အခန်း ၄၁၂

အခန်း ၄၁၂ - ခြိမ်းခြောက်မှု အသင့်ရှိနေခြင်း

ဂျပန်နိုင်ငံ၌ ဓာတ်ရောင်ခြည် တစ်မျိုးမျိုးကြောင့် မျိုးဗီဇပြောင်းလူသားများ ပေါ်ထွက်လာခဲ့လေပြီ။ လက်ရှိတွင် ဂျပန်နိုင်ငံသည် မျိုးဗီဇပြောင်းလူသားများအဖွဲ့တစ်ဖွဲ့ကို ဖွဲ့စည်းထားပြီး ဖြစ်၏။

"ဟားဟား... မစ္စတာယာမာဂါမီ... ငါတို့ရဲ့ မျိုးဗီဇပြောင်းလူသားများအဖွဲ့ အသင့်ဖြစ်ပြီလား" ရိုးရာဝတ်စုံကို ဝတ်ဆင်ထားသော အဘိုးအိုတစ်ဦးက မေးလိုက်သည်။

"ပြီးပါပြီ... မျိုးဗီဇပြောင်းလူသားများအဖွဲ့က အရမ်းကို အောင်မြင်ခဲ့ပါတယ်... ဒါက ကမ္ဘာပေါ်မှာ အင်အားအကြီးဆုံး အဖွဲ့ ဖြစ်လာလိမ့်မယ်... ဒါကကမ္ဘာပေါ်က အထူးတပ်ဖွဲ့အားလုံးကို သုတ်သင်ပစ်ဖို့ လုံလောက်တယ်" ယာမာဂါမီက ယုံကြည်မှုအပြည့်ဖြင့် ပြောလိုက်၏။

"အင်း... အရမ်းကောင်းတယ်... ဒီလိုဆိုရင် ငါတို့ တာ့ရှားနဲ့ ရှိနေတဲ့ ရန်ငြိုးဟောင်းတွေကို ရှင်းပစ်သင့်ပြီ... တာ့ရှားက နှစ်ပေါင်းများစွာ ငါတို့ကို လွှမ်းမိုးထားခဲ့တာ... အခု ငါတို့မှာ ဒီမျိုးဗီဇပြောင်းလူသားများအဖွဲ့ ရှိနေပြီဆိုတော့ သဘာဝကျကျပဲ သူတို့ကို ပြဿနာသွားရှာကြမယ်... သူတို့က ကုသရေးနည်းပညာတွေနဲ့ သူတို့ရဲ့ အဆင့်မြင့်နည်းပညာအားလုံးကို ငါတို့ဆီ ပေးပို့ရမယ်... ဒါမှမဟုတ်ရင်တော့ မျိုးဗီဇပြောင်းလူသားများအဖွဲ့ရဲ့ စွမ်းအားက သူတို့ရဲ့ စိတ်ကူးယဉ်နိုင်စွမ်းထက် ကျော်လွန်နေလိမ့်မယ်" အဘိုးအိုက ရက်စက်ကြမ်းကြုတ်စွာ ပြောလိုက်ချေသည်။

သူတို့သည် လွန်ခဲ့သော အချိန်အတော်ကြာကတည်းက လူတစ်စုအပေါ် စမ်းသပ်မှုများ စတင်ပြုလုပ်ခဲ့ကြပြီး နောက်ဆုံးတွင် လွန်ခဲ့သည့် ရက်အနည်းငယ်က မျိုးဗီဇပြောင်းလဲနေသူများကို အောင်မြင်စွာ ခွဲခြားသတ်မှတ်နိုင်ခဲ့ကြသည်။ ဤမျိုးဗီဇပြောင်းလူသားများသည် သာမန်လူသားများထက် အဆနှစ်ဆယ်ခန့် ပိုမိုမြန်ဆန်ပြီး ပိုမိုသန်မာကာ တုံ့ပြန်နိုင်စွမ်း ပိုကောင်းကြပေသည်။

