အခန်း ၅၅

ငါးဆားနယ် ကိုယ်လုပ်တော်

အပိုင်း ၅၅

ယွီမြောင်ဟွာ၏ စွမ်းဆောင်ချက်အားလုံးမှာ သူမကိုယ်တိုင် ဖန်တီးထားခြင်းမဟုတ်ဘဲ တာဝန်များကို အောင်မြင်စွာ ထမ်းဆောင်ခြင်းကြောင့် ရရှိလာသော ဆုလာဘ်များ ဖြစ်နေပါစေဦးတော့၊ သူမသာ မရှိခဲ့လျှင် နတ်ဘုရားများက တချီ မင်းဆက်ကို ယခုကဲ့သို့ ရက်ရက်ရောရော မျက်နှာသာပေးလိမ့်မည်မဟုတ်ချေ။ ထို့ကြောင့် ဤကျေးဇူးတရားကို မေ့ပျောက်၍ မဖြစ်နိုင်ပါ။

ဖေးလင်ယွဲ့သည် စိတ်ထဲမှ ရေရွတ်မှန်းဆနေမိသည်—ယွီမြောင်ဟွာ၏ လွန်ခဲ့သောဘဝက ထူးခြားဆန်းပြားသော အဆင့်အတန်းတစ်ခုခု ရှိခဲ့၍လော။ သူမသည် ဗုဒ္ဓမြတ်စွာဘုရား၏ သမီးတော်အရင်း ဖြစ်နေ၍ ဗုဒ္ဓက သူမအတွက် ကုသိုလ်အတုပြုလုပ်ရန် ဤနတ်ဘုရားတာဝန်များကို စီစဉ်ပေးထားခြင်းလည်း ဖြစ်နိုင်ပေသည်။

မည်သို့ပင်ဆိုစေကာမူ တချီမင်းဆက်က အကျိုးကျေးဇူးများ ရရှိနေခြင်းဖြစ်သောကြောင့် အသေးစိတ် အချက်အလက်များက သိပ်ပြီး အရေးမကြီးလှပါ။

သူတို့သုံးဦး အပြန်အလှန် နားလည်မှုရရှိသွားပြီးနောက်တွင် ကွေ့ဖေး ယွမ်ဟွေ့ရုန် ရောက်ရှိလာပြီး ယွီမြောင်ဟွာ နိုးလာပြီဖြစ်ကြောင်း သတင်းစကားပါးသဖြင့် တိုင်းပြည်၏ အထွတ်အထိပ် ပုဂ္ဂိုလ်ကြီးသုံးဦးသည် သူမအား ကြည့်ရှုရန် ချက်ချင်း ထွက်ခွာခဲ့ကြသည်။

၎င်းတို့ ရောက်ရှိသွားသောအခါ ဝမ်ယနျဉ်နှင့် အခြားသူများသည် ဦးညွှတ်အလေးပြုရန် ပြင်ဆင်ကြ၏။

ဖေးလင်ယွဲ့က ၎င်းတို့အား ကိုယ်တိုင်ကိုယ်ကျ ထူမပေးလိုက်သည်။ “အရိုအသေပေးဖို့ မလိုပါဘူး”

ထို့နောက် ယွီမြောင်ဟွာဘက်သို့ လှည့်ကာ ပြောလိုက်၏။ “ဟွေ့ဖေး… လောလောဆယ် ကျန်းမာရေး ပြန်ကောင်းဖို့ကိုပဲ အာရုံစိုက်ပါ၊ ကျန်တဲ့ ကိစ္စအဝဝကို ဘေးဖယ်ထားလိုက်ပါ” ထိုသို့ ပြောရင်း နံနက်ခင်း အရိုအသေပေးခြင်း ကဲ့သို့သော ပုံမှန်ဝတ်တရားများကိုပါ ကင်းလွတ်ခွင့်ပေးလိုက်သည်။

ယွီမြောင်ဟွာက ကျေးဇူးတင်ရှိကြောင်း အားနည်းသော အပြုံးလေးဖြင့် တုံ့ပြန်ခဲ့သည်။

ဖေးလင်ယွဲ့၏ အကြည့်သည် ဝမ်ယနျဉ် ဆီသို့ ကျရောက်သွားပြီးနောက် ဟွေ့ဖေးကို ပြုစုစောင့်ရှောက်ရန်အတွက် နန်းတော်ထဲတွင် နေထိုင်ခွင့်ပြုလိုက်၏။

ထိုသတင်းကြောင့် ‌ဟွေ့ဖေး၏ မျက်ဝန်းထဲတွင် ပျော်ရွှင်ရိပ်များ ဖြတ်ပြေးသွားသည်ကို သတိပြုမိလိုက်သဖြင့် ဖေးလင်ယွဲ့သည် မသိမသာ ပြုံးလိုက်မိသည်—ယခုတစ်ကြိမ်တွင်မူ သူသည် မိဖုရားခေါင်ကြီးနှင့် အခြားသူများ မဝင်စွက်ဖက်နိုင်မီ ဦးအောင် လုပ်ဆောင်နိုင်ခဲ့ခြင်း ဖြစ်သည်။

