အခန်း ၃၇၇

အခန်း ၃၇၇ ဓား လာစမ်း

ချန်ဖျင်အန်းသည် ဓားကြီးကို လက်နှစ်ဖက်ဖြင့် ဆုပ်ကိုင်ထားပြီး ရွှေရောင် အလင်းတန်းများကြားတွင် လွှမ်းခြုံခံထားရပေသည်။ ရွှေရောင် အလင်းတန်းများထဲတွင် သွေးနီရောင် အငွေ့အသက်များပါ ရောယှက်နေပြီး စစ်နတ်ဘုရား တစ်ပါးအလား ပြိုင်ဘက်ကင်းလောက်အောင် အစွမ်းထက်မြက်နေလေသည်။

လူအများစုမှာ သူ၏ ဤကဲ့သို့သော ဟန်ပန်ကြောင့် အကြီးအကျယ် တုန်လှုပ်သွားကြရလေသည်။

ဤသည်မှာ ချန်ဖျင်အန်းထံမှ ဤမျှ ကြီးမားသော စွမ်းအားမျိုး ထုတ်သုံးလာသည်ကို သူတို့ ပထမဆုံးအကြိမ် မြင်တွေ့ရခြင်းပင် ဖြစ်သည်။ ဤသည်ကို ကြည့်လျှင် သူ၏ ရင်ထဲ၌ မည်မျှအထိ ဒေါသထွက်နေပြီး ကျိုးဟန်ကို သတ်ဖြတ်ပစ်ချင်နေသည်ကို သိမြင်နိုင်ပေသည်။

"ဟားဟားဟား... ငါ့ရဲ့ နာမည်ကျော် သိုင်းကွက်အောက်မှာ သေရမှာဆိုတော့ မင်း တမလွန်ရောက်ရင်တောင် ပြုံးပျော်နိုင်ပြီပေါ့ကွာ..."

"ဓား လာစမ်း... ကောင်းကင်အာခံ နတ်ဆိုး..."

ချန်ဖျင်အန်းသည် မောက်မာဝင့်ကြွားစွာဖြင့် ရယ်မောလိုက်လေသည်။ ဤတစ်ကြိမ် တိုက်ခိုက်မှုသည် သူ၏ လက်ရှိ အစွမ်းအထက်ဆုံး တိုက်ခိုက်မှုဖြစ်ပြီး ဤကဲ့သို့သော အကျိုးသက်ရောက်မှုအပေါ် သူ အလွန်ပင် ကျေနပ်နေပေသည်။

မီတာတစ်ရာခန့် ရှည်လျားသော ဓားချီစွမ်းအင်သည် လေထုကို ဖြတ်တောက်သွားပြီး လေဟာနယ်ကိုပင် မျက်စိတစ်မှိတ်အတွင်း နှစ်ခြမ်းကွဲသွားစေလေသည်။ ထိုဓားချီက ကျိုးဟန်၏ ပုံရိပ်ကို လွှမ်းခြုံသွားပြီး ထက်မြက်ပြင်းထန်ကာ တားဆီး၍မရနိုင်သော အရှိန်အဝါများဖြင့် ဝင်ရောက် တိုက်ခိုက်လာလေတော့သည်။

"ကျွတ်... ကျွတ်... ကျွတ်... ဒါက ကောင်းကင်အာခံ နတ်ဆိုး ရဲ့ စွမ်းအားပါလား... အရင်ကတည်းက သတင်းကြားဖူးပေမယ့် တကယ်ကို အံ့မခန်း စွမ်းအားပဲ... ဒီနေ့ မျက်မြင်ကိုယ်တွေ့ ကြုံရတာ တကယ်ကို နာမည်နဲ့ လိုက်ဖက်လွန်းတာပဲ..."

"ဟုတ်တယ်လေ... သာမန်လောက် ကြောက်စရာကောင်းတာ မဟုတ်ဘူး... ကြယ်တစ်ပွင့် အထွတ်အထိပ် အဆင့်ကိုတောင် ထည့်ပြောစရာ မလိုဘူး... ငါထင်တာတော့ ကြယ်နှစ်ပွင့် အထွတ်အထိပ် အဆင့်နဲ့တောင် ရင်ဆိုင်လို့ ရလောက်တယ်..."

