အခန်း (၄၅၉-၄၆၀)

အခန်း ၄၅၉။ နတ်သမီးပုံပြင်ကမ္ဘာလေးနဲ့ နည်းနည်းတူသွားပြီ

ရွှီယန်က မြစ်တစ်ဖက်ကမ်းသို့ အောင်မြင်စွာ လွှဲကူးသွားနိုင်ခဲ့သည်။

မည်သည့်အခက်အခဲမှ မရှိခဲ့ပေ။

အောက်ဘက်ရှိ မိကျောင်းမည်းများပင် တုံ့ပြန်ချိန်မရလိုက်ပေ။

သူက တစ်ဖက်ကမ်းသို့ လှမ်းကြည့်လိုက်သည်။

သိပ်သည်းများပြားလှသော စစ်ချီပုရွက်ဆိတ်များက ကမ်းစပ်ဆီသို့ ပြန့်နှံ့လာနေပြီဖြစ်သည်။

ဤကောင်များက တကယ်ကို ကြောက်စရာကောင်းလှသည်။

မည်သည့်သတ္တဝါမဆို စစ်ချီပုရွက်ဆိတ်များ၏ တွယ်ကပ်ခြင်းကို ခံရပါက အချိန်တိုအတွင်း အရိုးစုအဖြစ် ပြောင်းလဲသွားရမည်မှာ သေချာလှသည်။

"အပူပိုင်းမိုးသစ်တောထဲမှာ အသက်ရှင်နိုင်တဲ့ တိရစ္ဆာန်တွေ အားလုံးက တော်တော်လေး ကြောက်စရာကောင်းကြတယ်..."

"ဒါကြောင့် သတိထားရမယ်..."

"ကျွန်တော် အခု ကြုံတွေ့နေရတာက မိုးသစ်တောရဲ့ သေးငယ်တဲ့ အစိတ်အပိုင်းလေး တစ်ခုပဲ ရှိသေးတယ်... ပိုနက်တဲ့နေရာတွေမှာ ဘာတွေရှိဦးမလဲဆိုတာ မသိနိုင်သေးဘူး..."

"ဥပမာ လူဝံအုပ်တွေ... မကာအိုမျောက်အုပ်တွေ... ဂျာဂွါကျားသစ်တွေ... ပင့်ကူခေါင်းဆောင်ကြီးတွေပေါ့..."

"ဒါကြောင့် ဒီလိုနေရာမျိုးကို ရောက်လာရင် လူတွေ ဖွံ့ဖြိုးအောင်လုပ်ထားတဲ့ နေရာမှာ သွားလာနေရင်တောင်မှ သေချာပေါက် သတိထားရမယ်..."

ရွှီယန်က စစ်ချီပုရွက်ဆိတ်များကို ကြည့်ရင်း အားလုံးကို ရှင်းပြနေသည်။

[လောင်ရွှီ အရမ်းမိုက်တယ်]

[မင်းက တကယ်ကြမ်းတာပဲ ဒီတိုင်းကြီး ခုန်ကူးလာတာလား]

[ဒီတစ်ခါတော့ မင်းသေပြီလို့ ငါတကယ်ထင်နေတာ]

[တကယ်ကို အစွမ်းထက်လွန်းတယ်]

[ဆရာကြီး]

ကွန်မန့်စာသားများက စည်ကားနေဆဲဖြစ်သည်။

နိုင်ငံခြားပလက်ဖောင်းများပေါ်တွင်လည်း လူအများအပြားက ရွှီယန်၏ လုပ်ရပ်ကို အံ့ဩတုန်လှုပ်နေကြသည်။

စိတ်လှုပ်ရှားဖွယ်ရာ ရုပ်ရှင်တစ်ကားကို ကြည့်နေရသည့်အလား ပင်ဖြစ်သည်။

ယခုအခါ ရွှီယန်က တကယ်ကို နာမည်ကြီးနေပြီဖြစ်သည်။

သူက စစ်ချီပုရွက်ဆိတ်များကို တစ်ခဏမျှ ကြည့်ရှုပြီးနောက် နောက်လှည့်ကာ ခရီးဆက်ခဲ့သည်။

သူ၏ စီမံကိန်းအရ တတိယနေ့ခန့်တွင် အပူပိုင်းမိုးသစ်တောထဲမှ လှည့်ပတ်ထွက်ခွာနိုင်ပြီး မိုးသစ်တောထဲရှိ မြို့ငယ်လေးတစ်မြို့သို့ ရောက်ရှိမည်ဖြစ်သည်။

ထိုအချိန်ကျလျှင် ယာဉ်တစ်စီးစီးကို စီးနင်း၍ ထွက်ခွာသွားနိုင်ပြီဖြစ်သည်။

လောလောဆယ်တွင် တောနက်ထဲ၌ ရှိနေဆဲဖြစ်ရာ အချိန်လု၍ ခရီးဆက်ရမည်ဖြစ်သည်။

ကျားကြောင်က သူ၏ရင်ခွင်ထဲတွင် ရှိနေဆဲဖြစ်ပြီး အဝေးဆီသို့ လှမ်းကြည့်နေသည်။

ရွှီယန်က ၎င်းကို မြေပြင်ပေါ်သို့ ချပေးလိုက်သည်။

"ဒီနေရာက အပူပိုင်းမိုးသစ်တောရဲ့ အနက်ရှိုင်းဆုံးနေရာဆိုတော့ မင်းနဲ့ ပိုပြီးသင့်တော်တယ်... မင်း ဒီမှာပဲ နေခဲ့တော့..."

"အပြင်ကို ဆက်ထွက်သွားရင် မင်း အမဲလိုက်တဲ့သူတွေ ဖမ်းတာကို ခံရလိမ့်မယ်..."

ရွှီယန်က ကျားကြောင်ကို စကားဆိုလိုက်သည်။

ကျားကြောင်က ရွှီယန်၏ စကားကို နားလည်သွားပုံရပြီး ရွှီယန်နှင့် ပွတ်သီးပွတ်သပ်လုပ်ကာ ကျေးဇူးတင်ကြောင်း ပြသလိုက်သည်။

ထို့နောက် ၎င်းက ပတ်ဝန်းကျင်ကို သတိဝီရိယရှိစွာဖြင့် ကြည့်ရှုလိုက်ပြီး အရပ်မျက်နှာတစ်ခုဆီသို့ ပြေးထွက်သွားတော့သည်။

ကျားကြောင်က ဤသို့ပင် ထွက်ခွာသွားခဲ့သည်။

ရွှီယန်ကတော့ ခရီးဆက်နေဆဲဖြစ်သည်။

ဤနေရာရှိ အရာအားလုံးက မသိရှိနိုင်သော အရာများနှင့် လျှို့ဝှက်ဆန်းကြယ်မှုများ ပြည့်နှက်နေဆဲဖြစ်သည်။

အထူးသဖြင့် ဤဘက်ရှိ နွယ်ပင်များဖြစ်သည်။

အပူပိုင်းမိုးသစ်တောရှိ နွယ်ပင်များ၏ ကြီးထွားမှုနှုန်းက အလွန်မြန်ဆန်လှပြီး ပတ်ဝန်းကျင်ရှိ သစ်ပင်များကို အလျင်အမြန် တွယ်တက် ဖုံးအုပ်နိုင်ကြသည်။

တစ်ခါတစ်ရံ သစ်ပင်တစ်ပင်လုံးကိုပင် လုံခြုံစွာ ရစ်ပတ်ဖုံးအုပ်ထားနိုင်ကြသည်။

ထို့ကြောင့် တိုက်ရိုက်ထုတ်လွှင့်မှု၏ မြင်ကွင်းတိုင်းက အလွန်ထူးဆန်းအံ့ဖွယ် ကောင်းလှသည်။

