အခန်း ၃၇၄

အခန်း (၃၇၄) မျိုးစေ့ကစားသမားများ

“အထူးဖိတ်ကြားခံရတဲ့ ကစားသမားတွေက လိပ်ပြာတိုက်ပွဲကို တိုက်ရိုက်ဝင်ရောက်ခွင့်ရမည်” ဟူသည့် သတ်မှတ်ချက်၏ အဓိပ္ပာယ်မှာ... သူတို့၏ နောက်ဆုံးရလဒ်က မည်သို့ပင်ဖြစ်စေ ဤကစားသမားဆယ်ဦးသည် ထိပ်တန်း ၁၀၀ စာရင်းအတွင်း၌ နေရာဆယ်နေရာကို ကြိုတင်ရရှိထားပြီးသား ဖြစ်သည်ဟု ဆိုလိုခြင်းပင်။

ပဏာမခြေစစ်ပွဲများ မစတင်မီ နောက်ဆုံးရက်တွင် အိပ်မက်ကုမ္ပဏီဘက်မှ ဤသို့ မမျှတသည့် သတင်းဆိုးကြီးကို ရုတ်တရက် ထုတ်ပြန်လိုက်ခြင်းက ကစားသမားများအကြား ပြင်းထန်သော မကျေနပ်မှုများကို သေချာပေါက် ဖြစ်ပေါ်စေတော့သည်။

လျှောက်ထားသူတိုင်းက “ငါများ အထူးဖိတ်ကြားခံရမလား” ဟူသော မျှော်လင့်ချက်မျှင်မျှင်လေး ရှိနေကြသော်လည်း... အမှန်တကယ်တော့ ထိုသို့ဖြစ်လာရန် အခွင့်အရေးမှာ သုညနီးပါးသာ ရှိသည်ကို သူတို့ကိုယ်တိုင်လည်း ကောင်းကောင်းကြီး သိကြသည်။

သာမန်ကစားသမားများမှာ ပိုးကောင်များတိုက်ပွဲတွင် အရိုးကြေကြေအရေခမ်းခမ်း အသည်းအသန် ကြိုးစားနေရပြီး ခြေစစ်ပွဲအောင်မြင်ရန်ပင် ကံတရားပေါ်၌ မှီခိုနေရချိန်တွင် ဤကစားသမားဆယ်ဦးမှာမူ မှတ်ပုံတင်ပြီးသည်နှင့် ထိပ်တန်း ၁၀၀ စာရင်းထဲသို့ တိုက်ရိုက်ရောက်ရှိသွားကာ ပျော်ပျော်ပါးပါး ကစားရုံဖြင့် အဆင့်သတ်မှတ်ချက်နှင့် ဆုလာဘ်များကို ကောင်းကောင်းကြီး ရရှိနိုင်မည်ဖြစ်သည်။ ဒါက ဘယ်လိုလော့ဂျစ်မျိုးလဲ။

ထို့ကြောင့်ပင်... ခန့်မှန်းရလွယ်လှသော အခြေအနေတစ်ခု ဖြစ်ပေါ်လာခဲ့ပြီး... ဂိမ်းဖိုရမ်ကြီးတစ်ခုလုံး ထပ်မံ ပေါက်ကွဲသွားတော့သည်။

ကံကောင်းထောက်မစွာဖြင့် ဂိမ်းကုမ္ပဏီသည် ယခုတစ်ကြိမ်တွင် ကြိုတင်ပြင်ဆင်ထားပုံရပြီး ပို့စ်တင်သည့်အချိန်ကို ကန့်သတ်ထားသောစနစ်အဖြစ် ချက်ချင်း အသက်သွင်းလိုက်လေသည်။

သို့သော်ငြားလည်း ညနေ ၅ နာရီနောက်ပိုင်းတွင် တင်သမျှ ပို့စ်အရေအတွက်မှာ အဆမတန် မြင့်တက်လာပြီး ညသန်းခေါင်ယံအချိန်အထိ လျော့ကျသွားမည့် အရိပ်အယောင် လုံးဝ မပြသပါချေ။

