အခန်း ၁၂၃

အခန်း (၁၂၃)

"ချင်ဟွိုင်ယွီ မင်း ဘယ်လိုဖြစ်လို့ ဒီအချိန်ကြီး ရောက်လာရတာလဲ"

ချင်ဟွိုင်ယွီ၏ မျက်ဝန်းထဲရှိ ညစ်ညမ်းသော အရာသည် တပ်မက်မှုမီးတောက်ဖြစ်ကြောင်း ချန်ကောဟွားက သဘာဝကျကျပင် မသိရှိပေ။

မနက်ပိုင်းက ချင်ဟွိုင်ယွီကို ထမင်းစားပြီးမှ အိမ်မှုကိစ္စလုပ်ရန် လာခဲ့ဟု သူ ပြောထားခဲ့သော်လည်း ယခု အလုပ်ဆင်းခါစ ထမင်းပင် မချက်ရသေးသည့်အချိန်တွင်ပင် သူမ ရောက်ရှိလာသဖြင့် ရင်ထဲတွင် အနည်းငယ် စပ်စုချင်စိတ် ဖြစ်ပေါ်လာသည်။

"အဲ… ဒီလိုပါ ချန်ကောဟွား"

ချင်ဟွိုင်ယွီက နူးညံ့ပျော့ပျောင်းစွာ ပြောလိုက်သည်။ သူမ မယုံကြည်နိုင်ပေ၊ ရှားကျူးဖြစ်စေ ရွှီတမောင်းဖြစ်စေ အသက်အရွယ်ကြီးရင့်နေပြီဖြစ်သော ဦးလေးကြီးရီပင်ဖြစ်စေ သူမ၏ ခန္ဓာကိုယ်ကို လိုချင်တပ်မက်နေကြသည်။

ချန်ကောဟွားတွင် ထိုကဲ့သို့သော အတွေးမျိုး မရှိဟု သူမ မယုံကြည်ပေ။ ထိုနှစ်က ချန်ကောဟွားသည် သူမနှင့် သတို့သမီးရွေးပွဲကို ဦးစွာ လာရောက်ခဲ့သူဖြစ်သည်။ ထို့ကြောင့် ချန်ကောဟွား၏ စိတ်ထဲတွင် သူမနှင့်ပတ်သက်၍ လုံးဝကို စိတ်ကူးရှိမည်ဟု ချင်ဟွိုင်ယွီ ယုံကြည်နေသည်။

ထိုစိတ်ကူး တစ်ဖန်ပြန်လည် ပေါ်ပေါက်လာသည်နှင့် သူမက အနည်းငယ် တွဲဖက်လုပ်ဆောင်ပေးလိုက်လျှင် ကိစ္စက အောင်မြင်သွားမည် ဖြစ်သည်။

အကယ်၍ ချန်ကောဟွားက သူမကို လက်ခံရန် ဆန္ဒရှိပါက အချိန်ကျလျှင် သူမကလည်း သူ့အတွက် သားတစ်ယောက် သမီးတစ်ယောက် မွေးပေးနိုင်သည်။ ချင်ဟွိုင်ယွီ စိတ်ထဲတွင် တိတ်တဆိတ် တွေးတောနေသည်။

"မင်း ငါ့ကို ဘာလုပ်ဖို့ ခေါ်တာလဲ"

ချန်ကောဟွားက မသိမသာ မျက်မှောင်ကြုတ်လိုက်သည်။ ချင်ဟွိုင်ယွီက သူ့နာမည် ခေါ်ဝေါ်ခြင်းကို အနည်းငယ် ရွံရှာနေသည်။

ချင်ဟွိုင်ယွီသည် ချန်ကောဟွား၏ စိတ်အခြေအနေကို သတိမပြုမိဘဲ ဆက်လက်၍ တိုးတိုးလေး ဖြားယောင်းပြောဆိုနေသည်။

"ချန်ကောဟွားရယ် တုန်းရွှီက သေတော့မယ်၊ ငါ တစ်ယောက်တည်း အိမ်မှာနေရတာ နည်းနည်း ကြောက်လို့… အခု နင့်အိမ်မှာ အလုပ်လုပ်လို့ ရမလား"

