်စဉ်တွေကိုပါ ပေးအပ်ထားတယ်။ ဒီနေ့ကစပြီး ငါ သိုင်းတာအိုကိုပဲ အစွမ်းကုန် ကျင့်ကြံတော့မယ်။ "

ပြည်သူများစွာက အင်မော်တယ်များနှင့် နတ်ဘုရားများ၏ အမှန်တရားများကို သိရှိပြီးနောက် ကျောက်ဖုန်းအပေါ် ပို၍ သစ္စာရှိလာကြသည်။ ထိုသတင်းက တဖြည်းဖြည်းနှင့် အရှေ့တိုက်ကြီးတစ်ခုလုံးကို ပျံ့နှံ့သွားသည်။

ကောင်းကင်ဘုံ၊ လင်းရှောင်နန်းတော်။

ခန်းမထဲတွင် ရပ်နေသော အင်မော်တယ်များနှင့် နတ်ဘုရားများ၏ အရေအတွက်က သိသိသာသာ နည်းသွားခဲ့သည်။ ခန်းမတစ်ခုလုံးကို တိတ်ဆိတ်မှုက လွှမ်းခြုံထားသည်။ ကောင်းကင်အင်မော်တယ်အဆင့်မှ မဟာရွှေအင်မော်တယ်အဆင့်ထိ အများအပြား ပျောက်ဆုံးနေကြသည်။

" ဧကရာဇ်မင်းမြတ် ရက်နှစ်ဆယ်အတွင်း ကောင်းကင်ဘုံက အရာရှိအများကြီး သေဆုံးသွားပါတယ်။ သူတို့ထဲမှာ မဟာရွှေအင်မော်တယ်အချို့တောင် ပါဝင်ပါတယ်။ " တိုက်ပိုင်ကျင်းရှင်းက တင်းမာသော အမူအရာနှင့် ပြောလိုက်သည်။

ပလ္လင်ပေါ်မှ ကောင်းကင်ဧကရာဇ်၏ မျက်နှာက မဲ့မှောင်နေသည်။ ထိုကပ်ရောဂါက အလွန်ကြောက်စရာကောင်းပြီး ရက်နှစ်ဆယ်အတွင်း ကောင်းကင်၃၃ခုလုံးကို ထိခိုက်စေခဲ့သည်။ ကောင်းကင်ဧကရာဇ်က ကူးစက်ခံထားရသူများကို သီးသန့်ခွဲထားပြီး ရောဂါမပျံ့အောင် တားဆီးထားသည်။

" စီမင် အမှန်တရားကို ဖော်ထုတ်နိုင်ပြီလား။ " ကောင်းကင်ဧကရာဇ်က စီမင်ကြယ်နတ်ဘုရားကို ကြည့်လိုက်သည်။

" ဧကရာဇ်မင်းမြတ် စုံစမ်းစစ်ဆေးမှုတွေအရ အရင်းအမြစ်ကို ရှာတွေ့ပါပြီ။ တောင်ဘက်တိုက်ကြီးက ဝိညာဉ်အနှစ်သာရတွေနဲ့ အသွေးအသားတွေ ကောင်းကင်ဘုံကို ယူလာပြီးတဲ့နောက်မှာ အဲ့ဒီကပ်ရောဂါက ပေါ်လာတာပါ။ " စီမင်ကြယ်နတ်ဘုရားက ရိုသေစွာ ပြောလိုက်သည်။

" တောင်ဘက်တိုက်ကြီးလား။ " ကောင်းကင်ဧကရာဇ်က မျက်မှောင်ကြုတ်သွားပြီး အနည်းငယ် စိတ်သက်သာရာ ရသွားသည်။

တောင်ဘက်တိုက်ကြီးက ကောင်းကင်ဘုံလက်အောက်မှာ ရှိသော်လည်း ​ဗုဒ္ဓဂိုဏ်း၊ နတ်ဆိုးနှင့် အခြားအင်အားစုများလည်း ရှိနေသောကြောင့် ပြိုင်ဆိုင်မှုအများဆုံး နယ်မြေဖြစ်သည်။ ကောင်းကင်ဘုံအတွက် ဝိညာဉ်အနှစ်သာရအရင်းအမြစ်က အရှေ့တိုက်ကြီးတွင် ရှိနေသည်။