"ချန် မိသားစုရဲ့ နောက်ခံအင်အားက တကယ်ကို ကြီးမားလွန်းတာပဲကွာ... ကြယ်ကိုးပွင့် နတ်ဘုရားအဆင့် အရည်အသွေးရှိတဲ့ အဖိုးတန်ဓားဆိုတော့ လူတိုင်း သွားရည်ကျချင်စရာပဲလေ... အထွတ်အထိပ် အဆင့် အရည်အသွေးကို ရောက်ဖို့ တစ်လှမ်းပဲ လိုတော့တာ..."

ကောင်းကင်အာခံ နတ်ဆိုး ဓားသိုင်း၏ ကြောက်မက်ဖွယ်ကောင်းသော စွမ်းအားက ယခင်က တစ်ကြိမ်တစ်ခါမျှ မရှိခဲ့ဖူးသော တုန်လှုပ်မှုကြီးကို ဖြစ်ပေါ်စေခဲ့လေသည်။

ချန်ဖျင်အန်း အစွမ်းထက်ကြောင်းကို သူတို့ သိရှိထားသော်ကြသော်လည်း ဤမျှလောက်အဆင့်အထိ အစွမ်းထက်နေလိမ့်မည်ဟု လုံးဝ မထင်မှတ်ထားခဲ့ကြချေ။

ရူးသွပ်ကြမ်းတမ်းသော ဓားချီစွမ်းအင် သက်သက်ဖြင့်ပင် လွှမ်းခြုံထားသော ဧရိယာမှာ အလွန် ကျယ်ပြန့်လှပေသည်။ ၎င်းအပြင် အံ့မခန်း မြန်ဆန်လှသော အမြန်နှုန်းကြောင့် ရှောင်တိမ်းရန်မှာ လုံးဝ မဖြစ်နိုင်သလောက်ပင် ရှိလေသည်။

"ဒီကောင်ရဲ့ တိုးတက်လာတဲ့ အရှိန်က ဒီလောက်တောင် မြန်နေလိမ့်မယ်လို့ မထင်ထားဘူး..."

ရဲ့ချန်သည် အဝေးရှိ အထပ်မြင့် အဆောက်အအုံတစ်ခုပေါ်တွင် မတ်တပ်ရပ်နေပြီး ဤနေရာ၌ ဖြစ်ပျက်နေသော မြင်ကွင်းများကို တစ်ခုမကျန် စောင့်ကြည့်နေလေသည်။

ချန်ဖျင်အန်း ထုတ်သုံးလိုက်သော အစွမ်းအထက်ဆုံး သိုင်းကွက်ကို မြင်တွေ့လိုက်ရချိန်တွင် သူကိုယ်တိုင်ပင် အနည်းငယ် အံ့အားသင့်သွားခဲ့ရသည်။

"ဟူး... ဝေးလံခေါင်သီတဲ့ မြို့ငယ်လေးက လူငယ်လေး တစ်ယောက်ကိုများ ချန် မိသားစုကို ဒုက္ခပေးနိုင်မလားလို့ ငါ မျှော်လင့်နေခဲ့မိတာ..."

"တကယ်ကို ကလေးဆန်တဲ့ အတွေးပဲ..."

ရဲ့ချန်သည် ကိုယ့်ကိုယ်ကိုယ် လှောင်ပြောင်သကဲ့သို့ အနည်းငယ် ရယ်မောလိုက်လေသည်။ ထို့နောက် စက္ကူယပ်တောင်လေးကို ခတ်ရင်း အကြည့်များကို ရုပ်သိမ်းလိုက်ကာ ဆက်လက် စောင့်ကြည့်ခြင်း မပြုတော့ချေ။

"ဟန်... ရှင် ရင်ဆိုင်နိုင်ပါ့မလား..."

"ကျွန်မ အထွတ်အထိပ် အဆင့် မှော်လက်နက်ကို ထုတ်သုံးပေးရမလား..."