ရွှီယန် ၎င်းတို့ကြားတွင် လမ်းလျှောက်နေသည်ကို ကြည့်ရသည်မှာ သမိုင်းမတင်မီ ကမ္ဘာကြီးထဲသို့ ရောက်ရှိသွားသကဲ့သို့ ပင်ဖြစ်သည်။

သစ်ပင်ကြီးတစ်ပင်ကို ဖြတ်သန်းသွားသောအခါ သစ်ပင်၏ ဒဏ်ရာရနေသော နေရာတွင် ဆီးနှင်းကဲ့သို့ ဖြူဖွေးနေသော အသားစားပိုးကောင်ကြီး အတော်များများကို ရွှီယန် မြင်တွေ့လိုက်ရသည်။

အပူပိုင်းမိုးသစ်တောက နွေးထွေးပြီး စိုစွတ်ပူအိုက်သဖြင့် ပိုးမွှားများ အလွန်များပြားလှသည်။

သူ့ထံတွင် အင်းဆက်နှိမ်နင်းနိုင်သော ခန္ဓာကိုယ်ဖွဲ့စည်းတည်ဆောက်ပုံ ရှိနေသဖြင့်သာ တော်တော့သည်။

ထိုသို့သာမဟုတ်ပါက သူ၏ရုပ်အဆင်းသွင်ပြင်မှာ စောစောကတည်းက ပျက်စီးသွားလောက်ပြီဖြစ်သည်။

မွေးရာပါ တောင်ပေါ်သွားလာနိုင်သော မြင့်မြတ်သည့် ခန္ဓာကိုယ်ပင်ဖြစ်သည်။

[လောင်ရွှီ ပရိုတင်းဓာတ်တွေပဲ အမြန်ဖြည့်တင်းလိုက်]

[ဘဲဂရီးလ်လိုမျိုး အသားစားပိုးကောင်ကြီးကို တစ်လုတ်တည်း မျိုချလိုက်]

[တောရိုင်းအစားအစာပဲ]

ကွန်မန့်စာသားများက အဆက်မပြတ် လိမ့်တက်နေသည်။

အင်တာနက်သုံးစွဲသူများက ပြဿနာရှာရသည်ကို အလွန်နှစ်သက်ကြသည်။

ရွှီယန်က ဤပိုးကောင်များ အလွန်ဆူဖြိုးနေသည်ကို ထူးဆန်းနေမိပြီး တစ်ချက်သာ ကြည့်လိုက်ကာ အလျင်အမြန် ထွက်ခွာသွားခဲ့သည်။

သူက အင်းဆက်ပိုးမွှားများကို အတော်လေး ရွံရှာမုန်းတီးသည်။

အနားသို့ အနည်းငယ်မျှပင် မကပ်နိုင်ချေ။

နို့တိုက်သတ္တဝါများကမှ ချစ်စရာကောင်းသေးသည်။

"ပိုးကောင်တွေက ပရိုတင်းဓာတ် မြင့်မားတာ အမှန်ပဲ... ဒါပေမဲ့ ကျွန်တော် စိတ်မဝင်စားဘူး..."

"အိတ်ထဲမှာ စားစရာတွေ အများကြီး ရှိသေးတယ်... အတင်းအကျပ် ဒုက္ခခံပြီး စားစရာ မလိုဘူး..."

"ဒီအရာတွေကို ရေစက်ရှိတဲ့သူတွေ အတွက်ပဲ ချန်ထားခဲ့ပါ့မယ်..."

ရွှီယန်က ပြုံးလျက် ပြန်လည်ဖြေကြားလိုက်သည်။

သူက မိုးသစ်တောထဲတွင် ဆက်လက် လမ်းလျှောက်နေသည်။

ဤရတနာရှာဖွေရေး တာဝန်၏ အခက်အခဲက အတော်လေး ကြီးမားလှသည်။

စနစ်က လမ်းကြောင်းကို အတိအကျ စီစဉ်ပေးထားပုံရပြီး တစ်လျှောက်လုံး လမ်းလျှောက်လာရာ အခြေခံအားဖြင့် အပူပိုင်းမိုးသစ်တောထဲရှိ ကြောက်စရာကောင်းသော သတ္တဝါများကို အကုန်အစင်နီးပါး ကြုံတွေ့ခဲ့ရပြီဖြစ်သည်။

ရွှီယန်ပင် ညည်းညူပြောဆိုချင်စိတ် ပေါက်သွားသည်။

'စနစ်... မင်းက ငါ့ကို အစီအစဉ်ရဲ့ အကျိုးသက်ရောက်မှု ပိုကောင်းအောင် လုပ်ပေးနေတာလား...'

ယခုအခါ ရွှီယန်က အလွန် သတိထားနေသည်။

အပူပိုင်းမိုးသစ်တော၏ အတော်လေး နက်ရှိုင်းသော နေရာသို့ ရောက်ရှိနေပြီဖြစ်ရာ နောက်ဆက်တွဲ အနေဖြင့် အပြင်သို့ ထွက်ခွာရမည်ဖြစ်သည်။

မည်သည့်အရာနှင့်မဆို ကြုံတွေ့နိုင်ချေရှိသည်။

အဆိပ်ရှိသော အင်းဆက်များနှင့် မြွေဆိုးများ အကြောင်းကိုတော့ အများကြီး ပြောနေစရာ မလိုတော့ချေ။

ရွှီယန်က ခေါင်းလှည့်ကြည့်လိုက်ရာ အရှေ့ဘက်တွင် တစ်မီတာကျော်ခန့် ကျယ်ဝန်းသော ဧရာမ ပင့်ကူအိမ်ကြီး တစ်ခု ထွက်ပေါ်နေသည်ကို မြင်တွေ့လိုက်ရပြီး လုံးဝ ကြောင်အမ်းအမ်း ဖြစ်သွားရသည်။

"ဟိုပင့်ကူအိမ်ကြီးကို ကြည့်လိုက်... ကြောက်စရာကောင်းတယ်လို့ မထင်ဘူးလား..."

ရွှီယန်က ပင့်ကူအိမ်ကို လက်ညှိုးထိုးပြကာ စကားဆိုလိုက်သည်။

ဒရုန်းကင်မရာက ထိုနေရာသို့ ရိုက်ကူးလိုက်သည်။

အင်တာနက်သုံးစွဲသူများက မြင်တွေ့သွားသောအခါ အားလုံးမှာ မျက်နှာပေါ်တွင် နားမလည်နိုင်သော အမူအရာများ ထွက်ပေါ်လာကြသည်။

ထိုအရာက တကယ်ပင် ပင့်ကူအိမ်ကြီး ဖြစ်နေသည်ကို အားလုံး အံ့ဩသွားကြသည်။

အားလုံးက အံ့ဩတုန်လှုပ်စွာဖြင့် ကွန်မန့်စာသားများ ရေးသားရန် ပြင်ဆင်နေချိန်မှာပင် ရွှီယန်က တည်ငြိမ်စွာဖြင့် စကားတစ်ခွန်း ထပ်ဆိုလိုက်သည်။

"ပင့်ကူအိမ် ရှိတဲ့ ပင့်ကူက တော်သေးတယ်... ကြောက်စရာ ကောင်းတယ်လို့ မဆိုနိုင်ဘူး... သူက ပင့်ကူအိမ်နဲ့ ရစ်ပတ်ပြီး အမဲလိုက်တုန်းပဲ ဆိုတာကို ဖော်ပြနေတာပဲ..."

