အခန်း ၇၈၄

အခန်း ၇၈၄ - တိတ်ဆိတ်ခြင်းသို့ ကူးပြောင်းခြင်း

"သန့်စင်ဆရာသခင်က ကောင်းကင်ဘုံကို ဆန့်ကျင်တဲ့ နောက်ထပ် ကျမ်းစာတစ်ခုကို ရရှိသွားတာလား"

"ဒီအရှိန်အဝါက တကယ်ကို ကြောက်ဖို့ကောင်းတယ်..."

ထာဝရနယ်မြေရှိ အဆင့်မြင့် တရားကျင့်သူများမှာ ကုချင်းဖန်၏ တရားကျင့်ရာနေရာမှ ပေါ်ထွက်လာသော အရှိန်အဝါကို ခံစားမိလိုက်ကြသည်။ ထိုအရှိန်အဝါသည် ထာဝရပုဂ္ဂိုလ်များ၏ စိတ်ထဲတွင်ပင် တုန်လှုပ်ခြင်းကို ဖြစ်ပေါ်စေသည်။ မြင့်မြတ်နယ်မြေတွင် ဤမျှ အစွမ်းထက်သော သူမှာ ထိုသန့်စင်သောဆရာသခင် တစ်ဦးသာ ရှိသည်။

သို့သော် ဤအရှိန်အဝါမှာ မြန်မြန်ဆန်ဆန်ပင် ပျောက်ကွယ်သွားသည်။

အခြားတစ်ဖက်တွင်ကုချင်းဖန်၏ အာရုံစိုက်မှုအားလုံးသည် သူ၏ ခန္ဓာကိုယ်ထံတွင် ရှိသည်။

ကောင်းကင်ဘုံ သွေးကြော ကိုးခု။

စကြဝဠာ အစိတ်အပိုင်းများ ပေါင်းစည်းခြင်း။

၎င်းတွင် အလွန် ကြောက်မက်ဖွယ်ကောင်းသော စွမ်းအားများ ပေါင်းစပ်ထားသည်။

"ကိုးဆ တိုးမြှင့်မှု"

"တတိယအဆင့် ကောင်းကင်ဘုံပုဂ္ဂိုလ် အဆင့်ကို အဆင့်တက်နိုင်ရင်တော့ ကောင်းကင်အသူရာရဲ့ သခင်နဲ့ တိုက်ခိုက်တဲ့အခါ ပိုပြီး အခွင့်အရေး ရလာလိမ့်မယ်"

ကုချင်းဖန်သည် အနည်းငယ် ပြုံးလိုက်သည်။ ဤရလဒ်မှာ အလွန်ကောင်းမွန်လှသည်။ ပို၍ အရေးကြီးသည်မှာ 'ကောင်းကင်ဘုံ သွေးကြော ကျမ်းစာ' ကို ကိုယ်တိုင် နားလည်သဘောပေါက်ပြီး အဆင့်တက်နိုင်ခြင်းကြောင့် အဆင့်မြှင်တင်မှတ် ပေါင်း တစ်ရာဘီလီယံနီးပါးကို သက်သာသွားစေခြင်းပင် ဖြစ်သည်။

ပုံမှန်အားဖြင့်ဆိုလျှင် အဆင့်ရှစ်မှ အဆင့်ကိုးသို့ တက်လှမ်းရန် အမှတ် များစွာ လိုအပ်သည်။ ယခုမူ သူ့တွင် အမှတ် အနည်းငယ်သာ ရှိသဖြင့် ဤသို့ ကိုယ်တိုင် အဆင့်တက်နိုင်ခြင်းမှာ အလွန်ပင် ကံကောင်းလှသည်။ ဤလျှို့ဝှက်နည်းစနစ်မှာ သူ၏ အဓိက လက်နက်တစ်ခု ဖြစ်လာမည်မှာ အမှန်ပင်။

ထို့နောက်တွင် ကုချင်းဖန်သည် တရားကျင့်ခြင်းကို ဆက်လက် လုပ်ဆောင်သည်။ အရာအားလုံးမှာ အစီအစဉ်အတိုင်း တိုးတက်လာသည်။

ကုချင်းဖန်၏ ကျမ်းစာ အဆင့်တက်ပြီး ငါးရာမြောက် နှစ်တွင် ကုရွှမ်မှာ ကောင်းကင်ဘုံပုဂ္ဂိုလ် အဆင့်သို့ အောင်မြင်စွာ အဆင့်တက်နိုင်ခဲ့သည်။ ဤသို့ဖြင့် ကုမိသားစုတွင် ထာဝရပုဂ္ဂိုလ် ငါးဦး ရှိလာပြီဖြစ်သည်။

တစ်ထောင်မြောက် နှစ်တွင် ကုရှန်းလင်သည် တရားကျင့်ရာမှ ထွက်ပေါ်လာပြီး ဇီဝေ မသေမျိုးနယ်မြေ၏ ရှေ့တန်းသို့ ပြန်သွားသည်။