ပူးပေါင်းကြံစည်မှုသီအိုရီသမား အမြောက်အမြား ပေါ်ထွက်လာကြပြီး “အိပ်မက်ကုမ္ပဏီက တရားမျှတမှုကို လျစ်လျူရှုပြီး အဆင့်တွေကို ကြိုတင်သတ်မှတ်ထားတယ်”၊ “သူဌေးတစ်ယောက်ယောက်က ထိပ်တန်း ၁၀၀ နေရာကို ပိုက်ဆံနဲ့ တိုက်ရိုက်ဝယ်လိုက်တာလား” နှင့် “ဒီလို အထွတ်အထိပ်ပြိုင်ပွဲ ဆိုတာကြီးက စတူဒီယိုတွေနဲ့ အိပ်မက်ကုမ္ပဏီတို့ ပူးပေါင်းပြီး လူသိရှင်ကြားဖြစ်အောင် ဖန်တီးထားတဲ့ ပြဇာတ်တစ်ခုပဲ” စသည့် ကွန်မန့်များဖြင့် ပို့စ်ပေါင်းများစွာကို နေရာအနှံ့ တွေ့မြင်လာရသည်။ မလိုမုန်းထားစိတ်ဖြင့် ထင်ကြေးပေးထားသော ပို့စ်များမှာလည်း မှိုလိုပေါက်လာတော့သည်။

ဤပို့စ်များသည် မည်သည့်အထောက်အထားမှမရှိဘဲ သာမန်မှန်းဆချက်များနှင့် အဓိပ္ပာယ်မရှိသော စကားများသာ ဖြစ်ကြသော်လည်း... လိုက်လံထောက်ခံသူ အမြောက်အမြား ရှိနေခဲ့ခြင်းဖြစ်သည်။ တစ်ချိန်တည်းမှာပင် သည်းထိတ်ရင်ဖိုသုခဘုံ၏ ဖောက်သည်ဝန်ဆောင်မှုဌာနမှာလည်း လေဖြတ်သလို ဖြစ်သွားခဲ့ရသည်။ အွန်လိုင်းဝန်ဆောင်မှုစာမျက်နှာတွင် မက်ဆေ့ခ်ျများ တောင်ပုံရာပုံ ရောက်ရှိနေပြီး ၎င်းတို့ကို ရောက်ရှိလာသည့်အချိန်အလိုက် တစ်ခုချင်းစီ ပြန်လည်ဖြေကြားရန်အတွက် သုံးနာရီအတွင်း ရောက်လာသောစာများကို သုံးရက်ခန့် ရုံးပိတ်၍ အချိန်ယူရမည့် အခြေအနေမျိုး ဖြစ်သည်။ ဖုန်းဖြင့် ဆက်သွယ်ရသော ဝန်ဆောင်မှုမှာ ပိုမိုဆိုးရွားနေပြီး အော်ပရေတာအားလုံး အလုပ်ရှုပ်နေကြသော်လည်း ဖုန်းခေါ်ဆိုမှု စုစုပေါင်း၏ ၁၀ ရာခိုင်နှုန်းအောက်ကိုသာ ပြန်လည်ဖြေကြားနိုင်ခဲ့ကြသည်...။

ထင်ရှားသည်မှာ ကစားသမားများသည် စိတ်ကျေနပ်လောက်စရာ “ရှင်းလင်းချက်” တစ်ခုကို အလိုရှိနေကြခြင်းပင်။

နောက်ဆုံးတွင် ည ၈ နာရီ၌ သုံးနာရီကြာ ရုန်းကန်လှုပ်ရှားခဲ့ပြီးနောက် အိပ်မက်ကုမ္ပဏီ၏ တရားဝင် ဝက်ဘ်ဆိုက်ပေါ်တွင် “အထူးဖိတ်ကြားခံရသော ကစားသမားများ” နှင့် ပတ်သက်သည့် နောက်ဆက်တွဲ ကြေညာချက်တစ်ခုကို ထုတ်ပြန်ပေးလိုက်လေသည်။

[ဤပြိုင်ပွဲတွင် ဖိတ်ကြားခံရသော ကစားသမားများသည် “မျိုးစေ့ကစားသမားများ” ဖြစ်ပါသည်။ တစ်နည်းအားဖြင့် ပြိုင်ပွဲ၏ နောက်ဆုံးအဆင့်သို့ မဝင်ရောက်မီ သတ်မှတ်ထားသော စည်းမျဉ်းများနှင့် ပုံစံများအရ ပြိုင်ပွဲမှ ပြုတ်ထွက်သွားရန် ရာခိုင်နှုန်း အနည်းဆုံးရှိသော ကစားသမားဆယ်ဦးကို ထည့်သွင်းစဉ်းစားထားခြင်း ဖြစ်ပါသည်။

