အခန်း ၂၁၃

အခန်း ၂၁၃

နောက်တစ်နေ့နံနက်တွင် ကျန်းဟန်သည် သူ အမြဲတစေ လုပ်ဆောင်နေကျအတိုင်း စိတ်စွမ်းအားကျင့်စဉ်ကို လေ့ကျင့်ရန်အတွက် နံနက် လေးနာရီတွင် အိပ်ရာမှ ထခဲ့သည်။

အဝတ်အစားလဲပြီး ဧည့်ခန်းထဲသို့ လျှောက်လှမ်းထွက်လာချိန်တွင် လျန်ပင်းမှာ အိပ်ပျော်နေဆဲဖြစ်သည်ကို ကျန်းဟန် တွေ့ရှိလိုက်ရ၏။

သူမသည် သူမ၏ စောင်ကို အရုပ်တစ်ရုပ်ကဲ့သို့ ရင်ခွင်ထဲ၌ တင်းကျပ်စွာ ပွေ့ဖက်ထားပြီး သူမ၏ ဖြူဖွေးသော ခြေတံများဖြင့် စောင်ကို ရစ်ပတ်ထား၏။ ကြည့်ရသည်မှာ စိတ်လုံခြုံမှု ကင်းမဲ့ခြင်းဝေဒနာကို ပြင်းထန်စွာ ခံစားနေရသည့်အတိုင်းပင် ဖြစ်သည်။

သူမကို တစ်ချက် ကြည့်လိုက်ပြီးနောက် သူသည် ဝရံတာသို့ ထွက်ကာ စိတ်စွမ်းအားကျင့်စဉ်ကို စတင်လေ့ကျင့်လိုက်တော့သည်။

ထိုသားရဲကုန်သည်ကို သတ်ပြီးနောက်တွင် သူ၏ ပါရမီမှာ သိသိသာသာ အားကောင်းလာပြီး စိတ်ဝိညာဉ်စွမ်းအင် စီးဆင်းမှုမှာလည်း ပိုမိုချောမွေ့လာကြောင်း ထင်ရှားစွာ တွေ့ရှိလိုက်ရ၏။ နံနက်ခင်းတစ်ခုတည်း၌ပင် သိသာထင်ရှားသော တိုးတက်မှုကို သူ ရရှိခဲ့လေသည်။

ယခုအခါ သူ၏ အကြားအာရုံနှင့် အမြင်အာရုံတို့ကို ပေါင်းစပ်လိုက်လျှင် တစ်ကီလိုမီတာ အချင်းဝက်အတွင်းရှိ မည်သည့်လှုပ်ရှားမှုကိုမျှ လွတ်သွားစေခြင်း မရှိတော့ချေ။ မိုင်အနည်းငယ်အတွင်းရှိ ဝိညာဉ်စွမ်းအင် အပြောင်းအလဲများနှင့် ကြီးမားသော လှုပ်ခတ်မှုများကိုပါ ရှင်းလင်းစွာ အာရုံခံမိနေပြီ ဖြစ်သည်။

ဤအတိုင်းသာ ဆက်သွားမည်ဆိုပါက သူသည် တစ်လမပြည့်မီအချိန်အတွင်း အကြားအာရုံကျင့်ကြံခြင်းကို အောင်မြင်ပြီးမြောက်ကာ အဆင့် ၃ လက်ရွေးစင်အဆင့် သားရဲထိန်းချုပ်သူအဆင့်သို့ ရောက်ရှိနိုင်လိမ့်မည်ဟု သူ ခံစားမိသည်။

နောက်ဆုံး၌ လျန်ပင်းသည်လည်း နံနက် ခုနစ်နာရီခွဲတွင် အိပ်ချင်မူးတူးဖြင့် နိုးလာခဲ့လေသည်။

သူမသည် သမ်းဝေလိုက်ရင်း စိမ်းသက်နေသော ပတ်ဝန်းကျင်ကို ကြည့်ကာ အနည်းငယ် မိန်းမောတွေဝေသွားမိသည်။