ယွီဝေဟွာမှာမူ အမျိုးသားတစ်ဦးဖြစ်သဖြင့် ပုံမှန်အခြေအနေများတွင် အတွင်းနန်းဆောင်သို့ ဝင်ရောက်ခွင့် ပိတ်ပင်ထားသော်လည်း ယနေ့သည် ကင်းလွတ်ခွင့်ရသော နေ့တစ်နေ့ ဖြစ်၏။

မယ်တော်ကြီးသည်လည်း သူမ၏ ဂရုစိုက်မှုကို ပြသသည့်အနေဖြင့် ရှားပါးပြီး အဖိုးတန်သော တိုင်းရင်းဆေးဘက်ဝင်အပင်များကို ကွမ်ကျွီနန်းဆောင်သို့ အမြောက်အမြား ပေးသနားခဲ့သည်။

တစ်ချိန်တည်းမှာပင် မိဖုရားခေါင်ကြီးက နန်းတွင်းအစေခံများကို ဟွေ့ဖေးအား အစွမ်းကုန် ဂရုစိုက်ကြရန် ပြင်းပြင်းထန်ထန် သတိပေးနှိုးဆော်လိုက်ပြီး နောက်လာမည့် လအနည်းငယ်အတွင်း ကွမ်ကျွီနန်းဆောင်၏ စားနပ်ရိက္ခာနှင့် အသုံးအဆောင်များကို သူမ ကိုယ်တိုင် တိုက်ရိုက် စီမံခန့်ခွဲသွားမည် ဖြစ်သည်။

ထို့အပြင် တော်ဝင်သမားတော်ကြီး နှစ်ဦးကိုလည်း ဟွေ့ဖေးအား တစ်နေ့ သုံးကြိမ် စစ်ဆေးရန် တာဝန်ပေးအပ်ထားပြီး သူမ၏ အခြေအနေပေါ်မူတည်၍ ဆေးညွှန်းများကို ပြောင်းလဲပေးသွားမည် ဖြစ်၏။

ခွန်အားဖြစ်ဆေးရည်များကို သောက်ရတော့မည်ဟူသော အတွေးကြောင့် ယွီမြောင်ဟွာ၏ စိတ်အခြေအနေမှာ ချက်ချင်း ညှိုးငယ်သွားရသည်။

သူမ၏ မိခင်ဖြစ်သူသည် သူမ ကျန်းမာရေး ပြန်လည်ကောင်းမွန်လာစေရန် နန်းတော်ထဲ၌ နေထိုင်ပြီး ကြီးကြပ်တော့မည် ဖြစ်ရာ မိခင်၏ စရိုက်အရ ဆေးရည်တစ်စက်မကျန် သောက်ရန် အတင်းအကျပ် တိုက်တွန်းတော့မည်မှာ မြေကြီးလက်ခတ်မလွဲပေ။

[အား… စနစ်ရေ… ငါ ဆေးတွေ မသောက်ချင်ဘူး၊ ငါ ဒီ တာဝန် အတွက် အများကြီး စွန့်လွှတ်ခဲ့ရတာနော်] ယွီမြောင်ဟွာက စိတ်ထဲမှနေ၍ ညည်းတွားလိုက်သည်။

[Host ရယ်… အောင့်ခံလိုက်ပါ၊ လအနည်းငယ်ဆိုတာ မျက်စိတစ်မှိတ်အတွင်း ဖြတ်ကျော်သွားမှာပါ၊ ဒါတင်မကသေးဘူး… ဒီတစ်ခေါက် ကျွန်တော်တို့ တော်တော်လေး လက်တွဲညီညီ လုပ်နိုင်ခဲ့ကြတယ်မဟုတ်လား] စနစ်သည် ၎င်းတို့နှစ်ဦးကြားရှိ ပူးပေါင်းဆောင်ရွက်မှုမှာ ပိုအားကောင်းလာသည်ဟု ခံစားမိ၏။

[Host အနေဖြင့် ယခုအချိန်တွင် တာဝန် အတွက် ပစ်မှတ်သုံးခုကို အတည်မပြုသေးဘူးလား။]

မူလက ပြန်ထွက်ခွာရန် ရည်ရွယ်ထားကြသော ဖေးလင်ယွဲ့နှင့် အခြားသူများသည် ၎င်းတို့၏ စိတ်ကူးကို ရုတ်တရက် ပြောင်းလဲလိုက်ကြသည်။ ထို တာဝန်က အရေးကြီးဆုံးဖြစ်သောကြောင့် ယွီမြောင်ဟွာ မည်သူ့ကို ရွေးချယ်မည်ကို ၎င်းတို့ သိရှိရပေမည်။