မျိုးစေ့ကစားသမားများကို ပိုးကောင်များတိုက်ပွဲနှင့် ပိုးအိမ်တိုက်ပွဲတို့မှ သီးခြားခွဲထုတ်ထားခြင်းမှာ စနစ်စီစဉ်သူများအနေဖြင့် အခြားကစားသမားများကို အကာအကွယ်ပေးရန်အတွက် ကျင့်သုံးလိုက်သော ကာကွယ်ရေးယန္တရားတစ်ခု ဖြစ်ပါသည်။

အထူးဖိတ်ကြားခံရမည့် ကစားသမားများကို စနစ်မှ တိုက်ရိုက်ရွေးချယ်ပေးမည် ဖြစ်ပါသည်။ မေလ ၁ ရက်နေ့ ညသန်းခေါင်ယံတွင် စနစ်၏ တွက်ချက်မှုများ ပြီးဆုံးမည်ဖြစ်ပြီး စာရင်းကို အလိုအလျောက် ထုတ်ပြန်ကြေညာပေးသွားမည် ဖြစ်ပါသည်။

အသေးစိတ်အချက်အလက်များအတွက် တရားဝင်ဝက်ဘ်ဆိုက်၏ ကြေညာချက်များကို ဆက်လက်စောင့်ကြည့်ပေးပါရန်။]

တစ်နည်းအားဖြင့်... ဤကြေညာချက်သည် ယခင်ကြေညာချက်ထက်ပင် ပိုမိုဆိုးရွားလှပေသည်...။

ကစားသမားများသည် ဤဆယ်ဦး ရှိနေခြင်းအပေါ်၌ပင် မကျေမနပ် ဖြစ်နေကြပြီ ဖြစ်ရာ ယခုအခါ ဂိမ်းကုမ္ပဏီက “ဒီလူတွေက ထိပ်တန်း ၁၀၀ ထဲကို ဝင်ဖို့ ရာခိုင်နှုန်း အလွန်မြင့်တယ်လို့ စနစ်က အသိအမှတ်ပြုထားတဲ့သူတွေပဲ၊ သူတို့ကို ပဏာမခြေစစ်ပွဲတွေမှာ ပေးမကစားတာက မင်းတို့ကို ကာကွယ်ပေးဖို့အတွက်ပဲ” ဟု ပွင့်ပွင့်လင်းလင်း ပြောလိုက်ခြင်း ဖြစ်သည်။

ဤသည်မှာ ထိုမျိုးစေ့ကစားသမားများကို ရိုးရိုးရှင်းရှင်းဖြင့် မီးဖိုပေါ် တင်ပေးလိုက်ခြင်း ဖြစ်သည်...။ အကယ်၍ ထိုဆယ်ဦးသည် အမှန်တကယ် သောက်ကြမ်းကြီးများ ဖြစ်ကြလျှင်တော့ တစ်မျိုးပေါ့။ သို့သော် အကယ်၍ သူတို့၏ လိပ်ပြာတိုက်ပွဲတွင် ပြသခဲ့သော စွမ်းဆောင်ရည်များမှာ မထိုက်တန်ဘဲ စိတ်ပျက်စရာကောင်းနေခဲ့လျှင် ပြိုင်ပွဲအပြီးတွင် မလိုမုန်းထားစိတ်ဖြင့် တိုက်ခိုက်မှုများကို သေချာပေါက် ကြုံတွေ့ရမည်ဖြစ်ပြီး နောက်ကွယ်မှ မရိုးမသား ခြယ်လှယ်မှုများ ရှိနေသည်ဟူသော ကောလာဟလအမျိုးမျိုး ထွက်ပေါ်လာရန်မှာ ရှောင်လွှဲရနိုင်မည်မဟုတ်တော့ပေ။

ကံကောင်းထောက်မစွာဖြင့်... နောက်ပိုင်းတွင် ဖြစ်ပျက်ခဲ့သော အဖြစ်အပျက်များအရ ထိုဆယ်ဦးမှာ အမှန်တကယ်ပင် မကောင်းဆိုးဝါးများကဲ့သို့ အစွမ်းထက်သူများ ဖြစ်ကြောင်း သက်သေပြနိုင်ခဲ့ကြလေသည်...။

...