သာမန်လူတစ်ဦးသည် ပေါင် ၁၀၀ အလေးချိန်ရှိသော ပစ္စည်းကို မနိုင်သော်လည်း မျိုးဗီဇပြောင်းလူသားများမှာမူ တန်ချိန်ရှိသော ပစ္စည်းတစ်ခုကို လွယ်ကူစွာ မတင်နိုင်ကြ၏။ ထို့အပြင် အလွန်ဆိုးရွားသော အခြေအနေများအောက်တွင် ထိုစွမ်းဆောင်ရည်မှာ နှစ်ဆ တိုးလာနိုင်သေးသည်။ ယခုမှ အသစ်ဖွဲ့စည်းလိုက်သော တပ်ဖွဲ့သည် လုပ်ကြံသတ်ဖြတ်မှုများအတွက် ပြီးပြည့်စုံလွန်းလှပေသည်။ မည်သူကမျှ သူတို့ကို တားဆီးနိုင်မည်မဟုတ်ချေ။

"ပြီးတော့ စမစ်ကို အကြောင်းကြားလိုက်... ဒီနေ့ကစပြီး ငါတို့ မဟာဂျပန်နိုင်ငံသားတွေက သူတို့ရဲ့ အမိန့်တွေကို ဆက်ပြီး နာခံမှာ မဟုတ်တော့ဘူး... သူတို့ကို ဒီကနေ ထွက်သွားဖို့ ပြောလိုက်... မဟုတ်ရင် ငါ ရိုင်းစိုင်းတယ်လို့ မအပြစ်မတင်နဲ့" အဘိုးအိုက ဆက်ပြောလေသည်။

"ဟုတ်ကဲ့ပါ... ဆရာ... အခု မျိုးဗီဇပြောင်းလူသားများအဖွဲ့က ဘယ်လိုစစ်ဆင်ရေးမျိုး လုပ်ဖို့ လိုအပ်ပါသလဲ" ယာမာမိုတိုက မေးလိုက်၏။

"တာ့ရှားကို သွား... အချိန်ကျလာရင် သူတို့ကို သဘာဝကျကျပဲ တာဝန်တွေ ပေးလိမ့်မယ်" အဘိုးအိုက ဖြည်းညှင်းစွာ ပြောလိုက်သည်။

တာ့ရှား၏ မှောင်မိုက်သော ညဉ့်ယံ၌ စုယွမ်နှင့် သူ၏အဖော်နှစ်ဦးတို့သည် ခွန်းလွန်းမှ ပျံသန်းလာခဲ့ကြပြီးဖြစ်သည်။ ပျံသန်းရေးဝတ်စုံများမှာ မယုံနိုင်လောက်အောင် မြန်ဆန်လှသဖြင့် သူတို့သုံးဦးစလုံးကို အတော်လေး စိတ်လှုပ်ရှားဖွယ်ကောင်းသော ခံစားမှုကို ပေးစွမ်းနိုင်ခဲ့လေသည်။

ပျံသန်းနိုင်စွမ်းကို ကျွမ်းကျင်ပိုင်နိုင်ခြင်းသည် လူသားတို့၏ တစ်သက်တာ အိပ်မက်တစ်ခု ဖြစ်၏။ ပျံသန်းခြင်းကို ကျွမ်းကျင်ပိုင်နိုင်ခြင်းသည် နတ်ဘုရားတစ်ပါးနှင့်တူသော တည်ရှိမှုတစ်ခု ဖြစ်လာခြင်းပင်တည်း။

"အချိန်လည်း လင့်နေပြီ... သူတို့အားလုံး အနားယူနေကြပြီလို့ ငါ ထင်တယ်... ဒါပေမဲ့ ဒါက အရေးပေါ်ကိစ္စဖြစ်နေတော့ အနှောင့်အယှက်ပေးမိတာကို ခွင့်လွှတ်မှာပါ" စုယွမ်က ပြောလိုက်သည်။