ပိုင်လင်းလုံက စိုးရိမ်တကြီးဖြင့် ပြောလိုက်လေသည်။

သူမကိုယ်တိုင်လည်း ယခင်က မကြုံဖူးသော ဖိအားကြီးကို ခံစားလိုက်ရပေသည်။ ထို့အပြင် ကျိုးဟန်၏ စွမ်းအားအပေါ် သူမ၏ သိရှိနားလည်ထားမှုမှာ ချန်းလဲ့ မြို့ ကာကွယ်ရေး တိုက်ပွဲ အချိန်ကာလတွင်သာ ရပ်တန့်နေခဲ့သဖြင့် ယခုကဲ့သို့ စိုးရိမ်ပူပန်သော စကားမျိုးကို ပြောထွက်လာခြင်း ဖြစ်လေသည်။

"စိတ်ချပါ... မင်းရဲ့ ယောက်ျားက တစ်ကွင်းလုံးကို ဘယ်လို မွှေနှောက်ပြမလဲဆိုတာကိုသာ စောင့်ကြည့်နေလိုက်..."

ကျိုးဟန်က ပေါ့ပါးစွာ ပြုံးလိုက်ပြီး စိတ်ချရန် အဓိပ္ပာယ်ပါသော အကြည့်တစ်ချက် ပေးလိုက်လေသည်။

ပိုင်လင်းလုံ ထံတွင် အထွတ်အထိပ် အဆင့် မှော်လက်နက် မည်သို့မည်ပုံ ရှိနေသနည်း ဆိုသည်ကိုမူ ယခု ဂရုစိုက်ရမည့် အချိန် မဟုတ်သေးချေ။

စကားပြောဆိုနေချိန်မှာပင် အားကောင်းပြင်းထန်လှသော ဓားချီစွမ်းအင်သည် အေးစက် ကြမ်းတမ်းသော အရှိန်အဝါများနှင့်အတူ ရိုက်ခတ်လာခဲ့လေပြီ။

"ဓား လာစမ်း..."

"ဧကရာဇ်သွေး ကောင်းကင်သတ်ဖြတ်ခြင်း... ငါ့အတွက် အရာအားလုံးကို ခုတ်ပိုင်းပစ်လိုက်စမ်း..."

ကျိုးဟန်က ကျယ်လောင်စွာ အော်ဟစ်လိုက်လေသည်။

ဧကရာဇ်သွေး ကောင်းကင်သတ်ဖြတ်ခြင်း ဓားသည် ဓားအိမ်ထဲမှ ထွက်ပေါ်လာသည်နှင့်တစ်ပြိုင်နက် ကြောက်မက်ဖွယ်ကောင်းသော ဓားချီစွမ်းအင်များ ပေါက်ကွဲထွက်လာလေသည်။

အဆုံးအစမဲ့သော ဖျက်ဆီးခြင်း စွမ်းအားများ လွင့်ပျံလာပြီး ၎င်းမှာ ပြိုင်ဘက်ကင်းလောက်အောင် အာဏာရှင်ဆန်သည့် မဟာဧကရာဇ် တစ်ပါး၏ အရှိန်အဝါပင် ဖြစ်လေသည်။

ဤဓားချက်က ကောင်းကင်နှင့် မြေကြီးကိုပင် တုန်လှုပ်သွားစေသည်။ ဓားချီများ ပျံထွက်လာမှုကြောင့် နေနှင့် လတို့ပင် အရောင်အဝါ ကင်းမဲ့သွားကာ ကောင်းကင်ကြီး တစ်ခုလုံး အရောင်အဆင်း ပျောက်ကွယ်သွားပြီး မီးခိုးရောင် အတိ ဖုံးလွှမ်းသွားလေသည်။

ကြမ်းတမ်း ပြင်းထန်လှသော စွမ်းအားများသည် အရပ်မျက်နှာ အနှံ့အပြားသို့ အဆက်မပြတ် ရိုက်ခတ်သွားလေသည်။

ထိုနေရာရှိ လူအများစုမှာ နှိုင်းယှဉ်၍ မရနိုင်လောက်အောင် တုန်လှုပ်ချောက်ချားသွားကြပြီး သူတို့၏ ရင်ထဲတွင် လှိုင်းလုံးကြီးများ ရိုက်ခတ်နေသကဲ့သို့ ခံစားလိုက်ကြရသည်။ ဤမျှလောက် အစွမ်းထက်သော အရှိန်အဝါမျိုး ရှိနေလိမ့်မည်ဟု လုံးဝ စိတ်ကူးမယဉ်ရဲခဲ့ကြချေ။

ဤသည်မှာ ဤကဲ့သို့ ကြောက်မက်ဖွယ်ကောင်းသော မြင်ကွင်းမျိုးကို သူတို့ ပထမဆုံးအကြိမ် မြင်တွေ့ဖူးခြင်းပင် ဖြစ်လေသည်။

"ဘုရားရေ... ဒီလူငယ်လေးက ဘယ်လို နောက်ခံမျိုး ရှိနေလို့ ဒီလောက်တောင် ကြောက်စရာ ကောင်းနေရတာလဲ..."