သူမသည် မိမိကိုယ်ကိုယ် မယုံကြည်နိုင်လောက်အောင် ဖြစ်သွားခဲ့၏။ သူမသည် ဤကဲ့သို့ စိမ်းသက်သော နေရာတစ်ခု၌ တရေးမျှ နိုးခြင်းမရှိဘဲ မိုးလင်းသည့်တိုင်အောင် အလွန်အမင်း နှစ်ခြိုက်စွာ အိပ်ပျော်သွားခဲ့ခြင်း ဖြစ်သည်။

သူမက သက်ပြင်းတစ်ချက် မှုတ်ထုတ်လိုက်ပြီး ဤသည်မှာ သူမ ရက်အတော်ကြာအောင် ကောင်းကောင်းမအိပ်ရသေးခြင်းနှင့်လည်း သက်ဆိုင်နိုင်သလို ကျန်းဟန်ကြောင့်လည်း ဖြစ်နိုင်သည်ဟု တွေးလိုက်မိသည်။ ဤလူသား ဤနေရာတွင် ရှိနေခြင်းက သူမကို ကြီးမားသော စိတ်လုံခြုံမှု အသိကို ပေးစွမ်းနိုင်ခဲ့သည်။

သူမ ကျန်းဟန်၏ အိပ်ခန်းဘက်သို့ ကြည့်လိုက်ချိန်တွင်မူ သူသည် အိပ်ခန်းထဲ၌ မရှိတော့ကြောင်း သတိပြုမိသွားခဲ့သည်။

ဤအချက်က သူမကို လန့်ဖျတ်သွားစေပြီး ပတ်ဝန်းကျင်ကို အပြေးအလွှား လှည့်ပတ်ကြည့်ရှုလိုက်မိ၏။ ထိုစဉ် ကျန်းဟန်သည် ဝရံတာတွင် စိတ်စွမ်းအားကျင့်စဉ်ကို ကျင့်ကြံနေပြီဖြစ်ကြောင်း မြင်လိုက်ရတော့သည်။

“မီးဖိုချောင်ထဲမှာ ဟင်းသီးဟင်းရွက်တွေ မရှိတော့ဘူး။ ရှင့်ရဲ့ သိုလှောင်သေတ္တာထဲမှာ ရှိလား။ ကျွန်မ ချက်လိုက်ပါ့မယ်။”

လျန်ပင်းက တိုးတိုးလေး ပြောလိုက်သည်။

သူမသည် ကျန်းဟန်၏ သက်တော်စောင့်အဖြစ် တာဝန်ထမ်းဆောင်ရန် ကတိပြုထားခဲ့သူ ဖြစ်ရာ သဘာဝအတိုင်း သူ၏ စားဝတ်နေရေးနှင့် သွားလာရေး အားလုံးကို သူမ တာဝန်ယူရမည် ဖြစ်သည်။

“မင်းရဲ့ စိတ်စွမ်းအားကျင့်ကြံမှုကိုပဲ အာရုံစိုက်ပါ။ ဟင်းချက်တာ၊ အဝတ်လျှော်တာတွေလို ကိစ္စမျိုးတွေ လုပ်နေစရာ မလိုဘူး။ အပြင်ကပဲ ဝယ်စားလိုက်လို့ရတယ်။ အသက်ရှင်သန်ရပ်တည်ဖို့အတွက် အင်အားက ပထမဆုံး ဦးစားပေးပဲ။ ငါ လိုအပ်တာက အစွမ်းထက်တဲ့ ပါတနာတစ်ယောက်ပဲ။ အဝတ်လျှော်ဟင်းချက်တာလောက်ပဲ သိတဲ့ အိမ်အကူ အမျိုးသမီးတစ်ယောက် မဟုတ်ဘူး။”

ကျန်းဟန်က မျက်လုံးများကို ဖွင့်ကာ သူမကို ကြည့်လျက် ပြောလိုက်သည်။

“ဟုတ်ကဲ့။ ကျွန်မ နားလည်ပါပြီ။”

လျန်ပင်းက ခေါင်းငြိမ့်ပြလိုက်၏။ ကျန်းဟန်သည် အဘယ်ကြောင့် ဤမျှအထိ အစွမ်းထက်နေရသလဲဆိုသည်ကို သူမ စတင်သဘောပေါက်လာခဲ့ပြီဖြစ်သည်။