ကျောက်ထျန်းက ခေါင်းညိတ်လိုက်ပြီးနောက် တိုက်ရိုက် ဆင်းသက်လိုက်၏။

"ဘယ်သူလဲ" ပတ်ဝန်းကျင်ရှိ လူများက တစ်စုံတစ်ယောက် ကျူးကျော်ဝင်ရောက်လာကြောင်း ချက်ချင်း သိရှိသွားကြပြီး သတိဝီရိယရှိစွာ ပြင်ဆင်လိုက်ကြလေသည်။

"ငါပါ... ကျောက်ထျန်း" ကျောက်ထျန်းက ပြောလိုက်သည်။

"ခေါင်းဆောင်ကျောက်... ကျွန်တော် ကူညီပေးနိုင်တာ တစ်ခုခု ရှိပါသလား" အစောင့်က မေးလိုက်၏။

"အင်း... မစ္စတာစုမှာ အရေးတကြီး ဖြေရှင်းစရာလေး ရှိနေလို့ပါ... ခေါင်းဆောင်ကြီးဆီ သွားပြီး ဥက္ကဋ္ဌစု ပြန်ရောက်လာပြီလို့ သွားပြောပေးပါ" ကျောက်ထျန်းက ပြောလိုက်သည်။

"ဥက္ကဋ္ဌစု လာရင် အချိန်မရွေး ဝင်လာလို့ရတယ်လို့ ခေါင်းဆောင်ကြီးက ပြောထားပါတယ်" အစောင့်က ပြန်ဖြေလိုက်၏။

ဤအချိန်၌ စုယွမ်နှင့် လီဟူတို့သည်လည်း ကောင်းကင်ထက်မှ တိုက်ရိုက် ဆင်းသက်လာကြလေသည်။ အစောင့်များ ကောင်းကင်ထက်မှ ပျံသန်းလာသည့် မြင်ကွင်းက သူတို့ကို ဆွံ့အသွားစေခဲ့သည်။

"တိမ်တိုက်တွေကို ဖြတ်သန်းပျံသန်းလာတယ်... ဒါ လူရော ဟုတ်သေးရဲ့လား"

လူတိုင်းမှာ အလွန် အံ့အားသင့်သွားကြချေသည်။ အချိန်ဖြုန်းရာကျမည်ဖြစ်သဖြင့် စုယွမ်က မည်သည့်အရာကိုမျှ ရှင်းပြရန် မရည်ရွယ်ထားပေ။

"ဒါဆို အထဲဝင်သွားကြစို့" ချက်ချင်းပင် သူတို့သုံးဦးစလုံး အတွင်းသို့ ဝင်သွားကြလေသည်။

ဤနေရာမှာ ရိုးရှင်းစွာ အလှဆင်ထားသော ခြံဝင်းတစ်ခု ဖြစ်၏။ ညဉ့်နက်နေပြီဖြစ်သော်လည်း စာကြည့်ခန်းမီးမှာ လင်းနေဆဲပင်။

"ခေါင်းဆောင်ကြီး" စုယွမ်က စာကြည့်ခန်းထဲသို့ ဝင်သွားလိုက်သည်။

"စူးလေး... မင်း ပြန်ရောက်လာပြီကိုး" ခေါင်းဆောင်ကြီးက ဝမ်းသာအားရ ပြောလိုက်၏။

"အင်း... ကျွန်တော့်ရဲ့ မြေအောက်ကမ္ဘာခရီးစဉ်က ဆယ့်ငါးရက်တောင် ကြာလိမ့်မယ်လို့ လုံးဝ မမျှော်လင့်ထားခဲ့ဘူး... နည်းနည်းတော့ ကြာသွားတယ်" စုယွမ်က ပြောလိုက်သည်။