ထိုနေ့ည ၈:၁၅ နာရီတွင် ဖုန်းပုကြွယ်သည် ဂိမ်းထဲသို့ နိုးကြားခြင်းမုဒ်ဖြင့် လော့ဂ်အင်ဝင်ခဲ့သည်။ လော့ဂ်အင်ဝင်ပြီးနောက် သူ ပထမဆုံး လုပ်ဆောင်ခဲ့သည်မှာ အီးမေးလ်များကို စစ်ဆေးခြင်း ဖြစ်သည်။

ပြီးခဲ့သည့် ရက်အနည်းငယ်အတွင်း သူစိမ်းအများအပြားသည် သူ့ထံသို့ သူငယ်ချင်းအဖြစ် တောင်းဆိုမှုများ ပေးပို့ခဲ့ကြသည့်အပြင် နှုတ်ဆက်စကားများနှင့် စကားစမြည်ပြောရန် အီးမေးလ်များကိုလည်း ပို့ခဲ့ကြသည်။ ထိုလူများအားလုံးမှာ “အော်ဒါ ” အဖွဲ့ဝင်များ ဖြစ်ပေသည်။

၂၄ ရက်နေ့တွင် ဝူစစ်ချန်းရွှမ်သည် ဈေးဆိုင်အတွင်း၌ ဖုန်းပုကြွယ်၏ ပြတ်ပြတ်သားသား ငြင်းပယ်ခံရပြီးနောက် ပြန်သွားကာ မုန့်ကျင်းချန်နှင့် ဆွေးနွေးခဲ့သည်။ ထိုနှစ်ဦးသည် ကောက်ချက်တစ်ခုသို့ လျင်မြန်စွာချလိုက်ကြပြီး ဖုန်းပုကြွယ်မှာ တိုက်ခိုက်ရေးစွမ်းရည် အဆင့်သတ်မှတ်ချက်တွင် ဒုတိယနေရာ၌ ရှိနေသော ကစားသမားဖြစ်ကြောင်း အခြေခံအားဖြင့် အတည်ပြုနိုင်ခဲ့ကြသည်။ ထို့နောက် သူတို့သည် ဤကိစ္စကို သူတို့၏ အထက်လူကြီးများထံသို့ အစီရင်ခံခဲ့ကြသည်။ ဤအကြောင်းအရာသည် အော်ဒါအဖွဲ့အတွင်း၌ အဆင့်မြင့်ဆုံး သတင်းအချက်အလက်အဖြစ် ချက်ချင်း သတ်မှတ်ခံလိုက်ရလေသည်။

ထို့ကြောင့် ၂၄ ရက်နေ့ နံနက်အစောပိုင်းမှစ၍ ဖုန်းပုကြွယ်သည် အော်ဒါစတူဒီယို၏ ရံဖန်ရံခါ နှောင့်ယှက်မှုများကို စတင်ကြုံတွေ့လာရတော့သည်။ ဤအခြေအနေနှင့် ရင်ဆိုင်ရသောအခါ ဖုန်းပုကြွယ်သည် သဘာဝကျကျပင် ၎င်းတို့အားလုံးကို လျစ်လျူရှုထားလိုက်သည်။ သူသည် အီးမေးလ်များကို တစ်ချက်ကြည့်ကာ ဖျက်ပစ်ခဲ့ပြီး သူငယ်ချင်းအဖြစ် တောင်းဆိုမှုအားလုံးကိုလည်း ငြင်းပယ်ပစ်ခဲ့သည်။ သူ၏ ချဉ်းကပ်ပုံမှာ ရိုးရှင်းပါသည်...။ မည်သည့်တောင်းဆိုမှုမျိုးကိုမဆို မစတင်မီကတည်းက အမြစ်ပြတ် ချေမှုန်းပစ်ခြင်းပင်။

သို့သော် တစ်ဖက်လူမှာ လက်လျှော့မည့်ပုံ မပေါ်ဘဲ... ဖုန်းပုကြွယ်နှင့် ညှိနှိုင်းရန် ဆက်လက်ကြိုးပမ်းနေဆဲ ဖြစ်သည်။

အမှန်အတိုင်း ပြောရလျှင် အော်ဒါစတူဒီယို၏ လုပ်ဆောင်ပုံမှာ နတ်ဘုရားများအဖွဲ့နှင့် အတော်လေး ကွာခြားလှသည်။ နတ်ဘုရားများအဖွဲ့သည် ပွင့်လင်းပြတ်သားကြသူများ ဖြစ်သည်။ တစ်ကြိမ်မျှ ပြတ်ပြတ်သားသား ငြင်းပယ်ခံရပြီးသည်နှင့် သူတို့သည် အကျိုးမရှိသော ကြိုးပမ်းမှုများကို ထပ်မံပြုလုပ်တော့မည် မဟုတ်ချေ။