[နင့်စကားမှန်တယ်၊ အရင်ဆုံး ဒီလောင်းကြေးထပ်ထားတဲ့သူတွေရဲ့ စိတ်ကျေနပ်မှု level ကို စစ်ဆေးကြည့်ပြီး အမှတ်အများဆုံး သုံးယောက်ကို ရွေးပြီး တာဝန်အတွက်ဆုတွေကို တစ်ခါတည်း သိမ်းကျုံးယူလိုက်မယ်။]

ယွီမြောင်ဟွာသည် "View All" ဆိုသည့် အကွက်ကို နှိပ်လိုက်သည်နှင့် တပြိုင်နက် ကိုယ်စားလှယ်လောင်း တစ်ဦးချင်းစီ၏ အမည်အောက်တွင် စိတ်ကျေနပ်မှု level အမှတ်များ ချက်ချင်း ပေါ်လာတော့သည်။

ချက်ချင်း ဝှေ့ကြည့်လိုက်ရုံမျှဖြင့် ယနေ့မွန်းလွဲပိုင်းက ပြုလုပ်ခဲ့သော ပြုမူဆောင်ရွက်ချက်များမှာ ထိရောက်မှုရှိကြောင်း အတည်ပြုနိုင်ခဲ့ပြီး လူအများစု၏ စိတ်ကျေနပ်မှု level မှာ ငါးမှတ်မှ ဆယ်မှတ်အထိ မြင့်တက်လာခဲ့၏။

နေပါဦး—

တစ်ယောက်ကလွဲလို့ပေါ့။

ယွီမြောင်ဟွာ ဆွံ့အသွားရသည်။ အနီရောင်ဖြင့် ပြသနေသော စိတ်ကျေနပ်မှု အမှတ်အသား ပင်လယ်ပြင်ကြီးထဲတွင် ထိုတစ်ဦးတည်းသော အမည်းရောင် ကိန်းဂဏန်းသည် သိသိသာသာ ထင်ရှားနေပြီး သူမ၏ မျက်ဝန်းများကို ဓားတစ်စင်းကဲ့သို့ ထိုးဆိုက်နေသကဲ့သို့ ခံစားရစေ၏။

[ဒါ မဖြစ်နိုင်တာ၊ ဒီကိန်းဂဏန်းက အမှန်ပဲလား။ ဖေးချီယောင်ရဲ့ စိတ်ကျေနပ်မှု level က မူလကတည်းက အနှုတ် နှစ်ဆယ် ဖြစ်နေတာတောင် အခု ထပ်မတိုးတဲ့အပြင် အနှုတ် နှစ်ဆယ့်ငါးအထိ ကျဆင်းသွားရတယ် ဟုတ်လား။ သူ ရူးနေတာလား။ သူ ငါ့ကို ဒီလောက်တောင် မုန်းတီးနေရတာလား။ ငါ သူ့ဘိုးဘွားတွေရဲ့ ဂူကိုများ သွားတူးမိလို့လား။]

ဖေးလင်ယွဲ့သည်လည်း ထပ်တူထပ်မျှ တုန်လှုပ်သွားရပြီးနောက် ဒေါသတရားများ အရှိန်အဟုန်ဖြင့် ထွက်ပေါ်လာသည်။

ချီယောင် တစ်ယောက် ဘာတွေ တွေးနေရသနည်း။

သူက ဟွေ့ဖေးကို ဒီလောက်တောင် စက်ဆုပ်ရွံရှာနေရသလား။

မင်းသားတစ်ပါးအနေဖြင့် ဟွေ့ဖေးနှင့် ပတ်သက်မှုမှာ ပွဲတော်များတွင်သာ ကန့်သတ်ထားပြီး သူမသည် သူ့အပေါ် တစ်ကြိမ်တစ်ခါမျှ မပြစ်မှားခဲ့ဖူးချေ။ ပြောရလျှင် သူမသည် သဲ့ဖေး၏ ကလေးနှစ်ယောက်နှင့် ပို၍ပင် ရင်းနှီးသေးသည်။

ဖေးလင်ယွဲ့သည် ချီယောင်၏ မုန်းတီးမှုမှာ သာမန် ပုဂ္ဂိုလ်ရေးအရ မကြိုက်နှစ်သက်မှုကြောင့်သာ ဖြစ်သည်ဟု ယုံကြည်ရလောက်အောင် ငတုံး မဟုတ်ပါ။

ဟွေ့ဖေးသည် ပြည်သူများအတွက် မိမိကိုယ်ကို စွန့်လွှတ်အနစ်နာခံခဲ့ပြီးနောက်တွင်ပင် သူ၏ သားဖြစ်သူသည် စိတ်လှုပ်ရှားမှု မရှိသည့်အပြင် ပို၍ပင် မကျေမနပ် ဖြစ်လာခဲ့၏။