"လာ လာ... လက်ဖက်ရည်တစ်ခွက် သောက်ပြီး နားလိုက်ဦး... ကဲ... အသုံးဝင်တဲ့ဟာ တစ်ခုခုများ ပြန်ယူလာခဲ့သေးလား" ခေါင်းဆောင်ကြီးက မေးလိုက်၏။

စုယွမ်က လက်ဖက်ရည်ခွက်ကို ယူ၍ တစ်ငုံသောက်လိုက်ပြီးနောက် ပြုံးလိုက်သည်။

"ပြန်ယူလာခဲ့ပါတယ်... အာကာသယာဉ်ပျံ(ခရူဇာ)ပါ"

"ဒါက အလင်းအမြန်နှုန်းရဲ့ အဆနှစ်ဆယ်ပုံ တစ်ပုံ မြန်နှုန်းရှိပြီး ဆီတစ်ခါဖြည့်ရုံနဲ့ နေစကြဝဠာစနစ်ကို သုံးပတ်လောက် ပတ်နိုင်တယ်... ပြီးတော့ အလွန်အစွမ်းထက်တဲ့ လေဆာအမြောက်လည်း တပ်ဆင်ထားသေးတယ်... အဲဒီအမြောက်ရဲ့ တိုက်ခိုက်မှု တစ်ချက်စီတိုင်းက နျူကလီးယားဗုံးတစ်လုံးထက် အင်အားမနည်းဘူး"

"ထပ်ပြောရရင် ဒါက မောင်းနှင်ရတာ လွယ်ကူတယ်... တာ့ရှားက လေယာဉ်မှူးတွေတောင်မှ အဲဒါကို မောင်းနိုင်ပါတယ်" စုယွမ်က အာကာသတိုက်လေယာဉ်အကြောင်းကို ဖြည်းညှင်းစွာ မိတ်ဆက်ပေးလိုက်လေသည်။

ခေါင်းဆောင်ကြီးမှာ အံ့အားသင့်သွားချေသည်။ သူသည် စစ်ရေးကိစ္စများနှင့် ပတ်သက်၍ အလွန် ဗဟုသုတကြွယ်ဝသူဖြစ်ပြီး ဤတိုက်လေယာဉ် ပေါ်ထွက်လာခြင်းက မည်သည့်အဓိပ္ပာယ်သက်ရောက်သည်ကို သိရှိထားပေသည်။ ဆိုလိုသည်မှာ မည်သူကမျှ သူတို့ကို တားဆီးနိုင်မည်မဟုတ်တော့ပေ။

"မြေအောက်ကမ္ဘာကနေ ဒီလောက် အစွမ်းထက်တဲ့ လက်နက်မျိုးကို မင်း ပြန်ယူလာလိမ့်မယ်လို့ ငါ တကယ် မမျှော်လင့်ထားခဲ့ဘူး... ဒီလို အစွမ်းထက်လက်နက်မျိုး တစ်ခုတည်း ရှိနေရင်တောင် လူတိုင်းကို ခြိမ်းခြောက်ဖို့ လုံလောက်နေပြီ" ခေါင်းဆောင်ကြီးက အာမေဍိတ်သံဖြင့် ပြောလိုက်၏။

"ဟားဟား ဟားဟား... ခေါင်းဆောင်ကြီး... ကျွန်တော် စကားပြောလို့ မပြီးသေးဘူး... ဒီအာကာသတိုက်လေယာဉ်က ကျွန်တော်တို့အတွက်တော့ အနိုင်ယူလို့မရနိုင်လောက်အောင် အစွမ်းထက်ပါတယ်... အားနည်းတဲ့ နိုင်ငံတစ်ခုဆိုရင်တောင် ဒါကိုသုံးပြီး အင်အားအကြီးဆုံး နိုင်ငံဖြစ်လာနိုင်တယ်... ဒါပေမဲ့ ကမ္ဘာ့အလယ်ဗဟိုယဉ်ကျေးမှုအတွက်တော့ ဒီအာကာသတိုက်လေယာဉ်က သူတို့ရဲ့ ယဉ်ကျေးမှုဟောင်းက ထုတ်ကုန်တစ်ခုသက်သက်ပဲ... အဆင့်နိမ့်ပြီး ခေတ်နောက်ကျနေတဲ့ ရှေးဟောင်းပစ္စည်းအကြွင်းအကျန်တစ်ခုပေါ့" စုယွမ်က ဖြည်းညှင်းစွာ ပြောလိုက်သည်။