"မြေတွင်းထဲမှာ နေတဲ့ ပင့်ကူမျိုးကမှ ကြောက်စရာကောင်းတာ... သူတို့က သားကောင် လာမယ့်အချိန်ကို အငြိမ်စောင့်နေတာမျိုး မလုပ်ဘူး... အမြဲတမ်း အရင်စပြီး တိုက်ခိုက်တတ်ကြတယ်..."

"စောစောစီးစီး ဝေးဝေးရှောင်သွားတာ ပိုကောင်းပါတယ်..."

ရွှီယန်၏ စကားကြောင့် အားလုံးက ပို၍ပင် လေးစားအားကျသွားကြသည်။

[လောင်ရွှီ မင်းမို့လို့ပဲ]

[ဆရာကြီးက အမြဲတမ်း ဆရာကြီးပဲ]

[ဘယ်လောက်တောင် အစွမ်းထက်နေလို့ ဒီလောက် တည်ငြိမ်နေရတာလဲ]

[သူများတွေမှာက တောင်စောင့်နတ်ရဲ့ စောင့်ရှောက်မှု ရှိတယ်လေ ယှဉ်လို့မရဘူး]

ရွှီယန်က ပတ်ဝန်းကျင်ကို သတိဝီရိယရှိစွာ ကြည့်ရှုလိုက်သော်လည်း ပင့်ကူ ဘယ်နေရာတွင် ရှိနေသနည်း ဆိုတာကို မမြင်တွေ့ရချေ။

ထို့ကြောင့် ဤထူထပ်သော သစ်တောအုပ်ကို ရှောင်ကွင်း၍ ဘေးဘက်မှ ဖြတ်သွားရန် ရွေးချယ်လိုက်သည်။

ကံကောင်းစွာဖြင့် သူက ပင့်ကူကြီးများနှင့် တကယ်ကြီး မဆုံတွေ့ခဲ့ရချေ။

တစ်လျှောက်လုံး ဤသို့ပင် အန္တရာယ်ကင်းစွာ ဖြတ်သန်းသွားနိုင်ခဲ့သည်။

ရွှီယန်က ပတ်ဝန်းကျင်ရှိ ရှုခင်းများကို ကြည့်ရှုခံစားနေသည်။

ရှုခင်းများက အလွန်လှပလှပေသည်။

ထိုစဉ်မှာပင် များပြားလှသော လိပ်ပြာအုပ်ကြီး တစ်အုပ်က ရွှီယန်၏ မြင်ကွင်းထဲသို့ ဝင်ရောက်လာခဲ့သည်။

အပူပိုင်းမိုးသစ်တောတွင် လိပ်ပြာများ အလွန်များပြားလှသည်။

မျက်စိရှေ့ရှိ ဤလိပ်ပြာအုပ်ကြီးက အရောင်အသွေး စုံလင်လှပသော အတောင်ပံများကို ပိုင်ဆိုင်ထားကြပြီး ပျံသန်းနေသော ပန်းပွင့်လေးများနှင့် အလားသဏ္ဌာန်တူကာ ထူထပ်သော မိုးသစ်တောကြီးကို အလှဆင်ပေးနေကြသည်။

"လိပ်ပြာတွေ အများကြီးပဲ..."

"ပြီးတော့ တော်တော်လေးလည်း ကြီးတယ်..."

"ဒီမြင်ကွင်းက အရမ်းလှတာပဲ..."

ရွှီယန်က အံ့ဩချီးကျူးလိုက်သည်။

အင်တာနက်သုံးစွဲသူများ ကလည်း ဤမြင်ကွင်းကို မြင်တွေ့လိုက်ကြရသည်။

ပန်းရုံများကြားတွင် ပျံဝဲနေသော လိပ်ပြာ အကောင်ဆယ်ဂဏန်းခန့်ကို မြင်သောအခါ အားလုံးက ချက်ချင်းပင် အံ့ဩတုန်လှုပ်သွားကြသည်။

[အရမ်းလှတာပဲ]

[ဒီမြင်ကွင်းက တကယ်ကို ကြည့်ကောင်းလွန်းတယ်]

[လခွမ်း နတ်သမီးပုံပြင် ကမ္ဘာလေးနဲ့ တောင် နည်းနည်း တူနေပြီ]

[ဒီလိုရှုခင်းမျိုးက လောင်ရွှီ နောက်ကို လိုက်ကြည့်မှပဲ မြင်ရနိုင်တာ]

ရွှီယန်၏ တိုက်ရိုက်ထုတ်လွှင့်မှုက အမြဲတမ်း စိတ်လှုပ်ရှားဖွယ် ကောင်းလှသည်။

ဤကဲ့သို့သော မြင်ကွင်းမျိုးကို ရင်ဆိုင်ရသောအခါ ရွှီယန်ပင် မနေနိုင်ဘဲ ဖုန်းကို ထုတ်ယူကာ ဓာတ်ပုံအချို့ ရိုက်ကူးလိုက်မိသည်။

လိပ်ပြာများ၏ အရောင်အသွေးက အလွန်စုံလင်လှပေသည်။

အချို့က အပြာရင့်ရောင်နှင့် အမည်းရောင် ရောနှောနေပြီး အချို့က ပန်းရောင်နှင့် အဝါရောင် ရောနှောနေကြသည်။

အချို့သော အမည်းရောင် အစက်အပြောက်များက မျက်လုံးများနှင့် ဆင်တူသဖြင့် ပျံသန်းနေသောအခါ လူ့မျက်နှာ တစ်ခုနှင့် အနည်းငယ် ဆင်တူနေလေသည်။

လိပ်ပြာများကတော့ အန္တရာယ် ထိုမျှလောက် မကြီးမားလှချေ။

အဆိပ် ပါဝင်သော အကောင်များက အလွန်နည်းပါးလှသည်။

မည်သို့ပင်ဖြစ်စေ ပန်းဝတ်ရည်ကို စုပ်ယူစားသောက်ပြီး ကြီးပြင်းလာကြသောကြောင့် ပင်ဖြစ်သည်။

"ဒီနေရာက တိရစ္ဆာန်တွေ ထဲမှာ ကြောက်စရာကောင်းတဲ့ အကောင်တွေ ကလွဲရင် လှပတဲ့ အကောင်တွေ လည်း အများကြီး ရှိသေးတယ်..."

"ရှုခင်းက တကယ်ကို ထူးခြားဆန်းသစ်တယ်..."

"ဒီနေရာကို ကမ္ဘာမြေကြီးရဲ့ အဆုတ် လို့ ပြောကြတာ မဆန်းပါဘူး..."

"ကျွန်တော် တစ်လျှောက်လုံး ဝင်လာတာ အောက်ဆီဂျင် ပါဝင်မှုနှုန်း အရမ်းမြင့်မားတာကို ခံစားမိတယ်... တစ်ကိုယ်လုံးက အတော်လေး ပေါ့ပါးလွတ်လပ်နေတဲ့ အခြေအနေမျိုးပဲ..."

"သေချာတာကတော့ စိုစွတ်ပြီး ပူအိုက်တာကလည်း တကယ်ကို ဆိုးရွားတယ်... ဒီလိုနေရာမျိုးက လူတွေ အချိန်အကြာကြီး နေထိုင်ဖို့ သိပ်မသင့်တော်ဘူး..."