" ဒီနေ့ကစပြီး ငါတို့ တောင်ဘက်တိုက်ကြီးက ဝိညာဉ်အနှစ်သာရတွေနဲ့ အသွေးအသားတွေကို လက်မခံတော့ဘူး။ " ကောင်းကင်ဧကရာဇ်က ချက်ချင်း အမိန့်ပေးလိုက်သည်။

ထိုကပ်ရောဂါက သူ့ကို အမှန်တကယ် ထိတ်လန့်သွားစေခဲ့သည်။ ကောင်းကင်ဘုံ၏ ဆုံးရှုံးမှုက အမှန်တကယ် ကြီးမားလှသည်။ သူက ကပ်ရောဂါအကြောင်းကို သေချာမသိခင် တောင်ဘက်တိုက်ကြီးမှ ဝိညာဉ်အနှစ်သာရများကို လက်ခံမည်မဟုတ်ပေ။

" ဧကရာဇ်မင်းမြတ် ​ဗုဒ္ဓဂိုဏ်းမှာလည်း ကျွန်တော်မျိုးတို့လို ကပ်ရောဂါတွေ ဖြစ်နေပါတယ်။ ​ဗုဒ္ဓတွေနဲ့ ရဟန်းတွေ အများကြီး သေဆုံးသွားပါတယ်။ " အင်မော်တယ်တစ်ယောက်က ပြောလိုက်သည်။

ထိုစကားများကို ကြားသောအခါ ကောင်းကင်ဧကရာဇ်၏ မျက်နှာပေါ်တွင် ဝမ်းသာသော အရိပ်အယောင်တစ်ခု ပေါ်လာသည်။ အနည်းဆုံးတော့ သူ၏ ကောင်းကင်ဘုံတစ်ခုတည်းမဟုတ်ဘဲ ဗုဒ္ဓဂိုဏ်းလည်း ထိခိုက်ခဲ့သည်။

" တိုက်ပိုင် အရှင်လောင်ဇီက ကပ်ရောဂါကို စစ်ဆေးပြီးပြီလား။ " ကောင်းကင်ဧကရာဇ်က မေးလိုက်သည်။

" ဧကရာဇ်မင်းမြတ် အဲ့ဒီကပ်ရောဂါအဆိပ်ကို အရှင်လောင်ဇီက သေဆုံးသွားတဲ့ အင်မော်တယ်တွေရဲ့ အလောင်းတွေကနေ ထုတ်ယူထားပါတယ်။ ပြီးတော့ ဝိညာဉ်အနှစ်သာရတွေထဲကလည်း ထုတ်ယူထားပါတယ်။ " တိုက်ပိုက်ကျင်းရှင်းက ကျောက်စိမ်းသေတ္တာတစ်ခုကို ထုတ်လိုက်သည်။ အထဲတွင် အနက်ရောင်အငွေ့အသက်အချို့ လှုပ်ရှားနေပြီး တစ်ခါတစ်ရံ မတည်ရှိနေသကဲ့သို့ ဖြစ်နေသည်။

ကောင်းကင်ဧကရာဇ်က လက်ဝှေ့ရမ်းလိုက်ပြီး ကျောက်စိမ်းသေတ္တာက သူ၏ လက်ထဲသို့ ရောက်လာသည်။ သူ၏ နတ်ဘုရားအာရုံက သေတ္တာထဲသို့ ဝင်ရောက်သွားသော်လည်း ဘာမှမသိရပေ။

" ဒါက ငါတို့ ကောင်းကင်ဘုံကို ကြီးမားတဲ့ ဆုံးရှုံးမှု ဖြစ်စေခဲ့တဲ့ အဆိပ်လား။ " ကောင်းကင်ဧကရာဇ်က အံ့ဩစွာ ​မေးလိုက်သည်။

" ဒီအဆိပ်က အရမ်းထူးဆန်းတယ်လို့ အရှင်လောင်ဇီက ပြောပါတယ်။ ဒါက သတ်ဖြတ်ခြင်းကနေတစ်ဆင့် ပျံ့နှံ့တာပဲ။ ဒါပေမယ့် သေချာသိဖို့ဆိုရင် တောင်ဘက်တိုက်ကြီးကို သွားပြီး စုံစမ်းဖို့ လိုတယ်လို့ ပြောပါတယ်။ " တိုက်ပိုင်ကျင်းရှင်းက ပြောလိုက်သည်။