"ဒါက အစွမ်းထက်သူ ဆိုတဲ့ စကားလုံးနဲ့တောင် ဖော်ပြလို့ မရနိုင်တော့ဘူး... တကယ့်ကို ပြိုင်ဘက်ကင်း ထိပ်တန်း အစွမ်းထက်သူ တစ်ယောက်ပဲ..."

"သေစမ်း... အရမ်းကို မိုက်လွန်းနေပြီကွာ... ဓား လာစမ်း ဆိုတဲ့ အော်သံ တစ်ချက်နဲ့တင် ဓားချီစွမ်းအင်တွေ ကန့်လန့်ဖြတ် ထွက်ပေါ်လာတာ တကယ်ကို အံ့မခန်းပဲ..."

"သောက်ကျိုးနည်း... ဒါက ဘယ်လို အရည်အသွေးရှိတဲ့ အဖိုးတန်ဓားလဲ... အရမ်း ကြမ်းလွန်းတယ်..."

"စန်းချုန်း ဧကရာဇ် မြို့တော် က လူငယ်မျိုးဆက် ပါရမီရှင်တွေ ဆိုရင်တောင် ဒီလူငယ်လေးကို အလုံးစုံ ဖိနှိပ်ထားဖို့ဆိုတာ ခက်ခဲလောက်တယ်နော်..."

"စန်းချုန်း ဧကရာဇ် မြို့တော် ကြီးတော့ အပြောင်းအလဲတွေ ဖြစ်တော့မယ်ထင်တယ်..."

လူအများစု အံ့အားသင့် ငေးမောနေချိန်မှာပင် ဓားချီစွမ်းအင်သည် ပြိုင်ဘက်ကင်းသော အရှိန်အဝါများနှင့်အတူ ခုတ်ပိုင်းလာခဲ့လေပြီ။

ဓားတစ်ချက်ဖြင့် စကြဝဠာကို တုန်လှုပ်စေသည်။ ဓားတစ်ချက်ဖြင့် ကောင်းကင်ယံကို ဖောက်ထွင်းသွားသည်။ ဤမျှလောက်အထိ အစွမ်းထက်လွန်းလှရာ မည်သည့်အရာကမျှ တားဆီးနိုင်စွမ်း မရှိချေ။

ချန်ဖျင်အန်း ၏ ဓားချီစွမ်းအင်မှာ အလွန် ဝေးကွာသော အကွာအဝေးမှာပင် ကျိုးဟန် ၏ ဓားချီစွမ်းအင်ကြောင့် အစိတ်စိတ်အမွှာမွှာ ကွဲအက်သွားခဲ့လေသည်။

ဆက်လက်၍ သူ၏ လက်ထဲရှိ ကြယ်ကိုးပွင့် နတ်ဘုရားအဆင့် အရည်အသွေးရှိ ရွှေရောင် ဝိညာဉ်ပိုင်းဖြတ် ဓားသည်လည်း ကြယ်ငါးပွင့် အထွတ်အထိပ် အဆင့် အရည်အသွေးရှိ ဧကရာဇ်သွေး ကောင်းကင်သတ်ဖြတ်ခြင်း ဓား၏ အောက်တွင် ခုခံနိုင်စွမ်း လုံးဝ မရှိတော့ဘဲ မျက်စိတစ်မှိတ်အတွင်းမှာပင် ရေတွက်၍ မရနိုင်သော အပိုင်းအစများအဖြစ် ပေါက်ကွဲ ထွက်သွားလေတော့သည်။

"မဖြစ်နိုင်ဘူး... ဒါ လုံးဝ မဖြစ်နိုင်ဘူး..."

"ငါ ချန်ဖျင်အန်း တစ်သက်လုံး လွှမ်းမိုးလာခဲ့တာ... လုံးဝ မကျေနပ်ဘူးကွာ..."