သူမက အလုပ်ကို ကိုယ်တိုင်လုပ်လိုသဖြင့် ချန်ကောဟွားကလည်း သဘာဝကျကျပင် လက်ခံလိုက်သည်။ မည်သို့ပင်ဖြစ်စေ သူက ငွေပေးရန် မလိုအပ်ပေ။

သို့သော် ချင်ဟွိုင်ယွီ၏ ဤကဲ့သို့ ရှက်သွေးဖြာ ဟန်ဆောင်ကာ မြှူဆွယ်နေသော ကိုယ်ဟန်အမူအရာက သူ၏ အစာအိမ်ထဲတွင် အလွန်အမင်း ရွံရှာမှုကို ဖြစ်ပေါ်စေသည်။

ဘယ်လောက်တောင် အသက်ကြီးနေပြီလဲ…

ကိုယ့်ကိုယ်ကို မိန်းမပျိုလေးတစ်ယောက်လိုမျိုး အလှအပကို ကြွားလုံးထုတ်နိုင်သေးတယ်လို့ ထင်နေတာလား…

အောက်တန်းကျလိုက်တာ….

ချန်ကောဟွားက ရုတ်တရက် ပေါ်ထွက်လာသော ရမ္မက်ဆန်ဆန် အငွေ့အသက်များကို ဖယ်ရှားပစ်ချင်သည့်အလား သူ၏ လက်ဖြင့် မျက်စိရှေ့တွင် ယမ်းပြလိုက်ပြီးနောက် ပြောလိုက်သည်။

"ချင်ဟွိုင်ယွီ မင်း ငါ့အိမ်လာပြီး အလုပ်လုပ်တာကို ငါ ကြိုဆိုပါတယ်၊ဒါပေမဲ့ မင်း လျှောက်ပြီး ညုတုတုလုပ်နေမယ်ဆိုရင်တော့….ငါ မကြိုက်ဘူးနော်"

ချင်ဟွိုင်ယွီ၏ မျက်နှာတစ်ခုလုံးသည် နီရဲသွားသည်။ ချန်ကောဟွား ပြောသော ညုတုတုလုပ်သည်ဟူသော စကား၏ အဓိပ္ပာယ်ကို သူမ မသိပေ။ သို့သော် ချန်ကောဟွားက သူ၏ လက်ကို နှာခေါင်းရှေ့တွင် ယမ်းပြလိုက်သည်ကို မြင်သောအခါ သူသည် သူမ၏ ယခုလေးတင် ပြောခဲ့သော စကားများကို ရွံရှာနေကြောင်း သိလိုက်ရသည်။

အထူးသဖြင့် ထိုအထက်စီးဆန်သော ကိုယ်ဟန်အမူအရာပင်ဖြစ်သည်။ သူမကို အောက်တန်းကျသည်ဟု ထင်မြင်နေကြောင်း ရှင်းလင်းစွာ ပြသနေသည်။ ချက်ချင်းပင် ချင်ဟွိုင်ယွီ၏ ရင်ထဲတွင် ဒေါသများ ပြည့်နှက်သွားသည်။

"ရောက်လာမှတော့ ဘာလို့ ကြောင်ကြည့်နေသေးတာလဲ…မြန်မြန် ဝင်လာပြီး အလုပ်လုပ်လေ"

ချင်ဟွိုင်ယွီ တုံ့ပြန်ရန် အချိန်မရလိုက်မီမှာပင် ချန်ကောဟွားက သူမကို စတင်တိုက်တွန်းလိုက်သည်။

ချင်ဟွိုင်ယွီကလည်း ဂရုမစိုက်ပေ။ စတင်လှုပ်ရှားမှု အဆင်မပြေသော်လည်း ယခုလေးတင် သူမ အခန်းကို အကဲခတ်ကြည့်လိုက်ရာ ချင်ကျင်းယွီက ဤအချိန်အထိ အိမ်ပြန်မရောက်သေးကြောင်း တွေ့လိုက်သည်။ အိမ်ရှင်မ အိမ်တွင် မရှိပါက သူမအတွက် လှုပ်ရှားရန် အခွင့်အရေးပေးလိုက်ခြင်းပင်ဖြစ်သည်။