သို့သော် အော်ဒါကမူ... ဖုန်းပုကြွယ်အနေဖြင့် သူတို့တွင် “ပြည်သူ့ဆက်ဆံရေးဌာန” ကဲ့သို့သော ဌာနတစ်ခု ရှိနေကြောင်း အတော်လေး သေချာနေလေသည်။ အကြောင်းမှာ ပြီးခဲ့သည့် ရက်အနည်းငယ်အတွင်း သူသည် အမျိုးသမီးဆန်ပြီး လှည့်စားတတ်သော အိုင်ဒီများထံမှ အီးမေးလ်များနှင့် သူငယ်ချင်းအဖြစ် တောင်းဆိုမှုများစွာကို လက်ခံရရှိခဲ့သောကြောင့် ဖြစ်သည်...။ အီးမေးလ်များ၏ အကြောင်းအရာမှာ “ညီမက အော်ဒါအဖွဲ့က ဘယ်သူဘယ်ဝါပါ၊ စကားခဏလောက် ပြောလို့ရမလား” ဆိုသည်မှ “အစ်ကိုဖုန်းပုကြွယ်၊ ညီမလေးနဲ့ စကားခဏလောက် ပြောလို့ရမလား” ဟူ၍ ဖြစ်လာပြီး ထို့နောက်တွင် “ညီမက အစ်ကိုနဲ့ ခင်ချင်ရုံပါ၊ ဘာလို့ ညီမကို လျစ်လျူရှုထားရတာလဲ” ဟူသော အရေးအသားများအထိ တဖြည်းဖြည်း ပြောင်းလဲလာခဲ့သည်...။

အစ်ကိုကြွယ်သည် ဤအီးမေးလ်များကို မြင်ရသည့် အကြိမ်တိုင်းတွင် ကြက်သီးမွေးညှင်းများ ထလာတတ်ပြီး ပြည့်တန်ဆာအိမ်ရှေ့တွင် ဆွဲဆောင်ခံနေရသကဲ့သို့ ခံစားနေရသည်...။ သူ့အား အံ့အားအသင့်စေဆုံးအချက်မှာ ထိုအမျိုးသမီးဆန်သောအိုင်ဒီများနှင့် ဆက်သွယ်ရန် ကျရှုံးသွားပြီးနောက် “ဧကရာဇ်ရဲ့လူ” နှင့် “ဆံပင်တု” စသည့် မရေမရာအဓိပ္ပာယ်ရှိသည့် ထူးဆန်းသော အိုင်ဒီအချို့က သူ့ကို စတင်ဆက်သွယ်လာခြင်း ဖြစ်သည်။ ထင်ရှားသည်မှာ အော်ဒါသည် မည်သည့်နည်းလမ်းကိုသုံး၍ဖြစ်စေ သူ့ကို ဆက်သွယ်ရန် အမှန်တကယ် လိုလားနေကြပုံရသည်...။

“အာ... ကြေညာချက်အသစ်တစ်ခု ထပ်ထွက်လာပြန်ပြီ...”

ဖုန်းပုကြွယ်သည် အီးမေးလ်ကို ဖျက်ပစ်လိုက်ပြီး ထိတွေ့မျက်နှာပြင်မှတစ်ဆင့် တရားဝင် ဝက်ဘ်ဆိုက်ကို ထပ်မံဖွင့်လှစ်လိုက်သည်။

“အင်း... မျိုးစေ့ကစားသမားဆိုပဲ...”

သူ ရေရွတ်လိုက်သည်။

“ဒါနဲ့ ပြောရဦးမယ်၊ ဒီကြေညာချက်ရဲ့ အကြောင်းအရာအရဆိုရင်... တိုက်ခိုက်ရေးစွမ်းရည် အဆင့်သတ်မှတ်ချက်ရဲ့ ထိပ်ဆုံးမှာ ရှိနေတဲ့ ငါက ထိပ်တန်းဆယ်ယောက်ထဲက တစ်ယောက် ဖြစ်လာဖို့ အခွင့်အရေး အများကြီး ရှိမနေဘူးလား”

သူ ဆက်လက်တွေးတောလိုက်သည်။

“တကယ်လို့ အဲ့လိုသာ ဖြစ်လာခဲ့ရင် ငါ့နာမည်က တရားဝင်ဝက်ဘ်ဆိုက်ပေါ် အတင်ခံရပြီး ချက်ချင်း ကစားသမား သန်းပေါင်းများစွာရဲ့ ဝေဖန်တိုက်ခိုက်ရေးပစ်မှတ် ဖြစ်လာတော့မှာပေါ့...”