ဤအရာသည် အချက်တစ်ချက်ကိုသာ ညွှန်ပြနေသည်—ချုံးမင်နန်းဆောင်သည် ကွမ်ကျွီနန်းဆောင် အပေါ် နက်ရှိုင်းသော မနာလိုမုန်းတီးမှုများ မွေးမြူထားပြီး ဟွေ့ဖေး၏ ဂုဏ်သတင်း ကျော်စောလာသည်ထက် တချီ တစ်ခုလုံး ဒုက္ခရောက်သွားသည်ကိုပင် ပို၍ မြင်တွေ့လိုကြသည်။

ရှန်ဖေးသည်… အပြင်ပန်းတွင် မြင်တွေ့ရသကဲ့သို့ သီလရှိပြီး သိမ်မွေ့ကာ အေးဆေးတည်ငြိမ်သူတစ်ဦး လုံးဝမဟုတ်ကြောင်း ထင်ရှားလှပေသည်။

ဖေးလင်ယွဲ့၏ မျက်ဝန်းများသည် အမှန်တရားကို အေးစက်စွာ သဘောပေါက်နားလည်သွားရင်း စူးရှတောက်ပလာတော့သည်။

နန်းတွင်းအဆောင်အယောင် မိဖုရားများက မိမိ၏ ရှေ့မှောက်တွင် ပြသနေသော အမူအရာများသည် ၎င်းတို့၏ စိတ်ရင်းအမှန်ကို ထင်ဟပ်စေချင်မှ ထင်ဟပ်စေလိမ့်မည်ဖြစ်ကြောင်း ဖေးလင်ယွဲ့ ကောင်းစွာ သိရှိနားလည်ထားသည်။

သို့သော်လည်း ရှန်ဖေးသည် နှစ်ပေါင်းများစွာအတွင်း ထူးခြားပြောင်မြောက်စွာ ပြုမူနေထိုင်ခဲ့၏။ သူမသည် မျက်နှာသာရရန် ဘယ်သောအခါမျှ ပြိုင်ဆိုင်ခြင်းမရှိဘဲ နာခံမှုရှိရှိဖြင့် ကိုယ့်ကိုယ်ကိုယ် ထိန်းသိမ်းကာ အခြားမိဖုရားများအတွက်လည်း မကြာခဏ အသနားခံပေးတတ်သည်။ သူမကို ရှားပါးပြီး စာနာနားလည်တတ်သော အဖော်မွန်တစ်ဦးဟု ခေါ်ဆိုနိုင်ပေသည်။ သူမသည် သူအနှစ်သက်ဆုံး မိဖုရားမဟုတ်သော်လည်း သူ၏နှလုံးသားထဲတွင် ထူးခြားသောနေရာတစ်ခု ရရှိထားပြီး နက်ရှိုင်းသော ယုံကြည်မှုကိုလည်း ခံစားရရှိထားသည်။

ထို့ကြောင့် သူမ ပြုစုပျိုးထောင်ခဲ့သော သားနှစ်ဦးစလုံးက ယွီမြောင်ဟွာအပေါ် ဤမျှပြင်းထန်သော မုန်းတီးမှုများ မွေးမြူထားကြောင်း ရုတ်တရက် သိရှိလိုက်ရခြင်းက ဖေးလင်ယွဲ့အား တုန်လှုပ်သွားစေခဲ့ပြီး ထိုနောက်တွင် ပြင်းထန်သော ဒေါသနှင့် မကျေနပ်မှုများ ချက်ချင်းပင် လွှမ်းမိုးသွားရ၏။

ယွီမြောင်ဟွာတွင် ကိုယ်ပိုင်သားသမီးမရှိဘဲ မျက်နှာသာပေးမှုကို အနည်းငယ်မျှ ပိုရရှိထားရုံသာ ဖြစ်သည်။ ဤအချက်က ၎င်းတို့၏ မနာလိုမုန်းတီးမှုကို နှိုးဆွရန် အမှန်တကယ်ပင် လုံလောက်နေသလော။

[ပတ်ဝန်းကျင်ကို ဝှေ့ကြည့်လိုက်ရင် ငါ့အပေါ် စိတ်ကျေနပ်မှု level အမြင့်ဆုံးလူက အိမ်ရှေ့စံမင်းသားဖြစ်နေတယ်၊ ဇောက်ထိုးကျလိုက်ပါတော့… ငါက သူ့မျက်နှာကိုကြည့်ရင် စိတ်ထဲကနေ အလိုလိုကို ဓာတ်မတည့်ဖြစ်နေတာ]

[Host က စိတ်ကျေနပ်မှုအမြင့်ဆုံး သုံးယောက်ကို ရွေးမယ်လို့ ပြောခဲ့တယ်မဟုတ်လား၊ အိမ်ရှေ့စံမင်းသားမှာ အမှတ် ၃၀ ရှိနေတာဆိုတော့ ဆုလာဘ်နှစ်ဆင့်ကို ချက်ချင်း ထုတ်ယူဖို့ လုံလောက်တယ်လေ၊ Host စိတ်မလှုပ်ရှားဘူးလား]