သူမသည်လည်း ထိုင်စရာနေရာတစ်ခုကို ရှာဖွေကာ စိတ်စွမ်းအားကျင့်စဉ်ကို စတင်လေ့ကျင့်လိုက်တော့သည်။

“မင်း အခြေခံ တရားထိုင်နည်းစနစ်ကိုရော သိရဲ့လား။”

လျန်ပင်း ကျောင်းထုတ်ခံခဲ့ရသည်ကို သတိရမိသဖြင့် ကျန်းဟန်က မေးမြန်းလိုက်ခြင်း ဖြစ်သည်။

“ဟုတ်ကဲ့။ ကျွန်မ ကျောင်းမထွက်ခင်တုန်းက ဆရာမဆီကနေ အခြေခံ တရားထိုင်နည်းစနစ်ကို သင်ယူခဲ့ဖူးပါတယ်။”

လျန်ပင်းက ခေါင်းငြိမ့်ပြလိုက်သည်။ သူမ၏ ပါရမီက မဆိုးလှသော်လည်း လူမှုဘဝအတွက် ရုန်းကန်လှုပ်ရှားနေရသဖြင့် ကျင့်စဉ်ကျင့်ကြံရန် အချိန်မရှိခဲ့ခြင်းသာ ဖြစ်သည်။

“ဒါဆို ကောင်းပြီ။ မင်းရဲ့ စိတ်စွမ်းအားကျင့်စဉ်ကို စလိုက်တော့။”

ကျန်းဟန်က ခေါင်းငြိမ့်ကာ ပြောလိုက်သည်။

စိတ်စွမ်းအားကျင့်စဉ် ကျင့်ကြံခြင်းမှာ နံနက် ကိုးနာရီအထိ မပြီးဆုံးခဲ့ပေ။ ကျန်းဟန်သည် အပြင်စာကို မှာယူလိုက်ပြီး မကြာမီပင် ပျံသန်းနိုင်သော သားရဲတစ်ကောင်က စားစရာများကို လာရောက်ပို့ဆောင်ပေးခဲ့သည်။

“စားသောက်ပြီးရင် မင်းရဲ့ မြွေစိမ်းလေးကို ငါ ကြည့်ရအောင် ထုတ်လိုက်ဦး။”

ကျန်းဟန်က ပြောလိုက်သည်။

“ဟုတ်ကဲ့။”

လျန်ပင်းက ခေါင်းငြိမ့်ပြလိုက်သည်။

နံနက်စာမှာ ရိုးရှင်းပါသည်။ ရှောင်းလုံပေါင်းနှင့် ဆန်ပြုတ်တို့ ဖြစ်သည်။

စားသောက်ပြီးနောက် လျန်ပင်းသည် သူမ၏ သားရဲဖြစ်သော မြွေစိမ်းလေးကို ထုတ်လွှတ်လိုက်တော့သည်။

မနေ့က ပိုင်လင်း၏ စွမ်းအားသွင်းပေးမှု ခံယူပြီးနောက်တွင် မြွေစိမ်းလေး၏ ရုပ်ခန္ဓာဖွဲ့စည်းပုံမှာ တစ်ညတာအတွင်း၌ပင် လုံးဝ ဥဿုံ ပြောင်းလဲသွားခဲ့ပြီ ဖြစ်သည်။

မူလက အလျား မီတာဝက်ခန့်သာ ရှိခဲ့သော မြွေစိမ်းလေးမှာ ယခုအခါ နှစ်မီတာနီးပါးခန့် ရှည်လျားနေပြီဖြစ်ပြီး ၎င်း၏ မျက်ဝန်းအစုံထဲတွင်လည်း ရွှေရောင်အလင်းတန်းများ ဖျတ်ခနဲ ဖျတ်ခနဲ လက်လှုပ်နေ၏။

၎င်းသည် ထွက်လာလာချင်းပင် ခန္ဓာကိုယ်ကို ဆိုဖာနှင့် ပွတ်တိုက်လိုက်ပြီး ခဏအကြာတွင် အရေခွံတစ်လွှာကို ချွတ်ချလိုက်တော့သည်။