" ဒါကို သေချာစုံစမ်းရမယ်။ " ကောင်းကင်ဧကရာဇ်က ခေါင်းညိမ့်ပြီး ကျန်းတောက်လင်ကို ကြည့်လိုက်သည်။ " ကောင်းကင်ဆရာကျန်း "

" ကျွန်တော်မျိုး ရှိပါတယ်။ " ကျန်တောက်လင်က ရှေ့တိုးလာသည်။

" ကောင်းကင်ဆရာက လူသားတွေနဲ့ နီးနီးကပ်ကပ်ရှိလို့ ဒီကပ်ရောဂါအကြောင်းကို စုံစမ်းပါ။ ဒါက သဘာဝကပ်ဘေးလား ဒါမှမဟုတ် လူလုပ်ကပ်ဘေးလားဆိုတာ သေချာစစ်ဆေးပါ။ အရင်းအမြစ်​ကို တွေ့တာနဲ့ ချက်ချင်း အစီအရင်ခံပါ။ " ကောင်းကင်ဧကရာဇ်က လေးနက်စွာ ပြောလိုက်သည်။

" အမိန့်အတိုင်းပါ။ " ကျန်းတောက်လင်က ငြင်းဆန်ခြင်းမရှိပေ။

ထိုအချိန်တွင် ...

" စီလုနန်းတော်က အစီအရင်ခံစာ ရောက်လာပါတယ်။ အရှေ့တိုက်ကြီးက ခွန်လွန်ဂိုဏ်းရဲ့ ကောင်းကင်တံဆိပ်က ကွဲအက်သွားပါပြီ။ မကြာသေးခင်က အရှေ့တိုက်ကြီးက အင်မော်တယ်ဂိုဏ်းတွေက ဝိညာဉ်အနှစ်သာရတွေ ပေးခဲ့ပေမယ့် ခွန်လွန်ဂိုဏ်းက မပေးခဲ့ပါဘူး။ " စီလုနန်းတော်မှ အရာရှိတစ်ယောက်က ခန်းမထဲသို့ ဝင်လာပြီး အစီရင်ခံလိုက်သည်။

" ခွန်လွန်လား။ " ကောင်းကင်ဧကရာဇ်၏ အမူအရာက ပြောင်းလဲသွားသည်။ " ဒီကိစ္စကို ချန်းရှန်းမဟာဧကရာဇ်ဆီ လွှဲပေးလိုက်ပါ။ ခွန်လွန်ဂိုဏ်းက ချန်ဂိုဏ်းရဲ့ အဆက်အနွယ်ဖြစ်လို့ ဒီကိစ္စကို သူပဲ စီမံလိမ့်မယ်။ "

ကောင်းကင်ဘုံတွင် ကောင်းကင်ဧကရာဇ်က အမြင့်ဆုံးဖြစ်ပြီး သူ၏ လက်အောက်တွင် မဟာဧကရာဇ်လေးပါးရှိသည်။ ၎င်းကို နတ်ဘုရားခန့်အပ်ခြင်းစစ်ပွဲအပြီးတွင် သူတော်စင်များ ချမှတ်ခဲ့ခြင်းဖြစ်သည်။ သူတော်စင်များ ပျောက်ကွယ်သွားသော်လည်း ကောင်းကင်ဘုံ၏ ဖွဲ့စည်းပုံက ရှိနေဆဲ ဖြစ်သည်။ ဝိညာဉ်အနှစ်သာရများကိုပင် မဟာဧကရာဇ်များကို ခွဲဝေပေးရန် လိုအပ်သည်။

" အခု ကောင်းကင်ဘုံအတွက် အရေးကြီးဆုံးက ဒီကပ်ရောဂါရဲ့ အရင်းအမြစ်ကို ဖော်ထုတ်ဖို့ပဲ။ အခြားကိစ္စတွေကို စိတ်ထဲသိပ်မထားနဲ့။ " ကောင်းကင်ဧကရာဇ်က လေးနက်စွာ ပြောလိုက်သည်။

စစ်မြေပြင်မှ ထာဝရရှင်ခြင်းဆီသို့