အိမ်ရှေ့စံမင်းသားသည် ဘေးထွက် တာဝန် မျိုးစုံကို အလွယ်တကူ ဖြစ်ပေါ်စေနိုင်ပြီး စွမ်းအင်များ ပိုမိုပံ့ပိုးပေးနိုင်သောကြောင့် စနစ်မှာ ယွီမြောင်ဟွာအား ဖျောင်းဖျရန် အစွမ်းကုန် ကြိုးစားနေခြင်း ဖြစ်သည်။ ကုန်ခမ်းခြင်းမရှိသော စွမ်းအင်ထောက်ပံ့မှုများကို တွေးရုံမျှဖြင့် စနစ် ဒစ်ဂျစ်တယ် တံတွေးများပင် ယိုကျလုနီးပါး ဖြစ်သွားရ၏။

အိမ်ရှေ့စံမင်းသား၏ စိတ်ကျေနပ်မှုအမှတ် သုံးဆယ်သို့ ရောက်ရှိသွားသည်ကို မြင်သောအခါ ဖေးလင်ယွဲ့ ကျေနပ်အားရမိသည်။ သူသည် အိမ်ရှေ့စံမင်းသား၏ရှေ့တွင် ဟွေ့ဖေးအား မကြာခဏ ချီးမွမ်းပြောဆိုခဲ့သည်မှာ အလဟဿ မဖြစ်ခဲ့ချေ။ အိမ်ရှေ့စံမင်းသားသည် သူ၏စကားများကို အမှန်တကယ် နှလုံးသွင်းကာ သူမအပေါ် မည်သည့်မကျေနပ်မှုမျှမရှိဘဲ အလွန်ပင် လေးစားအားကျနေခဲ့သည်။

ယခုကဲ့သို့ ကြင်နာတတ်ပြီး စိတ်သဘောထား ပြည့်ဝသော အိမ်ရှေ့စံမင်းသားသည် တချီအတွက် အသင့်တော်ဆုံး အမွေခံဖြစ်ပြီး ချီယောင်နှင့် အလွန်ပင် ထင်ရှားစွာ ကွာခြားနေပေသည်။

မိဖုရားခေါင်ကြီးနှင့် မယ်တော်ကြီးတို့မှာမူ စိတ်ဒွိဟဖြစ်နေကြသည်။ တစ်ဖက်တွင်လည်း အိမ်ရှေ့စံမင်းသားကို ရွေးချယ်ခြင်းက တချီအတွက် အကျိုးရှိမည့်အလား ဖြစ်နေ၏။

အခြားတစ်ဖက်တွင်လည်း သူ၏ အဆင့်အတန်းက… ပြဿနာများကို ဖိတ်ခေါ်ရန် အလွန်ပင် လွယ်ကူလွန်းလှသည်။

သို့သော်လည်း ၎င်းတို့သည် စိတ်ပိုင်းဆိုင်ရာ ကြိုတင်ပြင်ဆင်ထားပြီး ဖြစ်ကြသောကြောင့် တုံ့ဆိုင်းမှုမှာ ကြာရှည်မခံဘဲ ထိုအခြေအနေကို လက်ခံလိုက်ကြတော့၏။

ယွီမြောင်ဟွာသည် စိတ်ကျေနပ်မှု level အဆင့်ဆင့်ကို ဆက်၍စစ်ဆေးနေသည်။

[လန့်သွားတာပဲ… ငါ မြင်နေရတာ အမှန်ပဲလား၊ ဒုတိယအမြင့်ဆုံးလူက တကယ်ပဲ ဖေးယွီဟန် ဖြစ်နေတာလား၊ စနစ်ရေ… ဒီမှာ bug တက်နေတာ မဟုတ်ဘူးလို့ သေချာလား၊ ဒါက ဘယ်လိုလုပ် ဖြစ်နိုင်မှာလဲ၊ ဒီနေ့ အစောပိုင်းတင် ဖေးယွီဟန်က ငါ့ကို လူလိမ်လို့ စွပ်စွဲဖို့ ကြိုးစားခဲ့တာလေ၊ ဒါတောင် ငါ့အပေါ် သူ့ရဲ့ စိတ်ကျေနပ်မှု level က ဒီလောက်တောင် မြင့်နေရတာလား၊ အိမ်ရှေ့စံမင်းသားရဲ့ အောက်တင်ပဲ၊ အမှတ် ၂၅ တောင် ရှိတယ်]

အိမ်ရှေ့စံမင်းသားနှင့် နှိုင်းယှဉ်လျှင် ဖေးယွီဟန်၏ စိတ်ကျေနပ်မှုအမှတ်မှာ ယွီမြောင်ဟွာအတွက် ပို၍ပင် ထင်မှတ်မထားစရာ ဖြစ်ခဲ့ရ၏။