သူ၏ အံ့အားသင့် ထိတ်လန့်နေသော စကားသံများ ဆုံးအောင် မပြောရသေးမီမှာပင် ဓားချီစွမ်းအင်၏ ရက်စက်စွာ ခုတ်ထစ်မှုကြောင့် အပိုင်းအစများအဖြစ် ပြောင်းလဲသွားခဲ့လေသည်။

သို့သော် ဤမျှနှင့် မပြီးဆုံးသေးချေ။

ဓားချီစွမ်းအင်မှာ ချက်ချင်း ရပ်တန့်သွားခြင်း မရှိဘဲ မီတာ တစ်ထောင်ကျော် အထိ ဆက်လက် ပျံသန်းသွားကာ မရေမတွက်နိုင်သော အဆောက်အအုံများကို ဖျက်ဆီးပစ်လိုက်လေသည်။

ကျူချွဲ လမ်းမကြီး တစ်ခုလုံး လုံးဝ ပျက်စီးသွားခဲ့ပြီး မူလက ညီညာနေသော မြေပြင်မှာ ချောက်ကမ်းပါးကြီး တစ်ခုအဖြစ် ပြောင်းလဲသွားလေတော့သည်။

"ကျွတ်... ဒီ ဖျက်ဆီးနိုင်စွမ်းကြီးက... ကျိုးဟန်က တကယ်ကို ဘယ်လို နတ်ဘုရားမျိုးလဲကွာ..."

"ပါရမီရှင် အဆင့်စာရင်း ထိပ်ဆုံး ဆယ်ယောက်ထဲမှာ ပါဝင်တဲ့ ချန်ဖျင်အန်း က ဒီလိုပဲ သေသွားတာလား... ဒါတွေ အားလုံးက တကယ်ကို အိပ်မက်တစ်ခုလိုပဲ..."

"ဒါ... ဝါရင့် ထိပ်တန်း အစွမ်းထက်သူ အများစုတောင် ဒီလောက် ကြောက်စရာကောင်းတဲ့ စွမ်းအားမျိုး ရှိမှာ မဟုတ်ဘူးနော်..."

"ဒါကြောင့် သူက အစကနေ အဆုံးထိ ဒီလောက် တည်ငြိမ်နေတာကိုး..."

ပျက်စီးယိုယွင်းကာ မူလပုံစံပင် မရှိတော့သည့် နေရာကို ကြည့်ရင်း လူအများစု၏ ရင်ထဲရှိ တုန်လှုပ်မှုများသည် ထိတ်လန့် ကြောက်ရွံ့မှုများအဖြစ်သို့ ပြောင်းလဲသွားခဲ့လေပြီ။ ဤသည်မှာ လုံးဝကို ပြိုင်ဘက်ကင်းလောက်အောင် အစွမ်းထက်လွန်းလှပေသည်။

"မင်းမှာ ဒီလို စွမ်းအားမျိုး ရှိနေလိမ့်မယ်လို့ မထင်ထားဘူး..."

အဝေးတွင် ရှိနေသော ရဲ့ချန် ၏ မျက်လုံးများ ကျဉ်းမြောင်းသွားလေသည်။ သူကိုယ်တိုင်ပင် အနည်းငယ် ခြိမ်းခြောက်ခံနေရသည့် ခံစားချက်ကို ခံစားလိုက်ရပေသည်။

"အရမ်းကောင်းတယ်..."

"တခြား အင်အားစုတွေကို ရင်ဆိုင်ဖို့ ငါ့ရဲ့ ကိရိယာလေး တစ်ခု ဖြစ်လာဖို့ အချိန်ကိုက်ပဲ..."

ရဲ့ချန် ၏ မျက်နှာပေါ်တွင် ပျော်ရွှင်သော အပြုံးတစ်ခု ထွက်ပေါ်လာပြီး သူ၏ ခေါင်းထဲတွင် အကြံအစည် ပေါင်းများစွာ ပေါ်ပေါက်လာလေသည်။ ထို့နောက် သူသည် လူအုပ်ကြီးထဲတွင် ပျောက်ကွယ်သွားလေတော့သည်။

"ဟန်... ရှင် အရမ်းကို အစွမ်းထက်လွန်းတယ်နော်..."