အရေခွံလဲပြီးနောက်တွင် ၎င်း၏အရောင်မှာ ဖြူဆွတ်သွားခဲ့ပြီး အကြေးခွံများပေါ်တွင်မူ စိမ်းပြာရောင် အဆင်တန်ဆာ အသေးလေးများ ဖြစ်ပေါ်လာခဲ့သည်။

“မြွေစိမ်းလေးက အများကြီး ပြောင်းလဲသွားတာပဲ။ သတ္တုဒြပ်စင်ပါ ရရှိသွားပုံရတယ်။”

လျန်ပင်းက အံ့အားသင့်စွာ ပြောလိုက်သည်။

နဂါးသွေး သွင်းပေးမှုကို ခံယူပြီး တစ်ရက်တည်းဖြင့် ယခုကဲ့သို့ ပုံသဏ္ဌာန် ပြောင်းလဲသွားလိမ့်မည်ဟု သူမ အမှန်တကယ် မမျှော်လင့်ထားခဲ့မိပေ။ ဤအသွင်ပြောင်းလဲမှုက နှေးကွေးလိမ့်မည်ဟုသာ သူမ ထင်မှတ်ထားခဲ့ခြင်း ဖြစ်သည်။

မှန်ပါသည်...။ နဂါးများ၏ ထူးဆန်းအံ့ဩဖွယ်ကောင်းမှုမှာ သူမ စိတ်ကူးယဉ်ထားသည်ထက် များစွာ ပိုမိုလွန်ကဲလှ၏။

ကျန်းဟန်ကမူ အံ့ဩခြင်းမရှိခဲ့ပေ။ အဘယ်ကြောင့်ဆိုသော် ပိုင်လင်း၏ နဂါးသွေးသုံးစက်မှာ ဤကဲ့သို့သော သတ္တုဝါငယ်လေးအတွက် အလွန်အမင်း စွမ်းအားပြင်းထန်လှသဖြင့် အသွင်ပြောင်းလဲမှုကို တိုက်ရိုက် ဖြစ်ပေါ်စေခဲ့ခြင်း ဖြစ်သည်။

သူသည် ပိုကီဒက်စ်ကို ထုတ်ယူကာ ၎င်းကို စကန်ဖတ်လိုက်ရာ သက်ဆိုင်ရာ အချက်အလက်များ ချက်ချင်း ပေါ်ထွက်လာခဲ့သည်။

[သားရဲ] - မသိရှိရသေးပါ။

[မျိုးနွယ်] - စပါးအုန်းမြွေ/မြွေမျိုးနွယ်၊ နဂါးသွေးမျိုးဆက် ရှိနေကြောင်း သံသယရှိရသည်။

[ဓာတ်သဘာဝ] - သစ်သား၊ သတ္တု၊ နဂါး။

[အဆင့်] - အစေခံအဆင့် အလယ်အလတ်အဆင့်။

[အလားအလာ] - ကြယ်လေးပွင့်။

[ထူးခြားချက်] - မိစ္ဆာသန့်စင်ခြင်း

(ဤစွမ်းရည်သည် ၎င်း၏ ခန္ဓာကိုယ်ကို ကန်တစ်ခုကဲ့သို့ အသုံးပြု၍ အမျိုးမျိုးသော မိစ္ဆာစွမ်းအင်များကို သိုလှောင်စုဆောင်းစေနိုင်သည်။ မိစ္ဆာစွမ်းအင်များကို စုဆောင်းခြင်းဖြင့် ၎င်း၏ ခန္ဓာကိုယ်ကို သွန်းလုပ်နိုင်ပြီး ခန္ဓာကိုယ်မှ သန့်စင်ထုတ်လုပ်လိုက်သော မိစ္ဆာစွမ်းအင်များကို လက်နက်တစ်ခုကဲ့သို့ အသုံးပြုကာ ၎င်း၏ တိုက်ခိုက်မှုများကို ကွဲပြားသော အာနိသင်များ သက်ရောက်စေပြီး စွမ်းအားတိုးမြင့်စေနိုင်သည်။)