အစ်ကိုကြွယ်က သူ့မေးစေ့ကို ပွတ်သပ်လိုက်သည်။

“ဒါပေမဲ့လည်း... ငါ ဒီပြိုင်ပွဲမှာ ပါဝင်ခဲ့ကတည်းက ငါ့စွမ်းရည်က အနှေးနဲ့အမြန်ဆိုသလို လူသိရှင်ကြား ဖြစ်သွားမှာပဲ... ငါက အထူးဖိတ်ကြားခံရတဲ့ ကစားသမား ဖြစ်မလာရင်တောင် ငါ့စွမ်းရည်နဲ့ဆိုရင် ပိုးအိမ်တိုက်ပွဲ ဒါမှမဟုတ် လိပ်ပြာတိုက်ပွဲအထိ ရောက်ဖို့က ရာခိုင်နှုန်းအရမ်းများတယ်၊ ပြိုင်ပွဲကို တိုက်ရိုက်ထုတ်လွှင့်ပြီး မှတ်တမ်းတင်ထားမှာ ဖြစ်သလို နှစ်ဖက်လုံးရဲ့ နာမည်တွေကိုလည်း စာရင်းပြုစုထားမှာပဲ...”

သူ သက်ပြင်းချလိုက်မိသည်။

“ဒါက ငါ့ရဲ့ လျှို့ဝှက်ဆန်းကြယ်နေ့ရက်တွေ ကုန်ဆုံးသွားတာပဲလား... အနည်းဆုံး လေးနာရီအတွင်း၊ ဒါမှမဟုတ် အလွန်ဆုံး ရုံးပိတ်ရက် တစ်ပတ်ခွဲအတွင်းမှာ ငါက လူသိများတဲ့ ကစားသမားတစ်ယောက် ဖြစ်လာတော့မှာပဲ၊ တကယ့်ကို အလုပ်ရှုပ်စရာပဲကွာ...”

ထိုစဉ် ဆက်သွယ်မှုတောင်းဆိုချက်တစ်ခု ပေါ်လာလေသည်။ ၎င်းမှာ ရီရူလီထံမှ ဖြစ်သည်။

မက်ဆေ့ခ်ျကို လက်ခံလိုက်ပြီးနောက် ဖုန်းပုကြွယ်က တိုက်ရိုက် ပြောကြားလိုက်သည်။

“မင်း ဒီနေ့ စောစောနိုးတယ်နော်”

“ရှောင်လင်နဲ့ ရှောင်တန်တို့က သတ်ဖြတ်ခြင်းဂိမ်းကို ထပ်ပြီး သွားကစားနေကြတယ်”

ရီရူယွီက ပြန်လည်ဖြေကြားလိုက်သည်။

“ကျွန်မတို့ အရင်တန်းစီလိုက်ရအောင်”

“အာ... သူတို့နှစ်ယောက်က ဒီနောက်ပိုင်း အတူတူအချိန်ဖြုန်းတာ များနေသလိုပဲနော်...”

ဖုန်းပုကြွယ်က ဖြည့်စွက်ပြောလိုက်သည်။

“ရှင် ဘာပြောချင်နေတာလဲ”

ရီရူလီသည် သူမထုံးစံအတိုင်း အေးစက်သောလေသံဖြင့် မေးလိုက်၏။

“ဘာမှမဟုတ်ပါဘူး... သာမန်ပြောလိုက်တာပါ”

ဖုန်းပုကြွယ်သည် အကြောင်းပြချက်မရှိ ရုတ်တရက် ထိတ်လန့်သွားရပြီး စကားပြောနှုန်း မြန်သွားကာ အရှက်ပြေ ရယ်မောလိုက်လေသည်။

“ဟွန်း...”

ရီရူလီသည် အနည်းငယ် ထူးဆန်းသော ရယ်သံတစ်ခုကို ပြုလုပ်လိုက်သည်။ ယင်းမှ လုံးဝ အေးစက်သော ရယ်သံမျိုး မဟုတ်ဘဲ... ထူးခြားသောကျေနပ်မှုကို အရိပ်အမြွက် ပြသနေသကဲ့သို့ ရှိလေသည်။

...