[Host ရယ်… သူက ဒီနေ့ Host ရဲ့ သနားကြင်နာတတ်ပြီး သန့်ရှင်းစင်ကြယ်တဲ့ နတ်ဘုရားမလို သရုပ်ဆောင်ချက်ကြီးကြောင့် လုံးဝ အညှောက်ကျိုးသွားတာ နေမှာပေါ့၊ သူက အဲ့လိုပုံစံမျိုးကို သဘောကျတာ ဖြစ်ရမယ်၊ သူ့လို tsundere မျိုးကို တစ်ခါလောက် သိမ်းသွင်းနိုင်ပြီဆိုရင် တစ်ဘဝလုံး သစ္စာရှိသွားမှာ၊ သူက ဆုလာဘ် ချက်ချင်းထုတ်ဖို့ လုံလောက်တယ်လေ၊ ဆန့်ကျင်ဘက် အစုအဖွဲ့က ဇာတ်ကောင်နဲ့ အချစ်အမုန်း လွန်ဆွဲရတဲ့ ခံစားချက်က… ရင်ခုန်စရာ သိပ်ကောင်းတာ၊ သူ့ကို ရွေးလိုက်ပါ… ရွေးလိုက်ပါ]

နန်းတွင်းအရှုပ်တော်ပုံ စနစ်မှာ ပျော်ရွှင်လွန်းသဖြင့် မိန်းမောလုနီးပါး ဖြစ်နေသည်။ ဤလမ်းကြောင်းသည်လည်း ပေါကြွယ်ဝသော စွမ်းအင်အမှတ်များကို ပေးစွမ်းနိုင်သောကြောင့် ၎င်းက အလွန်သဘောကျနေခြင်း ဖြစ်၏။ မင်းသားအိမ်တော်၏ အမွေခံသည် တကယ်ကို အထင်ကြီးစရာ ကောင်းလှပေသည်။

ဖေးလင်ယွဲ့၏ စိတ်အခြေအနေသည် ချက်ချင်းပင် ထိုးဆင်းသွားရသည်။ သူ မမြင်ချင်ဆုံးအရာက ဖြစ်ပျက်လာခဲ့ပြီ ဖြစ်၏။

ဖေးယွီဟန်က ဒုတိယနေရာကို ရယူသွားခဲ့သည်လော။

ယွီမြောင်ဟွာက သူ့ကို တကယ်ပဲ ရွေးချယ်တော့မည်လား၊ သို့သော် သူ့ကို ရွေးချယ်ခြင်းက ပထမအဆင့် ဆုလာဘ်ကို ချက်ချင်း ရရှိစေမည် ဖြစ်သည်။

ဖေးလင်ယွဲ့၏ စိတ်ခံစားချက်များမှာ ရှုပ်ထွေးနေရသည်—တစ်ဖက်တွင်လည်း သူက ဆုလာဘ်များကို လိုချင်တပ်မက်နေသော်လည်း အခြားတစ်ဖက်တွင်မူ ယွီမြောင်ဟွာက ဖေးယွီဟန်အား ရွေးချယ်မည့် အတွေးကို မခံစားနိုင်ဖြစ်နေရ၏။ အကယ်၍ ၎င်းတို့ အပြန်အလှန် ဆက်ဆံရာမှတစ်ဆင့် သူမက သူ့အပေါ် တခြားစိတ်များ ရှိလာခဲ့လျှင် မည်သို့လုပ်မည်နည်း။

[တတိယအဆင့်က ကိုယ်စားလှယ်လောင်းရဲ့ စိတ်ကျေနပ်မှုအမှတ်က နှစ်ဆယ်ဆိုတော့ ဆုလာဘ်တစ်ခု ထုတ်ယူဖို့ လုံလောက်ပါတယ်]

ထန်ဟွာမှာ Host နှစ်သက်တတ်သော အမျိုးအစားလည်း ဖြစ်နေသဖြင့် သူ့ကိုပါဝင်စေမည့် တာဝန် များကို လုပ်ဆောင်ရန် Host အနေဖြင့် ပိုစိတ်အားထက်သန်လိမ့်မည်ဟု စနစ်က တွေးလိုက်မိ၏။

ကိုယ်စားလှယ်လောင်း တစ်ဦးချင်းစီ၏ ပုံတူပန်းချီများကို စစ်ဆေးပြီးနောက် ယွီမြောင်ဟွာသည် နောက်ဆုံးတွင် ဆုံးဖြတ်ချက် ချလိုက်တော့သည်။

[စနစ်၊ ငါ အိမ်ရှေ့စံမင်းသားရယ်၊ ဖေးယွီဟန်ရယ်၊ ပြီးတော့ ထန်ဟွာ ရှန်စုရုန့်တို့ကို ရွေးမယ်]

သူမ၏ ဆုံးဖြတ်ချက်ကို ကြားလိုက်ရသောအခါ စနစ်က ဝမ်းမြောက်ဝမ်းသာဖြင့် ဒစ်ဂျစ်တယ် မီးရှူးမီးပန်းများကို ဖောက်လိုက်၏။ ပထမအဆင့် စွမ်းအင်များကို ရရှိရန် သေချာသွားပြီ ဖြစ်သည်။