ရွှီယန်က အပြင်ဘက် စွန့်စားသွားလာသူ တစ်ယောက်အသွင် ပြောင်းလဲသွားပြီး အားလုံးကို အပြင်ဘက် လှုပ်ရှားမှု အတွေ့အကြုံများကို ရှင်းပြနေသည်။

အားလုံးကလည်း သူ ဤအကြောင်းအရာများကို ပြောပြသည်ကို နားထောင်ရသည်မှာ အလွန်နှစ်သက်ကြသည်။

မည်သို့ပင်ဖြစ်စေ ရွှီယန် ကိုယ်တိုင် ဖြတ်သန်းကြုံတွေ့နေရခြင်း ဖြစ်ရာ ပြောပြရသည်မှာ ပို၍ပင် လက်တွေ့ကျပြီး အသက်ဝင်လှပေသည်။

ရွှီယန်က တစ်ခဏမျှ ရပ်တန့်ကာ ကြည့်ရှုခံစားပြီးနောက် တိုက်ရိုက်ပင် ထွက်ခွာသွားတော့သည်။

ဤတစ်နေ့တာက အတော်လေး အေးချမ်းသည်ဟု ဆိုရမည်ဖြစ်သည်။

နေဝင်ရီတရောအချိန် ရောက်လုနီးပါး အချိန်တွင် ရွှီယန်က အနားယူရန် နေရာတစ်ခုကို ရှာဖွေလိုက်သည်။

အနားယူချိန်တွင် ကာကွယ်ရေး လုပ်ငန်းစဉ်များကို သေချာစွာ လုပ်ဆောင်ရမည်ဖြစ်သည်။

ညဘက်က အနည်းငယ်တော့ အန္တရာယ်များနေဆဲ ပင်ဖြစ်သည်။

ယမန်နေ့ကလိုမျိုး အပြင်ဘက်တွင် တံခါးစောင့်ပေးမည့် အကောင် ရှိမနေတော့ချေ။

ကျားကြောင် ရှိနေသရွေ့ မြွေများနှင့် ပိုးကောင်များက တဲအနားသို့ လုံးဝ ကပ်လာရဲမည် မဟုတ်ချေ။

ယခုညကတော့ သေချာမည် မဟုတ်တော့ချေ။

ရွှီယန်က တဲကို သေချာတပ်ဆင်လိုက်ပြီး အင်တာနက်သုံးစွဲသူများကို နှုတ်ဆက်လိုက်ရာ ဤတစ်နေ့တာ ကလည်း ပြီးဆုံးသွားခဲ့ပြီဖြစ်သည်။

ဒုတိယနေ့ သို့မဟုတ် နောက်ဆုံးနေ့သို့ ရောက်ရှိလာခဲ့သည်။

ရွှီယန်က ခရီးအကွာအဝေးကို တွက်ချက်ကြည့်လိုက်သည်။

ညဘက်ရောက်ချိန်တွင် အပူပိုင်းမိုးသစ်တောထဲမှ ထွက်ခွာသွားနိုင်လောက်ပြီဖြစ်သည်။

ဤတစ်ကြိမ် အပူပိုင်းမိုးသစ်တောကို ဖြတ်သန်းသွားလာခြင်း ဟူသော ကြီးမားသည့် လုပ်ဆောင်ချက်ကို ပြီးမြောက်သွားမည်ဖြစ်သည်။

ယခုအခါ သူ၏ တိုက်ရိုက်ထုတ်လွှင့်မှု ရေပန်းစားမှုက အလွန်မြင့်မားနေဆဲ ပင်ဖြစ်သည်။

သို့သော် နောက်ဆုံးနေ့၏ ခရီးစဉ် ကလည်း ထိုမျှလောက် လွယ်ကူမည် မဟုတ်ချေ။

ယခင် နှစ်ရက်တာ၏ အတွေ့အကြုံများအရ ဤလမ်းကြောင်းပေါ်တွင် သူ့ကို စောင့်ကြိုနေမည့် အပူပိုင်းမိုးသစ်တောထဲမှ သားရဲတိရစ္ဆာန် တစ်ကောင်ကောင် ရှိနေနိုင်သေးကြောင်း ခန့်မှန်းရသည်။

ထို့ကြောင့် သေချာပေါက် သတိထားရမည် သာဖြစ်သည်။

အခန်း ၄၆၀။ ဂျာဂွါကျားသစ်... 'ဒီလူက ဘယ်လိုလုပ် နည်းနည်း ထူးဆန်းနေရတာလဲ...'

ရွှီယန်က အပူပိုင်းမိုးသစ်တောထဲတွင် လမ်းလျှောက်နေလေသည်။

စိုစွတ်ပြီး ပူအိုက်သောလေထုကြောင့် ရွှီယန် အနည်းငယ် ပူလောင်နေကာ တစ်ကိုယ်လုံး ချွေးများ ရွှဲနစ်နေလေသည်။

ဤကဲ့သို့သော ပတ်ဝန်းကျင်မျိုးတွင် ချွေးထွက်လွယ်သည်မှာ အမှန်ပင်ဖြစ်သည်။

ရေများလည်း အကုန်နီးပါး သောက်လို့ ကုန်သွားခဲ့ပြီဖြစ်သည်။

သို့သော် နောက်ဆုံးနေ့ ရောက်နေပြီဖြစ်ရာ ကိစ္စတော့ မရှိလှချေ။

သူ၏ တွက်ချက်မှုအရ လမ်းကြောင်း၏ အဆုံးသတ်က လူများ ဖွံ့ဖြိုးတိုးတက်အောင် လုပ်ဆောင်ထားသော ရှုခင်းကြည့်ဧရိယာ တစ်ခုဖြစ်ပြီး ထိုနေရာတွင် အနားယူနိုင်မည်ဖြစ်သည်။

သို့သော် နောက်ဆုံး ဤခရီးစဉ်က လျှောက်ရ လွယ်ကူမည် မဟုတ်ချေ။

အချိန်တိုင်း အန္တရာယ်ကို သတိထားနေရမည်ဖြစ်သည်။

ဒရုန်းကင်မရာက ရိုက်ကူးနေဆဲဖြစ်သည်။

ရွှီယန်၏ တိုက်ရိုက်ထုတ်လွှင့်မှု ရေပန်းစားမှုက မြင့်မားနေဆဲပင်ဖြစ်သည်။

ပြည်တွင်းရော ပြည်ပတွင်ပါ ထိုသို့ပင်ဖြစ်သည်။

လမ်းလျှောက်နေရင်း ရွှီယန်က မကောင်းသော ကြိုတင်ခံစားမှုကို ထပ်မံ ရရှိလိုက်ပြန်သည်။

တစ်စုံတစ်ခုက သူ့ကို စိုက်ကြည့်နေသည့်အလား ပင်ဖြစ်သည်။

သူက ရုတ်တရက် ရပ်တန့်လိုက်ပြီး လက်ထဲတွင် နွယ်ပင်များ ခုတ်ထွင်ရာ၌ သုံးသော ဓားကို ကိုင်ဆောင်ကာ ပတ်ဝန်းကျင်ကို သတိဝီရိယရှိစွာ ကြည့်ရှုလိုက်လေသည်။

[အစ်ကိုယန်... ဘာဖြစ်လို့လဲ... ဘာကို ရှာတွေ့လို့လဲ]

[ရုတ်တရက်ကြီး လန့်အောင် မလုပ်ပါနဲ့... မူလကတည်းက မင်းရဲ့ လိုက်ဖ်လွှင့်မှုကို ကြည့်ရတာ ကြောက်စရာ ကောင်းနေပါပြီ ဆို]

သူ၏ အခြေအနေကို မြင်သောအခါ တိုက်ရိုက်ထုတ်လွှင့်မှု အခန်းထဲရှိ ကြည့်ရှုသူများက အသီးသီး ကွန်မန့်စာသားများ ရေးသားလာကြလေသည်။

"နည်းနည်းတော့ ပုံမှန် မဟုတ်ဘူးလို့ ခံစားနေရတယ်..."