ထိုသို့ဖြင့် စိတ်ထဲတွင် မပျော်ရွှင်သော်လည်း ချင်ဟွိုင်ယွီသည် အေးအေးဆေးဆေးပင် ချန်မိသားစုအိမ်ထဲသို့ ဝင်ရောက်သွားသည်။

"စားပွဲကို ရှင်းလင်းပြီးသွားရင် ခြေထောက်ဆေးဖို့ ရေတစ်ဇလုံ သွားခပ်လိုက်ဦး"

ချင်ဟွိုင်ယွီက ခေါင်းတစ်ဆက်ဆက် ညိတ်ပြလိုက်ပြီး အခွင့်အရေးရောက်လာပြီဟု စိတ်ထဲတွင် တွေးလိုက်သည်။ ချန်ကောဟွား ခြေထောက်ဆေးရာတွင် ကောင်းစွာ ပြုစုပေးနိုင်ပါက သူမအတွက် နေရာဝင်ယူရန် အခွင့်အရေး ရကောင်းရနိုင်သည်။

ချန်ကောဟွားသည် ချင်ဟွိုင်ယွီ၏ အတွေးများကို သဘာဝကျကျပင် မသိရှိဘဲ ရိုးရှင်းစွာ ညွှန်ကြားပြီးနောက် သူလည်း ယနေ့ ညစာကို စတင်ပြင်ဆင်လိုက်သည်။ မည်သို့ပင်ဖြစ်စေ ကျင်းယွီလည်း မကြာမီ ကလေးမွေးဖွားတော့မည်ဖြစ်ရာ အာဟာရပိုင်းနှင့်ပတ်သက်၍ ပေါ့ဆ၍မရပေ။ ချင်ကျင်းယွီ ကိုယ်ဝန်ရှိလာကတည်းက နေ့စဉ် ညစာများသည် ယခုကဲ့သို့ပင် အဆင့်အတန်းမြင့်မားသည်။

ကြက်သားပြောင်းဆန် ဆန်ပြုတ် တစ်အိုး၊ ဝက်သားနီချက် တစ်ပွဲ၊ မုန်ညင်းဖြူကြော် တစ်ပွဲနှင့် တို့ဖူးငါးကြင်းဟင်းချို တစ်ပွဲတို့ဖြစ်သည်။ အသားရော အသီးအရွက်ပါ ပါဝင်ပြီး လုံးဝကို အာဟာရပြည့်ဝကာ အရသာရှိသည်။

ချန်ကောဟွားက မီးဖိုချောင်တွင် အလုပ်များနေပြီး ချင်ဟွိုင်ယွီက ဧည့်ခန်းတွင် အလုပ်များနေသည်။ မကြာမီအချိန်တွင်ပင် အရသာရှိသော ဟင်းလျာများကို ချန်ကောဟွားက ချက်ပြုတ်ပြီး စားပွဲပေါ်သို့ တင်လိုက်သည်။ စားပွဲပေါ်တွင် ပန်းကန်လုံးများနှင့် တူများ၊ ပေ့ယန်လေရေ နှစ်ပုလင်းတို့ကိုလည်း တင်ထားလိုက်သည်။

ထိုမြင်ကွင်းကို အလုပ်လုပ်နေသော ချင်ဟွိုင်ယွီက မြင်တွေ့သွားသည်။ စားပွဲပေါ်ရှိ ဟင်းလျာများကို မျက်လုံးပြူးကာ ငေးကြည့်နေပြီး သွားရည်များကျချင်လာပြီး တံထွေးမျိုချခြင်းကို မတားဆီးနိုင်ခဲ့ပေ။