ပြန်လည်ကုသခြင်း - ၎င်း ဒဏ်ရာရရှိသည့်အခါတိုင်း ဤစွမ်းရည်သည် မိမိကိုယ်ကို ပြန်လည်ကုသရန် အလိုအလျောက် အသက်ဝင်လာမည် ဖြစ်သည်။

[စွမ်းရည်] - ဝင်တိုက်ခြင်း၊ ကြီးထွားခြင်း

[ဆင့်ကဲပြောင်းလဲမှု] - မသိရှိရသေးပါ။

[ဖော်ပြချက်] - ရွှေနဂါးသွေးမျိုးဆက် ရှိနေကြောင်း သံသယရှိရသည်။ သစ်သားဒြပ်စင်မှာ ဆက်တိုက် အားနည်းသွားနေသည်။

“ရွှေနဂါးတစ်ကောင်အဖြစ် ဆင့်ကဲပြောင်းလဲမယ့် လမ်းကြောင်းနဲ့ အရမ်းကိုက်ညီတဲ့ပုံပဲ။ ဒီပင်ကိုယ်စွမ်းရည်က တကယ် မဆိုးလှဘူး။ သူ့ကို သေချာ လေ့ကျင့်ပေးရင် သေချာပေါက် အောင်မြင်မှုတစ်ခု ရလိမ့်မယ်။”

ကျန်းဟန်က ပိုကီဒက်စ်ကို လျန်ပင်းထံသို့ ကမ်းပေးလိုက်သည်။

ပိုင်လင်းသည် နဂါး၏ မူလသွေးနှင့် ဝိညာဉ်ကို ပိုင်ဆိုင်ထားသောကြောင့် ၎င်း၏ သွေးသွင်းပေးခြင်းခံရသော သားရဲများသည်လည်း ၎င်းတို့နှင့် အသင့်တော်ဆုံးဖြစ်မည့် လမ်းကြောင်းအတိုင်း ဖွံ့ဖြိုးတိုးတက်သွားကြမည် ဖြစ်သည်။

သူက ဤမြွေစိမ်းလေးသည် သစ်သားဒြပ်စင် လမ်းကြောင်းအတိုင်း ဆက်လက်ဖွံ့ဖြိုးသွားလိမ့်မည်ဟု ထင်မှတ်ထားခဲ့သော်လည်း မထင်မှတ်ဘဲ သတ္တုဒြပ်စင် ဖြစ်နေခဲ့ရာ ၎င်းမှာ သူ၏ မျှော်လင့်ချက်ထက် အနည်းငယ် ကျော်လွန်သွားခဲ့သည်။

ဤ မိစ္ဆာသန့်စင်ခြင်းဆိုသည့် ပင်ကိုယ်စွမ်းရည်မှာလည်း အတော်ပင် ကောင်းမွန်လှသည်။ မိစ္ဆာစွမ်းအင်ဟူသည်မှာ နေရာတိုင်းတွင် ရှိနေတတ်ပြီး အသုံးအများဆုံးမှာ မြေကြီးမိစ္ဆာစွမ်းအင် ဖြစ်ကာ ၎င်းအပြင် သွေးမိစ္ဆာစွမ်းအင်၊ ကျားမိစ္ဆာစွမ်းအင် စသည်ဖြင့် ရှိတတ်ကြသည်။

အရာခပ်သိမ်းသည် မိစ္ဆာစွမ်းအင်ကို ထုတ်လုပ်နိုင်ကြပြီး ပမာဏ အနည်းအကျဉ်းသာ ကွာခြားသည်ဟု ဆိုနိုင်သည်။

“ကြယ်လေးပွင့် အလားအလာလား...။ တကယ်ကို ထိုးတက်သွားတာပဲ။”