"တစ်ခုခုက စောင့်ကြည့်နေသလိုမျိုးပဲ..."

"အားလုံးပဲ သိတဲ့အတိုင်း ကျွန်တော့်ရဲ့ ဆဋ္ဌမအာရုံက ယေဘုယျအားဖြင့် အတော်လေး တိကျတယ်..."

"အပူပိုင်းမိုးသစ်တောလို နေရာမျိုးမှာ ဘာတွေရှိနေမလဲဆိုတာ မပြောနိုင်ဘူး..."

ရွှီယန်က ပတ်ဝန်းကျင်ကို သတိဝီရိယရှိစွာ လှည့်ပတ်ကြည့်ရှု နေလေသည်။

ကာကွယ်ခုခံမည့် ဟန်ပန် အနည်းငယ် ပါဝင်နေလေသည်။

ပတ်ဝန်းကျင်တွင် မြင့်မားသော မြက်ပင်များ အများအပြား ရှိနေပြီး တစ်မီတာကျော် မြင့်သော ချုံပုတ်များလည်း ရှိသေးကာ သစ်ပင်များကလည်း အလွန်ဖြစ်ထွန်းနေပြီး နေရာတိုင်းတွင် အပင်များ ပြည့်နှက်နေလေသည်။

ရွှီယန်၏ အန္တရာယ် အာရုံခံနိုင်စွမ်း ကျွမ်းကျင်မှု ပွင့်ထွက်လာပြီးနောက် သူက အန္တရာယ်၏ အရင်းအမြစ်ကို တစ်လျှောက်လုံး ရှာဖွေနေခဲ့လေသည်။

သူ၏ အကြည့်များက မြက်ခင်းတော တစ်နေရာသို့ ကျရောက်သွားလေသည်။

တစ်ချက် ကြည့်လိုက်ရုံဖြင့် ပစ်မှတ်ကို သူ ရှာတွေ့သွားခဲ့လေသည်။

သို့သော် ရွှီယန်က ပစ်မှတ်ကို အကြည့်မလွှဲဘဲ စိုက်ကြည့်မနေဘဲ အကြည့်ကို လွှဲဖယ်သွားရန် ရွေးချယ်လိုက်လေသည်။

အကြောင်းမှာ ထိုအကောင်က ဂျာဂွါကျားသစ် တစ်ကောင် ဖြစ်နေကြောင်းကို သူ ရှင်းလင်းစွာ မြင်တွေ့လိုက်ရသောကြောင့် ပင်ဖြစ်သည်။

ဂျာဂွါကျားသစ် ကို အမေရိက ကျား ဟုလည်း ခေါ်ဆိုကြပြီး အပူပိုင်းမိုးသစ်တော၏ အရှင်သခင်များထဲမှ တစ်ကောင် ဖြစ်လေသည်။

ဤအကောင်များက ရေဝက် များနှင့် ငယ်ရွယ်သော မိကျောင်းမည်း များကို အမဲလိုက်ရန် နှစ်သက်ကြလေသည်။

စရိုက်လက္ခဏာက အထူးပင် ကြမ်းကြုတ်လှပေသည်။

မည်သို့ပင်ဖြစ်စေ အပူပိုင်းမိုးသစ်တော၏ တိရစ္ဆာန် ဖြစ်သည့်အပြင် ကျား၏ နာမည်ဂုဏ်သတင်းနှင့်ပါ ပတ်သက်နေလေသည်။

ထိုမျက်နှာကို ကြည့်လိုက်ရုံဖြင့်တင် လုံလောက်အောင် ကြောက်စရာကောင်းလှပေသည်။

"ဂျာဂွါကျားသစ်ပဲ... တစ်ခုခု စောင့်ကြည့်နေတယ်လို့ ငါပြောသားပဲ..."

ရွှီယန်က စကားတစ်ခွန်း ထပ်မံ ဖြည့်စွက် ပြောဆိုလိုက်လေသည်။

သူ ဤသို့ ပြောသည်ကို ကြားသောအခါ အင်တာနက်သုံးစွဲသူများ အားလုံး ကြောင်အမ်းအမ်း ဖြစ်သွားကြလေသည်။

'ဂျာဂွါကျားသစ် ဟုတ်လား...'

အားလုံး သံသယ ဖြစ်နေကြစဉ်မှာပင် ဒရုန်းကင်မရာက အနီးကပ် မြင်ကွင်းကို ဆွဲယူလိုက်လေသည်။

မြက်ခင်းတောထဲတွင် ကြီးမားလှသော ကျားသစ်ခေါင်းကြီး တစ်ခု ပုန်းကွယ်နေပြီး ရွှီယန်ကို အမဲလိုက်တော့မည့်ဟန်ဖြင့် အကြည့်မလွှဲဘဲ စိုက်ကြည့်နေသည်ကို အားလုံး မြင်တွေ့လိုက်ကြရလေသည်။

ကျားသစ် ဟု ခေါ်ဆိုသော်ငြားလည်း အစက်အပြောက်များသာ ကျားသစ်နှင့် ဆင်တူခြင်း ဖြစ်လေသည်။

ဂျာဂွါကျားသစ်၏ ခေါင်းက ကျား၏ ခေါင်းနှင့် ပိုမို ဆင်တူလေသည်။

၎င်းကို ကျားသစ် အစက်အပြောက်များ ပါဝင်သော ကျား တစ်ကောင်အဖြစ် နားလည်ထား၍ ရနိုင်လေသည်။

ထို့အပြင် ၎င်း အမဲလိုက်နေစဉ် အချိန်အတွင်း ထိုမျက်နှာအမူအရာက အလွန်တရာ ကြောက်စရာ ကောင်းလှပေသည်။

[လခွမ်း]

အင်တာနက်သုံးစွဲသူများက ဂျာဂွါကျားသစ်ကို တစ်ချက် မြင်လိုက်ရုံဖြင့် တစ်ကိုယ်လုံး ချွေးအေးများ ပျံလာသည်ဟု ခံစားလိုက်ကြရလေသည်။

ဤမြင်ကွင်းကို ကြည့်ရသည်မှာ တကယ်ကို ကြောက်စရာ ကောင်းလှပေသည်။

မြက်ခင်းတောထဲတွင် ကျားတစ်ကောင်က လူကို စိုက်ကြည့်နေသည်ကို မြင်ရပါက မည်သူက မကြောက်ရွံ့ဘဲ နေမည်နည်း။

အရေးကြီးဆုံးမှာ ရွှီယန်က အလွန် တည်ငြိမ်နေပုံ ပြသနေခြင်း ပင်ဖြစ်သည်။

ဤအကောင်၏ တိုက်ခိုက်နိုင်စွမ်းက အရှေ့မြောက်ကျား ထက် အများကြီး နိမ့်ကျနေခြင်း မရှိချေ။

တကယ်လို့များ အခြေအနေ အရေးပေါ်လာပါက လူကို ကိုက်ချီ၍ပင် ပြေးနိုင်လေသည်။

[တကယ်ကြီး ဂျာဂွါကျားသစ် ပဲ]

[ဒါ ကျားသစ် လား... ကြည့်ရတာ အရမ်း ကြောက်စရာ ကောင်းတာပဲ]