[Host အနေနဲ့ အချစ်လမ်းကြောင်းအတွက် နောက်ဆုံးပစ်မှတ်တွေကို အတည်ပြုပြီးပါပြီ၊ အိမ်ရှေ့စံမင်းသားလမ်းကြောင်း၊ tsundere အမွေခံလမ်းကြောင်းနဲ့ ထန်ဟွာ လမ်းကြောင်းတို့ ဖြစ်ပါတယ်၊ အိမ်ရှေ့စံမင်းသားရဲ့ စိတ်ကျေနပ်မှုအမှတ်က သုံးဆယ်၊ အမွေခံရဲ့အမှတ်က နှစ်ဆယ့်ငါးနဲ့ ထန်ဟွာရဲ့အမှတ်က နှစ်ဆယ် ဖြစ်တဲ့အတွက် Host အနေနဲ့ သက်ဆိုင်ရာ ဆုလာဘ်တွေကို ချက်ချင်း ရရှိမှာဖြစ်ပါတယ်]

[သင်သည် "အိမ်ရှေ့စံမင်းသား၏ စိတ်ကျေနပ်မှုအမှတ် ၂၀ သို့ ရောက်ရှိခြင်း" တာဝန်ကို အောင်မြင်ခဲ့ပါပြီ၊ ဆုလာဘ်မှာ အဆင့်မြင့် ရွှံ့အုတ်ကုတင်အပူပေးစနစ် နည်းပညာ ဖြစ်ပြီး အပူပေးစွမ်းရည် ပိုကောင်းမွန်ခြင်း၊ ပိုကြာရှည်ခံခြင်းနှင့် ဘေးအန္တရာယ်ကင်းရှင်းမှု မြင့်မားခြင်းတို့ ပါဝင်ပါသည်]

[သင်သည် "အိမ်ရှေ့စံမင်းသား၏ စိတ်ကျေနပ်မှုအမှတ် ၃၀ သို့ ရောက်ရှိခြင်း" တာဝန်ကို အောင်မြင်ခဲ့ပါပြီ၊ ဆုလာဘ်မှာ ကျိုင်းကောင်ဘေးအန္တရာယ် ကာကွယ်ရေးဆိုင်ရာ ပြည့်စုံသော လက်စွဲစာအုပ် ဖြစ်ပါသည်၊ Host အနေဖြင့် မကြာမီ ကျရောက်တော့မည့် ကျိုင်းကောင်ဘေးအန္တရာယ်အတွက် ပြင်ဆင်ရန် ဤလက်စွဲစာအုပ်ကို ကောင်းစွာ အသုံးချပါရန်]

[သင်သည် "ဖေးယွီဟန်၏ စိတ်ကျေနပ်မှုအမှတ် ၂၀ သို့ ရောက်ရှိခြင်း" တာဝန်ကို အောင်မြင်ခဲ့ပါပြီ၊ ဆုလာဘ်မှာ တောင်ဘက်ပိုင်း ရေသွင်းစိုက်ခင်းများနှင့် ကိုက်ညီသော ကောက်ကွေးထွန်တုံး ဒီဇိုင်းပုံစံနှင့် မြောက်ဘက်ပိုင်း ခြောက်သွေ့စိုက်ခင်းများအတွက် ဖြောင့်တန်းသော ထွန်တုံးဒီဇိုင်းပုံစံတို့ ဖြစ်ကြပြီး နှစ်ခုစလုံးက လုပ်ငန်းစွမ်းဆောင်ရည်နှင့် စိုက်ပျိုးရေး ကုန်ထုတ်စွမ်းအားကို သိသိသာသာ မြင့်တက်စေပါသည်]

[သင်သည် "ရှန်စုရုန့်၏ စိတ်ကျေနပ်မှုအမှတ် ၂၀ သို့ ရောက်ရှိခြင်း" တာဝန်ကို အောင်မြင်ခဲ့ပါပြီ၊ ဆုလာဘ်မှာ အစားအစာအချိုးအစား၊ ရောဂါကာကွယ်ရေးနှင့် ဝက်မျိုးစိတ်များ မြှင့်တင်ရေးနည်းလမ်းများ အပါအဝင် အသေးစိတ် ဝက်မွေးမြူရေးနည်းပညာ ဖြစ်ပါသည်၊ ဤအသိပညာကို ကျယ်ကျယ်ပြန့်ပြန့် ဖြန့်ဝေပေးပါက ဝက်သားအရည်အသွေးကို မြှင့်တင်ပေးနိုင်ပြီး ဈေးနှုန်းများကို လျော့ကျစေကာ သာမန်ပြည်သူများ ပိုအရသာရှိပြီး ဈေးသက်သာသော အသားကို စားသုံးနိုင်မည် ဖြစ်၏]