ရင်ခွင်ထဲရှိ ပိုင်လင်းလုံ ၏ လှပသော မျက်ဝန်းလေးများတွင် လှိုင်းကြက်ခွက်လေးများ ထသွားလေသည်။ ကျိုးဟန် ၏ စွမ်းအားက အဘယ်ကြောင့် ဤမျှ မြန်ဆန်စွာ တိုးတက်လာရသနည်း ဆိုသည်ကို မည်သို့ တွေးတောရမှန်းပင် သူမ နားမလည်နိုင်အောင် ဖြစ်နေလေသည်။

မူလက သူမကိုယ်တိုင်၏ စွမ်းအားများ တိုးတက်လာမှုကြောင့် အလွန် ဂုဏ်ယူ ဝမ်းသာနေခဲ့သည်။ သို့သော် ကျိုးဟန် နှင့် နှိုင်းယှဉ်လိုက်သောအခါ လုံးဝကို ဖိနှိပ်ခံလိုက်ရလေသည်။

သို့သော် ကံကောင်းထောက်မစွာပင် သူသည် သူမ အလွန် ချစ်မြတ်နိုးရသော အမျိုးသား ဖြစ်နေသဖြင့် ရင်ထဲတွင် မသက်မသာ ဖြစ်မနေဘဲ ပို၍ပင် ပျော်ရွှင်နေမိလေသည်။

"ဟားဟားဟား... ခွန်အား တစ်ဆယ်ရာခိုင်နှုန်းလောက်တောင် မသုံးရသေးဘူးကွ..."

ကျိုးဟန်က ပေါ့ပါးစွာ ပြောလိုက်လေသည်။

တကယ်တမ်းတွင်မူ သူ အနည်းငယ် ထိန်းချုပ်ထားနိုင်ခဲ့သည်။ သို့သော် ထိုသို့ ပြုလုပ်ရန် မလိုအပ်ဟု သူ ခံစားလိုက်ရသည်။

မိမိ၏ စွမ်းအားကို အနည်းငယ်မျှ ထုတ်ဖော်ပြသကာ လူမိုက်များကို ခြိမ်းခြောက်ထားခြင်း မရှိပါက ပိုမို များပြားသော ကောင်များ လာရောက် ရန်စကြမည်မှာ သေချာလှပြီး ပြဿနာများ အလွန် များပြားလာပေလိမ့်မည်။

ထို့ကြောင့် ဤနည်းလမ်းကသာ အလုပ်အရှုပ် သက်သာစေမည့် အကောင်းဆုံး နည်းလမ်းပင် ဖြစ်သည်။ ပိုင်လင်းလုံ ထံမှ ကိုးကွယ် ယုံကြည်သည့် အကြည့်များကို မြင်တွေ့လိုက်ရသောအခါ ကျိုးဟန် ၏ ရင်ထဲတွင် အလွန် ကြည်နူး သာယာသွားလေတော့သည်။

လမ်းမကြီး၏ အဆုံးတွင် ထက်မြက် ကြမ်းကြုတ်သော သတ်ဖြတ်ခြင်း အရှိန်အဝါများ ထွက်ပေါ်နေသည့် ထိပ်တန်း အထူးတပ်ဖွဲ့ တစ်ခု ရှိနေလေသည်။ ၎င်းတို့မှာ စန်းချုန်း ဧကရာဇ် မြို့တော် ၏ အစောင့်တပ်ဖွဲ့ ဖြစ်သော ပျံသန်းနေသော ဝက်ဝံ တပ်ဖွဲ့ ပင် ဖြစ်ပေသည်။

သူတို့သည် ဧကရာဇ် မြို့တော် ၏ လုံခြုံရေးနှင့် တည်ငြိမ်ရေးကို ထိန်းသိမ်းရန် တာဝန်ယူထားကြသူများ ဖြစ်သည်။

"သခင်ကြီး... ကျွန်တော်တို့ သွားပြီး ဖမ်းဆီးရမလား..."

စစ်သည် တစ်ဦးက အလယ်ဗဟိုရှိ ခန္ဓာကိုယ် တောင့်တင်း ထွားကျိုင်းလှသော တပ်မှူးကြီး ကို ကြည့်ကာ မေးလိုက်လေသည်။

"လောစရာ မလိုသေးဘူး... အခြေအနေကို စောင့်ကြည့်ရအောင်... တပ်ဖွဲ့ငယ် တစ်ခုကို လွှတ်ပြီး ကျိုးဟန်ကို အနီးကပ် နောက်ယောင်ခံ လိုက်ခိုင်းထား..."