[အပူပိုင်းမိုးသစ်တော ထဲမှာ တောင် ကြီးမားတဲ့ ကြောင်မျိုးနွယ်ဝင် တိရစ္ဆာန် တွေက ထိပ်တန်း အရှင်သခင် တွေပဲ... ဂျာဂွါကျားသစ် ကလည်း အဲဒီလိုပဲ]

[သူ့ကို အမေရိက ကျား လို့လည်း ခေါ်တယ်လေ... ကြမ်းမကြမ်း ဆိုတာ မင်းသာ ပြောကြည့်တော့]

[လောင်ရွှီ က ဒီအကောင်ရဲ့ စောင့်ကြည့်တာကို ခံနေရတာလား... သူ မကြောက်ဘူးလား]

ကွန်မန့်စာသားများက မျက်စိတစ်မှိတ်အတွင်း ပေါက်ကွဲထွက်လာတော့သည်။

ဤမြင်ကွင်းက ဘယ်လိုပဲကြည့်ကြည့် ကြောက်စရာ ကောင်းလှပေသည်။

ရွှီယန်က ဂျာဂွါကျားသစ် နှင့် အကြည့်ချင်း ဆုံတွေ့ခြင်း မရှိခဲ့ချေ။ ဤသည်ကလည်း ၎င်းအနေဖြင့် လူသိသွားကြောင်း ရိပ်မိသွားမည်ကို ကာကွယ်ရန် ပင်ဖြစ်သည်။

ထိုသို့သာ ဖြစ်သွားပါက ဂျာဂွါကျားသစ်က ဆက်လက် ပုန်းကွယ်မနေတော့ဘဲ တိုက်ရိုက်ပင် ပြေးထွက်လာမည် ဖြစ်လေသည်။

ဤအချိန်တွင် ရွှီယန်က စကားဆိုလိုက်လေသည်။

"ကျွန်တော် သူ့ကို မမြင်တဲ့ပုံစံ ဟန်ဆောင်နေရင် သူက ကျွန်တော့်ကို အမှောင်ထဲကနေ ဆက်ပြီး စောင့်ကြည့်နေလိမ့်မယ်..."

"သူက ကျွန်တော့်ကို အမဲလိုက်ဖို့ ဆုံးဖြတ်ချက် မချသရွေ့တော့ ကိစ္စမရှိဘူး..."

"ဒီနေရာက တကယ်ကို အန္တရာယ်များတာပဲ... ဂျာဂွါကျားသစ်နဲ့ ဆုံရလိမ့်မယ်လို့ ထင်မှတ်မထားခဲ့ဘူး..."

ရွှီယန်က ဂျာဂွါကျားသစ်ကို မမြင်သည့်အလား ဟန်ဆောင်လိုက်ပြီး ဂျာဂွါကျားသစ်နှင့် ဝေးကွာသော အရပ်ဆီသို့ လျှောက်သွားလေသည်။

ဤအချိန်တွင် ဂျာဂွါကျားသစ် ဘယ်လို စဉ်းစားနေသနည်း ဆိုသည့်အပေါ် မူတည်နေပြီဖြစ်သည်။

ရွှီယန်၏ စိတ်ထဲတွင်တော့ အခြားသော စိတ်ကူးများ ရှိနေလေသည်။

'ငါ့ဆီမှာ ကြောင်မျိုးနွယ်ဝင် တိရစ္ဆာန်တွေရဲ့ နှစ်သက်မှု ကျွမ်းကျင်မှု ရှိနေတယ်... ကြောင်မျိုးနွယ်ဝင် တိရစ္ဆာန် အားလုံးက ငါ့အပေါ် နှစ်သက်မှု ပြသမှာ မဟုတ်ပေမယ့် ငါ့ကို သားကောင်အဖြစ်တော့ သတ်မှတ်ကြမှာ မဟုတ်ဘူး...'

ထို့ကြောင့် ဂျာဂွါကျားသစ် လည်း ယခုအချိန်တွင် ကြောင်အမ်းအမ်း ဖြစ်နေမည်ဟု ခန့်မှန်းရလေသည်။

တစ်ခဏမျှ ရွှီယန်ကို သားကောင်ဟု ထင်မှတ်ပြီး နောက်တစ်ခဏတွင် ရွှီယန်က အလွန် ရင်းနှီးကျွမ်းဝင်စရာ ကောင်းသည်ဟု ခံစားနေရမည်ဖြစ်သည်။

ထို့ကြောင့် အနည်းငယ် ဝေခွဲမရ ဖြစ်နေလေသည်။

၎င်းက ရွှီယန်ကိုသာ တစ်လျှောက်လုံး အကြည့်မလွှဲဘဲ စိုက်ကြည့်နေလေသည်။

ရွှီယန် ကတော့ တစ်လှမ်းချင်း အပြင်သို့ လျှောက်သွားနေလေသည်။

အင်တာနက်သုံးစွဲသူများမှာ အသက်ကိုပင် ပြင်းပြင်း မရှူရဲလောက်အောင် စိုးရိမ်ထိတ်လန့် နေကြလေသည်။

နောက်တစ်စက္ကန့်တွင် ဂျာဂွါကျားသစ် ခုန်ထွက်လာပြီး ရွှီယန်ကို သတ်ပစ်လိုက်မည်ကို အလွန် ကြောက်ရွံ့နေကြလေသည်။

[အားလုံးပဲ စိတ်ချကြပါ... ကြောင်မျိုးနွယ်ဝင် တိရစ္ဆာန် တွေက လောင်ရွှီ နဲ့ ရင်းနှီးကြတယ်... အနားလာပြီး အပွတ်သပ် မခံတာကပဲ ထူးဆန်းနေပြီ]

[ဂျာဂွါကျားသစ် ရဲ့ ပုံစံကို ကြည့်ရတာ အပွတ်သပ်ခံဖို့ လာမယ့် ပုံစံမျိုး မဟုတ်ဘူး]

[ဒီပုံစံက နည်းနည်းတော့ ကြောက်စရာ ကောင်းလွန်းတယ်]

ကံကောင်းစွာဖြင့် ဤတစ်လျှောက်လုံး အန္တရာယ်ကင်းစွာ ဖြတ်သန်းသွားနိုင်ခဲ့လေသည်။

ရွှီယန်က ခပ်လှမ်းလှမ်းအထိ လျှောက်သွားလိုက်သော်လည်း ဂျာဂွါကျားသစ်က အနောက်မှ လိုက်မလာခဲ့ချေ။

သူ့ကို အမဲလိုက်မည့် အစီအစဉ်ကို စွန့်လွှတ်လိုက်ပြီ ဖြစ်ကြောင်း ခန့်မှန်းရလေသည်။

ရွှီယန်က ဂျာဂွါကျားသစ် ရှိရာ အရပ်သို့ နောက်လှည့် ကြည့်လိုက်ပြီး သက်ပြင်း တစ်ချက် ချလိုက်လေသည်။

"တော်သေးတယ်... သူ နောက်က လိုက်မလာလို့..."

"ဒါပေမဲ့ ဒီနေရာက တကယ်ကို အန္တရာယ်များတယ်..."

"အပင်တွေ ဒီလောက် ထူထပ်နေတာ... ဒီဘက်ကို ကြည့်လိုက်... ချုံပုတ်တွေ ချည်းပဲ..."

"ဂျာဂွါကျားသစ် ခုန်ထွက်လာမလား ဆိုတာကို မပြောနိုင်ဘူး..."

"ဒါကြောင့် သတိထားရဦးမယ်..."