လျန်ပင်း ပထမဆုံး သတိပြုမိလိုက်သည်မှာ မြွေစိမ်းလေး၏ အလားအလာ ဖြစ်သည်။

၎င်းသည် ကြယ်လေးပွင့်အဆင့် အလားအလာသို့ ပြောင်းလဲသွားသည်ကို မြင်လိုက်ရချိန်တွင် သူမမှာ အလွန်အမင်း စိတ်လှုပ်ရှားဝမ်းသာသွားခဲ့ရပြီး သူမ၏ ရင်ထဲတွင်လည်း ကျန်းဟန်အပေါ် အတိုင်းအဆမဲ့သော ကျေးဇူးတရားများဖြင့် ပြည့်နှက်သွားခဲ့ရသည်။

ကျန်းဟန်သည် မြွေစိမ်းလေး၏ အလားအလာကို တစ်ပြိုင်နက်တည်း ကြယ်နှစ်ပွင့်အထိ မြှင့်တင်ပေးနိုင်ခဲ့ရာ တကယ့်ကို အံ့ဩဖွယ်ရာ ကောင်းလှပေသည်။

သူမအနေဖြင့် ကျေးဇူးတင်စကားပင် ထပ်မံမပြောဆိုနိုင်တော့ပေ။ အဘယ်ကြောင့်ဆိုသော် ကျေးဇူးတင်ပါတယ်ဟူသော စကားလုံး၏ အလေးချိန်မှာ ဤကျေးဇူးတရားနှင့် နှိုင်းယှဉ်လျှင် ပေါ့ပါးလွန်းသောကြောင့် ဖြစ်ပေသည်။

“ဒီပိုကီဒက်စ်ကို မင်းပဲ သိမ်းထားလိုက်ပါ။ ဒါက အင်တာနက်နဲ့ ချိတ်ဆက်မထားတဲ့ အထူးထုတ်လုပ်ထားတဲ့ အရာပဲ။ မင်း ဒါကိုသုံးပြီး ဘယ်သားရဲကိုပဲ စကန်ဖတ်ဖတ် သူများ သိသွားတာ၊ မှတ်တမ်းတင်ခံရတာမျိုး ရှိမှာမဟုတ်ဘူး။”

ကျန်းဟန်က ပြောလိုက်သည်။

ဤအရာမှာ သူ မြူခိုးအဖွဲ့အစည်း၏ ဝဘ်ဆိုက်မှ ဝယ်ယူထားခြင်း ဖြစ်ပြီး အချက်အလက်များမှာ ပိုမိုစုံလင်လှသည့်အပြင် သတင်းအချက်အလက် ပေါက်ကြားမည်ကိုလည်း စိုးရိမ်စရာ မလိုပေ။

ဖုန်းတွင် ပါရှိသော ပိုကီဒက်စ်မှာမူ အင်တာနက်နှင့် ချိတ်ဆက်ထားခြင်း ဖြစ်သည်။

အကယ်၍ သင်က အရာများစွာကို သိရှိနေလျှင် အခြားသူများကလည်း သိရှိသွားနိုင်သဖြင့် ကျန်းဟန်သည် သူ၏ ကိုယ်ပိုင်သားရဲများကို စမ်းသပ်စစ်ဆေးရန်အတွက် ဖုန်းထဲရှိ ပိုကီဒက်စ်ကို ဘယ်သောအခါမျှ အသုံးမပြုခဲ့ပေ။

“ဟုတ်ကဲ့။”

လျန်ပင်းက ခေါင်းငြိမ့်ပြ၏။ ပြီးနောက် ယခုအခါ တစ်ကိုယ်လုံး ဖြူဆွတ်သွားခဲ့ပြီဖြစ်သော မြွေစိမ်းလေးကို လက်ညှိုးထိုးပြကာ မေးလိုက်ည်။

“သူ့ရဲ့ အခုပုံစံသစ်အတွက် နာမည်မရှိသေးဘူးထင်တယ်။”

“ဒါဆို သူ့ကို ရွှေရောင်မိစ္ဆာ စပါးအုန်းမြွေလို့ပဲ ခေါ်ကြရအောင်။”

ကျန်းဟန်က ပြောလိုက်သည်။

“ဟုတ်ကဲ့။ အဲဒီနာမည်က တကယ့်ကို သင့်တော်ပါတယ်။”