ချန်ကောဟွားသည် ချင်ဟွိုင်ယွီကို သတိပြုမိပြီးနောက် စိတ်ထဲတွင်လည်း သူမကို သနားသွားသည်။ အမျိုးသမီးတစ်ဦးအနေဖြင့် မိသားစုတစ်စုလုံးကို ပြုစုပျိုးထောင်ရခြင်းမှာ မလွယ်ကူလှပေ။ ထိုအချိန်က သူမနှင့် သတို့သမီးရွေးပွဲ လာရောက်စဉ်ကလည်း သူမကို ကူညီရန် စိတ်ကူးရှိသည်။ သို့သော် ချင်ဟွိုင်ယွီ၏ တောင်းဆိုမှုများ မြင့်တက်လာသော သဘောထားကိုမူ သူ လုံးဝ ထင်မှတ်မထားခဲ့သည့်အပြင် စကားတစ်ခွန်းကို နားလည်သွားစေသည်။

ထိုစကားမှာ သနားစရာကောင်းသောသူသည် မုန်းတီးစရာကောင်းသော နေရာတစ်ခု သေချာပေါက် ရှိနေတတ်သည် ဟူ၍ပင်ဖြစ်သည်။

ဤမုန်းတီးစရာကောင်းသော နေရာသည် ချင်ဟွိုင်ယွီက အချောင်လိုချင်သူဖြစ်ကြောင်း ဆိုလိုခြင်းမဟုတ်ပေ။ မည်သို့ပင်ဖြစ်စေ ယခင်ဘဝက နတ်သမီးလေးများ၏ သတို့သမီးရွေးပွဲ လုပ်ငန်းစဉ်တွင် မည်သူက အချောင်လိုချင်သူ မရှိမည်နည်း။ အထူးသဖြင့် ဤခေတ်ကာလတွင် ကျေးလက်ဒေသမှ တောင်သူလယ်သမားများသည် မည်မျှ ဆင်းရဲဒုက္ခခံစားနေရသနည်း။

ချင်ဟွိုင်ယွီသည် ကျေးလက်အမျိုးသမီးတစ်ဦးဖြစ်ပြီး မြို့ပေါ်မှ လူများကို အားကိုးကာ ဘဝကောင်းကောင်း ဖြတ်သန်းလိုသည်။ ထိုကဲ့သို့သော အတွေးမျိုးရှိခြင်းသည် မူလကတည်းက အပြစ်တင်စရာမရှိပေ။

သို့သော် အခြားသူများ၏ အခြေအနေ ကောင်းမွန်သည်ကို မြင်သောအခါ ကတိဖျက်ရုံသာမက ထိုအချိန်က အခြေအနေ သာမန်မျှသာရှိသော သူ့ကိုပါ နှိမ့်ချကာ အခြေအနေပိုကောင်းသော ကျားမိသားစုကို မြှောက်ပင့်ဖားယားခြင်းမှာမူ လူ့ကျင့်ဝတ်ပိုင်းဆိုင်ရာ ပြဿနာပင်ဖြစ်သည်။

ချင်ဟွိုင်ယွီ၏ ဤလူ့ကျင့်ဝတ်ပိုင်းဆိုင်ရာ ပျက်စီး‌ နေခြင်းကို ချန်ကောဟွားက အမုန်းဆုံးနှင့် အရွံရှာဆုံးပင်ဖြစ်သည်။ ထို့ကြောင့် ချင်ဟွိုင်ယွီ ဖားယားသည်ဖြစ်စေ၊ အားနည်းဟန်ဆောင်သည်ဖြစ်စေ သူမ၏ လူ့ကျင့်ဝတ်ပိုင်းဆိုင်ရာ ပျက်စီးနေသေးသရွေ့ ချန်ကောဟွားအနေဖြင့် သူမအပေါ် သဘောကျစိတ် ရှိလာနိုင်မည်မဟုတ်ဘဲ ရွံရှာမှုနှင့် မုန်းတီးမှုသာ ရှိပေလိမ့်မည်။

ချန်ကောဟွားက ဟင်းလျာများကို စားပွဲပေါ်သို့ တင်လိုက်ပြီးနောက် ချင်ဟွိုင်ယွီက သူ၏အနီးသို့ လျှောက်သွားကာ ဆောင့်ကြောင့်ထိုင်ချလိုက်ပြီး သူ့အတွက် ခြေထောက်ဆေးပေးရန် ပြင်ဆင်လိုက်သည်။