ရွှီယန်က တောခုတ်ဓားကို ကိုင်ဆောင်ထားရင်း အားလုံးကို ရှင်းပြလိုက်လေသည်။

အင်တာနက်သုံးစွဲသူများက ကြည့်လေ ပို၍ စိတ်လှုပ်ရှားလာလေ ဖြစ်ကြလေသည်။

သူက ကံကောင်းလွန်းသဖြင့်သာ တော်တော့သည်။

သာမန်လူသာ ဤကဲ့သို့သော အခြေအနေမျိုးတွင် ဆိုပါက အကြိမ်ပေါင်း ရှစ်ရာကျော်ခန့် သေဆုံးသွားလောက်ပြီ ဖြစ်လေသည်။

ရွှီယန်က ခရီးဆက်နေလေသည်။

တစ်ရက်စာ ခရီးစဉ်သာ ကျန်ရှိတော့ရာ တည်ငြိမ်စွာဖြင့် ခရီးဆက်သွားရုံဖြင့် လုံလောက်ပြီ ဖြစ်လေသည်။

အပူပိုင်းမိုးသစ်တောထဲတွင် အန္တရာယ် အများအပြား ရှိသလို လှပသော ရှုခင်းများ လည်း အများအပြား ရှိနေသေးလေသည်။

အရှေ့သို့ အတန်ကြာ လမ်းလျှောက်သွားပြီးနောက် အချိန်သိပ်မကြာခင်မှာပင် အရှေ့ဘက်ရှိ မြစ်တစ်စင်း၏ ဘေးနားတွင် ကြီးမားလှသော ကာပီဘာရာ အုပ်ကြီး တစ်အုပ် ထွက်ပေါ်လာသည်ကို ရွှီယန် မြင်တွေ့လိုက်ရလေသည်။

ရေဝက် များကို ဆိုလိုခြင်း ပင်ဖြစ်သည်။

အကြီးအသေး ရေဝက် အရေအတွက်က အနည်းဆုံး ဆယ့်နှစ်ကောင် ဆယ့်သုံးကောင်ခန့် ရှိလေသည်။

အားလုံးက ခေါင်းမော့ကာ မျက်လုံးမှိတ်ထားကြပြီး ကမ်းစပ်တွင် မှောက်လျက် နေပူဆာလှုံ နေကြလေသည်။

ရေဝက်များက ဒေါသ အနည်းဆုံး တိရစ္ဆာန်များ ဖြစ်ကြလေသည်။

ဤအကောင်များက အလွန်တရာ အေးချမ်း တည်ငြိမ်ကြလေသည်။

တစ်ခါတစ်ရံတွင် သူတို့၏ အေးချမ်း တည်ငြိမ်မှုက အနည်းငယ် ကြောက်စရာပင် ကောင်းသေးလေသည်။

ဥပမာအားဖြင့် အရွယ်ရောက်ပြီးသော ရေဝက်များက ဂျာဂွါကျားသစ်၏ အမဲလိုက်ခြင်းကို ခံရချိန်တွင် ရေဝက်ပေါက်လေးများက ရေထဲမှ ထွက်လာကာ တည်ငြိမ်စွာဖြင့် ကြည့်ရှုနေတတ်ကြလေသည်။

မိမိကိုယ်တိုင် ပြဿနာ ကြုံတွေ့ရမည်ကို အနည်းငယ်မျှပင် မကြောက်ရွံ့ကြချေ။

အသက်ရှင်ခွင့် မရတော့ရင် သေလိုက်မယ် ဆိုသော တည်ငြိမ်မှုမျိုး ရှိနေလေသည်။

"ရေဝက် တွေပဲ..."

"ဒီအကောင် တွေက အခု တော်တော်လေး နာမည်ကြီး နေတာ..."

"အိမ်မွေး တိရစ္ဆာန် အဖြစ် မွေးမြူလို့ ရတဲ့ အတွက် ပြည်တွင်းက နေရာ တော်တော်များများ မှာ ရေဝက် တွေကို မွေးမြူထားကြတယ်..."

"ကြည့်ရတာ တော်တော်လေး ချစ်စရာ ကောင်းတယ်..."

ရွှီယန်က အနည်းငယ် အံ့ဩ ဝမ်းသာစွာဖြင့် စကားဆိုလိုက်လေသည်။

အင်တာနက်သုံးစွဲသူများ ကလည်း တောရိုင်း ရေဝက်များကို မြင်တွေ့လိုက်ကြရလေသည်။

လူအများအပြားက အလွန် အံ့အားသင့် နေကြလေသည်။

[ဘာ... ဒီအကောင် တွေက တောရိုင်း တိရစ္ဆာန် တွေလား... ငါကတော့ အိမ်မွေး တိရစ္ဆာန် တွေလို့ပဲ တစ်လျှောက်လုံး ထင်မှတ်ထားခဲ့တာ]

[လခွမ်း... ရေဝက် တွေ ဘယ်လိုလုပ် အပူပိုင်းမိုးသစ်တော ထဲ ရောက်သွားတာလဲ လို့ တွေးနေတာ... အခုမှ အပူပိုင်းမိုးသစ်တော က သူတို့ရဲ့ ရှင်သန် နေထိုင်ရာ နေရာမှန်း သိတော့တယ်]

[ဟားဟားဟား... ဒီအကောင် တွေ အားလုံးက ကော်ပီကူးပြီး ပွားယူထားတဲ့ အတိုင်း တစ်ပုံစံတည်း တူညီနေကြတယ် နော်]

[လောင်ရွှီ... မင်း သွားပြီး ခြောက်လှန့် လိုက်စမ်းပါ... ရေထဲကို တန်းစီပြီး ခုန်ချသွားမလား ဆိုတာ ကြည့်ရအောင်]

ယခင်က တိရစ္ဆာန်ရုံ တစ်ခု၏ ဗီဒီယို တစ်ခု ရှိခဲ့ဖူးလေသည်။ ရေဝက်အုပ်ကြီး တစ်အုပ်က ကမ်းစပ်တွင် နေပူဆာလှုံ နေကြစဉ် ခွေးတစ်ကောင်က ၎င်းတို့ကို ခြောက်လှန့်ရန် တမင်သက်သက် ပြေးဝင်သွားပြီး ရေထဲသို့ ခုန်ချသွားအောင် လုပ်ဆောင်ခဲ့လေသည်။

ထိုခွေးက အတော်လေး ဆော့သန်ပြီး ဤကဲ့သို့သော ကိစ္စများကို မကြာခဏ လုပ်ဆောင်လေ့ ရှိကြောင်း သိသာ ထင်ရှားလေသည်။

ရွှီယန်ကတော့ ဤကဲ့သို့သော စိတ်ကူးမျိုး မရှိခဲ့ချေ။

နေပူဆာလှုံ နေကြသော ဤရေဝက်အုပ်ကို ဘေးနားတွင် ရပ်လျက် စောင့်ကြည့် နေရုံ သက်သက်သာ ဖြစ်လေသည်။

ရေဝက် အချို့က ရွှီယန်ကို သတိထားမိ သွားကြပြီး ရွှီယန်ကို လှမ်းကြည့် နေကြလေသည်။

ထိုအေးချမ်း တည်ငြိမ်နေသော ပုံစံက အားလုံးကို ဟားတိုက် ရယ်မော သွားစေလေသည်။

"ဒီအကောင် တွေက အပူပိုင်းမိုးသစ်တော ထဲမှာ ဘယ်လို ရှင်သန် နေထိုင်ကြလဲ ဆိုတာ ကျွန်တော် တောင် မသိတော့ဘူး..."