လျန်ပင်းက ခေါင်းငြိမ့်ထောက်ခံလိုက်သည်။

ထို့နောက် ကျန်းဟန်သည် ရွှေရောင်မိစ္ဆာသော စပါးအုန်းမြွေ၏ လတ်တလော အခြေအနေအပေါ် အခြေခံ၍ ၎င်းအတွက် ရိုးရှင်းသော လေ့ကျင့်ရေးအစီအစဉ်တစ်ခုကို ချမှတ်ပေးခဲ့သည်။

သူသည် စီနီယာ မွေးမြူရေးပညာရှင် တစ်ယောက် မဟုတ်သော်လည်း အနည်းဆုံးတော့ အဆင့်မြင့်မွေးမြူရေးပညာရှင်တစ်ဦး၏ အမွေအနှစ်ကျမ်းစာကို ဖတ်ရှုလေ့လာဖူးသူ ဖြစ်ရာ ရိုးရှင်းသော လေ့ကျင့်ရေးအစီအစဉ်တစ်ခု ရေးဆွဲပေးရန်အတွက်မူ ပြဿနာမရှိပေ။

ရွှေရောင်မိစ္ဆာ စပါးအုန်းမြွေ၏ လေ့ကျင့်မှုအား အဓိကအားဖြင့် ကဏ္ဍနှစ်ခုခွဲခြားထားသည်။ ပထမတစ်ခုမှာ အခြေခံအကျဆုံး ကိုယ်ခန္ဓာကြံ့ခိုင်မှု လေ့ကျင့်ခန်း ဖြစ်ပြီး ဒုတိယတစ်ခုမှာ မိစ္ဆာစွမ်းအင်များ စုစည်းရာနေရာများကို ရှာဖွေစုပ်ယူကာ ၎င်း၏ခန္ဓာကိုယ်နှင့် ဝိညာဉ်စွမ်းအားများကို သန်မာလာစေရန် ပြုလုပ်ခြင်း ဖြစ်သည်။

ကိုယ်ခန္ဓာကြံ့ခိုင်မှုလေ့ကျင့်ခြင်းက ၎င်းအား ပိုင်လင်း၏ နဂါးသွေးနှင့် ပိုမိုကောင်းမွန်စွာ ပေါင်းစပ်မိစေပြီး အရှိန်အဟုန်ဖြင့် မြွေနဂါးအဖြစ်သို့ အသွင်ပြောင်းလဲသွားနိုင်ရန် ကူညီပေးနိုင်မည်ဖြစ်သည်။ မိစ္ဆာစွမ်းအင်ကို လေ့ကျင့်ခြင်းမှာမူ ၎င်း၏အင်အားကို တိုးမြင့်စေပြီး မိမိ၏ သွေးမျိုးဆက်ကိုပါ လှုံ့ဆော်ပေးနိုင်ရန် ဖြစ်သည်။

ကျန်းဟန်သည် လျန်ပင်းအပေါ် စိတ်မချသေးသဖြင့် သစ္စာဆိုကျောက်တုံး မရောက်ရှိလာမီအထိ လူစည်ကားသောနေရာများသို့ မသွားရန် ဆုံးဖြတ်လိုက်သည်။

မွန်းလွဲပိုင်းတွင် သူသည် လျန်ပင်းကို ခေါ်ဆောင်ကာ မြို့အစွန်ရှိ လူသူဆိတ်ညံသော တောင်ပေါ်တောအုပ်တစ်ခုသို့ သွားရောက်ခဲ့သည်။ သူမအား တောအုပ်ထဲတွင် သားရဲလေ့ကျင့်ခန်း လုပ်ဆောင်စေကာ သူကိုယ်တိုင်မူ ကိုယ်ခန္ဓာကြံ့ခိုင်မှု လေ့ကျင့်ခြင်းနှင့် လျန်ပင်းကို လမ်းညွှန်ပြသပေးခြင်းတို့ ပြုလုပ်ခဲ့သည်။

သူ၏ ကိုယ်ခန္ဓာကြံ့ခိုင်မှုမှာ အလွန်အမင်း အားကောင်းနေပြီဖြစ်ရာ တိုက်ခိုက်ရေးပညာ သို့မဟုတ် သိုင်းပညာရပ်များကို သင်ယူရန် ပြင်ဆင်နေခြင်း ဖြစ်သည်။