တပ်မှူးကြီး ၏ မျက်ဝန်းများထဲတွင် နက်ရှိုင်းသော ကြောက်ရွံ့မှုများ ရှိနေပြီး အလျင်စလို လှုပ်ရှားခြင်း မပြုခဲ့ချေ။

မည်သို့ပင်ဆိုစေ သူတို့သည် လုံခြုံရေးကို တာဝန်ယူထားရသဖြင့် ခမ်းနား ထည်ဝါလှသော်လည်း ထိုအရာများ အားလုံးမှာ သာမန် လူများအပေါ်တွင်သာ သက်ရောက်မှု ရှိပေသည်။

ကျိုးဟန် ကဲ့သို့သော အလွန် အစွမ်းထက်သည့် ထိပ်တန်း သိုင်းပညာရှင် မျိုးကိုမူ သူတို့၏ အသက်လေး ရှည်ချင်သေးသဖြင့် အလျင်စလို သွားရောက် ရင်ဆိုင်မည် မဟုတ်ချေ။ အကယ်၍ သွားရောက် ရင်ဆိုင်မိပါက မည်သည့် အရာများ ဖြစ်လာမည်ကို မသိနိုင်ပေ။

"ဒီကောင်လေးကို သဘာဝကျကျ ရင်ဆိုင်မယ့်သူ ရှိလာမှာပါ... ငါတို့က လောလောဆယ် စိတ်ပူနေစရာ မလိုသေးဘူး..."

တပ်မှူးကြီး ၏ အကြည့်များက အလျင်စလို ထွက်ပြေးသွားကြသော ပုံရိပ် အချို့ထံသို့ ရောက်ရှိသွားလေသည်။ ထိုသူများမှာ ချန် မိသားစု မှ မျိုးဆက်များပင် ဖြစ်လေသည်။

ထို့ကြောင့် ချန် မိသားစု အနေဖြင့် လုံးဝ ကျေနပ်နေမည် မဟုတ်ကြောင်း သေချာလှပေသည်။ အကယ်၍ သူတို့ကသာ ကျိုးဟန် ကို သတ်ဖြတ်နိုင်ခဲ့မည် ဆိုပါက သူတို့ ပျံသန်းနေသော ဝက်ဝံ တပ်ဖွဲ့ အနေဖြင့်လည်း တာဝန် ပျက်ကွက်သည်ဟု ဆို၍ မရနိုင်တော့ချေ။

အကယ်၍ မသတ်ဖြတ်နိုင်ခဲ့ပါက ချန် မိသားစု ပင်လျှင် ရင်မဆိုင်နိုင်သော သူတစ်ယောက်ကို သူလို တပ်မှူးကြီး တစ်ယောက်အနေဖြင့် ပို၍ပင် နည်းလမ်း မရှိနိုင်တော့ပေ။

ထို့ကြောင့် တပ်မှူးကြီး မှာ အလွန် ဉာဏ်ကောင်းစွာဖြင့် ဝင်ရောက် စွက်ဖက်ခြင်း မပြုခဲ့ပေ။

သေချာပေါက် ဤသည်မှာ ကျိုးဟန် က အစွမ်းထက်သော တိုက်ခိုက်ရေး စွမ်းအားများကို ထုတ်ဖော်ပြသခဲ့ခြင်းကြောင့် ဖြစ်ပေါ်လာသည့် သက်ရောက်မှုပင် ဖြစ်သည်။ ထိုသို့မဟုတ်ပါက ဤ ပျံသန်းနေသော ဝက်ဝံ တပ်ဖွဲ့ မှာ သေချာပေါက် ထွက်ပေါ်လာမည် ဖြစ်လေသည်။

ကျိုးဟန် သည် အချိန်ဆွဲမနေတော့ဘဲ မျက်မမြင် ဓားသမား ၏ နေအိမ်ကို တိုက်ရိုက် ရှာဖွေလိုက်လေသည်။

"သူရဲကောင်းကြီး... မင်း နောက်ဆုံးတော့ ရောက်လာပြီပဲ…”