တစ်ချိန်တည်းတွင် လက်တွေ့ကမ္ဘာရှိ အိပ်မက်ကုမ္ပဏီ၏ ရုံးချုပ်၌ ဖြစ်သည်။

အဆောက်အအုံတစ်ခုလုံးတွင် အကြီးဆုံးဖြစ်သော ရုံးခန်းအတွင်း၌ ဝူဒီသည် အမှုဆောင်ကုလားထိုင်ပေါ်တွင် သက်တောင့်သက်သာ မှီထိုင်ရင်း ၇၀ လက်မ LCD တီဗီပေါ်တွင် စစ်တုရင်ကစားပွဲတစ်ခုကို ကြည့်ရှုနေလေသည်...။

“သာမန်လူတွေ စစ်တုရင်ကစားတာကို ကြည့်ရတာ စိတ်ဝင်စားဖို့ကောင်းလို့လား”

ဗင်းဆင့်၏ ပုံရိပ်က စားပွဲ၏ ဆန့်ကျင်ဘက်တွင် ရုတ်တရက် ပေါ်ထွက်လာခဲ့သည်။

“ဟီးဟီး... ငါက သူတို့ ဂိမ်းကစားတာကို ကြည့်နေတာ မဟုတ်ဘူး”

ဝူဒီက ပြန်လည်ဖြေကြားလိုက်သည်။

“ငါ သူတို့ကို စောင့်ကြည့်ရင်း သူတို့ရဲ့ တွေးခေါ်မှုပုံစံတွေကို နားလည်အောင် ကြိုးစားနေတာပါ”

“ ‘လူသားသဘာဝ’ ကို မြင်ချင်လို့လား”

ဗင်းဆင့်က ရယ်မောလိုက်သည်။

“စခရင်တစ်ခုရှေ့မှာ ထိုင်နေရုံနဲ့တော့ အဲ့လိုအရာမျိုးကို မြင်နိုင်ဖို့ မလွယ်ကူဘူးနော်”

“မင်း ဒီကိုလာတာက ငါတီဗီကြည့်နေတာကို တားဖို့သက်သက်ပဲလား”

ဝူဒီက လှမ်းမေးလိုက်သည်။

“ငါ မင်းနဲ့ လာအတည်ပြုတာပါ...”

ဗင်းဆင့်က ဆိုသည်။

“မင်း ဒီဗျူဟာအပေါ်မှာ တကယ် ယုံကြည်မှု ရှိရဲ့လား”

“ဟီးဟီးဟီး... အဲ့ဒါက တကယ့်ကို ပျင်းစရာကောင်းတဲ့ မေးခွန်းတစ်ခုလို့ မထင်ဘူးလား...”

ဝူဒီ ရယ်မောလိုက်၏။

“ဟုတ်ပါတယ်... မင်းက အမြဲတမ်း ယုံကြည်မှု ရှိနေတာပဲ...”

ဗင်းဆင့် သက်ပြင်းချလိုက်သည်။

“ဒါပေမဲ့... မင်း တစ်ခုခုကို လျစ်လျူရှုထားမိနေသလား”

သူ ခဏ ရပ်လိုက်သည်။

“တိုက်ခိုက်လိုတဲ့ စိတ်ဆန္ဒက လူသားတွေရဲ့ အန္တရာယ်အရှိဆုံး စွမ်းရည်တွေထဲက တစ်ခုပဲ... ‘အထူးဖိတ်ကြားခံရတဲ့ ကစားသမား’ နဲ့ ‘မျိုးစေ့ကစားသမား’ ဆိုတဲ့ ဝေါဟာရတွေက အရမ်းကို ထင်သာမြင်သာ ရှိမနေဘူးလား၊ တကယ်လို့ မင်းသာ အဲ့ဒီဆယ်ယောက်ကို ပိုးကောင်များတိုက်ပွဲ ကနေ ရိုးရိုးသားသား စတင်ခွင့်ပြုခဲ့မယ်ဆိုရင် သူတို့က အတားအဆီးအားလုံးကို အလွယ်လေး ကျော်ဖြတ်ပြီး လိပ်ပြာတိုက်ပွဲကို ဖြတ်ကျော်လာမှာပဲ၊ ထိပ်တန်း ငါးဆယ်စာရင်းထဲကို ဝင်နိုင်မှာ သေချာပါတယ်၊ ဒါပေမဲ့ အခု... ဒီနည်းလမ်းကိုသုံးပြီး သူတို့ကို လိပ်ပြာတိုက်ပွဲမှာ တိုက်ရိုက် ကစားခွင့်ပြုလိုက်တဲ့အတွက် မမျှော်လင့်ထားတဲ့ အခြေအနေတွေ ဖြစ်လာနိုင်တဲ့ အခွင့်အရေး ရှိသွားပြီ”

“နိုး နိုး နိုး...”