ဤဆုလာဘ်များသည် အမှန်တကယ်ပင် လက်တွေ့ကျပြီး ပြည်သူများ၏ လူနေမှုဘဝ အရည်အသွေးကို နည်းလမ်းမျိုးစုံဖြင့် မြှင့်တင်ပေးနိုင်ကြောင်း ယွီမြောင်ဟွာ ဝန်ခံရပေမည်။ ကျိုင်းကောင်ဘေးအန္တရာယ် ကာကွယ်ရေး လက်စွဲစာအုပ်မှာ အထူးသဖြင့် အဖိုးတန်လှသည်—ကြက်၊ ဘဲနှင့် ငန်းများကို မွေးမြူခြင်းက ကူညီပေးနိုင်ကြောင်း သူမ မရေမရာ မှတ်မိနေသော်လည်း အခြားသော တုံ့ပြန်ဆောင်ရွက်မှု အသေးစိတ်များကိုမူ သူမ မသိရှိချေ။

အနည်းဆုံးတော့ ယနေ့ သူမ၏ ကြီးကျယ်ခမ်းနားသော သရုပ်ဆောင်ချက်မှာ အလဟဿ မဖြစ်ခဲ့ပါ။ အိမ်ရှေ့စံမင်းသားကို ရွေးချယ်ခဲ့မိသည်မှာ တကယ်ကို ကံကောင်းလှပေသည်။

သို့သော် ဆုလာဘ်များစွာ ရှိနေသည့်အပြင် နည်းပညာများကလည်း ယခုခေတ်ကာလထက် ထင်ရှားစွာ သာလွန်နေသောကြောင့်—

[ဒီအရာအားလုံးကို တစ်ခါတည်း ချပြနိုင်မဲ့ နည်းလမ်းတစ်ခု ငါ ရှာရမယ်၊ တော်ဝင်စာကြည့်တိုက်နဲ့ မင်တဲ့နားနေဆောင်တို့က ဒီတစ်ခေါက် အဆင်ပြေမှာ မဟုတ်တော့ဘူး]

ဤကိစ္စကို ဖြေရှင်းပြီးနောက် ယွီမြောင်ဟွာ မော့ကြည့်လိုက်ရာ ဧကရာဇ်၊ မိဖုရားခေါင်ကြီးနှင့် မယ်တော်ကြီးတို့မှာ ရှိနေကြဆဲဖြစ်ကြောင်း ရုတ်တရက် သတိပြုမိလိုက်၏။ ကွေ့ဖေးမှာမူ ၎င်းတို့အား အကြောင်းကြားပြီးကတည်းက အဝတ်အစားလဲရန် သူမ၏ နန်းဆောင်သို့ ပြန်သွားခဲ့ပြီ ဖြစ်သည်။

နေပါဦး—

[သူတို့ ဘာလုပ်နေကြတာလဲ၊ ငါ စိတ်လွင့်နေတုန်း တစ်စိုက်မတ်မတ် ကြည့်နေကြတာလား]

[Host ကို စိတ်ပူနေကြလို့ နေမှာပေါ့၊ ဒီနေ့ ဖြစ်ပျက်ခဲ့တာတွေက တကယ်ကို ထိတ်လန့်စရာကောင်းတာပဲဥစ္စာ၊ ဒါက သူတို့ ဂရုစိုက်ကြောင်း ပြသနေတာပဲ]

မိဖုရားခေါင်ကြီးက ခပ်ဖွဖွ ချောင်းဟန့်လိုက်ပြီး သိမ်မွေ့စွာဖြင့် မိန့်ကြားခဲ့သည်။ “ဟွေ့ဖေး… ကောင်းကောင်း အနားယူပါ၊ လိုအပ်တာရှိရင် ပန်ကုန်းကို အချိန်မရွေး ပြောပါ”

“ကျေးဇူးတင်ပါတယ်… မိဖုရားခေါင်ကြီး” ယွီမြောင်ဟွာက ဆိုကာ သူမ၏ အားနည်းဟန်ဆောင်မှုကို ဆက်၍ထိန်းသိမ်းထားခဲ့၏။

ဆက်နေထိုင်ရန် အကြောင်းပြချက် မရှိတော့သည့်အပြင် ၎င်းတို့ သိရှိလိုသည်များကိုလည်း သိရှိသွားကြပြီဖြစ်သဖြင့် ထိုသူသုံးဦးသည် မကြာမီပင် ထွက်ခွာသွားကြတော့သည်။

မိဖုရားခေါင်ကြီးသည် ဧကရာဇ်နှင့် အကြည့်ချင်း ဖလှယ်လိုက်သည်—၎င်းတို့အနေဖြင့် ယွီမြောင်ဟွာ ရွေးချယ်လိုက်သော ကိုယ်စားလှယ်လောင်းများနှင့် ပတ်သက်၍ အသေးစိတ် ဆက်ဆွေးနွေးရန် လိုအပ်နေသေးသည်။

၎င်းတို့ ထွက်ခွာသွားပြီးနောက်တွင် ဝမ်ယနျဉ်သည် ယွီမြောင်ဟွာနှင့်အတူ နေထိုင်ပေးရန် ပြန်ရောက်လာခဲ့သည်။