"ဘာ... ဒါက... ဒီလောက် အစွမ်းထက်တဲ့ လက်နက်က တကယ်တော့ ရှေးဟောင်းအကြွင်းအကျန်တစ်ခုပဲလား... တကယ်လို့ ဒီအရာက ကမ္ဘာပေါ်ထွက်ပေါ်လာရင် နတ်ဘုရားတစ်ပါးလို ဖြစ်သွားမှာပဲ" ခေါင်းဆောင်ကြီးက အံ့ဩတကြီး ရေရွတ်လိုက်၏။

"ဟုတ်တယ်... ဒါက တကယ့်ကို ရှေးဟောင်းပစ္စည်းတစ်ခုပဲ... ကျွန်တော် ယူလာခဲ့တဲ့အထဲမှာ ကဏ္ဍစုံနဲ့ လုပ်ငန်းနယ်ပယ်ပေါင်းစုံ ပါဝင်တဲ့ ပစ္စည်းတွေ အများကြီး ပါသေးတယ်... ကျွန်တော့်ဆီမှာ ကမ္ဘာ့အလယ်ဗဟိုယဉ်ကျေးမှုရဲ့ အောင်မြင်မှုအားလုံး ရှိတယ်... ကျွန်တော်တို့ တာ့ရှားကသာ ဒီနည်းလမ်းအတိုင်းအဆင့်လိုက် ဖွံ့ဖြိုးတိုးတက်မှုပုံစံကို လိုက်နာနေသရွေ့ အနာဂတ်က ဆိုးရွားနေမှာမဟုတ်ဘူးလို့ ပြောလို့ရတယ်" စုယွမ်က ဆက်ပြောလေသည်။

"အင်း..." ခေါင်းဆောင်ကြီးက သူ၏ ကုလားထိုင်ပေါ်တွင် ထိုင်ကာ မိနစ်အနည်းငယ်ခန့် စဉ်းစားခန်းဖွင့်နေပြီးနောက် သူ၏မျက်လုံးများတွင် မျက်ရည်များ ပြည့်ဝလာချေသည်။

"ဒီနေ့တော့ နောက်ဆုံး ရောက်လာခဲ့ပြီပဲ... ဒီနေ့တော့ နောက်ဆုံး ရောက်လာခဲ့ပြီပဲ... ငါတို့ ဘယ်သူ့ရဲ့ မတရားဆက်ဆံမှုကိုမှ ဆက်ပြီး သည်းခံနေစရာ မလိုတော့ဘူး" ယခုအခါ ခေါင်းဆောင်ကြီးမှာ ယုံကြည်မှုများဖြင့် အပြည့်အဝ ပြည့်နှက်နေပြီဖြစ်၏။

"အင်း... ခေါင်းဆောင်ကြီး... ဒီလောက် အစွမ်းထက်တဲ့ လက်နက်ကို ငါတို့ ပိုင်ဆိုင်ထားရုံနဲ့ မလုံလောက်သေးဘူး... ကမ္ဘာတစ်ဝန်းလုံးကိုလည်း ဒါနဲ့ပတ်သက်ပြီး သိအောင် လုပ်ဖို့ လိုသေးတယ်... မဟုတ်ရင် သူတို့က ငါတို့ကို ပြဿနာတွေ ထပ်ရှာနေဦးမှာပဲ" စုယွမ်က အကြံပြုလိုက်သည်။