ဝူဒီက သူ့လက်ညှိုးကို လွှဲယမ်းလိုက်သည်။

“ဘယ်အရာကိုမှ မတော်တဆမှုလို့ ခေါ်လို့မရဘူး”

သူ ပါးစပ်ပိတ်ပြီး ခပ်ဖွဖွ ရယ်မောလိုက်သည်။

“ဟီးဟီးဟီး... တစ်ဖက်လူက သူတို့ကို တန်ဖိုးထားတာပဲဖြစ်ဖြစ်၊ အထင်သေးတာပဲဖြစ်ဖြစ်၊ အနိုင်ရတာက အနိုင်ရတာပဲ၊ ရှုံးနိမ့်သူက ဘာမှမဟုတ်ဘူး၊ အောင်နိုင်သူကပဲ သန်မာသူ ဖြစ်တယ်”

သူ ဗင်းဆင့်ဘက်သို့ လှည့်လိုက်သည်။

“သမိုင်းတစ်လျှောက်၊ မရေမတွက်နိုင်တဲ့ ကမ္ဘာတွေမှာ... အခြားသူတွေကို နင်းခြေနိုင်သူတွေက အမြဲတမ်း ထူးခြားတဲ့စွမ်းရည်ရှိသူတွေသာ ဖြစ်တယ်၊ အားနည်းသူတွေက သန်မာသူတွေအပေါ်မှာပဲ မှီခိုနိုင်ပြီး သူတို့ကို အမြဲတမ်း ကိုးကွယ်အားကျနေကြရတာပဲ၊ တကယ်လို့ သူတို့က အဲ့ဒီမြင့်မြတ်တဲ့ ရာထူးနေရာကို လောဘတက်ချင်တယ်ဆိုရင် သူတို့မှာ ထိုက်တန်တဲ့ အရည်အချင်းနဲ့ ခွန်အား ရှိမရှိ အရင်ဆန်းစစ်ရလိမ့်မယ်”

“ဟဲ...”

ဗင်းဆင့်က ရယ်မောလိုက်သည်။

“ဒါက ဆိုင်မွန်ရဲ့ အယူအဆနဲ့ တူလှချည်လား”

“ဘာလို့လဲဆိုတော့ ဒါက ငါပြောတဲ့ စကားမို့လို့ပဲ... ငါ ဒီမနက်တင် ဝူဒီကို ပြောခဲ့တာလေ”

ဆိုင်မွန်၏ အသံ ထွက်ပေါ်လာလေသည်။ အချိန်အတော်ကြာပြီးနောက် သူသည် ကြမ်းပြင်မှ မျက်နှာကြက်အထိ မြင့်မားသော မှန်ပြတင်းပေါက်ကြီး၏ ဘေးတွင် လက်နှစ်ဖက်ကို အိတ်ကပ်ထဲထည့်ကာ ရပ်နေပြီး ပြင်ပရှိ စည်ကားလှသော မြို့ပြညရှုခင်းကို တည်ငြိမ်စွာ ငေးကြည့်နေခဲ့သည်။

“မင်းက တကယ်ကြီး ထင်နေတာလား... အမြဲတမ်း တ‘ဟီးဟီး’ လုပ်နေတဲ့ကောင်က ငါ့ခွင့်ပြုချက်မရှိဘဲ လှုပ်ရှားမှုတစ်ခုခု လုပ်ရဲမယ်တဲ့လား”

“အင်း... နားလည်ပါပြီ”

ဗင်းဆင့်က ဆိုသည်။

“ဒိုင်လူကြီးရဲ့ အမြင်အရဆိုရင်တော့ ဒီဆယ်ယောက်က ပိုးကောင်များတိုက်ပွဲကို ဒီလောက်အထိ လျှို့ဝှက်စတင်ခဲ့တာက တခြားကစားသမားတွေအတွက် မမျှတဘူးလို့ ထင်ရတယ်”

“ဟီးဟီးဟီး... ဒါကြောင့်... အကျိုးမရှိတဲ့ ‘မတော်တဆမှုတွေ’ အတွက် စိတ်ပူနေမယ့်အစား မင်းတို့အနေနဲ့ ဒီတစ်ကြိမ်တော အော်ရီဂျင်ရဲ့ စွမ်းဆောင်ရည်ကို စောင့်ကြည့်နေသင့်တယ်...”

ဝူဒီက သူ၏ တောက်ပြောင်နေသော မျက်မှန်ကို လက်ခလယ်ဖြင့် ပင့်တင်လိုက်ရင်း သူ့လုပ်ဖော်ကိုင်ဖက်နှစ်ဦးကို ပြောကြားလိုက်သည်။

“မင်းတို့လည်း ဖုန်းပုကြွယ်အနေနဲ့ ဒါကို ‘လုပ်နိုင်မလား’ ဆိုတာ မြင်ချင်နေကြတာပဲ မဟုတ်လား... ဟီးဟီးဟီးဟီး...”