တစ်ထောင်နှစ်ရာမြောက် နှစ်တွင် ကုရှန်းလင်သည် တားမြစ်နယ်မြေ သခင်ကို တိုက်ပွဲတွင် သတ်ဖြတ်လိုက်သဖြင့် တစ်နယ်မြေလုံး တုန်လှုပ်သွားသည်။ အထက်နယ်ပယ်သို့ ရောက်ပြီး နှစ်ပေါင်းသုံးထောင် မပြည့်မီမှာပင် ဤသို့ စွမ်းဆောင်နိုင်ခြင်းမှာ အံ့အားသင့်စရာပင် ဖြစ်သည်။ ထို့ကြောင့် ကုရှန်းလင်မှာ နတ်ဆိုးနတ်ဘုရားမျိုးနွယ်၏ 'သတ်ဖြတ်ရန် စာရင်း' တွင် ပါဝင်သွားသည်။

သတင်းအချက်အလက် ပြားပေါ်တွင် စာသားများ ဆက်တိုက် ပေါ်လာသည်။

"သင်၏မျိုးဆက်'ကုရှန်းလင်' က တားမြစ်နယ်မြေ သခင်ကို အနိုင်ယူပြီး 'ချင်းဖန်' ကောင်းကင်ဘုံပုဂ္ဂိုလ်အဖြစ် ကျော်ကြားလာတယ်"

" သင်၏မျိုးဆက် 'ကုရှန်းလင်' က ဇီဝေ နယ်မြေရဲ့ ကောင်းကင်ဘုံဧကရာဇ်ရဲ့ အသိအမှတ်ပြုမှုကို ရရှိပြီး တရားကျင့်ခြင်း အရင်းအမြစ်များစွာကို ရရှိခဲ့တယ်"

" သင်၏မျိုးဆက် 'ကုရှန်းလင်' က နတ်ဆိုးနတ်ဘုရားမျိုးနွယ်ရဲ့ သတ်ဖြတ်ရန် စာရင်းတွင် ပါဝင်သွားခဲ့တယ်"

ကြာမြင့်လှသော နှစ်များအတွင်း အချက်အလက်များစွာ ပေါ်လာသည်။

'ကုယွန်ဖုန်း' သေဆုံးသွားကြောင်း သတင်းကို မြင်လိုက်ရသောအခါ ကုချင်းဖန်၏ အမူအရာမှာ ခေတ္တမျှ ရပ်တန့်သွားသည်။

ထို့နောက်တွင် သူသည် သက်ပြင်းတစ်ချက် ချလိုက်သည်။

"ကောင်းကင်ဘုံပုဂ္ဂိုလ် အဆင့်ကို မရောက်နိုင်ရင် အသက်ရှည်ဖို့ဆိုတာ တကယ်ကို ခက်ခဲတာပဲ"

တကယ်တော့ ကုမိသားစု၏ မျိုးဆက်များမှာ အလွန်များပြားနေပြီ ဖြစ်ရာ အချို့သော နာမည်များကိုပင် သူ မမှတ်မိတော့ပေ။ သို့သော် ကုယွန်ဖုန်းမှာမူ ကုမိသားစု၏ တတိယမျိုးဆက် ဖြစ်ပြီး သူသည် ကုချင်းဖန်နှင့် အကြိမ်ကြိမ် တွေ့ဆုံကာ လမ်းညွှန်ပေးခဲ့ရသူ ဖြစ်သည်။

ယခုအခါ နှစ်ပေါင်း လေးထောင်ကျော် ကုန်ဆုံးသွားပြီ ဖြစ်သည်။

ထာဝရပုဂ္ဂိုလ်များအတွက်မူ ဤအချိန်မှာ လက်ချောင်းတစ်ချောင်း၏ လှုပ်ရှားမှုမျှသာ ဖြစ်သည်။ သို့သော် သာမန် တရားကျင့်သူများအတွက်မူ တစ်ဘဝစာပင် ဖြစ်သည်။ အကယ်၍ ဂရုတစိုက် တွက်ချက်ကြည့်မည်ဆိုပါက ကုချင်းဖန်ကိုယ်တိုင်ပင် အသက် ခုနစ်ထောင်ကျော်နေပြီ ဖြစ်သည်။

ကုယွန်ဖုန်း မသေမျိုး ဆေးဝါးကို မသုံးစွဲရခြင်းမှာ ထိုဆေးဝါးမှာ အလွန် ရှားပါးသောကြောင့် ဖြစ်သည်။ ကုချင်းဖန်သည် တားမြစ်နယ်မြေများကို ဖျက်ဆီးပြီး ဆေးဝါးများစွာ ရရှိခဲ့သော်လည်း မိသားစုဝင်အားလုံးကို မပေးနိုင်ပေ။ သူသည် ဆေးဝါးအများစုကို ရွှီယူလန်အတွက်သာ သိမ်းဆည်းထားခဲ့သည်။ ဒုတိယမျိုးဆက်မှ အချို့သော သူများသာ ထိုဆေးဝါးကို ရရှိခွင့် ရှိကြသည်။