"အင်း... မှန်တယ်... ဒါက မဖြစ်မနေ လုပ်ရမယ့်ကိစ္စပဲ... ဂျပန်နိုင်ငံ၊ တောင်ကိုရီးယား၊ US စသဖြင့် နေရာအားလုံးကို သွားရောက်ရမယ်... တကယ်လို့ အားလုံး အဆင်မပြေခဲ့ရင် သူတို့ကို သင်ခန်းစာပေးလိုက်မယ်"

"ဒါနဲ့... ဒီမှာ ငါ့ဆီမှာ စာရင်းတစ်ခု ရှိတယ်... အဲဒီစာရင်းထဲမှာ ငါတို့ကို ဆန့်ကျင်ဖို့ ပူးပေါင်းကြိုးပမ်းနေတဲ့ နိုင်ငံတွေနဲ့ အဓိကပစ်မှတ်ထားရမယ့် ဝန်ထမ်းတွေရဲ့ နာမည်တွေ ပါတယ်... သူတို့က ငါတို့ပေးထားတဲ့ ကုသမှုတွေကို အခမဲ့ပေးအပ်စေချင်နေကြတာ... ဒီနိုင်ငံတွေကို ခြိမ်းခြောက်ဖို့အတွက် ဒါကို ငါတို့ အသုံးချနိုင်တယ်" ခေါင်းဆောင်ကြီးက ဆုံးဖြတ်ချက်ချလိုက်လေသည်။

"အင်း... ဒီတာဝန်ကို ကျွန်တော် ကိုယ်တိုင်ပဲ ယူသင့်တယ်လို့ ထင်တယ်" စုယွမ်က စေတနာ့ဝန်ထမ်းအဖြစ် တောင်းဆိုလိုက်၏။

"ရတာပေါ့... အခုလောလောဆယ် ဒီပစ္စည်းကိရိယာတွေနဲ့ အရင်းနှီးဆုံးက မင်းပဲ ရှိတာဆိုတော့ မင်းက အသင့်တော်ဆုံးပါပဲ... ပြီးတော့... ဂျပန်နိုင်ငံက မကြာသေးခင်ကမှ ဆူပူအုံကြွမှုတွေ အများကြီး လုပ်နေတယ်... သူတို့က မျိုးဗီဇပြောင်းလူသားတွေကို မွေးထုတ်ဖို့ နည်းလမ်းတချို့ကို အသုံးပြုခဲ့ကြတယ်... အဲဒီမျိုးဗီဇပြောင်းလူသားတွေက ကဏ္ဍစုံမှာ သာမန်လူတွေထက် အဆနှစ်ဆယ်လောက် ပိုစွမ်းဆောင်နိုင်ကြတယ်... ဒီလူတွေမှာ တော်တော်လေးကို ရက်စက်တဲ့ ရည်မှန်းချက်တွေ ရှိနေတယ်"

စုယွမ်က လှိုက်လှိုက်လှဲလှဲ သဘောတူလိုက်သည်။

"ဒါက နည်း​ပညာမြင့် သံခိပ်ကာဝတ်စုံတစ်စုံပါ... တကယ်လို့ အန္တရာယ်နဲ့ ကြုံလာရင် ဒါကို ဝတ်ထားလို့ရတယ်... မျိုးဗီဇပြောင်းလူသား နည်းနည်းပါးပါးကို ဖြေရှင်းဖို့ကတော့ ကလေးကစားစရာလောက်ပါပဲ" စုယွမ်က အာမခံချက်တစ်ခု ချန်ထားရစ်ခဲ့၏။

"အင်း... ဒီလို နည်း​ပညာမြင့် သံခိပ်ကာဝတ်စုံမျိုးနဲ့ဆိုရင် ငါတို့ရဲ့ လုံခြုံရေးက ပြဿနာမရှိတော့ဘူး... အဲဒီနိုင်ငံတွေကို ငါတို့ လုံလောက်တဲ့ ခြိမ်းခြောက်မှုမျိုး ပေးကိုပေးရမယ်”