"ကောဟွား ငါ အခန်းကို သန့်ရှင်းရေးလုပ်ပြီးသွားပြီ၊ ခြေထောက်ဆေးရေလည်း ခပ်ထားပြီးပြီ…အခု ငါ နင့်ကို ခြေထောက်ဆေးပေးမယ်"

ထိုစကားကို ကြားသောအခါ ချန်ကောဟွားက ကြက်သေသေသွားသည်။ သူ တကယ်ကို စဉ်းစား၍မရပေ။ချင်ဟွိုင်ယွီကို ဤမျှလောက် ဖိနှိပ်ထားပါလျက် သူမက အဘယ်ကြောင့် သူ့အား ဖားယားနေရသနည်း။ သူ့အတွက် ခြေထောက်ပင် ကိုယ်တိုင်ကိုယ်ကျ ဆေးပေးချင်နေသေးသည်။ ချင်ဟွိုင်ယွီတွင် အနိုင်ကျင့်ခံလိုသော စိတ်ထား (M) ရှိနေခြင်းများလား…

ထိုအချိန်တွင် ကျွီ…ဟူသော အသံတစ်ခု ထွက်ပေါ်လာပြီးနောက် အခန်းတံခါး ပွင့်သွားသည်။ အလုပ်ဆင်းလာသော ချင်ကျင်းယွီ အိမ်သို့ ပြန်ရောက်လာသည်။

"ကောဟွား ဒီနေ့ ငါ ရယ်စရာကောင်းတဲ့ ကိစ္စတစ်ခုနဲ့ ကြုံခဲ့ရတယ်..."

တံခါးပေါက်မှ ဝင်ဝင်ချင်း အိတ်ကိုပင် မချရသေးမီ ချင်ဟွိုင်ယွီက ချန်ကောဟွား၏ ပေါင်ကြားရှေ့တွင် ဆောင့်ကြောင့်ထိုင်နေသည်ကို ချင်ကျင်းယွီ မြင်တွေ့လိုက်ရသည်။ သူမသည် ချက်ချင်းပင် ကြက်သေသေသွားသည်။ မမြင်အပ်သော ကိစ္စတစ်ခုခုကို မြင်တွေ့လိုက်ရသည့်ပုံ ပေါက်နေသည်။

ချန်ကောဟွားက ချင်ကျင်းယွီ၏ မျက်နှာတွင် အလွန်အမင်း အံ့အားသင့်နေသည်ကို မြင်သောအခါ ဤအနေအထားသည် သိပ်မလှပသလို လူများကိုလည်း အထင်လွဲလွယ်စေကြောင်း သိလိုက်ရသည်။ ထို့ကြောင့် သူက ဒေါသတကြီးဖြင့် ပြောလိုက်သည်။

"ချင်ဟွိုင်ယွီ ဒီခြေထောက်ဆေးရေဇလုံကို ကျင်းယွီအတွက် ခပ်ခိုင်းလိုက်တာ…ခြေထောက်ဆေးပေးမယ်ဆိုရင်လည်း ကျင်းယွီကို ခြေထောက်ဆေးပေးရမှာ"

"ငါ့ကို ချင်ကျင်းယွီအတွက် ခြေထောက်ဆေးပေးခိုင်းတာလား"

ချင်ဟွိုင်ယွီ ကြက်သေသေသွားပြီး မျက်နှာပေါ်တွင် အလွန်အမင်း အံ့အားသင့်သွားသည်။

သူမ မနက်ပိုင်းက ချင်ကျင်းယွီ၏ စော်ကားမှုကို ခံခဲ့ရသေးသည်။ ယခုလေးတင် သူမ၏ အမျိုးသားကို ဖြားယောင်းသွေးဆောင်ရန် ကြိုးစားနေသည်ကို သူမနှင့် ပက်ပင်းတိုးသွားရာ သေချာပေါက် သူမ၏ ထပ်မံ၍ ပြင်းထန်စွာ စော်ကားမှုကို ခံရတော့မည်ဖြစ်သည်။

ဤသည်ကို တွေးမိသောအခါ ချင်ဟွိုင်ယွီသည် ခေါင်းအလွန်ကိုက်လာသည်ဟု ချက်ချင်း ခံစားလိုက်ရသည်။