ဤနယ်ပယ်တွင် သင်ကြားပြသပေးမည့် ဆရာကောင်းကို မတွေ့ရသေးသဖြင့် သူသည် ကိုယ်ခန္ဓာကြံ့ခိုင်မှုနှင့် ဖျတ်လတ်မှု လေ့ကျင့်ခန်းများမှ စတင်ခဲ့ရသည်။

သားရဲထိန်းချုပ်သူတစ်ယောက်အနေဖြင့် ကိုယ်ခန္ဓာကြံ့ခိုင်မှု ကောင်းမွန်နေလျှင်ပင် အချို့သောအရာများကို ကြိုတင်မလေ့ကျင့်ထားဘဲ အခြေအနေအရ ကြုံသလို ရင်ဆိုင်ရမည်ဆိုပါက ထိရောက်မှု ကောင်းမွန်လိမ့်မည်မဟုတ်ပေ။

လေ့ကျင့်ခန်းလုပ်ပြီးနောက် ကျန်းဟန်သည် ညစာအတွက် အနီးနားရှိ စမ်းချောင်းလေးထဲမှ ငါးအချို့ကို ဖမ်းယူခဲ့၏။

လျန်ပင်းမှာ စကားအလွန်နည်းသူ ဖြစ်သည်။

ကျန်းဟန်က လေ့ကျင့်ရေးတာဝန်များကို စီစဉ်ပေးပြီးနောက်တွင် သူမသည် စကားတစ်ခွန်းမှ မဆိုဘဲ ချက်ချင်းပင် လေ့ကျင့်တော့သည်။

ရွှေရောင်မိစ္ဆာ စပါးအုန်းမြွေသာမကဘဲ သူမကိုယ်တိုင်လည်း တစ်စက္ကန့်မျှပင် မနားတမ်းဘဲ တရစပ် လေ့ကျင့်နေခဲ့သည်။

အဘယ်ကြောင့်ဆိုသော် သူမအတွက်မူ ကျန်းဟန်ကဲ့သို့သော ဆရာတစ်ယောက်နှင့် ဆုံတွေ့ရခြင်းမှာ တကယ့်ကို တန်ဖိုးမဖြတ်နိုင်သော အခွင့်အရေး ဖြစ်သောကြောင့်ပင်။

ယခုအခါ သူမ သားရဲ၏ အလားအလာပြဿနာကို ဖြေရှင်းပေးနိုင်ခဲ့ပြီဖြစ်ရာ သူမအနေဖြင့် အစွမ်းကုန် မကြိုးစားရမည့် အကြောင်းရင်း ဘာရှိတော့မည်နည်း။

ဘဝ၏ ဆင်းရဲဒုက္ခများကလည်း အင်အားကြီးမားမှု၏ အရေးပါပုံကို သူမအား နက်ရှိုင်းစွာ နားလည်သဘောပေါက်စေခဲ့သည်။

သူမသည် ကျန်းဟန်ကို ကာကွယ်ရမည်သာမက သူမ၏ မောင်လေးကိုလည်း ရှင်ပြန်ထမြောက်အောင် လုပ်ဆောင်ရဦးမည် ဖြစ်သည်။

မည်သည့်တာဝန်ပင်ဖြစ်စေ ကြီးမားသော စွမ်းအားများ လိုအပ်သဖြင့် သူမသည် မိမိကိုယ်ကို ခဏတာမျှပင် ပျင်းရိနေခွင့် မပေးရဲပေ။

သူမသည် ခန္ဓာကိုယ်ကြံ့ခိုင်ရန်အတွက် အခြေခံဓားသိုင်းနည်းစနစ်ကို အသုံးပြု၍ မိုးချုပ်သည့်တိုင်အောင် လေ့ကျင့်ခဲ့၏။ ခန္ဓာကိုယ်တစ်ခုလုံး ပျော့ခွေသွားပြီး လုံးဝပင် မထနိုင်တော့သည့်အထိ ဖြစ်သွားခဲ့ရသည်။