"နေရာတိုင်းမှာ မြွေဆိုး တွေ သားရဲ တွေ ပြည့်နှက်နေတာ... ပြီးတော့ ဂျာဂွါကျားသစ် ကလည်း သူတို့ကို အစာအဖြစ် သတ်မှတ်ထားတာ..."

"ဒီလို စရိုက်မျိုးနဲ့ မျိုးတုံး ပျောက်ကွယ် သွားရင်တောင် အံ့ဩစရာ မဟုတ်ဘူး..."

"ဒါပေမဲ့ မျိုးပွား တာက တော်တော်လေး ကောင်းမွန် နေသေးတယ်..."

ရွှီယန်က ကာပီဘာရာ များကို ကြည့်ရင်း ပြုံးလျက် အံ့ဩချီးကျူး လိုက်လေသည်။

သူက ကာပီဘာရာများ ရှိရာသို့ အနည်းငယ် တိုးကပ်သွားလိုက်လေသည်။ ကာပီဘာရာ အချို့က အတော်လေး သတိဝီရိယ ရှိကြပြီး လူကို မြင်ပြီးနောက် ချက်ချင်းပင် မြစ်ထဲသို့ ခုန်ချသွားကြလေသည်။

အချို့ကတော့ ဂရုမစိုက်သော ပုံစံမျိုး ပြသနေကြဆဲ ပင်ဖြစ်သည်။

ရွှီယန်က ၎င်းတို့ အနည်းငယ် သတိဝီရိယ ရှိနေဆဲ ဖြစ်ကြောင်း မြင်သောအခါ ထပ်မံ မချဉ်းကပ် တော့ချေ။

ဤမြင်ကွင်းကို ကြည့်ရသည်မှာ အတော်လေး စိတ်ဝင်စားစရာ ကောင်းလှပေသည်။

ထို့နောက် ရွှီယန်က ခရီး ဆက်လက် ထွက်ခွာ လာခဲ့လေသည်။

လမ်းတစ်လျှောက်ရှိ ရှုခင်းများကို အပြည့်အဝ ခံစား ကြည့်ရှု လာခဲ့လေသည်။

စိတ်ပေါ့ပါး လွတ်လပ် သွားသည်ဟု ခံစားရလေသည်။

အန္တရာယ် ရှိနိုင်ခြေ အတိုင်းအတာ တစ်ခုအထိ ရှိနေသော်ငြားလည်း ယေဘုယျ အတွေ့အကြုံ ကတော့ အလွန် ကောင်းမွန် လှပေသည်။

အပြင်သို့ ဆက်လက် လျှောက်သွား လေလေ အန္တရာယ် ရှိနိုင်ခြေ က ပိုမို နိမ့်ကျ လာလေလေ ပင်ဖြစ်သည်။

မည်သို့ပင်ဖြစ်စေ လူသားများ ရှင်သန် နေထိုင်ရာ ဧရိယာ နှင့် ပိုမို နီးကပ် သွားပြီ ဖြစ်သောကြောင့် ပင်ဖြစ်သည်။

တစ်လျှောက်လုံး အန္တရာယ်ကင်းစွာ ဖြတ်သန်း လာနိုင်ခဲ့လေသည်။

ညဘက်သို့ ရောက်ရှိလာချိန် အထိ ရွှီယန်က အပူပိုင်းမိုးသစ်တော ထဲတွင် တည်ဆောက်ထားသော မြို့ငယ်လေး တစ်မြို့ သို့ ရောက်ရှိ လာခဲ့လေသည်။

ဤဘက်က ခရီးသွား လည်ပတ်ရန် နေရာ ပင်ဖြစ်သည်။

"နောက်ဆုံးတော့ အပြင်ရောက်လာပြီ..."

"လွယ်တော့ မလွယ်ကူဘူး..."

"ကျွန်တော် သွားခဲ့တဲ့ နေရာက အပူပိုင်းမိုးသစ်တော ရဲ့ ဆယ်ပုံတစ်ပုံ အထိတောင် မရောက်သေးဘူး..."

"ဒါပေမဲ့ ကြုံတွေ့ခဲ့ရတဲ့ အန္တရာယ် တွေက မနည်းတော့ဘူး..."

"တကယ်လို့များ အနက်ရှိုင်းဆုံး အရပ်ကို ထပ်သွားမယ် ဆိုရင် ဘယ်လို ထူးဆန်းတဲ့ သတ္တဝါ တွေ ရှိနေဦးမလဲ ဆိုတာကို မပြောနိုင်ဘူး..."

"ဒီတစ်ခေါက် အပြင်ထွက် လည်ပတ် ပြီးပြီ ဆိုတော့ လယ်ယာခြံဝင်း ကို ပြန်ပြီး အချိန် အတန်ကြာ အနားယူ ရတော့မယ်..."

ရွှီယန်က အားလုံးကို စကားဆိုလိုက်လေသည်။

တိုက်ရိုက်ထုတ်လွှင့်မှု အခန်း၏ ဖန်သားပြင် အပြည့် သြဘာပေး အားပေးသံများ ပြည့်နှက် သွားခဲ့လေသည်။

[အစ်ကိုယန် က တကယ်ကို အစွမ်းထက်တာပဲ... အသက်ရှင်လျက် အပြင်ကို ထွက်လာနိုင်တာ ကတင် မလွယ်ကူတော့ဘူး]

[ဆရာကြီး က အမြဲတမ်း ဆရာကြီး ပဲ]

[အရမ်းကို အစွမ်းထက် နေပါပြီ... တစ်ကမ္ဘာလုံး မှာတောင် ဒီလို လုပ်နိုင်တဲ့သူ လက်ချိုး ရေတွက်လို့ ရတယ်]

[နိုင်ငံခြား ကွန်ရက် မှာ မင်းရဲ့ ကျော်ကြားမှုရမှတ် တွေ အရမ်း မြင့်တက် နေပြီ... အားလုံးက မင်းကို အရူးသွပ်ဆုံးသော စွန့်စား သွားလာသူ လို့ ပြောဆို နေကြတယ်]

[အပြင်ဘက်က မီဒီယာ အများအပြား ကလည်း မင်းရဲ့ ဇာတ်လမ်း တွေကို တည်းဖြတ် နေကြတယ်... အစ်ကိုယန်... တစ်ကမ္ဘာလုံး အတိုင်းအတာ ဖြင့် နာမည်ကြီး နေပြီ]

ကွန်မန့်စာသားများက အဆက်မပြတ် လိမ့်တက် နေလေသည်။

ရွှီယန်က ဤသတင်းစကား များကို မြင်သောအခါ ပြုံးရုံသာ ပြုံးနေလိုက်လေသည်။

သူ အနည်းငယ် ပင်ပန်းနေပြီ ဖြစ်ရာ လောလောဆယ် အရေးကြီးဆုံးမှာ သေချာစွာ အနားယူရန် နေရာတစ်ခု ရှာဖွေရမည် ဖြစ်လေသည်။

ထို့နောက် အိမ်ပြန်မည့် ကိစ္စကို တွေးတောရမည် ဖြစ်လေသည်။

မည်သို့ပင်ဖြစ်စေ လယ်ယာခြံဝင်း ဘက်တွင် လွမ်းဆွတ်ရသော လူများနှင့် လွမ်းဆွတ်ရသော တိရစ္ဆာန်များ ရှိနေသေးလေသည်။

ထို့ကြောင့် စောစောစီးစီး ပြန်သွားခြင်း ကသာ အကောင်းဆုံး ပင်ဖြစ်သည်။